Malo o Mamalu

E ala ia Iesu Keriso ma Lana taulaga togiola, o le a toetutu ai tagata uma. A uma ona tatou toetutu, o le a tatou tutu i luma o le Alii ina ia faamasinoina e tusa ma o tatou manao ma galuega. O le mea lea o le a maua e i tatou taitoatasi se nofoaga e nofo ai e faavavau i se malo faapitoa o mamalu. E tolu malo o mamalu: o le malo selesitila, le malo terasitila, ma le malo telesitila.

Vaaiga Aoao

E ala i le Togiola a Iesu Keriso, o le a toetutu ai tagata uma. A uma ona tatou toetutu, o le a tatou tutu i luma o le Alii ina ia faamasinoina e tusa ma o tatou manaoga ma galuega. O le mea lea o le a maua e i tatou taitoatasi se nofoaga e nofo ai e faavavau i se malo faapitoa o mamalu. Na aoao mai e le Alii le mataupu faavae lenei ina ua Ia fetalai mai, “E tele mea e nonofo ai outou i le maota o Lo’u Tama” (Ioane 14:2).

E tolu malo o le mamalu: o le malo selesitila, le malo teresitila, ma le malo telesitila. O le mamalu tatou te mautofi ai o le a faalagolago lea i le loloto o lo tatou liua, na faaalia e ala i lo tatou usiusitai i poloaiga a le Alii. O le a faalagolago lea i le tulaga na tatou “taliaina [ai] le molimau ia Iesu” (Mataupu Faavae ma Feagaiga 76:51; tagai foi i le Mataupu Faavae ma Feagaiga 76:74, 79, 101).

Tusifaamaumau Ou Lagona Uunai

Malo Selesitila

O le malo selesitila o le malo aupito maualuga o malo e tolu o mamalu. O i latou e i lenei malo o le a nonofo e faavavau i le afioaga o le Atua le Tama ma Lona Alo o Iesu Keriso. E tatau ona avea lenei mea ma au sini: ia mautofi i le mamalu selesitila ma ia fesoasoani i isi ia maua foi lena faamanuiaga maoae. O se sini faapena e le mafai ona ausia i se taumafaiga se tasi; ae o le taunuuga o le amiotonu ma le tumau faamaoni i le faamoemoega i le olaga atoa.

O le malo selesitila o le nofoaga ua saunia mo i latou o e “na taliaina le molimau ia Iesu” ma ua “faaatoatoaina e ala ia Iesu le puluvaga o le feagaiga fou, o lē na faia lenei togiola ua atoatoa e ala i le faamaligiina o lona lava toto” (Mataupu Faavae ma Feagaiga 76:51, 69). Ina ia mautofi i lenei meaalofa, e tatau ona tatou maua sauniga o le faaolataga, tausi poloaiga, ma salamo ia tatou agasala. Mo se faamalamalamaga auiliili o i latou o le a mautofi i le mamalu selesitila, tagai i le Mataupu Faavae ma Feagaiga 76:50–70; 76:92–96.

Ia Ianuari 1836 sa maua ai e le Perofeta o Iosefa Samita se faaaliga vaaia lea na faalauteleina ai lona malamalama i tulaga manaomia ia mautofi ai i le mamalu selesitila. Sa tatalaina le lagi ia te ia, ma ia vaai ai i le malo selesitila. Sa maofa o ia ina ua ia vaai ai iina i lona uso matua o Alavini, e ui ina na maliu Alavini ae na te lei maua le sauniga o le papatisoga. (Tagai i le Mataupu Faavae ma Feagaiga 137:1–6.) Ona oo mai lea o le siufofoga o le Alii i le Perofeta o Iosefa:

“O i latou uma o e na maliliu e aunoa ma se malamalama e uiga i lenei talalelei, o e semanū latou te taliaina pe a na faatagaina i latou e ola, o le a avea ma suli o le malo selesitila o le Atua;

“O lenei foi o i latou uma o e e maliliu mai le taimi nei i luma e aunoa ma se malamalama e uiga i le talalelei, o e semanū latou te taliaina ma o latou loto atoa, o le a avea ma suli o lena malo;

“Aua o Aʼu, o le Alii, o le a faamasinoina tagata uma e tusa ma a latou galuega, e tusa ma le manaoga o o latou loto” (Mataupu Faavae ma Feagaiga 137:7–9).

Na saunoa le Perofeta o Iosefa Samita e uiga i lenei faaaliga, “Ma sa ou vaai foi o tamaiti uma o e e maliliu ae lei oo atu i latou i tausaga e tali mai ai ua faaolaina i le malo selesitila o le lagi” (Mataupu Faavae ma Feagaiga 137:10).

Mai i se isi faaaliga i le Perofeta o Iosefa, ua tatou iloa ai e tolu mamalu i totonu o le malo selesitila. Ina ia faaeaina i le tikeri aupito sili ona maualuga ma faaauau ai e faavavau i sootaga faaleaiga, e tatau ona tatou ulu atu “i le feagaiga fou ma tumau-faavavau o le faaipoipoga” ma ia faamaoni i lena feagaiga. I se isi faaupuga, o le faaipoipoga i le malumalu o se tulaga manaomia lea mo le mauaina o le tiekeri aupito maualuga o le mamalu selesitila. (Tagai i le Mataupu Faavae ma Feagaiga 131:1–4.) O i latou uma o e agavaa e ulu atu i le feagaiga fou ma tumau faavavau o le faaipoipoga o le a maua lena avanoa, a le o le olaga lenei po o le isi.

Malo Terasitila

O i latou o e mautofi i le mamalu terasitila o le a “mauaina luma o le Alo, ae lē o le atoatoa o le Tamā. O le mea lea, o i latou o ni tagata tino terasitila, ae lē o ni tagata tino selesitila, ma e ese i le mamalu e pei ona ese le masina mai le la” (Mataupu Faavae ma Feagaiga 76:77–78). I se faamatalaga masani, o tagata i le malo terasitila o ni tagata mamalu “o e na faatauasoina i le faitogafiti o tagata” (Mataupu Faavae ma Feagaiga 76:75). O le vaega lenei o le a aofia ai tagata o le Ekalesia o e sa “lei totoa i le molimau ia Iesu” (Mataupu Faavae ma Feagaiga 76:79). Ina ia aoao atili e uiga ia i latou o le a mautofi i le mamalu terasitila, tagai i le Mataupu Faavae ma Feagaiga 76:71-80, 91, 97.

Malo Telesitila

O le mamalu telesitila o le a faapolopoloina mo tagata o e sa “lē taliaina le talalelei a Keriso, po o le molimau ia Iesu” (Mataupu Faavae ma Feagaiga 76:82). O nei tagata o le a maua o latou mamalu pe a uma ona faaolaina mai le falepuipui o agaga, lea e taua i nisi o taimi o seoli (tagai i le Mataupu Faavae ma Feagaiga 76:84; Mataupu Faavae ma Feagaiga 76:106). O se faamalamalamaga auiliili o i latou o le a mautofi i le mamalu telesitila o le a maua i le Mataupu Faavae ma Feagaiga 76:81–90, 98–106, 109–112.

Malaia

O le a le agavaa nisi tagata e nonofo i soo se malo o mamalu. O le a taua i latou “o atalii o le malaia” ma o le a tatau ona “mau o ia i se malo e lē o se malo o le mamalu” (Mataupu Faavae ma Feagaiga 76:32; 88:24). O le a tulaga lea o le a i ai i latou “o e ua latou iloa [le] mana [o le Atua], ma sa faia ia latou mauaina, ma ua latou tuu i latou lava ia faatoilaloina e ala i le mana o le tiapolo, ma faafitia le upumoni ma tetee i [le] mana [o le Atua]” (Mataupu Faavae ma Feagaiga 76:31; tagai foi i le Mataupu Faavae ma Feagaiga 76:30, 32–49).