Tusi ma Lesona
Mataupu 46: O Le Faamasinoga Mulimuli

Mataupu 46

O Le Faamasinoga Mulimuli

Resurrected Christ with arms outstretched stands above a throng of people of all races and times, some prone, some standing. The people on the right side of Christ are in the attitude of worship. The people on the left side of Christ are in anguish. Scenes of ruin are in the foreground and background. The Washington D.C. temple is pictured in the upper left corner.

Faamasinoga a le Atua

  • O a nisi o faamasinoga eseese e oo mai ao lei faatinoina le Faamasinoga Mulimuli? E faapefea e nei faamasinoga uma ona fesootai le tasi i le isi?

Ua ta’u mai soo ia i tatou e tusitusiga paia, o le a oo mai le aso tatou te tutu ai i luma o le Atua ma faamasinoina. E manaomia ona tatou malamalama i le ala o le a fai ai le faamasinoga, ina ia tatou saunia lelei mo lenei taualumaga taua.

Ua aoao mai e tusitusiga paia ia i tatou o le a faamasinoina i tatou uma e tusa ma a tatou galuega: “Na [ou] iloa foi o e na oti, o tagatanuu atoa ma alii, o tutu i luma o le Atua, ona fofola lea o tusi: ua fofola foi ma le tasi tusi, o le tusi lea o le ola: ona faamasinoina ai lea o e na oti i mea ua tusia i tusi, e tusa ma a latou amio” (Faaaliga 20:12; tagai foi i le MFF 76:111; 1 Nifae 15:32; Aperaamo 3:25–28). O le a faamasinoina foi i tatou “e tusa ma manao o [tatou] loto” (MFF 137:9; tagai foi i le Alema 41:3).

Ua masani foi ona faamasinoina i tatou i le lalolagi, pe ua tatou agavaa mo le mauaina o avanoa i le malo o le Atua. Pe a papatisoina i tatou, e faamasinoina foi pe ua tatou agavaa mo le mauaina o lea sauniga. A valaauina i tatou e auauna atu i le Ekalesia pe faatalanoaina mo se siitaga i le perisitua po o le mauaina o se pepa faataga o le malumalu, ua faamasinoina foi i tatou.

Ua aoao mai Alema, pe a oo mai le oti ia i tatou, e tofia o tatou agaga e nonofo i le nofoaga o le fiafia po o le faanoanoa (tagai i le Alema 40:11–15). O se faamasinoga lea.

O Le A Faamasinoina i Tatou Ia Tatou Upu, Galuega, Ma Mafaufauga

  • Vaai faalemafaufau i le faamasinoina o oe mo ou manatu, o au upu, ma amioga uma.

Ua molimau mai le perofeta o Alema, “O a tatou upu e tausalaina ai i tatou, ioe, e tausalaina i tatou ia tatou galuega uma, … ae tausalaina i tatou i o tatou manatu” (Alema 12:14).

Ua fetalai mai le Alii, “O upu faatauvaa uma e faia e tagata, latou te talatala atu ai le tala i le aso faamasino. Aua o au upu e tauamiotonuina ai oe, o au upu foi e faasalaina ai oe” (Mataio 12:36–37).

E na o le faatuatua ia Iesu Keriso e mafai ai ona saunia i tatou mo le Faamasinoga Mulimuli. E ala i le avea ma soo faamaoni ia te Ia ma le salamo ia tatou agasala uma, e mafai ai ona faamagaloina i tatou mo a tatou agasala ma avea ma tagata mama ma paia ina ia mafai ai ona tatou mau i luma o le Atua. Pe a tatou salamo ia tatou agasala, ma lafoai manatu ma amioga le mama uma, o le a suia e le Agaga Paia o tatou loto ma o le a tatou le toe mananao e fai le agasala (tagai i le Mosaea 5:2). Ona faamasinoina ai lea o i tatou, ma o le a iloa ai pe ua saunia i tatou e ulufale atu i le afioaga o le Atua.

  • Mafaufau i mea e mafai ona e faia e faaleleia atili ai ou manatu, o au upu, ma amioga.

E Faamasinoina i Tatou i Tusifaamaumau

  • O a tusifaamaumau o le a faamasino mai ai i tatou? O ai o le a faamasinoina i tatou?

Fai mai le Perofeta o Iosefa Samita o le a faamasinoina ē ua oti i tusifaamaumau ua tausia i le lalolagi. O le a faamasinoina foi i tatou i mea ua tusia i le “tusi o le ola” ua tausia i le lagi (tagai i le MFF 128:6–8).

“E ao ina [outou] tutu i luma o le nofoa faamasino o Le Paia o Isaraelu, … ona faamasinoina ai lea o i latou i le faamasinoga paia a le Atua.’ (II Nifae 9:15.) Ma e tusa ai ma le faaaliga a Ioane, “Ona fofola lea o tusi: ua fofola foi ma le tasi tusi, o le tusi lea o le ola: ona faamasinoina ai lea o e ua oti i mea ua tusia i tusi, e tusa ma a latou amio.’ (Faaaliga 20:12.) O ‘tusi’ o loo ta’ua nei o tusi lava ia o ‘tala o a [outou galuega] ua tausia i le lalolagi. … O le tusi o le ola o le talafaamaumau lea e teuina i le lagi.’ (Mataupu Faavae ma Feagaiga 128:7.)” Aoaoga a Peresitene o le Ekalesia: Harold B. Lee [2000], 226–27).

O loo i ai se tasi tusi o le a faaaoga e faamasinoina ai i tatou. Ua aoao mai e le Aposetolo o Paulo, o le tagata lava ia, o le tusi lea ua sili ona atoatoa o lona lava olaga (tagai i le Roma 2:15). Ua teuina i o tatou tino ma o tatou mafaufau se talafaasolopito ua sili ona atoatoa o mea uma sa tatou faia. Sa aoao mai e Peresitene Ioane Teila lenei upu moni: “[E faamatala e le tagata lava ia] lona lava tala, ma molimau foi ia te ia lava. … O lena tala e tusia e le tagata lava ia i papatusi o lona mafaufau, le tala lena e le mafai ona pepelo o le a faaalia i le aso lena i luma o le Atua ma agelu, ma i latou o e o le a avea ma faamasino” (Deseret News, Mati 8, 1865, 179).

Ua aoao mai le Aposetolo o Ioane, “E le faamasino e le Tama se tasi, a ua tuu mai i le Atalii” (Ioane 5:22). O le a faapea foi ona valaaulia e le Alo isi e fesoasoani i le Faamasinoga. O le Toasefululua sa faatasi ma Ia i Lana galuega o le a latou faamasinoina ituaiga e sefululua o Isaraelu (tagai i le Mataio 19:28; Luka 22:30). O soo e toasefululua sa Nifae o le a faamasinoina tagata sa Nifae ma tagata sa Lamana (tagai i le 1 Nifae 12:9–10; Mamona 3:18–19).

O Le Tofia i se Nofoaga i se Malo o le Mamalu

  • O le a faapefea e lo tatou faamaoni i lo tatou olaga i le lalolagi ona uunaia o tatou olaga i le faavavau?

I le Faamasinoga Mulimuli, o le a tofia i tatou i se nofoaga i le malo ua tatou saunia i ai. Ua aoao i tatou e tusitusiga paia e uiga i malo e tolu o le mamalu—o le malo selesitila, o le malo terasitila, ma le malo telesitila (tagai i le MFF 88:20–32).

I le Mataupu Faavae ma Feagaiga 76, ua faamatala mai ai e le Alii ia ala e mafai ona tatou filifilia e ola ai i o tatou olaga faaletino. Na Ia faamalamalama mai, o filifiliga tatou te faia tatou te maua ai se tasi o ia malo ua tatou saunia i ai. Ua tatou iloa mai i lenei faaaliga, e oo i tagata o le Ekalesia, o le a eseese malo latou te maua, aua o le a le tutusa lo latou faamaoni ma le totoa i lo latou usiusitai ia Keriso.

O ituaiga ia o olaga e mafai ona tatou filifili tatou te ola ai, ma malo tatou te maua e tusa ma a tatou filifiliga.

Selesitila

“O i latou ia na talia le mau ia Iesu, ma talitonu i Lona suafa ma papatisoina,… ina ia fufuluina ma faamamaina i latou ia latou agasala uma i le tausia o poloaiga, ma maua le Agaga Paia.” O i latou ia na manumalo i le lalolagi e ala i lo latou faatuatua. O i latou ia ua amiotonu ma faamaoni ua mafai ai ona faamauina ia i latou e le Agaga Paia o latou faamanuiaga. (Tagai i le MFF 76:51–53.) O i latou o e mauaina le tikeri silisili ona maualuga o le malo selesitila, o e e avea ma atua, e tatau foi ona faaipoipoina mo le faavavau i le malumalu (tagai i le MFF 131:1–4). O i latou uma o e e mauaina le malo selesitila, o le a mafuta faatasi ma le Tama Faalelagi ma Iesu Keriso e faavavau (tagai i le MFF 76:62).

E ala i galuega tatou te faia i totonu o malumalu, ua mafai ai e tagata uma lava ua ola i le lalolagi ona maua avanoa tutusa e maua ai le atoatoaga o le talalelei ma sauniga o le faaolataga ina ia mafai ai ona latou maua se nofoaga i le tikeri e sili ona maualuga o le malo selesitila.

Terasitila

O i latou ia na teena le talalelei i le lalolagi, ae na latou talia mulimuli ane ai i le lalolagi o agaga. O i latou ia o tagata mamalu o le lalolagi, ae sa faatauasoina i latou i le talalelei a Iesu Keriso i le faitogafiti poto o tagata. O i latou foi ia sa latou mauaina le talalelei ma le molimau ia Iesu, ae sa latou le faamaoni i ai. O le a asia i latou e Iesu Keriso, ae le o lo tatou Tama Faalelagi. (Tagai i le MFF 76:73–79.)

Telesitila

O tagata ia e le i talia le talalelei po o le molimau ia Iesu i le lalolagi po o le lalolagi o agaga. O le a mafatia i latou ia latou lava agasala i seoli seia mavae le Meleniuma, pe a latou toe tutu mai. “O i latou ia o tagata pepelo, ma faataulaitu, ma e mulilulua, ma tane o e faitaaga soo i fafine talitane, ma e fiafia i le pepelo ma faia le pepelo.” O i latou ia ua pei o le tele o fetu i le lagi ma oneone o le matafaga. O le a asia i latou e le Agaga Paia, ae le o le Tama po o le Alo. (Tagai i le MFF 76:81–88, 103–6, 109.)

Fafo I Le Pogisa

O i latou ia sa latou maua le molimau ia Iesu e ala i le Agaga Paia ma sa latou iloa le mana o le Alii, ae sa latou tuu ia Satani ia manumalo ia i latou. Sa latou teena le upumoni ma teena le mana o le Alii. Ua leai se faamagaloga mo i latou, aua ua latou faafitia le Agaga Paia ina ua uma ona latou mauaina. O le a latou le maua se malo o le mamalu. O le a latou nonofo i le pogisa, puapuaga, faanoanoa, faatasi ma Satani ma ana agelu, i le faavavau. (Tagai i le MFF 76:28–35, 44–48.)

E Tatau Ona Tatou Sauni Nei mo le Faamasinoga

  • O a mea e mafai ona tatou faia ia saunia ai mo le Faamasinoga Mulimuli?

O le mea moni, o aso uma lava o se aso o le faamasinoga. Tatou te tautatala, mafaufau, ma galulue e tusa ai ma tulafono selesitila, terasitila, po o le telesitila. O lo tatou faatuatua ia Iesu Keriso, e pei ona faaalia i mea tatou te faia i aso taitasi, e fuafua i ai le malo o le a tatou mauaina.

Ua tatou maua le talalelei toefuataiina a Iesu Keriso i lona atoatoa. O le talalelei o le tulafono lea o le malo selesitila. Ua uma ona faaali mai sauniga uma o le perisitua e tatau mo lo tatou alualu i luma. Ua tatou tofu ifo i le vai o le papatisoga ma osia se feagaiga o le a tatou ola i ni olaga faaKeriso. Afai tatou te faamaoni ma tausia feagaiga sa tatou osia, ua uma ona ta’u mai e le Alii ia i tatou le taui o le a tatou mauaina. O le a Ia fetalai mai ia i tatou, “O mai ia, o outou ua faamanuiaina e lo’u Tama, ia fai mo outou tofi le malo na saunia mo outou ae lei faavaeina le lalolagi” (Mataio 25:34).

Mau Faaopoopo