Tusi ma Lesona
Mataupu 40: Galuega o le Malumalu ma Talafaasolopito o Aiga

Mataupu 40

Galuega o le Malumalu ma Talafaasolopito o Aiga

The east spires of the Salt Lake Temple with the Angel Moroni and clouds in the sky.

E Finagalo Lo Tatou Tama Faalelagi E Toe Foi Atu Lana Fanau Ia Te Ia

O le Togiola a Iesu Keriso ua maua ai e i tatou taitoatasi le faamaoniga o le a tatou toe tutu mai ma ola ai e faavavau. Peitai, afai e tatau ona tatou ola e faavavau ma o tatou aiga i le afioaga o le Tama Faalelagi, e ao ona tatou faia mea uma lava ua poloaiina ai i tatou e le Faaola ia tatou faia. E aofia ai i lenei mea le papatisoina ma le mauaina o sauniga o le malumalu.

I le avea ai ma tagata O Le Ekalesia a Iesu Keriso o le Au Paia o Aso e Gata Ai, ua uma ona papatisoina ma faamauina i tatou uma taitoatasi e se tasi o i ai le pule tatau o le perisitua. E tatau foi ia i tatou uma taitoatasi ona alu atu i le malumalu ia maua ai sauniga faaola o le perisitua e faia iina. Peitai, e toatele fanau a le Atua latou te lei maua nei avanoa tutusa. Sa ola i latou i se taimi po o se nofoaga e lei mafai ona maua ai e i latou le talalelei.

E finagalo le Tama Faalelagi i Lana fanau uma lava ia toe foi atu ma mau faatasi ma Ia. Mo i latou o e ua maliliu e aunoa ma le papatisoga po o sauniga o le malumalu, ua saunia e ia se ala e faataunuu ai ia sauniga. Ua Ia fetalai mai ia i tatou ia tatou faia ia sauniga mo o tatou tuaa i le malumalu.

Malumalu o le Alii

  • Aisea ua taua ai malumalu i o tatou olaga?

O Malumalu O Le Ekalesia a Iesu Keriso o Le Au Paia o Aso e Gata Ai o ni maota faapitoa ua faapaiaina mo le Alii. E mafai e tagata agavaa o le Ekalesia ona o atu i ai ma maua ai sauniga paia, ma osia ai feagaiga ma le Atua. E pei lava o le papatisoga, e taua ia sauniga ma feagaiga mo lo tatou faaolataga. E tatau ona faia ia sauniga i totonu o malumalu o le Alii.

Tatou te ulu atu foi i le malumalu e aoao atili ai e uiga i lo tatou Tama Faalelagi ma Lona Alo, o Iesu Keriso. Tatou te maua i le malumalu se malamalama e sili atu e uiga i lo tatou faamoemoe i le olaga ma lo tatou sootaga ma le Tama Faalelagi ma Iesu. E aoaoina ai i tatou e uiga i lo tatou muai olaga, e uiga i lo tatou olaga i le lalolagi, ma le olaga pe a mavae le oti.

O Sauniga o le Malumalu e Faamauina Ai Aiga e Faavavau.

  • O le a le uiga o le faamauina?

O sauniga uma lava o le malumalu e faia i le mana o le perisitua. E ala mai i lenei mana, e faamauina ai sauniga ua faia i le lalolagi, po o le faamauina ai foi i le lagi. Sa faapea ona aoaoina e le Faaola Lona Au Aposetolo, “O se mea foi e te fusifusia i le lalolagi, e fusifusia foi lea i le lagi” (Mataio 16:19; tagai foi i le MFF 132:7).

E na o malumalu lava e mafai ona faamauina ai i tatou o ni aiga e faavavau. O le faaipoipoga i le malumalu e mafai ai ona faatasia se alii ma se tamaitai e avea o le tane ma le ava e faavavau pe afai la te faamamaluina a laua feagaiga. O le papatisoga ma isi sauniga uma e saunia ai i tatou mo lenei faamoemoega paia.

Pe a faaipoipo se alii ma se tamaitai i le malumalu, e faapea foi ona avea a laua fanau o se vaega o lo laua aiga e faavavau. O ulugalii sa faaipoipoina faalemalo e mafai foi ona latou maua nei faamanuiaga i le saunia lea o i latou lava ma a latou fanau e o atu i le malumalu ma faamauina ai le tasi i le isi. E mafai e matua o e vaetamaina faaletulafono fanau ona faamauina na fanau ia i laua.

  • O le a le mea e tatau ona faia e se ulugalii e aoga ai le mana o le faamauga i la laua faaipoipoga?

E Manaomia E O Tatou Tuaa La Tatou Fesoasoani

  • O a o tatou tiutetauave i o tatou tuaa ua maliliu e aunoa ma le maua o sauniga faaleperisitua?

Sa faaipoipo Mario Cannamela ia Maria Vitta i le 1882. Sa nonofo i laua i le nuu o Tripani, Italia, sa ola ae ai lo laua aiga ma sa latou maua ai le fiafia i le tele o tausaga i mea sa latou faia faatasi. Sa lei faalogo Mario ma Maria i le savali o le talalelei toefuataiina a Iesu Keriso i le taimi ao ola i laua. Sa lei papatisoina i laua. Sa lei maua foi e i laua le avanoa e o atu ai i le malumalu e faamauina ai faatasi o se aiga e faavavau. Ina ua oo mai le oti, sa faamutaina ai foi la laua faaipoipoga.

I le sili atu i se selau tausaga mulimuli ane sa maua ai se faatasiga maoae. Sa o atu ai suli o Mario ma Maria i le Malumalu o Los Angeles, o iina sa tootutuli ai le atalii o suli o Mario ma lana ava i le fatafaitaulaga ma avea ai ma sui mo le faamauina o Mario ma Maria. Sa faatumuina o laua mata i loimata i lo laua lagonaina o le olioli o Mario ma Maria.

O le toatele o o tatou tuaa na maliliu i latou ae lei faalogo i le talalelei ao soifua i latou i le lalolagi. O loo i ai nei i latou i le lalolagi o agaga (tagai i le mataupu 41 i le tusi lenei). O iina ua aoaoina ai i latou i le talalelei a Iesu Keriso. O e ua latou talia le talalelei o loo faatalitali mo sauniga o le malumalu ina ia faia mo i latou. Ao tatou faia nei sauniga o le malumalu mo o tatou tuaa, e mafai ona tatou lagona lo latou olioli.

  • E faapefea ona faaali mai e le aoaoga faavae o le faaolataga mo e ua maliliu le faamasinoga tonu, le alofa loloto, ma le alofa mutimutivale o le Atua?

  • O a ni aafiaga ua e maua i lou faia o galuega faalemalumalu mo ou tuaa?

Talafaasolopito o Aiga—Le Ala e Amata Ai Ona Tatou Fesoasoani i o Tatou Tuaa

  • O a laasaga autu mo le faia o galuega faaletalafaasolopito mo aiga?

Ua uunaia le Au Paia o Aso e Gata Ai e auai i gaoioiga mo talafaasolopito o aiga. E ala mai i nei gaoioiga tatou te malamalama ai i o tatou tuaa ma o le a mafai ai ona tatou faia sauniga mo i latou. O le talafaasolopito o aiga e aofia ai laasaga faavae e tolu:

  1. Sailia o o tatou tuaa.

  2. Saili tuaa ua tatau ona faia sauniga faalemalumalu.

  3. Ia mautinoa ua faia sauniga mo i latou.

O le tele lava o uarota o loo i ai fautua mo talafaasolopito o aiga e mafai ona taliina fesili ma taitai atu i tatou i punaoa po o fesoasoani tatou te manaomia. Afai e leai se fautua mo talafaasolopito o aiga i le uarota, o le epikopo po o le peristene o le paranesi e mafai ona tuuina mai le taitaiga.

Sailia o o Tatou Tuaa

Ina ia faia sauniga o le malumalu mo o tatou tuaa, e tatau ona tatou iloa o latou igoa. E tele lava punaoa lelei o loo maua i ona po nei e fesoasoani ia i tatou e saili ai igoa o o tatou tuaa.

O le ala lelei e amata ai le faapotopotoina o faamatalaga e uiga i o tatou tuaa o le vaai lea po o a ni faamatalaga o loo maua i o tatou lava fale. Atonu o loo i ai ia i tatou ni pepa fanau, tusi faamaonia o faaipoipoga, po o pepa maliu. Atonu e mafai foi ona tatou maua Tusi Paia a le aiga, faamatalaga o e ua maliliu i nusipepa, talafaasolopito o aiga, po o tairi ma api o talaaga. E le gata i lea, e mafai foi ona fesili atu i tagata o o tatou aiga mo ni faamatalaga o i ai ia te i latou. Pe a maea ona aoina mai faamatalaga i o tatou aiga ma mai o tatou tuaa, e mafai ona tatou sailia isi punaoa, e pei o le FamilySearch.org. E mafai foi ona tatou asiasi atu i le fale o gafa o le Ekalesia i o tatou nuu.

O le tele o mea tatou te iloa o le a faalagolago lea i faamatalaga o loo mafai ona tatou mauaina. Atonu foi e itiiti lava se faamatalaga ua tatou maua o le aiga ma atonu foi e le mafai ona sili atu nai lo le sailia o o tatou matua ma matua o o tatou matua. Afai ua tatou maua se faapotopotoga tele o talafaamaumau faaleaiga, atonu o le a mafai ona tatou sailia tuaa mai tupulaga ua mamao atu i tua.

E mafai ona tatou tausia faamatalaga ua tatou faapotopotoina mai i pepa o ulugalii ma le fanau ma pepa o gafa.

Saili Po o Ai Tuaa ua Manaomia Ona Faia Sauniga Faalemalumalu

Sa faia sauniga o le malumalu mo e ua maliliu talu mai le amataga o le Ekalesia. O lea la, o nisi o sauniga mo o tatou tuaa atonu ua uma ona faia. Ina ia iloa po o ai tuaa e manaomia ona faia sauniga o le malumalu, e lua nofoaga e tatau ona tatou vaai i ai. O a tatou lava talafaamaumau faaleaiga atonu o i ai ni faamatalaga e uiga i galuega ua uma ona fai. A leai, o loo i ai i le Ekalesia le talafaamaumau o sauniga uma ua uma ona faia i le malumalu. E mafai ona fesoasoani le fautua mo talafaasolopito o aiga a le uarota po o le paranesi i lea taumafaiga.

Ia Mautinoa Ua Uma Ona Faia Sauniga

O le toatele o o tatou tuaa i le lalolagi o agaga atonu o loo naunau e fia maua o latou sauniga o le malumalu. O le taimi lava tatou te maua ai nei tuaa, e tatau loa ona faia le fuafuaga ina ia faia lenei galuega mo i latou.

O se tasi o faamanuiaga o galuega o le talafaasolopito o aiga e maua mai lea i le alu i le malumalu ma faia sauniga mo o tatou tuaa. E tatau ona saunia i tatou lava ia maua se pepa faataga o le malumalu, pe afai e mafai, e mafai ona tatou faia lea galuega. Afai ua sefululua tausaga pe sili atu le matutua o a tatou fanau, e mafai ona fetufaai i nei faamanuiaga i le papatisoina ma le faamauina mo o latou tuaa.

Afai e le mafai e i latou ona o atu i le malumalu e auai i le faia o ia sauniga, o le a faia e le malumalu le fuafuaga ina ia faia ia sauniga e isi tagata o le Ekalesia.

  • Ua faapefea ona fesoasoani le Alii ia te oe ma tagata o lou aiga e saili faamatalaga e uiga i ou tuaa?

Avanoa Faaopoopo i Talafaasolopito o Aiga

  • O a nisi o auala faigofie e mafai ai e se tasi e tele ni ona tiutetauave ona ia auai i le faia o galuega o talafaasolopito o aiga?

I le faaopoopo atu i le faia o sauniga o le malumalu mo tuaa ua tatou iloa, e mafai foi ona tatou fesoasoani atu ia te i latou i le lalolagi o agaga i le tele o isi ala. E tatau ona tatou saili atu le taitaiga a le Agaga ao tatou mafaufau ma le agaga tatalo i le mea e tatau ona tatou faia. E faalagolago i tulaga o loo feagai ma i tatou, e mafai ona tatou faia mea nei o loo taua i lalo.

  1. Auai i le malumalu i soo se taimi e mafai ai. Pe a uma ona tatou ulu atu i le malumalu mo i tatou lava, e mafai loa ona tatou faia sauniga o le faaolataga mo isi o loo faatalitali mai i le lalolagi o agaga.

  2. Faia sailiga ina ia maua ai tuaa o e faigata ona maua. O fautua o talafaasolopito o aiga e mafai ona taialaina i tatou i mea o loo maua ai punaoa.

  3. Fesoasoani i le polokalama Ekalesia o le sailia o igoa. O le polokalama lenei, e saunia ai e tagata o le Ekalesia ia faamatalaga o gafa mo le faaaogaina i polokalama faakomepiuta i le talafaasolopito o aiga o le Ekalesia. O nei polokalama e faigofie ai ia i tatou ona sailia o tatou tuaa.

  4. Tuuina atu faamatalaga o le talafaasolopito o aiga i le polokalama faakomepiuta a le Ekalesia o loo faaaogaina i le taimi lenei mo talafaasolopito o aiga. O loo i ai i ia polokalama ia gafa na tuuina mai e tagata mai le lalolagi atoa. E maua ai e tagata avanoa e fetufaai ai a latou faamatalaga faaleaiga. E mafai e fautua mo talafaasolopito o aiga ona tuuina atu isi faamatalaga e uiga i polokalama faakomepiuta a le Ekalesia.

  5. Ia auai i faalopotopotoga faaleaiga. E tele mea e mafai ona tatou faia mo o tatou tuaa pe a tatou galulue faatasi ma isi tagata o le aiga.

  • Mafaufau i mea e mafai ona e faia e faateleina ai lou auai i galuega faalemalumalu ma le talafaasolopito o aiga.

Mau Faaopoopo