Tusi ma Lesona
Mataupu 33: Galuega Faafaifeautalai

Mataupu 33

Galuega Faafaifeautalai

The resurrected Jesus Christ standing with the apostles outside the city of Jerusalem. Christ is dressed in white robes and has His arms extended as He speaks to the eleven apostles. Christ is commanding the apostles to preach the gospel to all nations. The city Jerusalem is visible in the background.

O Le Ekalesia a le Alii o se Ekalesia Talai

  • O a auala ua avea ai le galuega faafaifeautalai o se vaega o le fuafuaga a le Atua mo Lana fanau?

Sa faaali atu e le Alii ia Atamu le fuafuaga o le talalelei: “Sa faapea lava ona amata ona talai atu le talalelei mai le amataga” (Mose 5:58). I le taimi mulimuli ane, sa auina atu ai atalii amiotonu o Atamu e talai atu le talalelei i isi tagata i le lalolagi: “Sa latou valaau atu i tagata uma i nuu uma lava, ia salamo, ma sa latou aoao atu foi i le fanauga a tagata le faatuatua” (Mose 6:23).

Sa avea perofeta uma lava ma faifeautalai. Sa poloaiina i latou uma taitoatasi i ona lava aso ia talai atu le savali o le talalelei. Soo se taimi lava sa i ai le perisitua i le lalolagi, sa manaomia e le Alii ni faifeautalai latou te talai atu mataupu e faavavau o le talalelei i Ana fanau.

O le Ekalesia a le Alii o se ekalesia e talai i taimi uma. A o soifua le Faaola i le lalolagi, sa Ia faauuina Aposetolo ma Fitugafulu ma tuu atu ia i latou le pule ma le tiute e talai atu le talalelei. O le tele o a latou talaiga sa faia i o latou lava tagata, o tagata Iutaia (tagai i le Mataio 10:5–6). Ina ua mavae ona toetu mai o Iesu, sa Ia auina atu Aposetolo e talai le talalelei i Nuuese. Sa Ia poloai atu i Aposetolo, “O atu ia outou i le lalolagi uma, ina talai atu ai le talalelei i tagata uma lava” (Mareko 16:15).

O le Aposetolo o Paulo o se faifeautalai tautaua na auina atu i Nuuese. Ina ua liliu mai o ia i le Ekalesia, sa ia faaaoga le vaega na totoe o lona soifua e talai atu ai le talalelei i tagata o Nuuese. I le gasologa o taimi eseese o lana misiona, sa sasaina, ma fetogia, ma tuuina i le falepuipui. Peitai sa faaauau pea ona ia talai atu le talalelei (tagai i le Galuega 23:10–12; 26).

Sa toe amataina le galuega faafaifeautalai ina ua toefuatai mai le Ekalesia a le Alii, e ala mai i le Perofeta o Iosefa Samita. I ona po nei, ua tuuina atu i Aposetolo ma Fitugafulu le tiute autu mo le talaiga o le talalelei, ma ia mautinoa ua talai atu i le lalolagi uma. Sa fetalai atu le Alii ia Iosefa Samita: “Talai atu la’u talalelei i lea nuu ma lea nuu, i lea aai ma lea aai. … Molimau atu i nuu uma, i tagata uma” (MFF 66:5, 7). O Iuni 1830, na amata ai e Samuelu Harisona Samita, le uso o le Perofeta [o Iosefa Samita], le malaga muamua faafaifeautalai mo le Ekalesia.

Talu mai lena taimi, e afe ma afe faifeautalai ua valaauina ma auina atu e talai le talalelei. O le savali ua latou avatu i le lalolagi, e faapea o Iesu Keriso o le Alo o le Atua ma le Faaola o tagata. Ua latou molimau atu ua toefuatai mai le talalelei i le lalolagi e ala mai i se perofeta a le Atua. Ua tuu atu i faifeautalai le tiute e talai atu le talalelei i tagata uma, ma papatiso i latou, ma aoao i latou ia latou faia mea uma ua poloaiina ai e le Alii (tagai i le Mataio 28:19–20). O faifeautalai o le Au Paia o Aso e Gata Ai, ua o atu i vaega eseese o le lalolagi i a latou lava tupe, e talai atu le savali o le talalelei.

O Le A Talai Atu Le Talalelei i le Lalolagi Uma

  • O a nisi o auala eseese ua saunia e le Alii mo i tatou e faasoa atu ai le talalelei?

Ua ta’u mai i faaaliga i aso e gata ai, e ao ina tatou avatu le talalelei toefuataiina i nuu uma ma tagata uma (tagai i le MFF 133:37). E le tuuina mai e le Alii ia i tatou se poloaiga e aunoa ma Lona saunia o se ala mo i tatou e faataunuu ai (tagai i le 1 Nifae 3:7). Ua saunia e le Alii auala mo i tatou e aoao atu ai le talalelei i atunuu sa tapunia muamua ia i tatou. Ao faaauau pea ona tatou tatalo ma faaaoga le faatuatua, o le a tatalaina e le Alii isi malo i le galuega faafaifeautalai.

Ua faapea foi i le Alii ona “musuia mafaufau o tagata maoae e gaosia mea fou e faalautele ai le galuega a le Alii i ala e lei iloa muamua e lenei lalolagi” (Russell M. Nelson, “Computerized Scriptures Now Available,” Ensign, Aperila 1988, 73). O nusipepa, mekasini, televise, leitio, satelite, komepiuta, o le Initoneti, ma isi mea faapena ua aoga tele i le tuuina atu o le savali o le talalelei i le miliona ma miliona o tagata. O tatou o e ua maua le atoatoa o le talalelei e tatau ona tatou faaaogaina nei mea e faataunuu ai le poloaiga a le Alii: “Aua, e moni, e ao ina oo atu le leo mai lenei nuu i le lalolagi atoa, i tuluiga o le lalolagi—e ao ina talai atu le talalelei i tagata uma lava” (MFF 58:64).

  • O a ni auala ua e vaai o faaaoga lelei ai tekinolosi e faasoa atu ai le talalelei?

E Taua Le Galuega Faafaifeautalai

  • Aisea e taua ai le faalogo ma malamalama tagata taitoatasi i le talalelei?

“O lo tatou faamoemoe muamua lava lenei o se Ekalesia—o le laveai ma le faaeaina o agaga o le fanauga a tagata” (Ezra Taft Benson, i le Conference Report, Aperila 1974, 151; po o le Ensign, Me 1974, 104). Ua tatau ona i ai le galuega faafaifeautalai ina ia tuuina atu i tagata o le lalolagi le avanoa e faalogo ma talia ai le talalelei. E manaomia ona latou aoaoina le upu moni, liliu atu i le Atua, ma maua le faamagaloga mai a latou agasala.

E toatele o tatou uso ma tuafafine i le lalolagi ua faatauasoina i aoaoga sese a tagata ma ua “taofia mai le upu moni ona ua latou le iloa le mea e maua ai” (MFF 123:12). O le galuega faafaifeautalai tatou te aumai ai i latou i le upu moni.

Ua poloaiina i tatou e le Alii, “Ina galulue ia outou i lo’u tovine aua o le aso galue mulimuli— ia faia le toe valaau atu i e o nonofo i le lalolagi” (MFF 43:28). Ao tatou aoao atu le talalelei i o tatou uso ma tuafafine, ua tatou saunia le ala mo le Toe Afio Mai Faalua o le Faaola (tagai i le MFF 34:6)

E Tatau Ona Avea i Tatou Uma ma Faifeautalai

  • O a auala e mafai ona tatou saili ai ma le filiga ni avanoa e faasoa atu ai le talalelei i isi? O a ni auala e mafai ona saunia ai i tatou lava mo ia avanoa?

E tatau i tagata taitoatasi o le Ekalesia ona avea ma se faifeautalai. E tatau ona avea i tatou ma faifeautalai e tusa pe lei valaauina ma vaetofia i tatou. Ua ia i tatou le tiute o le aoao atu o le talalelei e ala i upu ma galuega i fanau uma a lo tatou Tama Faalelagi. Ua fetalai mai le Alii ia i tatou, “E tatau i tagata uma ua uma ona lapataiina ona lapatai i lona tuaoi” (MFF 88:81). Ua lapatai mai le perofeta ia i tatou e tatau ona tatou faaali atu i o tatou tuaoi tatou te alolofa ia i latou, ae tatou te lei lapatai atu ia i latou (tagai i le Aoaoga a Peresitene o le Ekalesia: Spencer W. Kimball [2006], 290). E manaomia ona latou lagona lo tatou faauo atu ma le faaaumea mai o i latou.

O atalii o Mosaea, sa latou talia ma le loto i ai lo latou tiute e aoao atu le talalelei. Ina ua latou liua mai i le Ekalesia, sa faatumuina o latou loto i le tiga alofa mo isi tagata. Sa latou mananao e talai atu le talalelei i o latou fili o tagata sa Lamana, “aua sa le mafafai i latou ona tuu le agaga e toatasi ia fano; ioe, o le manatu lava e tigaina se agaga e toatasi i le puapuaga e le iu, ua tete ai i latou ma gatete lava” (Mosaea 28:3). Ao faatumuina e le talalelei o tatou olaga i le olioli, o le a tatou lagona lenei tiga alofa ma le fia fesoasoani mo o tatou uso ma tuafafine. O le a tatou mananao e faasoa atu le savali o le talalelei i tagata uma e fia faalogo i ai.

E tele auala e mafai ona tatou talai atu ai le talalelei. O nisi nei o fautuaga:

  1. E mafai ona tatou faaali atu i uo ma isi le olioli ua tatou maua mai le ola ai i upu moni o le talalelei. O le ala lea e mafai ai ona avea i tatou ma malamalama i le lalolagi (tagai i le Mataio 5:16).

  2. E mafai ona tatou faatoilaloina lo tatou matamuli e ala i le faauo atu i isi ma le faia o mea lelei mo i latou. E mafai ona tatou fesoasoani atu ia i latou ia latou iloa ua tatou alolofa moni ia i latou, ae tatou te le o sailia se mea mo so tatou lava lelei.

  3. E mafai ona tatou faamatala atu le talalelei ia tatou uo lotuese ma isi.

  4. E mafai ona tatou valaaulia a tatou uo e fia malamalama atili i le talalelei i o tatou aiga, e aoaoina ai e faifeautalai. Afai e mamao a tatou uo lotuese, e mafai ona tatou auina atu se talosaga ia auina atu faifeautalai o loo i le eria o nonofo ai, e asiasi ia i latou.

  5. E mafai ona tatou aoao ia tatou fanau le taua o le avatu o le talalelei i isi, ma e mafai ona tatou saunia i latou faaleagaga ma mea tautupe e o atu ai i misiona. E mafai ona saunia i tatou lava e faamisiona i le taimi ua toeaiina ma olomatutua ai.

  6. E mafai ona totogi a tatou sefuluai ma foai atu i le tupe mo faifeautalai. E faaaoga nei foai mo le faalauteleina o le galuega faafaifeautalai.

  7. E mafai ona tatou foai atu i le tupe mo faifeautalai i le uarota, paranesi, po o le Ekalesia aoao e tuuina atu ai le fesoasoani tau tupe i faifeautalai e le mafai e o latou aiga ona totogi tupe latou te manaomia.

  8. E mafai ona tatou faia galuega o le sailiiliga o talafaasolopito o aiga ma galuega faalemalumalu, e fesoasoani ai i o tatou augatama ia maua le atoatoa o faamanuiaga o le talalelei.

  9. E mafai ona tatou valaaulia tagata lotuese i gaoioiga e pei o afiafi faaleaiga ma fiafia faale-Lotu, konafesi, ma sauniga lotu.

  10. E mafai ona tatou tuuina atu i ai kopi o mekasini a le Ekalesia. E mafai ona tatou faasoa atu savali o le talalelei e ala i le faaaogaina o vaega o loo maua i luga o saite aloaia a le Ekalesia i le Initoneti, LDS.org ma le Mormon.org.

O le a fesoasoani mai lo tatou Tama Faalelagi ia avea i tatou ma faifeautalai lelei, pe a tatou naunau e avatu i isi le talalelei, ma tatalo mo le taitaiga. O le a Ia fesoasoani mai ia i tatou ia tatou maua auala e avatu ai le talalelei i e o siomia ai i tatou.

  • Mafaufau i tagata e mafai ona e faasoa atu i ai le talalelei. Filifili auala o le a e faasoa atu ai le talalelei. Fuafua e faatuina se sini o se aso patino ia oo atu i ai ua e faasoa atu le talalelei i ia tagata.

Ua Folafola Mai E Le Alii Faamanuiaga Ia I Tatou mo le Faia o Galuega Faafaifeautalai

Sa ta’u atu e le Alii i le Perofeta o Iosefa Samita, o le a maua e faifeautalai faamanuiaga silisili. I se fetalaiga i toeaina o e ua foi mai ia latou misiona, na fetalai mai ai le Alii, “Ua faamanuiaina outou, aua ua tusia i le lagi le molimau na outou faia ina ia vaavaai i ai agelu; o loo olioli foi i latou ona o outou” (MFF 62:3). Na Ia fetalai mai foi o i latou o e galulue mo le faaolataga o isi o le a faamagaloina a latou agasala ma aumaia le olataga i o latou lava agaga (tagai i le MFF 4:4; 31:5; 84:61).

Ua fetalai mai le Alii ia i tatou:

“Afai foi e faapea ona [outou] galulue i o [outou] aso uma i le alagaina o le salamo i lenei nuu ma aumaia tau lava o se agaga e toatasi ia te a’u, faauta i le tele o lo outou olioli faatasi ma Ia i le malo o lo’u Tama!

“Ma o lenei, afai o le a tele lo outou olioli faatasi ma se agaga e toatasi ua [outou] aumai ia te a’u i le malo o lo’u Tama, faauta i le sili atu o lo outou olioli pe afai [tou] te aumai ni agaga [se] toatele ia te a’u!” (MFF 18:15–16).

  • O anafea na e lagonaina ai le olioli o le galuega faafaifeautalai?

Mau Faaopoopo

  • MFF 1:17–23 (ua poloaiina Iosefa Samita e talai atu)

  • MFF 24:12 (e faamalosia e le Alii o ē saili pea lava pea e folafola atu Lana talalelei)

  • MFF 38:41 (faasoa atu le talalelei i auala filemu ma le agamalu)

  • MFF 34:4–6; Galuega 5:42 (o le talalelei ia folafola atu)

  • MFF 60:1–2 (ua lapataia e le Alii i latou o e ua fefefe e talai atu le talalelei)

  • MFF 75:2–5 (o i latou o e folafola atu le talalelei ma ua faatuatua o le a faamanuiaina i le olaga e faavavau)

  • MFF 88:81–82 (O i latou o e ua lapataia e tatau ona lapataia o latou tuaoi)

  • Mataio 24:14 (ia talai atu le talalelei ao lei oo mai le iuga)

  • Aperaamo 2:9–11 (ia tuuina atu le talalelei ma le perisitua i nuu uma)