Tusi ma Lesona
Mataupu 7: O Le Agaga Paia

Mataupu 7

O Le Agaga Paia

Na Oo Mai Le Agaga Paia ia Atamu ma Eva

  • Aisea na manaomia ai e Atamu ma Eva le taitaiga a le Agaga Paia?

Ina ua tuua e Atamu ma Eva le Faatoaga o Etena, sa amata ona laua galueaiina le laueleele ma faia isi galuega la te ola ai. Sa maua e laua ni fanau e toatele ma sa faaipoipo foi o laua atalii ma afafine ma maua ni a latou fanau (tagai i le Mose 5:1–3). O le ala lea sa amata ai ona tuua e fanau agaga a lo tatou Tama Faalelagi Lona afioaga ae o mai i le lalolagi e pei ona folafola atu ia i latou (tagai i le Aperaamo 3:24–25) Ina ua latou o mai i le lalolagi, sa aveesea mai ia i latou le manatua o lo latou aiga i le lagi. Peitai sa le i tuuesea i latou e lo tatou Tama mai Lana uunaiga. Sa Ia auina mai le Agaga Paia e faamafanafana ma fesoasoani ma taitai Ana fanau agaga uma.

Sa valaau atu Atamu ma Eva i le Tama Faalelagi i le tatalo. Sa Ia fetalai mai ia i laua ma tuuina mai ia i laua poloaiga, lea sa la usiusitai i ai. Na oo mai se agelu a le Alii ma aoao mai ia Atamu ma Eva le ata o le faaolataga. Sa auina mai e le Alii le Agaga Paia e molimau i le Tama ma le Alo, ma aoaoina Atamu ma Eva i le talalelei. (Tagai i le Mose 5:4–9.)

O le mana o le Agaga Paia sa mafai ai e Atamu ona “amata ona ia perofeta ane e uiga i aiga uma o le lalolagi, ua faapea atu: Ia viia le suafa o le Atua, aua ua pupula o’u mata ona o la’u solitulafono, ma o le a ou maua le olioli i le olaga nei, ma o le a ou toe vaai i le Atua i le tino” (Mose 5:10). Ona o le molimau a le Agaga Paia ia Eva, sa ia faapea mai ai, “Ana le seanoa la ta solitulafono, semanu ta te le maua ni fanau, ma lē iloa le lelei ma le leaga, ma le olioli o le togiolaina o i taua, ma le ola e faavavau e tuuina mai e le Atua ia i latou uma o e usiusitai” (Mose 5:11).

  • E faapefea ona tutusa lo tatou manaomia o le taitaiga mai le Agaga Paia ma le manaomia e Atamu ma Eva?

Uiga o le Agaga Paia

  • O a tulaga e ese ai le Agaga Paia mai le Tama ma le Alo? Aisea e taua ai ia i tatou lena eseesega?

O le Agaga Paia o se tasi o le Aiga Atua (tagai i le 1 Ioane 5:7; MFF 20:28). O ia o se “peresona o Agaga” (MFF 130:22). Na o le tasi le nofoaga e mafai ona i ai o Ia i le taimi e tasi, a o Lona mana e mafai ona i ai i mea uma i le taimi e tasi.

O le Tama Faalelagi, Iesu Keriso, ma le Agaga Paia, ua ta’ua o le Aiga Atua. E tasi i latou i le faamoemoe. Ua tofu i latou taitoatasi ma se tofiga taua i le ata o le faaolataga. O lo tatou Tama Faalelagi o lo tatou Tama ma o Ia o le Pule. O Iesu Keriso o lo tatou Faaola. O le Agaga Paia, o Ia na te faaali mai mea, ma molimau i mea moni uma.

O le Agaga Paia o le avefeau a lo tatou Tama Faalelagi ma o Ia o se meaalofa faapitoa ia i tatou (tagai i le mataupu e 21 i le tusi lenei).

O Le Misiona a le Agaga Paia

  • O a nisi o upu moni e faaali mai e le Agaga Paia ia i tatou?

O le misiona a le Agaga Paia o le molimau i le Tama ma le Alo ma mea moni uma lava.

E molimau mai e le Agaga Paia ia i tatou o Iesu o lo tatou Faaola ma le Togiola (tagai i le 3 Nifae 28:11; MFF 20:27). Na te faaali mai ia i tatou o lo tatou Tama Faalelagi, o le Tama lea o o tatou agaga. E fesoasoani mai ia i tatou ia tatou malamalama e mafai ona faaeaina i tatou e pei o lo tatou Tama Faalelagi. (Tagai i le Roma 8:16–17.) Na folafola mai e perofeta a le Alii, “O le mana foi o le Agaga Paia tou te iloa ai le tonu i mea uma lava” (Moronae 10:5).

A aunoa ma le Agaga Paia, e le mafai ona tatou iloa o Iesu o le Keriso. Ua tusia e le Aposetolo o Paulo e faapea, “E leai foi se tasi na te mafaia ona ta’ua o Iesu o le Alii, a le se anoa le Agaga Paia” (1 Korinito 12:3). Na fetalai mai foi le Faaola lava Ia, “O le ola e faavavau foi lenei, ia latou iloa oe le Atua moni e toatasi, atoa ma Le ua E auina mai, o Iesu Keriso lea” (Ioane 17:3). O le mana o le Agaga Paia e taitaia i tatou ia malamalama ma ola i le talalelei a Iesu Keriso.

Ua matua malosi lava le mana faatalitonu o le Agaga Paia, e leai lava se masalosalo i le moni o mea Na te faaali mai ia i tatou. Sa saunoa mai Peresitene Iosefa Filitia Samita:

“A maua e se tagata se faaaliga mai le Agaga Paia, e matua ootia ai lava lona agaga e le galo ai, o se mea e faigata ona titina ese. O le Agaga lea ua tautala mai i le agaga, ma e oo mai ma se mana malosi e talitonu ai. O se faaaliga mai o se agelu, po o le Alo foi o le Atua lava Ia, e maofa ai mata ma le mafaufau, ma e oo lava ina toe mavae atu, a o uunaiga a le Agaga Paia e magoto ifo i le ta’ele o le agaga ma ua sili atu ona faigata ona titina ese” (Answers to Gospel Questions, tuufaatasia e Joseph Fielding Smith Jr., 5 voluma. [1957–66], 2:151).

Na saunoa mai foi Peresitene Samita, “E ala mai i le Agaga Paia e ulu atu ai le upu moni i musele ma uaua tetele uma o le tino ina ia le mafai ona galo” (Doctrines of Salvation, comp. Bruce R. McConkie, 3 voluma. [1954–56], 1:48).

I le avea ma tagata O Le Ekalesia a Iesu Keriso o le Au Paia o Aso e Gata Ai, e tatau ona faaagavaaina i tatou lava e talia lenei avefeau ma le molimau faapitoa i lo tatou Tama Faalelagi ma Iesu Keriso.

  • Mafaufau i taimi ua fesoasoani ai le Agaga Paia ia te oe ia e tupu ma ola i lau molimau. Pe a talafeagai ai, faasoa atu nisi o ou aafiaga ia i tagata o le vasega po o le aiga.

Mau Faaopoopo

Lolomi