Tusi ma Lesona
Mataupu 38: Faaipoipoga e Faavavau

Mataupu 38

Faaipoipoga e Faavavau

An African couple on the grounds of the Accra Ghana Temple. Taken in Ghana, West Africa.

O Le Faaipoipoga ua Faauuina e le Atua.

O le faaipoipoga i le va o le alii ma le tamaitai o se vaega taua o le fuafuaga a le Atua. Ua fetalai mai le Alii, “O sē faasa i le faaipoipoina e lei faauuina lea e le Atua, aua o le faaipoipoga e faapaiaina lea e le Atua i tagata” (MFF 49:15). Talu mai lava le amataga, o le faaipoipoga o se tulafono o le talalelei. Sa fuafuaina le faaipoipoga ia tumau e faavavau, ae le na o lo tatou olaga faaletino.

Sa faaipoipoina Atamu ma Eva e le Atua ae lei i ai le oti i le lalolagi. O la laua faaipoipoga, o se faaipoipoga e faavavau. Sa la aoao atu lenei tulafono ia la fanau ma fanau a a la’ua fanau. Ao gasolo pea tausaga, sa oo mai le amioleaga i loto o tagata, ma sa aveesea ai mai le lalolagi le pule sa fai ai lenei sauniga. Ae ua toefuatai mai le faaipoipoga e faavavau i le lalolagi, e ala mai i le Toefuataiga o le talalelei.

  • Aisea ua taua ai le iloa ua faauuina e le Atua le faaipoipoga i le va o se alii ma se tamaitai?

E Taua Le Faaipoipoga e Faavavau mo le Faaeaga

  • O le a le mataupu faavae a le Alii o le faaipoipoga, ma e faapefea ona ese mai manatu o le lalolagi?

E toatele tagata i le lalolagi ua manatu o le faaipoipoga ua na o se tu tau i aga fesootai, ma na o se ioega faaletulafono i le va o se alii ma se tamaitai e nonofo faatasi ai. Ae i le Au Paia o Aso e Gata Ai, o le faaipoipoga ua sili atu nai lo lena. Ua faalagolago lo tatou faaeaga i le faaipoipoga, faatasi ai ma isi mataupu faavae ma sauniga, e pei o le faatuatua, papatisoga, ma le taliaina o le meaalofa o le Agaga Paia. Ua tatou talitonu o le faaipoipoga o le sootaga sili lea ona paia e mafai ona i ai i le va o se alii ma se tamaitai. O lenei sootaga paia e aafia ai lo tatou fiafia i le taimi nei ma le faavavau.

Ua tuuina mai e le Tama Faalelagi ia i tatou le tulafono o le faaipoipoga e faavavau, ina ia mafai ai ona avea i tatou e pei o Ia. Ua fetalai mai le Alii:

“I le mamalu selesitila, e i ai lagi po o tikeri e tolu;

“E ao foi i se tagata ina ulu [atu] i lenei faatulagaga o le perisitua [o lona uiga o le feagaiga fou e faavavau o le faaipoipoga] ina ia na maua le tulaga aupito i luga;

“Afai foi na te le faia faapea, na te le mafai ona maua” (MFF 131:1–3).

E Tatau Ona Faia Le Faaipoipoga e Faavavau i le Pule Tatau i le Malumalu

  • Aisea e tatau ai ona faia se faaipoipoga i le pule tatau i le malumalu ina ia faavavau ai?

O se faaipoipoga e faavavau e ao lava ina faia e se tasi ua umia le mana o faamauga. Ua folafola mai e le Alii, “Afai e faaipoipo le tane i le ava … i le feagaiga fou ma le faavavau, … e le ua faauuina, … ma afai [la]te tumau i [le] feagaiga [a le Alii],… o le a faatumauina atoatoa foi pe a o ese atu i laua mai le lalolagi” (MFF 132:19).

Ua le gata ina tatau ona faia le faaipoipoga e faavavau e se tasi ua i ai le pule tatau o le perisitua, ae tatau foi ona faia i se tasi o malumalu paia o lo tatou Alii. O le malumalu ona pau lea o le nofoaga e mafai ona faia ai lenei sauniga paia.

I le malumalu, e tootutuli faatasi ai ulugalii o le au Paia o Aso e Gata Ai i se tasi o fata faitaulaga paia, i luma o o latou aiga ma uo o e ua maua o latou faaeega paia. La te osia ai a laua feagaiga o le faaipoipoga i luma o le Atua. Ona taua lea o i laua o le tane ma le ava mo le olaga nei ma le faavavau atoa. E faia lenei sauniga e se tasi ua umia le perisitua paia a le Atua, ma ua i ai le pule faapitoa na te faia ai lenei sauniga paia. E galue lenei uso i lalo o le taitaiga a le Alii, ma folafola atu i le ulugalii faamanuiaga o le faaeaga. Na te faatonuina i laua i mea e ao ina la faia e maua ai ia faamanuiaga. Na te faamanatu atu ia i laua, o faamanuiaga uma e faalagolago i le usiusitai i tulafono a le Atua.

Afai e faaipoipoina i tatou i se isi pule e ese mai le pule o le perisitua i se malumalu, o lena faaipoipoga, ua mo na o le olaga nei. A mavae le oti, e leai se aia a le ulugalii o le tasi i le isi po o a laua fanau foi. O le faaipoipoga e faavavau, tatou te maua ai le avanoa e mafuta ai pea o ni aiga, pe a mavae le olaga nei.

Faamanuiaga o se Faaipoipoga e Faavavau

  • O a faamanuiaga o se faaipoipoga e faavavau i le olaga lenei ma le faavavau?

I le avea ai ma Au Paia o Aso e Gata Ai, ua tatou ola mo le faavavau, ae le mo na o le taimi nei. E ui i lea, e mafai ona tatou maua faamanuiaga i le olaga lenei o se taunuuga o le faaipoipo ai e faavavau. O nisi nei o na faamanuiaga:

  1. Tatou te iloa e mafai ona tumau e faavavau a tatou faaipoipoga. Na o sina taimi puupuu e tuu eseese ai i tatou e le oti. E leai se mea e mafai ona tuueseeseina i tatou e faavavau, sei vagana ai lo tatou lava le usiusitai. E fesoasoani lenei malamalama ia i tatou e matua galulue tele ai ina ia maua ni faaipoipoga fiafia ma faamanuiaina.

  2. Tatou te iloa e mafai ona faaauau pea a tatou sootaga faaleaiga i le faavavau atoa. E fesoasoani lenei malamalama ia i tatou e faaeteete ai i le aoaoina ma le koleniina o a tatou fanau. E fesoasoani foi ia i tatou e faaali atu ai ia i latou le onosai ma le alofa tele. O lona taunuuga, tatou te maua ai se aiga e sili ona fiafia.

  3. Talu ai ua faaipoipoina i tatou i le auala faauuina a le Atua, ua tatou agavaa ai mo le liligi mai o le Agaga i luga o a tatou faaipoipoga pe afai tatou te tumau i lo tatou agavaa.

O nisi nei o faamanuiaga e mafai ona tatou maua e faavavau:

  1. E mafai ona tatou ola i le vaega po o le tikeri sili ona maualuga o le malo selesitila o le Atua.

  2. E mafai ona faaeaina i tatou e pei o le Atua, ma maua le atoaga o le olioli.

  • E mafai faapefea e se vaaiga i le faavavau ona uunaia o tatou lagona e uiga i faaipoipoga ma aiga?

E Ao Ona Saunia i Tatou mo se Faaipoipoga e Faavavau

  • O a ni mea e mafai ona tatou faia e fesoasoani ai i tupulaga talavou e sauniuni mo faaipoipoga e faavavau?

Na aoao mai Peresitene Spencer W. Kimball: “O le faaipoipoga atonu o le filifiliga aupito sili lea ona taua o filifiliga uma, ma e aupito o’oo’o foi ona aafiaga, aua e le gata ina maua ai le fiafia i le taimi nei, ae faapea foi ona maua ai le olioli i le faavavau. E le gata ina aafia ai tagata e toalua o loo faatasi ai, ae faapea foi o laua aiga aemaise lava a la fanau ma fanau a a laua fanau ma faasolo mai ai i le tele o augatupulaga. I le filifiliga la o se soa mo le olaga nei ma le faavavau, e mautinoa lava e tatau ona faia ia fuafuaga, mafaufauga, tatalo ma anapogi aupito sili ona mae’ae’a, ina ia mautinoa ai [e] ui lava i filifiliga uma, o le filifiliga lenei e le tatau lava ona sese” (Aoaoga a Peresitene o le Ekalesia: Spencer W. Kimball [2006], 216–217).

E tatau ona avea le faaipoipoga e faavavau ma sini a tagata uma o le Au Paia o Aso e Gata Ai. Ua tonu foi lena mea mo tagata ua faaipoipo i le tulafono a le malo. O le sauniuni mo le faaipoipoga e faavavau, e manaomia ai le manatunatu loloto ma le tatalo. Na o tagata o le Ekalesia o e ola amiotonu, e faatagaina e ulu atu i le malumalu (tagai i le MFF 97:15–17). E le mafai ona tatou filifili faafuasei i se aso tatou te fia faaipoipo i le malumalu, ona tatou ulu atu loa lea i le malumalu i lena aso ma faaipoipo ai. E i ai mea faapitoa e ao ina tatou faia muamua.

Ao lei ulu atu i tatou i le malumalu, e tatau ona avea i tatou ma tagata toaaga ma agavaa o le Ekalesia mo se vaitaimi ia le itiiti mai i le tausaga e tasi. E tatau i alii ona maua le Perisitua Mekisateko. E ao ina faatalanoaina i tatou e le peresitene o le paranesi po o le epikopo. Afai tatou te agavaa, o le a ia tuu mai ia i tatou se pepa faataga o le malumalu. Afai tatou te le agavaa, o le a ia fautuaina i tatou ma fesoasoani mai ia te i tatou e fuafuaina sini ia agavaa ai e ulu atu i le malumalu.

A tatou maua loa se pepa faataga o le malumalu mai lo tatou epikopo po o le peresitene o le paranesi, e tatau ona sainia lena pepa faataga e se tasi o le au peresitene o le siteki po o le peresitene o le misiona. I le faatalanoaga mo le pepa faataga o le malumalu, e fesili mai ia i tatou i fesili faapenei:

  1. Pe e te faatuatua ma e talitonu i le Atua, Le Tama Faavavau, ma Lona Alo, o Iesu Keriso; ma le Agaga Paia? Po o ia te oe se molimau mausali o le talalelei toefuataiina?

  2. Pe e te lagolagoina le Peresitene o le Ekalesia a Iesu Keriso o le Au Paia o Aso e Gata Ai, o le perofeta, tagatavaai, ma talifaaaliga? Pe e te talia o ia o le tagata e toatasi i le lalolagi ua tuuina i ai le pule e faaaoga ai ki uma o le perisitua?

  3. Po o e ola i le tulafono o le legavia?

  4. Po o totogi atoa lau sefuluai?

  5. Po o e tausia le Upu o le Poto?

  6. Po o e faamaoni atoatoa i au mea e fai i le va ma isi tagata?

  7. Po o e taumafai e tausia feagaiga ua e faia, ma auai i sauniga faamanatuga ma lotu perisitua, ma tausia lou olaga ia ogatasi ma tulafono ma poloaiga o le talalelei?

Pe a e talosaga atu mo se pepa faataga o le malumalu, ia e manatua o le ulu atu i le malumalu o se avanoa paia. O se mea mamafa, ae le o se mea e manatu māmā i ai.

E ao ina tatou matua usiusitai i feagaiga uma tatou te osia i le malumalu. Ua fetalai mai le Alii, afai tatou te tumau ma faamaoni, o le a tatou ulufale atu i lo tatou faaeaga. O le a avea i tatou faapei o lo tatou Tama Faalelagi. (Tagai i le MFF 132:19–20.) O le faaipoipoga i le malumalu ua tatau i ai le ositaulagaina o mea uma. O le faaipoipoga i le malumalu o se ala lea e maua ai faamanuiaga e faavavau e le mafuatia.

  • O a ni mea e ao ina tatou faia e faamalosiau atu ai i tagata talavou e faatu se sini ia faaipoipo i le malumalu? E faapefea ona tatou fesoasoani ia i latou ia saunia mo le faaipoipoga i le malumalu?

Mau Faaopoopo