Mataupu 32

Sefuluai Ma Taulaga

Totogiina o Sefuluai ma Taulaga

• E faapefea ona faaali atu e lo tatou naunau e totogi sefuluai ma taulaga le agaga faafetai i lo tatou Tama Faalelagi mo Ana faamanuiaga uma ia i tatou?

Ua tuuina mai ia i tatou poloaiga e fesoasoani e saunia ai i mea uma tatou te ola ai i luma o lo tatou Tama Faalelagi. Ua Ia tuuina mai ia i tatou se ala tatou te faafetai atu ai ia te Ia mo o tatou faamanuiaga. O lo tatou totogi ma le loto i ai o sefuluai ma taulaga, o se tasi lea o ala tatou te faafetai atu ai ia te Ia. A tatou totogi atu ia taulaga, ua tatou faaali atu i le Faaola tatou te alolofa ia te Ia, ma o le a tatou usiusitai i Lana fautuaga.

• O a auala e fesoasoani ai ia i tatou lo tatou totogiina o sefuluai ma taulaga e avea ai faapei o lo tatou Tama Faalelagi?

O Le Usiusitai i le Tulafono o le Sefuluai

• O le a le sefulai faamaoni?

Mo faiaoga: Faaaoga fesili i le amataga o se vaega e amata ai se talanoaga ma faamalosia ai tagata o le vasega po o tagata o le aiga e faaaoga le tusi lesona e saili ai faamatalaga faaopoopo. Faaaoga fesili i le faaiuga o se vaega e fesoasoani ai i tagata o le vasega po o tagata o le aiga e mafaufau loloto ai ma talanoaina le uiga o mea ua latou faitauina ma faaaoga ai i o latou olaga.

I aso anamua, sa usiusitai Aperaamo ma Iakopo i le poloaiga e totogi atu le sefuluai o le tasi vae sefulu o a latou mea ua maua (tagai i le Eperu 7:1–10; Kenese 14:19–20; 28:20–22).

I ona po nei, sa tatalo atu le Perofeta o Iosefa Samita, “Le Alii e, faaali mai i Au auauna le vaega o mea a Lou nuu E te finagalo i ai mo le sefuluai” (MFF 119, faatomuaga o le mataupu). Sa tali mai le Alii: “O le a faia lenei mea ma amataga o le sefuluai a lo’u nuu. A mavae lea, o i latou ua totogiina le sefuluai o le a totogi atu le tasi vae sefulu o a latou mea uma e maua i tausaga taitasi; o le a faia foi lenei mea ma tulafono tumau ia te i latou e faavavau” (MFF 119:3–4). Ua faamalamalama mai e le Au Peresitene Sili o le “tasi vae sefulu o a latou tupe faaopoopo uma i tausaga taitasi” e faatatau lea i o tatou totogi o galuega (tagai i le tusi a le Au Peresitene Sili, 19 Mati, 1970).

A totogi a tatou sefuluai, ua tatou faaali atu lo tatou faamaoni i le Alii. Tatou te aoaoina foi a tatou fanau i le taua o lenei tulafono. O le a latou fia mulimuli ia tatou faataitaiga, ma o le a latou totogi le sefuluai i soo se tupe latou te maua.

• O a ni auala ua sili ai le avea o le sefuluai ma mataupu faavae o le faatuatua nai lo se mataupu faavae tau tupe?

• O a ni mea e mafai ona faia e matua e aoao ai a latou fanau e totogi a latou sefuluai ma malamalama i lona taua tele?

E Tatau Ona Tatou Foai atu Ma Le Loto I Ai

• Aisea e taua ai o tatou uiga faaalia a o tatou totogiina a tatou sefuluai?

E taua tele le foai atu ma le loto i ai. “A totogi e le tagata lana sefuluai e aunoa ma le fiafia i ai, ua faoa mai ia te ia se vaega o le faamanuiaga. E ao ina ia aoao e foai atu ma le fiafia, loto i ai, ma le olioli, ona faamanuiaina ai lea o lana meaalofa” (Stephen L Richards, The Law of Tithing [tamai tusi, 1983], 8).

Sa aoao mai e le Aposetolo o Paulo le taua o le ala tatou te foai atu ai, e pei o le taua o le mea ua tatou foai atu. Fai mai a ia, “Ia taitoatasi ma foai e pei ona filifili i lona loto; aua ma le tiga, aua foi ma le faatauanauina; auā e alofa le Atua i le ua foai ma le loto malie” (2 Korinito 9:7).

• O le a le uiga ia te oe o le avea ma “tagata foai fiafia”?

Sefuluai ma Isi Taulaga

• O a ni auala o loo faaaogaina ai e le Ekalesia tupe o sefuluai ma isi taulaga?

I le avea ai ma tagata o le Ekalesia, tatou te tuuina atu sefuluai ma isi taulaga i le Alii.

Sefuluai

Ua faaaogaina e le Ekalesia le sefuluai mo faamoemoega e tele. O nisi o ia faamoemoega e:

1. Fausia, tausia, ma faagaoioia ai malumalu, falelotu, ma isi fale.

2. Tuuina atu ai tupe e faagaoioi ai siteki, uarota, ma isi iunite o le Ekalesia. (E faaaoga e iunite nei tupe e faatinoina ai polokalama faalelotu a le Ekalesia, e aofia ai le aoaoina atu o le talalelei ma le faatinoina o gaoioiga o aga fesootai.)

3. Fesoasoani i le polokalama faafaifeautalai.

4. Aoaoina ai tupulaga talavou i aoga a le Ekalesia, seminare, ma inisitituti.

5. Lolomi ma faasalalau atu ai tusi lesona.

6. Fesoasoani atu ai i talafaasolopito o aiga ma galuega o le malumalu.

Isi Taulaga

Taulaga Anapogi E anapopogi tagata o le Ekalesia i masina taitasi, i lo latou lē aai lea ma lē feinu mo ‘aiga sosoo e lua. Latou te tuuina atu se aofai a itiiti mai o le aofai lea o le tupe na semanu latou te faaaogaina mo ‘aiga e lua. E mafai ona latou lima foai ma le agalelei e tusa ma le mea latou te mafaia. Ua ta’ua lenei taulaga o le taulaga anapogi. E faaaoga e epikopo nei taulaga anapogi e faatau ai meaai, fale, lavalava, ma togafitiga faafomai mo i latou o e le tagolima. (Tagai i le mataupu 25 i le tusi lenei.)

O se vaega o le aso anapogi le auai o tagata o le Ekalesia i se sauniga ua taua o le sauniga anapogi ma le lotu molimau, lea e fetufaai ai a latou molimau o le tasi i le isi e uiga ia Keriso ma Lana talalelei.

Isi Foai. E foai atu e tagata o le Ekalesia tupe i isi galuega a le Ekalesia, e pei o le galuega faafaifeautalai, le Tupe Faaagaga mo Aoga, o le fausiaina o malumalu, ma le fesoasoaniga i tagata puapuagatia o le lalolagi.

Auauna Atu E ofoina atu e tagata o le Ekalesia o latou taimi, tomai, ma oloa e fesoasoani ai i isi tagata. O lenei auaunaga ua mafai ai e le Ekalesia ona fesoasoani atu i tagata matitiva o le Ekalesia ma isi e le auai i le Ekalesia i le lalolagi i nuu taitasi, i malo, ma le va o malo, aemaise lava pe a tulai mai ni mala.

E Faamanuiaina I Tatou Pe A Tatou Foai Atu Sefuluai Ma Taulaga

Ua folafola mai e le Alii Na te faamanuiaina i tatou pe afai tatou te totogi ma le faamaoni a tatou sefuluai ma taulaga. Ua Ia fetalai mai, “Ina aumai ia mea e sefuluai ai a outou mea uma lava i le fale e tuu ai mea ina ia i ai mea e ai i lo’u fale ma ia outou tofotofo mai ia te a’u i lenei mea, … pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele” (Malaki 3:10).

Ua ta’u mai i faaaliga i aso e gata ai se tasi o faamanuiaga mo i latou o e totogi sefuluai: “E moni o le aso o le taulaga, ma o le aso e sefuluai ai lo’u nuu; aua o lē faia sefuluai o le a le susunuina i lona oo mai” (MFF 64:23).

O faamanuiaga ua folafola mai ia i tatou, e faaletino ma faaleagaga. Afai tatou te foai atu ma le loto i ai, o le a fesoasoani le Tama Faalelagi ia i tatou ia maua mea e manaomia i aso taitasi o meaai, lavalava, ma fale e nonofo ai. A o saunoa atu Peresitene Gordon B. Hinckley i le Au Paia o Aso e Gata Ai i Filipaina, na ia faapea atu afai “e taliaina [e tagata] le talalelei ma ola ai, totogi a latou sefuluai ma taulaga, tusa lava pe itiiti, o le a tausia e le Alii Lana folafolaga anamua ona o i latou, ma o le a latou maua ipu araisa ma lavalava i o latou tua ma faapaologa i luga o o latou ulu. E leai lava se isi tali o loo ou vaai atu i ai. Latou te manaomia se mana sili atu nai lo soo se mana lava faalelalolagi e siitia ai i latou ma fesoasoani ia i latou” (“Inspirational Thoughts,” Ensign, Aokuso 1997, 7). O le a Ia fesoasoani mai foi ia i tatou ia tatou alualu i luma i le “malamalama o le Atua, i le molimau, i le mana tatou te ola ai i le talalelei ma musuia ai o tatou aiga ia faapea foi ona latou faia” (Aoaoga a Peresitene o le Ekalesia: Heber J. Grant [2002], 124).

O i latou e totogi a latou sefuluai ma taulaga e faamanuiaina tele. Latou te maua se lagona lelei ua latou fesoasoani e atiina ae le malo o le Atua i le lalolagi.

• O a nisi o faamanuiaga ua maua e oe, tagata o lou aiga, po o au uo e ala i le totogiina o sefuluai ma isi taulaga?

Mau Faaopoopo

• MFF 119:1–4 (o le tulafono o le sefuluai)

• Kenese 14:18–20; Alema 13:13–16 (sa totogi ia sefuluai a Aperaamo)