Tusi ma Lesona
Mataupu 15: O Le Nuu O Le Feagaiga A Le Alii

Mataupu 15

O Le Nuu O Le Feagaiga A Le Alii

The Old Testament prophet Abraham kneeling in prayer. Abraham is holding a staff in one hand and is looking toward the heavens as he prays. Sarah, the wife of Abraham, is depicted watching and with a look of humor on her face, from a tent portrayed in the background. Abraham and Sarah are depicted as elderly people.

O Le Natura o Feagaiga

  • O Le a le feagaiga? Aisea ua ta’ua ai le Au Paia o Aso e Gata Ai o ni tagata o le feagaiga?

Na osia e le Alii feagaiga ma Lana fanau i le lalolagi talu mai lava le amataga. A faia e Lona nuu ni feagaiga (po o ni folafolaga) ma Ia, ua latou iloa mea ua Ia faamoemoeina mai ia te i latou ma faamanuiaga e mafai ona latou faamoemoeina mai ia te Ia. E mafai ona latou faia lelei Lana galuega i le lalolagi. O tagata e osi feagaiga ma le Alii, ma ua osia e le Alii o feagaiga ma i latou ua ta’ua o le nuu o le feagaiga a le Alii. O tagata o le Ekalesia, o se vaega o le nuu o le feagaiga a le Alii.

I totonu o le talalelei, o se feagaiga o se maliega paia po o se folafolaga ua faia i le va o le Atua ma se tagata po o se vaega o ni tagata. I le faia o se feagaiga, e folafola mai e le Atua se faamanuiaga e faavae i le usiusitai i ni poloaiga faapitoa. O le Alii Na te faia tuutuuga o Ana feagaiga, ma Na te faaali mai ia tuutuuga i Ana perofeta. A tatou filifili e usiusitai i tuutuuga o le feagaiga, tatou te maua faamanuiaga ua folafola mai. A tatou filifili e le usitaia, e taofi e le Alii ia faamanuiaga, ma i nisi taimi, Na te tuuina mai foi se faasalaga.

Mo se faataitaiga, ina ua tatou auai i le Ekalesia, e tele feagaiga sa tatou osia ma le Atua (tagai i le mataupu e 20 i le tusi lenei). Tatou te osi feagaiga ma le Faaola i le papatisoga o le a tatou ave i o tatou luga Lona suafa. Ua Ia folafola mai “o i latou uma o e salamo ma papatisoina i lo’u igoa, o Iesu Keriso lea, ma tumau e oo i le iuga, o i latou lava ia o le a faaolaina” (MFF 18:22). Tatou te osi feagaiga ma le Alii pe a tatou aai ma feinu i le faamanatuga (tagai i le mataupu e 23 i le tusi lenei). Tatou te folafola atu o le a tatou tauave i o tatou luga Lona suafa, manatua pea o Ia, ma usiusitai i Ana poloaiga. Ae folafola mai ia i tatou, o le a mafuta le Agaga Paia ma i tatou. (Tagai i le MFF 20:77–79.) A tatou maua sauniga o le malumalu, tatou te osia foi isi feagaiga paia ma ua folafola mai ia i tatou le faaeaina pe a tatou usiusitai faamaoni (tagai i le MFF 132; tagai foi i le mataupu e 47 i le tusi lenei).

Ua osia foi e le Atua ni feagaiga faapitoa ma ni tagata po o ni vaega o tagata faapitoa. Sa Ia osia ni feagaiga faapitoa ma Atamu, Enoka, Noa, le fanauga a Isaraelu, ma Liae (tagai i le Mose 6:31–36, 52; Kenese 9:9–17; Esoto 19:5–6; 2 Nifae 1). Sa Ia osia se feagaiga faapitoa ma Aperaamo ma ana fanau ua faamanuiaina ai tagata o le Ekalesia i ona po nei.

  • Mafaufau i feagaiga ua e faia ma le Atua ma faamanuiaga ua Ia folafola mai ia te oe pe a tausia ia feagaiga.

O Le Feagaiga a le Atua ma Aperaamo ma Ana Fanau

  • O le a le feagaiga faaAperaamo?

O Aperaamo, o se perofeta o le Feagaiga Tuai, o se alii amiotonu (tagai i le ata o loo i le mataupu lenei). Sa musu o ia e ifo atu i tupua a lona tamā. Sa ia tausia poloaiga uma a le Alii. Ona o le amiotonu o Aperaamo, o lea na osia ai e le Alii se feagaiga ma ia ma ana fanau.

Sa folafola mai e le Alii ia Aperaamo, o le a ia maua ni fanau e toatele. Sa Ia folafola mai o le a latou maua uma le talalelei, faamanuiaga o le perisitua, ma sauniga uma o le faaeaga. O ia fanau, o le a latou avatu le talalelei i nuu uma o le lalolagi, e ala i le mana o le perisitua. O le a faamanuiaina aiga uma o le lalolagi, e ala atu ia i latou (tagai i le Aperaamo 2:11). Sa folafola mai foi e le Atua afai latou te amiotonu, o le a Ia faatuina Lana feagaiga ma augatupulaga uma o fanau a Aperaamo (tagai i le Kenese 17:4–8).

  • E faapefea ona aoga ia i tatou poloaiga ma folafolaga i le feagaiga faaAperaamo? (Mafaufau pe faapefea ona talafeagai lenei fesili i nofoaga eseese, e pei o le aiga, i le galuega, i le nuu, po o le avea ai ma faifeautalai.)

O Tagata o le Ekalesia o se Nuu o le Feagaiga

  • O a faamanuiaga ma tiutetauave ua oo mai i le nuu o le feagaiga a le Atua i ona po nei?

O tagata e fananau mai i le gafa o Aperaamo, ua le na o i latou ia ua ta’ua e le Atua o le nuu o Lana feagaiga. Na fetalai atu le Atua ia Aperaamo, “O i latou uma o e talia lenei talalelei, e faaigoaina i latou i lou igoa, ma avea i latou ma au fanau, ma o le a latou tutu mai foi ma viia oe, o so latou tamā” (Aperaamo 2:10). O lona uiga, e lua vaega o tagata ua aofia i le feagaiga na osia e Aperaamo: (1) O i latou o e amiotonu e fananau mai i le gafa o Aperaamo, ma (2) i latou o e e fai ma tama fai i lona gafa, e ala i lo latou talia ma ola ai i le talalelei a Iesu Keriso (tagai i le 2 Nifae 30:2).

A tatou papatiso i le Ekalesia, ua tatou ulufale atu i le feagaiga a le Alii na osia ma Aperaamo, Isaako, ma Iakopo (tagai i le Kalatia 3:26–29). Afai tatou te usiusitai, o le a tatou maua faamanuiaga o lena feagaiga. Tatou te maua le aia tatau tatou te maua ai le fesoasoani ma le taitaiga mai le Agaga Paia. E maua e alii agavaa le aia tatau e umia ai le perisitua. E mafai ona maua e aiga faamanuiaga o le perisitua. E mafai ona tatou maua le ola e faavavau i le malo selesitila. E leai ni faamanuiaga e sili atu nai lo faamanuiaga nei.

Faatasi ma nei faamanuiaga ua tatou maua i le avea ai ma nuu o le feagaiga a le Alii, ua ia i tatou foi ni tiute taua tele. Na folafola atu e le Alii ia Aperaamo, o le a avatu le talalelei i le lalolagi uma e ala atu i ana fanau. O loo tatou faataunuuina lena tiute e ala i le polokalama a faifeautalai faamisiona a le Ekalesia, ma galuega faafaifeautalai ua faia e ona tagata. O lenei avanoa e talai atu ai le talalelei i le lalolagi atoa, e na o le Ekalesia a le Alii ma tagata o Lana feagaiga e tatau ona faia.

I le avea ai ma nuu o le feagaiga a le Alii, e tatau foi ona tatou tausia Ana poloaiga. Na fetalai mai le Alii, “E noatia a’u, le Alii, pe a outou faia mea ou te fai atu ai; ae pe a outou le faia mea ou te fai atu ai, e leai sa outou folafolaga” (MFF 82:10). Afai tatou te solia a tatou feagaiga ina ua uma ona tatou talia le talalelei, ona faaleaogaina ai lea o le feagaiga ma o le a ta’usalaina foi i tatou i luma o le Atua (tagai i le MFF 132:4). Ua fetalai mai o Ia: “Tuu ese le agasala, ina nei pa’ū faamasinoga tiga i o outou luga. Aua o le ua foaiina atu i ai mea e tele, e sueina mai ia te ia mea e tele; o le e agasala foi i le malamalama tele, o le a ia maua le faasalaga tele” (MFF 82:2–3).

O Le Feagaiga Fou ma le Faavavau

  • O a mea tatou te folafola atu tatou te faia pe a tatou talia le talalelei? O a faamanuiaga e tuuina mai e le Tama Faalelagi ia i tatou pe a tatou tausia nei folafolaga?

O le atoatoaga o le talalelei, ua ta’ua o le feagaiga fou ma le faavavau. Ua aofia ai feagaiga na osia i le papatisoga, faamanatuga, malumalu, ma soo se isi lava taimi. Ua ta’ua e le Alii e faavavau ona ua faauuina e le Atua e faavavau, ma ona o le a le suia lava le feagaiga. Sa Ia tuuina atu lenei lava feagaiga e tasi ia Atamu, Enoka, Noa, Aperaamo, ma isi perofeta. E faatatau i le tulaga lena, e le o se feagaiga fou. Ae ua ta’ua e le Alii o se feagaiga fou aua soo se taimi lava e toefuatai mai ai le talalelei ina ua mavae ona aveesea mai le lalolagi, e fou le feagaiga i tagata e tuuina atu i ai (tagai i le Ieremia 31:31–34; Esekielu 37:26).

A tatou talia le feagaiga fou ma le faavavau, tatou te ioe o le a tatou salamo, ma papatiso, ma talia le Agaga Paia, ma faia o tatou faaeega paia, ma talia le feagaiga o le faaipoipoga i le malumalu, ma mulimuli ma usiusitai ia Keriso e oo i le iuga o o tatou olaga. A tatou tausia a tatou feagaiga, ua folafola mai e le Tama Faalelagi ia i tatou, o le a tatou maua le faaeaga i le malo selesitila (tagai i le MFF 132:20–24; tagai foi i le mataupu e 47 i lenei tusi lesona).

E faigata i tagata ona malamalama i le maoae o lena folafolaga. O poloaiga Na te tuu mai, e mo lo tatou manuia, ma e mafai ona tatou maua faamanuiaga ma le matagofie o le lagi ma le lalolagi. E mafai ona tatou nonofo i Lona afioaga ma maua Lona alofa, alofa loloto, mana, maoae, poto, atamai, mamalu, ma puleaga uma.

  • E faapefea ona avea le ta’ua o i tatou o le nuu o le feagaiga a le Alii ma uunaiga i auala e faia ai o tatou lavalava, amioga, ma tausia ai poloaiga a le Atua?

Mau Faaopoopo Ma Isi Tusi