Tusi ma Lesona
Mataupu 2: O Lo Tatou Aiga Faalelagi

Mataupu 2

O Lo Tatou Aiga Faalelagi

Hubble image of the galaxy

O I Tatou O Fanau A Lo Tatou Tamā Faalelagi

  • O a mea o loo aoao mai e tusitusiga paia ma perofeta o aso e gata ai e uiga i la tatou sootaga ma le Atua?

O le Atua, e le gata o lo tatou Pule ma Lē na faia i tatou; a o Ia foi o lo tatou Tama Faalelagi. O alii ma tamaitai uma o atalii ma afafine moni o le Atua. “O le tagata, i le avea ai o se agaga, na fanauina e ni matua faalelagi, ma sa tausia seia oo ina matua i maota e faavavau o le Tama, a e lei sau i le lalolagi i se tino [faaletino]” (Aoaoga a Peresitene o le Ekalesia: Iosefa F. Samita [1998], 341).

O tagata taitoatasi ua fananau mai i le lalolagi, o so tatou uso po o se tuafafine. Ona o i tatou o fanau agaga a le Atua, ua tatou maua ai le mana e mafai ai ona tatou atiina ae Ona uiga paia auau mama. E ala i le Togiola a Iesu Keriso, e mafai ai ona avea i tatou faapei o lo tatou Tama Faalelagi ma maua le atoatoaga o le olioli.

  • E mafai faapefea e lou malamalama o oe o se atalii po o se afafine o le Atua ona uunaia ou manatu, au upu, ma faatinoga?

Sa Tatou Atiina Ae o Tatou Uiga ma Taleni a o Tatou i ai i le Lagi

  • Mafaufau i taleni ma meaalofa ua faamanuiaina ai oe.

Ua aoao mai e tusitusiga paia ia i tatou, o perofeta uma lava, na saunia i latou lava e avea ma taitai i le lalolagi, a o latou i ai i le lagi o ni agaga (tagai i le Alema 13:1–3). Sa muai faauuina (filifilia) i latou e le Atua e avea ma Ana taitai i le lalolagi ae lei fananau mai i latou i ni tino faaletino. O Iesu, Atamu, ma Aperaamo, o nisi ia o ia taitai. (Tagai i le Aperaamo 3:22–23.) Sa aoao mai e Iosefa Samita, “o tagata uma ua i ai se valaauga e talai atu i tagata o le lalolagi sa [muai] faauuina mo lena lava faamoemoe” (Aoaoga A Peresitene O Le Ekalesia: Iosefa Samita [2007], 544). E ui i lea, ua saoloto tagata taitoatasi i le lalolagi e talia pe teena soo se avanoa e auauna atu ai.

Sa le tutusa i tatou uma i le lagi. Mo se faataitaitaiga, ua tatou iloa o i tatou o atalii ma afafine o matua faaleagaga—o alii ma tamaitai (tagai i le “O Le Aiga: O Se Folafolaga I Le Lalolagi,” O Le Liahona, Iuni 1996, 10). Na ia i tatou taleni ma atamai eseese, ma na valaauina i tatou ia tatou faia ni mea eseese i le lalolagi. E mafai ona tatou malamalama atili e uiga i o tatou “agavaa faavavau” pe a maua o tatou faamanuiaga fapeteriaka (tagai i le Thomas S. Monson, i le Conference Report, Oketopa 1986, 82; po o le Ensign, Novema 1986, 66).

Ua punitia e se veli lo tatou manatua o lo tatou muai olaga, peitai ua silafia e lo tatou Tama i le Lagi i tatou ma mea na tatou faia ae tatou te lei o mai iinei. Ua Ia filifilia le taimi ma le nofoaga mo i tatou taitoatasi e fananau mai ai, ina ia mafai ona tatou aoaoina lesona ua manaomia ma faia le mea sili ona lelei e le tagata lava ia e tusa ai ma ana taleni ma uiga.

  • Ua faapefea ona faamanuiaina oe i taleni a isi tagata? E faapefea ona faamanuiaina isi i au taleni ma meaalofa?

Sa Tuuina Mai e Lo Tatou Tama Faalelagi se Fuafuaga e Avea ai i Tatou Faapei o Ia

  • E faapefea ona fesoasoani le olaga faalelalolagi e saunia i tatou ia avea faapei o lo tatou Tama Faalelagi?

Na silafia e lo tatou Tama Faalelagi e le mafai ona tatou alualu i luma i tala atu o se tulaga patino sei vagana ua tatou tuua o Ia mo sina taimi. Sa finagalo o Ia ia tatou atiina ae uiga faaleatua o loo ia te Ia. Ina ia faia lena mea, sa manaomia ona tatou tuua lo tatou aiga i le muai olaga ina ia tofotofoina i tatou ma tatou maua ai le poto masani. Sa manaomia ona faaofuina o tatou agaga i ni tino faaletino. E manaomia ona tatou tuua o tatou tino faaletino i le oti ma toe faatasia ma o tatou tino i le Toetutu. Ona tatou maua ai lea i le taimi lena ni tino e ola pea e pei o lo tatou Tama Faalelagi. A tatou pasia suega uma, o le a tatou maua le atoatoa o le olioli lea ua maua e lo tatou Tama Faalelagi. (Tagai i le MFF 93:30–34.)

Na talo e lo tatou Tama Faalelagi se Fono Tele e faailoa mai ai Lana fuafuaga mo lo tatou alualu i luma (tagai i le Aoaoga a Peresitene o le Ekalesia: Iosefa Samita, 209, 544). Sa tatou iloa ai, afai tatou te mulimuli i Lana fuafuaga, o le a avea i tatou e pei o Ia. O le a tatou toetutu; o le a tatou maua le mana uma i le lagi ma le lalolagi; o le a avea i tatou ma ni matua faalelagi, ma maua ni fanau agaga e pei o Ia (tagai i le MFF 132:19–20).

Sa faailoa mai ia i tatou o le a Ia faia se lalolagi mo i tatou o le a tofotofoina ai i tatou (tagai i le Aperaamo 3:24–26). O le a pupuni o tatou mafaufau i se veli, ma o le a galo ai ia i tatou lo tatou aiga faalelagi. E tatau ona faia lena mea, ina ia mafai ai ona tatou filifili le lelei po o le leaga, e aunoa ma le faatosinaina o i tatou i lo tatou manatuaina o le taimi na tatou mau faatasi ai ma lo tatou Tama Faalelagi. O le ala lena, o le a mafai ai ona tatou usiusitai ia te Ia ona o lo tatou faatuatua ia te Ia, ae le ona o lo tatou malamalama, po o lo tatou manatuaina o Ia. O le a Ia fesoasoani mai ia i tatou ia tatou iloa le upu moni pe a tatou toe faalogo ai i le lalolagi (tagai i le Ioane 18:37).

Sa faailoa mai foi ia i tatou i le Fono Tele, le faamoemoe o lo tatou alualu i luma: ina ia maua le atoatoa o le olioli. E ui i lea, sa faailoa mai foi ia i tatou, e i ai nisi o i tatou o le a faaseseina, ma filifilia isi ala, ma leiloa lo tatou ala. Sa faailoa mai ia i tatou o le a oo mai ia i tatou uma tofotofoga i o tatou olaga: o ma’i, lē fiafia, tiga, faanoanoa, ma le oti. Ae sa tatou malamalama o le a tuuina mai ia i tatou ia mea ina ia tatou maua ai le poto masani mo lo tatou lelei (tagai i le MFF 122:7). Afai tatou te onosaia nei mea, o le a avea ia tofotofoga ma mea e faamamaina ai i tatou, a e le faatoilaloina ai i tatou. O lea poto masani o le a aoaoina i tatou ia tumau, onosai, ma alofa mama (tagai i le Aoaoga a Peresitene o le Ekalesia: Spencer W. Kimball [2006], 15–16).

Sa faailoa mai foi ia i tatou i lenei fono, ona o lo tatou vaivai, o le a tatou agasala uma ai, sei vagana ai tamaiti laiti (tagai i le MFF 29:46–47). Sa faailoa mai ia i tatou o le a saunia se Faaola mo i tatou ina ia mafai ona tatou manumalo ia tatou agasala, ma manumalo i le oti e ala i le toetu. Sa faailoa mai ia i tatou afai tatou te faatuatua ia te Ia, usiusitai i Ana afioga ma mulimuli i Lana faataitaiga, o le a faaeaina i tatou ma avea e pei o o tatou matua faalelagi. O le a tatou maua le atoatoa o le olioli.

  • Lisi mai nisi o uiga o lo tatou Tama Faalelagi. E faapefea ona fesoasoani le ata o le faaolataga ia i tatou e faatupuina nei uiga?

Mau Faaopoopo