Tusi ma Lesona
Mataupu 35: Usiusitai

Mataupu 35

Usiusitai

An angel appearing to Adam and Eve as they prepare to offer a lamb as a burnt offering. The illustration depicts the angel explaining to Adam and Eve that the animal sacrifice was symbolic of the sacrifice to be made by Jesus Christ.

E Tatau Ona Tatou Usiusitai ma le Naunautai i le Atua

  • O le a le eseesega o le usiusitai ma le naunautai ma le lē loto i ai?

Ao soifua Iesu i le lalolagi, sa fesili se aoao tulafono ia te Ia:

“Le Aoao e, o le fea poloaiga o i le tulafono ua sili?

“Ona fetalai atu ai lea o Iesu ia te ia, E te alofa atu i le Alii lou Atua ma lou loto atoa, ma lou agaga atoa, ma lou manatu atoa.

“O le poloaiga muamua lena ma le sili.

“E faapena foi lona lua, E te alofa atu i le lua te tuaoi, ia pei o oe lava ia te oe.

“O na poloaiga e lua ua autu ai le tulafono uma ma le au perofeta” (Mataio 22:36–40).

Ua tatou iloa mai nei mau le taua o lo tatou alofa i le Alii ma o tatou tuaoi. Ae faapefea ona faaali lo tatou alofa mo le Alii?

Sa tali foi e Iesu lenei fesili ina ua Ia fetalai mai, “O le ua ia te ia a’u poloaiga ma tausi i ai, o ia lea e alofa mai ia te a’u; o le e alofa mai foi ia te a’u, e alofaina o ia e lo’u Tama” (Ioane 14:21).

E tatau ia i tatou taitoatasi ona fesili ifo ia i tatou lava pe aisea ua tatou usiusitai ai i poloaiga a le Atua. Pe ona ua tatou fefefe ea i le faasalaga? Pe ona o lo tatou fia maua ea o taui o le ola i se olaga lelei? Pe ona o lo tatou alolofa i le Atua ma Iesu Keriso ma ua mananao e auauna atu ia i Laua?

E sili atu le usiusitai i poloaiga ona ua tatou fefefe i le faasalaga nai lo le matua le usitaia lava. Ae o le a sili atu ai ona tatou fiafia pe afai tatou te usiusitai i le Atua ona o lo tatou alolofa ia te Ia ma mananao e usiusitai ia te Ia. A tatou usiusitai ia te Ia ma le loto i ai, o le a mafai foi ona Ia faamanuia mai ia i tatou ma le finagalo i ai. Ua Ia fetalai mai, “O A’u, o le Alii, … ou te fiafia lava e faamamalu i e auauna mai ia te A’u i le amiotonu ma le upu moni e oo i le iuga” (MFF 76:5). E fesoasoani foi le usiusitai ia i tatou ia tatou alualu i luma ma avea e pei o lo tatou Tama Faalelagi. Ae o e e le faia se mea sei iloga e poloaiina ai i latou, ma latou tausi toai poloaiga, latou te le maua le taui (tagai i le MFF 58:26–29).

  • E mafai faapefea ona tatou faateleina lo tatou naunautaiga e usiusitai?

E Mafai Ona Tatou Usiusitai E Aunoa Ma Le Malamalama Pe Aisea

  • Aisea e le manaomia ai ona tatou malamalama i taimi uma i faamoemoega o le Alii ona faatoa tatou usiusitai ai lea?

O le tausia o poloaiga a le Atua e saunia ai i tatou mo le ola e faavavau ma le faaeaga. O nisi taimi tatou te le iloa le pogai ua tuuina mai ai se poloaiga. E ui i lea, tatou te faaali atu lo tatou faatuatua ma le faalagolago i le Atua pe a tatou usiusitai ia te Ia e aunoa ma lo tatou iloa pe aisea.

Sa poloaiina Atamu ma Eva la te osi atu taulaga i le Atua. I se tasi aso, na sau ai se agelu ia Atamu ma fai mai ia te ia pe aisea ua ia osi atu ai taulaga i le Atua. Sa tali atu Atamu na te le iloaina le pogai. Na ia faia lenei mea ona ua poloaiina ai o ia e le Alii. (Tagai i le Mose 5:5–6 ma le ata o loo i le mataupu lenei.)

Ona aoao mai lea e le agelu ia Atamu le talalelei, ma fetalai mai ia te ia e uiga i le Faaola o le a afio mai. Ona oo ifo lea o le Agaga Paia ia Atamu, ma ua ia vavalo e uiga i tagata o le lalolagi seia oo lava i le tupulaga mulimuli. (Tagai i le Mose 5:7–10; MFF 107:56.) Sa maua e Atamu lenei malamalama ma faamanuiaga maoae, aua sa usiusitai.

E Saunia E Le Atua Se Ala

Ua ta’u mai e le Tusi a Mamona ia i tatou, sa tuuina mai ia Nifae ma ona uso matutua se tofiga faigata mai le Alii (tagai i le 1 Nifae 3:1–6). Sa muimui uso o Nifae ma fai mai ua faigata le mea ua finagalo ai le Atua ia i latou. Ae sa fai atu Nifae, “Ou te alu atu ma fai ia mea ua poloaiina e le Atua, aua ua ou iloa, e le aumai e le Atua ni poloaiga i le fanauga a tagata, sei iloga Na te saunia le ala mo i latou ia mafai ai e latou ona fai le mea ua Ia poloaiina ai i latou” (1 Nifae 3:7). A tatou manatu ua faigata ia i tatou ona tausi se poloaiga a le Alii, e ao ina tatou manatua upu a Nifae.

  • O le a se taimi ua saunia ai e le Alii se ala mo oe e te usitai ai ia te Ia?

E Leai Se Poloaiga E Faatauvaa Pe Faigata Naua Ona Usiusitai I Ai

O nisi taimi tatou te mafaufau ai ua le taua tele se poloaiga. Ua ta’u mai e tusitusiga paia ia i tatou, e uiga i se alii e igoa ia Naamanu, sa manatu faapena. Sa maua Naamanu i se ma’i leaga tele. Sa oo ina malaga atu o ia mai Suria i Isaraelu e talosaga atu i le perofeta o Elisaia e faamaloloina lona ma’i. O Naamanu o se alii taua i lona atunuu, o lea sa le fiafia ai ina ua le alu atu Elisaia e faafetaiai ia te ia ae ua auina atu i ai lana auauna. Ae sa sili atu foi le le fiafia o Naamanu ina ua ia maua le faatonuga a Elisaia e faapea: ia alu e taele faafitu i le vai o Ioritana. “Sa oo ina ia fesili, “E le sili ea ona lelei … vaitafe o Tamaseko i vai uma o Isaraelu? ou te le taele ai ea ma ou mama ai?” na ia finau ane ai. Sa toe alu ese o ia ma le ita tele. Peitai sa fai atu ia te ia ana auauna: “Ana fai atu e le perofeta se mea tele ia te oe, e te le faia ea? ua le sili ea la, ua ia fai mai ia te oe, E taele, ma e mama ai?” Sa lava le tofā ia Naamanu sa malamalama ai e taua ona usiusitai i le perofeta a le Atua, e tusa pe foliga mai o se mea faatauvaa ua ia fai mai ai. O lea na ia taele ai i le Ioritana ma ua faamaloloina ai lona gasegase. (Tagai i le 2 Tupu 5:1–14.)

Atonu tatou te mafaufau i nisi taimi ua faigata tele ona tatou usiusitai i se poloaiga. Atonu tatou te faapea ifo e pei o uso o Nifae, “Ua faigata lenei mea ua e poloaiina ai i matou.” Ae faapei o Nifae, e ao ina tatou mautinoa e le tuuina mai e le Atua ia i tatou se poloaiga sei iloga Na te saunia se ala mo i tatou e mafai ai ona tatou usiusitai ia te Ia.

O se “mea faigata” na poloaiina ai Aperaamo e le Alii e ave lona atalii pele o Isaako e osi atu ai le taulaga (tagai i le Kenese 22:1–13; tagai foi i le mataupu 26 i le tusi lenei). Sa tele tausaga o faatali Aperaamo i le fanau mai o Isaako, le atalii sa folafola mai e le Atua ia te ia. A faapefea nei ona toese atu lona atalii mai ia te ia i se ala faapea? Atonu o se mea sa sili ona faigata ia Aperaamo. E ui i lea, sa ia filifili e usiusitai i le Atua.

E tatau foi ia i tatou ona tatou loto e fai soo se mea e finagalo ai le Atua. Na saunoa mai le Perofeta o Iosefa Samita, “Sa ou faia lenei ma a’u tulafono: Pe a faatonuina ai e le Atua, ia faia loa” (Aoaoga a Peresitene o le Ekalesia: Iosefa Samita [2007], 171). E mafai foi ona avea ia upu ma a tatou tulafono.

  • O le a se taimi na e maua ai ni faamanuiaga o se taunuuga o lou usiusitai i poloaiga na foliga mai o se mea faatauvaa?

Sa Usiusitai Iesu Keriso I Lona Tama

  • O a ni faataitaiga e te manatua pe a e mafaufau i le usiusitai o Iesu Keriso i Lona Tama?

O Iesu Keriso o le faataitaiga silisili o le usiusitai i lo tatou Tama Faalelagi. Sa Ia fetalai mai, “Ou te le’i alu ifo mai le lagi e fai lo’u lava loto, ao le finagalo o Le ua auina mai a’u” (Ioane 6:38). Sa Ia tuuto atu Lona soifuaga atoa i le usiusitai i Lona Tama; e ui i lea, sa le faigofie ia te Ia i taimi uma. Sa faaosoosoina o Ia i ala uma e pei o isi tagata (tagai i le Eperu 4:15). Sa Ia tatalo i le Faatoaga o Ketesemane, “Lo’u Tama e, afai e mafai, ia ave ese lenei ipu ia te au; ae aua le faia lo’u loto, ao lou finagalo” (Mataio 26:39).

Talu ai sa usiusitai Iesu i le finagalo o le Tama i mea uma, o lea na mafai ai e Ia ona saunia le faaolataga mo i tatou uma lava.

  • E mafai faapefea e lo tatou manatuaina o le faataitaiga a le Faaola ona fesoasoani ia i tatou ia tatou usiusitai?

O Taunuuga o le Usiusitai Ma Le Le Usiusitai

  • O a nisi o taunuuga o le usiusitai po o le le usiusitai i poloaiga a le Alii?

Ua pulea le malo o le lagi i tulafono, ma a tatou maua se faamanuiaga, e maua i le usiusitai i le tulafono ua faavae ai lena faamanuiaga (tagai i le MFF 130:20–21; 132:5). Ua fetalai mai le Alii ia i tatou o lo tatou usiusitai ma le maelega, e mafai ai ona tatou maua le poto ma le malamalama (tagai i le MFF 130:18–19). E mafai foi ona tatou alualu i luma faaleagaga (tagai i le Ieremia 7:23–24). I le tasi itu, o le le usiusitai e maua ai le faanoanoa ma e le maua ai faamanuiaga. “O ai ea a’u, ua faapea mai ai le Alii, ua folafola atu ae le faataunuuina? Ou te poloai atu ae le usiusitai tagata; ou te tatalaina ma latou le maua le faamanuiaga. Ona latou faapea ifo ai lea i o latou loto: E le o le galuega lenei a le Alii, aua e lei taunuu Ana folafolaga” (MFF 58:31–33).

A tatou tausia poloaiga a le Atua, Na te faataunuuina Ana folafolaga, e pei ona fai atu le Tupu o Peniamina i lona nuu: “Ua finagalo o Ia ia outou faia e pei ona Ia poloai mai ia te outou, aua afai ua outou faia ua Ia faamanuia loa ia te outou” (Mosaea 2:24).

O E Usiusitai E Maua Le Ola E Faavavau

Ua fetalai mai le Alii ia i tatou, “Afai tou te tausi a’u poloaiga ma tumau e oo i le iuga, o le a [outou] maua le ola e faavavau, o le meaalofa sili lea i meaalofa uma a le Atua” (MFF 14:7).

Ua ta’u mai e le Alii isi faamanuiaga e oo mai ia i latou o e usiusitai ia te Ia i le amiotonu ma le upu moni sei oo i le iuga

“Aua ua faapea mai le Alii—o a’u, le alii, ou te alofa mutimutivale ma faapalepale i e matatau ia te a’u, ma fiafia lava e faamamalu i e auauna mai ia te a’u i le amiotonu ma le upu moni e oo i le iuga.

“E sili lava lo latou taui, e faavavau foi lo latou mamalu.

“Ou te faaalia foi ia te i latou mea lilo uma, ioe, o mea lilo uma sa natia o lo’u malo talu mai aso anamua; a o tausaga amuli, ou te faailoa ai ia te i latou lo’u loto e uiga i mea uma o lo’u malo.

“Ioe, e oo lava i mea e ofo ai o le faavavau o le a latou iloa, ma mea e oo mai ou te faaalia ia te i latou, e oo lava i mea a tupulaga e tele.

“O le a sili foi lo latou poto, e oo foi i le lagi lo latou malamalama. …

“Aua o lo’u Agaga o le a ou faamalamalamaina ai i latou, ma lo’u mana o le a ou faailoa ai ia te i latou mea lilo o lo’u loto—ioe, e oo lava i…mea e lei vaaia e mata, pe faalogoina e taliga, pe oo foi i le loto o le tagata” (MFF 76:5–10).

  • O le a le uiga ia te oe o le faaupuga “tumau sei oo i le iuga”?

  • O le a se mea e mafai ona tatou faia tatou te tumau faamaoni ai i mataupu faavae o le talalelei e ui ina le faia e le toatele o tagata? E mafai faapefea ona tatou fesoasoani i fanau laiti ma le autalavou e tumau faamaoni i mataupu faavae o le talalelei?

Mau Faaopoopo