Mataupu 41

O Le Lalolagi o Agaga Pe a Mavae Le Oti

Olaga pe a mavae le Oti

• O le a le mea e tupu ia i tatou i tua atu o le oti?

Ua saunia e le Tama Faalelagi se fuafuaga mo lo tatou olataga. O se vaega o lena fuafuaga na Ia auina ese ai i tatou mai Lona afioaga, tatou te ola i le lalolagi ma maua ni tino faaletino o aano ma le toto. E oo mai le taimi e oti ai o tatou tino faaletino, ma o atu ai o tatou agaga i le lalolagi o agaga. O le lalolagi o agaga o se nofoaga faatalitali, galulue, aoao, ma, mo ē amiotonu, e malolo ai mai tiga ma faanoanoaga o le lalolagi. O iina o le a nonofo ai o tatou agaga seia oo ina tatou saunia mo le toetutu mai. Ona toe faatasia ai lea o o tatou tino faaletino ma o tatou agaga, ma tatou maua ai le tikeri o le mamalu sa tatou saunia i ai (tagai i le mataupu 46 i le tusi lenei).

E toatele i tatou e le malamalama pe faape’ī le lalolagi o agaga. Ua tuuina mai ia i tatou e tusitusiga paia ma perofeta o aso e gata ai ni faamatalaga e uiga i le lalolagi o agaga.

• O a ni lagona toafilemu ua e maua mai lou malamalama ai o loo i ai se olaga pe a mavae le oti? E mafai faapefea ona tatou faaaoga lo tatou malamalamaaga i le lalolagi o agaga pe a mavae le oti e faamafanafana atu ai i isi?

O Fea O I Ai le Lalolagi o Agaga?

Ua saunoa mai perofeta o aso e gata ai o agaga o i latou ua oti e le o mamao ma i tatou. Na saunoa mai Peresitene Ezra Taft Benson: “O nisi taimi, e matua manifinifi lava le veli i le va o le olaga nei ma le olaga i tala atu [o le veli]. Ua le mamao mai ia i tatou e ua pele ia i tatou ua mavae atu” (i le Conference Report, Aperila 1971, 18; po o le Ensign, Iuni 1971, 33). Na aoao mai Peresitene Polika Iaga o le lalolagi o agaga o loo i le lalolagi, e siomia ai i tatou (tagai i le Aoaoga a Peresitene o le Ekalesia: Polika Iaga [1997], 279).

E Faape’ī Le Foliga Mai o Tatou Agaga?

O agaga, ua tutusa lava o latou foliga mai e pei o le tino faaletino, ae ua sili atu ona atoatoa le tino faaleagaga (tagai i le Eteru 3:16). E o ese atu agaga mai le lalolagi ma o latou uiga tuuto po o uiga faatuiese i mea o le amiotonu (tagai i le Alema 34:34). Ua i ai ia i latou tuinanau ma manaoga sa i ai i latou a o ola i le lalolagi. O agaga uma, o ni tagata matutua. Sa tagata matutua agaga uma a o lei fananau mai i le lalolagi, ma o ni tagata matutua foi pe a mavae le oti, e tusa pe feoti a o pepe pe o ni tamaiti foi (tagai i le Aoaoga a Peresitene o le Ekalesia:Iosefa F. Samita [1998], 131–32).

• Aisea e taua ai le iloa o manatu ma uiga o loo i ai i agaga i le taimi lenei o le mea foi lena o le a i ai i le lalolagi o agaga?

O A Tulaga e i ai i le Lalolagi o Agaga Pe A Mavae Le Ola?

Ua aoao mai le perofeta o Alema i le Tusi a Mamona e uiga i vaega po o tulaga e lua ua i ai i le lalolagi o agaga:

“Ona oo lea ina nonofo agaga o e amiotonu i le mea e fiafia ai, ua ta’ua o le parataiso, o le mea lea e mapu ai, o le mea e filemu ai, latou te malolo ai i o latou tiga uma, ma le popole uma, ma le faanoanoa, ma mea faapena.

“Ona oo lea ina tulia ese agaga o e amioleaga, ioe, o e ua leaga—aua faauta, e leai se vaega po o se tofi o le Agaga o le Atua ia te i latou; aua faauta, ua latou filifilia galuega leaga, ae le o galuega lelei; o le mea lea na ulufia ai i latou e le agaga o le tiapolo, ma ua ave mona o latou fale—oi latou ia foi e lafoina atu i le pouliuli i fafo, e i ai le taufaitagi, ma le tagiaue, ma le lilivau o nifo, o lenei foi ona o la latou lava amioletonu, ua avea faatagataotaua ai i le loto o le tiapolo.

“O le tofi foi lenei o agaga o e amioleaga, ioe, i le pouliuli, o le tofi foi lea o le fefe ma le mata’u i le faatalitali i le toasa e mumū o le toatamai o le Atua ia te i latou; e faapea ona nonofo i latou i lenei tofi, e faapea foi ma e amiotonu i le parataiso, seia oo i le aso o lo latou toetu mai” (Alema 40:12–14).

Ua tuueseese agaga e tusa ma le mamā o o latou olaga ma lo latou usiusitai i le finagalo o le Alii ao i ai i le lalolagi. E tuu eseese e amiotonu ma e amioleaga (tagai i le 1 Nifae 15:28–30), ae mafai e agaga ona alualu i luma mai le tasi tulaga i le isi tulaga, pe a latou aoaoina mataupu o le talalelei ma ola ai. E mafai e agaga o loo i le parataiso ona aoao agaga o loo i le falepuipui (tagai i le MFF 138).

Mo faiaoga: Ia fesoasoani i tagata o le vasega po o le aiga ia malamalama i le eseesega i le va o le parataiso ma le falepuipui o agaga, mafaufau e tusi se laina sa’o e amata mai luga e tau i lalo i le ogatotonu o le laupapa po o luga o se pepa lautele, ia maua ai ni koluma se lua. I le pito i luga o le tasi koluma, tusi ai Tulaga o e Amiotonu. I le pito i luga o le isi koluma, tusi ai Tulaga o e Amioleaga. Fai i le vasega e faamatala mai tulaga taitasi o le lalolagi o agaga, e faavae i luga o mea ua latou faitauina mai i le vaega lenei. Tusi se otootoga o a latou faamatalaga i lalo o le koluma talafeagai.

Parataiso

E tusa ai ma upu a le perofeta o Alema, o le a malolo ai agaga o e amiotonu mai tiga ma faanoanoaga uma o le lalolagi. E ui i lea, latou te galulue e faia le galuega a le Alii. Sa vaai Peresitene Iosefa F. Samita i se faaaliga e faapea, ina ua mavae le faasatauroga o Iesu Keriso, sa afio atu o Ia i e amiotonu i le lalolagi o agaga. Sa Ia tofia avefeau, ma tuu atu ia i latou le mana ma le pule, ma poloaiina i latou e “aveina atu le malamalama o le talalelei ia i latou sa i ai i le pogisa, e oo atu i agaga uma o tagata” (MFF 138:30).

Ua faatuina le Ekalesia i le lalolagi o agaga, ma ua faaauau ai iina ia tiutetauave o i latou e umia le perisitua (tagai i le MFF 138:30). Sa aoao mai Peresitene Uilifoti Uitilafi: “Ua i ai le Perisitua lava e tasi i le isi itu o le veli. … O Aposetolo, Fitugafulu, ma Toeaina taitasi, ma isi, o e na maliliu i le faatuatua, o le taimi lava e ulu atu ai i le tasi itu o le veli, e ulu atu ai i le galuega o le talaiga” (Deseret News, Ian. 25, 1882, 818).

E taua foi sootaga faaleaiga. Sa vaai Peresitene Jedediah M. Grant, o ia o se fesoasoani ia Polika Iaga, i le lalolagi o agaga ma faamatala atu ia Heber C. Kimball le faatulagaga o loo i ai iina: “Sa fai mai o ia, o tagata sa ia vaai i ai iina sa faatulagaina i ni aiga. … Na ia faapea mai, ‘Ina ua ou vaai atu i aiga, e i ai nisi sa le atoatoa, … aua sa ou vaai i aiga sa le faatagaina e nonofo faatasi, aua sa latou le faamamaluina o latou valaaulia iinei’” (Deseret News, Tes. 10, 1856, 316–17).

Falepuipui o Agaga

Sa ta’ua e le Aposetolo o Peteru le lalolagi o agaga o se falepuipui, ma o le falepuipui lea mo nisi (tagai 1 Peteru 3:18–20). I le falepuipui o agaga o loo i ai agaga o e latou te lei mauaina le talalelei a Iesu Keriso. O nei agaga o loo i ai le saolotoga ma e mafai ona tosina atu i le lelei po o le leaga foi. Afai latou te talia le talalelei ma sauniga ua faia mo i latou i malumalu, e mafai ona saunia i latou lava e tuua le falepuipui o agaga ma o atu e nonofo i le parataiso.

O loo i ai foi i le lalolagi o agaga i latou na teena le talalelei ina ua mavae ona talai atu ia te i latou i le lalolagi po o le falepuipui o agaga. O agaga nei o le a mafatia i se tulaga ua ta’ua o seoli. Ua latou aveese i latou lava mai le alofa tunoa o Iesu Keriso, Le na fetalai mai, “Aua faauta, o a’u le Atua na puapuagatia i nei mea mo tagata uma, ina ia latou le puapuagatia pe afai latou te salamo; ae peitai, afai latou te le salamo, e ao ina latou tiga e pei o a’u; o le tiga lea na faagateteina ai a’u lava, o le Atua, le Silisiliese i mea uma, ona o le tiga, ma na maligi ai le toto mai pu laiti uma lava o le tino, ma na tiga le tino atoa ma le agaga” (MFF 19:16–18) A uma ona latou mafatia atoatoa mo a latou lava agasala, ona faatagaina ai lea o i latou e nonofo i le tikeri o le mamalu sili ona maualalo, o le malo telesitila lea.

• O a auala e tutusa ai tulaga i le lalolagi o agaga ma tulaga i le olaga lenei?

Mau Faaopoopo

• 1 Peteru 4:6 (ua talai atu le talalelei i e ua oti)

• Mose 7:37–39 (ua saunia le falepuipui o agaga mo e amioleaga)

• MFF 76 (faaaliga e uiga i malo e tolu o le mamalu)

• Luka 16:19–31 (taunuuga o le mativa ma le mauoa i le lalolagi o agaga )