Tusi ma Lesona
Mataupu 1: O Lo Tatou Tama i le Lagi

Mataupu 1

O Lo Tatou Tama Faalelagi

Ata
Hubble image of the galaxy

O Loo I Ai se Atua

  • O a nisi o mea o loo molimau atu ia te oe o loo i ai se Atua?

Ua tusia e Alema, se perofeta o le Tusi a Mamona, e faapea, “Ua faailoaina mai i mea uma e i ai le Atua; ioe, o le lalolagi, ma mea uma i luga o le fogaeleele, ioe, ma lona faataamilomilo, atoa ma fetu o lo o taamilo i o latou ala, ua molimau e i ai Le Silisiliese na Faia mea uma” (Alema 30:44). E mafai ona tatou vaavaai a’e i le vanimonimo i le po ma maua ai se manatu i le uiga o le faamatalaga a Alema. Ua i ai le miliona ma miliona o fetu ma paneta ua atoatoa lelei lo latou faatulagaina. E le i faafuasei ona i ai iina. E mafai ona tatou vaai i galuega a le Atua i le vanimonimo ma le fogaeleele. O le tele o laau matagofie, ma le tele o ituaiga o manu, o atumauga, o vaitafe, o ao e aumaia le timu ma le kiona ia i tatou—o nei mea uma lava ua molimau mai ia i tatou o loo i ai se Atua.

Ua aoao mai ia i tatou e perofeta, o le Atua o le Pule Silisiliese lea o le atulaulau. E afio le Atua i le lagi (tagai i le MFF 20:17). O Ia na faia le lagi ma le lalolagi ma mea uma lava o i ai, e ala i Lona Alo, o Iesu Keriso (tagai i le 3 Nifae 9:15; Mose 2:1). O Ia na faia le masina, fetu, ma le la. O Ia na faatulagaina le lalolagi lenei, ma faatinoina, ma faagaoioia, ma tuuina i ai le ola. O Ia na faatumuina le vanimonimo ma vai i meaola. O Ia na tuuina i mauga iti ma fanua laugatasi ituaiga o manu eseese uma. O Ia na tuuina mai ia i tatou le ao ma le po, le taumafanafana ma le taumalulu, le tau e totō ai fatu ma le tau e selesele ai. O Ia na faia le tagata i Lona lava faatusa e avea ma pule i isi mea na Ia faia (tagai i le Kenese 1:26–27).

O le Atua o le Tamalii Silisiliese ma Atoatoa e toatasi ua tatou talitonu ma tapuai i ai. “O loo silasila mai” O Ia “o le Matua Sili o le atulaulau i luga o le aiga atoa o tagata ma Lana tausiga ma le gauai atu i ai faaletamā” (Aoaoga a Peresitene o le Ekalesia: Iosefa Samita [2007], 42).

O Le Natura o le Atua

  • O a nisi o uiga o le Atua?

Talu ai ua faia i tatou i Lona faatusa (tagai i le Mose 2:26; 6:9), ua tatou iloa ai e foliga o tatou tino i Lona tino. Ua faaofuina Lona agaga faavavau i se tino faaletino o aano ma ivi (tagai i le MFF 130:22). Ae peitai, ua faaatoatoaina ma faamamaluina le tino o le Atua i se mamalu e le mafaamatalaina.

E atoatoa le Atua. O Ia o se Atua o le amiotonu, faatasi ma uiga e pei o le alofa, alofa mutimutivale, alofa moni, upumoni, mana, faatuatua, malamalama, ma le faamasinoga. Ua ia te Ia le mana uma. Ua Ia silafia mea uma. Ua tumu o Ia i le agalelei.

O mea lelei uma e mai le Atua. O mea uma lava Na Te faia, e fesoasoani ai i Lana fanau ia avea e pei o Ia. Ua Ia fetalai mai, “Faauta, o la’u galuega ma lo’u mamalu lenei—ia faataunuu le faaofuina o le tagata i le tino ola pea ma le ola faavavau” (Mose 1:39).

  • Aisea e taua ai lo tatou malamalama i le natura o le Atua?

Ina Ia Tatou Iloa Le Atua

  • E mafai faapefea ona tatou iloa le Atua?

E matua taua tele le iloa o le Atua o lea na fetalai ai le Faaola e faapea: “O le ola e faavavau foi lenei, ia latou iloa oe le Atua moni e toatasi, atoa ma Lē ua e auina mai, o Iesu Keriso lea” (Ioane 17:3).

Ua ta’u mai ia i tatou e le poloaiga muamua ma le sili e faapea, “E te alofa atu i le Alii lou Atua ma lou loto atoa” (Mataio 22:37).

O le tele o lo tatou iloa o le Atua, o le tele foi lea o lo tatou alolofa ia te Ia ma tausia Ana poloaiga (tagai i le 1 Ioane 2:3–5). O le tausia o Ana poloaiga, e mafai ai ona avea i tatou e pei o Ia.

E mafai ona tatou iloa le Atua pe afai tatou te:

  1. Talitonu o loo soifua o Ia ma e alofa o Ia ia i tatou (tagai i le Mosaea 4:9).

  2. Suesue i tusitusiga paia (tagai i le 2 Timoteo 3:14–17).

  3. Tatalo atu ia te Ia (tagai i le Iakopo 1:5).

  4. Usitai i Ana poloaiga uma i le mea sili tatou te mafaia (tagai i le Ioane 14:21–23).

A tatou faia ia mea, o le a tatou iloa le Atua, ma iu ina tatou maua le ola e faavavau.

  • Manatunatu loloto i mea uma e mafai ona e faia e faalatalata atu ai i le Atua.

Mau Faaopoopo

Lolomi