Tusi ma Lesona
Mataupu 45: O Le Meleniuma

Mataupu 45

O Le Meleniuma

A male lion and lamb lying peacefully next to each other in a grassy field. Rolling hills are in the background. There are clouds in the sky. The image portrays the peace among animal life that will exist during the Millennium.

O Tagata o i le Lalolagi i le taimi o le Meleniuma

  • O ai o le a i le lalolagi i le taimi o le Meleniuma?

O tausaga e afe o le filemu, alofa, ma le olioli, o le a amata i le lalolagi i le Afio Mai Faalua o Iesu Keriso. O lenei vaitaimi o le afe o tausaga, ua ta’ua o le Meleniuma. Ua fesoasoani mai tusitusiga paia ma perofeta ia i tatou ia tatou malamalama ai i le tulaga o le a tatou ola ai i le lalolagi i le taimi o le Meleniuma.

Talu ai ona e faaumatia tagata amioleaga i le Afio Mai Faalua o le Faaola, e na o tagata amiotonu o le a i ai i le lalolagi i le amataga o le Meleniuma. O i latou ia o e sa ola i olaga mama ma le faamaoni. O i latou ia a lē o le malo terasitila latou te maua, o le malo selesitila.

I le Meleniuma, o le a i ai pea i le lalolagi tagata i o latou tino faaletino e pei ona i ai nei, ma o le a latou fanauina foi fanau e pei ona tatou fanauina i le taimi nei (tagai i le MFF 45:58). Fai mai Iosefa Samita o le a asiasi soo mai i le lalolagi tagata tino ola pea. O ia tagata toetutu o le a fesoasoani i le taitaiga ma isi galuega. (Tagai i le Aoaoga a le Perofeta o Iosefa Samita, filifilia e Iosefa Filitia Samita [1976], 268.)

O le a i ai pea i tagata lo latou faitalia, ma e toatele o le a saoloto e faaauau pea a latou tapuaiga ma manatu mo sina taimi. Ae oo mai le taimi e talitonu ai ma ta’uta’u e tagata uma o Iesu Keriso o le Faaola.

I le Meleniuma, o Iesu lava Ia o le a “nofotupu i le lalolagi” (Mataupu Faavae o le Faatuatua 1:10). Ua faamatala mai e Iosefa Samita o Iesu o le a “nofotupu i le Au Paia ma afio mai i lalo ma faatonu” (Aoaoga a Peresitene o le Ekalesia: Iosefa Samita [2007], 274).

O Galuega a le Ekalesia i le taimi o le Meleniuma

  • O a galuega maoae e lua o le a faia i le taimi o le Meleniuma?

E i ai ni galuega tetele se lua o le a faia e tagata o le Ekalesia i le taimi o le Meleniuma: galuega i le malumalu ma le talaiga o le talalelei. O galuega i le malumalu e aofia ai sauniga e tatau mo le faaeaga. O ia sauniga e aofia ai le papatisoga, le faaee atu o lima mo le meaalofa o le Agaga Paia, ma sauniga o le malumalu—o le faaeega paia, faaipoipoga i le malumalu, ma le faamauga faatasi o aiga.

E toatele tagata ua maliliu e aunoa ma lo latou mauaina o ia sauniga. E tatau i tagata i le lalolagi ona faia nei sauniga mo i latou. O loo faia lenei galuega i malumalu o le Alii. E tele naua galuega e tatau ona faia ao lei amataina le Meleniuma, ina ia mafai ona faamaeaina i lena taimi. O le a fesoasoani mai tagata toetutu ia i tatou e faasa’o mea sese na tatou faia i le sailiga o o tatou tuaa ua maliliu. O le a latou fesoasoani mai foi ia i tatou ia tatou maua faamatalaga tatou te manaomia e faamaea ai a tatou talafaamaumau. (Tagai i le Joseph Fielding Smith, Doctrines of Salvation, tuufaatasia e Bruce R. McConkie, 3 voluma. [1954–56], 2:167, 251–52.)

O le tasi galuega tele o le a faia i le taimi o le Meleniuma, o le talaiga o le talalelei. O le a aoao atu le talalelei ma le mana tele i tagata uma. E oo mai le taimi o le a le manaomia ai ona aoao atu i isi uluai mataupu faavae o le talalelei aua “e iloa a’u e i latou uma lava, o tagatanuu atoa ma alii, o loo fetalai mai ai Ieova” (Ieremia 31:34).

  • E faapefea ona tatou saunia nei mo le galuega o le Meleniuma?

Tulaga i le taimi o le Meleniuma

  • O a auala o le a ese ai le olaga i le taimi o le Meleniuma mai le olaga o loo i ai nei i le lalolagi?

Na aoao mai le Perofeta o Iosefa Samita e faapea o le taimi o le Meleniuma, “o le a faafouina le lalolagi ma maua lona mamalu faaparataiso” (Mataupu Faavae o le Faatuatua 1:10).

O Le a Saisaitia Satani

I le taimi o le Meleniuma, o le a saisaitia Satani. O lona uiga, o le a leai sona mana e faaosooso ai i latou o e o le a ola i le taimi lena (tagai i le MFF 101:28). O “fanau e ola ae i le faaolataga e aunoa ma le agasala” (MFF 45:58). “Ona o le amiotonu o le …nuu [o le Alii], e le pule ai Satani; o lea e le matala ai o ia i tausaga e tele, aua e leai sana pule i loto o le nuu, aua ua latou nonofo i le amiotonu, e pule aoao foi Le Paia o Isaraelu” (1 Nifae 22:26).

Filemu i le Lalolagi

I le taimi o le Meleniuma, o le a le i ai ni taua. O le a nonofo faatasi tagata i le filemu ma le lotogatasi O mea uma sa faaaogaina mo taua o le a faaaogaina mo mea aoga. “Ona latou tu’i ai lea [o a] latou pelu e fai ma suotosina, o a latou tao foi e fai ma polo e teu ai vine; e le sii atu le pelu e le tasi nuu i le tasi nuu, latou te le aoao foi i taua” (Isaia 2:4; tagai foi i le Isaia 11:6–7; MFF 101:26).

O Le Malo Amiotonu

O le a nofotupu le Alii i le lalolagi atoa, ma o le a i ai moni tagata uma i lalo o Lana puleaga, ma o le a faailoa atu e nuu uma i lalo o le lagi Lana pule, ma ifo atu i Lona tootoo. O i latou e auauna atu ia te Ia i le amiotonu o le a fesootai ma le Atua, ma Iesu; o le a i ai foi le auaunaga a agelu, ma o le a latou iloa le taimi ua tuanai, o le taimi nei, ma le lumanai; ao isi tagata, e le usiusitai atoatoa atu i Ana poloaiga, pe aoaoina atoa foi i Ana feagaiga, e tatau ona matua usitai atu ma le atoatoa i Lana faigamalo. Aua o le nofoaiga a le Atua i le lalolagi, o le a Ia faamalosia Ana tulafono, ma ua poloaiina o le a usitai mai nuu uma o le lalolagi o Lana aia tatau tonu lava lea” (Aoaoga a Peresitene o le Ekalesia: Ioane Teila [2001], 241–42).

Leai Se Oti

I le taimi o le Meleniuma, o le a leai se oti e pei ona tatou iloa nei. A oo ina oo atu le ola o tagata i le tausaga ua matuā matua lava, o le a le oti i latou ma tanumia. Ae o le a suia lo latou tulaga faaletino i se tulaga atoatoa i le “emo o le mata.” (Tagai i le MFF 63:51; 101:29–31.)

O Le a Faailoa Mai Mea Uma

E i ai nisi upumoni e lei faailoa mai ia i tatou. O le a faaalia mai mea uma lava i le Meleniuma. Ua fetalai mai le Alii o le a “faaalia e Ia mea uma—o mea ua tuanai, ma mea ua natia e lei iloa e se tagata, o mea o le lalolagi na faia ai, ma Lona aoga atoa ma lona iuga—o mea sili ona taua, o mea i luga, ma mea i lalo, o mea i totonu o le lalolagi, ma luga o le lalolagi atoa ma mea i le lagi” (MFF 101:32–34).

O Isi Gaoioiga o le a Faia i le Meleniuma

I le tele lava o mea, o le tulaga o le soifuaga o le a pei lava ona i ai i le taimi nei, vagana ai o mea uma o le a faia i le amiotonu. O le a aai ma feinu pea tagata ma lavalava e pei ona latou faia. (Tagai i le Aoaoga a Peresitene o le Ekalesia: Polika Iaga [1997], 333.) O le a toto ma selesele pea e tagata faatoaga ma fausia fale (tagai i le Isaia 65:21).

  • O a ou manatu ma lagona e uiga i tulaga o le a i ai i le taimi o le Meleniuma?

O Le Taua Faaiu Pe a Mavae Le Meleniuma

  • O le a le taunuuga faaiu o le lalolagi?

I le faaiuga o le 1,000 o tausaga, o le a tatala ai Satani mo se taimi puupuu. E i nisi tagata o le a liliuese mai le Tama Faalelagi. O le a faapotopoto e Satani ana au, ma o le a faapotopoto foi e Mekaeli (Atamu) au o le lagi. I lena taua tele, o le a tuliesea ai e faavavau Satani ma e mulimuli ia te ia. O le a liua foi le lalolagi ma avea ma malo selesitila. (Tagai i le MFF 29:22–29; 88:17–20, 110–15.)

Mau Faaopoopo