Mataupu 14

O Le Faatulagaga O Le Perisitua

Ua I Ai Nei i le Lalolagi Le Perisitua

Ua taitaia le Ekalesia a Iesu Keriso o le Au Paia o Aso e Gata Ai e ala i le perisitua. O le perisitua, e o faatasi ma le galuega a le Atua i taimi uma lava, “e tumau pea i le Ekalesia a le Atua i tupulaga uma, ma e leai se amataga o aso po o se iuga o tausaga” (MFF 84:17). Ua i ai le perisitua i le lalolagi i ona po nei. E papatisoina alii talavou ma alii ua matutua i le Ekalesia, ma a oo ina iloiloina i latou ua agavaa, ona faauuina lea o i latou i le perisitua. E tuu atu ia i latou le pule e galulue ai mo le Alii, ma fai Lana galuega i le lalolagi.

E Lua Vaega o le Perisitua

• Na faapefea ona maua igoa o le Perisitua Mekisateko ma le Perisitua Arona?

Mo faiaoga: Faaaoga fesili i le amataga o se vaega e amata ai se talanoaga ma faamalosia ai tagata o le vasega po o tagata o le aiga e faaaoga le tusi lesona e saili ai faamatalaga faaopoopo. Faaaoga fesili i le faaiuga o se vaega e fesoasoani i tagata o le vasega po o tagata o le aiga e mafaufau loloto ai ma talanoaina le uiga o mea ua latou faitauina ma faaaoga ai i o latou olaga.

Ua vaevaeina le perisitua i ni vaega se lua: o le Perisitua Mekisateko ma le Perisitua Arona (tagai i le MFF 107:1). “O le ala ua ta’ua ai le muamua o le Perisitua Mekisateko ona o Mekisateko o le faitaulaga sili maoae.

“A o le i oo i ona aso sa ta’ua o le Perisitua Paia, e tusa ma le faatulagaga a le Alo o le Atua.

“A ona o le faaaloalo po o le migao i le igoa o Lē Silisili, ina ia aloese ai le faaaoga soo o lona igoa, na faaigoaina ai lea perisitua ia Mekisateko, po o le Perisitua faa-Mekisateko, e i latou, le ekalesia, i aso anamua” (MFF 107:2–4; faatusilima i le uluai kopi).

O le perisitua maualalo, o se faaopoopoga i le Perisitua Mekisateko. Ua ta’ua o le Perisitua Arona aua sa tuuina mai ia Arona ma ona atalii i o latou tupulaga uma. O i latou e umia le Perisitua Arona, ua i ai le pule latou te faia ai sauniga faaletino o le faamanatuga ma le papatisoga. (Tagai i le MFF 20:46; 107:13–14, 20.)

O i latou e umia le Perisitua Mekisateko, ua i ai le mana ma le pule e taitai ai le Ekalesia ma taitaia le talaiga o le talalelei i le lalolagi atoa. Latou te vaaia galuega uma faaleagaga a le Ekalesia (tagai i le MFF 84:19–22; 107:8). Latou te taitaia galuega e faia i malumalu; latou te pulefaamalumalu i uarota, paranesi, siteki, ma misiona. O le perofeta filifilia a le Alii, le Peresitene lea o le Ekalesia, o le faitaulaga sili pulefaamalumalu i le Perisitua Mekisateko (tagai i le MFF 107:65–67).

Ki o le Perisitua

• O le a le eseesega i le va o le perisitua ma ki o le perisitua? O ai taitai perisitua e mauaina ki?

E i ai le eseesega i le va o le faauuina i se tofi o le perisitua ma le mauaina o ki o le perisitua. Ua aoao mai Peresitene Iosefa F. Samita:

“O le Perisitua i lona aotelega o le pule ua tuuina mai i tagata latou te galulue ai mo le Atua. O alii taitasi ua faauuina i soo se vaega o le perisitua, ua i ai lenei pule ua tuuina atu ia te ia.

“Ae peitai o gaoioiga uma e faia i lalo o lenei pule, e ao ona faia i le taimi ma le nofoaga e tatau ai, i le auala e tatau ai, ma mulimuli i le faatulagaga e tatau ai. O le mana e taitaia ai ia galuega, o ki ia o le Perisitua. I lona atoatoaga, o ki e umia e le tagata e toatasi i taimi taitasi, o le perofeta lea ma le peresitene o le Ekalesia. E mafai ona ia faamatuu atu se isi vaega o lenei mana i se tasi, i lea la tulaga o le a umia ai e lena tagata ki mo lena matafaioi faapitoa. O lea, o le peresitene o le malumalu, o le peresitene o le siteki, o le epikopo o le uarota, o le peresitene o le misiona, o le peresitene o le korama, ua taitasi ma umia ki o galuega e faataunuuina mo lena vaega po o le nofoaga faapitoa. O lona Perisitua ua le faalauteleina ona o lona valaauga faapitoa; …o le peresitene o le korama a toeaina, mo se faataitaiga, ua le sili ae lona Perisitua nai lo i latou o loo i ai i le korama. A ua ia umia le mana e taitaiina ai le galuega faatulagaina e faia e le korama, pe a tuu i se isi faaupuga, o ki o lena vaega o le galuega” (Aoaoga a Peresitene o le Ekalesia: Iosefa F. Samita [1998], 141; faatusilima o loo i le uluai kopi).

• E faapefea ona puipuia le Ekalesia e ki o le perisitua?

O Tofi ma Tiute o le Perisitua Arona

• O a auala e auauna atu ai i latou o loo umia le Perisitua Arona?

A faaee atu le Perisitua Arona i se alii po o se tama [boy], ua faauuina o ia i se tofi o lena perisitua. O tofi i le Perisitua Arona o le tiakono, aoao, ositaulaga, ma le epikopo. Ua tofu tofi taitasi ma ona tiute ma matafaioi e tauaveina. O vaega po o korama taitasi e pulefaamalumalu ai se taitai vaega po o se peresitene o le korama, o lē na te aoao atu i tagata o le korama o latou tiute, ma tuu atu ia i latou ni tofiga e fai.

E i ai nisi alii e auai i le Ekalesia pe ua toe toaaga mai i le Ekalesia a ua mavae atu tausaga e masani ona maua ai e alii tofi o lea perisitua. E masani lava ona faauuina i latou i se tofi o le Perisitua Arona ma e le umi se taimi ae siitia atu i tofi maualuluga pe afai ua agavaa i latou.

Tiakono

O se alii talavou ua papatiso ma faamau o se tasi o le Ekalesia ma ua agavaa, e mafai ona faauu o ia i le tofi o le tiakono pe a 12 ona tausaga. O le tofiga masani o le tiakono o le tufatufa atu o le faamanatuga i tagata o le Ekalesia, tausi mama fale ma fanua o le Ekalesia, avea ma avefeau mo taitai o le perisitua, ma fai isi tofiga faapitoa e pei o le aoina mai o le taulaga anapogi.

Aoao

E mafai ona faauuina se tama agavaa i le tofi o le aoao pe a sefulufa ona tausaga. Ua i aoao tiute, aia, ma mana uma o le tofi tiakono, ma nisi tiute faaopoopo. Ua i aoao o le Perisitua Arona le tiute o le fesoasoani i tagata o le Ekalesia ia ola i poloaiga (tagai i le MFF 20:53–59). Ina ia fesoasoani e faia lena tiute, e masani ona tofia i latou e avea ma faiaoga o aiga. Latou te asiasi atu i aiga o tagata o le Ekalesia ma faamalosi atu ia i latou ia ola i mataupu o le talalelei. Ua poloaiina i latou ia aoao atu upu moni o le talalelei mai tusitusiga paia (tagai i le MFF 42:12). O aoao foi latou te saunia le areto ma le vai mo le faamanatuga.

Ositaulaga

E mafai ona faauuina se tama ua agavaa i le ositaulaga pe a sefuluono ona tausaga pe sili atu. Ua i ai i ositaulaga tiute, aia, ma mana uma o le tofi o le tiakono ma le aoao, faapea ma nisi tiute faaopoopo (tagai i le MFF 20:46–51). E mafai e le ositaulaga ona papatisoina [tagata]. E mafai foi ona ia faamanuia le faamanatuga. E mafai ona ia faauu isi ositaulaga, aoao, ma tiakono. E mafai e se ositaulaga ona taitai i sauniga pe a leai se tasi o umia le Perisitua Mekisateko. Ua ia te ia le tiute o le aoao atu o le talalelei ia i latou ua faatasi ma ia.

Epikopo

O le epikopo ua faauu ma vaetofia e pulefaamalumalu i le Perisitua Arona i le uarota. O ia o le peresitene o le korama a ositaulaga (tagai i le MFF 107:87–88). A galue le epikopo i lona tofi i le Perisitua Arona, na o mea faaletino e galue ai, e pei o le vaaia o tupe ma talafaamaumau ma le tausiga o e matitiva ma lē tagolima (tagai i le MFF 107:68).

O le epikopo ua faauuina foi o se faitaulaga sili ina ia mafai e ia ona pulefaamalumalu i tagata uma o le uarota (tagai i le MFF 107:71–73; 68:15). O le epikopo o se faamasino i Isaraelu (tagai i le MFF 107:74) ma faatalanoaina tagata o le Ekalesia mo pepa faataga o le malumalu, faauuga i le perisitua, ma isi tulaga manaomia. Ua ia te ia le aia na te maua ai le meaalofa o le iloatino.

• O faapefea ona faamanuiaina oe e ala i auaunaga a i latou o loo umia le Perisitua Arona?

O Tofi ma Tiute o le Perisitua Mekisateko

• O a nisi o auala o loo auauna ai i latou o loo umia le Perisitua Mekisateko?

O tofi o le Perisitua Mekisateko o le toeaina, faitaulaga sili, peteriaka, Fitugafulu, ma le Aposetolo.

Toeaina

Ua valaauina toeaina e aoao, folafola, papatiso, ma leoleo i le Ekalesia (tagai i le MFF 20:42). O i latou uma ua umia le Perisitua Mekisateko o ni toeaina. Ua ia i latou le pule e tuuina atu ai le meaalofa o le Agaga Paia e ala i le faaee atu o lima (tagai i le MFF 20:43). E tatau i toeaina ona taitai sauniga o le Ekalesia e pei ona taitaia ai e le Agaga Paia (tagai i le MFF 20:45; 46:2). E mafai e toeaina ona faamanuia e mama’i (tagai i le MFF 42:44) ma faamanuia fanau laiti (tagai i le MFF 20:70). E mafai e toeaina ona pulefaamalumalu i sauniga o le Ekalesia pe a leai se faitaulaga sili (MFF 107:11).

Faitaulaga Sili

Ua tuuina atu i se faitaulaga sili le pule e taitai ai i le Ekalesia ma vaaia mea faaleagaga (tagai i le MFF 107:10, 12). Ua ia te ia le pule e faia ai tofiga o tofi maualalo uma (tagai i le MFF 68:19). O peresitene o siteki, peresitene o misiona, lagolago maualuga, au epikopo, ma isi taitai o le Ekalesia, ua faauuina i le tofi faitaulaga sili.

Peteriaka

O Peteriaka e faauuina e le Au Pulega Aoao o le Ekalesia, po o peresitene o siteki pe a tuuina atu ia te i latou le pule e le Aufono a le Toasefululua, latou te tuuina atu i tagata o le Ekalesia faamanuiaga faapitoa faapeteriaka. O nei faamanuiaga e tuuina mai ai ia te i tatou se malamalama e uiga i o tatou valaauga i le lalolagi. O nei faamanuiaga o afioga lava a le Alii ia i tatou taitoatasi. O peteriaka foi o ni faitaulaga sili ua faauuina. (Tagai i le MFF 107:39–56.)

Fitugafulu

O fitugafulu o ni molimau faapitoa ia Iesu Keriso i le lalolagi, ma fesoasoani e atiina ae ma taitaia le Ekalesia i lalo o le taitaiga a le Au Peresitene Sili ma Aposetolo e Toasefululua (tagai i le MFF 107:25, 34, 38, 93–97).

Aposetolo

O le Aposetolo o se molimau faapitoa ia Iesu Keriso i le lalolagi atoa (tagai i le MFF 107:23). O Aposetolo latou te faatautaia mataupu a le Ekalesia i le lalolagi atoa. O i latou ua faauuina i le tofi o le Aposetolo i le Perisitua Mekisateko, e masani ona vaetofia o sui o le Korama a Aposetolo e Toasefululua. Ua tuuina atu ia i latou taitoatasi ki uma o le malo o le Atua i le lalolagi, ae na o le Aposetolo sinia, o le Peresitene o le Ekalesia, na te mafai ona faaaogaina ia ki uma. O isi, e galulue i lalo o lana taitaiga.

• Ua faapefea ona faamanuiaina oe e ala i le auaunaga a i latou e umia le Perisitua Mekisateko?

O Korama o le Perisitua Arona

Ua faatonu mai e le Alii ia faatulagaina tagata uma e umia le perisitua i ni korama. O se korama o se vaega o uso ua umia le tofi e tasi o le perisitua.

E tolu korama i le Perisitua Arona:

1. O le korama a tiakono, e aofia ai tiakono e 12 (tagai i le MFF 107:85). O le au peresitene o le korama a tiakono e valaauina e le epikopo mai tagata o la latou lava korama.

2. O le korama a aoao, e aofia ai aoao e 24 (tagai i le MFF 107:86). O le au peresitene o le korama a aoao e valaauina e le epikopo mai tagata o la latou lava korama.

3. O le korama a ositaulaga, e aofia ai ositaulaga e fasefulu valu (tagai i le MFF 107:87–88). E pulefaamalumalu ai le epikopo o le uarota lea e i ai le korama. O le epikopo o se faitaulaga sili ma o lea e auai foi o ia i le korama a le au faitaulaga sili.

Pe a sili atu le aofaiga mai le fuainumera ua ta’u mai mo se korama, ua mafai loa ona vaeluaina le korama.

O Le Korama o le Perisitua Mekisateko

I le tulaga aoao o le Ekalesia, e faatulagaina uso o le Au Peresitene Sili i se korama, e pei ona faia i Aposetolo e Toasefululua. E faatulagaina foi Fitugafulu i ni korama.

I le tulaga o le Ekalesia i nuu ma alalafaga—i uarota ma paranesi ma siteki ma itu—e faatulagaina i latou ua umia le Perisitua Mekisateko i korama nei:

Korama a Toeaina

O korama taitasi a toeaina “ua faatuina e avea ma auauna tumau; e ui i lea, e mafai ona latou malaga, peitai ua faauuina i latou e avea ma auauna tumau” (MFF 124:137). E faia le tele o a latou galuega e latalata i o latou aiga. O le korama e aofia ai ni toeaina e oo atu i le 96, e pulefaamalumalu ai se au peresitene o le korama. A oo ina silia ma le fuainumera lea, ona mafai lea ona vaelua le korama.

Korama a Faitaulaga Sili

O korama taitasi a faitaulaga sili e aofia ai faitaulaga sili uma i totonu o le siteki, e aofia ai peteriaka ma epikopo. O le peresitene o le siteki ma ona fesoasoani o le au peresitene lena o le korama lea. O faitaulaga sili i uarota taitasi e faatulagaina i se vaega faatasi ma se taitai vaega.

O Le Taua o Korama o le Perisitua

• E faapefea ona fesoasoani korama ma ausilali a le perisitua e faamalolosia tagata taitoatasi ma aiga?

Pe a faauuina i le perisitua, o le a avea loa se tane po o se tama [boy] ma se uso i se korama o le perisitua. E amata mai i lena taimi ma le olaga atoa, e famoemoe e avea pea o ia ma se uso i se korama o le perisitua e tusa ma lona tofi i le perisitua (tagai i le Boyd K. Packer, “What Every Elder Should Know—and Every Sister as Well: A Primer on Principles of Priesthood Government,” Ensign, Fepuari 1993, 9).

Afai e faagaoioia se korama o le perisitua i le ala sa’o, o le a faamalolosia uso o le korama, faamanuiaina, faaaumeaina, ma aoaoina i le talalelei e o latou taitai. E moni lava e mafai ona faamaloloina se alii mai valaauga o le Ekalesia, e pei o le avea ma faiaoga, peresitene o se korama, epikopo, lagolago maualuga, po o le peresitene o le siteki, ae le suia ai le avea o ia ma se uso o se korama. O le avea ma uso o se korama o le perisitua e tatau ona manatu i ai o se avanoa paia.

Ausilali i le Perisitua

• E faapefea ona fesoasoani ausilali o le perisitua i tagata taitoatasi ma aiga?

O faalapotopotoga uma i le Ekalesia e galulue i lalo o le taitaiga a taitai perisitua ma fesoasoani ia i latou e tauaveina le galuega o le Alii. Mo se faataitaiga, o au peresitene o le faalapotopotoga o le Aualofa, Tamaitai Talavou, Alii Talavou, Peraimeri, ma le Aoga Sa i se uarota e auauna i lalo o le taitaiga a le au epikopo. O nei faalapotopotoga ua ta’ua o ausilali i le perisitua.

• O a ni au matafaioi o oe o se tagata e toatasi e te fesoasoani ai i korama o le perisitua ma ausilali i le perisitua ina ia faamanuiaina?

Mau Faaopoopo

• Alema 13:1–19 (ala na faauu ai alii i le perisitua)

• Mataio 16:19; MFF 68:12 (sa tuu atu i Aposetolo ia ki ma le mana; o mea latou te faamau faailogaina i le lalolagi, e faamau faailogaina foi i le lagi)

• MFF 20:38–67 (tiute o toeaina, ositaulaga, aoao, tiakono)

• MFF 84; 107 (faaaliga e uiga i le perisitua)

• 1 Korinito 12:14–31 (e taua tofi uma o le perisitua)