Tusi ma Lesona
Mataupu 27: O Le Galue ma le Tiute o le Tagata Lava Ia

Mataupu 27

O Le Galue ma le Tiute o le Tagata Lava Ia

A man working indoors on a lathe.

O Le Galue o se Mataupu Faavae e Faavavau

  • O a ni mea na e oo i ai na faaali atu ai ia te oe le taua o le galue?

Ua faaali mai e lo tatou Tama Faalelagi ma Iesu Keriso ia Laua faataitaiga ma aoaoga le taua o le galue i le lagi ma le lalolagi. Sa galue le Atua e foafoa le lagi ma le lalolagi. Sa Ia faapotopotoina faatasi o sami i le mea e tasi ma faaaliali ae le eleele matutu. Sa Ia faia vao, laau iti, ma laau tetele ia tutupu ae i le eleele. Sa Ia faia le la, le masina, ma fetu. Sa Ia faia mea ola uma i le sami ma le laueleele. Ona Ia tuu lea i ai o Atamu ma Eva i le lalolagi la te tausia ma pulea isi mea ola uma. (Tagai i le Kenese 1:1–28.)

Na fetalai mai Iesu, “O loo galue Lo’u Tama e oo mai lava i le aso nei; o loo galue foi A’u” (Ioane 5:17). Ua Ia fetalai mai foi, “E tatau ona ou faia galuega a Le ua auina mai A’u” (Ioane 9:4).

Ua Poloaiina I Tatou Ia Tatou Galulue

Ua avea lava le galue ma se ala masani o le olaga i le lalolagi talu mai le taimi na tuua ai e Atamu ma Eva le Faatoaga o Etena. Sa fetalai atu le Alii ia Atamu, “E te ai foi au meaai ma le afu o ou mata” (Kenese 3:19). Sa galulue Atamu ma Eva i le fanua ina ia mafai ona la maua ai mea la te manaomia ma mea e manaomia e a la’ua fanau (tagai i le Mose 5:1).

Sa fetalai le Alii i le fanauga a Isaraelu, “O aso e ono e te galue ai” (Esoto 20:9).

I ona po muamua o le Ekalesia Toefuataiina, sa fetalai mai le Alii i le Au Paia o Aso e Gata Ai, “O lenei, o A’u, le Alii, ua Ou le fiafia i e nonofo i Siona, aua ua i ai e faatalanoa ia te i latou” (MFF 68:31).

Ua fai mai se tasi o perofeta a le Atua, “E tatau ona toe faapaleina le galue o se mataupu faatumutumuina i olaga o tagata o la tatou Ekalesia” (Heber J. Grant, Aoaoga a Peresitene o le Ekalesia: Heber J. Grant [2002], 115).

Tiute Faaleaiga

  • O a nisi o tiutetauave o tama, tina, ma fanau e faatumauina ai se aiga? O a ni mea e mafai ona faia e tagata o le aiga e tauave faatasi ai le galuega i le aiga?

E galulue faatasi matua e saunia mea mo le manuia faaletino, faaleagaga, ma faalelagona o lo laua aiga. E le tatau lava ona faamoemoe i laua e faia e se tasi lenei tiute mo i laua. Sa faapea ona tusia e le Aposetolo o Paulo, “Afai e le tausi e se tasi lona aiga, afai foi e le sili ona tausi i e mau ma ia, ua faafitia e ia le faatuatua” (1 Timoteo 5:8).

E tatau i matua ona saili atu le taitaiga mai le Alii ma mulimuli i fautuaga a perofeta i le faataunuuina o tiute o le tagata lava ia. O le faavaeina o se aiga e faavae i aoaoga faavae o le talalelei o loo aoaoina i aso taitasi ma o loo i ai le alofa ma le faatulagaga tatau o mea uma e matua taua lava e pei o le saunia o manaoga faavae o meaai ma lavalava.

E tatau i fanau ona faia la latou vaega i galuega a le aiga. E tatau ona tuuina atu i fanau ni galuega latou te faia, e talafeagai ma lo latou malosi. E manaomia ona faamalo atu ia i latou mo galuega lelei latou te faia. O uiga lelei e faaalia i le galue, o mausa, ma tomai, e aoaoina e ala i aafiaga faamanuiaina i totonu o le aiga.

O nisi taimi e feagai ai tagata ma mea faigata a o taumafai e saunia mea e manaomia mo o latou aiga. O se gasegase tumau, maliu o le toalua, po o le faaopoopo mai o se isi tagata matua e mafai ona faateleina ai tiute o le aiga. E manatua e lo tatou Tama Faalelagi aiga o i ai tulaga faapenei ma tuuina atu le malosi ia te i latou e tauaveina ai o latou tiute. E faamanuiaina i latou e le Tama i taimi uma lava pe afai latou te ole atu ia te Ia i le faatuatua.

E Mafai Ona Tatou Maua Le Fiafia Ia Tatou Galuega

  • E faapefea ona aafia a tatou galuega i o tatou uiga faaalia?

I nisi tagata, o le galue, o se mea e sili ona lē lelei. A o isi tagata o le galue o se vaega e sili ona fiafia o le olaga. O se tasi o ala e mafai ona maua ai manuia uma o le olaga, o le aoao lea ia fiafia e galue.

E le mafai e i tatou uma ona filifili le ituaiga o galuega tatou te faia. O nisi o i tatou e galulue i le tele o itula mo mea e tatau tatou te manaomia. E faigata ona maua le fiafia i galuega faapena. Peitai, o tagata sili ona fiafia, o tagata ia ua latou aoao e fiafia ia latou galuega, e tusa lava po o le a.

E mafai ona tatou fesoasoani le tasi i le isi ia tatou galuega. E oo i galuega sili ona mamafa e māmā pe a fesoasoani atu i ai se tasi.

E taua tele o tatou uiga faaalia i le galue. O se tala faataitai lenei ua faaali mai ai le ala na vaai atu ai se tasi alii i tala atu o ana galuega i aso taitasi. E i ai se tagata malaga na ui ane i tafatafa o se mauga maa, ma sa ia vaaia ai ni alii se toatolu o faigaluega ai. Sa fesili atu o ia i alii taitoatasi po o le a lana mea o fai. Sa faailoa mai i tali a nei tagata taitoatasi le eseese o uiga faaalia i le galuega e tasi o loo latou faia. “O loo ou tipiina le maa,” o le tali lea a le alii muamua. Sa tali mai le tagata lona lua, “O lea ou te galue mo ni fasi auro se tolu i le aso.” Ae tali mai le tagata lona tolu ma le laumata fiafia, “O lea ou te fesoasoani e fausia se maota o le Atua.”

Soo se galuega faamaoni tatou te faia, e mafai ona tatou auauna atu ai i le Atua. Fai mai le Tupu o Peniamina, o se perofeta sa Nifae, “Pe a i ai outou i le galuega a o outou uso, ua i ai outou i le galuega a le Atua” (Mosaea 2:17). Afai na o mea tatau ai mo i tatou lava ma o tatou aiga ua maua ia tatou galuega, o lena lava tatou te fesoasoani i nisi o fanau a le Atua.

  • E mafai faapefea ona faaleleia atili o tatou uiga faaalia i le galue?

E Ta’usalaina e le Atua Le Nofonofovale

E le fiafia le Alii i e ua paie pe nofonofovale. Ua Ia fetalai mai, “E leai se nofoaga o e ua paie i le ekalesia, sei iloga e salamo ma sui ona ala” (MFF 75:29). Ua Ia poloai mai foi, “Aua e te paie, aua o le paie e le ai i le areto pe ofu i le ofu o lē galue” (MFF 42:42).

Mai lava i ona po muamua o le Ekalesia, o loo aoao mai pea lava e o tatou perofeta i le Au Paia o Aso e Gata Ai ina ia tutoatasi ma faalagolago ia i tatou lava, ma aloese mai le paie po o le nofonofovale. O le a le tuuesea e ni tagata moni o le Au Paia o Aso e Gata Ai mai ia i latou lava le avega o le tausiga o i latou. Afai lava o loo maua e i latou le tino malosi ma mafai, o le a latou tausia i latou lava ma o latou aiga i mea uma o loo manaomia o le olaga.

E tatau i tagata o le Ekalesia e tusa ma lo latou malosi, ona latou talia foi le tiute o le tausia o tagata o o latou aiga o e ua le mafai ona latou tausia i latou lava.

  • E faapefea ona aafia se tagata i le nofonofovale? se aiga? se nuu?

Galue, Faafiafiaga, Ma Le Malolo

  • Aisea e taua ai le tausisia o le paleni i le va o le galue, faafiafiaga, ma le malolo?

E tatau ona tatou maua le paleni lelei i le va o le galue, faafiafiaga, ma le malolo. E i ai se alagaupu mai anamua e faapea: “O le leai o se mea e faia o le galuega sili ona faigata lena, aua e le mafai e se tasi ona tuu ae sei malolo.” A leai se galuega, e leai se uiga o le malolo.

E le gata ina manaia ma tatau ai le malolo, ae ua poloaiina foi i tatou ia tatou malolo i le aso Sapati (tagai i le Esoto 20:10; MFF 59:9–12). O lenei aso malolo e oo mai pe a mavae atu aso e ono e galue ai, e maua ai le malosi faafouina mo aso e sosoo ai. Ua folafola mai foi e le Alii le “atoatoa o le lalolagi” ia i latou o e tausia le aso Sapati (tagai i le MFF 59:16–20; tagai foi i le mataupu 24 i le tusi lenei).

O isi aso o le vaiaso, e faaopoopo ai i le galue, e mafai foi ona faaaoga se taimi e faaleleia atili ai a tatou taleni ma mea tatou te fiafia e fai, faafiafiaga, ma isi gaoioiga e faafouina ai lo tatou malosi.

  • O le a se mea e mafai ona tatou faia e tausisia ai le paleni lelei i le va o le galue, faafiafiaga, ma le malolo? E mafai faapefea e matua ona fesoasoani ia latou fanau e tausisia lenei paleni?

O Faamanuiaga o le Galue

  • O a nisi o faamanuiaga e maua mai i le galue faamaoni?

Na faaali atu e le Atua ia Atamu, “E te ai au meaai ma le afu o ou mata” (Kenese 3:19). E le gata o lenei mea o se tulafono faaletino, a o se tulafono foi mo le faaolataga o le agaga o Atamu. E leai se eseesega moni i le va o galuega faaleagaga, faalemafaufau, ma le faaletino. E taua le galue ia i tatou taitoatasi mo le alualu i luma, mo le atiina ae o amioga lelei, ma le tele o le fiafia e le iloa e le tagata paie.

Na saunoa mai Peresitene Tavita O. MaKei, “Ia tatou iloa o le avanoa e galue ai, o se meaalofa, ma o le malosi e galue ai, o se faamanuiaga, ma o le fiafia e galue, o le manuia lena” (Pathways to Happiness [1957], 381).

“Ua ola tagata ina ia latou maua le olioli” (2 Nifae 2:25). O le galue o le ki lea o le olioli atoatoa i le fuafuaga a le Atua. Afai tatou te amiotonu, o le a tatou toe foi atu e mau faatasi ma lo tatou Tama Faalelagi, ma e i ai galuega o le a tatou faia. A oo ina avea i tatou faapei o Ia, o le a avea a tatou galuega e pei o Lana galuega. O Lana galuega, o le “faataunuuina [lea o le] faaofuina o le tagata i le tino ola pea ma le ola e faavavau” (Mose 1:39).

Mau Faaopoopo