Folasaga

O Se Taiala Mo Suesuega Ma Se Tusi Lesona a le Faiaoga

Mataupu Faavae o le Talalelei na tusia e avea o se taiala mo suesuega a le tagata lava ia ma avea o se tusi lesona a le faiaoga. Ao e suesue i ai, ma saili atu i le Agaga o le Alii, e mafai ona faatupulaia lou malamalama ma lau molimau i le Atua le Tama, Iesu Keriso ma Lana Togiola, ma le Toefuataiga o le talalelei. E mafai ona e maua tali i fesili o le olaga, maua se faamaoniga o lou faamoemoega ma lou taua, ma taulimaina ma le faatuatua ia lu’i faaletagata lava ia ma faaleaiga.

Faatonuga mo le Aoao Atu i le Ekalesia ma le Aiga

O le avea o se faiaoga o se tiutetauave sili ona taua e aofia ai le tele o avanoa e faamalolosia ai isi ma mautinoa o loo “tausia [i latou] i le afioga a le Atua” (Moronae 6:4). O le a sili ona lelei lou aoao atu pe a e mulimulitaia nei mataupu faavae:

Alofa ia i latou e te aoaoina.
Aoao atu e ala i le Agaga.
Aoao atu aoaoga faavae.
Valaaulia le aoao ma le filiga

Alofa Ia I Latou E Te Aoaoina

A faaali atu lou alofa ia i latou e te aoaoina, o le a faateleina lo latou lagonaina o le Agaga o le Alii. O le a faateleina lo latou tinoū e aoao ma tatala atu o latou lagona ia te oe ma isi o le vasega. Taumafai e te faamasani lelei i tagata o lau vasega, ma faailoa atu ia i latou e faamaoni lou alofa mo i latou. Ia e nofouta i lu’i a i latou o i ai ni manaoga faapitoa. Faatupuina se siosiomaga toafilemu i totonu o lau vasega ina ia saoloto ai lagona o le vasega e talanoa atu ia te oe mo se fesoasoani i soo se tulaga e fesiligia ai e i latou mataupu o le talalelei ma auala e aoga ai ia i latou.

O le a faatasi mai le Agaga o le Alii pe afai e maua le alofa ma le lotogatasi. Na fetalai mai le Alii, “O le poloaiga fou ou te tuu atu ai ia te outou, Ia outou fealofani; faapei ona ou alofa atu ia te outou, ia fealofani foi outou” (Ioane 13:34).

Mo manatu faaopoopo i lenei mataupu, tagai i le O Le Aoao Atu, E Leai Se Isi Valaauga E Sili Ai, itulau 33–41.

Aoao atu e ala i le Agaga.

O mea e sili ona taua o le a e aoaoina atu o mataupu ia a Keriso e pei ona faaalia mai i tusitusiga paia ma perofeta o ona po nei ma ua faamaonia mai e le Agaga Paia. Ina ia lelei ona faia lenei mea, e ao ona e maua le Agaga o le Alii. “O le a tuuina atu foi le Agaga ia te outou i le tatalo i le faatuatua,” na fetalai mai ai le Alii, “ae afai tou te le maua le Agaga, aua tou te aoao atu” (MFF 42:14; tagai foi MFF 50:13–22). O le Agaga Paia o le faiaoga moni lea, o le mea lea e taua tele ai le faatupuina o se siosiomaga e mafai ai ona faatasi mai le Agaga o le Alii.

Mo manatu faaopoopo i lenei mataupu, tagai i le O Le Aoao Atu, E Leai Se Isi Valaauga E Sili Ai, itulau 43–50.

Aoao atu Aoaoga Faavae

Ae e te lei aoao atu mai se mataupu, suesue mae’ae’a le mataupu ina ia mautinoa ua e malamalama i le aoaoga faavae. Ia suesue foi mau faaopoopo o loo lisi atu i le faaiuga o le mataupu. O le a matuai tele atu le faamaoni ma le mana e te aoao atu ai pe a oo ina uunaia oe lava ia i aoaoga o i le mataupu. Aua lava le taumateina aoaoga faavae o le Ekalesia. Ia aoao atu tau lava o mea ua lagolagoina e tusitusiga paia, upu a perofeta ma aposetolo o aso e gata ai, ma le Agaga Paia (tagai i le MFF 42:12–14; 52:9).

Afai ua valaauina oe e faiaoga i se korama po o se vasega e faaaoga ai le tusi lenei, aua nei suitulaga ai nisi tusi i fafo atu, e tusa lava pe lelei ma manaia na tusi. Tumau i le faamaoni i tusitusiga paia ma upu o i totonu o le tusi. Faaaoga aafiaga faaletagata lava ia ma tala mai mekasini a le Ekalesia e fesoasoani i le lesona, pe afai e talafeagai ai.

Mo manatu faaopoopo i lenei mataupu, tagai i le O Le Aoao Atu, E Leai Se Isi Valaauga E Sili Ai, itulau 52–61.

Valaaulia Le Aoao ma le Filiga

A o e aoao atu, fesoasoani atu i isi tagata ia latou iloa le ala e faaaoga ai mataupu faavae o le talalelei i o latou olaga i aso taitasi. Ia faia ni talanoaga i ala e mafai ai e nei mataupu faavae ona aafia o tatou lagona e uiga i le Atua, i tatou lava, o tatou aiga, ma o tatou tuaoi. Faamalosiau i tagata auai e ola e tusa ai ma mataupu faavae.

Taumafai ia faaauai le toatele o tagata i talanoaga o lesona pe afai e mafai. E mafai ona e faia lenei mea i le tofia o i latou e faitau mai se mau, tali ni fesili, pe faamatala mai ni mea na oo ia te i latou, peitai, ia faia na mea pe afai e te mautinoa o le a le faamaina ai i latou. E mafai foi ona e faia ni tofitofiga faapitoa mo tagata o le vasega a o saunia ia lesona. Ia e nofouta i manaoga ma lagona o isi tagata. Atonu foi e te manaomia le talanoa atu faapitoa i tagata taitoatasi a o lei faia le lesona ma fesili atu pe mafai ona latou auai i le tuuina atu o le lesona.

Mo manatu faaopoopo i lenei mataupu, tagai i le O Le Aoao Atu, E Leai Se Isi Valaauga E Sili Ai, itulau 63–79.

Fesoasoaniga Faaopoopo mo Faiaoga

Ua i ai i mataupu taitasi o lenei tusi se faamatalaga mo faiaoga. Ua aofia ai i ia faamatalaga ni manatu e mafai ona fesoasoani ia te oe i lou taumafai e alofa i e o loo e aoaoina, e aoao atu e ala i le Agaga, e aoao atu aoaoga faavae, ma faatupuina ia i latou o loo e aoaoina le filiga faamaoni e aoao.