Mataupu 28
Mataupu Faavae ma Feagaiga 76:50–119
Faatomuaga ma le Faasologa o Taimi
I le aso 16 Fepuari, 1832, a o galulue le Perofeta o Iosefa Samita ma Sini Rikitone i le faaliliuga musuia o le Tusi Paia ma manatunatu loloto i le uiga o le Ioane 5:29, sa tuuina atu ia i la’ua se faaliga, lea o loo tusia i le Mataupu Faavae ma Feagaiga 76. I le vaega o le faaaliga o loo tusia i le Mataupu Faavae ma Feagaia 76:50–119, sa faaali atu ia Iosefa ma Sini i latou o e nonofo i le malo selesitila, terasitila, ma le telesitila ma le taua o le mauaina ma le totoa i le molimau ia Iesu Keriso.
-
25 Ianuari, 1832Sa faauu ai Iosefa Samita e avea ma Peresitene o le Perisitua Maualuga i le taimi o se konafesi a le Ekalesia i Amherst, Ohaio.
-
Faaiuga o Ianuari, 1832Na toe foi ai Iosefa Samita ma Sini Rikitone i Hairama, Ohaio, e galulue i le faaliliuga musuia o le Feagaiga Fou.
-
16 Fepuari, 1832Na maua mai ai le Mataupu Faavae ma Feagaiga 76.
-
24–25 Mati, 1832Na aveina ai Iosefa Samita ma Sini Rikitone e se vaega faatupu faalavelave i le po ma sa tauga le sasaina ma valita ma faapipii i ai fulumanu i Hairama, Ohaio.
Mataupu Faavae ma Feagaiga 76:50–119: Talaaga Faasolopito Faaopoopo
E toatele uluai tagata o le Ekalesia sa auai atoatoa i isi aulotu Kerisiano ma sa taofiofi mamau lava i nisi o o latou talitonuga sa i ai muamua. O upumoni faaleaoaoga faavae na faailoa mai e ala mai i le Perofeta o Iosefa Samita o nisi taimi sa luitauina ai aoaoga faalelotu muamua o nei tagata ae sa o latou maua ai se malamalama tonu atili i le fuafuaga a le Atua. O le taliina o fesili na tulai mai i le taimi o le faaliliuga musuia o le Tusi Paia, lea na amata e le Perofeta ia Iuni 1830 ma faaauau ai pea mo le tusa ma le tolu tausaga, o se tasi lea o auala taua na tatala mai ai e le Alii ia upumoni o le talalelei toefuataiina i le Au Paia. O le faaaliga na tuuina atu ia Iosefa Samita ma Sini Rikitone i le aso 16 Fepuari, 1832, sa segia mai e ala i le faaliliuga musuia o le Ioane 5:29 i le Feagaiga Fou, ma sa matua faalauteleina ai le malamalama o le Au Paia i le ola pe a mavae le oti.
I ona po o Iosefa Samita, e masani lava sa masani le au Kerisiano faapea i le olaga pe a uma le olaga nei, o le a tofia ai e le Atua ni nai tagata i le lagi ma faasalaina uma isi ia puapuagatia e faavavau i seoli. O le vaaiga lea sa masani ai uluai tagata o le Ekalesia. Sa talitonu le tama o le Perofeta, o Iosefa Samita le Matua, ma le tamamatua o le Perofeta o Asaeli Samita i le Laugatasia, o se ituaiga o faaolataga laugatasia lea e iu ina faaolaina e le Atua e amioleaga pe a ua lava ona latou puapuagatia. O upumoni sa faaalia mai i le faaaliga o loo tusia i le Mataupu Faavae ma Feagaiga 76 o loo faamatala mai ai vaega ma’oti o le lagi, poo malo o le mamalu, ma le ala e matua eseese ai le faamasinoga o e amioleaga ma e amiotonu mai vaaiga faalelotu faaagaifanua o le olaga pe a uma le oti. (Tagai Matthew McBride, “The Vision,” in Revelations in Context, ed. Matthew McBride and James Goldberg [2016], 149–50, or history.lds.org.)
Ina ua aoao le Au Paia e uiga i le faaaliga na tuu mai i le Perofeta o Iosefa Samita ma Sini Rikitone, sa faigata i nisi tagata ona taliaina le aoaoga faavae na faaalia mai e le Alii. Na ta’ua e Peresitene Polika Iaga (1801–1877): “Ina ua faaali mai e le Alii ia Iosefa Samita ma Sini Rikitone e faapea, e i ai se nofoaga ua saunia mo tagata uma, e fuafua lea i le malamalama na latou mauaina ma lo latou teenaina o le leaga ae faia le lelei, sa avea lea ma se luitau tele i nisi, ma o nisi ua liliuese ona o le a le auina atu e le Atua i le faasalaga e faavavau i latou e le talitonu ia Keriso ma tamaiti pepe, ae i ai so latou nofoaga i le faaolataga, i le taimi o le Alii, mo tagata uma, ma o le a faamanuiaina i latou e faamaoni ma mama ma tonu, e tusa lava pe sa auai i soo se ekalesia pe leai foi. O se aoaoga faavae fou lea i lenei augatupulaga, ma e toatele sa umi se taimi o taumafai e talia lenei aoaoga”Teachings of Presidents of the Church: Brigham Young [1997], 292).
O Polika Iaga foi ia na faigata ona malamalama i lenei aoaoga faavae i le taimi muamua. Sa ia ta’ua: “Na faapena foi a’u agaifanua, o lea ina ua oo mai le Faaaliga i le taimi muamua ia te au, sa matua faafeagai lava ma feteenai ma mea na aotauina ai au muamua. Sa faapea atu, Faatalitali teisi. Ou te lei teenaina; ae sa le mafai ona ou malamalama i ai.” Fai mai a ia sa manaomia ona “mafaufau ma tatalo, e faitau ma mafaufau, seia oo ina [ia] iloaina ma malamalama atoatoa i ai mo [ia lava]” (ta’ua i le McBride, “The Vision,” 150–51).
Na oo ina lauiloa le faaaliga i tagata o le Ekalesia ua na “o le Faaaliga.” Ina ua tusifaamaumauina, na avea ma uluai tala lomia o le molimau a le Perofeta i le Tama ma le Alo lea na faigofie ona maua e tagata o le Ekalesia.
Mo nisi faamatalaga e uiga i le matalalaga faasolopito o le Mataupu Faavae ma Feagaiga 76, tagai i le talaaga faasolopito faaopoopo mo le Mataupu Faavae ma Feagaiga 76:1–49 i le lesona i luma atu o i lenei tusi lesona.
Mataupu Faavae ma Feagaiga 76:50–70
Ua vaai Iosefa Samita ma Sini Rikitone ia i latou o le a maua le mamalu selesitila
Mataupu Faavae ma Feagaiga 76:50–70. “E faatatau ia i latou o e o le a tutulai mai i le toetutu mai o e amiotonu”
Ina ua uma ona maua e le Perofeta o Iosefa Samita ma Sini Rikitone le faaaliga o loo tusia i le Mataupu Faavae ma Feagaiga 76, na lautele atu le malamalama o le Au Paia i le olaga pe a mavae le oti. Sa aoaoina e tagata o le Ekalesia e faapea na saunia e le Atua vaega eseese o le lagi ma o Ana fanau uma o le a faaolaina i se malo o le mamalu, sei vagana ai nisi toaitiiti o e faafitia o Ia ma fouvale i Lona mana (tagai MF&F 76:31, 42–44, 89–98). O lea faaaliga o le faaaliga muamua o le tele o faaaliga o loo tusia i le Mataupu Faavae ma Feagaiga o loo faamamafa mai ai faapea o soo faamaoni o le Tama ma le Alo e mafai ona maua le faaeaga ma le ola faavavau, lea e aofia ai faamanuiaga aupito silisili e mafai e le Atua ona faaee i luga o Ana fanau. Mo se faataitaiga, o e amiotonu ua folafola atu i ai e maua se toetu mamalu, e nonofo i le afioaga o le Atua, e maua mea uma o ia te Ia, ma avea e faapei o Ia ma maua se atoaga o Lona mamalu (tagai MF&F 76:54–59; 81:6; 84:33–38; 88:28–29, 107; 93:19–22, 27–28).
Mataupu Faavae ma Feagaiga 76:51–53. “O i latou o e maua le molimau ia Iesu”
Na faaali atu i le Perofeta o Iosefa Samita ma Sini Rikitone i le faaaliga i latou o e o le a tulai mai i le Toetutu o e amiotonu, ma sa la faalogo i se faamatalaga o le faamaoni ma faamanuiaga o na tagata. Sa faailoa mai e le Alii e faapea o i latou o le a mautofi i le malo selesitila o i latou ia “o e na maua le molimau ia Iesu, ma sa talitonu i lona suafa” (MF&F 76:51). Na faamalamalama mai e Elder Bruce R. McConkie (1915–1985) o le Korama a Aposetolo e Toasefululua: “Ua ia te au le mea ua lauiloa o ‘le molimau ia Iesu,’ o lona uiga ua ou iloa e ala i se faaaliga patino mai le Agaga Paia i lo’u agaga o Iesu o le Alii; na Ia aumaia le ola ma le tino ola pea i le malamalama e ala i le talalelei, ma ua ia toefuatai mai i nei aso le atoaga o lana upumoni e faavavau, ina ia mafai ai e i tatou faatasi ma e anamua ona mautofi i lona afioaga i le faavavau” (“O Le Molimau Ia Iesu,” Liahona, Aperila 1973, 109).
O i latou o e maua se molimau ia Iesu Keriso, e papatisoina, ma maua le Agaga Paia e mafai ona manumalo i le lalolagi ma maua faamanuiaga tamaoaiga i le faavavau (tagai MF&F 76:50–70).
O le mauaina o se molimau ia Iesu o lona uiga foi o se tagata ua taliaina le talalelei a Iesu Keriso, ua papatiso ma maua le Agaga Paia, ua faatoilaloina le lalolagi e ala i le faatuatua, ma ua “faamaufaailogaina e le Agaga Paia o folafolaga” (tagai MF&F 76:51–53). O le tikeri e maua ai e se tagata le molimau ia Iesu ma lona lototoa e ola ai e tusa ma lena molimau e maua ai le taui e faavavau ua faaee atu ia te ia (tagai MF&F 76:51, 73–75, 79, 82).
Mataupu Faavae ma Feagaiga 76:53. “Faamaufaailogaina e le Agaga Paia”
O i latou o le a mautofi i le malo selesitila o i latou ia ua faatoilaloina le lalolagi e ala i le faatuatua ma le usiusitai i tulafono ma sauniga o le talalelei. O le “Agaga Paia o folafolaga” o loo ta’ua i le Mataupu Faavae ma Faaaliga 76:53 o le Agaga Paia ua galue e faamaufaailoga, faamaonia, pe faapaia ia sauniga ma le amiotonu o se tagata faamaoni ina ia aoga na sauniga pe a mavae le Toetutu (tagai MF&F 132:7). E ala mai i lenei faaaliga o le Agaga Paia, e mafai e se tagata ona maua le faamautinoaga faaleagaga mulimuli ane o le ola e faavavau (tagai Efeso 1:13–14; MF&F 88:3–5). O lea faamautinoaga o nisi taimi e faasino i ai o le “upu o le valoaga e sili lona mausali” (2 Peteru 1:19; MF&F 131:5).
Na aoao mai Elder David A. Bednar o le Korama a Aposetolo e Toasefululua: “O le Agaga Paia o Folafolaga o le mana faapaia lea o le Agaga Paia. Pe a faamaufaailogaina e le Agaga Paia o Folafolaga, ua fusifusia se sauniga, se tautoga, po o se feagaiga i le lalolagi ma i le lagi. (Tagai MF&F 132:7). O le mauaina o lenei ‘faailoga o le faamaoniga’ mai le Agaga Paia o le taunuuga lea o le faatuatua, amiosa’o, ma le mausali i le faamamaluina o feagaiga o le talalelei ‘i [le] aluga o taimi’ (Mose 7:21). Peitai, o lenei faamaufaailogaina e mafai ona faaleaogaina e ala i le amioletonu ma le solitulafono” (“E Ao Ina Toe Fanau Mai Outou,” Ensign or Liahona, Me 2007, 22).
Mataupu Faavae ma Feagaiga 76:54–62. “O le mea lea, … o i latou o atua, o atalii lava o le Atua”
O le Au Paia faamaoni o e ua “faamaufaailogaina e le Agaga Paia o folafolaga” (MF&F 76:53) ua tuuina atu i ai faamanuiaga o le avea ma “suli-faatasi ma Keriso,” o le Ulumatua a le Tama (tagai Roma 8:14–17; tagai foi MF&F 76:94–95; 93:21–22). Sa faasino atu le Alii i nei Au Paia ua faaeaina “o le ekalesia a le Ulumatua” ma o sulu “ua tuu atu i ai e le Tama mea uma i o latou lima” (MF&F 76:54–55; tagai foi MF&F76:94–95; 84:37–38). O i latou e ausia lo latou agavaa faavavau mamaua se tofi i le malo selesitila o le a avea ma faitaulaga ma tupu, ma faitaulaga tamaitai ma masiofo, ma o lo latou faaeaga e aofia ai le folafolaga “o i latou o atua” (tagai MF&F 76:56, 58; tagai foi Salamo 82:1, 6; Ioane 10:34; MF&F 29:13; 109:75–76; 131:1–4; 132:19–20; tagai foi “Becoming Like God,” Gospel Topics Essay, topics.lds.org).
Na molimau mai Peresitene Boyd K. Packer (1924–2015) e faapea talu ai o tatou o fanau a le Atua, o lo tatou taunuuga e faavavau o loo faalagolago i lo tatou gafatia e avea e faapei o Ia.
“Talu ai o mea ola uma e mulimuli i le mamanu a ona matua, pe tatou te manatu ea la o i ai i le Atua nisi mamanu uiga ese i le mafaufau mo Ana fanau? E moni o i tatou, o Ana fanau, i le gagana faasaienisi, e le o se isi ituaiga ese nai lo Ia?
“… Atonu o lea tatou te laiti i lo tatou tulaga alualu i luma—talavou, pe tamameamea foi, pe a faatusatusa ia te Ia. Ae ui o lea, i le faavavau o le a oo mai, afai tatou te agavaa, e mafai ona tatou faapei o Ia, e ulu atu i Lona afioaga, ‘vaai pe ona vaaia [i tatou], ma iloa e pei ona iloa i [tatou],’ ma maua se ‘atoaga.’ (MF&F 76:94.)” (“The Pattern of Our Parentage,” Ensign, Nov. 1984, 67–68).
Mo nisi faamatalaga e uiga i “le ekalesia a le Ulumatua,” tagai i le faamatalaga mo le Mataupu Faavae ma Feagaiga 93:2122 i le tusi lesona lenei.
Mataupu Faavae ma Feagaiga 76:63–65. “O le uluai toetutu”
Na maua e le Perofeta o Iosefa Samita ma Sini Rikitone le faaaliga o loo tusia i le Mataupu Faavae ma Feagaiga 76 a o la manatunatu loloto i le aoaoga faavae o le Toetu. O suiga musuia na faaalia e faatatau i le Ioane 5:29 sa fesoasoani lea ua la malamalama ai faapea o le a i ai le faatulagaga tatau i le Toetu: “O [le a tutulai mai] e na faia mea lelei i le toetutu o e amiotonu, ma o i latou o e na faia mea leaga [o le a tulai mai] i le toetutu mai o e amioletonu”(MF&F 76:17). O le Toetutu o e amiotonu ua iloa foi o le “uluai toetutu” ((MF&F 76:64) ma e aofia ai i latou uma o le a mautofi i malo selesitila ma le terasitila (tagai MF&F 88:96–99). O Le Toetutu Muamua na amata ina ua matala tuugamau o e amiotonu i le maea ai o le Toetu o Iesu Keriso (tagai Mataio 27:52–53; Mosaea 15:21–24; 3 Nifae 23:9–10). O loo faasino le Mataupu Faavae ma Feagaiga i le Uluai Toetutu o le taimi o le a tulai mai ai e amiotonu mai o latou tuugamau i le Afio Mai Faalua o Iesu Keriso (tagai MF&F 29:13; 45:54; 88:96–99). O le Toetutu o e amioletonu, po o le “toetutu mulimuli” (MF&F 76:85), o le a aofia ai i latou o e o le a mautofi i le malo telesitila ma i latou o atalii o le malaia, ma o le a tupu i le faaiuga o le Meleniuma (tagai MF&F 76:85; 88:32, 100–102).
Mataupu Faavae ma Feagaiga 76:69 “O tagata amiotonu e faaatoatoaina e ala ia Iesu”
O tagata o e mulimuli i o latou olaga i le usiusitai i tulafono ma sauniga o le talalelei ua lauiloa ua amiotonu (tagai i faataitaiga o i le Mataio 1:19; Enosa1:1; Mosaea 2:4; Mose 8:27) E ala i le Togiola a Iesu Keriso, o tagata amiotonu e faapaiaina ma faaatoatoaina. O le faagasologa o le faapaiaina, po o le faia ia paia, e sau e ala mai i le alofa tunoa o Iesu Keriso ma e mo “i laotu uma o e alolofa ma auauna atu i le Atua ma o latou manatu atoa, mafaufau atoa, ma le malosi atoa” (MF&F 20:31; tagai foi Moronae 10:32–33). Na aoao mai e Peresitene Russell M. Nelson o le Au Peresitene Sili e uiga i le faagasologa lea e faaatoatoa ai i tatou:
“Uso e ma tuafafine, sei o tatou faia le mea sili tatou te mafai ma taumafai e faaleleia atili i aso taitasi. Pe a alia’e o tatou faaletonu, e mafai ona tatou taumafai pea e faasa’oina. E mafai ona faateleina lo tatou loto faamagalo i o tatou lava faaletonu ma ia i latou tatou te alolofa i ai.” E mafai ona faamafanafanaina i tatou ma onosai. Na aoao mai le Alii, ‘E le mafai ona outou gafatia luma o le Atua i le taimi nei … ; o le mea lea, ia outou faaauau pea i le onosai seia faaatoatoaina outou’ [MF&F 67:13].
“E le tatau ona tatou lotovaivai pe afai ua foliga mai ua matua faigata ma le maea a tatou taumafaiga faamaoni agai atu i le atoatoaga. O loo faatalitali le atoatoaga. E oo mai lona atoatoaga pe a maea le Toetu ma e na o le Alii lava e ala ai. O loo faatalitali mai mo i latou uma o e alolofa ia te ia ma tausia ana poloaiga. E aofia ai nofoalii, o malo, o itumalo sili, o pule, puleaga uma [tagai MF&F 132:19]. O le faaiuga lea e tatau ona tatou onosaia. O le atoatoa e faavavau o loo teuina e le Atua mo i tatou taitoatasi” (Atoatoaga o Loo Faatalitali,” Liahona, Ian. 1996, 104, 105).
O Iesu Keriso o “le puluvaga o le feagaiga fou, o le na faia lenei togiola ua atoatoa e ala i le faamaligiina o lona lava toto” (MF&F 76:69).
Mataupu Faavae ma Feagaiga 76:70. O le mamalu o tino toetutu
Ua manino ia tusitusiga paia e faapea o fanau uma a le Atua o le a toetutu (tagai 1 Korinito 15:22; Alema 11:42; 40:4). O le malo e faavavau e maua e se tagata toetu, faapea la natura o se tino toetu o se tagata, peitai, o le a fua i lona faamaoni ma le usiusitai i tulafono a le Atua (tagai 1 Korinito 15:40–42; MF&F 76:96–98; 88:22–24, 28–31). O i latou o le a mautofi i le malo selesitila o le a maua tino e selesitila, ‘o e o lo latou mamalu o lena o le la” (MF&F 76:70). O i latou i le malo terasitila o le a maua tino e eseese mai ia i latou o i le malo selesitila, “e pei [o le mamalu] o le masina e ese mai le la i le vanimonimo” (MF&F 76:71; tagai foi MF&F 76:78). O tino telesitila o le a itiiti ifo le mamalu, “e pei lava ona ese le mamalu o fetu mai le mamalu o le masina i le vanimonimo” (MF&F 76:81).
Na faamalamalama mai e Peresitene Iosefa Filitia Samita (1876–1972):
“I le Mataupu Faavae ma Feagaiga Vaega 88, ua ta’u mai ai ia te i tatou o le a i ai eseesega i tino o e nonofo i malo eseese e fetaui ma manaoga uma ma tuaoi.
“Ma o i latou o e e lē faapaiaina i le tulafono lea na Ou tuu atu ia te outou, le tulafono lava lea a Keriso, e ao ina mautofi i se isi malo, le malo lava lena o le terasitila, po o le malo lena o le telesitila.
“Ona o ia o lē e lē mafai ona ola i le tulafono o se malo selesitila e lē mafai ona ia gafatia se mamalu selesitila.
“Ma o ia o lē e lē mafai ona ola i le tulafono o se malo terasitila e lē mafai ona ia gafatia se mamalu terasitila.
“Ma o ia o lē e lē mafai ona ola i le tulafono o se malo telesitila e lē mafai ona ia gafatia se mamalu telesitila; o lea ua lē agavaa o ia mo se malo o le mamalu. O lea e ao ai ina mau o ia i se malo e lē o se malo o le mamalu’ [MF&F 88:21–24]. …
“Talu ai o le a faatulai mai tino i le toetutu e fetaui ma le tulaga o tagata taitoatasi, o le a tofia e le Alii tane taitasi ma le fafine i le nofoaga na maua e le tagata i ana galuega” (Answers to Gospel Questions, comp. Joseph Fielding Smith Jr. [1963], 4:64–65).
Mataupu Faavae ma Feagaiga 76:71–80
Na vaai Iosefa Samita ma Sini Rikitone ia i latou o le a maua le mamalu terasitila
Mataupu Faavae ma Feagaiga 76:71–80. E sili atu ma le tasi malo faalelagi
O tikeri e tolu o le mamalu e faatusa i le la, o le masina, ma fetu (tagai MF&F 76: 71–72, 81).
O le faaaliga o malo o le mamalu na faailoa mai ai le fuafuaga a le Atua mo o tatou olaga pe a mavae le olaga nei e aofia ai le vaaiga e matua sili atu nai lo le vaaiga faaagaifanua o se lagi e tasi ma se seoli e le uma. Talu ai e le tutusa uma le lelei o tagata pe tutusa le leaga, na faamalamalama mai ai e le Perofeta o Iosefa Samita (1805–1844): “I le mataupu lona 14 o le Ioane—‘E tele mea e nonofo ai i le maota o lo’u Tama’ [Ioane 14:2] … e tatau ona faapea—‘I le malo o lo’u Tama e tele malo o i ai. … Ua i ai mea e nonofo ai i latou o e usiusitai i se tulafono selesitila, ma e i ai isi mea e nonofo ai i latou o e le atoatoa i le tulafono, o le tagata i lona lava faatulagaga” (Teachings of Presidents of the Church: Joseph Smith [2007], 219).
Na vaai le Perofeta o Iosefa Samita ma Sini Rikitone o le lalolagi terasitila sa saunia mo i latou “o lo latou mamalu ua ese mai le mamalu o le ekalesia a le Ulumatua” (MF&F:71). O lona uiga o le mamalu terasitila e pau i lalo ifo o le mamalu selesitila ae e i luga ae o le mamalu telesitila (tagai MF&F 76:81, 91). Na aoao mulimuli ane e le Perofeta e faapea o le malo selesitila e aofia ai “lagi po o tikeri e tolu” (MF&F 131:1) O le malo telesitila e aofia ai foi mamalu eseese (tagai MF&F 76:98).
O le talalelei a Iesu Keriso o le ala lea e mafai ona mulimuli ai fanau uma a le Atua ia maua ai se tofi i le malo selesitila. O lena taui mamalu e faavavau o loo mafai ona au i ai tagata uma o e filifili e talia le talalelei ma osia ma tausia feagaiga ma le Alii (tagai MF&F 10:50; 14:7; 20:14; 50:24).
Mataupu Faavae ma Feagaiga 76:72–74. “O i latou ia o e na oti e aunoa ma le tulafono”
O le faaaliga o loo tusia i le Mataupu Faavae ma Feagaiga 75 o loo aumaia ai na o se faamatalaga o e nonofo i le lalolagi terasitila. Mo se faataitaiga, e tusa ai ma le Mataupu Faavae ma Feagaiga 76:72–73, o nisi o i latou o i le malo terasitila o tagata “o e maliliu e aunoa ma le tulafono” ma e ua aoaoina i le talalelei i le lalolagi o agaga. E taua le malamalama faapea o nisi o tagata o loo aoaoina le talalelei i le lalolagi o agaga o le a mautofi i le malo selesitila, a o isi o loo aoaoina o le a le maua le talalelei i le auala e tasi ma o lea o le a mautofi ai i se malo e maualalo ifo (tagai MF&F 137:7–9; 138:30–37, 58–59). E le gata i lea, e i ai isi o e maliliu e aunoa ma se iloa i le talalelei ae o le a mautofi i le malo telesitila. O le malo o le mamalu o le a mautofi ai tagata taitoatasi i le iuga, o le a maua e tusa ai ma le tulafono na te filifilia e talia ma ola ai (tagai foi MF&F 88:21–24).
Mataupu Faavae ma Feagaiga 76:74–75, 79. “Totoa i le molimau ia Iesu”
O i latou o e mautofi i le malo terasitila “sa lei totoa i le molimau ia Iesu” (MF&F 76:79). I se isi faaupuga, o nei tagata sa mauaina se molimau ia Iesu Keriso ae sa lei lava le totoa e talia ai pe ola ai i le atoaga o le talalelei ina ia mafai ai ona maua se taui selesitila…Na aoao mai e Elder Quentin L. Cook o le Korama a Aposetolo e Toasefululua le taua o le totoa i a tatou molimau ia Iesu: “O la’u tatalo e faapea … ia tatou faia a tatou amio ia ogatusa ma faamoemoega tautupu e moomia mai ia i latou o e o i le galuega a le Alii. E tatau ona tatou manatua i mea uma o le “totoa i le molimau ia Iesu” o le tofotofoga sili lea e tuueseese ai tagata i le malo selesitila ma le malo teresitila. [MF&F 76:79]. Tatou te mananao ia maua i le itu selesitila o lena vavaega” (“Filifili ma le Atamai,” Ensign po o le Liahona, Nov. 2014, 49).
E ao i soo o Iesu Keriso ona totoa ia latou molimau ia Iesu pe o le a latou le maua le faaeaga (tagai MF&F 76:79).
E i ai le eseesega i le va o le i ai o se molimau ia Iesu Keriso ma le ola ai ina ia atagia mai o tatou olaga lena molimau. Na faamatala mai e PeresiteneEzra Taft Benson le ala e mafai ona tatou totoa ia tatou molimau ia Iesu: “’O i latou o e amiotonu ma faamaoni’ [MF&F 76:53]! Se faaaliga ina a talafeagai mo se e lototoa i le molimau ia Iesu. Latou te lotototoa i le puipuiga o le upumoni ma le amiotonu. O tagata ia o le Ekalesia o e ua faalauteleina o latou valaauga i le Ekalesia (tagai MF&F 84:33), e totogi a latou sefuluai ma taulaga, e ola ini olaga mama, e lagolagoina o latou taitai o le Ekalesia i upu ma faatinoga, e tausia le aso Sapati ia paia, ma usiusitai i poloaiga uma a le Atua” (“Toa i le Molimau ia Iesu,” Liahona, Iulai 1982, 63).
Mataupu Faavae ma Feagaiga 76:81–112
Ua vaai Iosefa Samita ma Sini Rikitone ia i latou o le a maua le mamalu telesitila
Mataupu Faavae ma Feagaiga76:84–85. “O i latou ia o e ua lafo i lalo i seoli”
O i latou o le a mautofi i le malo telesitila o i latou ia ua filifili e le taliaina le talalelei po o se molimau ia Iesu Keriso (tagai MF&F 76:82, 101). Latou te lei faafitia le Agaga Paia e pei ona fai e atalii o le malaia, ae ua latou filifilia se ala o le amioleaga ma ua “lafo ai i lalo i seoli” (MF&F 76:84). I le tulaga lea, o seoli e faasino i lena vaega o le lalolagi o agaga o le a puapuagatia ai i latou sa le usiusitai i le olaga nei mo a latou lava agasala ona sa latou lei salamo (tagai MF&F 19:15–18). O tagata nei o le a tumau ai i le tulaga lea o seoli seia latou tulai mai i “le toetutu mulimuli,” lea e sosoo ma le Meleniuma (MF&F 76:85; tagai foi MF&F 43:18; 63:17–18; 76:106; 88:100–101).
Na faamatala mai e Elder Quentin L. Cook e faapea: “ I le oti, o agaga amiotonu e ola i se tulaga e le tumau ua ta’ua o parataiso. Ua aoao mai e Alema le Itiiti i tatou ‘o le parataiso, o se nofoaga e malolo ai, o se nofoaga o le filemu o le a latou malolo ai mai i o latou faalavelave uma ma mai le popole uma, ma le faanoanoa’ [Alema 40:12]. O agaga amioletonu e nonofo i le falepuipui o agaga, o nisi taimi e ta’ua o se seoli [tagai 2 Nifae 9:10–14; MF&F 76:84–86]. Ua faamatalaina o se nofoaga matautia, o se nofoaga pogisa lea o le a nonofo ai i latou e matatau i le “toasa mumu o le Atua’ seia oo i le toetutu [Alema 40:14]. Peitai, ona o le Togiola a Iesu Keriso, o agaga uma ua faamanuiaina ua fananau mai o le a iu ina toetutu, o le a toe tuufaatasia le agaga ma le tino, ma mautofi i malo o le mamalu ia e silisili atu i lo le mea o tatou i ai i le lalolagi nei [tagai MF&F 76:89]. O tuusaunoaga ua na o i latou o e, faapei o Satani ma ana agelu, ua fouvale ma le loto i ai faasaga i le Atua [tagai Isaia 14:12–15; Luka 10:18; Faaaliga 12:7–9; MF&F 76:32–37]. I le Toetutu, o le tuuina mai ai i luga e le lalolagi o agaga po o seoli ana agaga pologa” (“O Le Fuafuaga a lo tatou Tama—E Lava Lelei mo Ana Fanau Uma,” Ensign or Liahona, Me 2009, 37).
Mataupu Faavae ma Feagaiga 76:88–89. O le mamalu o le malo telesitila “e sili mamao atu i malamalamaaga uma”
O e amioleaga o le a puapuagatia i seoli o le iu ina togiolaina (tagai MF&F 76:85), avea ma “suli o le olataga” (MF&F 76:88) ma “auauna a Le Silisili Ese” (MF&F 76:112), ma o le a mautofi i se vaega o le mamalu telesitila (tagai MF&F 76:98). O lenei malamalama faaleaoaoga faavae ua faamamafa mai ai le tele naua o le alofa mutimutivale o Iesu Keriso ma ua faamautu mai ai “na te laveai tagata uma” sei vagana ai atalii o le malaia (MF&F 76:44). Na faamalamama mai e Elder John A. Widtsoe (1872–1952) o le Korama a Aposetolo e Toasefululua:
“O le [Mataupu Faavae ma Feagaiga] o loo faamalamalama manino mai ai e faapea o le mamalu aupito maualalo lea e tofi i ai le tagata e matua mamalu lava ma e e le oo i ai le malamalama o le tagata. O se aoaoga faavae e taua i le faaMamona lea e oo lava i le tagata agasala aupito agaleaga; i le faamasinoga faaiu, o le a maua se mamalu lea e le oo i ai le malamalama o le tagata, lea e matua maoae lava tatou te le gafataulimaina ona faamatala. O i latou e lelei o le a maua se nofoaga e sili atu ona mamalu . …
“O le Talalelei o se talalelei e maoae le alofa. O le alofa o loo i lona alititai. O le atalii aupito agaleaga [o le Atua] e matua alofagia lava ma o lona taui e le oo i ai le malamalama o le tagata ola” (The Message of the Doctrine and Covenants, ed. G. Homer Durham [1969], 167).
E ala i le alofa tunoa o Iesu keriso, e mafai ai e Ona soo ona avea e faapei o Ia “i le mana, ma i le malosi, ma i le puleaga (tagai MF&F 76: 94–95).
Mataupu Faavae ma Feagaiga 76:98–101. “O i latou ia o e o sa Paulo, ma sa Apolo, ma sa Kefa”
O nisi o le a mautofi i le malo telesitila o i latou ia ua fai mai e mulimuli ia Iesu Keriso po o ni perofeta faapitoa ae e teena ma le loto i ai le Faaola ma e mumusu e talia Lana talalelei pe mulimuli i Ana perofeta. Ina ia tausalaina le fevaevaeai i le Au Paia i ona aso, o lea sa tusi atu ai le Aposetolo o Paulo i le au Korinito:
“Aua ua ta’ua mai outou, o’u uso e, … o ia te outou misa.
“O la’u upu lenei, ua taitoatasi outou ma faapea ane, O a’u o lo sa Paulo; O a’u o lo sa Apolo; O a’u o lo sa Kefa; O a’u o lo sa Keriso.
“Po ua felefele ea Keriso? pe na faasatauroina ea Paulo e sui ai outou? pe na papatisoina ea outou i le igoa o Paulo?” (1 Korinito 1:11–13).
O faaupuga faapena i le Mataupu Faavae ma Feagaiga 76:99–101 e faasino ia i latou e le ogatasi ma Iesu Keriso po o Ana perofeta.
Mataupu Faavae ma Feagaiga 76:111. E ao i tagata uma ona maua lana e tusa ma ana lava galuega”
I le taimi o Lana galuega i le olaga nei, na faamalamalama mai ai e Iesu, “E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o lo’u Tama o i le Lagi” (Mataio 7:21). O le manaomia o le usiusitai i poloaiga ma sauniga o le talalelei sa avea pea lava ma savali tutotonu o le talalelei a Iesu Keriso. Sa aoao mai e Peresitene Polika Iaga (1810–1877): “O fanau a tagata o le a faamasinoina e tusa ma a latou galuega, pe lelei pe leaga. Afai e faatumulia aso o le tagata i galuega lelei, o le a faapena foi ona tauia e tusa ai. I se isi itu, afai e faatumulia ona aso i faatinoga leaga, o le a ia maua e tusa ai ma na faatinoga. … O afea e iloa ai e tagata o le vaitau lenei o taimi ua tatau ai ona latou amata ona faataatia le faavae o lo latou faaeaga mo le olaga nei ma le faavavau, o le taimi lenei e afuafua ai, ma aumaia mai le loto fua e faamamalu ma viia ai le Atua, e pei ona sa faia e Iesu” (Teachings of Presidents of the Church: Brigham Young [1997], 286).
Mataupu Faavae ma Feagaiga 76:113-19
Ua faamalamalama mai e Iosefa Samita ma Sini Rikitone le auala e mafai ai ona maua e isi le malamalama ua la mauaina e ala i faaaliga.
Mataupu Faavae ma Feagaiga 76:113–16. E tele mea na vaai ai Iosefa Samita i lenei faaaliga nai lo mea ua tusiaina
I le ta’ua ai o le faaaliga o loo tusia i le Mataupu Faavae ma Feagaiga 76, na saunoa ai le Perofeta o Iosefa Samita e faapea: E mafai ona ou faamalamalama e silia ma le faaselau nai lo le mea ua ou faia ai, e uiga i mamalu o Malo na faaalia mai ia te au i le faaaliga, pe ana faatagaina ai au, ma pe ana ua saunia tagata e taliaina” (i le Manuscript History of the Church, vol. D-1, page 1556, josephsmithpapers.org).
O le oa o le aoaoga faavae ma malamalamaaga faaleagaga na tuu mai i le faaaliga o malo o le mamalu ua aumaia ai ia te i tatou se malamalama i le olaga pe a mavae le oti lea e matua le oo i ai se mea o maua i tusi paia anamua. Na saunoa Peresitene Wilford Woodruff (1807–1898) , “Ou te talanoa e uiga i le Faaaliga [i le MF&F 76] na o ia, o se faaaliga lea ua sili atu le malamalama, sili atu upumoni ma sili atu aoaoga faavae ua ia aumaia nai lo se isi lava faaaliga o i ai i se isi lava tusi ua tatou faitauina. Na te faamaninoina mai i lo tatou malamalamaaga e uiga i lo tatou tulaga i le taimi nei, o fea na tatou o mai ai, aisea ua tatou i ai iinei, ao fea foi tatou te agai i ai. E mafai ona iloa e soo se tagata e ala i lena faaaliga pe o le a lana vaega ma lona tulaga o le a i ai. Aua ua iloa e tagata uma pe o a tulafono latou te tausia, ma o tulafono e tausia e tagata iinei o le a fua i ai lo latou tulaga mulimuli ane” (Teachings of Presidents of the Church: Wilford Woodruff [2004], 120–21).
Na toe manatua e Peresitene Uitilafi, o le na avea ma se tagata o le Ekalesia i le 1833, lana tali patino i le faaaliga o loo tusia i le Mataupu Faavae ma Feagaiga 76:
“Sa aoaoina au mai lo’u tamaitiiti e na o le tasi le afi ma le Seoli e tasi, ma sa ta’u mai o e amioleaga e tasi lo latou faasalaga ma o e amiotonu e tasi lo latou mamalu. …
“… Ina ua ou faitauina le faaaliga … , na faamalamalamaina lo’u mafaufau ma aumaia ai ia te au le olioli tele, na foliga mai ia te au o le Atua o le sa faailoa maia lena mataupu faavae i le tagata, sa poto, amiotonu ma faamaoni, o i ai uiga silisili faaleatua ma se lagona lelei ma le malamalama, sa ou lagonaina e ogatusa o Ia ma le alofa, alofa mutimutivale, fai mea tonu ma le faautauta, ma sa ou lagonaina e tatau ona ou alofa atili i le Alii nai lo le mea sa i ai muamua i lo’u olaga” (“Remarks on the Necessity of Adhering to the Priesthood in Preference to Science and Art,” in Deseret News, May 27, 1857, 91).