Mataupu 13

Mataupu Faavae ma Feagaiga 30–34

Faatomuaga ma le Faasologa o Taimi

I le taimi lava na uma ai le konafesi lona lua a le Ekalesia, na faia i le faaiuga o Setema 1830 i Feiete, Niu Ioka na maua ai e le Perofeta o Iosefa Samita ia faaaliga mo Tavita Uitimera, Pita Uitimera le Itiiti., ma Ioane Uitimera. O nei faatonuga o loo faamaumauina i le Mataupu Faavae ma Feagaiga 30. Pe tusa o le taimi foi lena, sa valaauina ai e le Alii ia Thomas B. Marsh e talai atu le talalelei ma fesoasoani i le faatuina o le Ekalesia. O lea valaauga, o loo tusia i le Mataupu Faavae 31, e aofia ai foi folafolaga ma fautuaga e taiala ai o ia o se faifeautalai ma i lona soifuaga patino.

Ia Oketopa 1830, sa maua ai e Iosefa Samita le faaaliga lenei ua i ai i le Mataupu Faavae ma Feagaiga 32, lea ua valaauina ai e le Alii ia Pale P. Palate ma Ziba Peterson e faatasi ma Oliva Kaotui ma Pita Uitimera le Itiiti, i se misiona i sa Lamana i Misuri i sisifo. I se isi faaaliga ua faamaumauina i le Mataupu Faavae ma Feagaiga 33,, na valaauina e le Alii ia Ezra Thayre ma Northrop Sweet e folafola atu le talalelei. O le faaaliga o loo tusia i le Mataupu Faavae ma Feagaiga 34 na tuuina mai ia Novema 1830. I lena faaaliga na faamalo atu ai le Alii ia Osona Palate mo lona faatuatua ma sa poloaiina ai o ia e folafola le talalelei e sauniuni ai mo le Afio Mai Faalua o Iesu Keriso.

Taumafanafana 1830Ua faitau e Pale P. Palate le Tusi a Mamona ma ua papatisoina.

Setema 1830Na siitia Thomas B. Marsh ma lona aiga mai talaane o Boston, Massachusetts, i Palamaira, Niu Ioka, ma sa papatisoina o ia.

19 Setema, 1830Na papatisoina Osona Palate e lona uso matua o Pale.

26–28 Setema 1830O le konafesi lona lua a le Ekalesia na faia i Feiete, Niu Ioka.

Faaiuga o Setema 1830Na maua mai ai le Mataupu Faavae ma Feagaiga 30–31.

Oketopa 1830Na maua mai ai le Mataupu Faavae ma Feagaiga 32–33.

Oketopa 1830Na tuua ai e Oliva Kaotui ma ana soa mo se misiona i sa Lamana.

4 Novema, 1830Na maua mai ai le Mataupu Faavae ma Feagaiga 34.

Mafaufau i tiutetauave o loo e umia o se soo o le feagaiga o Iesu Keriso. A o e suesue i le Mataupu Faavae ma Feagaiga 30–34, mafaufau pe mafai faapefea ona fesoasoani le fautuaga a le Alii ia te oe e faataunuu ou tiute.

Mataupu Faavae ma Feagaiga 30: Talaaga Faaopoopo Faasolopito

O le konafesi lona lua a le Ekalesia, na faia i Feiete, Niu Ioka, ia Setema 1830 mo le tolu aso. O le konafesi na aofia ai talanoaga e uiga i le maa na faaaoga e Hiram Page e maua ai faaaliga sese (tagai i le faamatalaga mo le Mataupu Faavae ma Feagaiga 28 i le tusi lesona lenei). Na tusia e le Perofeta o Iosefa Samita e faapea “O Uso Page, faapea foi le ekalesia foi sa auai, ua faaleaogaina le maa ua ta’ua, ma mea uma e faatatau i ai, ua matua faamalieina ai ma faafiafiaina i tatou” ma ona “taumamafa ai lea o le Au Paia i le faamanatuga, faamauina, ma faauuina le toatele, ma alo atu i se anoanoai o pisinisi a le Ekalesia i lena lava aso; lea na matou maua ai le mana tele o le Atua sa faaalia i o matou luga; na afio mai le Agaga Paia i o matou luga, ma sa faatumuina i matou i le olioli e le mafaamatalaina; ma sa matua tele le filemu, ma le faatuatua, ma le faamoemoe, ma le alofa mama i o matou luga” (i le The Joseph Smith Papers, Histories, Volume 1: Joseph Smith Histories, 1832–1844, ed. Karen Lynn Davidson ma isi [2012], 452). A o lei taape le Au Paia mai le konafesi, sa tuuina mai faaaliga mo uso Tavita Uitimera, Pita Uitimera le Itiiti, ma Ioane Uitimera. O nei faaaliga na muai lolomi eseese i le Tusi o Poloaiga, ae sa tuufaatasia e Iosefa Samita i se vaega e tasi i le lomiga i le 1835 o le Mataupu Faavae ma Feagaiga.

Faafanua 5: O le Eria o Niu Ioka, Penisilevania, ma Ohaio i le Iunaite Setete

Faafanua 6: Misiona ia sa Lamana, 1830–1831

Mataupu Faavae ma Feagaiga 30

Ua aoao mai e le Alii ia Tavita, Pita le Itiiti, ma Ioane Uitimera e faatatau i a latou matafaioi i le galuega a le Atua.

Faitau le Mataupu Faavae ma Feagaiga 30, ma vaavaai mo auala e finagalo le Alii ia te oe e faalagolago ai ia te Ia mo le malosiaga.

Mataupu Faavae ma Feagaiga 30:1–4. “Ua e fefe i tagata ma ua e le faalagolago mai ia te au”

E avea ai o se tasi o Molimau e Toatolu, na vaai ia Tavita Uitimera i se agelu ma sa ia vaai ma tago i papatusi o le Tusi a Mamona. Na ia maua mai foi isi faaaliga na tuuina mai e ala mai i le Perofeta o Iosefa Samita (tagai MF&F 14; 17; 18). Ae ina ua ta’ua e lona uso faaletulafono, o Hiram Page, ua ia maua faaaliga mo le Ekalesia, sa taitai seseina Tavita. Na aoaiina e le Alii ia Tavita i lona fefe i le tagata nai lo lo lona faalagolago i le Atua (tagai MF&F 30:1).

Sa faamalamalama e Peresitene Ezra Taft Benson (1899–1994) le ala e mafai ai e le faamaualuga ona tatou fefefe i tagata.

“O tagata faamaualuluga e sili atu ona fefefe i faamasinoga a tagata nai lo o faamasinoga a le Atua. (Tagai MF&F 3:6–7; 30:1–2; 60:2.) ‘O le a se manatu o tagata ia te a’u?’ e sili atu ona mamafa nai lo le “O le a se finagalo o le Atua ia te a’u?’

“Na toetoe ina a faasaoloto e le Tupu o Noa le perofeta o Apinati, ae o se uunaiga i lona faamaualuga e ana faitaulaga amioleaga na auina atu ai Apinati i le afi mumu. (Tagai i le Mosaea 17:11–12.) Na faanoanoa Herota i le talosaga a lana ava e fasiotia Ioane le Papatiso. Peitai o lona naunautaiga faamaualuga ia foliga lelei atu ia i “latou o e ua taooto e aai faatasi ma ia” na afua ai ona fasiotia Ioane. (Mata. 14:9; tagai foi Mareko 6:26.)

“O le fefe i faamasinoga a tagata e faaalia ia lava e tauva mo le faamaonia a tagata. O e faamaualuga e fiafia ‘i viiga mai tagata e sili nai le viiga mai le Atua.’ (Ioane 12:42–43.) O o tatou faamoemoega mo mea tatou te fai e i mea e faaalia ai le agasala. Na fetalai mai Iesu na Ia faia ‘pea lava o mea e lelei’ e fiafia i ai le Atua. (Ioane 8:29.) Pe o le a le lelei ea mea tatou te fai e avea le faafiafiaina o le Atua ma o tatou faamoemoega nai lo le taumafai e sii ae i tatou lava i luga atu o lo tatou uso ma sili ae foi i se isi?” (Aoaoga a Peresitene o le Ekalesia: Ezra Taft Benson [2014], 233–34).

Na faamalamalama mai e Peresitene Dallin H. Oaks o le Au Peresitene Sili le ala e le tatau ai i le Au Paia ona tosinaina e mea o le lalolagi: “E le lelei ona tatou auauna atu i lo tatou Faaola pe afai tatou te fefefe i tagata e sili atu nai lo le Atua. Na ia aoaiina nisi o taitai i Lana Ekalesia toefuataiina i lo latou sailia o viiga o le lalolagi ma le sili ona latou mafaufau i mea o le lalolagi nai lo mea a le Alii (tagai MF&F 30:2; 58:39). O na aoaiga ua faamanatu mai ai ia te i tatou ua valaauina i tatou e faatuina tagavai a le Alii, ae le mulimuli i le lalolagi. Na tautino mai e Elder John A. Widtsoe, “E le mafai ona tatou savavali e pei o isi tagata, pe tautatala foi e pei o isi tagata, pe faia foi e pei ona faia e isi tagata, aua e ese lo tatou taunuuga, matafaioi, ma tiutetauave ua tuuina mai i o tatou luga, ma e tatau ona faafetauia i tatou lava [i ai]’ [in Conference Report, Apr. 1940, 36]. O lena mea moni e i ai le faatatauga i le taimi nei i taga fai uma” (“Auaunaga ma le le Manatu Faapito,” Ensign po o le Liahona, Me 2009, 94–95).

Mataupu Faavae ma Feagaiga 30:5–8. “Folafola atu la’u talalelei”

Ia Iuni 1829 na ta’u atu ai e le Alii ia Pita Uitimera le Itiiti e faapea o le folafolaina atu o le salamo o le mea e “sili ona aoga” mo ia e fai (tagai MF&F 16:4, 6). Ia Setema 1830, sa tofia Pita e faamisiona e fai ma soa ia Oliva Kaotui i le faatuina o le Ekalesia ia sa Lamana. O le faamamafa i le taua o le galuega faifeautalai o loo faaauau pea i le talafaasolopito o le Ekalesia.

Na faamalamalama mai e Elder Jeffrey R. Holland o le Korama a Aposetolo e Toasefululua le mafuaaga o le a taulai atu ai pea le Au Paia i le folafolaina atu o le talalelei i isi: “O le galuega faifeautalai e le na o le pau lea o mea tatou te faia i lenei Ekalesia tele, lautele, ma le ofoofogia. Ae toetoe lava o isi mea uma e manaomia ona tatou faia, e faalagolago i tagata faatoa faalogo i le talalelei a Iesu Keriso ma ua auai mai i lo tatou faatuatuaga. E mautinoa lava o le mafuaaga autu lena o le poloaiga mulimuli a Iesu i le Toasefululua—o lenei, ‘ia outou o atu e fai nuu uma lava ma soo, ma papatiso atu ia te i latou i le suafa o le Tama, ma le Atalii, ma le Agaga Paia’ [Mataio 28:19]. Ma, seiloga lava e tupu lena mea, ona faatoa mafai lea ona oo mai le tele o faamanuiaga o le talalelei—lotogatasi o aiga, polokalama a le autalavou, folafolaga faaleperisitua, ma sauniga e taitai atu ai i tatou i le malumalu. Ae e pei ona molimau mai Nifae, e le mafai lava ona oo mai se mea o na mea seiloga e ‘ulu atu se tasi i le … faitotoa’ [2 Nifae 33:9]. Faatasi ai mea uma e faia i le ala i le ola e faavavau, tatou te manaomia ai le tele o nisi faifeautalai e talaia lena faitotoa ma fesoasoani i tagata e ui atu ai” (“Ua Tauto i Tatou Uma,” Ensign po o le Liahona, Nov. 2011, 46–47).

Mataupu Faavae ma Feagaiga 30:6. “Ati a’e la’u ekalesia i luga o sa Lamana”

Mo faamatalaga e tusa ai ma le faaaogaina o le faaupuga sa Lamana i le Mataupu Faavae ma Feagaiga, tagai i faamatalaga mo le Mataupu Faavae ma Feagaiga 28:8–10, 14–16 i le tusi lesona lenei.

Mataupu Faavae ma Feagaiga 30:9–11. Talai atu la’u talalelei, ma le leo pei o se pu”

O Ioane Uitimera o se tasi o Molimau e Toavalu o papatusi o le Tusi a Mamona ma sa avea foi mo sina taimi puupuu o se tusiupu i le Perofeta o Iosefa Samita i le taimi o le faaliliuga musuia o le Tusi Paia. I se faaaliga e ala mai i le Perofeta ia Iuni 1829, na ta’u atu ai e le Alii ia te ia, “O le mea o le a sili atu ona taua mo oe o le alaga atu lea o le salamo i lenei nuu, ina ia mafai ona e aumai o agaga ia te a’u” (MF&F 15:6). Ina ua maea le konafesi a le Ekalesia ia Setema 1830, sa poloaiina e le Alii ia Ioane e alu ma galue i Lana galuega, e amata atu i le eria sa nofo ai Phillip Burroughs, i Seneca Falls, Niu Ioka, e le mamao mai le aiga o le au Uitimera (tagai MF&F 30:9–10). I ni nai vaiaso a o lei oo mai lenei faaaliga, sa lauga atu ai Pale P. Palate i se vaega o e sa faapotopoto i le fale o Phillip Burrough, ma sa liua mai ai ni nai tagata. O Philip Burroughs sa faatatau i ai o se “uso” i le Mataupu Faavae ma Feagaiga 30:10, ae e leai se faamaumauga faapea na avea o ia ma se tagata o le Ekalesia. Peitai, na papatiso lana ava.

Sa faamanatu mai e Elder L. Tom Perry (1922–2015) o le Korama a Aposetolo e Toasefululua i tagata o le Ekalesia le mafuaaga e tatau ai ona sii ae o latou leo e faasoa atu le talalelei: “E tatau ona faia ‘ma le naunautaiga tele’ (MF&F 123:14) ia tatou aumaia le malamalama o le talalelei ia i latou o e o loo saili mo tali e mafai ona ofoina atu e le ata o le faaolataga. E manatu popole le toatele mo o latou aiga. O nisi o loo vaavaai mo le saogalemu i se lalolagi o loo fesuisuiai ai mea e faatauaina. O lo tatou avanoa o le tuuina atu lea ia i latou o le faamoemoe ma le lototoa ma ia valaaulia i latou e o mai faatasi ma i tatou ma auai ma i latou o e talia le talalelei a Iesu Keriso. Ua i ai i le lalolagi le talalelei a le Alii ma o le a faamanuiaina ai o latou olaga iinei ma i le faavavau a oo mai” (“Aumai Agaga Ia te A’u,” Ensign po o le Liahona, Me 2009, 110).

Mataupu Faavae ma Feagaiga 31: Talaaga Faaopoopo Faasolopito

I le avea ai o se alii talavou ua faaipoipo sa nofo e lata i Boston, Massachusetts, sa faitau ai e Thomas B. Marsh le Tusi Paia ma sailiili i lotu, ae sa ia lagonaina le uunaia e faapea “e i ai se ekalesia o le a tulai mai, lea o le a i ai le mea moni ma lona atoatoa” (Thomas B. March, “History of Thos. Baldwin Marsh (Tusia e Ia Lava i Great Salt Lake City, November, 1857),” Deseret News, Mar. 24, 1858, 18). Na ia lagona le uunaia e le Alii e malaga i Niu Ioka i sisifo. O iina na ia faalogo ai e uiga ia Iosefa Samita ma papatusi auro ma sa ia saili e aoao atili i ai. Na la feiloai ma Matini Harisi i Palamaira ma Oliva Kaotui, talu ai o Iosefa sa nofo i Haremoni, Penisilevania i le taimi lea. Sa toe taliu Thomas i Boston ma faaauau ai ona aoao e uiga i le galuega a le Atua i lo la fetusia’i lea ma Oliva Kaotui. Ina ua uma ona ia aoao faapea ua faatulagaina le Ekalesia a Iesu Keriso, sa sii atu o ia ma lona aiga i Palamaira, Niu Ioka, ma sa taunuu ia Setema 1830. E lei leva ae papatiso o ia e Tavita Uitimera, ma sa auai atu o ia i le konafesi lona lua a le Ekalesia i le masina lava lea. Sa faamanuiaina Thomas Marsh i le mauaina o se taitaiga patino mai le Alii e ala mai i se faaaliga na tuuina atu i le Perofeta o Iosefa Samita i lena konafesi.

Mataupu Faavae ma Feagaiga 31

Ua valaauina e le Alii ia Thomas B. Marsh, Pale P. Palate, ma Ziba Peterson e folafola atu le talalelei.

A o e faitauina le Mataupu Faavae ma Feagaiga 31, vaavaai mo faamanuiaga na folafola atu ia Thomas B. Marsh pe afai na te auauna atu i le Alii i le faatuatua.

Mataupu Faavae ma Feagaiga 31:1–6. A tatou auauna atu ma le faamaoni i le Alii, o le a faamanuiaina o tatou aiga.

E moni lava, i le avea ai ma tama o se aiga e laiti, sa i ai popolega o Thomas Marsh mo lona toalua ma le fanau a o sii atu mai Massachusetts i Niu Ioka. I le faaaliga o loo tusia i le Mataupu Faavae ma Feagaiga 31, na folafola atu ia te ia o le a ala atu i lona faatuatua ma le auauna atu i le Alii, o le a i ai se aso e talitonu ai lona aiga ma faatasi atu ma ia i le Ekalesia. O le taimi lena, ua toatolu atalii o Thomas ma lona toalua, o Elisapeta, o le iva tausaga, fitu, ma le tolu. Na liua mulimuli ane ia Elisapeta i le 1831, (tagai The Joseph Smith Papers, Documents, Volume 1: July 1828–June 1831, ed. Michael Hubbard MacKay and others [2013], 194, note 412). O le folafolaga a le Alii e faamanuia le aiga o Marsh atonu na faamalosia ai Thomas ina ua valaauina o ia e fesoasaoni i le galuega a le Atua.

E faapena foi folafolaga o loo maua i aso nei ia i latou o e taumafai e tuuto atu i latou lava i le galuega a le Alii. Sa faasoa mai e Elder Robert D. Hales o le Korama a Aposetolo e Toasefululua le aafiaga lenei:

“Sa popole se ulugalii [faifeautalai faamisiona] i le tuua o lo la afafine laitiiti o le ua le toe toaga i le Lotu. Sa tusia e lona tama faamaoni: ‘Sa ma tatalo pea mo ia ma agapogi e le aunoa. Ona oo lea i le konafesi aoao, sa musumusu mai le Agaga ia te au, “Afai o le a e auauna atu, o le a leai se mea e te toe popole ai e uiga i lou afafine.” O lea na matou talanoa ai ma lo ma epikopo. O le vaiaso talu ona ma maua lo ma valaauga, sa faasilasila mai ai e ia ma lana uo tama ua fai la la’ua faamau. Ae ma te lei tuua mo Aferika, sa faia se faaipoipoga i lo matou fale. [Ona matou faapotopoto faatasi ai lea ma lo matou aia ma] ma faia se fono faaleaiga. … Sa ou tuuina atu la’u molimau i le Alii ma Iosefa Samita … ma fai atu ia te i latou ou te fia manao e tuuina atu ia i latou taitoatasi se faamanuiaga faaletama. Sa ou amata i le atalii ulumatua ona sosoo lea ma lona toalua ma faasolo ai lava seia oo i le uii … [e aofia ai ma lo ma atalii fou faaletulafono].’…

“… A o faamanuia e le tama faamaoni i lenei tala ia tagata o lona aiga, sa lagonaina e lona atalii faaletulafono le tosinaga a le Agaga Paia. Na tusia e le tama: ‘E oo atu i le faaiuga o le ma tausaga muamua ua amata ona faamaluluina [le] loto [o lo ma atalii faaletulafono] agai i le Ekalesia. Ae toeitiiti ma toe foi i le fale mai le ma misiona, na o mai o ia ma lo ma afafine e asiasi mai ia i ma’ua. I totonu o lana atopau mo le taimi muamua sa i ai sana ia lava seti o ofu mo le Aso Sa. Na matou o i le lotu, ma ina ua matou toe foi i le fale, sa papatiso o ia. I se tausaga mulimuli ane, sa faamauina i la’ua i le malumalu’” (“Ulugalii Faamisiona: Faamanuiaga mai le Ositaulaga ma le Auauna atu,” Ensign po o le Liahona, Me 2005, 40).

O anafea na e molimauina ai se aiga o faamanuiaina ona o se tasi o tagata o le aiga sa auauna atu ma le faamaoni i le Alii? E mafai faapefea e le iloaina e faamanuiaina e le Alii ia aiga o i latou o e auauna atu ia te Ia ona tosina ai au taumafaiga e auauna atu?

Mataupu Faavae ma Feagaiga 31:5. “Sasau lau selesaito ma lou agaga atoa, ma ua faamagaloina oe i au agasala”

O Le Seleselega Auro

O Le Seleselega Auro saunia e David Merrill. O mau o loo faasino i fusisaito o le saito ua seleseleina e faatusa i fua o galuega faafaifeautalai, e aofia ai agaga ua liua mai (tagai MF&F 31:4–5; 33:7, 9).

I faamanuiaga na folafola atu ia Thomas B. Marsh sa i ai le faamautinoaga o le a faamagaloina ana agasala e ala i ana taumafaiga maelega e folafola atu le talalelei i isi (tagai MF&F 31:5). Sa faamanino mai e Elder M. Russell Ballard o le Korama a Aposetolo e Toasefululua le sootaga o le faasoa atu o le talalelei ma le faatumauina o se faamagaloga o a tatou agasala.

“O se taunuuga natura o le liua o le faamagaloga faifai pea lea o agasala e ala i le ola i le talalelei, lea e aofia ai le faasoa atu o le talalelei i isi. Na tautino mai e Peresitene Spencer W. Kimball, ‘Ua ta’u mai e le Alii ia i tatou e faapea o le a sili atu ona mautinoa le faamagaloina o a tatou agasala a o tatou aumaia agaga ia Keriso ma tumau faamaoni i le tuuina atu o molimau i le lalolagi, ma e moni lava o i tatou uma taitoatasi o loo vaavaai mo se fesoasoani faaopoopo ina ia faamagaloina a tatou agasala.’ (Liahona, Nov. 1977, p. 5.)

“I le Mataupu Faavae ma Feagaiga ua tatou faitau ai: ‘Aua o le a Ou faamagaloina outou ia outou agasala ma le poloaiga lenei—ia outou tutumau-mausalī i o outou mafaufau i le mamalu ma le agaga o le tatalo, i le tuuina atu o le molimau i le lalolagi atoa e uiga i mea na ua taʼu atu ia te outou.’ (MF&F 84:61; ua faaopoopo le faatusilima.) O loo fai mai foi le Mataupu Faavae ma Feagaiga: “E ui i lea, ua faamanuiaina outou, ona o le molimau na outou tuu atu ua tusi faamaumau i le lagi mo agelu e vaai i ai; ma ua latou olioli i luga ia te outou, ma ua ua faamagaloina a outou agasala mai ia te outou’. (MF&F 62:3; ua faaopoopo le faatusilima.)

“… E peiseai e fai si manino o le aoaoga faavae ia te au; o le faamagaloina o agasala o se faiga e faifai pea. A o taumafai i tatou taitoatasi ia mama, atoatoa, ma faapaiaina, ou te le iloa se isi auala e sili atu mo i tatou e faia ai lenei mea nai lo le fesoasoani i isi o fanau a lo tatou Tama Faalelagi ia maua le upumoni” (“Tusi i lalo se Aso,” Liahona, Ian. 1985, 16).

Mataupu Faavae ma Feagaiga 31:9–13. O fautuaga ma lapataiga mo Thomas B. Marsh

E ui ina sa faafetaia Thomas B. Marsh mo lona faatuatua (tagai MF&F 31:1) ma sa folafola atu i ai faamanuiaga e tele, sa tuuina atu foi e le Alii ia te ia ni fautuaga ma ni lapataiga. I le 1835, sa valaauina ai Thomas e galue i le Korama a Aposetolo e Toasefululua i lenei tisipenisione. Na tofia mulimuli ane e avea ma Peresitene o lena Korama. Ae, i totonu o ni nai tausaga—ia Mati 1839—sa tape lona igoa ona ua liliuese. O faatonuga a le Alii o i le Mataupu Faavae ma Feagaiga 31 semanu e faamanuiaina ai o ia i se puipuiga faaleagaga pe afai na te ua’i atu i ai. Sa toe papatiso Thomas B. Marsh i le aso 16 Iulai, 1857, i Florence, Nebraska, ma na sau o ia i Iuta i le tausaga lava lea. Sa ia sailia le faamagaloga mai taitai o le Ekalesia, ma sa tuuina atu e Peresitene Iaga ia te ia se avanoa e tautala atu ai i le Au Paia. O mea ia sa ia ta’ua e uiga i lona liliuese:

“Sa tele taimi sa ou manao ai ia iloa pe na faapefea ona amata lo’u liliuese, ua ua ou faia se faaiuga masalo ai na alu ese le Agaga o le Alii mai lo’u loto.

“O le isi fesili o le, ‘na faapefea ae o anafea foi na e le maua ai le Agaga?’ Na ou lotoleaga i le Perofeta, ona ou vaaia ai lea le faaluaina ma faatuatuanai ai le mea sa’o, ma faaalu ai lo’u taimi atoa e vaavaai mo mea leaga, ma ina ua amata e le tiapolo ona taitai a’u sa faigofie ona tulai ae le mafaufau faalenatura, o le ita lea, lotoleaga ma le inoino. Sa mafai ona ou lagonaina i totonu ia te au; sa ou lagona le ita ma le inoino, ma ua alu ese le Agaga o le Alii, e pei ona fai mai le mau, sa faatauasoina au.” (“Remarks by Thomas B. Marsh,” Deseret News, Sept. 16, 1857, 220; spelling standardized).

Sa nofo Thomas B. Marsh i aso na totoe o lona soifua i Iuta. Na maliu o ia ia Ianuari 1866 i Ogden, lea o loo tanu ai.

Mataupu Faavae ma Feagaiga 31:10. Na faapefea ona avea Thomas B. Marsh ma se “fomai i le ekalesia”?

Sa maua e Thomas B. Marsh ni nai tomai i le faaaogaina faavailaau o laulaau, ma faatasi ai ma lena iloa sa mafai e ia ona fesoasoani i le tele o tagata. Peitai, o lona valaauga sili atu o le faamaloloina lea o agaga (tagai Thomas B. Marsh, “History of Thos. Baldwin Marsh,” 18.)

Faitau le Mataupu Faavae ma Feagaiga 32, ma vaavaai mo auala o le a fesoasoani ai le Alii ia i latou o e valaauina e folafola atu le talalelei.

Mataupu Faavae ma Feagaiga 32: Talaaga Faaopoopo Faasolopito

I le taumafanafana o le 1830, sa malaga mai ai Pale P. Palate ma lona faletua o Thankful, mai lo latou fale i Ameresi, Ohaio, e asiasi i tagata o le latou aiga i le setete o Niu Ioka. Sa uunaia e le Agaga Paia ia Pale e afe i le nuu o Newark, Niu Ioka, e latalata i Palamaira, lea na ia iloa ai e uiga i le Tusi a Mamona. Sa ia tusia mulimuli ane, e uiga i lana tali i le tusi:

Pale P. Palate

Na tofia Pale P. Palate o se faifeautalai i sa Lamana ma avea mulimuli ane o se Aposetolo.

“Sa ou susueina ma le naunautai, ma faitau lona itulau autu. Ona ou faitauina lea o molimau a nisi o molimau e faatatau i lona mauaina ma le faaliliuina. Ina ua mavae lenei mea, sa ou amata faitauina ona anotusi mai le amataga. Sa ou faitau i le aso atoa; o le ai, sa o se avega mamafa, sa leai so’u manao i se meaai; o le moe sa o se avega mamafa pe a oo mai le po, aua sa sili atu ia te a’u le faitau i lo o le moe.

“A o ou faitauina, sa i o’u luga le agaga o le Alii, ma sa ou iloa ma malamalama ua moni le tusi, e pei lava lona manino ma le iloagofie o le malamalama ma le iloa e se tagata o loo i ai o ia” (Autobiography o Parley Parker Pratt, ed. Parley P. Pratt [1938], 37).

Sa malaga atu Pale i Palamaira, lea sa feiloai ai ma aoaoina ai o ia e Ailama Samita. E lei leva, ae malaga atu Ailama ma Pale i Feiete, Niu Ioka, e feiloai ai ma tagata o le paranesi ua faatupulaia a le Ekalesia. Sa papatisoina ma faauuina Pale, o se toeaina e Oliva Kaotui ia Setema 1830.

E laitiiti se iloa e uiga i liua mai o Ziba Peterson. Ua tatou iloa sa papatisoina o ia e Oliva Kaotui ia Aperila 1830, ma sa faauuina o se toeaina ia Iuni o le tausaga lava lea e tasi. E lei leva ona tuua e Oliva Kaotui ma Pita Uitimera le Itiiti mo le la misiona, ae fesili atu le Perofeta o Iosefa Samita i le Alii e fia iloa pe tatau ona i ai nisi e o faatasi ma i la’ua. Sa ia maua mai le faaaliga o loo tusia i le Mataupu Faavae ma Feagaiga 32, e valaauina Pale P. Palate ma Ziba Peterson e o.

I le tautoulu o le 1830 ma le taumalulu o le 1830–31, o le vaega toalaiti o faifeautalai e aofia ai Oliva Kaotui, Pita Uitimera le Itiiti, Pale P. Palate, ma Ziba Peterson (na au faatasi atu ai ma se tagata liliu mai Ohaio e igoa ia Fredrick G. Williams), sa latou malaga pe toetoe atoa le 1,500 maila (pe tusa ma le 2,400 kilomita) mai Feiete, Niu Ioka, i Initipene, Misuri—sa tele ina savavali. I la latou malaga, sa talai atu e nei faifeautalai le talalelei i Mentor ma Katelani, Ohaio, i se faapotopotoga o tagata o e sa sueina se toefuataiga o le FaaKerisiano o le Feagaiga Fou. O Sini Rikitone, le taitai o le vaega, ma le toatele o le potopotoga sa liua i le talalelei toefuataiina. Sa iu ina taunuu atu nei faifeautalai e toafa i Initipene i le ogatotonu o Ianuari 1831. O se vaega o la latou malaga, na latou onosaia ai le maatiati o le malulu, matagi malolosi, ma le le lavā, sa matele lava ina ola i falaoa sana malo ma fasipuaa mata malo. I nisi o nofoaga, o le kiona sa latou savavali ai sa tolu futu le loloto. E ui lava i nei faigata, sa faamanuiaina faifeautalai i le faailoaina atu o le talalelei i tagata Initia Amerika o e sa nonofo i Teritori o Initia na latalata i le tuaoi i sisifo o Misuri. Na faataunuuina e le Alii Lana folafolaga o le a faatasi o Ia ma nei faifeautalai, ma e leai se mea o le a manumalo ia te i latou. (Tagai i le Church History in the Fulness of Times Student Manual, 2nd ed. [Church Educational System manual, 2003], 83–85.)

Mataupu Faavae ma Feagaiga 32

Ua valaau le Alii ia Pale P. Palate ma Ziba Peterson e folafola le talalelei ia sa Lamana.

O a ni upumoni e mafai ona e faailoa mai i le Mataupu Faavae ma Feagaiga 32 e uiga i le ala o le a fesoasoani ai le Alii ia te i tatou a o tatou auauna atu ma le faamaoni ia te Ia?

Mataupu Faavae ma Feagaiga 32:1–3. “O Aʼu lava o le a alu atu faatasi ma i latou ma i ai i totonu o lo latou lotolotoi”

O i le Vao

O i le Vao saunia e Robert Theodore Barrett. Na valaauina Oliva Kaotui, Pale P. Palate, Pita Uitimera, ma Ziba Peterson e folafola atu le talalelei “ia sa Lamana” (MF&F 32:2).

Na tofia Pale P. Palate ma Ziba Peterson e faatasi atu ia Oliva Kaotui ma Pita Uitimera le Itiiti i la la’ua misiona ia sa Lamana (tagai MF&F 28:8–9; 30:5–8). Na folafola atu e le Alii i nei faifeautalai afai o le a latou folafola atu le talalelei i le agamalu, o le a Ia “alu atu o Ia faatasi ma i latou ma o le a i ai i totonu o lo latou lotolotoia” (MF&F 32:3). Na faasoa mai e Peresitene Henry B. Eyring o le Au Peresitene Sili le aafiaga lenei e aoao mai ai nisi o auala e mafai e le Alii ona faatasi ma i tatou a o tatou auauna atu i o tatou valaauga:

“E faalautele e le Atua i latou Na te tofia, e oo lava i mea e foliga ia te outou o se auaunaga itiiti pe tau le iloa. O le a e maua le meaalofa o le vaai atu ua faalauteleina lau auaunaga. Avatu le faafetai a o avea ai mou lena meaalofa. …

“E le gata o le a faalautele e le Alii le mana o au taumafaiga. O le a galue lava o Ia lava faatasi ma oe. O Lona siufofoga i faifeautalai e toafa, na valaauina e ala atu i le Perofeta o Iosefa Samita i se galuega faigata, o loo tuuina mai ai se faalototele i tagata uma Na te valaauina i totonu o Lona malo: ‘Ma o Au lava o le a alu atu faatasi ma i latou ma i ai i totonu o lo latou lotolotoi; ma o Au o lo latou fautua i le Tama ma o le a leai se mea e faasaga ia te i latou e manumalo’ [MF&F 32:3]. …

“E mafai ona e maua le faamautinoaga maualuga o le a matua faateleina lou mana e le Alii. Na pau lava le mea e finagalo mai ai o Ia o lou tuu atu lea o lau taumafaiga silisili ma lou loto atoa. Ia faia ma le lotofiafia ma faatasi ai ma le tatalo o le faatuatua. O le a auina mai e le Tama ma Lona Alo Pele le Agaga Paia e fai ma au soa e taialaina oe. O le a faateleina au taumafaiga i olaga o tagata e te auauna atu i ai. Ma e toe tepa i tua i mea e ono foliga mai nei o taimi faigata o le auaunaga ma le ositaulaga, o le a avea le ositaulaga ma se faamanuiaga, ma o le a e iloa ai sa e vaai i le aao o le Atua o sii ae i latou sa e auauna i ai mo Ia, ma sii ae foi oe i luga” (“Tulai i lou Valaauga,” Ensign po o le Liahona, Nov. 2002, 77–78).

Mataupu Faavae ma Feagaiga 33: Talaaga Faaopoopo Faasolopito

Sa nofo Ezra Thayne e lata i Palamaira, Niu Ioka, ina ua ia faalogo e uiga i le Toefuataiga o le talalelei a Iesu Keriso. Sa ia faafaigaluegaina tagata o le aiga o Samita e fesoasoani ia te ia i ana galuega faatino. Sa iu ina ioe o ia e auai i se sauniga sa folafola atu ai e Ailama Samita le talalelei. Na ia tusia mulimuli ane e uiga i lona tali atu i mea sa aoao mai e Ailama: “O upu uma sa tuia ai a’u i le ta’ele o lo’u agaga. Sa ou faapea, o upu uma sa tusi mai ia te a’u. Na tafe ifo loimata i o’u alafau, sa ou matuai faamaualuga ma fia loto malo. O toatele sa i ai iina latou te iloaina au. … Sa ou saofai seia i’u ina ou to’a lelei ae ou te le’i ea i luga” (sii mai le Matthew McBride, “Ezra Thayre: From Skeptic to Believer,” i le Revelations in Context, ed. Matthew McBride and James Goldberg [2016], 62, po o le history.lds.org).

Sa maua e Ezra se molimau mamana o le moni o le Tusi a Mamona. Sa ia maua foi se faaaliga lea ‘’sa sau ai se tamaloa ma aumai ia te a’u se taaiga pepa ma tuu mai ia te au, faapea foi ma se pu, ma fai mai ou te feulaina. Sa ou fai atu ia te ia, ou te le’i feulaina lava se pu i lo’u olaga. Sa ia fai mai, e mafai ona e feula, tago e faataitai. Sa ou tuuina i lo’u gutu ma feula, ma o se leo e sili ona matagofie lea ua ou faalogo i ai. O le taaiga pepa o le faaaliga ia te au ma Northrop Sweet. O Oliva Kaotui o le tamaloa lea na aumaia le taaiga pepa ma le pu. Ina ua ia aumaia le faaaliga ia te au ma Northrop Sweet, sa ia fai mai, o le faaaliga lea mai le Atua mo oe” (i le The Joseph Smith Papers, Documents, Volume 1: July 1828–June 1831, 206). Na papatisoina Ezra Thyre ma Pale P. Palate, ma ia Oketopa 1830, i le faaaliga o loo tusia i le Mataupu Faavae ma Feagaiga 33, sa tofia ai o ia ma Northrop Sweet i le galuega a le Alii.

O Northrop Sweet sa papatisoina o se tagata o le Ekalesia e Pale P. Palate ia Oketopa 1830, i Palamaira, Niu Ioka. Na faaipoipo o ia i le tei o Matini Harisi. E lei leva ona uma le papatisoga, e pei ona tusia i le Mataupu Faavae ma Feagaiga 33, sa tofia o ia e auauna atu i se misiona. Na oo atu ia Iuni 1831, ua siitia atu Northrop i Katelani, Ohaio, lea na faauuina ai o ia o se toeaina; ae peitai, e le’i leva ae aluese ma le Ekalesia ma taumafai faatasi ma nisi e faatu se isi ekalesia, ma faapea mai, o Iosefa Samita o se perofeta pepelo.

Mataupu Faavae ma Feagaiga 33

Ua tofia e le Alii Ezra Thayre, Northrup Sweet, ma Osona Palate e folafola atu le talalelei.

Faitau le Mataupu Faavae ma Feagaiga 33, ma vaavaai mo faamanuiaga e o faatasi ma le lototoa e aoao atu le talalelei.

Mataupu Faavae ma Feagaiga 33:4. “Ua latou sese i le tele o taimi ona o faitaulaga pepelo”

O le ata faatusa o le tovine ua faaleagaina i le Mataupu Faavae ma Feagaiga 33:4 e faasino i le tulaga o le liliuese lea e faaleagaina ai le lalolagi ona o le agasala o faitaulaga pepelo. Na faamalamalama e Elder Dallin H. Oaks le uiga o faitaulaga pepelo:

“E i ai i tusitusiga paia se upu mo le auaunaga i le talalelei “mo le faamoemoe o le mauaina o oa ma le mamalu’; o le ‘faitaulaga pepelo lea.’ (Alema 1:16.) Fai mai Nifae, ‘O faitaulaga pepelo, o tagata ia latou te talai atu ma faatutu aʼe i latou lava e fai ma malamalama i le lalolagi, ina ia mafai ona latou maua o oloa ma viiga o le lalolagi; a ua latou lē saili le manuia o Siona.’ (2 Ni. 26:29.) I nei aso e gata ai, ua poloaiina i tatou e ‘saili e aumai i luma ma faatu le faamoemoe o Siona.’ (MF&F 6:6.) Ae paga lea, e le o i latou uma o e ua faataunuuina le galuega i lalo o le na faauluuluga o loo matuai faamoemoe e atinae Siona pe faamalolosia le faatuatua o tagata o le Atua. E mafai foi ona galulue isi faamoemoega.

“O auaunaga e matua foliga mai e le manatu faapito ae o le mea moni e mo ‘oa ma le mamalu, e mautinoa lava e o mai i totonu o le tausalaga a le Faaola o i latou o e foliga mai ‘fafo e amiotonu i tagata, ae o totonu … ua tutumu i le pepelo ma le amioletonu.’ (Mata. 23:28.) O lea ituaiga auaunaga e leai se taui faaletalalelei e maua ai” (“Aisea Tatou Te Auauna Atu Ai?” Liahona, Ian. 1985, 67).

Na saunoaElder Marlin K. Jensen o le Fitugafulu e uiga i le eseesega o le faitaulaga pepelo ma le auauna atu ma le manatu tasi i le mamalu o le Atua:

“O i latou o e sailia le mamalu ma mea mo i latou lava i le faia o le galuega a le Alii e tausalaina i le mea ua ta’ua i tusitusiga paia o faitaulaga pepelo. …

O le Au Paia o Aso e Gata Ai e manatu tasi i le mamalu o le Atua latou te vaai atu i le olaga mai se vaaiga ese nai lo i latou o e o tata’i atu la latou gauai i isi mea. O na ituaiga o tagata mo se faataitaiga, e faalemanaia tele ni faamalo ma ni aloa’iaga o a latou galuega lelei. E sili lo latou naunau e fafaga mamoe a le Alii nai lo le faitauina o i latou. O le mea moni, e tele ina latou maua lo latou fiafiaga sili i le auauna atu e aunoa ma le iloa, o lea latou te tuua ai e e manuia i lo latou agalelei, ma le leai o se isi e faafetai i ai pe faaviivii i ai vagana ai le Alii” (“Ma le Manatu Tasi i le Mamalu o le Atua,” Liahona, Ian. 1990 27).

Mataupu Faavae ma Feagaiga 33:8–10. “Tatala o oulua gutu”

O Tusiga a Nifae i luga o Papatusi Auro

O Tusiga a Nifae i luga o Papatusi Auro, saunia e Paul Mann. Na faatonu e le Alii Ana auauna e tatala o la’ua gutu i le savali o le salamo, ma o le a “avea i la’ua e pei lava o Nifae o anamua” (tagai MF&F 33:8–10).

I fuaiupu e tolu (tagai MF&F 33:8–10) na poloaiina faatolu ai Ezra Thayre ma Northrop Sweet e tatala o la’ua gutu ma folafola atu le salamo. E manaomia e le Alii ia auauna o e totoa ma naunau e folafola atu le talalelei.Na faasoa mai e Peresitene Henry B. Eyring le faataitaiga lenei i le mafuaaga e taua ai ona tatala o tatou gutu ma faasoa atu le talalelei i tagata uma tatou te iloa:

“I se taimi i le olaga a sau, o tagata uma na e feiloai i ai i le olaga lenei, o le a latou iloa le mea ua e iloa i le taimi nei. O le a latou iloa na pau lava le ala e ola faavavau ai faatasi ma o tatou aiga ma faatasi ai ma lo tatou Tama Faalelagi ma Lona Alo o Iesu Keriso, o le filifili lea e ulu atu i le faitotoa e ala i le papatisoga i lima o i latou ua i ai le pule mai le Atua. O le a latou iloa ai, na pau lava le ala e mafai ai ona faavavau faatasi aiga o le talia lea ma tausi ia feagaiga paia o loo osia i malumalu o le Atua i lenei lalolagi. O le a latou iloa na e iloaina. Ma o le a latou manatua pe na ofoina atu ia i latou le mea na ofoina atu e se isi ia te oe.

“E faigofie lava ona faapea, ‘E le o le taimi sao lenei.’ Ae o loo i ai le matautia i le faatuai. O tausaga ua alu, na ou faigaluega ai mo se tamaloa i Kalefonia. Sa ia faafaigaluegaina au, na agalelei o ia ia te au, ma na foliga mai sa maualuga lava lana vaaiga ia te au. Atonu sa na o au lava le tagata o le Au Paia o Aso e Gata Ai na masani lelei i ai. Ou te le iloa po o a mafuaaga uma na ou maua na ou faatalitali ai mo se taimi sili ona lelei e talanoa atu ai ia te ia e uiga i le talalelei. Ae ou te manatua lou lagonaina o le faanoanoa ina ua ou iloaina, ina ua litaea o ia ma na mamao foi le mea na ou nofo ai, ua maliliu i laua ma lona faletua a o malaga atu i laua i le leva o le po i lo laua fale i Carmel, Kalefonia. Na alofa o ia i lona faletua. Na alofa o ia i lana fanau. Na alofa foi o ia i ona matua. Na alofa o ia i fanau a lana fanau, ma o le a alofa o ia i lana fanau ma o le a manao latou te mafuta faatasi e faavavau.

“Ia, ou te le iloa pe o le a faapefea ona taulimaina le tumutumu o tagata i le olaga a sau. Ae faapea la o le a ou feiloai atu ia te ia, ma o le a vaai mai o ia i ou mata, ma o le a ou vaaia ai i ona mata le fesili: ‘Hal, na e iloaina lava. Aisea na e le tauina mai ai ia te au?’” (“O Se Leo o le Lapataiga,” Liahona, Ian. 1999, 33).

O anafea na e lagonaina ai le taialaina o oe e le Alii a o e tatalaina lou gutu e faasoa atu le talalelei?

Mataupu Faavae ma Feagaiga 34: Talaaga Faaopoopo Faasolopito

O Osona Palate o le uso o Pale P. Palate. Sa faamatala e Osona ana taumafaiga e faalatalata atu i le Alii a o talavou: “E tele taimi sa ou lagona se naunautaiga tele e saunia mo se tulaga i le lumanai; ae e lei amataina lava, o le mea moni lava, e saili atu i le Alii, seia oo i la tautotogo o le 1829. Ona amata lea ona ou tatalo ma le faatauanau, ma salamo i agasala uma. I le paganoa o le po, a o momoe gapepe isi i o latou aluga, sa masani ona ou malolo atu i ni nofoaga lilo i fanua gaogao po o le vaomatua tuufua, ma ifo atu i luma o le Alii, ma tatalo ai mo itula ma se loto momomo ma le agaga salamo; o lo’u faamafanafanaga ma lo’u fiafiaga lea. O le faanaunauga sili o lo‘u loto, ina ia faaali mai e le Alii Lona fingalo e uiga ia te a’u” (i le The Orson Pratt Journals, comp. Elden J. Watson [1975], 8–9). Ia Setema 1830 sa asiasia ai Osona e se tasi o ona uso matutua, o Pale P. Palate, o le e lei leva ona papatiso. Faapei foi o Pale, sa liliu mai Osona i le upumoni, ma sa papatiso o ia i le aso 19 Setema, 1830 i lona aso fanau lona 19. Ona ia malaga ai lea mo le 200 maila e feiloai i le Perofeta o Iosefa Samita i Feiete, Niu Ioka. Sa fesili atu o ia ina ia iloa le finagalo o le Alii mo ia, ma sa maua ai e Iosefa Samita le faaaliga o loo tusia i le Mataupu Faavae ma Feagaiga 34.

Mataupu Faavae ma Feagaiga 34

Ua valaauina Osona Palate e talai atu le talalelei

Faitau le Mataupu Faavae ma Feagaiga 34, ma vaavaai mo mafuaaga na poloaiina ai e le Alii i tatou e folafola atu le talalelei i isi.

Mataupu Faavae ma Feagaiga 34:10 “o le a tuu atu e ala atu i le mana o le Agaga Paia”

Sa 19 tausaga o Osona Palate ma sa na o ni nai vaiaso talu ona avea ma tagata o le Ekalesia ina ua tuu atu e le Alii ia te ia, e ala i le Perofeta o Iosefa Samita, le faaaliga o loo tusia i le Mataupu Faavae ma Feagaiga 34. I le faaaliga lea na folafola atu ai e le Alii ia Osona o le a mafai ona ia molimau atu i le agaga o valoaga (tagai MF&F 34:10).

Orson Pratt

Sa 19 tausaga o Osona Palate ina ua valaauina o ia e “sii ae [lona] leo … ma alaga atu le salamo” (MF&F 34:6).

Na mavae tausaga e tele mulimuli ane, i le avea ai ma Aposetolo a le Alii, na ta’ua ai e Elder Osona Palate (1811–1881) e uiga i lena folafolaga: “Sii ae lou leo ma ia vavalo atu, ma o le a tuu atu e ala i le mana o le Agaga Paia.’ O le mea tonu lava lea i le faaaliga na foliga mai ia te au ua matua tele naua mo au e ausia, ae peitai sa i ai se poloaiga lelei e tatau ona ou faia. E tele taimi sa ou manatunatu ai i lenei faaaliga, ma e tele foi taimi ou te tuufesili ai i lo’u loto—’Pe ua ou faataunuuina ea lena poloaiga e pei ona tatau ai ona ou faia? Pe ua ou sailia ea ma le lotonaunau e pei ona sa tatau ai ona ou maua le meaalofa o valoaga, ina ia faataunuu ai le manaoga o le lagi?’ Ma sa ou lagonaina i nisi taimi le tausalaina o a’u lava, ona o lo’u faatamala ma ona o le laitiiti o le alualu i luma sa ou faia e tusa ai ma lenei meaalofa sili, faalelagi ma le paia. Sa matuai leai sou faamoemoe e vavalo i tagata sei vagana ua tuuina mai ia te au e ala i musumusuga ma le mana o le Agaga Paia” (“Discourse by Elder Orson Pratt,” Deseret News, Mar. 3, 1875, 68).

Sa molimau mai Peresitene Henry B.Eyring e faapea o le a tuuina mai e le Alii le lagolago faalelagi e ala mai i le Agaga Paia ia i latou uma o Ana fanau a o latou saili e faataunuu o latou valaauga ma tiutetauave:

“O le a taiala e le Alii oe e ala i faaaliga e faapei foi ona sa Ia valaauina ai oe. E tatau ona e fesili atu i le faatuatua mo faaaliga e iloa ai le mea e tatau ona e faia. O lou valaauga e aumai faatasi ai le folafolaga e tali ai fesili o le a oo mai. Peitai o lena taitaiga o le a na o le pau le taimi e oo mai ai pe a mautinoa e le Alii o le a e usitai. Ina ia iloa Lona finagalo e tatau ona e tautino atu e faia. O upu ‘Ia faia Lou finagalo,’ e tusia i le loto, o le faitotoa lea i faaaliga.

“O tali e oo mai e ala i le Agaga Paia. E tele taimi o le a e manaomia ai lena taitaiga. Ina ia iai le Agaga Paia e fai ma au soa, e tatau ona e agavaa, faamamaina i le Togiola a Iesu Keriso. O lea, o lou usiusitai i poloaiga, o lou naunau e faia Lona finagalo, ma lou ole atu i le faatuatua o le a fua i ai po o le a le manino e mafai ona taiala ai oe e le Matai e ala i tali i au tatalo.

“E tele taimi o tali e oo mai a o e suesue i tusitusiga paia. O loo i ai tala o mea sa faia e le Alii i Lana auaunaga i le olaga nei ma le taitaiga na Ia tuu atu i Ana auauna. O loo i ai aoaoga faavae ia e faatatau i taimi uma ma tulaga uma. O le mafaufau loloto i tusitusiga paia o le a taitai atu ai oe e feisili ia fesili sa’o i tatalo. Ma e faapei lava ona sa’o na matala le lagi ia Iosefa Samita ina ua uma ona ia manatunatu loloto ma le faatuatua i tusitusiga paia, o le a tali mai foi le Atua i au tatalo ma o le a Ia taitai oe i lou lima. …

“E mafai ona e maua le faamautinoaga maualuga o le a matua faateleina lou mana e le Alii. Na pau lava le mea e finagalo mai ai o Ia o lou tuu atu lea o lau taumafaiga silisili ma lou loto atoa. Ia faia ma le lotofiafia ma faatasi ai ma le tatalo o le faatuatua. O le a auina mai e le Tama ma Lona Alo Pele le Agaga Paia e fai ma au soa e taialaina oe. O le a faalauteleina au taumafaiga i olaga o tagata e te auauna atu i ai. Ma a oo ina e toe tepa i tua i mea atonu e foliga mai ia te oe i le taimi nei o taimi faigata o le auaunaga ma le ositaulaga, o le a avea le ositaulaga o se faamanuiaga, ma o le a e iloa ai na e vaai i le aao o le Atua o sii ae i latou o e sa auauna i ai mo Ia, ma sii ae oe i luga” (“Rise to Your Call,” Ensign, Nov. 2002, 76, 78).

Mafaufau i se taimi na faamanuiaina ai oe ona o le aoao atu o le talalelei i se tasi po o se taimi na faamanuiaina ai oe ona o se tasi na faasoa atu le talalelei ia te oe. Atonu e te manao e tusi i lalo ou mafaufauga.

Mataupu Faavae ma Feagaiga 34:11. “Ou te faatasi ma oe”

Ua tele taimi ua folafola mai ai e le Alii e faapea o le a ia faatasi ma i latou o e faamaoni ma e e uai atu i le valaaulia e fesoasoani i Lana galuega (tagai, mo se faataitaiga, MF&F 30:11; 31:13; 32:3; 33:9; 34:11). Na faamatala e Elder David A. Bednar o le Korama a Aposetolo e Toasefululua le ala e mafai ai ona faamafanafanaina i lenei folafolaga:

“O le osia ma le tausia o feagaiga paia e tuufaatasia ai i tatou ma le Alii o Iesu Keriso. O le mea moni lava, o loo augani mai le Faaola ia i tatou ina ia faalagolago atu ma tatou galulue faatasi ma Ia, e ui lava o a tatou taumafaiga silisili e le tutusa ma e le mafai ona faatusalia ia te Ia. A o tatou faalagolago atu ia te Ia ma tosoina faatasi a tatou avega ma Ia i le malaga o le olaga nei, e moni lava e avegofie Lana amo, o Lana avega foi e mama ia.

“E le o tuua na o i tatou ma e le tatau ona tuua na o i tatou. E mafai ona tatou fetaomi atu i luma i o tatou olaga i aso taitasi faatasi ai ma le fesoasoani faalelagi. E auala mai i le Togiola a le Faaola tatou te mafai ai ona maua le gafatia ma le “malosi i [lo tatou lava] mana” (“Faaola e ia Ou Alofa,” Viiga, nu. 150). E pei ona folafola mai e le Alii, ‘O lea, ia faaauau pea la outou malaga ma ia olioli o oulua loto; aua faauta, ma tagai, Ou te faatasi ma oulua e oo lava i le iuga’ (MF&F 100:12)” (“Tauave ma le Faigofie a Latou Avega,” Ensign po o le Liahona, Me 2014, 88).

I le tele o mea i faaaliga o loo tusia i le Mataupu Faavae ma Feagaiga 30–34, na folafola mai ai e le Alii e faapea o le a faatasi o Ia ma i latou o e auauna atu ma le faamaoni ia te Ia (tagai MF&F 30:11; 31:13; 32:3; 33:9; 34:11). Mafaufau e faailoga taimi taitasi i au tusitusiga paia. Mafaufau i se taimi na faatasi ai le Alii ma oe a o e auauna atu ia te Ia.