Mataupu 16
Mataupu Faavae ma Feagaiga 42
Faatomuaga ma le Faasologa o Taimi
Na poloaiina e le Alii le Au Paia sa nonofo i Niu Ioka e o i Ohaio ma sa folafola atu o le a latou maua iina Lana tulafono (tagai MF&F 37:3; 38:32). I le aso 9 Fepuari, 1831, e lei leva ona taunuu Iosefa Samita i Katelani, Ohaio, sa potopoto ni toeaina e 12 o le Ekalesia ma tatalo faatasi, e pei ona sa poloaiina ai i latou e le Alii e fai (tagai MF&F 41:2–3). A o sailia e nei taitai o le Ekalesia le taitaiga a le Alii e faatatau i le tuputupu ae o le Ekalesia, sa maua mai e le Perofeta o Iosefa Samita le faaaliga o loo tusia i le Mataupu Faavae ma Feagaiga 42:1–72. E lua vaiaso mulimuli ane, i le aso 23 Fepuari 1831, sa toe saili atu ai le Perofeta mo nisi faatonuga mai le Alii; o le taitaiga faaopoopo na ia mauaina o loo tusia i le Mataupu Faavae ma Feagaiga 42:74–93. O auiliiliga faaopoopo o loo tusia i le fuaiupu 73 na faaopoopo mulimuli i ai e le Perofeta i le taimi na lolomi ai le Mataupu Faavae ma Feagaiga. O le tuu faatasia, ua ta’ua ai nei faaaliga “o le tulafono a le Ekalesia” (MF&F 42, faaulutala o le vaega). I nei faaaliga, na faalauiloa mai ai e le Alii ia tulafono faaleagaga ma faaletino, e taitaia ai tagata o le Ekalesia, e fesoasoani ai i e matitiva, faatupeina ai taumafaiga eseese o le Ekalesia, ma fesoasoani ai i isi Au Paia o e na o mai i Ohaio. O nei tulafono na tuu mai ai le taitaiga i le Ekalesia tamameamea ma sa fesoasoani e tapena ai i latou e avea ma nuu o Siona.
-
2 Ianuari, 1831Sa folafola atu i le Au Paia i Niu Ioka o le a latou maua ia tulafono a le Atua pe a latou faapotopoto i Ohaio (tagai MF&F 38).
-
Amataga o Fepuari 1831Na taunuu ai Iosefa ma Ema i Katelani, Ohaio.
-
4 Fepuari, 1831Sa valaauina Eteuati Paterika e avea ma uluai epikopo o le Ekalesia toefuataiina (tagai MF&F 41).
-
aso 9 ma le aso 23 Fepuari, 1831Na maua mai ai le Mataupu Faavae ma Feagaiga 42.
Mataupu Faavae ma Feagaiga 42: Talaaga Faaopoopo Faasolopito
Ina ua taunuu le Perofeta o Iosefa Samita i Katelani, Ohaio, i le amataga o Fepuari 1831, sa ia maua ai ona o le leai o se taitaiga faaperofeta, sa lei malamalama atoa ai le Au Paia iina i aoaoga faavae ma aiaiga a le Ekalesia. Sa tele a latou fesili ma le malamalama sese e tusa ai ma faaaliga faaleagaga, pe faapefea ona ola faatasi o se nuu o le Au Paia, taitaiga i le Ekalesia, ma pe faapefea ona tupu le faapotopotoina o le Au Paia.
A o lei aoaoina e uiga i le talalelei toefuataiina, o nisi o tagata o le Ekalesia faatoa papatiso i Katelani, sa auai i latou i ni vaega faalenuu sa faaigoa “o le aiga.” O lea vaega sa faavae a latou faiga i faamatalaga o le Feagaiga Fou e uiga i uluai Au Paia Kerisiano na “tuutasi a latou mea uma” (tagai Galuega 2:44–45; 4:32). Ina ua mavae ona avea ma tagata o le Ekalesia toefuataiina, o le toatele o nei tagata faatoa liliu mai sa fai pea a latou faiga masani o le ola faalenuu. O se tasi o ia vaega sa nonofo i le faatoaga a Isaako Morley, i tua atu o le nuu o Katelani. “Ina ua taunuu Ioane Uitimera i le ogatotonu o Ianuari mai Niu Ioka [1831], sa ia matauina o le mea na latou faia na afua ai le tele o faafitauli. Mo se faataitaiga, na ave ma faatau atu e Heman Bassett se uati e tuu i le taga, sa anaina e Levi Hancock. Ina ua fesiligia pe aisea, na tali Heman, ‘ Oi, sa ou manatu sa i ai uma i le aiga.’ Na tali atu Levi sa lei fiafia o ia i lea ituaiga o ‘faiga faaleaiga’ ma na te le toe taliaina [Levi W. Hancock, ‘Levi Hancock Journal,’ Church History Library, Salt Lake City, 81]” (Church History in the Fulness of Times Student Manual, 2nd ed. [Church Educational System manual, 2003],95).
Ina ua tuua Katelani, sa aoaoina e le Perofeta o Iosefa Samita le faaletonu o lea faiga faaletamaoaiga. Sa ia iloaina e toatele tagata o le Ekalesia mai Niu Ioka sa ositaulagaina le tele o mea e tuua ai o latou fale ae faatasi mai ma le Au Paia i Ohaio. Sa ia iloaina foi o le a manaomia e le Ekalesia ni tupe, oloa, ma fanua ina ia fesoasoani ai i e matitiva ma lagolago ai i le femalagaai mai o e faapotopoto i Ohaio. Na amata e Iosefa ona fuafua mo lenei lolofi mai o le Au Paia mai Sasae ma mo le faavaeina o Siona i Misuri “i tuaoi latalata i sa Lamana” (MF&F 28:9).
I le usiusitai ai i le taitaiga a le Alii o loo tusia i le Mataupu Faavae ma Feagaiga 41:2--3, na fono ai le Perofeta o Iosefa Samita ma toeaina e 12 i le aso 9 Fepuari, 1831, ma tatalo faatasi, ma ole atu ai i le Alii ina ia faaali mai Lana tulafono. Na fesili atu nei uso i le Alii e uiga i mataupu e lima i se tulaga faapitoa: (1) pe tatau ona faapotopoto i se nofoaga se tasi ia nuu eseese o le Au Paia pe tumau pea le faaeseese i le taimi nei, (2) pe o le a le tulafono a le Alii mo le puleaina ma le faafoeina o le Ekalesia, (3) pe faapefea ona latou tausia aiga o i latou o e valaauina e galulue faafaifeautalai (4) pe faapefea e le Au Paia o loo ola i lalo o mataupu faavae o le faapaiaga ona taulimaina tagata e le lolotu, ma le (5) o a tapenapenaga e tatau ona fai ina ia tausia ai le Au Paia e taunuu mai Sasae (tagai The Joseph Smith Papers, Documents, Volume 1: July 1828–June 1831, ed. Michael Hubbard MacKay ma isi [2013], 246--47, note 42). I le tali mai, na maua ai e le Perofeta le faaaliga o loo tusia i le Mataupu Faavae ma Feagaiga 42:1–72, o se tuufaatasiga o tali faafaaaliga na tuu mai e le Alii i nei uso e tali ai fesili muamua e tolu. O tali faaalia i fesili o totoe e lei lolomia o se vaega o le Mataupu Faavae ma Feagaiga.
O le fale o Newel K. Whitney i Katelani, Ohaio
E lua vaiaso mulimuli ane, i le aso 23 Fepuari, 1831, na o atu ai Iosefa Samita ma toeaina e toafitu i le Alii ma nisi fesili e faatatau i le faatinoina o le tulafono a le Ekalesia. Na tuu atu e le Alii i nei alii se taitaiga faaopoopo. O lea taitaiga na faaopoopo i le faaaliga o le aso 9 Fepuari ma ua tusia nei i le Mataupu Faavae ma Feagaiga 42:74–93. O auiliiliga faaopoopo o loo tusia i le Mataupu Faavae ma Feagaiga 42:73 na faaopoopo mulimuli i ai e le Perofeta i le taimi na saunia ai le Mataupu Faavae ma Feagaiga mo le lolomiina. E taua le matau faapea na faia e le Perofeta o Iosefa Samita i lea taimi i lea taimi ni suiga po o faaopoopoga i faaaliga na tusia muamua e faamanino ai pe atagai mai ai se malamalama faaopoopo na faaalia mai e le Alii. O nei faafouga musuia e faapupula mai a le natura faifai pea o faaaliga ma o se faataitaiga o le aia ma le pule a le Alii ma Lana peorfeta e suia ai pe faamanino ai faaaliga muamua.
Mataupu Faavae ma Feagaiga 42:1-29
Ua valaauina e le Alii ia toeaina e folafola le talalelei, faatonu i latou i le aoaoina atu o le talalelei, ma faaali atu i ai tulafono ma poloaiga mo le Au Paia.
Mataupu Faavae ma Feagaiga 42:1–3. ”Faafofoga ma usiusitai i le tulafono”
Sa faasino e le Perofeta o Iosefa Samita i faaaliga o loo tusia i le Mataupu Faavae ma Feagaiga 42 o “le tulafono o le Ekalesia” (MF&F 42, faaulutala o le vaega). O nei faaaliga na faataunuu ai le folafolaga muamua a le Alii e avatu i le Au Paia Lana tulafono pe afai e usitaia e Iosefa Samita ma le Au Paia sa nonofo i Niu Ioka le poloaiga e toe o i Ohaio. Sa aofia ai i lenei tulafono ia aoaoga a le Alii i mataupu eseese e tali atu ai i talosaga a le Perofeta ma toeaina e 12 o e sa fono ia maua le tulafono. Sa tautino mai e le Alii e faapea o upumoni sa Ia faaalia o le avea “[Mana] tulafono e pulea ai [Lana] ekalesia” (MF&F 42:59), ma sa Ia poloaiina le Au Paia ia “faafofoga ma usiusitai [i lenei] tulafono” (MF&F 42:2).
Na aoao mai e Peresitene George Q. Cannon (1827–1901) o le Au Peresitene Sili le mea lenei e uiga i le Mataupu Faavae ma Feagaiga 42: “I le tuufaatasia ai, o se faaaliga sili lea ona taua. Na lafoia mai ai se sulu o le malamalama i luga o le anoanoai o mataupu eseese ma sa foia ai ni fesili taua e tele. Na matuai fiafia alii ma tamaitai faamaoni i le avea ai ma tagata o se Ekalesia na faailoa mai e le Alii o Lana lava, ma o lea e aumaia ai e Ia Lana upu e ala mai i le Perofeta musuia e pei ona sa ia faia ai i le taimi nei” (Life of Joseph Smith the Prophet [1958], 109).
Mataupu Faavae ma Feagaiga 42:4–9. Ua tuuina mai e le Alii ia faatonuga e faatatau i le faapotopotoina o le Au Paia.
Ina ua uma ona poloaiina tagata o le Ekalesia i Niu Ioka e o i Ohaio, sa taumafaufau taitai o le Ekalesia pe tatau foi ona masii i Katelani ia i latou o i isi potopotoga ua ola i matusasae o Ohaio. Sa ta’u atu e le Alii e faapea o le a oo mai le taimi o le a “faapotopoto ai ia tasi” le Au Paia i “le aai o Ierusalema Fou,” ae e lei oo mai lena taimi (MF&F 42:9). Peitai ina ua oo mai le taimi, o le faapotopotoina i Ierusalema Fou o le Au Paia o le a faataunuu ai le folafolaga na faia ia Isaraelu anamua o le a avea i latou “ma nuu o le [Atua] ma e fai foi o Ia “ma [o latou] Atua” (MF&F 42:9; tagai foi Esoto 6:7; 19:5–6; Faaaliga 21:2–3).
Ina ia faatino lenei faapotopotoina sa tatau i toeaina ona o atu mai Katelani, “e talai atu [le] talalelei, taitoalua” (MF&F 42:6) ma atiae le Ekalesia i soo se mea e maua ai i latou e talitonu (tagai MF&F 42:8). O i latou o e talai atu le talalelei e tatau ona “o atu i le mana o [le] Agaga” ma “i le suafa o [Iesu Keriso, … alaga atu [Lana] upu e pei o agelu a le Atua” (MF&F 42:6). O faifeautalai ma agelu e taufai faia se galuega faapea; sa faamalamalama mai e le perofeta o Mamona e faapea o le galuega a agelu o le “valaau atu lea i tagata ia salamo … e ala i le alaga atu o le afioga a Keriso,” o lea e saunia ai fanau a le Atua ia “faatuatua ia Keriso” (Moronae 7:31–32).
O nisi o uluai tagata liliu mai i le Ekalesia na papatisoina i le Vaitafe o Sakarini e lata i Katelani, Ohaio.
Mataupu Faavae ma Feagaiga 42:11. “Ua lauiloa i le ekalesia ua ia te ia le pule”
Ina ua tuua e Oliva Kaotui, Pale P. Palate, ma isi faifeautalai ia Ohaio, sa tuua ia tagata faatoa liliu mai i le eria o Katelani e aunoa ma ni au taitai malolosi o le Ekalesia. O nisi o nei uso fou sa mulimuli i tu ma aga masani mai isi faatuatuaga po o aganuu ma sa latou faatinoina ai ni faiga faavalevalea faalelotu e matua uiga ese. Na faamatala mulimuli ane e Peresitene Siaosi A. Samita o le Au Peresitene Sili e faapea i le taimi lena, sa i ai ni tagata o le Ekalesia sa fai mai “sa mafai ona latou vaai i agelu, ma o le a aumaia tusi mai le lagi,… ma o le a aumaia i ni feliua’iga e le masani ai” (“Historical Discourse, Deseret News, Dec. 21, 1864, 90).
Ina ua taunuu le Perofeta o Iosefa Samita i Katelani, Ohaio, na ia ta’ua e faapea “o nisi o manatu ese lava ma agaga sese na fetolofi mai i totonu i ”nisi [o le Au Paia i Ohaio]” (i le History of the Church, 1:146). E pei ona tusia i le Mataupu Faavae ma Feagaiga 42:11, na faasa e le Alii i latou sa lei valaauina ma tofia e Ia mai matafaioi faapea o ni faiaoga, taitai, po o talifaaaliga i le Ekalesia. Na Ia faamanino mai faapea o i latou o e ua faataga ona talai atu Lana talalelei ma fausia Lana Ekalesia o i latou ia ua “lauiloa i le ekalesia” ma ua uma ona “faauuina e ao o le ekalesia” (MF&F 42:11). Sa faamalamalama mai e Peresitene Boyd K. Packer (1924–2015) o le Korama a Aposetolo e Toasefululua:
“E i ai le faamoemoe i tagata o le Ekalesia i soo se mea o le lalolagi e mafai ona faailoa pulega aoao ma i le lotoifale. O lena faiga e mafai ai ona tatou iloa pe o ai latou te aoao mai ai. …
“Sa tele naua igoa sa tuuina mai, tele naua palota lagolago sa faia, tele naua faauuga ma vaetofia na faia i luma o le tele naua o molimau, sa matua tele naua faamaumauga na teuina, tele naua tusi faamaonia sa saunia, ma tele naua ata na lolomi i le tele naua o nofoaga mo soo se tasi e faaseseina ai pe o ai e umia le pule tatau” (“Alo Ese mai i Tagata Faapena,” Liahona, Iulai 1985, 34).
“Tatou te iloa lava i taimi uma po o ai ua tofia e taitai pe faiaoga ma maua le avanoa e lagolago ai pe tetee foi i le gaoioiga. E lei afua mai i se tagata ae na faamalamalama mai i faaaliga [MF&F 42:11]. … O lea faiga, e puipuia ai le Ekalesia mai soo se tagata taufaasese e manao e pulea le korama, uarota, siteki, po o le Ekalesia” (O Mea Vaivai ma le Faigofie a le Ekalesia,” Ensign po o le Liahona, Nov. 2007, 6).
Mataupu Faavae ma Feagaiga 42:12–15. “Aoao atu mataupu faavae o la’u talalelei, o loo i le Tusi Paia ma le Tusi a Mamona.
Na tautino mai e le Alii e faapea o i latou o e ua valaauina e aoao atu Lana talalelei e tatau ona “aoao atu ia mataupu faavae o [Lana] talalelei” e pei ona maua ai i tusitusiga paia (MF&F 42:12). I le taimi na tuuina mai ai lenei faaaliga, o le Tusi Paia ma le Tusi a Mamona, faatasi ai ma le faatupulaia o le aofai o faaaliga i aso e gata ai, na o le pau ia o tusitusiga paia na i ai mo tagata o le Ekalesia. Mulimuli ane, na tele atu tusitusiga paia o le a tuuina mai, e aofia ai le Mataupu Faavae ma Feagaiga, o le Penina Tau Tele, ma le faaliliuga musuia a Iosefa Samita o le Tusi Paia (tagai MF&F 42:15, 56–58). I o tatou taimi, o punaoa faatusi paia e tatau ona tatou aoao atu e faasino i tusitusiga faavae.
Ua faamoemoe mai le Alii ia tatou aoao atu “le atoaga o le talalelei” mai le Tusi Paia ma le Tusi a Mamona (MF&F 42:12).
Na faamalamalama mai e Peresitene Gordon B. Hinckley (1910–2008) le mafuaaga ua ta’ua ai tusitusiga paia o tusitusiga faavae: “’O Tusitusiga Faavae’… o le faatanoa o la tatou aoaoga faavae mai tafega o vai o le malamalama o le talalelei. Ua aumaia ai le tulaga laugatasia lea e fua i ai aoaoga faavae uma o le talalelei. O isi tusi uma, tusi lesona, ma kosi e suesue ai e tatau ona puna a’e mai le afioga a le Alii e pei ona aumaia i nei voluma” (“Cornerstones of Responsibility” [address given at the Regional Representatives’ seminar, Apr. 5, 1991], 1).
Mataupu Faavae ma Feagaiga 42:14. “Ma o le a tuu atu ia te outou le Agaga e ala i le tatalo o le faatuatua”
O le aoao atu musuia ma le mataalia e fesoasoani i fanau a le Atua e faamalolosia ai ma liua i le talalelei a Iesu Keriso. Sa folafola mai e le Alii e faapea o Lona Agaga o le a “tuuina … mai e ala i le tatalo o le faatuatua” ia i latou e tofia e faiaoga, ma sa Ia faamamafa mai o i latou e le maua le Agaga “e le tatau ona aoao atu” (MF&F 42:14). I se isi faaupuga, o le aoaoina mai moni o le talalelei o le a le tupu sei vagana ua i ai le Agaga, tusa lava pe faaaoga e le faiaoga ni auala mataalia faafaiaoga. Na ta’ua e Elder L. Tom Perry (1922–2015) o le Korama a Aposetolo e Toasefululua, “O lo tatou avanoa paia le maua o le Agaga Paia, o se tasi o le Aigaatua, e fai ma a tatou soa tumau, e faamalamalamaina ma musuia i tatou ia tatou tapenapenaga o ni faiaoga. E tatau ona tatou saunia i tatou lava e ala i le usiusitai i poloaiga a le Atua, ina ia malolosi ai o tatou talitonuga mautu pe a tatou valaau atu i le Alii, ina ia faalauteleina e Lona Agaga i tatou a o aoao atu. A tatou maua le Agaga e taitaia i tatou, ua mafai ona tatou aoao atu ma le mana tele” (“Aoao i Latou i le Afioga a le Atua i le Maelega Atoatoa,” Liahona, Iulai 1999, 8).
Na aoao mai Peresitene Dallin H. Oaks o le Au Peresitene Sili:
“Afai tatou te maua le Agaga o le Alii e taiala ai i tatou, e mafai ona tatou aoao atu soo se tagata, tusa lava pe o le a le lelei o le aotauina, i soo se mea i le lalolagi. E tele atu le silafia o le Alii nai lo i tatou, ma afai o i tatou o ana auauna, e galulue i lalo o lona Agaga, e mafai ona ia auina atu lana savali o le faaolataga i agaga uma taitoatasi.
“Sa aoao mai Peresitene Iosefa Filitia Samita e faapea: “O le fetalai atu o le Agaga o le Atua i le agaga o le tagata e i ai le mana e fesootai atu ai le upumoni i se aafiaga sili atu ma le malamalama nai lo le upumoni e mafai ona fesootai mai e se fesootaiga faaletagata e oo lava i tagata faalelagi. E ala mai i le Agaga Paia ona lalagaina le upumoni i muiaa tonu ma musele o le tino ina ia le mafai ai ona galo’ (Doctrines of Salvation, comp. Bruce R. McConkie, 3 vols. [1954–56], 1:47–48)”“Aoao Atu ma le Aoaoina i le Agaga,” Liahona, Me. 1999, 7).
Mataupu Faavae ma Feagaiga 42:18–29. “O A’u tulafono … ua tuuina atu i totonu o a’u tusitusiga paia”
I le Mataupu Faavae ma Feagaiga 42:18–29 na toeiloiloina ai e le Alii le tele o poloaiga ma tulafono na Ia tuuina atu ia Isaraelu anamua, e pei ona i ai i le Tusi Paia ma i le Tusi a Mamona. Sa faamanatu atu i le Au Paia o i latou e alolofa ia te Ia e tatau ona auauna atu ia te Ia ma tausi i Ana poloaiga (tagai MF&F 42:29).
Mataupu Faavae ma Feagaiga 42:18. “O le a lē maua se faamagaloga i le lalolagi lenei, po o i le lalolagi a sau”
O se tulafono e tasi na toefaamautu mai e le Alii i o tatou aso o le poloaiga lea “Aua e te fasioti tagata” (MF&F 42:18). O i latou e faamaligiina le toto e le sala, o lona uiga ua latou fasioti tagata, “o le a le maua se faamagaloga i le lalolagi lenei, po o i le lalolagi a sau” (MF&F 42:18). E le gata i lea, e tatau ona “avatu i latou i luga ma faia ia te i latou e tusa ai ma tulafono o le laueleele” (MF&F 42:79).
Na faamalamalama mai e Peresitene Iosefa Filitia Samita (1876–1972) o le lapataiga a le Alii faapea o i latou o e fasioti tagata o le a le faamagaloina: “Fai mai Ioane e lua ituaiga o agasala [tagai 1 Ioane 5:16–17]. O le tasi ituaiga e mafai ona faamagaloina; o le isi ituaiga o se agasala e iu i le oti, o lea e leai se faamagaloga. O le fasioti tagata o se tasi o le ituaiga lona lua. O lea e faamaligi ma le loto i ai le toto e le sala. … O le alofa mutimutivale o le Silisiliese, e ala i le togiola a Iesu Keriso, e aapa atu ai ma opo mai agaga taitasi o e o le a lafoaia ana agasala, sei vagana ai i latou o e ua agasala ma le loto i ai, e pei ona fai mai Ioane, ’e iu i le oti’” (The Restoration of All Things [1945], 204–5).
O le Tusitaulima 2: Taitaiina o le Ekalesia o loo aumai ai fautuaga nei e faatatau i faafitauli e lua e fesootai ma lenei poloaiga atonu o tau mafaufau i ai nisi:
“E tusa ai ma faaaliga ua tuuina mai, e mafai ona salamo ma faamagaloina le tagata mo le agasala o le faapau pepe” ([2010], 21.4.1).
“O se mea sese le aveeseina o le ola, e aofia ai ma le ola o le tagata lava ia. Ae peitai, o se tagata ua pule i le ola atonu e le pa’ū ia te ia ana gaoioiga. E na o le Atua e mafai ona faamasinoina lea mataupu (21.4.14).
Mataupu Faavae ma Feagaiga 42:22. E ao i tane po o ava ona “pipii atu [le tasi i le isi] ae le o se isi lava”
Na faamalamalama mai e Elder L. Whitney Clayton o le Fitugafulu: “O faaipoipoga e aupito fiafia ua ou vaai i ai, e suluia mai ai le usiusitai i se tasi o poloaiga aupito fiafia—ia tatou ‘nonofo faatasi i le alofa’ [MF&F 42:45]. I le fetalaiga i tane, na poloai mai ai le Alii, ‘Ia e alofa i lau ava ma lou loto atoa, ma ia e pipii atu ia te ia ae le o se isi” [MF&F 42:22]. Ua aoao mai e se tusitaulima a le Ekalesia: “O le upu pipii o lona uiga ia matua tuuto atoatoa atu ma le faamaoni i se tasi. O ulugalii faaipoipo e pipii atu i le Atua ma le tasi i le isi e ala i le tautua ma le alofa o le tasi i le isi e ala i le tausia o feagaiga i le faamaoni atoatoa o le tasi i le isi faapea foi i le Atua.’ O le tane ma le ava e ‘tuua o la’ua olaga nofofua ae amatalia la la’ua faaipoipoga e avea ma a [la’ua] uluai faamuamua. … La te le faatagaina lava se isi tagata po o se mea e fiafia i ai, ia sili a’e se faamuamua i o la olaga nai lo le tausia o feagaiga ua la osia ma le Atua faapea foi le tasi i le isi’ [Tusitaulima 2: Taitaiina o le Ekalesia [2010], 1.3.1]. Matau ma aoao; o ulugalii faamanuiaina e alofa le tasi i le isi ma le tuuto atoatoa” (“Faaipoipoga: Matau ma Aoao,” Ensign po o le Liahona, Me 2013, 85).
Mataupu Faavae ma Feagaiga 42:23. O taunuuga o le tuinanau
I le Mataupu Faavae ma Feagaiga 42:23, “o le tuinanau” o lona uiga o le i ai o manaoga feusuai amioletonu agai i se isi tagata. Ua faamanino mai e tusitusiga paia e faapea a vaai atu se tagata i se isi ma manaonao i ai, ua faapei lava ua uma ona ia “faatino le mulilua i … lona loto” (Mataio 5:28; tagai foi 3 NIfae 12:28; MF&F 63:16). O mafaufauga le mama, upu, po o amioga e le gata ina taunuu i le le toe i ai o le Agaga ae o le a iu ina taitai atu ai se tagata ina “faafitia le faatuatua” (MF&F 42:23; 63:16). E faaaoga e Satani le tuinanau feusuai e ‘ati’ati ese ai le malosiaga faaleagaga o fanau a le Atua ma taitai atu ai i latou i le faatafunaga.
Ua lapatai mai Elder L. Whitney Clayton e faapea:
“O loo i ai se mailei faaleagaga i aso nei e tau o ponokalafi, ma o le toatele, e tosina atu i ana savali inosia, ua ulu atu i lenei mailei matautia. E pei lava o soo se mailei, e faigofie ona ulu atu i ai ae faigata ona toe sola ese mai ai. O nisi ua fe’alofa’i faapea e mafai lava ona na ona matamata faasamasamanoa i ponokalafi e aunoa ma le pagatia i ona aafiaga le lelei. E amata ona latou faapea mai, ‘E le leaga tele lava,’ pe ‘O ai e popole i ai? E leai lava se eseesega,’ po o le ‘Na o si o’u fia iloa lava.’ Peitai ua faaseseina i latou. Ua lapatai mai le Alii, ‘Ma o ia o lē e vaai atu i se fafine i le manao ia te ia, o le a faafiti e ia le faatuatua, ma o le a lē maua e ia le Agaga; ma afai e lē salamo o ia o le a tuli o ia i fafo’ (MF&F 42:23). …
“Faatasi ai ma le alu ese o le Agaga, o i latou e faaaogaina ponokalafi e aveesea foi mafaufauga ma manatu lelei e filifili ai. … Latou te taumafai e nana a latou agasala, e galo e leai se mea e nana mai le Alii (tagai 2 Nifae 27:27). O taunuuga moni e amata ona faaputuputu a o mou ese atu le faaaloalo o le tagata ia te ia lava, o sootaga suamalie ua oona, ua mamae faaipoipoga, ma ua amata ona faupu’e tagata e aafia fua ai. O le iloa ai o mea sa latou matamata i ai ua le toe faamalieina ai, ua latou faata’ita’ia ata e sili ona maotua. Ua faasolosolo malie ona faatupulaia le avea ma vaisu tusa lava pe latou te le iloaina pe latou te faafitia foi, ma … ua faateteleina le leaga o a latou amioga, a o mou ese o latou tulaga faatauaina o amioga lelei” (Amuia i Latou Uma O E Loto Mama,” Ensign po o le Liahona, Nov. 2007, 52).
Mataupu Faavae ma Feagaiga 42:24–26. “Aua e te mulilua”
O sootaga feusuai i le va o se tane ma se ava o ni faailoaga paia o le alofa ma o se faaalia o le mana sili faaeaea o le Atua na faaee i luga o Ana fanau---o le mana e foafoa ai le ola. O le faaaogaina tatau o lea mana e totonugalemu i le fuafuaga o le faaolataga a le Tama Faalelagi, ma na Ia tuuina mai poloaiga maua’i e puipuia ai lona faaaogaina.Na faamalamalama mai e Elder David A. Bednar o le Korama a Aposetolo e Toasefululua faapea:
“O le faaipoipoga i le va o le tane ma se tamaitai o le alafua faatagaina lea, e ulufale mai ai agaga o le muai olaga i le olaga nei. O le faafitia atoatoa o feusuaiga a o lei faaipoipo ma le faamaoni a’ia’i i totonu o le faaipoipoga, e puipuia ai le paia a’ia’i o lenei alafua paia.
“O le mana o le foafoaina o fanau e matuai taua faaleagaga. O le faaaoga sese o lenei mana e faatoilalo ai faamoemoega o le fuafuaga a le Tama ma lo tatou i ai i le olaga nei. O lo tatou Tama Faalelagi ma Lona Alo o tufuga ia ma ua faamatuu mai ia i tatou taitoatasi se vaega o lo La’ua mana foafoa. O ni taiala patino mo le faaaogaina tatau o lenei tomai e foafoa ai le ola, o ni elemene taua ia i le fuafuaga a le Tama. O o tatou lagona e uiga i ai ma le faaaogaina o lena mana faalelagi, o le a fuafua ai se fuataga tele o lo tatou fiafia i le olaga nei ma lo tatou taunuuga i le faavavau. …
“O Le Ekalesia a Iesu Keriso o le Au Paia o Aso e Gata Ai e i ai se tulaga faatonuina e tasi, e mausali o le ola mama faalefeusuaiga: o sootaga mafana felata’i e na o le va lava o se alii ma se tamaitai i le sootaga o le faaipoipoga ua faatonu mai i le fuafuaga a le Atua, e tatau i ai. O na sootaga ua le na o se naunau e fiailoa, se manaoga ia faamalieina, po o se ituaiga o taaloga po o faafiafiaga e tulimatai ma le manatu faapito. E le o se osigātoilalo pe ua na o se taga e faatino. Ae, ua latou i ai i le olaga faitino o se tasi o faailoaga taua o lo tatou natura paia ma gafatia, ma o se auala o le faamalolosia o noataga faalelagona ma faaleagaga i le va o le tane ma le ava” (Matou te Talitonu i le Nofomama,” Ensign po o le Liahona, Me 2013, 42).
O le agasala o le mulilua e tele ina amata i mafaufauga e le mama pe faatuinanau. Na tuuina mai e Peresitene Howard W. Hunter (1907–1996) le lapataiga lenei:
“E le faatagaina e le Alii ma e tausalaina e lana ekalesia soo se sootaga militino i fafo atu o le faaipoipoga. O le le faamaoni o se tane e nutimomoia ai le loto o lana ava, ma lē toe talitonuina ai o ia e lana ava faapea lana fanau (tagai Iakopo 2:35).
“Ia faamaoni i au feagaiga o le faaipoipoga i mafaufauga, upu, ma aga. O ponokarafi, faiamio, ma mafaufauga vale o feusuaiga, e faatamaia ai le tagata ma faavaivaia ai le faavae o se faaipoipoga fiafia. O le lotogatasi ma le faatuatuaina i totonu o se faaipoipga o le a faaumatiaina. O se e le puleaina ona mafaufauga ma ia faatino ai le mulilua i lona loto, afai e le salamo, o le a ia le maua le Agaga, ae faafitia le faatuatua ma o le a atuatuvale (tagai MF&F 42:23; 63:16)” (Aoaoga a Peresitene o le Ekalesia: Howard W. Hunter [2015], 218-9).
Mataupu Faavae ma Feagaiga 42:30–55
Ua tuuina mai e le Alii ia mataupu faavae o le tulafono o le faapaiaga ma ua fautuaina le Au Paia e faatatau i le oti ma le faamaloloina
Mataupu Faavae ma Feagaiga 122:30–39. O le tulafono o le faapaiaga
I le aso 2 Ianuari, 1831, i le taimi o le konafesi faaiu a le Ekalesia lea na faia i Niu Ioka, sa aoao mai ai e le Alii, “Ia taitasi le tagata ma manatu taua i lona uso e pei o ia lava ia te ia” (MF&F 38:24). Ua faamaonia ai i i se mataupu faavae e tatau ona i ai e saunia ai le Au Paia e faatu se Siona i aso e gata ai. I le aso 4 Fepuari, 1831, ina ua taunuu le Perofeta o Iosefa Samita i Katelani, Ohaio, sa faatonuina e le Alii o ia e valaau ia Eteuati Paterika e fai ma uluai epikopo o le Ekalesia, “e vaaia mea uma e pei ona o le a tofia ia te ia i a’u tulafono i le aso Ou te tuu atu ai i latou” (MF&F 41:10). E lima aso mulimuli ane, i le aso 9 Fepuari, sa faaali atu ai e le Alii ia Iosefa ia mataupu faavae e tatau ai o le tulafono o le faapaiaga, sa otooto atu ai Lana fuafuaga e tausia e matitiva ma e le tagolima, fausia Lana Ekalesia, ma saunia Lona nuu e fausia Siona (tagai MF&F 42:30–39).
Ina ia faapaiaina o lona uiga ia faia ia paia, ia tuu ese ma tuuto atu i se faamoemoega paia. O le faapaiaga o se aga o le faapaiaina o a tatou meatotino, taimi, ma punaoa i le Atua ma tuuina atu ma le naunautai ia te Ia. E ala i le faapaiaga, e mafai ai e soo moni o Iesu Keriso ona tausia e matitiva ma e le tagolima ma fesoasoani ai e fausia le malo o le Atua i lenei lalolagi. O le faapaiga e faalagolago i le mataupu faavae o le “e saili e tagata taitoatasi le lelei o le la te tuaoi, ma faia mea uma ma le manatu tasi i le mamalu o le Atua” (MF&F 82:19; tagai foi MF&F 38: 24–25). Na faamalamalama mai e Peresitene Spencer W. Kimball (1895–1985):
“O le faapaiaga o le tuuina atu e se tasi o lona taimi, taleni ma ana mea e fesoasoani ai e tausia e matitiva ma e le tagolima—pe o le faaleagaga pe faaletino—ma le fausiaina o le malo o le Alii. …
“O Siona o se igoa ua tuuina e le Alii i ona tagata o le feagaiga, o e ua faailogaina i le mama a’ia’i o le loto ma faamaoni i le tausiga o e matitiva, o e le tagolima, ma e faanoanoa. (Tagai i le MF&F 97:21.)…
“O lenei faatulagaga aupito maualuga o le sosaiete o le perisitua e faavae i luga o le aoaoga faavae o le alofa, auauna atu, galue, faalagolago ia te oe lava, ma le tausimea, o ia mea uma ua tapulaa e le feagaiga o le faapaiaga” (“Galuega Fesoasoani o le Uelefea: O le Talalelei ua Galue,” Ensign, Apr. 1978, 78).
I faaaliga ua lauiloa o le tulafono o le Ekalesia, o loo tusia i le Mataupu Faavae ma Feagaiga 42, sa faatonuina ai e le Alii ia tagata o le Ekalesia e fesoasoani i e matitiva e ala i le faapaiaina o a latou meatotino “faatasi ma se feagaiga ma se pepa mau faamaonia e le mafai ona solia” (MF&F 42:30). Na faamalamalama mai e Peresitene J. Reuben Clark Jr. (1871–1961) o le Au Peresitene Sili le mafuaaga e tatau ai i le nuu o le Alii ona naunau e faia ia ituaiga o osigataulaga: “O le mataupu faavae muamua o faaaliga uma o i le [tulafono o le faapaiaga] o le o a tatou mea uma o i ai, o mea ia a le Alii; o le mea lea, e mafai ona valaau mai le Alii ia i tatou mo soo se mea ma meatotino uma o loo ia te i tatou, aua o mea a Ia. … (MF&F 104:14–17, 54–57)” (i le Conference Report, Oct. 1942, 55).
O le tulafono o le faapaiaga o loo faasino soo i ai i le Mataupu Faavae ma Feagaiga (tagai MF&F 38; 42; 44; 48; 51; 54; 56; 58; 70; 72; 78; 82–85; 92; 96–97; 104–6; 119–20;136). O le tele o fuaitau e aofia ai faatonuga e fesoasoani ia i le Au Paia e faatino lenei tulafono. E ui ina tumau ia mataupu faavae o le tulafono o le faapaiaga, o nisi taimi sa suia ai faiga ina ia taulima ai tulaga eseese ma manaoga. Na saunoa Peresitene Gordon B. Hinckley e faapea: “O le tulafono o le ositaulaga ma le tulafono o le faapaiaga e lei faapea ua le toe faia ma o loo faaaoga pea” (Aoaoga a Gordon B. Hinckley [1997], 639). O le taimi nei, o loo tausia pea e le Au Paia faamaoni le tulafono o le faapaiaga pe a latou taumafai e alolofa i le Atua ma tuuto atu a latou tupe, taimi, ma isi punaoa i le fausiaina o le malo o le Atua ma fesoasoani e faamama avega i mafatiaga o e matitiva ma e le tagolima. Na aoao mai e Elder Bruce R. McConkie (1915–1985) o le Korama a Aposetolo e Toasefululua:
“Ua tusia: ’O ia o lē e lē mafai ona ola i le tulafono o se malo selesitila e lē mafai ona ia gafatia se mamalu selesitila.’ (MF&F 88:22.) O le tulafono o le ositaulaga o se tulafono selesitila, e faapena foi i le tulafono o le faapaiaga. O le mea lea ina ia maua lena taui faaselesitila lea tatou matua naunau atu i ai, e tatau ona tatou mafaia ona ola ai i nei tulafono e lua. …
“E le o valaauina lava i tatou i taimi uma e ola i le tulafono atoa o le faapaiaga ma avatu uma o tatou taimi, taleni, ma a tatou mea i le fauina o le malo o le Alii i le lalolagi. …
“Ae o le uiga o le tala faatusi paia e faapea ina ia maua le faaolataga faaselesitila e tatau ona tatou mafaia ona ola ai i nei tulafono i le atoatoa pe afai e valaauina i tatou e fai. O le malamalama lelei i lea mea o le mea moni lea e tatau ona tatou ola ai seia oo ina valaauina i tatou e faia” (“Obedience, Consecration, and Sacrifice” Ensign, May 1975, 50).
Mataupu Faavae ma Feagaiga 42:32–33. Tausimea
Sa otooto mai e le Alii se mamanu mo le faatinoina o le tulafono o le faapaiaga i popofou o le Ekalesia. Na faatonuina ia aiga e faapaia a latou tupe ma meatotino i le Ekalesia e ala i le tuuina atu o nei punaoa i “le epikopo o [le] ekalesia ma ona fesoasoani” (MF&F 42:31). O le epikopo, i le avea o ia ma sui o le Alii, sa ia tofia i lena taimi se vaega o le fanua ma oloa i aiga taitasi e fuafua i “tulaga ma manaoga ma mea e manaomia [e le aiga]” (MF&F 51:3; tagai foi MF&F 42:32–33). O lea vaega sa ta’ua o se “tausimea” (MF&F 42:72). O lea, o aiga taitasi na tuu atu i ai se fanua ma punaoa, ia na umia patino e tagata o le au paia ma e tatau ona latou pulea e faaaoga ai la latou faitalia. I le avea ai ma tausimea o punaoa a le Alii, sa latou tali atu ia te Ia ma tauaveina le tiutetauave atoa mo mea na Ia tuuina atu ia i latou. Soo se faasiliga i luga atu o manaoga ma mea na manaomia e le aiga sa i ai lea i le epikopo ina ia faaaoga “e avatu ia te i latou ua leai [sa] leai ni mea” (MF&F 42:33).
Mataupu Faavae ma Feagaiga 42:34–35, 55. O le faleteuoloa a le Alii
I le mamanu na otooto mai e le Alii, soo se “mea e totoe,” po o faasiliga, o tupe ua faapaiaina po o meatotino e tatau ona teu i le faleteuoloa (MF&F 42:34; tagai foi fuaiupu 55). Ona faaaoga lea e le epikopo nei punaoa “e avatu i e matitiva ma e ua le tagolima” (MF&F 42:34) ma ia faataunuu ai isi faamoemoega e pei o le faatauina o fanua mo le Ekalesia, fauina o fale mo tapuaiga, ma le “fausiaina … o le Ierusalema Fou” (MF&F 42:35). O le taimi nei, o le faleteuoloa ua faauigaina o “se nofoaga e tali ai e le epikopo, taofia i le faatuatuaga, ma faasoasoa atu ai i e matitiva o taulaga ua faapaiaina a le Au Paia o Aso e Gata Ai. O faleteuoloa taitasi e mafai ona tetele pe laiti foi e tusa ai ma tulaga manaomia. O le Au Paia faamaoni latou te foai atu taleni, tomai, ma mea tautupe i le epikopo e tausia ai e matitiva i le taimi e manaomia ai. O le mea lea, o se faleteuoloa e mafai ona aofia ai se lisi o tautua o loo maua, tupe, meaai, ma isi oloa. O le epikopo o le sui lea e vaaia le faleteuoloa ma faasoasoa atu oloa ma tautua e tusa ai ma manaoga ma e pei ona taitaia ai e le Agaga o le Alii (MF&F 42:29–36; 82:14–19)” (Taiala i Tusitusiga Paia, “Faleteuoloa,” scriptures.lds.org).
Na poloaiina e le Alii ia faatu se faleteuoloa e fesoasoani ai i e matitiva ma e le tagolima (tagai MF&F 42:33–34).
Mataupu Faavae ma Feagaiga 42:40–41. “Aua e te faamaualuga i lou loto”
Na saunoa le perofeta o le Tusi a Mamona e uiga i luitau faaleagaga o le a feagai ma fanau a le Atua i aso e gata ai. O nei luitau o le a i ai le faamaualuga e faaalia e ala i “le ofuina o ofu mananaia tele: a o faatuatuanai “i e ua matitiva ma e ua le tagolima, o e ua mamai ma ua puapuagatia” (Mamona 8:36–37). I popofou o le Ekalesia toefuataiina, na poloai mai ai le Alii, “Aua e te faamaualuga i lou loto” ma sa ta’u atu i le Au Paia “[e tatau] ona faafaigofie ofu uma” (MF&F 42:40). O lea faatonuga atonu o lona uiga o le avea ai o ni tagata o le Ekalesia, e tatau ona taumamao mai le soona faapapanu o laei.
Na aoao mai e Elder Jeffrey R. Holland o le Korama a Aposetolo e Toasefululua le mea lenei e uiga i a tatou filifiliga e tusa ai ma laei ma foliga: “Mo oe ina ia e maua atoatoa faamanuiaga ma le puipuiga a le Tama Faalelagi, tatou te talosaga atu ia te oe ina ia tumau faamaoni i faatulagaga o le talalelei a Iesu Keriso ma ia le mulimuli i tifiga ma ta’iga lea e avea ai oe ma pologa. O le a le taofia lava e le Ekalesia lau lava aia e faatatau i mea tonu e tatau ona e ofuina ma foliga tonu e tatau ona e foliga ai. Ae o le a faailoa atu pea lava e le Ekalesia ia faatulagaga ma o le a aoao atu pea lava ia mataupu faavae” (“I Tamaitai Talavou,” Ensign po o le Liahona, Nov. 2005, 28–29).
Mataupu Faavae ma Feagaiga 42:42. “Aua e te paie”
Ua poloai mai le Atua i Ana fanau ia galulue ma toaaga (tagai MF&F 52:39; 56:17; Mose 4:25). O i latou e faatamala pe paie ua tausalaina i le faatalatalanoa, lea e tausalaina e le Alii.Na molimau mai Peresitene Gordon B. Hinckley i le taua o le mataupu faavae o le talalelei o le galue:
“E leai se mea e i lalo o le lagi e suitulaga i le toaga e galue. O le auala lea e mafai ona ausia ai miti. O le auala lea e avea ai vaaiga matautia.
“O le toatele lava o i tatou e maua i le tototuufaasolo o le paie. E sili ai lo tatou taaalo nai lo le galulue. E sili ai le tafaovale nai lo le galue. E lelei sina taalo laitiiti ma sina faapaie laitiiti. Ae o le galue e iloa ai le eseesega i le olaga o se alii po o se tamaitai. E falolo ai o tatou mafaufau ma faaaoga tomai o o tatou lima e siitia ai i tatou mai le faaleogalua. O le galue e maua mai ai meaai tatou te aai ai, lavalava tatou te oofu ai, ma fale tatou te nonofo ai. E le mafai ona tatou faafitia le manaomia ona galulue ma lima ua i ai le tomai, ma mafaufau ua aotauina pe afai tatou te mananao ia tuputupu ae ma manuia.
“Ina ua tutuli ese Atamu ma Eva mai le Faatoaga o Etena, sa fetalai atu le Atua, “E te ai foi au mea e ai ma le afu o ou mata, seia e toe foi atu i le eleele.’ (Ken. 3:19.)” (“Ou Te Talitonu,” Liahona, Mat. 1993, 4).
Mataupu Faavae ma Feagaiga 42:44. 48. “O ia o le … ua le tofia e oti, o le a faamaloloina”
O le umi o le ola o se tagata i le olaga nei ua i ai lea i le pule a le Atua. Ua ta’u mai i le Mataupu Faavae ma Feagaiga 42:44, 48 e faapea o se tagata e manaomia le faamalologa ma e lava le faatuatua ma “e le o tofia e oti” (fuaiupu 48) o le a faamaloloina. Na faamalamalama mai e Elder Lance B. Wickman o le Fitugafulu: “Ua tele naua taimi tatou te le manatu ai i le fasifuaitau e agavaa ai ‘ma e le o tofia e oti’ (‘pe,’ e mafai foi ona tatou faaopoopo i ai, ‘pe ma’i pe i ai manaoga faapitoa’). Faamolemole aua nei aveesea o tatou faamoemoe pe afai ua uma ona faia tatalo faamaoni, ma faataunuuina foi faamanuiaga faaleperisitua, ma ua foliga mai e leai lava se suiga manuia e oo mai i e pele ia i tatou, ma iu ai lava ina oti. Ia faalototeteleina outou i le iloa sa outou faia mea uma e mafai ona outou faia. O lena faatuatua, anapogi, ma faamanuiaga o le a le foi fua! Faapea e lei toe malosi mai lau tama e ui i mea uma sa faia mo ia e mafai ma e tatau ona avea ma faavae mo le filemu ma se faamautinoaga ia i latou uma o e alolofa ia te ia.! O le Alii—o le e musuia faamanuiaga ma o le e faafofoga mai i tatalo faamaoni uma—ae ui o lea ua toe valaauina atu o ia e foi atu. O aafiaga uma o le tatalo, anapogi, ma le faatuatua atonu na matua sili atu mo lo matou manuia nai lo ia” (“Ae Peitai a le o lea” Liahona, Nov. 2002, 30–31).
Mataupu Faavae ma Feagaiga 42:45–48. “O le a le tofo i le oti i latou o e e oti ia te au”
Aua o i latou o e faamaoni ma tumau e oo i le iuga, o le oti “o le a suamalie ia te i latou,” a o e fouvale ma e le salamo o le a “oona lo latou oti” (MF&F 42:46–47). E le faapea o le a le mafatia e amiotonu i tiga faaletino; ae o le a le oo ia i latou le tiga faaleagaga lea e oo i ai e amioleaga pe a oti i latou.Na faapupula mai e Elder Robert D. Hales o le Korama a Aposetolo e Toasefululua lenei mataupu faavae:
“I nai masina ua mavae atu sa ou maua ai le avanoa e asiasi atu ai i se alii sa maua i se gasegase ua ui. O se e umia le perisitua ma le faamaoni a’ia’i, sa faafetaia’ia o ia ma mea moni o le olaga nei. Peitai, na ia maua le malosi, i le faataitaiga a le Faaola, o le na fetalai, i le Tatalo a le Alii, ‘Ia faapea outou ona tatalo: … Ia faia lou finagalo i le lalolagi, e pei ona faia i le lagi’ (Mata. 6:9–10). …
“Na oo ina talia e la’u uo le fasifuaitau ‘Ia faia lou finagalo’ a o feagai o ia ma ona lava tofotofoga faamomoiloto ma mafatiaga. …
“… Sa ma talatalanoa pe na faapefea ona ia faaaluina lona olaga e taumafai ai ia faamaoni, ia faia le mea na poloaiina ai o ia e le Atua, ia faamaoni i ana fegalegaleaiga ma ona uso a tagata ma isi uma, e tausi ma alofa i lona aiga. Pe le o le uiga ea lena o le tumau e oo i le iuga? Sa ma talanoa e uiga i mea e tupu i le taimi lava e oti ai, e uiga i mea na aoao mai e le Atua ia i tatou e uiga i le lalolagi o agaga. O se nofoaga o le parataiso ma le fiafia mo i latou o e sa ola i ni olaga amiotonu. E le o se mea e fefe ai.
“Ina ua uma le ma talatalanoaga, sa ia valaauina faatasi lona toalua ma le aiga lautele—fanau ma fanau a fanau—e toe aoao atu ia i latou le aoaoga faavae o le Togiola ma o le a toetutu tagata uma. Sa oo ina malamalama tagata uma e faapei lava ona sa fetalai le Alii, e ui ina o le a i ai le faavauvau i le toesea mo se taimi le tumau, ae e leai se faanoanoa ia i latou o e oti i le Alii (tagai Faaa. 14:13; MF&F 42:46). Sa maliu filemu o ia i le aoauli na sosoo ai, ma sa faatasi ai lona aiga uma i ona autafa. O le toafilemu lea ma le mafanafana e oo mai ia i tatou pe a tatou malamalama i le fuafuaga o le talalelei ma iloa e faavavau aiga” (“O Le Aiga e Faavavau.” Liahona, Ian. 1997, 66).
E pei o le oti, o le faanoanoa mo i latou o e oti o se vaega o le olaga nei. E ui e mafai ona tatou maua lagona mamana o le alofa mo aiga ma uo, ae e mafai foi ona tatou lagonaina le faanoanoa loloto ma le lototiga pe a oti se tasi tatou te alolofa i ai. Sa faamalamalama mai e Peresitene Russell M. Nelson o le Au Peresitene Sili e faapea o se mea masani lava ma talafeagai le faavauvau i le toesea o e pele:
“Po o le a lava le matua, tatou te faavauvau mo a tatou pele e maliliu. O le faavauvau o se tasi o faailoaga loloto o le alofa mama. I se tali masani e ogatusa atoatoa ma le poloaiga faalelagi: ‘Ia outou nonofo faatasi i le alofa, ia outou fetagisi ai i le toesea o i latou o e e oti.’ (MF&F 42:45).
“E sili atu i lea, e le mafai ona tatou talisapaia atoatoa toetuufaatasiga fiafia mulimuli ane e aunoa ma tuueseesea ma loimata i le taimi nei. Na pau lava le ala e aveesea ai le faanoanoa mai le oti o le aveesea lea o le alofa mai le olaga” (“O Faitotoa o le Oti,” Liahona, Iulai 1992, 72).
Mataupu Faavae ma Feagaiga 42:56–93
Ua tuuina atu e le Alii isi tulafono faaopoopo i le Au Paia ma aoao atu ia i latou le faatinoga o Lana tulafono.
Mataupu Faavae ma Feagaiga 42:56–58. “Ia e ole mai, ma o le a tuu atu ai a’u tusitusiga paia”
Ina ua uma ona faamautu i le eria o Katelani, sa faaauau e le Perofeta o Iosefa Samta ma Sini Rikitone ona galulue i le faafouga musuia po o le “faaliliuga” o le Tusi Paia. E pei ona ta’ua mai i le Mataupu Faavae ma Feagaiga 42:56, e lei mulimuli le Perofeta i le faagasologa masani o le faaliliuga lea e faaliliu ai upu i le gagana e tasi i upu o le isi. Ae, na saili e Iosefa le taitaiga a le Alii e ala i le tatalo, ma sa taitaiina e le Alii o ia e tusa ai.
Na fetalai atu foi le Alii e faapea a “maua e [le Au Paia] [Ana tusitusiga paia] i le atoatoa” e tatau ona latou “aoao atu ai i tagata uma” (MF&F 42:57–58; tagai foi MF&F 42:15). I se tusi mai le Perofeta o Iosefa Samita, Sini Rikitone, ma Feterika G. Williams i taitai o le Ekalesia i Misuri i le aso 2 Iulai, 1833, na latou tusi atu ai, “O le aso nei ua maea ona matou faaliliuina Tusitusiga Paia, ma o lea matou te faafoi atu le agaga faafetai i lo tatou Tama Faalelagi (i le History of the Church, 1:368). E amata i le 1979, o le lomiga a le Au Paia o Aso e Gata Ai o le Tusi Paia a King James ua aofia ai le faitau selau o fuaitau mai le Faaliliuga a Iosefa Samita i ona feaosoaniga e suesue ai. Talu mai lena taimi, ua maua foi filifiliga mai le Faaliliuga a Iosefa Samita o le Tusi Paia mo tagata o le Ekalesia i le tele o gagana i fesoasoaniga e suesue ai tusitusiga paia, e fesoasoani ai e faataunuu le poloaiga a le Alii e aoao atu “i nuu uma, o ituaiga, gagana ma tagata” (MF&F 42:58).
Atapue o le eria faasolopito o Katelani, Ohaio i le taimi nei, lea na avea ma laumua o le Ekalesia mai le 1831–1838
Mataupu Faavae ma Feagaiga 42:60–62, 65. “O le a e maua lea faaaliga e faaopoopo i luga o lea faaaliga ma lea faaaliga”
Sa folafola mai e le Alii e faapea o i latou o e usiusitai i Lana tulafono e mafai ona maua se aofaiga faateleina o faaaliga paia ma le malamalama—e oo lava i le ina “iloa o mealilo” (MF&F42:61). Sa aoao mai e Elder David A. Bednar e faapea:
“E avanoa le agaga o faaaliga mo tagata uma o ē mauaina e ala i le pule e tatau ai o le perisitua ia sauniga faaola o le papatisoga, i le faatofuina mo le faamagaloina o agasala ma le faaee atu o lima mo le meaalofa o le Agaga Paia—ma o lē foi o loo galue i le faatuatua e faataunuu le poloaiga faaleperisitua ia ‘talia le Agaga Paia.’ O lenei faamanuiaga e le o faatapulaaina i taitai pulefaamalumalu o le Ekalesia; ae, e tatau ona i ai i olaga o alii, tamaitai, ma tamaiti uma o ē ausia le tausaga e tatau ai ma ulu atu ai i feagaiga paia. O le naunautai faamaoni ma le agavaa e valaaulia ai le agaga o faaaliga i o tatou olaga. …
“… O le tele lava o taimi, e oo mai faaaliga i nai faaopoopoga laiti mo sina taimi, ma e tuuina mai e tusa ma o tatou manaoga, agavaa, ma tapenapenaga. O na fesootaiga mai le Tama Faalelagi e faasolosolo malie mai ma le le gaoiā ma ‘toto ifo [i o tatou agaga] e pei o le sau mai le lagi’ (MF&F 121:45). …
“Ua faatumulia le talafaasolopito o le Ekalesia ma o tatou olaga patino i faataitaiga o mamanu a le Alii mo le mauaina o faaaliga “o lea upu ma lea upu, o lea fuaiupu ma lea fuaiupu’ [2 Nifae 28:30]. Mo se faataitaiga, o upumoni faavae o le talalelei toefuataiina e lei auina atu uma i le Perofeta o Iosefa Samita i le taimi e tasi i le Vao Paia. O nei oa anagata sa faaalia pe a talafeagai tulaga ma pe a sa’o le taimi” (“O Le Agaga o Faaaliga,” Ensign po o le Liahona, Me 2011, 87–88).
Na aoao mai e Peresitene Dallin H. Oaks e faapea i la tatou sailiga mo faaaliga faifai pea, e tatau ona tatou malamalama e i ai le eseesega i le va o le faaauau o le faaaliga ma le faaaliga faifai pea.
“E ao ona tatou iloaina o le a talanoa mai le Alii ia i tatou e ala i le Agaga i Lana lava taimi ma i Lana lava ala. …
“… Tatou te tatalo faifai pea mo se taitaiga, ae e le tatau ona tatou faamoemoe e faifaipea le faaaliga. Tatou te faamoemoe e faaauau le faaaliga, o le faaauau pea ona mautinoa e uiga i le faaaliga i soo se taimi tatou te sailia ai le taitaiga ma o o tatou tulaga ua tatau ai ma o le a filifili ai e se Alii poto ma le agaalofa e tuuina mai ia i tatou” (“I Lana Lava Taimi, i Lana Lava Ala,” Liahona, Aok, 2013, 22, 27).
Mataupu Faavae ma Feagaiga 42:74–93. O le tulafono a le Alii e pulea ai Lana Ekalesia
Ina ua mavae ona maua mai le faaaliga o loo tusia i le Mataupu Faavae ma Feagaiga 42:1–72 na toe fesiligia e taitai o le Ekalesia pe faapefea ona taulima ia tagata o le Ekalesia e solia tulafono a le Atua. E lua vaiaso mulimuli ane, i le aso 23 Fepuari, 1831, na maua mai ai le faaaliga o loo tusia i le Mataupu Faavae ma Feagaiga 42:74–93. Na tautino mai e le Alii e faapea o le “tulafono” o le Ekalesia, e pei ona i ai i le Mataupu Faavae ma Feagaiga 42, sa faia e “pulea ai [Lana] ekalesia” (MF&F 42:59). E le gata i lea, e tatau i tagata o le Ekalesia ona “tausia poloaiga ma feagaiga uma o le ekalesia” (MF&F 42:78).
Mataupu Faavae ma Feagaiga 42:88. “Afai e faatausuai mai sou uso po o sou tuafafine ia te oe”
Na faamalamalama mai e Elder David A. Bednar le ala e tatau ona tatou tali atu ai pe a faatausuai mai se tasi ia i tatou:
“E i ai lava ma e i ai taimi, o le a fai mai ai pe faia foi e se tasi i lenei Ekalesia se mea e mafai ona tiga ai. O mea faapena o le a tutupu moni ia i tatou taitoatasi—ma o le a mautinoa lava o le a sili atu i le tasi ona tupu. E ui atonu e le o faamoemoe tagata e faamanualia pe tausuai ia i tatou, ae ui o lea e mafai ona le mafaufau ma le faautauta.
“O oe ma au e le mafai ona pulea faamoemoega po o amioga a isi tagata. Peitai, tatou te fuafuaina pe o le a faapefea ona tatou faia. Faamolemole ia manatua o oe ma au o sui ua faaeeina i le faitalia e iloa ai, ma e mafai ona tatou filifili e aua nei faatausuai. …
“O le mea e malie ai, o le apoapoaiga ia ‘ia atoatoa ona lelei o la outou amio’ [Mataio 5:48] ua vave ona sosoo ma le fautuaga e uiga i le ala e tatau ona tatou tali atu ai i mea sese ma faatausuai [tagai Mataio 5:43--44, 46]. E manino lava o tulaga manaomia matautia e tau atu ai i le faaatoatoaina o le Au Paia e aofia ai tofitofiga ia e tofotofoina ai ma luitauina ai i tatou. Afai e fai mai e se tagata se mea po o se upu tatou te manatu e faatausuai, o la tatou matafaioi muamua lava, o le aua lea nei tiga le loto ae talanoa patino atu lea, ma le faamaoni, ma tuusao i lea tagata. O lena faiga, e valaaulia ai musumusuga mai le Agaga Paia, ma mafai ai ona faamanino ni faaletonu, ma malamalama ai i le faamoemoega moni” (“E Leai Foi se Mea e Tausuai ai i Latou,” Ensign po o le Liahona, Nov. 2006, 91–92).