Mataupu 21

Mataupu Faavae ma Feagaiga 57–58

Faatomuaga ma le Faasologa o Taimi

I le usiusitai i le poloaiga a le Alii e tauaofia se konafesi a le Ekalesia i Misuri (tagai MF&F 52:2–5), na malaga le Perofeta o Iosefa Samita ma le toatele o isi pe tusa o le 900 maila mai Ohaio i Misuri. I le aso 20 Iulai, 1831, i nai aso ina ua taunuu i le Itumalo o Siakisone, Misuri, na maua mai ai e Iosefa Samita le faaaliga o loo tusia i le Mataupu Faavae ma Feagaiga 57. I lea faaaliga na folafola mai ai e le Alii o Initipene, Misuri, o le avea ma nofoaga tutotonu o le aai o Siona ma lona malumalu, ma sa Ia faatonuina le toatele o tagata taitoatasi e faatatau i a latou matafaioi i le fausiaina o Siona.

I le aso 1 Aokuso, 1831, e lei atoa se lua vaiaso talu ona mauaina e Iosefa le faaaliga lea na atofa mai ai Initipene o le nofoaga tutotonu o Siona, sa o atu nisi o tagata o le Ekalesia i le Perofeta e mananao e fia iloa le finagalo o le Alii e faatatau i lo latou auai i le fausiaina o Siona. I le tali mai, na tuuina mai e le Alii le faaaliga ua tusia i le Mataupu Faavae ma Feagaiga 58. I lea faaaliga na faatonuina ai e le Alii le Au Paia e faatatau i mataupu faavae o le a faavaeina ai le aai o Siona, e aofia ai le usiusitai i poloaiga, faatuatua i puapuaga, o le faaaogaina o le faitalia e aumaia ai le amiotonu, ma le salamo ma le faamagalo atu.

14 Iulai, 1831Sa taunuu ai Iosefa Samita ma ana soa sa latou malaga i le Itumalo o Siakisone, Misuri.

20 Iulai, 1831Na maua mai ai le Mataupu Faavae ma Feagaiga 57.

Faaiuga o Iulai, 1831Sa taunuu ai le Au Paia mai Kolesavile ma le toatele o toeaina i le Itumalo o Siakisone.

1 Aokuso, 1831Na maua mai ai le Mataupu Faavae ma Feagaiga 58.

2–3 Aokuso 1831Na faapaiaina ai le laueleele i le Itumalo o Siakisone, Misuri, mo le faavaeina o Siona, ma sa faapaiaina se tulaga mo le malumalu i Initipene, Misuri.

O le a se mea ua avatu ai ia te oe le faamoemoe? A o faatonuina e le Alii le Au Paia e uiga i le faavaeina o Siona, sa Ia aoao atu i latou i aoaoga faavae ma mataupu faavae o le a latou maua ai le faamoemoe. Vaavaai mo upumoni nei a o e suesueina le Mataupu Faavae ma Feagaiga 57–58.

Mataupu Faavae ma Feagaiga 57: Talaaga Faasolopito Faaopoopo

Na aoao mai e le Perofeta o Iosefa Samita (1805–1844) e faapea “o le fausiaina o Siona o se galuega ua naunau i ai tagata o le Atua i tupulaga uma; o se autu na nofoa’i ai perofeta, faitaulaga ma tupu ma le fiafia uiga ese” (Aoaoga a Peresitene o le Ekalesia: Iosefa Samita [2011], 186). O le toatele o uluai Au Paia sa faamoemoe foi ma le naunautai i le faatuina o Siona. E avea o se vaega o le Toefuataiga, sa tuuina atu ai e le Alii i le Au Paia faaaliga faaopoopo e uiga i le fausiaina o le aai o Siona i luga o le laueleele i aso e gata ai. Mo se faataitaiga, mai leTusi a Mamona sa aoao ai e le Au Paia e faapea o le aai o Siona, po o le Ierusalema Fou, o le a faatuina i le Konetineta o Amerika (tagai 3 Nifae 20:22; 21:23–24; Eteru 13:2–10).

I se faaaliga na tuuina mai ia Setema 1830, sa faamalamalama mai ai e le Alii e faapea o le a Ia le faaalia mai le nofoaga tonu o le aai o Siona i lena taimi ae o le a faatuina “ii tuaoi latalata i sa Lamana” (MF&F 28:9). Ia Tesema 1830, a o galue le Perofeta o Iosefa Samita i le faaliliuga musuia o le Tusi Paia, sa ia aoaoina o taimi faigata o aso e gata ai, o le a faasaoina e le Alii Lona nuu ma faapotopoto i latou i le “Aai Paia” o Siona (tagai Mose 7: 60–62). I le aso 9 Fepuari, 1831, sa faamalamalama mai ai e le Alii e faapea o le a Ia faaalia mai le “mea o le a faatu ai le Ierusalema Fou” i Lona lava taimi” (MF&F 42:62). E na o le tasi le masina mulimuli ane, ae maua e le Perofeta se faaaliga e ta’u mai ai o Siona o le a avea “o se laueleele o le filemu, o se aai o le sulufaiga, o se nofoaga o le saogalemu” i se lalolagi amioleaga (MF&F 45:66–67). Sa faatupulaia le faamoemoe o le Au Paia e uiga i le Siona ina ua oo ia Iuni 1831, na poloai mai le Alii o le isi konafesi a le Ekalesia “ia faia i Misuri, i luga o le laueleele o le a Ou faapaiaina mo lo’u nuu” (MF&F 52:2). I lea lava foi faaaliga na folafola atu ai e le Alii e faailoa atu ai “le laueleele o lo [latou] tofi pe afai e tumau faamaoni ia Iosefa Samita ma Sini Rikitone (MF&F 52:5).

I le usitaia o le poloaiga a le Alii e tauaofia se konafesi a le Ekalesia i Misuri, sa tuua ai e le Perofeta o Iosefa Samita ma ni nai soa latou te malaga ia Katelani, Ohaio, ae o atu iina i le aso 19 Iuni, 1831. E le gata i lea, ae sa valaauina e le Alii se aofaiga o e umia le perisitua e malaga taitoalua i Misuri ma talai le talalelei a o latou faimalaga atu (tagai MF&F 52:7–10, 22–33; 56:5–7). Ina ua mavae le 900 maila sa latou malaga ai, sa muamua taunuu le Perofeta ma ana soa i Initipene, Itumalo o Siakisone, Misuri i le aso 14 Iulai, 1831. O iina sa faafeiloaia ai i latou e Oliva Kaotui, Pita Uitimera le Itiiti, ma Ziba Peterson, o le sa tofia i le tautoulu o le 1830 e fai ma faifeautalai e talai le talalelei i sa Lamana (tagai MF&F 28:8; 30:5–8; 32:2–3). O nei faifeautalai sa malaga faatasi ma se tasi faatoa liliu mai i le Ekalesia, o Feterika G. Williams, o le sa talosaga ia Oliva Kaotui pe mafai ona aufaatasi atu ma i latou i la latou malaga.

E tusa ai ma le talafaasolopito a Iosefa Samita, ina ua taunuu le Perofeta i Initipene, sa ia faaaluina se taimi e mafaufau loloto ai i le faavaeina o Siona ma le tulaga o tagata Initia Amerika sa nonofo i le isi itu tuaoi o Misuri. O ona mafaufauga na oo ai ina ia tuufesilisili: “O afea o le a fuga mai ai le vao e pei o le rosa; o afea o le a fausia ai Siona i lona mamalu; ma o fea foi o le a tu ai Lou Malumalu ia o mai i ai o nuu uma i aso amuli?” (i le Manuscript History of the Church, vol. A-1, page 127, josephsmithpapers.org). Na sosoo ai, i le aso 20 Novema, 1831, na maua ai e le Perofeta o Iosefa Samita le faaaliga ua tusia i le Mataupu Faavae ma Feagaiga 57.

Mataupu Faavae ma Feagaiga 57

Ua faailoa mai e le Alii le mea e tu ai Siona ma faatonuina tagata taitoatasi e faatatau i a latou matafaioi i le faatuina o Siona.

Faitau le Mataupu Faavae ma Feagaiga 57:1–3, ma vaavaai pe na faapefea ona tali mai le Alii i fesili a le Perofeta o Iosefa Samita e faatatau i le faatuina o Siona.

Mataupu Faavae ma Feagaiga 57:1–3. Ua tautino mai e le Alii le tulaga o le aai o Siona

I le tali mai i le fesili a le Perofeta o Iosefa Samita, na faailoa mai ai e le Alii e faapea o Initipene, le Itumalo o Siakisone, Misuri, o “le laueleele o le folafolaga, ma le nofoaga mo le aai o Siona” (MF&F 57:2) O le nofoaga mo le aai o Siona sa tu i lalo tonu o se pioga i le Vaitafe o Misuri ma pe tusa ma le 10 maila i sasae o le tuaoi o le itulagi o Initia-Misuri (le tuaoi i le taimi nei o Misuri-Kansas). O le laueleele e aofia ai Misuri ma isi setete o loo siosiomia ai na avea ma se vaega o le Iunaite Setete ina ua uma le Faatauga o Lusiana i le 1803). Ina ua uma le faatauga, sa i ai tagata fai mai fou, o le toatele lava e mai i isi setete i matu, sa sii mai i Misuri e faato’a le laueleele. Na avea Misuri ma setete i le 1821, ma i le 1826 na faavaeina ai e le fono faitulafono o le setete le Itumalo o Siakisone. O le taulaga fou faatoa nofoia o Initipene, lea na tu i se auala o fefaatauaiga sa faaigoa o le Alasopo o Sana Fe, na avea ma laumua o le itumalo. O le taimi o lenei faaaliga, sa na o ni nai selau ia tagatanuu o le Itumalo o Siakisone ma ni nai fale i nofoaga faitele e aofia ai ma le fale faamasino o le itumalo.

Mataupu Faavae ma Feagaiga 57:3 “O Initipene o le nofoaga tutotonu”

Ina ua atofa mai e le Alii le Itumalo o Siakisone, Misuri, o le nofoaga o le a fausia ai le aai o Siona, sa Ia faailoa mai foi o le aai o Initipene o le a avea “ma nofoaga tutotonu” (MF&F 57:3). O le avea ai ma nofoaga tutotonu ua faasino mai, i se isi itu, o le matafaioi faapea o Siona, po o le Ierusalema Fou, o le a avea o se tasi o laumua e lua (o le isi o Ierusalema) o le malo o le Alii i le taimi o le Meleniuma (tagai Joseph Fielding Smith, Doctrines of Salvation, comp. Bruce R. McConkie [1955], 3:71). Mai lenei nofoaga o le a vaavaaia ai e le Alii lava Ia gaoioiga ma faagasologa o Lona malo.

Sa faamamafa mai e Elder Bruce R. McConkie (1915–1985) o le Korama a Aposetolo e Toasefululua le taua o Siona o le “nofoaga tutotonu” ina ua ia aoao mai le mea lenei: “Tuu atu ia Isaraelu e faapotopoto i siteki o Siona i atunuu uma. Ia avea laueleele uma ma Siona ia i latou o e na totofi e aumau ai iina. Ia avea le atoaga o le talalelei ia mo au paia i malo uma. Ia aua nei taofia faamanuiaga mai ia i latou. Ia atiae malumalu lea o le a galueaiina ai le atoaga o sauniga i le fale o le Alii. Ae e i ai lava se nofoaga tutotonu, se nofoaga o le a tu ai le malumalu autu, o se nofoaga o le a afio mai i ai le Alii, o se nofoaga o le a alu atu ai le tulafono e pulea ai le lalolagi uma. … Ma o lena nofoaga tutotonu lea ua taua nei e tagata o Initipene i le Itumalo o Siakisone, Misuri, ae o le a oo mai le aso o le a avea ai ma Siona a lo tatou Atua ma le Aai o le Paia o lona nuu. Ua filifilia le tulaga; ua iloa le nofoaga; ua alu atu le poloaiga; ma ua faamautinoa mai le taunuuga folafolaina” (A New Witness for the Articles of Faith [1985], 595).

O le Falefaamasino faasolopito o le Itumalo o Siakisone i Initipene, Misuri, sa fausia i le tulaga o se falefaamasino piliki e fogafale-lua anamua, e tasi ma le afa maila i sasae o le tulaga o le malumalu ma sa ta’ua e le Alii i se faaaliga (tagai MF&F 57:3).

Mataupu Faavae ma Feagaiga 57:3. “O se tulaga mo le malumalu”

E le gata i le faailoa mai o le nofoaga mo le aai o Siona, ae na tautino mai foi e le Alii le tulaga mo le malumalu sa “taoto i le itu i sisifo, i luga o se fasi fanua e le mamao atu mai le falefaamasino” (MF&F 57:3). O le a fausia le malumalu i aso e gata ai a o lei oo i le Afio Mai Faalua o Iesu Keriso…Na faamalamalama mai e Elder Bruce R. McConkie le tulaga ese o le malumalu o le a fausia i Initipene, Misuri: “E faatatau i le malumalu o le a o mai uma i ai malo i aso e gata ai, o le a fausia i le Ierusalema Fou a o lei oo i le Afio Mai Faalua, o mea uma e avea o se vaega o le faagasologa o le tapenaga o le a saunia ai se nuu mo le toe foi mai o lo latou Alii” (A New Witness for the Articles of Faith, 595).

O le fasi faafanua mo le Aai o Siona na saunia i lalo o le taitaiga a le Perofeta o Iosefa Samita ma sa auina atu i le Au Paia i Misuri ia Iuni 1833, faatasi ai ma fuafuaga faale-tusiata faavae mo le uluai malumalu i Siona.

Pe tusa ma le lua tausaga mulimuli ane, na ia maua ai le faaaliga o loo tusia i le Mataupu Faavae ma Feagaiga 57, na maua ai e le Perofeta o Iosefa Samita se faaaliga faaopoopo e faatatau i le tulaga o le a fausia ai le malumalu. I le 1833, sa i ai i le Perofeta se fasi faafanua na tusia mo le aai o Siona lea e faaalia mai ai se lotoa o le malumalu e 24 fale e tatau ona fauina felata’i le tasi ma le isi i Initipene (tagai History of the Church, 1:357–59). O le faapotopotoina i, ma le fausiaina o le aai o Siona, po o le Ierusalema Fou, e pei ona tautino mai e le Alii, o le a amata i “le nofoaga o le malumalu” (MF&F 84:4).

Aisea e te manatu ai e taua ona faatu se malumalu i le nofoaga tutotonu o Siona? Aisea e taua ai le i ai o le malumalu i le totonugalemu o o tatou olaga?

Faitau le Mataupu Faavae ma Feagaiga 57:4–16, ma vaavaai mo le mea na faatonu e le Alii ia toeaina e fai ina ia faatuina ai Siona.

Mataupu Faavae ma Feagaiga 57:4–5. “O se mea poto le tatau ona faatau o le laueleele e le au paia”

I se faaaliga na muamua mai, sa poloaiina ai e le Alii le Au Paia ia “teu tupe uma [latou te mafai] ona maua i le amiotonu” ina ia mafai ai ona latou saunia e faatau le laueleele i Siona pe a faailo atu e le Alii le nofoaga ia i latou (MF&F 48:4–5). Ina ua uma ona faailoa mai le nofoaga o Siona, sa ta’u atu e le Alii i toeaina e faatau fasi fanua uma o loo “taooto i le itu i sisifo, e oo atu lava i le laina o loo sosolo tonu atu i le va o tagata Iutaia ma Nuuese” (MF&F 57:4). Na faamalamalama mai e Peresitene Iosefa Filitia Samita (1876–1972) e faapea o le laina o loo sosolo tonu atu i le va o tagata Iutaia ma Nuuese “e i ai lona faasinoga i le laina o loo tavavae ai le au Sa Lamana [po o Initia Amerika] mai tagata ua nofoia le Itumalo o Siakisone. O le taimi lea na tuu atu ai e le Malo o le Iunaite Setete i tagata Initia ia laueleele i sisifo o Misuri, ae na mulimuli ane sa latou toe aveesea mai ia i latou. O le au Sa Lamana, o e o lo sa Isaraelu, sa faasino i ai o tagata Iutaia, ma o Nuuese o tagata, o le toatele lava e ala mai i elemene le faatulafonoina, e nonofo i sasae o le vaitafe” (Church History and Modern Revelation [1953], 1:206).

I lea vaitau i sasae o le Iunaite Setete, e toatele tagata fai mai sa faaaogaina le faiga o le “nofoia o fanua e lei faato’aina” ina ia maua ai ni fanua. O lona uiga latou te nonofo i laueleele e lei nofoia po o ni fanua ma le faamoemoe e lesitala mulimuli ane la latou tagi i le falefaamasino o le itumalo. E oo atu i le taumafanafana o le 1831, ina ua tuuina mai lenei faaaliga, o le tele lava o le laueleele lea na poloaiina e le Alii le Au Paia e faatau ua uma ona ave e tagata fai mai, ma o lea na moomia ai ona faatau mai e le Au Paia ia fanua mai ia te i latou. I le usitai i le poloaiga a le Alii e faatau fanua, ia Tesema 1831, ua faatauina e Epikopo Eteuati Paterika le 63 eka mai ia Jones Hoy Flournoy (tagai Church History in the Fulness of Times, 2nd ed. [Church Educational System manual, 2003], 129). O lea fasi laueleele na oo ina lauiloa o le fasifanua o le malumalu aua o loo aofia ai le laueleele na atofa mai e le Alii mo le malumalu.

Mataupu Faavae ma Feagaiga 57:7–16. Ua faatonuina e le Alii ia tagata taitoatasi e faamautu i latou lava i le laueleele o Siona ma ua faatonuina foi i latou e tusa ai ma a latou matafaioi i le fausiaina o Siona

E pei ona tusia i le Mataupu Faavae ma Feagaiga 57:7–18, na faatonuina ai e le Alii ni toeaina e “faamautu” i latou lava i le Itumalo o Siakisone, Misuri. Ina ia “faamautu” e fautuaina mai ai faapea sa faamoemoe le Alii mo nei alii ia tumau ai i le Itumalo o Siakisone ma atiina ae le eria ma ia avea mo latou lava aiga. O lenei poloaiga atonu na oo mai o se mea na tete’i ai nisi o nei alii o e sa leai se manatu o le a faatonuina i latou e nonofo i Misuri ae o lea ua tuua o latou fale i Ohaio i le na o le tasi le masina talu ai.

O le vaaiga mai le ea o Initipene, Misuri i ona po nei, o loo faaalia ai nisi o laueleele na faatauina e le Au Paia i le 1831 mo le Aai o Siona ma le malumalu i se taimi mulimuli (tagai MF&F 57:4--6).

O le poloaiga e nonofo i Misuri e lei faigofie O i latou na faatonuina e nonofo sa popole i le aumaia o o latou aiga mai Ohaio ma toefatufatu ai se olaga fou i laina tuaoi o Amerika. Na tusia e Epikopo Eteuati Paterika se tusi i lona toalua, o Litia, lea na ia “avatu ai le tala o le a le toe foi atu i Ohaio i lena taumafanafana ae sa talosagaina lona toalua ma o la afafine e toalima e faatasi atu ma ia i laina tuaoi o Misuri. E le gata i lea, nai lo le mafai ona ia toe foi i Ohaio e fesoasoani e aumai lona aiga i lena tautoulu, sa ia tusi atu, ‘A le o Uso Gilbert o a’u e tatau ona i ai iinei i faatauga ia Tesema [ma le] le iloaina e mafai ona ia toe foi mai i lena taimi ua ou mafaufau ai e sili ona fautuaina e nofo iinei mo le tulaga o i ai le faaletonu i le taimi nei e tusa ma [o’u] faamoemoega.’ Na ia lapatai atu foi o le taimi lava e faatasi mai ai ma ia i Misuri, ‘E tatau ona ta pagatia [ma] o le a tele le taimi e tele faigata iinei ia e lei masani ai oe [ma] au i le tele o tausaga” [Letter, Aug. 5, 1831, in Edward Partridge letters, 1831–1835, Church History Library]. … Sa usitai Litia ma le naunautai e sii atu, ma sa tapena lona fale ma faapotopoto lana fanau teine e toalima e malaga i sisifo i se nofoaga na te lei vaai muamua i ai” (Sherilyn Farnes, “A Bishop unto the Church,” in Revelations in Context, ed. Matthew McBride and James Goldberg [2016], 79–80, history.lds.org).

Mataupu Faavae ma Feagaiga 58: Talaaga Faasolopito Faaopoopo

I le faaiuga o Iulai 1831, o nisi o toeaina o e sa talai le talalelei a o malaga mai i Misuri, faatasi ai ma tagata o le Paranesi a Kolesavile, na amata ona taunuu i sisifo o Misuri. O nisi o e faatoa taunuu sa faamoemoe e maua mai se nuu lauusiusi o tagata fou liliu mai, ae sa le fiafia i latou i le mea sa latou maua mai. Sa taunuu Oliva Kaotui, Ziba Peterson, Pita Uitimera le Itiiti, ma Feterika G. Williams i le isi o le laina tuaoi i Misuri ia Ianuari 1831, ma sa amata ona manuia la latou talaiga i le au Initia Amerika, ae ona sa latou lei maua ni faatagaga e tatau ai e i ai i le Teritori Initia ma ona o le tetee mai sui i le lotoifale o Initia ma faifeau, o lea na tutuliesea ai faifeautalai. Ina ua mavae ona tutuli ese mai le Teritori o Initia ia Fepuari 1831, sa folafola atu e faifeautalai i tagata fai mai papae i le Itumalo o Siakisone. E ui ina sa galulue malosi ia faifeautali, e toaitiiti nai le toa 10 tagata na liliu mai ma auai i le Ekalesia i le taimi na amata a i ona taunuu mai le perofeta o Iosefa Samita ma toeaina i Misuri ia Iulai 1831. Nai lo le sueina o se nuu ua faatulagaina e lava le tele e nonofo uma ai le Au Paia sa malaga mai, na maua e i latou faatoa taunuu mai se nuu i le laina tuaoi i le mea sa tele ina le’i faato’aina (tagai The Joseph Smith Papers, Documents, Volume 2: July 1831–January 1833, ed. Matthew C. Godfrey and others [2013], 12).

O le taimi foi lea, sa i ai se feeseeseaiga o le Perofeta o Iosefa Samita ma Epikopo Eteuati Paterika e tusa ai ma le laueleele na faatauina mai mo le Au Paia. Sa manatu Epikopo Paterika sa tatau ona faatau mai isi fasi fanua nai lo fanua ia na ta’u mai e le Perofeta (tagai The Joseph Smith Papers, Documents, Volume 2: July 1831–January 1833, 12–13). O tulaga ia, ma le feagai ai ma le faamoemoe o le fausiaina o Siona, sa maua ai e le Perofete le faaaliga o loo i ai i le Mataupu Faavae ma Feagaiga 58.

Mataupu Faavae ma Feagaiga 58:1–13

Ua fautuaina e le Alii ia toeaina ina ia faamaoni i o latou puapuaga

Faitau le Mataupu Faavae ma Feagaiga 58:1–13, ma vaavaai mo upumoni na aoao atu e le Alii i toeaina e fesoasoani ai ia te i latou i luitau sa latou feagai i le faavaeina o Siona.

Mataupu Faavae ma Feagaiga 58:1–13. O le muai silafia e le Atua

E ui ina sa faaalia e nisi o toeaina le le fiafia i le mea sa latou maua atu i Misuri, ae o le toatele o le Au Paia mai Kolesavile sa faatoa taunuu atu ma le toatele o isi toeaina sa sagisagi ma naunau e aoao mea sa mafai ona latou faia e fesoasoani ai i le faatuina o Siona. A o lei tuuina atu i le Au Paia sa faatoa taunuu atu ni faatonuga patino sa latou sailia, sa valoia e le Alii le taunuuga o Siona ma le Au Paia. O se vaega o lea valoaga, sa ta’uatu ai e le Alii i le Au Paia e faapea o le a latou feagai ma puapuaga ae sa folafola atu afai latou te “faamaoni i puapuaga” o le a “sili atu [lo latou taui] i le malo o le lagi” (MF&F 58:2). Sa ta’u atu foi e le Alii i le Au Paia e faapea sa “faamamaluina [i latou] i le faataatiaina o le faavae” o Siona (MF&F 58:7), ua foliga mai ai o le faamaeaina o Siona o le a le tupu i o latou taimi ae o se taimi i le lumanai.

Atapue o le eria i Initipene, Misuri, na faapaiaina e le Perofeta o Iosefa Samita ia Aokuso 1831 mo le fausiaina o se malumalu i aso e gata ai, lea ua masani ona faasino i ai o le fanua o le malumalu.

Sa faamatalaina e Elder Orson F. Whitney (1855–1931) o le Korama a Aposetolo e Toasefululua le muai silafia e le Alii o le faatuina o Siona:

“I mea uma lava e tutupu, o mea sa tutupu atonu na muai vaaia. O le valoiaina [muai silafia] e oo atu i mea uma lava e fesootai ma le galuega a le Alii. Ina ua Ia poloaiina lona nuu e fausia le Ierusalema Fou, sa ia silafia le tele, po o le laitiiti, sa latou gafatia ona ausia i lena itu—sa silafia lelei muamua e faapei foi ona ia silafia mulimuli ane. O se mea e pei o le maofa po o le le fiafia i lana vaega e le mafuafuaina. O se Tamalii o i ai le poto uma, le mana uma, o le sa foafoaina, faatagataina, togiolaina ma faamamaluina ‘le miliona o lalolagi e pei o lenei’ [Mose 7:30], e le o se mea e ofo ai i soo se mea e tupu i lo tatou paneta itiiti.

“… O Le ua Silafia Mea Uma sa ia muai silafia mea o le a faia e i latou na o le a fausia Siona, pe o mea o le a tuua e le faia, ma sa ia mamanuina ana fuafuaga e tusa ai. O le mea moni e lei oo i le taimi mo le togiolaina o Siona. Sa lei saunia le Au Paia e fausia le Ierusalema Fou” (Saturday Night Thoughts: A Series of Dissertations on Spiritual, Historical, and Philosophic Themes [1921], 187).

O le a sou manatu aisea o le a poloaiina ai e le Alii le Au Paia e fausia Siona ae ua Ia silafia o le a le mafai ona latou faia i lena taimi?

Mataupu Faavae ma Feagaiga 58:3 “E lē mafai ona outou vaaia i o outou mata faalenatura i le taimi nei, le fuafuaga a lo outou Atua”

O nisi o le uluai Au Paia sa muai fatuina ni manatu e uiga i le fausiaina o Siona i o latou aso. O le toatele o i latou sa talitonu o loo loma le Afio Mai Faalua o Iesu Keriso. E faapena foi, o nisi atonu na talitonu o le fausiaina o Siona ma le malumalu iina o le a vave ona tupu ma e aunoa ma ni faigata e tele. Peitai, sa lapataia le Au Paia e le Alii, “E le mafai ona outou vaaia i o outou mata faalenatura, i le taimi nei, le fuafuaga a lo outou Atua e faatatau i mea o le a oo mai pe a mavae le taimi nei” (MF&F 58:3). Sa oo ina faamalamalamaina e le Alii le Au Paia e faapea o le a latou feagai ma puapuaga, ae sa Ia folafola atu o le iu lava, pe afai latou te tumau faamaoni , o le a “faapaleina i latou i le mamalu tele” (tagai MF&F 58:3–6). E faapena foi, e mafai i nisi taimi ona tatou muai fuafuaina ni manatu e ono le fetaui ma le fuafuaga a le Atua.Na faasoa mai e Elder Neal A. Maxwell (1926–2004) ole Korama a Aposetolo e Toasefululua se faamatalaga na tusia e le tusitala o C. S. Lewis, o le sa faamalamalamaina mai e faapea tatou te le malamalama pea i mea o loo teuina e le Atua mo i tatou:

“Na faamatala e C. S. Lewis, i lana tusi Mere Christianity, lo tatou sootaga ma le Atua i se auala faapitoa lea e mafai ona fesoasoani tatou te talisapaia ai le ala e gauai atu ai i tatou lava i lona finagalo, ua na o le pau lea o le auala e mafai ona tupu ai le tuputupu a’e faaleagaga:

“‘Vaai faalemafaufau e faapea o oe o se fale e ola. Ua sau i totonu le Atua e toe fau lena fale. I le taimi muamua, atonu, e mafai ona e malamalama i mea o loo Ia faia. Ua ia faasa’osa’oina ia talivai ma taofi ia tutulu o le faaalo ma isi mea faapena: na e iloa o na galuega sa manaomia ona fai ma o lea e te le o te’i ai. Ae o le taimi nei ua amata ona ia taina solo le fale i se auala ua tiga tele ai ma e foliga mai e leai se uiga. O le a ea Ana mea o fai? O le faamalamalamaga o le, o loo Ia fausia se fale e fai si ese mai mai le fale na e mafaufau i ai—ua togi atu i ai se faalava fou ii, tuu se fola faaopoopoiina, faatutu olo, fai fanua i fafo. Na e manatu o le a faia ia avea oe ma se tamai fale manaia: ae o loo Ia fausia se maota tele. …’(New York: The Macmillan Company, 1952, p. 160.)” (“The Value of Home Life,” Ensign, Feb. 1972, 5).

Faatasi ai ma le manao i le Au Paia e fausia le aai o Siona, sa i ai i le Alii nisi mafuaaga mo le poloaiina o i latou e faamautu i Misuri sisifo. Sa Ia faailoa mai o Ona faamoemoega e aofia ai le sauniaina o loto o Lona nuu, aoao o i latou ia usiusitai, ma le sauniaina o i latou e tuuina atu le molimau o Lana galuega (tagai Mataupu Faavae ma Feagaiga 58:5–13).

E ono mafai faapefea e le iloaina e le mafai ona tatou iloaina fuafuaga uma a le Atua ona fesoasoani ia te oe e tumau faamaoni ai tusa lava pe o e feagai ma taimi faigata?

Mataupu Faavae ma Feagaiga 58:8–11 “O se ‘aiga o mea lololo, o uaina ua i ai le ‘alu”

Na ta’u atu e le Alii i le Au Paia o se tasi o mafuaaga na Ia manao ai ia i latou e faataatia le faavae o Siona o le fesoasoani lea e saunia ”se ‘aiga o mea lololo, o uaina ua i ai le ‘alu ua faamamaina lelei” (MF&F 58:8). E ogatusa lelei lea ma le valoaga a Isaia e faapea o le a “faia [e le Alii] mo nuu uma le faigaai o mea lelei, o le tausamiga o uaina ua tuu ai ‘alu” (Isaia 25:6). O nei faatusa o le taumafataga—”o mea lololo” ma “uaina ua tuu ai ‘alu—o faailoga o le mauoa, e ta’u mai ai o lea taumafataga e taua tele. Na ta’u atu foi e le Alii i uluai Au Paia e faapea “o le a valaaulia i ai atunuu uma” i le tausamiga lenei, “o e ua mauoa ma e ua aoaoina, o e ua atamamai ma e ua tamalii;… (MF&F 58:9–11; tagai foi Mataio 22:1–10). Ua aoao mai e lenei valoaga e faapea o atunuu uma o le a valaaulia e taumamafa i faamanuiaga tamaoaiga o le talalelei e tapenapena ai mo le Afio Mai Faalua o Iesu Keriso.

Mataupu Faavae ma Feagaiga 58:14–33

Ua aotele mai e le Alii ia tiute o se epikopo, poloaiina le Au Paia e tausia tulafono o le laueleele, ma ua fautuaina i latou e faaaoga la latou faitalia e fai ai mea lelei.

Faitau le Mataupu Faavae ma Feagaiga 58:14–23, ma vaavaai mo mea na fetalai ai le Alii e uiga ia Epikopo Eteuati Paterika ma le fautuaga na tuu atu e le Alii ia i latou o e sa faatonuiona e nonofo ai pea i Misuri.

Mataupu Faavae ma Feagaiga 58:14–16. “Ia faaeteete o ia ne’i pa’u”

I le tali atu i le feeseeseaiga i le va o Epikopo Eteuati Paterika ma le Perofeta o Iosefa Samita e faatatau i le tulaga maualuga lelei o le laueleele e tatau ona faatauina i Siona, sa a’oa’i e le Alii ia Epikopo Paterika ma lapataia o ia i lona “le talitonu ma le tauaso o le loto” e mafai ona tau atu i lona pa’u pe afai ae le salamo o ia (MF&F 58:15). Sa talia e Epikopo Paterika le lapataiga ma le aoaiga a le Alii i le lotomaualalo. I se tusi na tusia i lona toalua, o Litia, i ni nai aso talu ona maua lea faaaliga, sa faapupula atu ai e Epikopo Paterika lona lotomaualalo: “Ua iloa ua ou tu i se tulaga taua, … [ma] a o a’oaiina au i lea taimi ma lea taimi o nisi taimi ou te lagonaina ai e peiseai ua tatau ona ou pa’u, ia ou le lafoaia le galuega, ae ou te fefe e maualuga lo’u tulaga nai lo le mea e mafai ona ou faatinoina e taliaina ai e lo’u tama faalelagi. … Tatalo mai mo au ia aua nei ou pa’u” (quoted in Farnes, “A Bishop unto the Church,” 81, history.lds.org).

I se faaaliga na tuuina mai i le aso 11 Setema, 1831, sa ta’u mai ai e le Alii e faapea ua agasala ia Eteuati Paterika, ae na Ia fetalai mai afai e salamo o ia o le a faamagaloina o ia (tagai MF&F 64:17). Na salamo mulimuli ane ia Epikopo Paterika ma iu ina faamagaloina. E tusa ai ma minute o se fonotaga sa faia ia Mati 1832, Sa faailoa mai ai e Epikopo Paterika e faapea “sa salamo o ia ma [sa] salamo pea lava” ona o le feeseeseaiga i le va o ia ma le Perofeta o Iosefa Samita (i le The Joseph Smith Papers, Documents, Volume 2: July 1831–January 1833, 62).

Mataupu Faavae ma Feagaiga 58:16–20. “Ua tofia e avea ma faamasino i Isaraelu”

Sa valaauina e le Alii ia Epikopo Eteuati Paterika e taitaia ia taumafaiga e faatuina ma fausia le aai o Siona. Sa faatonuina foi e Ia ia Epikopo Paterika ma Sini Gilbert e nonofo i Misuri e pulea meatotino a le Ekalesia ma faatau mai fanua i totonu ma faataamilo i Initipene, Misuri. O le tiutetauave autu lava o Epikopo Paterika o le faatautaia o le tulafono o le faapaiaga e ala i le taliaina o faapaiaga a le Au Paia ma tuuina atu ia i latou a latou mea-tausi (tagai MF&F 41:9–11; 42:30–35, 71–73; 51; 57:7, 15). Sa nafa foi o ia ma le faamasinoina o le nuu o le Atua e tusa ai ma le tulafono a le Atua (tagai MF&F 58:17–18). Sa faamalamalama mai ePresident Gordon B. Hinckley (1910–2008) nisi o auala e faamasinoina ai e epikopo ia tagata: “O se tiutetauave taufaafefe ma le ofoofogia le tu atu o se faamasino o tagata. E tatau ona avea oe o lo latou faamasino i nisi taimi e tusa ai ma le agavaa e avea ai ma tagata o le Ekalesia, agavaa e ulu atu i le maota o le Alii, agavaa e papatiso, agavaa e maua le perisitua, agavaa e auauna atu i se misiona, agavaa e aoao atu ma avea o ni taitai i faalapotopotoga. E tatau ona avea oe ma faamasino o lo latou agavaa i taimi o mafatiaga ia maua le fesoasoani ma taulaga anapogi a tagata ma oloa mai le faleteuoloa a le Alii” (“O Leoleo Mamoe o Isaraelu,” Ensign po o le Liahona, Nov. 2003, 61).

Faitau le Mataupu Faavae ma Feagaiga 58:24–33, ma vaavaai mo aoaoga faavae ma mataupu faavae semanu e fesoasoani ia i latou o e sa poloaiina e faavae ia Siona.

Mataupu Faavae ma Feagaiga 58:24–25. “Latou te taupulepule ai i le va o latou lava ma a’u”

Na ta’u atu e le Alii ia Epikopo Eteuati Paterika ma ona fesoasoani e fai le laueleele o Misuri ma o latou nofoaga e nonofo ai. Na ta’u atu foi i nei alii e aumai o latou aiga i Misuri, “e pei ona latou taupulepule ai i le va oi latou lava ma a’u” (MF&F 58:25). O le faatonuga e taupulepule i latou lava ma faatasi ai ma le Alii o se mamanu lea e tatau foi ia i tatou o le Au Paia o Aso e Gata Ai ona mulimuli ai a o tatou sailia musumusuga ma le taitaiga a le AliiNa aoao mai ia Elder M. Russell Ballard o le Korama a Aposetolo e Toasefululua e faapea “o le mana tele faaleagaga ma le taitaiga musuia” e mafai ona maua mai le fefautuaai po o le taupule lelei faatasi. Na ia folafola mai foi e faapea “e leai se faafitauli i le aiga, uarota po o le siteki e le mafai ona le foia pe afai tatou te vaavaai mo ni fofo i le ala a le Alii e ala i le fefautuaai—faufautua moni—ma le tasi ma le isi” (Fefautuaai ma a Tatou Aufono [1997], 2, 4).

E mafai faapefea e faatonuga a le Alii e uiga i le taupule faatasi ma Ia ma isi ona fesoasoani ia te oe i lou olaga i le taimi nei?

Mataupu Faavae ma Feagaiga 58:26–29. Ua fautuaina e le Alii le Au Paia e faaaoga o latou faitalia e fai ai mea lelei

A o sailia e uluai Au Paia ia faatonuga a le Alii e ausia ai le poloaiga paia e faavae ma fausia Siona, sa ta’u atu e le Alii ia te i latou, “E le tatau ona Ou poloai atu i mea uma” (MF&F 58:26). Sa Ia faatonuina foi i latou e faaaoga lo latou faitalia e “fai mea e tele i lo latou lava loto malie, ma aumai le amiotonu tele” (MF&F 58:27). Na poloaiina e le Alii nei uluai Au Paia e faavae ia Siona ma sa tuuina atu ia i latou faatasi ma mataupu faavae e taiala ai, ae sa Ia tuu patino atu e faitalia i latou ma le ala e fai ai.Na faamalamalama mai e Peresitene Ezra Taft Benson (1899–1994):

“E masani lava ona tuu mai e le Alii ia faamoemoega aotele e ausia ma ni nai taiala e mulimuli ai, ae na te faamoemoeina i tatou e galueaiina le tele o auiliiliga ma metotia. O metotia ma auala e masani ona atiina ae e ala i le suesue ma le tatalo ma e ala i le ola ai ina ia mafai ona tatou maua ma mulimuli i uunaiga a le Agaga. O tagata e vaivai le faaleagaga, e pei o i latou i ona po o Mose, sa tatau ona poloaiina i le tele o mea. O le taimi nei o i latou e mataala faaleagaga e tilotilo i faamoemoega, siaki ia taiala na faataatia e le Alii ma ana perofeta, ona galulue ai lea ma le lototatalo—e aunoa ma le tau poloaiina ‘i mea uma.’ O lea uiga e saunia ai alii mo le tulaga faaleatua. …

“O nisi taimi e faatalitali ai ma le faamoemoe le Alii i lana fanau ina ia galulue i latou lava, ma a latou le faia, latou te le maua le taui sili atu, ma a le faataatia ese e le Alii le mea atoa ma faataga i latou e mafatia i taunuuga, ia pe na te matuai sipelaina auiliili mai foi le mea e tatau ona latou faia. E masani, ou te fefe, o le tele o lona sipelaina mai, o le laitiiti foi lea o lo tatou taui” (i le Conference Report, Apr. 1965, 121–22).

O le a sou manatu aisea e le ta’u maia ai e le Alii ia i tatou mea uma e tatau ona tatou fai?

Mataupu Faavae ma Feagaiga 58:30—33. “Ou te poloai atu a ua lē usiusitai mai tagata”

Na ta’u atu e le Alii i le Au Paia afai latou te le usitai i Lana poloai mai, o le a Ia faaleaogaina ma aveese ia faamanuiga semanu latou te maua pe ana fai latou te usiusitai (tagai MF&F 58:32). Ua avea lenei upumoni ma se lapataiga i uluai Au Paia o e na poloaiina e faatu ia Siona. Pe ana fai latou te le usitai i Ana poloaiga, semanu e faaleaoga e le Alii le poloaiga e faatu Siona ma o le a le maua e le Au Paia ia faamanuiaga e mafai ona latou maua.

Na valoia foi e le Alii e faapea afai Na te faaleaogaina le poloaiga e faavae ia Siona ma taofia faamanuiaga ona o le le usiusitai o le Au Paia, semanu e faapea mai nisi e “le o le galuega a le Alii” (MF&F 58:33). Sa lapataia e le Alii i latou o e o le a faia lena mau faapea o lo latou taui o le a sau mai “lalo ae ua le mai i luga” (MF&F 58:33).

Mataupu Faavae ma Feagaiga 58:34–65

Ua tuuina mai e le Alii ia faatonuga faaopoopo e tusa ai ma Siona, aoao mai mataupu faavae o le salamo ma le faamagaloga, ma poloaiina toeaina e ave le talalelei i le lalolagi uma

Faitau le Mataupu Faavae ma Feagaiga 58:34–43, ma vaavaai mo mea na aoao mai e le Alii e uiga i le salamo ma le faamagaloga.

Mataupu Faavae ma Feagaiga 58:38–42. “O ia lava lea ua faamagaloina, ma o A’u o le Alii, e le toe manatua lava”

Ua tautino mai e le Alii e faapea o i latou o e salamo o le a faamagaloina ma o le a Ia “le toe manatua [a latou agasala]” (MF&F 58:42). Na aoao mai Peresitene Boyd K. Packer (1924–2014) o le Korama a Aposetolo e Toasefululua e faapea, ona o le Togiola a Iesu Keriso ua moni lenei folafolaga tusa lava po o a agasala tatou te faia:

Po o a lava a tatou soligatulafono, po o le a foi se tele e faamanualia ai e a tatou amioga isi tagata, o lena tausalaina e mafai lava ona tafiesea atoa. Ia te au, masalo o le fasifuaitau aupito sili ona matagofie i tusitusiga paia o le mau lea ina ua fetalai le Alii, ‘Faauta, o ia o lē ua salamo i ana agasala, o ia lava lea ua faamagaloina, ma o Aʼu, o le Alii, e lē toe manatuaina lava i latou’ [MF&F 58:42].

“O le folafolaga lena o le talalelei a Iesu Keriso ma le Togiola” (O Le Togiola,” Ensign po o le Liahona, Nov. 2012, 77).

O nisi ua faaseseina ona talitonu faapea afai e mafai ona latou manatua a latou agasala, o lona uiga e lei faamagaloina. Na faamalamalama mai e Peresitene Dieter F. Uchtdorf o le Korama a Aposetolo a Toasefululua le mafuaaga atonu tatou te manatua ai a tatou agasala pe a uma ona faamagaloina i tatou: “O le a taumafai lava Satani e faatalitonu i tatou e lei faamagaloina a tatou agasala aua o loo mafai ona tatou manatuaina. O Satani o le pepelo; e taumafai o ia e faapuaoa la tatou vaaiga ma taitai ese mai ai i tatou mai le ala o le salamo ma le faamagaloga. E lei folafola mai le Atua faapea, o le a tatou le manatuaina a tatou agasala. O le manatuaina o le a fesoasoani ia i tatou e aloese mai ai i le toe faia o mea sese lava na. Peitai, afai tatou te tumau i le moni ma le faamaoni, o le a oo ina manifinifi le manatua o a tatou agasala. O lenei mea o le a avea ma se vaega manaomia o le faagasologa o le faamalologa ma le faapaiaga” (“Vaega Tonu o le Toe Foi Saogalemu,” Ensign po o le Liahona, Me 2007, 101).

O le a le eseesega e mafai ona faia i le olaga o se tasi pe afai sa talitonu o ia i le mataupu faavae o loo aoao mai i le Mataupu Faavae ma Feagaiga 58:42? O le a se eseesega e na te faia i lou aiga?

Mataupu Faavae ma Feagaiga 58:43 “Faauta, e ta’uta’u atu e ia i latou ma lafoai i ai”

Ina ua uma ona aoao atu le Au Paia e mafai ona faamagaloina a latou agasala, sa faailoa atu i ai e le Alii mea e manaomia mo le salamo: ta’uta’u atu ma lafoai agasala. Na faamatala mai e Elder D. Todd Christofferson o le Korama a Aposetolo e Toasefululua le uiga o le ta’uta’u atu o agasala: “O le ta’uta’u atu ma le lafoai o ni manatu faavae mamana tele. E matua tele atu nai lo le na o se fai atu faasamasamanoa ‘ou te ioe i ai; ou te faamalie atu.’ O le ta‘uta’u atu o se faailoaga loloto, o nisi taimi e tiga, o mea sese ma solitulafono i le Atua ma le tagata” (O Le Meaalofa Paia o le Salamo,” Ensign po o le Liahona, Nov. 2011, 40).

Na faamalamalama mai e Elder Neil L. Andersen o le Korama a Aposetolo e Toasefululua le uiga o le lafoai o a tatou agasala: “O le lafoai o agasala e foliga mai ai e le toe foi mai lava. O le lafoaia e manaomia ai le taimi. Ina ia fesoasoani ia i tatou, e faataga ai e le Alii i nisi o taimi ia toega o a tatou mea sese e nofo i o tatou manatua. O se vaega taua o lo tatou aoaoina i le olaga nei”(“Salamo … Ina Ia mafai Ona ou Faamalolo Ia Te Oe,” Ensign or Liahona, Nov 2009, 42).

Manatunatu loloto i le mea e te ono manaomia ona fai e ta’uta’u atu ai ma lafoai au agasala. Ia avea o se sini e salamo vave soo i au agasala. Afai na e faia ni agasala matuia, saili lou epikopo po o le peresitene o le paranesi ina ia mafai ona fesoasoani ia te oe i le ala o le salamo ina ia atoa ai le faamagaloga.

Faitau le Mataupu Faavae ma Feagaiga 58:44–65, ma vaavaai mo faatonuga na tuuina mai e le Alii i toeaina o e o le a nonofo ai pea i Ohaio.

Mataupu Faavae ma Feagaiga 58:50–52. Ua poloaiina e le Alii ia Sini Rikitone e tusi se faamatalaga o le laueleele o Siona

Sa poloaiina e le Alii ia Sini Rikitone e “tusi se faamatalaga o le laueleele o Siona … e pei ona [sa] faailoa atu e le Agaga ia te ia” (MF&F 58:50). O lea faamatalaga, faatasi ai ma se tusi ma se pepa o le faasologa o igoa sa tatau ona tuuina atu i tagata o le Ekalesia e sue ai tupe e faatau ai fanua i Misuri (tagai MF&F 58:51). Ona e lei maua ia atapue i lena taimi, o le faamatalaga a Sini sa mafai ona fesoasoani i tagata e vaai faalemafaufau ai i le laueleele ma faamalosiauina ai i latou e foai atu tupe.

Sa amoina e le Perofeta o Iosefa Samita ma isi alii e 11 se ogalaau [oak] e amata ai le faavae mo le uluai fale o le Ekalesia ma le aoga i Siona, lea ua faamanatuina i lenei maafaamantu i Kansas City, Misuri

Mataupu Faavae ma Feagaiga 58:57. “Tuu atu i la’u auauna o Sini Rikitone na te faapaia ma faasaina lenei laueleele”

Sa poloaiina e le Alii ia Sini Rikitone e faapaia le laueleele o Siona ma le tulaga mo le malumalu (tagai MF&F 58:57). O le talafaasolopito o Iosefa Samita o loo faamtala mai ai mea na tutupu i le faapaiaga lea na fai ina ua maea ona maua mai le faaaliga lenei: “I le aso [lona lua] o Aokuso, sa ou fesoasoani ai i le paranesi a Kolesavile o le Ekalesia e faataatia le uluai ogalaau mo se fale e avea ma faavae o Siona, i le taulaga o Kaw, e sefulu ma le lua maila i sisifo o Initipene. Na amoina mai le ogalaau ma faatuina e alii e toasefululua e faamamalu ai ituaiga e sefulu ma le lua o Isaraelu. I le taimi foi lava lea, e ala i tatalo, sa faapaiaina ai le laueleele o Siona ma faasaina e Elder [Sini] Rikitone, ma o sa vaitau o le olioli ia i latou o e sa faatasi ai, ma maua ai sina tepa i le lumanai, o le taimi o le a oo mai se taimi e tatala mai ai e faamalieina ai e faamaoni (in Manuscript History of the Church, vol. A-1, page 137, josephsmithpapers.org). O le aso na sosoo ai, 3 Aokuso 1831, na faapaiaina ai e le Perofeta o Iosefa Samita le tulaga mo le malumalu (tagai Manuscript History of the Church, vol. A-1,” page 139).

Mataupu Faavae ma Feagaiga 58:46–47, 59, 63–64. E tatau ona folafola atu le talalelei i tagata uma

Na faatonuina e le Alii ia toeaina o e sa lei poloaiina e nonofo i Siona e “talai atu le talalelei i itulagi faataamilo ai, ma a mavae lena … ia toe foi i o latou aiga” (MF&F 58:46). Na poloaiina e le Alii nei uluai faifeautalai, e faapei ona sa Ia faia i Ana Aposetolo anamua a o lei Afio Ae o Ia i le lagi (tagai Mataio 28:19–20), e avatu le talalelei “i le lalolagi atoa, ma i vaega aupito mamao o le lalolagi–e ao ina talai atu le talalelei i tagata uma lava” (MF&F 58:64).

E faatatau i lea poloaiga, na aoao mai Elder David A. Bednar o le Korama a Aposetolo e Toasefululua e faapea:

“O soo tuuto o Iesu Keriso o loo avea pea ma o le a avea pea ma faifeautalai totoa ma filiga. O se faifeautalai o se soo o Keriso, o le e molimau atu e uiga ia te Ia, i lana matafaioi o le Togiola ma folafola atu le upumoni o Lana talalelei.

“O le Ekalesia a Iesu Keriso o loo avea pea ma o le a avea pea ma ekalesia faamisiona. Ua taliaina e tagata taitoatasi o le Ekalesia a le Faaola le matafaioi paia e fesoasoani i le faataunuuina o le tiute paia ua tuuina mai e le Alii i Ana Aposetolo, e pei ona faamaumauina i le Feagaiga Fou: …

“E matua mamafa lava i le Au Paia o Aso e Gata Ai lenei tiutetauave e aoao atu tagata uma, i atunuu uma e uiga i le Alii o Iesu Keriso ma Lana talalelei toefuataiina. Matou te talitonu i le Ekalesia lava e tasi lea na faavaeina e le Faaola anamua lea ua toe faatuina i luga o le lalolagi e Ia lava i aso e gata ai. O aoaoga faavae, mataupu faavae, pule o le perisitua, sauniga, ma feagaiga o Lana talalelei o loo maua i aso nei i Lana Ekalesia. …

“O le mea moni, tatou te lagonaina se tiutetauave paia e momoli atu lenei savali i malo uma, ituaiga, gagana, ma nuu. (“O Mai ia Ina Matamata,” Ensign po o le Liahona, Nov. 2014, 107).

Manatunatu loloto i aoaoga faavae ma mataupu faavae ua e aoaoina i le Mataupu Faavae ma Feagaiga 57–58 e te manatu atonu na aumaia ai le faamoemoe i uluai Au Paia o Aso e Gata Ai. Mafaufau e aoao atu i se tagata o le aiga poo se uo se tasi o nei upumoni sa e mauaina.