Mataupu 19

Mataupu Faavae ma Feagaiga 50

Faatomuaga ma le Faasologa o Taimi

Ina ua taunuu le Perofeta o Iosefa Samita i Katelani, Ohaio, i le amataga o Fepuari 1831, na ia matauina “o nisi o manatu ese lava ma agaga sese na fetolofi mai i totonu” i nisi o le Au Paia. Na amata ona ia aoao atu “ma sina faaeteetega, ma sina poto” ina ia faamuta ai nei faaaliga faaleagaga sese (i le Manuscript History of the Church, vol. A-1, page 93, josephsmithpapers.org). Ina ua mavae ni nai masina, sa toe foi mai Elder Pale P. Palate mai se misiona ma matauina amioga faapena i paranesi o le Ekalesia i fafo atu o Katelani, o lea sa latou o atu ai ma nisi o toeaina ia Iosefa Samita mo se taitaiga (tagai Manuscript History of the Church, vol. A-1, itulau 114, josephsmithpapers.org). Ia Me 1831, na ole atu ai le Perofeta i le Alii e tusa ai ma lea faafitauli ma sa maua mai ai le faaaliga na faamaumauina i le Mataupu Faavae ma Feagaiga 50. I le faaaliga lenei, na faatonuina ai e le Alii le Au Paia e aoao atu ma talia le talalelei e ala i le Agaga o le Upumoni.

Tautotogo 1831O nisi tagata o le Ekalesia i Katelani sa tosina e faaaliga sese faaleagaga.

I le faaiuga o Mati 1831Na toe foi mai ai Pale P. Palate i Katelani mai se misiona i le Teritori o Initia ma Misuri.

30 Aperila, 1831Na fanauina ai e Ema Samita se masaga, o se atalii ma se afafine, o e na maliliu uma i totonu o ni nai itula.

9 Me, 1831Na maua mai ai le Mataupu Faavae ma Feagaiga 50.

9 Me, 1831Na vaetamaina e Iosefa ma Ema Samita se masaga pepe a Ioane ma Iulia Murdock, ina ua maliu Iulia i le fanauina o le masaga i le aso 30 Aperila.

Mataupu Faavae ma Feagaiga 50: Talaaga Faasolopito Faaopoopo

O Pale P. Palate o se tasi o faifeautalai e toafa o e sa fesoasoani e faaliliu mai le silia ma le 100 tagata i Katelani, Ohaio, i le faaiuga o le tautoulu o le 1830. Ina ua mavae le faaauauina o lana misiona e folafola atu le talalelei i tagata Initia Amerika i sisifo o Misuri, sa toe foi Elder Palate i Ohaio i le faaiuga o Mati 1831. I le taimi lena sa ia molimauina ai ni amioga sa faateia ai i tagata o le Ekalesia i Katelani. Sa ia faamatalaina: “A o ou alu atu i paranesi eseese, sa faaalia mai ni faatinoga e matua uiga ese lava, ia sa mataga nai lo le faagaeetiaina. O nisi tagata sa foliga mai ua matapogia, ma faia ni taga faailo e le talafeagai, ma ua ese lava o latou foliga. O isi e pei ua faavale malosi, ma tauau atu ai ina faasenunui le vaai, meia, ma oso faama’ilili, ma isi mea. O isi e foliga mai o tali ni faali’ali’a ma ni faaaliga, ia e le faagaeetia ai, ma e le ogatusa ma le aoaoga faavae ma le agaga o le talalelei. (Autobiography of Parley P. Pratt, ed. Parley P. Pratt Jr. [1938], 61).

Na tusia e le Perofeta o Iosefa Samita nisi o aafiaga o le mulimuli i agaga sese: “E le’i leva ona faatulagaina le Talalelei i Katelani, ma i le taimi o le leai o ni taitai o le Ekalesia, na faalauiloa mai ai le tele o agaga sese, e tele ni faaaliga ese lava sa vaaia, ma ni manatu soonafai ma faivavale sa faafiafiaina; sa taufetuli mai i fafo tamaloloa mai faitotoa i lalo o le uunaiga a lenei agaga, ma o nisi o i latou sa tutu i luga o tagutugutu o laau ma feei ai, faapea ma ituaiga uma o faiga faavalevalea sa latou faia; sa i ai se tasi alii sa tulitulia se polo na ia fai mai, sa ia vaaia o lele i le ea, seia oo ina tau atu i se mato, ina ua puna o ia i luga o le tumutumu o se laau, lea na faasaoina ai lona ola; ma le tele lava o mea faavalevalea sa latou faia, sa fuafuaina e aumaia ai le maasiasi i luga o le Ekalesia a le Atua, ia mafua ai ona aluese le Agaga o le Atua, ma ia suati i luga ma faatamaia na mataupu faavae faamamaluina lea na atiina a’e mo le faaolataga o le aiga o tagata” (i le Manuscript History of the Church, vol. C-1, page 1311, josephsmithpapers.org).

Sa matauina e Pale P. Palate e faapea o lenei amioga fenumiai na taitai atu ai nisi e saili se faamaninoga mai le Perofeta: “O le lagonaina o o matou vaivaiga ma le leai o se poto masani, ma ina nei o matou sese i le faamasinoga e faatatau i nei faiga faaaliga o agaga, o au, Ioane Murdock, ma isi toeaina, na matou oa tu ia Iosefa Samita, ma fesili atu ia te ia e ole atu i le Alii e faatatau i nei agaga o faaaliga” (Autobiography of Parley P. Pratt, 61–62).

Faafanua 5: O le Eria o Niu Ioka, Penisilevania, ma Ohaio o le Iunaite Setete

Mataupu Faavae ma Feagaiga 50:1–9

Ua lapataia e le Alii toeaina o le Ekalesia e uiga i agaga sese

Mataupu Faavae ma Feagaiga 50:2–3. “Ua saili Satani e faasese outou.”

Sa lapataia e le Alii ia le Au Paia o loo i ai agaga i le lalolagi o e, faatasi ai ma Satani, o loo saili e faasese ma faatoilaloina fanau a le Atua. Sa lapatai mai Peresitene Boyd K. Packer (1924–2015) o le Korama a Aposetolo e Toasefululua i tagata o le Ekalesia ia aua nei faavaleaina i latou i lagona taufaasese po o agaga sese.

Ia outou mataala nei faaseseina outou e musumusuga mai se puna e le mama. E mafai ona tuuina atu ia te outou savali faaleagaga sese. E i ai agaga taufaasese e faapei foi ona i ai agelu taufaasese. (Tagai Moro. 7:17.)…

“O le vaega faaleagaga o i tatou ma lo tatou vaega faalelagona e matua fesootai vavalalata lava ma ‘[e] mafai ona faaseseina se lagona faalelagona mo se mea e faaleagaga. E i ai nisi taimi tatou te maua ai tagata latou te maua mea ua latou manatu o ni uunaiga faaleagaga mai le Atua, ae o na uunaiga a le o le taulai atu i lagona pe mai le fili foi” (“O Le Moligao a le Alii,” Liahona, Jul. 1983, 55–56).

O isi taimi, na saunoa ai Peresitene Packer i le taua o le iloa o le eseesega i le va o se faaosoosoga mai le tiapolo ma se faaaliga moni mai le Alii:

“E mafai ona i ai faaaliga pepelo, uunaiga mai le tiapolo, faaosoosoga! Po o le a lava le umi e te ola ai, po o le a foi lava le itu, o le a taumafai lava le tiapolo e taitai sese oe. …

“Sa saunoa mai le Perofeta o Iosefa Samita e faapea: ‘e leai se manuaga sili atu o le fanau a tagata nai lo le aafia i se uunaiga a se agaga pepelo ae ua latou manatu ua latou maua le Agaga o le Atua” [Teachings of the Prophet Joseph Smith, p. 205]. …

“Afai e i ai se taimi e te maua ai se uunaiga e fai se mea e te lagona ai le le nofo lelei, o se mea e te iloa i lou mafaufau e sese ma feteenai ma aoaoga faavae amiotonu, aua e te tali atu i ai!” (“Faaaliga a le Tagata Lava Ia: O Le Meaalofa o le Tofotofoga ma le Folafolaga,” Liahona, Ian. 1995, 61).

Mataupu Faavae ma Feagaiga 50:4–9. “O tagata taufaasese ma pepelo”

Sa lapataia e le Alii le Au Paia i Katelani e uiga i “tagata taufaasese ma pepelo” i totonu o tagata o le Ekalesia (MF&F 50:6). Na faamalamalama mai e Elder M. Russell Ballard o le Korama a Aposetolo e Toasefululua e tatau ona tatou nofouta i perofeta pepelo ma faiaoga pepelo:

“I le avea ai ma Aposetolo a le Alii o Iesu Keriso, o lo tatou tiute le avea ma leoleo o le olo, e lapatai atu i tagata o le Ekalesia e faaeteete i perofeta pepelo ma faiaoga pepelo o loo faatalitali e maileia ma faatamaia le faatuatua ma molimau. O le aso, matou te lapataia outou o loo i ai ni perofeta pepelo ma ni faiaoga pepelo ua tulai mai; ma afai tatou te le faaeteete, e oo lava ia i latou o tagata faamaoni o Le Ekalesia a Iesu Keriso o le Au Paia o Aso e Gata Ai, o le a afaina fua ai i lo latou taufaasese. …

“Pe a tatou mafaufau i perofeta pepelo ma faiaoga pepelo tatou te matele lava i le mafaufau ia i latou o e lagolagoina se aoaoga sese ua iloga mai pe taumateina foi le i ai o le pule e aoao atu ai le talalelei moni a Keriso pe tusa ai ma la latou faaliliuga. E masani ona tatou taumateina faapea o na ituaiga tagata e faifaimea faatasi ma ni vaega laiti matautia o loo i tuaoi o nuu. Ae peitai ou te toe tau atu:o loo iai perofeta pepelo ma faiaoga pepelo o e o loo faapea mai e auai i le Ekalesia. E iai i latou o e, e aunoa ma le pule, ua faapea mai ua faamaonia e le ekalesia a latou galuega ma faatinoga. Ia nofouta i ituaiga tagata faapea” (Ia Faaeteete i Perofeta Pepelo ma Faiaoga Pepelo,” Liahona, Ian. 2000, 62).

O nisi tagata o le ekalesia i Katelani sa faia e pei ua latou maua le mana faaleagaga po o le pule lea sa le i ai moni ia i latou. O lea, na faailoa mai ai e le Alii i latou o “tagata taufaasese ma le pepelo” (MF&F 50:6). Sa faauigaina mai eElder Joseph B. Wirthlin (1917–2008) o le Korama a Aposetolo e Toasefululua le pepelo ma uunaia i tatou ina ia aveesea mai o tatou olaga:

“O le pepelo … o le faafoliga sese lea o le amiomama po o le amiotonu ma faafoliga mai i se mea e le o ia i tatou. Afai tatou te iloa le mea sa’o ma tautino atu e ola ai i lena iloa, ae, o le mea moni, tatou te le o faia, o i tatou o ni tagata pepelo. Ua tausalaina e le Faaola le pepelo i se gagana e le mafaaseseina [tagai Mataio 23:27–28; MF&F 50:6, 8]. …

“O le a la le mea e tatau ona fai e le Au Paia o Aso e Gata Ai? E manino lava le tali. E tatau i le Au Paia ona matua aunoa ma se pona i itu uma o o latou olaga: i o latou fale ma aiga, valaauga o le Ekalesia, feutagaiga uma faapisinisi, ma, aemaise ai, vaega lilo ma patino faaletagata lava ia o o latou olaga lea e na o i latou ma le Alii e vaai i ai.

“Ou te fautuaina ia tatou vaavaai ifo i o tatou loto ma pe o mama a’ia’i o tatou faamoemoega ma taga fai ma e le faitioina ma vaai pe o tatou saoloto mai le pepelo ma le taufaasese (“Without Guile,” Liahona, Iulai 1988, 82).

Mataupu Faavae ma Feagaiga 50:10–36

Ua faatonuina e le Alii ia toeaina i le ala e iloatino ai agaga sese ma le Agaga o le Upumoni.

Mataupu Faavae ma Feagaiga 50:13–18. Aoao atu e ala i le Agaga o le Upumoni

Na faatagaina e tagata o le ekalesia i Katelani i latou lava e tosinaina e agaga sese, ia na afua ai le fenumiai. Na latou aveseseina ia amioga faalelotu uiga ese o ni faaalia a le Agaga Paia. Na faailoa mai e le Alii le matafaioi a le Agaga Paia o se “Faamafanafana” ma sa ta’ua mai ai o le Agaga Paia na “auina atu e aoao atu le upumoni” (MF&F 50:14) ae le faasalalauina le fenumiai. Na faamalamalama mai e le Alii na poloaiina toeaina o le Ekalesia e talai atu ma le Agaga le talalelei ma afai latou te taumafai e faia i se isi lava ala, o a latou aoaoga o le a le o le Atua (tagai MF&F 50:17–18). Na tuu mai e Peresitene Dallin H. Oaks o le Au Peresitene Sili ni faataitaiga o le aoao atu i ala e le mai le Agaga.

“Afai tatou te aoao atu i le ala na faatonu mai e le Alii, e mafai e Ia ona auina mai lona Agaga e faagaeetia ma faamalamalamaina i latou tatou te aoao atu. Afai tatou te le aoao atu i lana ala—afai tatou te aoao atu e tusa ai ma lo tatou lava iloa ma tusa ai ma lo tatou atamai, ma afai tatou te nonoa faatauasoina i tatou lava i a tatou lava tapenaga pe i le poto po o faaupuga a se isi tagata—o a tatou aoaoga ‘e le mai le Atua’ (MF&F 50:18]. …

“Afai tatou te faalagolago i auala faafelafolafoai po o metotia faalefaatauga po o vaega faasaikolosi, ua tatou talai atu le talalelei i se isi auala, ma e le mai le Atua. …

“O mea faaleatamai—iloiloga ma finauga—e mafai ona saunia ai le ala, ma e mafai ona fesoasoani ai ia i tatou i a tatou tapenapenaga. Ae afai e noatia i tatou i na mea ae le o le Agaga o le Alii, tatou te le o aoao atu le talalelei i le ala a le Alii” (“Aoao Atu ma Aoao Mai e ala i le Agaga,” Liahona, Me. 1999, 8–9).

o le faiaoga ma le tagata aoao i se potuaoga o le inisitituti — O i latou e tofia etalai atu le talalelei a Iesu Keriso e tatau ona aoao atu e ala i le Agaga o le upumoni (tagai MF&F 50:14,17).

Na faamatala e le Alii Lana talalelei “o le afioga o le upumoni” (MF&F 50:17), o le mea lea, o i latou o e talai atu le talalelei e tatau ona saili e faia “e ala i le Faamafanafana, i le Agaga o le upumoni” (MF&F 50:17). E tuu atu e le Agaga Paia le molimau i le upumoni a o aoaoina atu.Na faamalamalama mai e Elder L. Tom Perry (1922–2015) o le Korama a Aposetolo e Toasefululua le ala e mafai ai e i latou o e talai atu le talalelei ona agavaa mo lenei fesoasoani taua a le Agaga.

“O lo tatou avanoa le laumaua le i ai o le Agaga Paia, o se sui o le Aigaatua, e avea ma a tatou soa tumau, e faagaeetia ma musuia i tatou i a tatou tapenapenaga o ni faiaoga. E tatau ona tatou saunia i tatou lava e ala i le usiusitai i poloaiga a le Atua, ia malosi lo tatou talitonu mautinoa pe a tatou valaau atu i le Alii, ina ia faalautele e Lona Agaga i tatou a o tatou aoao atu. A tatou tuu atu i le Agaga e faatonutonu i tatou, ua tatou gafataulimaina ona aoao atu ma le mana tele. …

“O le a mataalia lo tatou aoao atu pe afai tatou te faia ma le lotomaualalo e ala i le tatalo ma le suesue. Ona fesoasoani mai lea o le Agaga ia i tatou i le faasafuaina atu o le upu, e ogatasi ma tusa ma le mea e finagalo le Alii tatou te aoao atu”(“Teach Them the Word of God with All Diligence,” Liahona, Iulai 1999, 8).

A aoao atu le talalelei i le Agaga, o i latou o e talia le afioga a le Alii e mafai ona faagaeetia ma fafagaina. Na aoao mai e Elder Jeffrey R. Holland o le Korama a Aposetolo e Toasefuluua le mafuaaga e tatau ai i faiaoga uma i le Ekalesia ona saili ia taialaina e le Agaga Paia.

“E lei tuuina mai lava e le Alii se fautuaga e sili ona faamamafaina nai lo le tatou aoao atu o le talalelei ‘e ala i le Agaga, le Faamafanafana lea na auina atu e talai atu le upumoni’ [MF&F 50:14]. …

“E leai se aoaoga faavavau e mafai ona tupu e aunoa ma lena segia o le Agaga mai le lagi. …

“O le mea lena e matua mananao i ai o tatou tagata pe a latou potopoto i se sauniga pe o mai foi i se potuaoga. O le toatele o tagata e le o mai i le lotu e saili na o nai mea moni o le talalelei, pe o mai e vaai ni uo ua leva, e ui lava e taua na mea uma e lua. Latou te o mai e saili se aafiaga faaleagaga. Latou te fia maua le filemu. Latou te mananao ia faamalosia lo latou faatuatua ma faafouina lo latou faamoemoe. Latou te mananao, i se otootoga, ia fafagaina i afioga a le Atua, ia faamalosia e mana o le lagi. O i tatou ua valaauina e lauga pe faiaoga pe taitai ua i ai se matafaioi e fesoasoani e saunia lena mea, i le lelei sili e mafai ona tatou faia ai” (“O Se Faiaoga Mai le Atua,” Liahona, Iulai 1998, 26).

Mataupu Faavae ma Feagaiga 50:19–22 Mauaina o le talalelei e ala i le Agaga o le Upumoni

O i latou o e faalogo i le talalelei a Iesu Keriso o talai atu e le Agaga o le Upumoni e maua le avanoa e lagona ai le Faamafanafana; e faagaeetia ai, ma talia ai le upumoni. A aoao atu e se tagata le upumoni e ala i le Agaga ma ua tatala mai e le tagata aoao ia ona mauaina e ala i le Agaga,”e faagaeetiaina maolioli faatasi i laua uma” (MF&F 50:22).

Ina ia maua e se tagata le savali o le talalelei pe a aoao atu e le Agaga Paia, e tatau ia te ia ona naunau ia tosinaina e le Agaga o le Upumoni. Na aoao mai eBrother A. Roger Merril, o se tasi na avea ma Peresitene Aoao o le Aoga Sa, le ala sili e mafai ai e i tatou ona maua pe aoaoina le talalelei e ala i le Agaga.

“E masani ona tatou taulai faalelei atu i le taua o le aoaoina e le Agaga. Ae moomia ona tatou manatua e tutusa foi le taua ua tuuina e le Alii, pe sili atu foi, i le taliaina e le Agaga. (Tagai i le MF&F 50:17–22.) …

“Ia tatou sauniga a le Ekalesia, ia tatou suesuega faaletagata ma faaleaiga o tusitusiga paia, ma … a o tatou faalogo atu i perofeta ma aposetolo a le Alii, o nisi o i tatou o le a tele atu mea o le taliaina nai lo isi. Aisea? Ua ou aoaoina e faapea o i latou o e taliaina moni e le itiiti ifo ma le tolu ni mea latou te faia, ia e le mafai ona fai e isi.

“Muamua, e latou te saili. Ua tatou ola nei i se lalolagi faafiafia, o se lalolagi o matamataga. E aunoa ma le iloa, e tatou te mauaina i tatou lava a o mai i le konafesi po o le alu i le lotu ma le uiga lea, ‘O lea ua ou i ai iinei; ia faagaeetia mai au.’ Ua tatou logonoa faaleagaga.

“A tatou taulai atu ae le sailia ma mauaina le Agaga, o le a tatou le popole e uiga i se faiaoga po o se failauga e taofia lo tatou mafaufau ma sili ona tatou popole i le tuuina atu o la tatou gauai i le Agaga. Manatua, mauaina o se veape. O se mataupu faavae o le faatino. O se faaaliga faavae o le faailoaina o le faatuatua.

“Lona lua, o i latou e mauaina e, lagonaina. E ui o faaaliga e oo mai i le mafaufau ma le loto, e masani lava ona lagonaina. E masani lava tatou te le iloaina le Agaga. … seiloga tatou te aoao e gauai atu i nei lagona faaleagaga.

“Lona tolu, o i latou o e taliaina e le Agaga e fuafua e faatino. E pei ona poloai mai le perofeta o Moronae, ina ia mauaina se molimau i le Tusi a Mamona, e tatau ona tatou ole atu ‘ma le manatu tonu i ai’ (Moronae 10:4). Ua aoao mai le Agaga pe afai e faamaoni lo tatou faamoemoe e faia se mea e uiga i mea na tatou aoaoina” (“Taliaina e le Agaga,” Ensign po o le Liahona, Nov. 2006, 93–94).

o tagata aoga i se potuaoga o le seminare — Ua i ai i e aoao le Talalelei se tiutetauave e aoao ai e ala i le Agaga o le upumoni (tagai MF&F 50:19–21).

Na aoao mai Elder Bruce R. McConkie (1915–1985) o le Korama a Aposetolo e Toasefululua le talafaatusa lea e fesoasoani ai i faiaoga ma tagata aoao ia malamalama i la latou matafaioi i le aoaoina o le talalelei: “O le tapuai moni, faamaoni, ma le loto, mai le Agaga, i se sauniga faamanatuga mo se faataitaiga, e sau pe a tautala se failauga e ala i le mana o le Agaga Paia, ma pe a faalogo le potopotoga e ala i le mana o le Agaga Paia.” Na faaauau e Elder McConkie i lona saunoa mai e faapea o le mea e masani ona tupu i a tatou sauniga faamanatuga o le, e o mai le potopotoga ua saunia faaleagaga i latou lava e aoao le talalelei, “ua naunau ia fafagaina. Latou te aumaia se sioki e kalone lona tele. E sau le failauga i lona poto faalelalolagi ma na te aumaia sina fagu laitiiti e paina ma na te liligi mai lana fagu paina ma gasese i totonu o le sioki e kalone. A le o lea, e pei ona tupu i nisi taimi, e aumai e le failauga lana feau mai le Alii ma e maua le Agaga ma sau ma se sioki e kalone e tuuina mai se savali, ae e leai ma se tagata i le potopotoga na aumaia se mea e tele atu i lo se iputi. Ona ia liligi mai lea o lana kalone o upumoni e faavavau ae na o sina mea itiiti e maua e tagata e na o sina iota o le galala e faavavau e faamalie ai, nai lo le mauaina o le savali tonu e faaaofia ai. E manaomia ai le faiaoga ma le tagata aoga, e manaomia ai le failauga ma le potopotoga, o i latou uma e soofaatasi i le faatuatua ina ia maua ai le talaiga po o le tulaga faafaiaoga e tatau ai” (“The Foolishness of Teaching” [address to Church Educational System religious educators, Sept. 18, 1981], 9–10).

Mataupu Faavae ma Feagaiga 50:2324. “O le mea ua le faagaeetia … o le pouliuli lea. O le mea e mai i le Atua o le malamalama lea”

O le pouliuli e faatusa i tosinga faatiapolo a le fili ma e faatusa i mea uma e le faagaeetia (tagai MF&F 50:23–24). Ua faamanatu mai e le Tusi a Mamona i le aufaitau e faapea o i latou o e “gauai atu i le tiapolo ma filifili galuega ole pouliuli nai lo le malamalama” ua tausalaina e “o ifo i lalo i seoli” (2 Nifae 26:10). A le usitaia e tagata ia poloaiga a le Atua, e punitia e a latou agasala le malamalama e sau mai le Agaga o le Alii ma latou iloa i latou lava ua “savavali i le pouliuli i le aoauli” (MF&F 95:6). Na aoao mai e Peresitene Iosefa Filitia Samita (1876–1972): “E leai se faaupuga o le upumoni e sili atu nai lo le ‘o mea e le faagaeetia e le mai le Atua.’ Ma o mea e le mai le Atua o le pouliuli lea, e le afaina po o fea e sau ai i foliga o se tapuaiga, talitonuga, filosofia po o faaaliga. E leai se faaaliga mai le Atua o le a le faagaeetia” (Church History and Modern Revelation [1953], 1:201–2).

atapue o se laoso — O i latou o e talia le malamalama o le Atua o le a tuuina atu i ai atili seia oo i le aso atoatoa (tagai MF&F 50:23–25).

I le taimi o Lana galuega i le tio nei, na fetalai ai le Faaola, “O le mulimuli mai ia te au, e le savali o ia i le pouliuli, a e ia te ia le malamalama o le ola” (Ioane 8:12; tagai foi MF&F 45:7). Oi latou o e mulimuli i le Alii “e maua atili le malamalama” lea e mafai ai e i latou ona “iloa le upumoni ma “tuliesea ai le pouliuli” (MF&F 50:24–25). Sa aoao mai Elder Robert D. Hales o le Korama a Aposetolo e Toasefululua:

“E aveese e le malamalama le pouliuli. A i ai le malamalama, e toilalo le pouliuli ma ua tatau ona aluese. O le mea e sili ona taua, e le mafai e le pouliuli ona manumalo i le malamalama vagana ua tuuitiitia le malamalama pe aluese. A i ai le malamalama faaleagaga o le Agaga Paia, e aluese le pouliuli o Satani. …

“… Afai tatou te tuu le malamalama o le Agaga e emo pe mou atu e ala i le le tausia o poloaiga pe o le le taumamafa i le faamanatuga po le tatalo pe suesue i tusitusiga paia, o le a mautinoa lava le sau i totonu o le pouliuli o le fili” (“Nai Le Pouliuli i Lona Lava Malamalama e Matua Ofo Ai,” Liahona, Iulai 2002, 70–71).

Mataupu Faavae ma Feagaiga 50:23–24. “O ia o lē e mauaina le malamalama, ma tumau pea i le Atua, e mauaina le malamalama atili”

O le talalelei a Iesu Keriso e saunia ai fanau a le Atua e atoatoa ai e ala i le faagasologa o le tuputupu ae faaleagaga. O i latou o e taumafai e mulimuli i le Alii ma maua se atoaga o Lona malamalama o le a iu lava ina atoatoa e faapei o Ia (tagai Moronae 10:32; MF&F 67:13). Na aoao mai le Perofeta o Iosefa Samita (1805–1844) i le mafuaaga e avea ai le mauaina o le malamalama ma mea e saunia ai i tatou e avea e faapei o le Atua: “Tatou te manatu o le Atua sa foafoaina le tagata ma le mafaufau e mafai ona faatonutonuina, ma le tomai faalemafaufau e mafai ai ona faateleina faatatau i le tulaga o le usitai ma le maelega e tuuina atu i le malamalama e fesootai mai le lagi i le manao le mafaufau; ma o le a mafai ona latalata atili o le tagata i le atoatoa, o le manino tele foi lea o ona manatu, ma faateleina foi lona fiafia, seia ona faatoilaloina le leaga o lona olaga ma aveesea uma naunauga i le agasala, ma faapei ai o e faamaoni anamua ua taunuu atu i le vaega o le faatuatua ua fusia ai o ia i le mana ma le mamalu o Le na faia o ia, ma aveina atu ai i luga e mau ma Ia. Ae ua tatou manatu o se nofoaga lea e lei mafai lava e se tagata ona oo atu i ai i se taimi vave” (Aoaoga a Peresitene o le Ekalesia: Iosefa Samita [2007), 210–11).

O le mauaina o le malamalama faaleagaga o le faagasologa lea o le mauaina o le iloa faaleagaga ma tuputupu ae ai i le amiotonu patino. Sa faamalamalama mai e Elder Dieter F. Uchtdorf o le Korama a Aposetolo e Toasefululua le ala e faamalolosia ai taumafaiga e maua le malamalama ma faamanino mai ai se molimau patino i le upumoni.

“O le faateleina o le liliu atu o o tatou loto ma mafaufau i le Atua, o le faateleina foi lena o le malamalama faalelagi e oo mai i o tatou agaga. Ma o taimi uma tatou te saili atu ai ma le naunautai ma le faamaoni i lena malamalama, tatou te faailoa atu i le Atua lo tatou saunia e maua atili le malamalama. E faasolosolo lava, o mea sa foliga mai e faanenefu, pogisa, ma mamao ese o le a oo ina manino, malamalama, ma tatou masani ai.

“I lea lagona e tasi, afai tatou te aveesea i tatou lava mai le malamalama o le talalelei, o le a amata ona muitiiti lo tatou lava malamalama—e le i se aso se tasi po o se vaiaso ae e faasolosolo lava i le aluga o le taimi—seia oo ina tatou toe tepa i tua ma tatou le malamalama tonu ai pe aisea na tatou talitonu ai e moni le talalelei. O lo tatou malamalama sa i ai muamua atonu ua foliga mai ua faavalevalea ia i tatou ona o mea sa matuai manino muamua ua toe puaoa, faanenefu, ma ua mamao ese atu. …

O la’u molimau ia maua uma e fanau a le Atua lenei malamalama faaleagaga. O le a faamalamalamaina ai lou mafaufau ma aumai ai le faamalologa i lou loto ma le olioli i ou aso. Au uo pele, faamolemole aua nei faatuai le taimi e te saili atu ai ma faamalosia lau lava molimau e uiga i le galuega paia a le Atua, le galuega o le malamalama ma le upumoni.

“O lau molimau patino i le malamalama ma le upumoni o le a le gata ina faamanuiaina ai oe ma au fanau i le olaga nei, ae ole a e alu faatasi ma oe i le faavavau atoa, i lalolagi e leai se gataaga” (“Mauaina O Se Molimau o le Malamalama ma le Upumoni,” Ensign or Liahona, Nov. 2014, 22–23).

Mataupu Faavae ma Feagaiga 50:26–30. “O le a tuu atu ia te outou mea tou te ole mai ai”

Ua i ai i auauna a le Alii le aia tatau mo mana faalelagi e fesoasoani ai ia te i latou ia ausia mea uma o loo Ia manaomia. O lenei fesoasoani faalelagi e na o i latou o e ua “taumama ma ua faamamaina mai agasala uma” e tuu atu i ai (MF&F 50:28). Na faamalamalama mai e Elder Richard G. Scott (1928–2015) o le Korama a Aposetolo e Toasefululua le mafuaaga e tatau ai ona faamamaina a tatou taumafaiga mai le agasala e sauni aai i tatou ia maua tali i a tatou tatalo:

“E leai se tasi e faamoemoe e maua se taunuuga mai tulafono faaletino e aunoa ma le usitaia. E faapena foi le tulafono faaleagaga. Po o le a lo tatou mananao i se fesoasoani, e tatau lava ona tatou faamoemoe e mulimuli i le tulafono faaleagaga lea e faafoeina lena fesoasoani. E le o se mealilo le tulafono faaleagaga. O se mea e mafai ona tatou malamalama ai.

“Ua i ai i le Alii le mana e faamanuia ai i tatou i soo se taimi. Ae ua tatou iloa ina ia faalagolago atu i Lona fesoasoani, e tatau ona tatou usiusitai pea lava pea i Ana poloaiga. …

“Afai ua taʼumama ma faamamaina outou mai agasala uma, soo se mea tou te ole atu ai i le suafa o Iesu o le a faia lava. Ae ia outou iloa le mea lenei, o le a tuu atu ia te outou mea tou te ole mai ai.’ (MF&F 50:29–30; ua faaopoopo le faatusilima.) …

“O a tatou tatalo faamaoni e tali mai pe a ogatusa ma le finagalo o le Alii. Talu ai e le mafai ona tatou malamalama atoatoa i Lona finagalo, ua tatau ai ona tatou savavali ma le faatuatua. E silafia e Ia mea uma ma e atoatoa foi Ana faaiuga. O le mea moni e faapea olo tatou gafatia utiuti e le mafai ai ona tatou malamalama i Ana fegalegaleaiga uma ma le tagata e le faatuaoia ai foi o Ia mai le faamanuiaina o i tatou. O Lona finagalo o la tatou filifiliga aupito sili lea i le olaga, pe tatou te malamalama atoa i ai pe leai foi. A tatou galulue e faaaoga ai ma le poto lo tatou saolotoga e filifili ai, o le a galue foi le Alii e tusa ai ma Lona finagalo.

“Ua tatou vaai i lena vaega utiuti o le fuafuaga e faavavau ua Ia mamanuina mo i tatou taitoatasi. Faalagolago ia te Ia, tusa lava pe i le vaaiga e faavavau e matua tiga lava mo na o sina taimi e le tumau.i Ia onosai pe a fai atu ia te oe e faatali pe a e manao ia tino vave mai. Atonu e fesili atu ia te oe e faia ni mea e matua faasagatau malosi i lou manao. Faaaoga le faatuatua ma faapea atu, Ia faia Lou finagalo. O na ituaiga o aafiaga, e taulimaina ma le mamalu, e saunia ai oe ma faatulagaina oe mo faamanuiaga e sili atu e oo mai. I le avea ai ma ou Tama, o Lona faamoemoega o lou fiafia e faavavau, o lou atiina ae pea lava, o lou gafatia faateleina. O Lona finagalo ia faasoa atu ia te oe mea uma ua ia te Ia” (“Obtaining Help from the Lord,” Liahona, Ian. 1992, 84, 86).

Na faamalamalama mai e Peresitene Marion G. Romney (1897–1988) o le Au Peresitene Sili le ala e mafai ai ona agaigai i luma a tatou tatalo i le tulaga e faailoa atu ai le finagalo o le Atua: “O le a oo mai le taimi tatou te iloa ai le finagalo o le Atua ae tatou te lei ole atu. Ona ‘tatau ai’ lea o mea uma tatou te ole atu ai [MF&F 88:64]. O mea uma tatou te ole atu ai o le a ‘sa’o’ [3 NIfae 18:20]. O le a tupu lena mea o se taunuuga o leola amiotonu, o le a tatou matua olioli lava i le mafutaga mai o le agaga o le a ia ta’u mai ia i tatou mea tatou te ole atu ai” (i le Conference Report, Oct. 1944, 56).

Mataupu Faavae ma Feagaiga 50:31–35. “O le mana e faatoilalo ai mea uma e le faauuina e ia”

E pei ona tusia i le Mataupu Faavae ma Feagaiga 50:31–35, ua tuuina mai e le Alii i Ana auauna le mana e iloatino ai le eseesega o agaga sese ma meaalofa moni faaleagaga ma faaaliga mai le Atua. Faatasi ai ma lenei mana, e tatau i taitai perisitua ona faailoa mai pe faasilasila mai foi pe a latou iloa se agaga sese po o se agaga pogisa, ae e le tatau ona latou talasua i lea tomai ina nei faaseseina i latou lava.

Mataupu Faavae ma Feagaiga 50:37–46

Ua valaauina e le Alii Ana auauna e faamalolosia le Ekalesia ma ua folafola atu o le a faatasi ma i latou

O Le Leoleo Mamoe Lelei, saunia e Del Parson — *O Le Leoleo Mamoe Lelei,* saunia e Del Parson “O au o le leoleo mamoe lelei” (MF&F 50:40--46.

Mataupu Faavae ma Feagaiga 50:40–46. “E le mafai ona outou gafatia mea uma i le taimi nei; e ao ina outou tuputupu ae”

Na fetalai le Alii e faapea o toeaina o le Ekalesia sa pei o “ni fanau laiti” i lo latou iloa i le talalelei, ae sa Ia folafola atu afai latou te talia o Ia o le a latou “tuputupu ae i le malosi faaleagaga ma i le malamalama o le upumoni” (MF&F 50:40) ma o le a i ai se aso o le a tasi ai ma le Tama ma le Alo (tagai MF&F 50:43). Na faamanatu mai e Elder Neal A. Maxwell (1926–2004) o le Korama a Aposetolo e Toasefululua i le Au Paia e aua le lotovaivai i le telegese o le tuputupu ae faaleagaga:

O le tuputupu ae malie e le gata ina talia lelei e le Alii ae ua Ia fautuaina foi. Fai mai tautinoga faalelagi: “O outou o ni fanau laiti, ma e le mafai onaoutou gafatia mea uma i le taimi nei’ (MF&F 50:40); ‘O le a ou taitai outou i le ala’ (MF&F 78:18). E pei lava ona masani ai ona tulai mai le faailoaga mai le lagi i lea fuaiupu ma lea fuaiupu, o lea mataupu ma lea mataupu, o si mea itiiti i i ma si mea itiiti i o, e faapena foi ona tatou ausia malie lo tatou alualu i luma faaleagaga (tagai MF&F 128:21; 98:12).

“Nai lo le vaaia o i tatou lava o toilalo ona tatou te le atoatoa i se taimi vave, e pei o le uiga faaleatua o le alofa mutimutivale, e tatau ona tatou saili ia atili alofa mutimutivale ‘i le gasologa o taimi.’ E oo lava i totonu o le filiga, e tatau lava ona leai ni faamoemoega e le tinoa. E ui ina le atoatoa, o se tagata ua faaleleia atili e mafai lava ona iloa o le auala o lona olaga e talia lava e le Alii tusa lava pe tele se va e tatau ona ausia (Men and Women of Christ [1991], 23)