Inisitituti
Mataupu 17: Mataupu Faavae ma Feagaiga 43–45

Mataupu 17

Mataupu Faavae ma Feagaiga 43–45

Faatomuaga ma le Faasologa o Taimi

Ina ua taunuu Iosefa Samita i Katelani, Ohaio, ia Fepuari 1831, sa ia maua atu nisi o tagata liliu mai ua taitaisese e lagona malolosi faalelotu ma faaaliga taufaasese. Fai mai nisi ua latou maua faaaliga, e aofia ai se fafine e igoa ia Mrs. Hubble o le sa ia ta’ua o ia lava o se perofeta fafine. Talu ai sa ia faaseseina nisi o le Au Paia, o lea sa tatalo ai le Perofeta o Iosefa Samita e uiga i le faafitauli ma sa ia maua ai le faaaliga o loo tusia i le Mataupu Faavae ma Feagaiga 43. I lea faaaliga na aumaia ai e le Alii ia upumoni na faamanatu atu ai i le Au Paia le mamanu a le Atua mo le aumaia o faaaliga i le Ekalesia.

Sa valaauina talu ai e le Alii ia toeaiina o le Ekalesia e folafola atu le talalelei (tagai MF&F 42:4–8). E lei leva talu ona tuuina mai lena poloaiga, ae tuu mai e le Alii se faaaliga o loo tusia nei i le Mataupu Faavae ma Feagaiga 44, e faatonuina ai toeaina e tapenapena mo se konafesi. Sa folafola atu e le Alii ia i latou afai latou te faaaogaina le faatuatua ia te Ia, o le a latou maua Lona Agaga i luga o i latou ma faatoilalo ai o latou fili.

A o tuputupu ae le Ekalesia i Katelani, sa faateleina le inaina i le Ekalesia. Sa osofaia e le aufaitio le Ekalesia i nusipepa ma faia isi taumafaiga e tetee ai i le Au Paia. Ia Mati 1831, i le taimi lea o le tetee, sa maua mai ai e le Perofeta o Iosefa Samita le faaaliga o loo tusia i le Mataupu Faavae ma Feagaiga 45. I lea faaaliga na faamatala mai ai e le Alii ia aso e gata ai, o le Afio Mai Faalua o Iesu Keriso, ma le Ierusalema Fou, po o Siona.

Novema 1830–February 1831Ina ua tuua faifeautalai, sa fai mai nisi o le au liliu fou mai i Katelani, Ohaio ua latou maua ni tusi po o ni tusiga mai le lagi.

Amataga o le 1831Sa alia’e mai lipoti sese e uiga i le Au Paia ma o latou talitonuga i nusipepa i Ohaio, e pei o le Painesville Telegraph.

Fepuari 1831Sa fai mai “Mrs. Hubble,” o se tagata faatoa liliu mai i Ohaio, o ia o se perofeta fafine a le Alii.

Fepuari 1831Na maua mai ai le Mataupu Faavae ma Feagaiga 43..

Fepuari 1831Na maua mai ai le Mataupu Faavae ma Feagaiga 44..

7 Mati, 1831Na maua mai ai le Mataupu Faavae ma Feagaiga 45..

Amataga o Iuni 1831Na faia ai se konafesi a le Ekalesia i Katelani, Ohaio.

Mataupu Faavae ma Feagaiga 43: Talaaga Faasolopito Faaopoopo

Ina ua taunuu atu Ioane Uitimera i Katelani, Ohaio, ia Ianuari 1831, sa ia maua atu nisi o tagata faatoa liliu mai iina ua faaseseina e nisi ua fai mai ua latou maua ni fesootaiga uiga ese ma le malie mai le lagi. O nei faaaliga taufaasese e faapea na alia’e mai o ni “tusiga i tua o le faavaa o le Tusi Paia, ma pa’ulaau, ia na faalele i le ea, ma sa i luga o o latou tualima, ma le mau mea valea ma e le aoga” (i le The Joseph Smith Papers, Documents, Volume 1: July 1828–June 1831, ed. Michael Hubbard MacKay and others [2013], 256).

Na faateteleina atugaluga ina ua “sau [se fafine e igoa ia Mrs.Hubble] ma le maemaea tele e faaalia mai poloaiga, tulafono ma isi mea uigaese” (Joseph Smith, in Manuscript History of the Church, vol. A-1, page 101, josephsmithpapers.org). Na ta’ua e Ioane Uitimera, o le tusitalafaasolopito o le Ekalesia i lena taimi e faapea, o le tosinaga a lenei fafine na taitai ese atu ai nisi o tagata o le Ekalesia: “E uiga i nei aso, sa i ai se fafine e igoa ia Hubble o le sa fai mai o ia o se perofeta fafine a le Alii, ma sa ia tautino mai e tele ana faaaliga, ma sa ia iloa e moni le Tusi a Mamona; ma [sa ia talitonu] e tatau ona avea o ia o se faiaoga i le Ekalesia a Keriso. Sa foliga mai o ia [e] ese le paia ma sa faaseseina ai nisi o e sa le mafai ona iloaina lona pepelo” (i le The Joseph Smith Papers, Histories, Volume 2: Assigned Histories, 1831–1847, ed. Karen Lynn Davidson and others [2012], 29; ua faalaugatasia le sipelaga, mataitusi tetele, ma faailoga; tagai foi The Joseph Smith Papers, Documents, Volume 1: July 1828–June 1831, 257, note 95).

O taga na faia e lenei fafine na oo mai o se luitau i le aoaoga faavae na faaalia mai e le Alii i le Ekalesia i Feiete, Niu Ioka, i ni nai masina na muamua atu. O le Perofeta o Iosefa Samita sa na o ia le tagata e mafai ona “mauaina poloaiga ma faaaliga” mo le Ekalesia (MF&F 28:2). Peitai, e i ai ni nai Au Paia mai Niu Ioka sa iloaina lenei faaaliga talu ai ae lei taunuu mai i Katelani, ma e lei lolomiina foi se tasi o faaaliga talu ai. O tagata o le Au Paia i Katelani o ni tagata faatoa liliu mai, ma sa tele ina latou le iloa le faatulagaga paia ua atofaina mo le faaalia mai o Lona finagalo i Lana Ekalesia. O lea, na fesili ai le Perofeta i le Alii e faatatau i le mataupu ma sa ia maua ai se faaaliga ina “ia le mafai ai ona faaseseina ‘le Au Paia]” (MF&F 43:6).

Faafanua 5: O Eria o Niu Ioka, Penisilevania, ma Ohaio o le Iunaite Setete.

Mataupu Faavae ma Feagaiga 43:1–7

Ua tautino mai e le Alii o faaaliga ma poloaiga e na o Lana perofeta filifilia lava e ala mai ai

Mataupu Faavae ma Feagaiga 43:2–7. O faaaliga mo le Ekalesia e maua mai e ala i le perofeta soifua.

I le tali atu i le fesili a le Perofeta e uiga ia Mrs.Hubble ma isi faaaliga sese na tutupu i Katelani, Ohaio, na faatonuina ai e le Alii le Au Paia e faapea “e leai se isi e ese mai ua tofia atu ia te outou na te mauaina poloaiga ma faaaliga” nai lo le Peresitene o le Ekalesia (MF&F 43:3). Na faamalamalama mai e Peresitene J. Reuben Clark Jr. (1871–1961) o le Au Peresitene Sili le mea lenei:

“Ua i ai i le Peresitene o le Ekalesia se … faamanuiaga faapitoa faaleagaga … , aua o ia o le Perofeta, Tagatavaai, ma Talifaaaliga mo le Ekalesia atoa.

“O i e tatau ona teu i mafaufau—e tatau ona iloa—e na o le Peresitene o le Ekalesia, le Faitaulaga Sili Pulefaamalumalu, … e i ai le aia tatau e maua ai faaaliga mo le Ekalesia, pe fou pe toe suia, pe tuu mai foi faaliliuga faalepulega o tusitusiga paia ia e tamau i luga o le Ekalesia, pe suia i soo se itu ia aoaoga faavae o i ai nei a le Ekalesia. Ua na o ia lava le fofoga taumomoli o le Atua i le lalolagi mo Le Ekalesia a Iesu Keriso o le Au Paia o Aso e Gata Ai, le Ekalesia moni e tasi. Ua na o ia lava e mafai ona tautino atua le mafaufau ma le finagalo o le Atua i lona nuu” (“When Are the Writings and Sermons of Church Leaders Entitled to the Claim of Scripture?” [lauga i le Church Educational System religious educators, July 7, 1954], 6, emp.byui.edu/marrottr/ClarkWhenAreWritings.pdf).

ata o le Perofeta o Iosefa Samita o loo tatalo

O faaaliga ma poloaiga mo le Ekalesia e na o le auauna lava ua tofia e le Alii e auala mai ai (tagai MF&F 43:2–7).

E i ai tulafono e pulea ai le faatulagaga e maua ai faaaliga i le Ekalesia. O le Mataupu Faavae ma Feagaiga 43 o loo faapupula mai ai e faapea e ui ina mafai e tagata taitoatasi ma tatau ona maua faaaliga patino (tagai MF&F 43:16), e i ai le faatulagaga tatau i le ala e tuuina mai ai faaaliga mo le Ekalesia atoa. Sa aotele mai e Peresitene James E. Faust (1920–2007) o le Au Peresitene Sili ia upumoni faavae e lima e faatatau i le ala e faaalia mai ai e le Atua le upumoni i Lana Ekalesia.

“Muamua, o ki ma le pule a le Atua ua tuuina mai e Ia ia Iosefa Samita ma i latou taitoatasi e suitulaga ia te ia, o e ua valaauina e avea ma Peresitene o le Ekalesia.

“Lona lua, o na ki ma le pule e le tuuina atu lava i nisi tagata, ma o i latou ua i ai lena pule ua ‘lauiloa i le Ekalesia’ [MF&F 42:11].

“Lona tolu, o faaaliga faifai pea ma le taitaiga mo le Ekalesia e ala mai i le Peresitene o le Ekalesia, ma o le a ia le taitaiseseina lava le Au Paia.

“Lona fa, o tagata taitoatasi o le Ekalesia e mafai ona maua faaaliga mo o latou lava valaauga ma vaega o o latou tiutetauave ma mo o latou lava aiga. E le mafai ona latou maua ni faatonuga faaleagaga mo i latou e maualuga atu i le pule.

“Lona lima, o i latou e fai mai latou te maua faaaliga mai le Atua mo le Ekalesia i tua atu o le faatulagaga tatau ua faatuina ma le ala o le perisitua, ua taialaseseina. E faatatau foi lenei mea i soo se tasi o e mulimuli ia i latou” (“O Le Leo FaaPerofeta,” Liahona, Iulai 1996, 7).

Mataupu Faavae ma Feagaiga 43:4. “O le a leai se mana e ia te ia na o le tofia o se isi tagata i lona tulaga”

O faatonuga a le Alii e faatatau i le faatulagaga tatau o faaaliga i le Ekalesia e aofia ai le tuutuuga e faapea tusa lava pe aveesea ia Iosefa Samita le avanoa o le avea ma perofeta a le Atua, o le a ia te ia pea le mana e tofi ai se isi e fai ma se ua faatagaina ona suitulaga. Sa faamalamalama e Peresitene George Q. Cannon (1827–1901) o le Au Peresitene Sili le tulaga faapitoa lenei: “Ina ua fetalai le Alii ia Iosefa e uiga i le pau, na ia fetalai o le a ia te ia le pule e tofia ai se tasi i lona tulaga [tagai MF&F 43:4], ma e leai lava se tasi o le a i ai le aia tatau e galue ai vagana ua faauuina o ia e ala i le pule, pe sau foi i totonu i le faitotoa [tagai MF&F 43:7]. E mafai ona e iloa e ala i le faaaliga sa ou faitauina e faapea e leai se tagata e mafai ona maua le pule i se isi lava mea. E tatau lava ona sau e ala mai i le Perisitua paia. Atonu e fai mai tagata sa latou faalogo i le siufofoga o Iesu, pe faalogo i le mea lea, o lena po o se isi, ae o le a e iloaina o le mana o le Atua o le a i ai i ki [o le perisitua], ma o Ana faamanuiaga o le a mulimuli i le taitaiga a Ana auauna o e umia le pule” (“Discourse by Elder Geo. Q. Cannon,“ Deseret News, Dec. 15, 1869, 532).

Mataupu Faavae ma Feagaiga 43:7. “Sau i totonu e ala mai i le faitotoa ma faauuina”

Soo se fesili pe o ai na filifilia e le Alii e taitai Lona nuu ua manino ona taliina i tusitusiga paia. Na aoao mai le Faaola:

“O le le ui atu i le faitotoa i totonu o le lotoa mamoe, a e alu ae i ai i se tasi mea, o le gaoi lea ma le fao mea.

“A o le ui atu i le faitotoa, o le leoleo mamoe lava lea” (Ioane 10:1–2).

E mafai e tagata o le Ekalesia ona mautinoa e leai se taitai o le a tulai ae e ala mai i tulaga e le masani ai pe o se faauuga faalilolilo, aua ua folafola mai le Alii o taitai perisitua o le “a faauuina o ia e se tasi ua i ai le pule, ma ua lauiloa i le ekalesia ua ia te ia le pule ma ua faauuina o ia i le ala e tatau ai e ao o le ekalesia” (MF&F 42:11).

E tatau i tagata o le Ekalesia ona nofouta ia i latou o e fai mai ua ia i latou le pule faapitoa po o le faauuga e taitai ai fanau a le Atua. Na lapatai mai Peresitene James E. Faust:

“Mai le amataga sa i ai nisi mai totonu ma fafo atu o le Ekalesia sa saili e faatauanau ia tagata o le Ekalesia ia aua nei mulimuli i tautinoga musuia a i latou o e sa umia ki o le malo o le Atua i le lalolagi. O nisi o i latou sa saili e taitaisese sa latou faia ma ua fai mai ua ia i latou faamanuiaga faapitoa o le atamai po o musumusuga i luga atu o le faatulagaga tatau ua faavaeina o le Ekalesia. …

“Na faamalamalama mai e le Perofeta o Iosefa o le taumalulu o le 1832–33 e faapea ‘e leai se agelu moni mai le Atua o le a sau e faauu se tagata, aua ua uma ona auina mai i latou e faavae le perisitua e ala i le faauuina o au i ai, ma ua toe faatuina le perisitua i le lalolagi, faatasi ai ma [le] mana e faauu ai isi, e leai lava se avefeau mai le lagi o le a toe sau e faalavelave i lena mana e ala i le toe faauuina o nisi. … O le mea la lea ia outou iloa, mai lenei taimi agai atu i luma, afai e i ai soo se tagata e sau ia te outou ma faapea mai na faauuina e se agelu, a le o se tagata pepelo o lona uiga ua faafoliga i ai o se taunuuga o le solitulafono e se agelu a le tiapolo, aua o lenei perisitua, o le a le mafai lava ona aveesea mai lenei ekalesia’ [Orson Hyde, ‘Although Dead, Yet He Speaketh,’ Millennial Star, Nov. 20, 1846, 139]” (“The Prophetic Voice,” 5, 7).

Mataupu Faavae ma Feagaiga 43:8–16

O se poloaiga e aoao ma faagaeetia le tasi i le isi

Mataupu Faavae ma Feagaiga 43:8–11. “Ia outou fusia faatasi ai outou lava ia outou faia ma le paia atoatoa i o’u luma”

Pe a potopoto tagata o le Ekalesia e “aoao ma faagaeetia le tasi i le isi” (MF&F 43:8), latou te mulimuli i se mamanu ua tofia mai le lagi i le aoao atu ma le aoaoina mai o upumoni o le talalelei. O aoaoga o le talalelei e saunia ai fanau a le Atua ia faapaiaina a o latou galulue i mea sa latou aoaoina. E le lava le na ona maua mai o se malamalama i mea faaleagaga. O i latou o e maua le talalelei a Iesu Keriso e osia feagaiga e “fusia ai [i latou] e faia ma le paia atoatoa i luma [o le Atua]” (MF&F 43:9).

O konafesi aoao, e faia taifaalua i le tausaga, e maua ai se avanoa taua mo tagata o le Ekalesia e maua aoaoga o le talalelei. Na faamalamalama mai e Elder Paul V. Johnson o le Fitugafulu le mafuaaga e le lava ai le na ona faalogologo i savali e tuuina mai i le konafesi aoao. “Ina ia suia e savali o le konafesi o tatou olaga, e tatau ona tatou naunau e mulimuli i fautuaga tatou te faalogo i ai. Na faamalamalama mai e le Alii i se faaaliga na tuuina atu i le perofeta o Iosefa Samita ‘pe a outou potopoto faatasi ia outou aoao atu ma fefaamalamalamaa’i le tasi i le tasi, ina ia outou iloa ai … le ala e tausi ai vaega o la’u tulafono ma poloaiga’ [MF&F 43:8]. Ae o le ‘iloa o le ala e tausi ai’ ua le lava lea. Na fetalai mai le Alii i le isi fuaiupu, ‘Tou te fusia faatasi ai outou lava ia faia mea uma i le paia atoatoa i o’u luma’ [MF&F 43:9]. O lea naunautaiga e faatino mea sa tatou aoaoina, e tatala ai faitotoa mo faamanuiaga ofoofogia” (“O Faamanuiaga O Le Konafesi,” Ensign po o le Liahona, Nov. 2005, 52).

E le gata i le faasino atu i lo tatou tiutetauave patino e galulue i tulafono ma poloaiga tatou te maua mai le Alii, ae ua fautua mai foi le Mataupu Faavae ma Feagaiga 43:8–9 e faapea a o tatou faapotopoto faatasi ina ia aoaoina ma faagaeetiaina e le talalelei, ua tatou fusia faatasi i tatou o se tino o le Au Paia. Sa faamalamalama mai e Peresitene Lorenzo Snow (1814–1901):

“E tatau ona tatou malamalama e tatau ona tatou galulue i luga o mataupu faavae patino ia e mafai ai ona fusia faatasi i tatou lava o se nuu, e fusia faatasi o tatou lagona ina ia mafai ai ona tasi i tatou, ma e le mafai lava ona faataunuuina lenei mea sei vagana ai ua faia ni mea patino, ma mea e manaomia ai le faia o la tatou vaega.

“Mata e faapefea ona e alu e te galue e fusia faatasi outou lava? “Mata e faapefea e se alii ona alu e galue ina ia tuufaatasia o ia lava ma lona tuaoi? Afai e faipaaga ni alii se toalua e lei masani muamua, mata e faapefea ona la galulue e faamautu le faigauo o le tasi ma le isi, fesootaiga ma le faamemelo o le tasi i le isi? Aisea o le a tatau ai ona faia o se mea, ma e le faia na o le itu e tasi, ae e tatau ona faia e le tasi faapea foi le isi. O le a le taliina mo le tasi na te faia na o ia le pisinisi, e le mafai foi e le tasi ona tali na lagona ma faia le galuega e ia lava, ae ina ia tasi i o la faamoemoega ma faanaunauga—e manaomia le faatinoga a i la’ua uma” (Aoaoga a Peresitene o le Ekalesia: Lorenzo Snow [2012] 198–99).

Mataupu Faavae ma Feagaiga 43:12–14. Lagolagoina o le perofeta e ala i le faatuatua ma tatalo

E pei ona tusia i le Mataupu Faavae ma Feagaiga 43:12–14, na ta’u atu ai e le Alii i le Au Paia e mafai ona latou lagolagoina le Perofeta o Iosefa Samita e ala i le faatuatua ma tatalo faapea foi lo latou tuuina atu mo mea o moomia faaletino e le aiga. Sa tuuto atu e le Perofeta lana gauai atoa i le taitaiga ma mataupu faaleagaga a le Ekalesia. O le tuuina atu o le lagolago ia te ia e ala i mea faaletino o le a taunuu i faamanuiaga mo tagata o le Ekalesia, e aofia ai le malamalama faaleaoaoga faavae e maua mai le faaliliuga musuia o le Tusi Paia.

Mataupu Faavae ma Feagaiga 43:17–35

E tatau i auauna a le Atua ona talai atu le salamo e sauniuni ai mo le Afio Mai Faalua ma le Meleniuma

Mataupu Faavae ma Feagaiga 43:17–28. O Leo o le Lapataiga

“O le aso sili o le Alii” (MF&F 43:17) e faasino i le Afio Mai Faalua o Iesu Keriso ma le amataga o le Meleniuma. Na poloaiina e le Atua Ana auauna e folafola atu le salamo e puipuia ai Ana fanau mai le faataumaoia e le amioleaga pe a toe foi mai le Faaola. E ui o le a uai atu nisi ma salamo, ae o le a le amanaiaina e isi ma teena le leo o auauna a le Alii. O le mea lea, e sii ae ai e le Alii le leo o le lapataiga ia salamo i auala eseese: O Ana auauna, o le auaunaga a agelu, o Lona lava siufofoga, ma e oo lava i le mana faatafuna o le natura.

Mataupu Faavae ma Feagaiga 43:29–33. O le Meleniuma tele

“O le Meleniuma tele” (MF&F 43:30) e faasino i le 1,000 tausaga lea e faafeao mai e le Afio Mai Faalua o le Faaola (tagai Faaaliga 20:4; MF&F 29:11). I le taimi o le Meleniuma, ‘o le a nofotupu lava Keriso i le lalolagi’ (Mataupu Faavae o le Faatuatua 1:10). Ua faamautinoa mai e le Alii i e amiotonu o le a latou nofotupu faatasi ma Ia i le taimi o le Meleniuma (tagai MF&F 43:29). O le a saisaitia Satani i le taimi o le Meleniuma ma o le a leai sona mana e faaosooso ai i latou o e ola i lena taimi (tagai MF&F 43:31; 101:28).

Na tomanatu Peresitene Gordon B. Hinckley (1910–2008) i faamanuiaga o le a olioli ai pe a saisaitia Satani: “Ona amata ai lea o le vaitau o le Meleniuma tele (MF&F 43:30) o le afe tausaga o le a saisaitia ai Satani ma o le a nofotupu le Alii i ona tagata. Mata e mafai ona outou vaai faalemafaufau i le ofoofogia ma le matagofie o lena vaitau o le a leai ai se tosinaga a le fili? Mafaufau i lenei tosinaga i o outou luga ma manatunatu i le toafilemu o lena taimi o le a outou saoloto ai mai na tosinaga. O le a i ai le toafilemu ma le agalelei i mea o i ai nei le fefinauai ma mea leaga” (“E le Tatau Ona Tatou Matatau i Lona Afio Mai,” Liahona, Oketopa 1982, 3).

Mataupu Faavae ma Feagaiga 44: Talaaga Faasolopito Faaopoopo

E lei leva ona taunuu i Katelani, Ohaio, ae maua e le Perofeta o Iosefa Samita ia faaaliga o loo tusia i le Mataupu Faavae ma Feagaiga 42, lea o loo aotele mai ai tulafono e taiala ai le Ekalesia. Sa aofia mai ai le poloaiga e faapea e tatau i toeaina ona “o atu i le mana o lo’u Agaga, ma talai atu la’u talalelei, taitoalua. … Ma mai i lenei nofoaga, ia outou o atu ai” (MF&F 42:6, 8). O le faaaliga o loo tusia i le Mataupu Faavae ma Feagaiga 44 na valaauina ai toeaina o le Ekalesia ina ia faapotopoto faatasi a o lei o atu e talai le talalelei.

Sa galue le Perofeta o Iosefa Samita i luga o lena faatonuga ma auina atu se tusi i le aso 22 Fepuari, 1831 ia Matini Harisi, o le sa nofo ai lava i Niu Ioka. Sa ta’ua e le Perofeta le faaaliga ina ua ia faamalamalama atu ia Matini e faapea “ua i ai le galuega iinei ma ua agai atu i sasae, sisifo, matu, ma saute; ma o le a e logoina foi Toeaina o loo i ai iina e faapea o i latou uma o e mafai ona avanoa o le a o mai iinei e aunoa ma se faatuai pe a mafai, o le Poloaiga lea a le Alii aua ua ia te ia se galuega tele mo i latou uma” (i le The Joseph Smith Papers, Documents, Volume 1: July 1828–June 1831, 263; ua faalaugatasia ia faailoga ma sipelaga).

I vaiaso na sosoo ai i le taimi o le tautotogo o le 1831, o le toatele o le Au Paia mai Niu Ioka sa faapotopoto i Katelani, Ohaio. O le konafesi lona fa a le Ekalesia sa faia ia Iuni 1831, ma e toatele toeaina na auai i sauniga o lenei konafesi, lea sa saunia ai i latou e tuua pe a uma e talai atu le talalelei.

Mataupu Faavae ma Feagaiga 44

Ua poloaiina e le Alii ia Ana auauna e faapotopoto faatasi

Mataupu Faavae ma Feagaiga 44:1–2. “O le a ou sasaa atu lo’u Agaga i luga o i latou i le aso o le a latou faapotopoto faatasi ai i latou lava”

Sa folafola atu e le Alii i toeaina o le Ekalesia afai latou te faapotopoto faatasi ma faaaoga lo latou faatuatua ia te Ia, o le a Ia sasaa ifo Lona Agaga i o latou luga. Na aoao mai e Elder Joseph B. Wirthlin (1917--2008) o le Korama a Aposetolo e Toasefululua e faapea o se tasi lenei o faamoemoega o fonotaga a la tatou Ekalesia: “I konafesi aoao ma isi sauniga a le Ekalesia i le salafa o le lalolagi, tatou te potopoto faatasi ai e sailia mafutaga—le mafutaga lelei a uso ma tuafafine i le talalelei ma le mafanafana o le sootaga matagofie ma le Agaga o le Atua. Ia tatou sauniga tapuai, o le i ai o lena Agaga e faatumulia ai o tatou loto i le alofa mo le Atua ma o tatou uso a Au Paia” (“O Ni Soa Faatauaina,” Liahona, Ian. 1998, 32).

atatosi o se vaega toalaiti o loo potopoto e faalogologo i le talalelei

Sa folafola mai e le Alii e sasaa mai Lona Agaga pe a faapotopoto faatasi le au faatuatua (tagai MF&F 44:2).

Mataupu Faavae ma Feagaiga 44:4–5. “Faatulaga outou lava e tusa ai ma tulafono a tagata”

E ui ina sa faatulagaina faaletulafono le Ekalesia i le setete o Niu Ioka, ae sa manaomia foi ni taumafaiga faapena i Ohaio a o faapotopoto le Au Paia i Katelani. O lea mea o le a faatagaina ai le Ekalesia e aloaia o se faalapotopotoga faalelotu ma o le a mafai ai e le Ekalesia ona umia ona lava fanua ma olioli i avanoa e tasi e tuuina atu i isi vaega faalelotu i Ohaio. I le faaaliga o loo tusia i le Mataupu Faavae ma Feagaiga 44, sa faamanino mai ai e le Alii e faapea o lenei laasaga sa manaomia e puipuia ai le Ekalesia mai le faatamaiaina e le fili. (Tagai i le Steven Harper, Making Sense of the Doctrine and Covenants: A Guided Tour through Modern Revelations (2008), 153.

Mataupu Faavae ma Feagaiga 45: Talaaga Faasolopito Faaopoopo

E oo atu i le tautotogo o le 1831, ua toatele tagata liliu mai ua faapotopoto ma le Au Paia i Katelani, Ohaio. O lenei tuputupu ae vave o le Ekalesia sa faafetaiaia e le tetee faateleina. Sa faamatala e le Perofeta o Iosefa Samita ia luitau sa feagai ma le Au Paia i lea taimi: “I lea taimi o le Ekalesia, sa tele lipoti sese, o talapepelo ma tala faavalevalea, sa lolomi ma faasalalau i nusipepa, ma fepasiai i itu uma, e taofia ai tagata mai le suesueina o le galuega, po o le taliaina foi o le faatuatuaga. … Peitai i le olioli o le au paia o e sa tauivi faasaga i mea uma sa mafai ona faatupu e le faamaualuga ma le amioleaga, sa ou maua ai le mea lea [Mataupu Faavae ma Feagaiga 45]” (i le Manuscript History of the Church, vol. A-1, page 104, josephsmithpapers.org). Na maua e le Perofeta lea faaaliga i le aso 7 Mati, 1831, ma sa fesoasoani i le Au Paia e malamalama atili ai i le tetee sa latou fetaiai i totonu o le talaaga o aso e gata ai, o faailoga o taimi, ma le Afio Mai Faalua o Iesu Keriso.

Mataupu Faavae ma Feagaiga 45:1–14

Ua faamamafa mai e Iesu Keriso Ana matafaioi o se Foafoa, Fautua, ma le Malamalama ma le Ola o le Lalolagi

Mataupu Faavae ma Feagaiga 45:3–5 O Iesu Keriso o lo tatou Fautua, o loo aioi atu mo lo tatou faamoemoe

Ua tausalaina i tatou i le agasala, ma e tusa ai ma le amiotonu o le Atua, e leai se mea eleelea e mafai ona mau i Lona afioaga. Peitai, na afio mai Iesu Keriso i le eleele e fai ia mafai le faaolataga mo fanau taitoatasi a le Tama Faalelagi. E ala mai i le Togiola a le Faaola e mafai ai ona tatou mama ma mafai ona faasaoina mai le agasala ma le oti. O Lona alofa, alofa mutimutivale, ma le alofa tunoa ua mafai ai e tagata uma ona maua le salamo ma le faamagaloga. Talu ai o Iesu Keriso sa amiotonu atoatoa ma sa faamalieina tuutuuga o le faamasinoga tonu mo agasala a isi, e mafai ona avea o Ia ma Fautua mo i tatou e ala i le aioi atu mo lo tatou faamoemoe i luma o le Tama. Na Faamalamalama mai e Peresitene Russell M Nelson o le Au Peresitene Sili:

“O Iesu o lo tatou Fautua i le Tama (tagai 1 Ioane 2:1; MF&F 29:5; 32:3; 45:3; 110:4). O le upu fautua e sau mai le pogai faa-Latina o lona uiga o se “leo mo,’ po o le ‘o se e aioi atu mo se tasi.’ O isi faaupuga e fesootai i ai o loo faaaoga i tusitusiga paia, e pei o le puluvaga po o le sooupu (tagai foi 1 Timoteo 2:5; 2 Nifae 2:28; MF&F 76:69). …

“… O le malamalama ia te ia o lo tatou fautua-puluvaga-sooupu ma le Tama tatou te maua ai le faamautinoga o lona malamalama le mafaatusalia, faamasinotonu, ma le alofa mutimutivale (tagai Alema 7:12)” (“Jesus the Christ—Our Master and More” [Brigham Young University fireside, Feb. 2, 1992], 4, speeches.byu.edu).

atatosi o Iesu o loo amo ina se satauro

Ona o Ona mafatiaga ma le maliu, o Iesu Keriso o le Fautua o i latou uma o e talitonu i Lona suafa (tagai MF&F 45:3–5).

E uiga ese lava, e puluvagaina e le Faaola lo tatou faamoemoe i luma o le Tama ma aioi atu ia faasaoina i latou o e talitonu ia te Ia mai tuutuuga e faavavau o le faamasinoga tonu, e le faavaea i lo tatou ta’umamaina ae i luga o Lana taulaga togiola. O Lana mataupu mo lo tatou togiolaina mai le faasalaga o le agasala o “mafatiaga ma le oti o le na le faia e ia se agasala” (MF&F 45:4)

Mataupu Faavae ma Feagaiga 45:15–59

Ua faaalia mai e le Faaola ia faailoga ma mea ofoofogia o le a tutupu i se taimi vave pe a mavae Lona maliu ma mea o le a tamua mai i Lona Afio Mai Faalua.

Mataupu Faavae ma Feagaiga 45:15–59. “O le a ou faaalia manino atu e pei ona sa Ou faaalia atu i o’u soo a o Ou tu i o latou luma i le tino”

Na feiloai Iesu Keriso ma Ona soo i luga o le Mauga o Olive i Lona toe vaiaso i le olaga nei. I le taimi lena na Ia valoia ai le faatafunaga o le malumalu i Ierusalema, ma na fesili Ona soo pe o afea o le a tupu ai lena faatafunaga ma pe o afea foi o le a Ia toe foi mai ai i le lalolagi (tagai Iosefa Samita—Mataio 1:2–4). I le tali atu i ai na faaali atu ai e le Alii ia faailoga o le a tutupu i se taimi vave pe a mavae Lona maliu ma faailoga o le a tamau mai i Lona Afio Mai Faalua. Na Ia toe faia foi lea valoaga i Lana Au Paia i aso e gata ai, e pei ona tusia i le Mataupu Faavae ma Feagaiga 45:16–59.

ata faataitai o le malumalu o Herota

I le taimi o Lana misiona i le tino, sa valoia ai e Iesu Keriso le faatafunaga o le malumalu i Ierusalema o se faailoga o lona Afio Mai Faalua (tagai MF&F 45:18–20).

Mataupu Faavae ma Feagaiga 45:16–59. Faailoga o le Afio Mai Faalua

O i latou o e iloa ia faailoga o le Afio Mai Faalua o Iesu Keriso ma mulimuli i fautuaga e tuuina mai e ala i perofeta a le Alii o le a saunia e taulima ia luitau o lenei taimi taua ma o le a “tulimatai atu mo le aso tele o le Alii o le a oo mai” (MF&F 45:39). O le a le aveina faafuasei ae o le a faatalitali atu ma le naunautai i le Afio Mai Faalua o le Alii.

O tusitusiga paia o le punaoa sili lea mo i latou o e mananao e suesue i faailoga ma mea o le a tutupu i le Afio Mai Faalua. Mo se faataitaiga, e tele auiliiliga e mafai ona aoaoina mai faatonuga na tuuina atu i soo o le Feagaiga Fou ina ua latou fesili i le Faaola, “Pe se a le faailoga o lou afio mai ma le gataaga o le lalolagi?” (Mataio 24:3). O aoaoga a Iesu Keriso o loo maua i le Mataio 24:3–51 na matua faalauteleina e ala i le faaliliuga musuia na faia e le Perofeta o Iosefa Samita, e pei ona maua i le Iosefa Samita—Mataio 1:4—55 (i le Penina Tau Tele). E tele vaega o le Mataupu Faavae ma Feagaiga e fesoasoani foi e faamalamalama ia mea e tutupu i aso amuli ma pe mafai faapefea ona saunia le fanau a le Atua mo na mea (o faataitaiga e aofia ai le MF&F 29; 38; 45; 63; 84; 88; 101; 133).

O faailoga o le Afio Mai Faalua o le Alii e mafai ona vaevae i ni faavasegaga autu se lua: (o faailoga o se vaega o le Toefuataiga o le talalelei ma lona faalautelega o le a oo i ai i le lalolagi atoa ma le (2) o faailoga o se vaega o le faateleina o mea leaga ma le malaia ma faamasinoga o le a oo mai i luga o le lalolagi. O nisi o faailoga ma mea o le a tutupu i le Afio Mai Faalua o loo faamatala mai i le Mataupu Faavae ma Feagaiga 45:16–59 e aofia ai mea nei:

  • O le a faapotopotoina Nuuese ma Iutaia (tagai MF&F 45:25, 30, 43)

  • “O taua ma tala o taua, ma o le a vavao le lalolagi atoa” (MF&F 45:26)

  • O le atoaga o le talalelei o le a toefuatai mai (tagai MF&F 46:28)

  • “O le a ufitia le lalolagi i se faama’i faatafunaina” (MF&F 45:31)

  • O soo o le Alii “o le a tutu i nofoaga paia, ma o le a lemasii ese” (MF&F 45:32)

  • “O mafuie … i nofoaga eseese, ma faatafunaga e tele” (MF&F 45:33)

  • O faailoga ma mea e ofo ai … o le a faaalia i le lagi i luga, ma i le lalolagi o i lalo” (MF&F 45:40)

  • “O le a faapouliuli le la, ma liu toto le masina” (MF&F 45:42)

  • O le a afio mai le Alii “ua faaofuina i le mana ma le mamalu tele, faatasi ai ma agelu paia uma” (MF&F 45:44)

  • O le a tutu mai le au paia o e na momoe” (MF&F 45:45)

  • O le a faaali mai le Alii i luga o le Mauga o Olive ma talanoa ai ma Iutaia (tagai MF&F 45:48, 51–53)

Mataupu Faavae ma Feagaiga 45:32. “O le a tutu o’u soo i nofoaga paia”

O se tasi o faamoemoega o le faaaliga o loo tusia i le Mataupu Faavae 45 o le fesoasoani lea i fanau a le Tama e saunia mo le Afio Mai Faalua o Iesu Keriso. E ui o le a mafatia e amioleaga ma faaumatia, ae o le a maua e soo o le Alii le filemu ma faamanuiaga pe afai o le a latou “tutu i nofoaga paia, ma … ia le masii ese” (MF&F 45:32).

Sa faamalamalama e Sister Ann M. Dibb, o le na avea o se Fesoasoani i le Au Peresitene Aoao o Tamaitai Talavou, le ala e mafai ai ona tatou tutu i nofoaga paia. “Na fautua mai Peresitene Ezra Taft Benson, ‘O nofoaga paia e aofia ai o tatou malumalu, o o tatou fale tapuai, o o tatou fale, ma siteki o Siona, ia e … “mo se puipuiga, ma mo se sulufaiga” [MF&F 115:6]’ [‘Prepare Yourself for the Great Day of the Lord,’ New Era, May 1982, 50]. E faaopoopo atu i nei mea, ou te talitonu e mafai ona taitasi i tatou ma sueina nisi mau nofoaga. Atonu e tatau ona tatou mafaufau muamua i le upu nofoaga o se siosiomaga faaletino po o se tulaga faalefaafanua. Peitai, o se nofoaga e mafai ona ma ‘se tulaga iloga, tulaga, po o se auga o le mafaufau’ [Merriam-Webster Online, ‘place,’ merriam-webster.com/dictionary/place]. O lona uiga o nofoaga paia e mafai foi ona aofia ai minute i taimi—taimi e molimau mai ai le Agaga Paia ia te i tatou, taimi tatou te lagonaina ai le alofa o le Tama Faalelagi, po o taimi tatou te maua ai se tali i a tatou tatalo. E le gata i lea, ou te talitonu soo se taimi e te maua ai le lototoa e tu atu mo le mea tonu, aemaise i tulaga e leai se isi e naunau e faia, ua e fatuina lava se nofoaga paia” (“O o Outou Nofoaga Paia,” Ensign po o le Liahona, Me 2013, 115).

fua pula i luga o se laau

E faapei ona ta’u mai e lau ua totogo a’e o se mati le amataga o le taumafanafana, o le alia’e mai foi o faailoga ua valoia o le a ta’u mai ai le oo mai o le Afio Mai o le Alii (tagai MF&F 45:36–38).

Mataupu Faavae ma Feagaiga 45:35. O le a faataunuuina ia folafolaga

E ui o le tele o faailoga o le Afio Mai Faalua e aofia ai le malaia ma mea taufaafefe o le a tutupu, sa faatoafilemu e le Faaola Ona soo i le faamalamalama atu i ai e faapea o nei faailoga o le a avea o se faaaliga “o le a faataunuuina folafolaga na fai atu ai ia te outou” (MF&F 45:35). O nei folafolaga atonu e faasino i faamanuiaga o loo faatalitali mai i e amiotonu a o faafeao mai i totonu le Meleniuma.

Mataupu Faavae ma Feagaiga 45:56–59. O e popoto latou te talia le upumoni ma avea le Agaga Paia ma o latou taiala

O le faataoto i taupou e toasefulu sa uluai tuuina mai ina ua tuu atu e Iesu ia faatonuga i ona soo i luga o le Mauga o Olive (tagai Mataio 25:1–13). O le Mataupu Faavae ma Feagaiga o loo aumaia ai sina faaliliuga o lenei faataoto, o loo faamalamalama mai ai faamanuiaga ua folafola mai ia i latou o e popoto e aofia ai ma le folafolaga o le a faatasi ma le Alii i Lana nofoaiga i le Meleniuma i le lalolagi (tagai MF&F 45:56–59). O e popoto ua faamatalaina o i latou o e “ua talia le upumoni, ma ua latou avea le Agaga Paia mo o latou taiala, ma sa lei faaseseina” (MF&F 45:57).

O Le Toalima o i Latou e Popoto, saunia e Walter Rane

O Le Toalima o i Latou e Popoto saunia e Walter Rane I le Afio Mai Faalua o Iesu Keriso, o le a faataunuuina le faataoto i taupou e toasefulu (tagai MF&F 45:56–67).

Sa faamalamalama mai e Elder David A. Bednar o le Korama a Aposetolo e Toasefululua e faapea ua i ai i tagata uma o le Ekalesia le avanoa e avea ai le Agaga Paia ma se taiala: O le “Aveaina o ‘le Agaga Paia mo [tatou] taiala’ (MF&F 45:57) e mafai ma e tatau mo lo tatou tuputupu ae faaleagaga ma ola ai i se lalolagi ua faateleina le amioleaga. O nisi taimi i le avea ai ma Au Paia o Aso e Gata Ai, tatou te talanoa ma galulue e peiseai o le iloaina o le tosinaga a le Agaga Paia i o tatou olaga o se mea e le masani ai pe tuusaunoaina foi. E ao ona tatou manatua, o le folafolaga o le feagaiga o le Ia tatou maua pea Lona Agaga e faatasi ma i tatou. O le faamanuiaga silisili e faatatau i tagata taitasi uma o le Ekalesia o e ua papatiso, faamau, ma ua faatonuina ia “talia le Agaga Paia.’” (“Ina Ia Tatou Maua Pea Lona Agaga e Faatasi ma i Tatou,” Ensign po o le Liahona, Me 2006, 30).

Mataupu Faavae ma Feagaiga 45:60–75

Ua faamatala mai e le Alii le Ierusalema Fou, po o le Siona

Mataupu Faavae ma Feagaiga 45:60–61 “Seia faaliliuina le Feagaiga Fou”

O le faaliliuga musuia o le Tusi Paia lea na amata e le Perofeta o Iosefa Samita i Niu Ioka ia Iuni o le 1830, na faaauau pea ina ua taunuu o ia i Katelani, Ohaio. Talu mai le amataga o le faaliliuga, sa galue punouai le Perofeta i le Feagaiga Tuai. E oo atu i le aso 7 Mati, 1831, ina ua maua mai le Mataupu Faavae ma Feagaiga 45 ua oo le faaliliuga i le Kenese 19:35. Ona faatonuina lea o Iosefa Samita e le Alii i lena taimi, e amata ona faaliliu le Feagaiga Fou (tagai MF&F 45:60–61). Sa amata e le Perofeta ma Sini Rikitone ona galulue i le Evagelia a Mataio i le aso lava na sosoo ai. “O le itulau 1 o le tusitusiga o loo tusi ai le aso 8 Mati, 1831, na sosoo ma le faaupuga ‘O Se Faaliliuga o le Feagaiga Fou na faaliliuina i le mana o le Atua.’ O lea faamatalaga ua faaalia ai lagona o le usoga e uiga i le galuega sa la faia” (Robert J. Matthews, A Plainer Translation: Joseph Smith’s Translation of the Bible, A History and Commentary [1985], 73).

Mataupu Faavae ma Feagaiga 45:62–71. Ua poloaiina le Au Paia e fausia le Ierusalema Fou

E pei ona tusia i le Mataupu Faavae ma Feagaiga 45:62–71, na aoao e le Alii le Au Paia i le ala e saunia ai mo faigata ma mala ia na valoaia e faateleina a o lei Afio Mai Faalua le Alii. E patino lava, sa ta’u atu ia i latou e faapotopoto faatasi ma faatuina se aai o Siona e faataitai i le mamanu o le nuu o Enoka (tagai Mose 7:18–20). O le a faaigoaina o le “Ierusalema Fou” ma o le a avea “o se laueleele o le filemu, o se aai o le sulufaiga, o se nofoaga o le saogalemu” (MF&F 45:66). O le upu Siona e faaaogaina i nisi taimi i se faauigaga e fai si ona eseesega teisi. O nisi taimi o le upu e faatatau i le nuu o Siona ma e faamatalaina ai i latou o e “loto mama” (MF&F 97:21). O isi nofoaga uma, o Siona e faatatau i le Ekalesia atoa ma ona siteki i le lalolagi atoa (tagai i le MF&F 82:14). O le upu Siona e mafai foi ona faasino i tulaga faapitoa faalefaafanua. I lenei faaaliga, o Siona na faasino i se aai moni o le a atinaeina e le Au Paia ma o le a latou faapotopoto ai.

Na faia e le Perofeta o Iosefa Samita (1805–1844) le saunoaga lea e uiga ia Siona i aso e gata ai:

“O le fausiaina o Siona o se galuega ua naunau i ai le nuu o le Atua i vaitausaga uma; o se autu sa nopia’i ai perofeta, faitaulaga ma tupu ma le fiafia tulaga ese; sa o latou sagisagi atu ma le naunauga fiafia i le aso tatou te ola ai; ma faasasao atu ai ma naunauga faalelagi ma le olioli sa latou pepese ai ma tusia ma valoia o tatou aso; peitai sa latou maliliu e aunoa ma le vaai i ai; o i tatou o ni tagata ua alofagia na filifilia e le Atua e aumaia le mamalu i Aso e Gata Ai; ua tuua mo i tatou e vaai i ai, auai i le faatinoga ma fesoasoani e faataavale i luma le mamalu o Aso e Gata Ai.

“Soo se nofoaga e faapotopoto ai le Au Paia o Siona lea, o le a fausia ai e tagata amiotonu uma e avea o se nofoaga o le saogalemu mo ana fanau.

“O le a i ai i vaega eseese o Siteki [o Siona] mo le faapotopotoina o le Au Paia. … O iina o le a faamanuiaina ai a outou fanau, ma outou faatasi ai ma uo o le a faamanuiaina ai outou. O le upega o le Talalelei e maua ai ituaiga eseese.

“… E tatau ona avea le atiina ae o Siona ma o tatou faamoemoe sili … O le a vave ona oo mai le taimi, o le a le toe maua ai e tagata le filemu sei vagana i Siona ma ona siteki” (Aoaoga a Peresitene o le Ekalesia: Iosefa Samita 2007], 198).

Na taulai atu e Peresitene Polika Iaga (1801–1877) le Au Paia i le taua o le faatuina o Siona i aso e gata ai:

“O le faamoemoega o lo tatou olaga o le atinaeina o Siona o lo tatou Atua, o le faapotopotoina o le Aiga o Isaraelu, … faaputu oa sili o le malamalama ma le poto i lo tatou lava malamalama, faamamaina o tatou lava loto ma saunia tagata ina ia fetaiai ma le Alii pe a afio mai. …

“E leai sa tatou galuega iinei sei vagana ai le atinaeina ma le faatuina o Siona o le Atua. E ao ona faia e tusa ai ma le finagalo ma le tulafono a le Atua [tagai MF&F 105:5], e mulimuli i lena faataitaiga ma le faatulagaga sa fausia ma le faaatoatoa ai e Enoka le Siona muamua, o le sa aveina i le lagi. … O i tatou, e ala i lo tatou faatuatua, e ao ona saunia i tatou lava e faitai ma Siona mai luga pe a toe oo mai i le fogaeleele, ma fetaiai ma Siona mai luga pe a toe oo mai i le fogaeleele, ma fetaiai ma le pupula ma le mamalu o lona oo mai” (Aoaoga a Peresitene o le Ekalesia: Polika Iaga [1997], 111–12).