Mataupu 15

Mataupu Faavae ma Feagaiga 37–38; 41

Faatomuaga ma le Faasologa o Taimi

I le faaiuga o Tesema 1830, sa faaauau ai pea ona galue le Perofeta o Iosefa Samita i lana faaliliuga musuia o le Tusi Paia. O le taimi lea, na maua mai ai e Iosefa le faaaliga ua faamaumauina i le Mataupu Faavae ma Feagaiga 37. I lenei faaaliga, sa poloaiina ai e le Alii le Perofeta e tuu ese mo se taimi le tumau le faaliliuga o le Tusi Paia ae folafola atu le talalelei ma faamalosi le Ekalesia. Na Ia poloaiina foi le Au Paia e faapotopoto i Ohaio.

I le konafesi a le Ekalesia na faia i le aso 2 Ianuari, 1831, na faasilasila atu ai e Iosefa Samita le poloaiga a le Alii mo le Au Paia ina ia faapotopoto i Ohaio. O le toatele o le Au Paia sa mananao ia iloa atili e uiga i le poloaiga, o lea na fesili ai le Perofeta i le Alii le taimi o le konafesi. Na maua mai e Iosefa le faaaliga o loo tusia i le Mataupu Faavae ma Feagaiga 38 a o i ai le aofia. I lenei faaaliga na faaali atu ai e le Alii Ana mafuaaga ua poloaiina ai le Au Paia e faapotopoto i Ohaio ma sa faamalamalama atu ai ia faamanuiaga folafolaina i le faia o lena mea.

O le toatele lava o le Au Paia na taliaina le poloaiga ma sa amata tapenapenaga e agai atu i Ohaio. I le latalata i le faaiuga o Ianuari 1831, sa malaga ai le Perofeta o Iosefa; lona faletua o Ema, ma isi i taavale e toso e solofanua mai Niu Ioka i Ohaio ma sa taunuu i Katelani i le amataga o Fepuari. I le aso 4 Fepuari, sa maua mai ai e Iosefa le faaaliga o loo tusia i le Mataupu Faavae ma Feagaiga 41, lea na faatonuina ai e le Alii le Perofeta ma isi taitai o le Ekalesia e tatalo ia talia Lana tulafono. E le gata i lea, sa valaauina e le Alii ia Eteuati Paterika e avea ma uluai epikopo o le Ekalesia.

Tesema 1830Sa amata ona galue Sini Rikitone o se tusiupu mo Iosefa Samita i le taimi o le faaliliuga o le Tusi Paia.

Tesema 1830A o faaliliuina le Tusi Paia sa maua mai e Iosefa Samita se vaega o le tusifaamaumau anamua a Enoka (Mose 7).

30 Tesema, 1830Na maua mai ai le Mataupu Faavae ma Feagaiga 37.

2 Ianuari 1831I le taimi o le konafesi lona tolu a le Ekalesia, sa faasilasila mai ai e Iosefa Samita ua tatau ona faapotopoto le Au Paia i Ohaio.

2 Ianuari, 1831Na maua mai ai le Mataupu Faavae ma Feagaiga 38.

Ianuari–Fepuari 1831Na sii atu Iosefa ma Ema Samita i Katelani, Ohaio, ma sa taunuu i le amataga o Fepuari.

4 Fepuari, 1831Na maua mai ai le Mataupu Faavae ma Feagaiga 41.

Mafaufau pe o fea poloaiga e ono faigata mo oe ona usitaia. A o e suesueina le Mataupu Faavae ma Feagaiga 37–38, mafaufau e uiga i mafuaaga e ono faigata ai i le Au Paia i Niu Ioka ona usitai i le poloaiga a le Alii e o i Ohaio.

Mataupu Faavae ma Feagaiga 37: Talaaga Faaopoopo Faasolopito

Na liliu mai Sini Rikitone i le talalelei ina ua ia faalogo i le talaiga a Oliva Kaotui, Pale P. Palate, ma isi faifeautalai o e sa afea Ohaio i la latou malaga i tuaoi i sisifo o Misuri. I le va o ni nai viaso, sa papatiso ai e faifeautalai le silia ma le 100 tagata liliu mai i le eria o Katelani, e aofia ai ma Sini Rikitone. Ina ua maea lona papatisoga, sa malaga ia Sini faatasi ma Eteuati Paterika i Niu Ioka ma feiloai ai ma le Perofeta o Iosefa Samita. Na tofia Sini e ala i se faaaliga e fesoasoani ia Iosefa Samita e fai ma tusiupu a o faaauau e le Perofeta le faaliliuga musuia o le Tusi Paia. I le avea ai o Sini ma ana tusiupu, sa faalau atu ai e Iosefa le Mose 7 i le Penina Tau Tele. Ia Tesema 1830 sa faatonuina ai e le Alii i la’ua e taofi le faaliliuga ae faamalolosi tagata o le Ekalesia i Niu Ioka. Na poloaiina foi e le Alii le Au Paia e faapotopoto i Ohio ma aufaatasi ma i latou o e sa liua iina. E ui ina sa fetalai talu ai le Alii o le a manaomia ona faapotopoto faatasi Lona nuu i se tino e tasi ina ia puipuia ai mai puapuaga (tagai MF&F 29:8), o le faaaliga lenei (MF&F 37) o le uluai poloaiga lea e faatatau i le faapotopotoga moni o le Au Paia i se nofoaga tutotonu i lenei tisipenisione.

Mataupu Faavae ma Feagaiga 37

Ua poloaiina e le Alii Lana Ekalesia e faapotopoto i Ohaio

Faitau le Mataupu Faavae ma Feagaiga 37, ma vaavaai mo faamaoniga e le faamalosia e le Alii Lana fanau e usitai i Ana poloaiga.

Mataupu Faavae ma Feagaiga 37:1. “Ua le tatau ia te au ona oulua toe faaliliu”

Ia Iuni 1830, sa amata e le Perofeta o Iosefa Samita se toefaafouga musuia o le Tusi Paia lea na ia faasino i ai o se faaliliuga. Mai ia Iuni ia Tesema 1830, na taulai le Perofeta i le tusi o Kenese o le Feagaiga Tuai, faatasi ai ma Oliva Kaotui, Ioane Uitimera, Ema Samita, ma Sini Rikitone sa fesoasoani ia te ia o ni tusiupu. Ia Tesema 1830 na poloaiina ai e le Alii ia Iosefa Samita ma Sini e taofi la la galuega o le faaliliuga i le taimi lea ma sa faatonuina i la’ua e toe amata pe a taunuu i Katelani, Ohaio.

Mataupu Faavae ma Feagaiga 37:1–3. “O i Ohaio”

Mai ia Aperila ia Okeopa 1830, o le mea moni o tagata uma o le Ekalesia sa nonofo i Niu Ioka, i eria o Palamaira, Feiete, ma Kolesavile. Na suia lena mea ina ua afea e faifeautalai na auina e talai i Initia Amerika i le tuaoi i sisifo o Misuri, ia Katelani Ohaio. Na iloa e faifeautalai sa saunia e le Alii le toatele o tagata iina e maua le savali o le talalelei toefuataiina. E silia ma le 100 tagata na liliu mai i totonu o nai vaiaso. O le poloaiga mo le Au Paia e “faapotopoto faatasi i Ohaio” (MF&F 37:3), o lona uiga o le Vaitafe tele o Ohaio i matu i sasae o Ohaio i le mea sa tu ai Katelani, na manaomia le Au Paia e malaga i se mea mamao pe tusa ma le 300 maila (480 kilomita) mai le mea sa latou nonofo ai i Niu Ioka.

Ia Setema 1830, na faamalamalama mai e le Alii e faapea o le Au Paia na “valaaulia e faataunuu le faapotopotoina o la’u au filifilia” ma”ia faapotopotoina mai i latou i le nofoaga e tasi i luga o lenei laueleele” (MF&F 29:7–8). O le aai o Siona—le Ierusalema Fou—na atofa e le Alii o le nofoaga lea e faapotopoto i ai le Au Paia. O le faamoemoega e tasi o le misiona a Oliva Kaotui o le saunia lea mo le taimi o le a faailoa mai ai e le Alii le mea e faatu ai Sione (tagai MF&F 28:8–9). Na iu ina faaalia mai e le Alii o Initipene, Misuri, o le a avea ma Siona (tagai MF&F 57:1–3). Peitai, na poloaiina e le Alii le Au Paia e faapotopoto i Ohaio seia mafai ona maua mai nisi faamatalaga mai ia Oliva Kaotui pe a toe foi mai lana misiona. O aoaoga mulimuli ane a le Perofeta o Iosefa Samita ma isi perofeta o aso e gata ai na faamanino mai ai o le a faalauteleina ia Siona e faatumu ai Amerika i Matu ma Saute ma e oo lava i talaatu e faatumu ai le lalolagi atoa.

O le poloaiga muamua mo le Au Paia e faapotopoto i lenei tisipenisione o le eria o Katelani, Ohaio (tagai MF&F 37:3, atapue ca. 1907).

Faaaloaloga a le Church History Library and Archive

Mataupu Faavae ma Feagaiga 38: Talaaga Faaopoopo Faasolopito

I le aso 2 Ianuari, 1831, e lei umi ona maua mai e le Perofeta o Iosefa Samita le poloaiga mo le Ekalesia e “faapotopoto faatasi i Ohaio” (MF&F 37:3), sa faia se konafesi i Feiete, Niu Ioka. Sa auai tagata o le Ekalesia mai eria e tolu o Niu Ioka i le mea sa nonofo ai tagata o le au paia: Palamaira, Feiete, ma Kolesavile. Sa faasilasila atu e le Perofeta le poloaiga a le Alii ina ia potopoto i Ohaio. Sa tusifaamaumauina e Ioane Uitimera e faapea “sa i ai le pau o le faavavau i luga o le potopotoga, ma … sa latou naunau e fia iloa atili e uiga i lenei mataupu” (i le The Joseph Smith Papers, Histories, Volume 2: Assigned Histories, 1831–1847, ed. Karen Lynn Davidson and others [2012], 18). Sa fesili Iosefa Samita i le Alii, ma, a o i ai le potopotoga, sa ia maua mai se faaaliga na aumaia ai se faamalamalamaga auiliili e uiga i le mafuaaga na tatau ai ona toe sui le mea o i ai le Au Paia.

Mataupu Faavae ma Feagaiga 38:1–22

Ua tautino mai e le Alii Lona silisiliese ma faamautinoa mai i le Au Paia o loo i ai o Ia i totonu o i latou.

Faitau le Mataupu Faavae ma Feagaiga 38:1–22, ma vaavaai mo faamatalaga o le natura o le Alii ma ona uiga ia na mafai ai ona faamalolosia le faatuatua o le Au Paia ma sa fesoasoani ai ia te i latou e faatuatuaina Ana poloaiga.

Mataupu Faavae ma Feaigaiga 38:2. E silafia e le Alii mea uma

E silafia e le Alii mea uma (tagai 2 Nifae 2:24; 9:20). Na te silafia “le iuga mai le amataga” (Aperaamo 2:8), ma e mafai e Ia ona silafia ma malamalama i mea uma ua tuanai, le taimi nei, ma le lumanai (tagai MF&F 88:41; 130:7). Talu ai Na te silafia mea uma, e mafai ona tatou faatuatua ia te Ia. O Lectures on Faith, o se ofaga o lesona na lolomiina ma le faatagaga ma le faamaoniga a le Perofeta o Iosefa Samita, o loo i ai faamalamalamaga o le faia o le silafia atoatoa o le Atua ma lo tatou tomai e faaaoga ai le faatuatua atoa ia te Ia: “A aunoa ma le silafia o mea uma e le mafai e le Atua ona faasaoina se vaega o ana fanau; aua o le mafuaaga o lona silafia o mea uma, mai lava i le amataga e oo i le gataaga, ua mafai ai e ia ona tuu mai lena malamalama i ana fanau lea ua avea ai i latou ma ni e o le ola faavavau; ma ana le seanoa le manatu ua i ai i mafaufau o tagata e faapea ua i ai i le Atua le poto uma semanu latou te le mafai ona faaalia le faatuatua ia te ia” (Lectures on Faith [1985], 51–52).

Mataupu Faavae ma Feagaiga 38:12. “O loo faatali e agelu le poloaiga e sele i lalo le lalolagi … ; ma faauta, ua au faatasi le fili”

O loo faasino le Mataupu Faavae ma Feagaiga 38:12 i le faataoto o loo i le Feagaiga Fou e uiga i le saito ma le titania (tagai Mataio 13:24–30). O le ata o agelu o loo faatalitali e sele le lalolagi o se atafaatusa i le faatafunaga o e amioleaga i le iuga o le lalolagi.Na faamalamalama mai e Elder Neal A. Maxwell (1926–2004) o le Korama a Aposetolo e Toasefululua le ala e mafai ai e i latou o e mulimuli i le Atua ona maua le filemu i se lalolagi ua fai ifo.

“I le tele o tausaga ua mavae, sa ou taumanatunatu ai i ata faatusi paia o agelu o loo faatalitali i le ‘ao ma le po’ mo “le poloaiga tele” e o mai i lalo e sele le titania i se lalolagi amioleaga ma le pagatia; sa foliga mai o se mea sa ou fia iloa tele. (Tagai i le MF&F 38:12; 86:5.) O lea puapuagatia tele, e le moomia e le tagata, ua ou le toe taumafaufau ai i ai!

“E ui i lea, o le a tupu le seleina faaiu i le na o le taimi lava ua fuafua ai e le Tama ua ‘matua atoa’ le lalolagi. (MF&F 86:7.) O le taimi nei, uso e ma tuafafine, o le luitau o le ola faaleagaga i se lalolagi toilalo o ‘saito ma le titania’. [MF&F 86:7.]

“E i ai taimi e ia ni nai au taufaalata po o ni au fouvale e taumafai e faaoso lo tatou ita a o latou tau manava i o latou popolega faapitoa, ae o aafiaga lofituina o lena lalolagi ua matua fai ifo i luga o tagata o le Ekalesia o le ‘tulaga matautia manino lea o i ai i le taimi nei.’ ‘O mea leaga ma fuafuaga’ e galulue moni e ala i ‘[tagata] faufau leaga i aso e gata ai.’ MF&F 89:4.) Ua faasilasila mai foi e le Alii, ‘’Faauta ua au faatasi le fili.’ MF&F 38:12.)

‘Peitai e le tatau lava ona fefefe pe meia lo tatou toafilemu tusa lava pe ua oo ina taliaina mea sa lei taliaina muamua, e faapei ua avatu i ai le faaaloalo tele. (“‘Faauta, ua Au Faatasi Fili’ (MF&F 38:12),” Liahona, Iulai 1993, 76).

Mataupu Faavae ma Feagaiga 38:13–15. “Ou te faailoa atu ia te outou se mealilo”

O le faaaliga ia toe sui le mea e o i ai tagata o le Ekalesia i Ohaio sa lei faamoemoeina, ma e tele ni osigataulaga na faamalumalu mai ai. Na tofotofoina le talitonuga o le Au Paia e faapea o Iosefa Samita o se perofeta. Na tusia e Ioane Uitimera e faapea, sa masalosalo nisi tagata faapea “na faatupuina e Iosefa [le faaaliga] e ia lava e faasese ai tagata ia i’u ane ua manuia ai o ia” (ii le The Joseph smith Papers, Histories, Volume 2: Assigned Histories, 1831–1847, 21).

E ui ina sa fesiligia e nisi le matafaioi paia a Iosefa Samita o se perofeta, ae sa faasoa mai ma le alofa mutimutivale e le Alii i tagata o le Ekalesia se mea sa latou le i iloaina, “o se mealilo, o se mea lea o loo faia i totonu o potu faalilolilo” (MF&F 38:13). Na aoaoina e Iosefa Samita ma le Au Paia mai le Alii e faapea sa faufau leaga ia fili ia faataunuu lo latou faatafunaga (tagai MF&F 38:13, 28).

Mataupu Faavae ma Feagaiga 38:17–20. “O se laueleele e tafe ai le suasusu ma le meli”

E ui o le a manaomia e le Au Paia le ositaulaga ina ia malaga ai i Ohaio, ae na faasoa mai e le Alii ia auiliiliga e iloa ai e Ana fanau amiotonu le ala e maua ai “se laueleele o le folafolaga, o se laueleele ua tafe ai le suasusu ma le meli” (MF&F 38:18), o lona uiga o se nofoaga e tumu i le tamaoaiga (tagai Esoto 3:8). O lenei folafolaga o se “laueleele o le … tofi” (MF&F 38:19) atonu na i ai se faataunuuga faaletino i le tulaga o le aai o Siona i le lumanai i Misuri, ae e foliga mai foi e faasino i le laueleele pe a oo ina toefaafou ma maua se mamalu faaparataiso i le taimi o le Meleniuma (tagai Mataupu Faavae o le Faatuatua 1:10; tagai foi MF&F 63:20–21, 49). O e amiotonu e ola i tulafono a le Atua ma o e saili ia avea e faapei o Ia o le a maua se laueleele e faavavau o le tofi i le fogaeleele pe a oo ina avea o se malo selesitila (tagai MF&F 88:17--20). Na ta’u atu e le Alii i tagata o le Ekalesia ina ia sailia lenei laueleele o le tofi “ma o [latou] loto atoa” (MF&F 38:19).

Mataupu Faavae ma Feagaiga 38:23–42

Ua poloaiina e le Alii le Au Paia ina ia lotogatasi ma faamalamalama mai le pogai na Ia poloaiina ai i latou e faapotopoto i Ohaio.

Faitau le Mataupu Faavae ma Feagaiga 38:23–27, ma vaavaai mo se mataupu faavae e tatau ona taiala ai a tatou amioga i isi tagata.

Mataupu Faavae ma Feagaiga 38:24–27. “Ia taitasi le tagata ma manatu taua i lona uso e pei o ia lava ia te ia”

A o tapenapena e le Alii le Au Paia i lenei tisipenisione e faavae ia Siona, sa Ia aoao atu foi i latou e uiga ia Enoka ma le nuu o Siona anamua. Ia Tesema 1830, sa maua ai e le Perofeta o Iosefa Samita se faaaliga e uiga i le aai o Siona lea na i ai le nuu o Enoka “sa tasi o latou loto na tasi le mafaufau, … ma sa leai se mativa i totonu o i latou” (Mose 7:18). I se faaaliga na maua mai i le aso 2 Ianuari, 1831, sa toe faamamafa mai ai e le Alii le mataupu faavae faavavau o le a fesoasoani i Ana fanau e faatuina le Siona i aso e gata ai, e aofia ai le lotogatasi, amiotonu, ma le tausia o e matitiva. O Ana poloaiga e “taitasi le tagata ma manatu taua i lona uso e pei o ia lava ia te ia” (MF&F38:24) e faatatau i tagata uma aua o i tatou uma o uso ma tuafafine—o fanau a le Atua. O le tausia ma le faaaloalo i isi e taua tele i le sauniuni e ola i le tulafono o le faapaiaga, lea na tuuina mai pe tusa o le tasi le masina mulimuli ane, ina ua taunuu Iosefa Samita i Katelani, Ohaio (tagai MF&F 42:30).

Sa faapupula mai e Elder Jeffrey R. Holland o le Korama a Aposetolo e Toasefululua le taua o le mafaufau i tagata uma o se tasi e auauna atu ma alofa i ai:

E tele taimi tatou te mafai ai, ae masani lava e aunoa ma se mafaufau i ai, e fai si faaleano i tulaga ma faigata o loo siomia ai i tatou. E tofu uma tatou ma faafitauli, ma o le iuga lava e tofu tauave e le tagata lava ia le tiutetauave mo lona lava fiafia. E leai se tasi o i tatou e saoloto mai faigata mo i tatou lava pe ua matua faamanuiaina i le taimi ma tupe e le mafai ai ona tatou faia se isi mea ae tausi i e manunu’a ma pagatia’ (‘Faaola e ia Ou Alofa,’ Viiga, no 150. ). Ae ui o lea, i le vaavaai atu i le soifuaga o le Faaola mo se faataitaiga, ou te masalo atonu e mafai ona tatou maua se ala e faia ai isi mau mea o na mea nai lo le mea o tatou faia. …

“… Maimau e pe ana mafai ona ou toe foi i lo’u talavou ma faapea e i ai se isi avanoa e aapa atu ai ia i latou o e, i lena taimi, e lei oo i ai le malosi o la’u vaai. E mananao le autalavou e lagonaina lo latou faitaulia ma le taua, ia maua le lagona e taua i latou i isi. … O mafutaga ou te lei maua, o uo ou te lei pa’i atu i ai, o le mea lena ua afua ai ona ou tiga i le taimi nei ina ua mavae nei tausaga uma mulimuli ane.

“Se’i ou faamatalaina le mea lea e tasi, lea ua avea o se tausalaga i le taimi nei. I le 1979 sa faia ai i St. George Utah, l toetuufaatasiga o le 20-tausaga o le matou vasega i le Aoga Maualuga i Dixie. Sa maoae tausaga o lo matou i ai i le aoga maualuga sa siamupini i le lakapi ma pasiketipolo a le setete, ma le anoanoai o isi manatuaga o lo matou ‘nuu moni, ISA’. Sa faia se taumafaiga e sue ia tuatusi o i ai le vasega atoa i le taimi lea ma aumaia tagata uma i le mafutaga.

“I le totonugalemu o na fiafiaga uma, sa ou manatua ai le tusi e ogaoga le tiga na tusia e se tasi e ese le atamai—ae, i lona teineitiiti, sa peiseai e lei amanaia tele—se tamaitai talavou na tusia se mea faapenei:

“Faamalo atu ia i tatou uma i le lava o le ola umi ua faia ai se toetuufaatasiga o le 20-tausaga a le vasega. Ou te faamoemoe na fiafia tagata uma. Ae aua nei taofia se nofoaga mo au. O le mea moni, sa ou faaaluina le tele o na tausaga e 20 e taumafai ai e faagalo taimi sili ona tiga o le taimi na tatou faatasitasi ai i le aoga. O lea la ua toeitiiti a mou atu ia te au na lagona o le tuulafoaiina ma le nutililii o lo’u manatu i lo’u lava taua, e le mafai ona ou toe aumaia a’u e vaai i le vasega uma ma toe lamatia ai i le toemanatuaina o na mea uma. Ia manuia le faamoemoe ma faamagalo mai au. O lo’u faafitauli, e le o outou. Atonu e mafai ona ou alu atu pe a faailoga le 30-tausaga.’

“Lea, ua ou fiafia lava e lipoti atu, na ia faia. Ae e tasi lava le mea sa matua sese ai o ia—o le matou faafitauli, ma sa matou iloaina.

“Sa ou tagi mo ia—o la’u uo—ma e i ai isi uo e fiafia ia te ia i lo’u talavou lea na mautinoa lava sa lei avea a’u ma le toatele o isi ma tufuga ‘o le faamalologa‘ (Viiga, no. 150). Sa le o i matou o ni sui po o ni soo o le Faaola e faamoemoe ia avea ai tagata. Sa le mafai lo’u taumafaufau pe o le a se mea semanu ou te faia e mataitu atili ai i latou e le o faaaofia mai, ia mautinoa e ono pa’i atu se taga faatino a se upu agalelei po o se taliga e faalogo po o sina talanoaga itiiti faasamasamanoa e leai se tau, ma se taimi e faasoa atu, ia lava ina ia faaaofia mai ai i latou o loo fepiiti i si’ui o le li’o faaagafesootai, ma i nisi taimi e toetoe lava a le o pipii ai.

“Na fetalai Iesu i lana lauga e sili ona ofoofogia: ‘Aua afai tou te alolofa atu i e ua alolofa mai ia te outou, se a ea se taui tou te maua ai? e le faia ea e le au telona o lea lava mea? Pe afai tou te faapito lo outou fealofani o outou uso, se a se mea sili ua tou faia? E le faapea ea ona faia e le au telona?’ (Mata. 5:46–47).

“Ou te faia se talosaga mo i tatou ia aapa atu i talaatu o lo tatou lava lotomalie, ia see ese mai lo tatou lava sone masani ua mafana, ia aapa atu ia i latou atonu e le faigofie i taimi uma ona pa’i atu i ai” (“O Mai ia te A’u,” Liahona, Aok. 1998, 21–22).

Na maua e le nuu o Enoka ia Siona e ala i le aoao ia tasi le tasi ma le isi (tagai Mose 7:17–18). O le a se mea sa mafai ona e fai ina ia sili atu lou mulimuli i le poloaiga “ia taitasi le tagata ma manatu taua i lona uso e pei oia lava ia te ia” (MF&F 38:25)?

Mataupu Faavae ma Feagaiga 38:27. “Afai tou te le tasi,e le a A’u outou.”

Na aoao mai Peresitene Henry B. Eyring o le Au Peresitene Sili le ala e mafai ai ona tasi i tatou ma i latou e siomia i tatou:

“Ua tatou iloa mai aafiaga o le olioli e oo mai pe a faamanuiaina i tatou i le lotogatasi. Tatou te moomoo, o ni fanau agaga a lo tatou Tama Faalelagi, mo lena olioli sa tatou mauaina faatasi ai ma Ia i le olaga na muamua atu i lo lenei. O Lona finagalo ia tuuina mai ia i tatou lena moomooga paia mo le lotogatasi ona o Lona alofa ia i tatou.

“E le mafai ona Ia tuuina mai ia i tatou o ni tagata taitoatasi. O le olioli o le lotogatasi ua Ia matuai finagalo e tuuina mai ia i tatou e le aunoa ma isi. E ao ina tatou sailia ma agavaa ia i ai faatasi ma isi. E le o se tulaga la e faateia ai le uunaia o tatou e le Atua e faapotopoto ina ia Ona faamanuiaina i tatou.” Ua Ia finagalo ia tatou faapotopoto i aiga. Ua Ia faatuina vasega, uarota, ma paranesi ma poloaiina i tatou ia faapotopoto soo faatasi. I na faapotopotoga, lea ua mamanuina e le Atua mo i tatou, o loo taoto ai lo tatou avanoa sili. E mafai ona tatou tatalo ma galulue mo le lotogatasi o le a faapea ona aumaia ia i tatou le olioli ma faateleina ai lo tatou mana e auauna atu” (“E Fusia o Tatou Loto ia Tasi,” Ensign po o le Liahona, Nov. 2008, 69).

Mataupu Faavae ma Feagaiga 38:27, 34–36. Tausia o e matitiva ma ia lotogatasi

O le faleoloa o Newel K. Whitney sa totonugalemu i taumafaiga a le Ekalesia e “vaaia e ua matitiva ma e ua le tagolima, ma auauna atu mo lo latou toomaga” (MF&F 38:35).

I le Mataupu Faavae ma Feagaiga 38, na poloaiina ai e le Alii le Au Paia ina ia logotasi ma ia tausia e matitiva. O le lua lenei o mataupu faavae taua e tatau ona faavae ai Siona ma o se vaega o le tulafono o le malo selesitila. O nei poloaiga e lua o loo faamamafa mai foi i le Mose 7:18 ma le 4 Nifae 1:2-3. Mulimuli ane, Ina ua taumafai le Au Paia e ola i le tulafono o le faapaiaga i Misuri, sa le i faamanuiaina i latou ona sa latou ‘lē faasoa atu a latou mea… i e matitiva” ma sa latou “le lotogatasi” (MF&F 105:3–5; tagai foi MF&F 105:5). O le taimi nei e tele avanoa i le Ekalesia e tausia ai i latou o e manaomia, e aofia ai le foai atu o se taulaga anapogi limafoai.

Faitau le Mataupu Faavae ma Feagaiga 38:28–42, ma vaavaai mo mafuaaga na faapotopoto ai le Au Paia i Ohaio.

Mataupu Faavae ma Feagaiga 38:28–32. “Afai ua outou saunia o le a outou le matatau.”

I le Mataupu Faavae ma Feagaiga 38:28–32, na lapataia lemu e le Alii le Au Paia e uiga i mea sa na o Ia na silafia mai Lana silafaga paia ma sa poloaiina ai le Au Paia e o i Ohaio. Na Ia faamamafa mai faapea e ala i lo latou usiusitai ma sauniuniga, o le a leai se mea latou te matatau ai (tagai MF&F 38:15, 30).

Na saunoaElder L. Tom Perry (1922–2015) o le Korama a Aposetolo e Toasefululua e uiga i le taua o le sauniuni.

“I aso taitasi tatou te molimauina ai le femoumouai tele o siitaga o fefaatauaiga; o taua; fevataua’i o tagata; o mafatiaga faaleatunuu; o tulaga eseese o le tau; o ‘au le mafaitaulia o le ola legavia, o solitulafono, ma faiga malolosi; osofaiga ma uunaiga o aiga ma tagata tagata taitoatasi; o le saoasaoa o tekinolosi ua tau leai ai ni galuega; ma isi mea. Ua matua manino lava le manaomia ona sauniuni. O le faamanuiaga sili o le saunjia tatou te maua ai le saolotoga mai le matata’u, ae pei ona faamoania mai ia i tatou e le Alii i le Mataupu Faavae ma Feagaiga: ‘Afai ua outou saunia, o le a outou le matata’u’ [MF&F 38:30].

“E pei lava ina taua lo tatou lava saunia faaleagaga o i tatou lava, e tatau foi ona tatou saunia mo manaoga faaletino. E manaomia i tatou taitoatasi e faaavanoa se taimi e fesili ifo ai ia i tatou lava, O a tapenapenaga e tatau ona ou faia e taulima ai o’u manaoga ma manaoga o lo’u aiga?” (“Afai Ua Saunia Outou, o le a Outou Le Matata’u ai Lava,” Ensign, Nov. 1995, 35–36).

Mataupu Faavae ma Feagaiga 38:31–32. “O le a outou tuu atu ia te outou la’u tulafono; ma o iina o le a faaeeina ai outou i le mana mai luga”

O se vaega o le Alasopo o Chillicothe, lea sa ui atu i le faatoaga a Isaako Moli, sa uia e Iosefa ma Ema Samita ao la malaga atu i Katelani, Ohaio.

E le gata ina ia fesoasoani ai i Ona tagata e sosola ese mai le faatafunaga, ae sa folafola atu foi e le Alii a oo ina faapotopoto faatasi le Au Paia i Ohaio, o le a Ia tuu atu ia te i latou se tulafono ma faaee atu ia te i latou le mana. I le aso 9 o Fepuari, 1831, a o lei leva ona taunuu i Katelani, Ohaio, na maua ai e le Perofeta o Iosefa Samita se faaaliga lea ua tusia i le Mataupu Faavae ma Feagaiga 42:1–72. Sa ia mauaina nisi faatonuga atili i le aso 23 o Fepuari (tagai i le MF&F 42:73–93). O le tuu faatasia, ua ta’ua ai nei faaaliga “o le tulafono a le Ekalesia” (MF&F 42, faaulutala o le vaega). Mulimuli ane, ia Iuni 1833, sa toefaamanatu atu ai e le Alii i le Au Paia ia Lana poloaiga e “fausia se fale, o se fale lea ua ou fuafuaina e faaeeina ai i latou ua Ou filifilia ile mana mai luga” (MF&F 95:8; tagai foi MF&F 88:119). Sa faaaeeina Iosefa Samita ma Oliva Kaotui i le mana i le aso 3 Aperila, 1836, ina ua la mauaina ki o le pule o le perisitua mai avefeau mai le lagi (tagai MF&F 110:9). Sa maua e le Au Paia amiotonu o e sa auai i le faapaiaga o le malumalu i Katelani ma isi sauniga o le malumalu le sasaa mai o meaalofa faaleagaga ma faaaliga. O le faaeega o le mana e le tutusa ma le sauniga lea na folasia mai i tagata amiotonu o le Ekalesia i se taimi mulimuli ane i Navu, Ilinoi.

Mataupu Faavae ma Feagaiga 38:42. “Ia mamā outou o e e tauaveina ipu a le Alii”

Na faamatala mai e Elder Jeffrey R. Holland le uiga o se fasifuaitau o loo maua i le Mataupu Faavae ma Feagaiga 38:42:

“Se’i ou faamatala atu ia te outou le uiga o lena fasifuaitau ‘tauaveina ipu a le Alii’. I aso anamua sa tusa e lua faauigaga, e taufai fesootai uma i le galuega o le perisitua.

“O le muamua e faasino i le toe maua mai ma toe faafoi i Ierusalema o omea eseese o le malumalu sa aveina i Papelonia e le Tupu o Nepukanesa. I le taulimaina patino o le faafoi mai o nei mea, sa toefaamanatu atu ai e le Alii i na uluai uso le paia o soo se mea e i ai se faia ma le malumalu. O le mea lea a o latou toe aveina i lo latou nuu moni ia nei ipu faaofuofu eseese, pesini, ipu, ma isi ipu, e tatau ia i latou lava ona mama e faapei o mea mo sauniga o loo latou tauaveina [tagai 2 Tupu 25:14–15; Esera 1:5–11].

“O le faauigaga lona lua e fesootai ma le muamua. E faapena foi ipu faaofuofu ma mea sa faaaoga mo sauniga faamama i le fale. Na ta’ua e le Aposetolo o Paulo, ina ua tusi atu i lana uo talavou o Timoteo, e uiga i nei mea, ‘I se fale tele o loo i ai … ipu auro ma … ario, … o ipu laau ma omea’—o nei mea mo le faataeeleina ma le faamamaina e masani ai i le taimi o le Faaola. Ae na faaauau le tala a Paulo e faapea, ‘Ai se tasi … e faamama ia te ia [ai le le agavaa], o ia o le a fai ma ipu… e tauleleia, e aoga foi mo le alii, ua saunia mo galuega lelei uma.’ O le mea lea, fai mai Paulo, ‘Ia e sola ese … i tuinanau o taulelea: … tausisi i le amiotonu, … valaau i le Alii ai le loto mama [2 Timoteo 2:20–22; faaopoopo le faamamafa].

“I nei tala faatusi paia e lua, o le savali o le avea ai ma e ua tauaveina le perisitua e le gata ina tatou taulimaina ipu paia ma faatusa o le mana o le ‘Atua—mafaufau i le sauniunia, faamanuia, ma le tufaina o le faamanatuga, mo se faataitaiga—ae e tatau foi ona tatou avea foi o se meafaigaluega ua faapaiaina. I se isi itu ona o mea e tatau ona tatou faia ae e sili atu ona taua ona o tagata e tatau ona tatou avea ai ua ta’u mai e perofeta ma aposetolo ia i tatou ia ‘sosola ese … i tuinanau o taulelea’ ma ‘valaau atu i le Alii ai le loto mama.’ Ua latou ta’u mai ia i tatou ia mama” (“Faapaiaina,” Liahona, Ian. 2001, 39

Mataupu Faavae ma Feagaiga 41: Talaaga Faaopoopo Faasolopito

Na tuua e Iosefa ma Ema Samita ia Niu Ioka, faatasi ma Sini Rikitone ma Eteuati Paterika e o i Katelani, Ohaio. Ina ua latou taunuu atu i Katelani i le amataga o Fepuari 1831, sa afe Iosefa i le faleoloa o Newel K. Whitney. O Newel Whitney ma lona toalua o Ann, o ni tagata faatoa liliu mai i le Ekalesia, ae la te lei feiloai lava i le Perofeta. Sa ulu atu Iosefa i le faleoloa, tuu atu lona lima i luga o le fata ma fai atu, “Newel K. Whitney, o oe le tagata lea.” Ina ua faailoa mai e Newel sa fai si ona faaletonu aua na te lei iloaina po o ai lea e tautala i ai, ma sa tali atu le Perofeta, “O au o Iosefa le Perofeta; sa e tatalo ia ou oo mai iinei, o lea o le a le mea e te manao ai ia te au?” (i le Mark Staker, “Thou Art the Man,” Ensign, Apr. 2005, 37).

Na muai feiloai Iosefa Samita ia Newel K. Whinery i le faleoloa o le au Whitney i Katelani, Ohaio.

Sa maitaga Ema Samita i se masaga i totonu o na masina, ma sa valaaulia e le au Whitney ia Iosefa ma Ema e latou te nonofo i lo latou fale. Ae, sa moomia pea lava e Iosefa ma Ema so la’ua fale mautu e nonofo ai, e faapena foi Sini ma Fipe Rikitone. O lo la liliu mai i le Ekalesia, na lafoai ai e le au Rikitone le avanoa e nonofo ai i se fale sa fauina mo i la’ua e lana aulotu sa i ai, a o faifeau o ia i Mentor, Ohaio. Sa ofo atu e Leman Copley, o le sa i ai sana faatoaga tele i Thompson, Ohaio pe tusa ma le 20 maila i sasae o Katelani, na te faia ia fale ma sapalai mo Iosefa ma Sini. (Tagai The Joseph Smith Papers, Documents, Volume 1: July 1828–June 1831, ed. Michael Hubbard MacKay and others, [2013], 241.) Sa tatalo Iosefa ma sa maua mai le faaaliga o loo tusia i le Mataupu Faavae ma Feagaiga 41, lea sa ta’u mai ai e tatau i le Au Paia ona fauina se fale mo le Perofeta ma o Sini Rikitone “e tatau ona ola e tusa ai ma le mea e foliga mai ua lelei ia te ia” (MF&F 41:8). Sa nonofo ia Iosefa ma Ema faatasi ma le au Whitney mo na o ni nai vaiaso, ona la toe sii atu lea i le fale o Isaako Moli a o fauina e le Au Paia sina fale faaiviivi laitiiti mo i la’ua i le faatoaga a Moli.

Faitau le Mataupu Faavae ma Feagaiga 41, ma vaavaai po o a faamanuiaga na folafola atu e le Alii i Ana auauna pe afai latou te tutu faatasi i le faatuatua ma tatalo.

Mataupu Faavae ma Feagaiga 41

Ua aoao mai le Alii o soo moni o le a tausia Lana tulafono

Mataupu Faavae ma Feagaiga 41:5. “O ia o lē e taliaina laʼu tulafono ma faia, o ia lava lea o loʼu soo”

I se faaaliga na maua mai i le aso 4 Fepuari, 1831, na fetalai atu ai le Alii i taitai o le Ekalesia o le a mauaina Lana tulafono e “ala i le tatalo o lo [latou] faatuatua” (MF&F 41:3). I totonu o ni nai aso o lenei folafolaga, i le aso 9 Fepuari, sa faaali mai ai e le Alii Lana tulafono i le Ekalesia (tagai MF&F 42:1–72). I le faamoemoega o lena faaaliga, na faamalamalama mai ai e le Alii e faapea ina ia avea ma soo moni, e tatau i e mulimuli ia te Ia ona maua Lana tulafono ma ia faia (tagai MF&F 41:5). E ui atonu e toatele e ono faapea mai e talitonu ia Iesu Keriso, ae e le o i latou uma ua naunau e faia le mea ua Ia fetalai mai ai. O i latou o le a faia le mea ua Ia poloai mai ai ua folafola atu i ai o le a latou ulu atu i le malo o le lagi (tagai Mataio 7:21).

Na faamanatu mai e Peresitene Dallin H. Oaks o le Au Peresitene Sili ia i tatou le uiga o le avea ma soo moni o le Alii o Iesu Keriso: “O le mulimuli ia Keriso e le o se faiga faasamasamanoa pe na o ni taimi ae o se tautinoga faifai pea ma o le ala o le olaga e faatatau i taimi uma ma i nofoaga uma” (“O Soo o Keriso,” Ensign po o le Liahona, Me 2013, 97).

Sa molimau mai foiElder Dieter F. Uchtdorf o le Korama a Aposetolo e Toasefululua:

“E le lava le na ona tautala e uiga ia Iesu Keriso pe folafola atu o i tatou o Ona soo. E le lava le siomia o i tatou lava i faatusa o la tatou tapuaiga. O le avea ma soo e le o se taaloga a tagata matamata. E le mafai ona tatou faamoemoe e maua faamanuiaga o le faatuatua i le na ona tutu e leai se mea e fai i tua o le laina pe faapea e mafai ona tatou maua faamanuiaga o le ola maloloina i le nofonofo i luga o le sofa ma matamata i taaloga i le televise ma tuu atu fautuaga i le au taaalo. Ae mo isi, ‘o le soo matamata’ e sili atu pe afai e le o se auala autu lea o le tapuai.

“E le o se tapuaiga ua matafi la tatou taupaiga. E le mafai ona tatou maua faamanuiaga o le talalelei i le na ona matau o mea lelei o loo faia e isi. E manaomia ona tatou o ese mai tua o laina ma faatino mea tatou te folafola atu” (“O le Ala o le Soo,” Ensign po o le Liahona, Me 2009, 76–77).

Mataupu Faavae ma Feagaiga 41:9. “Ua Ou valaauina… ; ma … e tatau foi ona tofia o ia i le leo o le ekalesia, ma faauu o se epikopo”

I le faaaliga o loo tusia i le Mataupu Faavae ma Feagaiga 41, e le gata ina valaauina e le Alii ia Eteuati Paterika e avea ma se epikopo i Lana Ekalesia, ae sa Ia faaalia mai ai foi le mamanu e faatatau ia i latou uma o e valaauina e galulue i le Ekalesia. Muamua, e tatau ona valaauina se tagata e le Atua e ala i faaaliga i le o pule. I le valaauga o Eteuati Paterika, sa faaali mai ai e le Alii i le Perofeta o Iosefa Samita o Eteuati ua tatau ona avea ma uluai epikopo o le Ekalesia i lenei tisipenisione. Lona lua, o i latou o e tofia i le ala e tatau ai e le Alii e tatau ona tofia, pe lagolagoina, “i le leo o le ekalesia.” Ma le mea mulimuli, o tagata e tatau ona faauu pe vaetofia i o latou tofi po o valaauga i le pule o le perisitua.

Mataupu Faavae ma Feagaiga 41:9–11. “La’u auauna Eteuati Paterika”

Na muamua faalogo Eteuati Paterika i le talalelei toefuataiina i le tautoulu o le 1830, ina ua afea e faifeautalai na auina atu i sa Lamana ia Katelani, Ohaio, a o latou agai atu i Misuri (tagai MF&F 28:8; 30:5–8; 32:2–3) Peitai, e lei papatisoina o ia, seia oo ia Tesema. Na tusia e Lusi Maki Samita, le tina o le Perofeta le mea lea e uiga i le faaiuga a Eteuati Paterika e papatiso: Ia Tesema [1830], na atofa ai e Iosefa se fonotaga i lo matou fale, ma ao pulefaamalumalu o ia, sa o mai Sini Rikitone ma Eteuati Paterika i totonu ma nonofo ifo i le potopotoga. Ina ua maea le lauga a Iosefa, sa ia tuuina atu i tagata uma le avanoa e talanoa mai ai po o ai e i ai se finagalo e fia faaalia. O lea la, na tulai ai le Susuga a Paterika ma faapea mai, sa i ai i Manaseta ma le manatu ia maua mai ni faamatalaga atili e uiga i aoaoga faavae sa matou talaiina, [peitai] ona sa le maua mai matou, o lea sa ia fesilisili ai i o matou tuaoi e uiga i o matou uiga faaalia, lea na latou fai mai, sa lelei atoatoa, seia oo ina faaseseina i matou [latou] e faatatau i le Tusi a Mamona. Sa ia fai mai foi, sa savali atu i le matou faatoaga ma matauina ai le lelei o le faatulagaina ma le manuia lea sa faaalia ai, ma, o le vaaia o mea sa matou ositaulagaina ona o lo matou faatuatuaga, ma le faalogoina sa le fesiliga lava lo matou faamaoni i soo se tulaga nai lo na o lo matou tapuaiga, sa talitonu o ia i la matou molimau, ma ua sauni e papatiso, ‘pe afai’ o lana faamatalaga lea, ‘o le a papatisoina a’u e Uso Iosefa’“ (“Lucy Mack Smith,History,1845,”191, josephsmithpapers.org; ua faalaugatasia le sipelaga ma faailoga). Sa papatisoina Eteuati Paterika e Iosefa Samita i le aso 11 o Tesema, 1830.

I Katelani, Ohaio, sa valaauina ai Eteuati Paterika e avea ma uluai epikopo o le Ekalesia, ma mulimuli ane sa ia mafatia i le tele o sauaga i Misuri, e aofia ai le valitaina o ia ma faapipii i ai fulumanu e se au faatupu vevesi matamataita ona sa le mafai ona ia lafoai lona faatuatua i le Tusi a Mamona. Na maliu o ia o se tagata faamaoni o le Ekalesia i le 1840 i Navu, Ilinoi, i le 46 o tausaga o lona soifua. O se faasilasilaga o lona maliu na ta’ua ai mea nei e uiga i le maliu o Eteuati: “Na uma lona soifua o se taunuuga o Sauaga i Misuri, ma o ia o se tasi o lena faitau aofai o lona toto o le a moomia i o latou lima” (faasilasilaga o le maliu o Eteuati Paterika, Times and Seasons, Iuni 1840, 128). (Mo nisi faamatalaga atili e uiga ia Eteuati Paterika, tagai i le Mataupu Faavae ma Feagaiga 36; 41:9–11; 42:10; 50:39; 51:1–4, 18; 52:24; 57:7; 58:14–16, 24–25, 61–62; 60:10; 64:17; 124:19tagai foi i le Church History in the Fulness of Times Student Manual, 2nd ed. [Church Educational System manual, 2003],82.)

O le naunautaiga o Eteuati Paterika “e tuua lana fatu’aiga ae faaalu uma lona taimi i galuega a le ekalesia” (MF&F 41:9) ua faamautu i le tala lea: “Na faamatala mulimuli ane e le afafine o [Eteuati] Paterika e faapea ina ua mave le faalauina mai o lenei faaaliga, sa faatau atu e lona tama ana meatotino ma ‘sa iloa ai ae itiiti’ mai le fefaatauaiga. Sa ia faaopoopo mai, ‘O le filifiliga a lo’u tama e auai i le lotu mamona ma le ositaulagaina o lona fanua, sa mafua ai ona manatu ana uo o le lalolagi ua valea o ia. Sa lei mafai ona latou iloa le mea sa i ai i le lotu na afua ai ona lafoai e se tagata mea uma o le lalolagi mo lea’” (i le The Joseph Smith Papers, Documents, Volume 1: July 1828–June 1831,244).

I le Mataupu Faavae ma Feagaiga 41:5, na faamalamalama mai e le Alii e faapea “o le e mauaina la’u tulafono ma faia” o Lona soo lea. O a ni mea e mafai ona e faia e faaali atu ai i le Alii o le a e maua Lana tulafono ma faia? Aisea e taua ai mo oe le saili ia avea o se soo o Iesu Keriso?

Punaoa Faaopoopo

• Elizabeth Maki, “Go to the Ohio,” i le Revelations in Context, ed.Matthew McBride and James Goldberg (2016), 70–73, po o le history.lds.org.