Lesona 81
Mataupu Faavae ma Feagaiga 76:81–119
Folasaga
O lenei lesona e suesue ai le faaaliga i le malo telesitila na faaali mai i le Perofeta o Iosefa Samita ma Sini Rikitone, e pei ona faamaumauina i le Mataupu Faavae ma Feagaiga 76. Na faamatalaina e Iosefa Samita ma Sini Rikitone mea na la aoaoina e uiga ia i latou o e o le a mautofi i le malo telesitila ma e uiga i taunuuga o le teenaina o le molimau ia Iesu Keriso. Sa laua faamatalaina foi mea e eseese ai le malo telesitila mai isi malo o le mamalu.
Fautuaga mo le Aoaoina Atu
Mataupu Faavae ma Feagaiga 76:81-112
Ua faaali mai e le Alii ia Iosefa Samita ma Sini Rikitone se faaaliga i le malo telesitila
Valaaulia tagata aoga e mafaufau faapea o se uo e auai i se isi tapuaiga Kerisiano na fai mai ia i latou, “Na fai mai la’u faifeau a tatou feoti, tatou te o, a le i le lagi o seoli. Ou te le o lagona ua lava lo’u lelei ou te alu ai i le lagi i le taimi nei, ae ou te le o lagona foi o o’u matuai leaga e tatau ai ona ou alu i seoli. O le a le aoaoga a le tou ekalesia e uiga i le lagi ma seoli?”
-
E faapefea ona e tali atu i lau uo?
Faaali atu le ata mai le lesona 78 e ta’ua “Mataupu Faavae ma Feagaiga 76: Otootoga o le Faaaliga” (po o le valaaulia o tagata o le vasega e aumai i fafo a latou lava kopi o le ata). A o talanoaina e tagata aoga le vaega o totoe o le Mataupu Faavae ma Feagaiga 76, uunaia i latou e vaavaai mo upumoni e mafai ona fesoasoani i lenei uo.
Valaaulia se tagata aoga e faitau leotele le Mataupu Faavae ma Feagaiga 76:81–83, 101, 103. Fai atu i le vasega e mulimuli i le faitauga, ma vaavaai mo upu ma fasifuaitau o loo faamatala ai tagata o le a mautofi i le malo telesitila.
-
O a upu ma fasifuaitau i nei fuaiupu e faamatala ai tagata o le a mautofi i le malo telesitila? (Atonu e manaomia ona e faamalamalama atu e faapea o se faataulaitu o se tagata e auai i gaoioiga e valaaulia ai faatosinaga a agaga leaga. O se mulilua o se tagata e auai i agasala o feusuaiga.)
-
E tusa ai ma fuaiupu e 82 ma le 101, o nisi tagata o le a mautofi i le malo telesitila aua sa latou mumusu e maua faamanuiaga silisili na ofoina atu ia i latou. O a faamanuiaga ua latou teena? (Ua latou teena ma le loto i ai le molimau ia Iesu ma le talalelei. Ona ua latou teena le Faaola ma Lana talalelei, ua latou mumusu ai i le avanoa e salamo ai i a latou agasala ma faamamaina e ala i le Togiola. A o talanoaina e tagata aoga lenei fesili, atonu e te manao e faamanatu atu ia te i latou mea sa latou aoaoina i le lesona talu ai e uiga i le totoa i le molimau ia Iesu. Faailoa atu o le mamalu tatou te mautofi ai, o le a faalagolago lea i le ala tatou te maua ai lenei molimau [tagai i le MF&F 76:50–51, 69, 78 79, 81–82, 101].)
-
E tusa ai ma le fuaiupu e 83, e faapefea ona ese i latou o e o le a mautofi i le malo telesitila mai atalii o le malaia? (Latou te le solia le agasala e le mafaamagaloina o le faafitia o le Agaga Paia [tagai i le MF&F 76:35].)
Valaaulia tagata aoga e faitau filemu le Mataupu Faavae ma Feagaiga 76:84–85, 104–106, ma vaavaai mo mea o le a tupu i e amioleaga a o lei mafai ona latou maua le mamalu telesitila.
-
O le a le mea e tupu i e amioleaga a o lei mafai ona togiolaina i latou ma faataga e mautofi i le malo telesitila? (Fesoasoani i tagata aoga e faailoa mai le upumoni lenei: o i latou o e mautofi i le malo telesitila e tatau ona puapuagatia i seoli a o le’i laveaiina i latou e le Faaola. Atonu e te manao e tusi lenei upumoni i le laupapa.)
Ina ia fesoasoani i tagata aoga ia malamalama i le uiga o le upu seoli, faamalamalama atu o loo faaaoga i tusitusiga paia le upu e le itiiti ifo i ni itu se lua. Muamua, o seoli o le vaega o le lalolagi o agaga e nofoia e tagata amioleaga ma o se tulaga moni ae le tumau o le faasalaga ma le puapuagatia faaleagaga. Lona lua, o nisi taimi e faaaoga ai e tusitusiga paia le upu seoli e faasino i se tulaga tumau o le faasalaga ma le puapuagatia mo atalii o le malaia. (Tagai Bible Dictionary, “Hell”; Taiala i Tusitusiga Paia, “Seoli,” scriptures.lds.org.)
-
O a upu i le fuaiupu e 84–85 ma le 104–106 o faamatala ai puapuaga o le a oo i e amioleaga pe a latou oti? (Atonu e manaomia ona e faamalamalama atu faapea, i le fuaiupu e 105, o le fuaitau “afi e faavavau,” o se faaupuga faafaatusa e faatatau i le mafatia o e amioleaga o e o le a mautofi i le malo telesitila. E le faapea o le a le muta lava lo latou puapuagatia. (Tagai i le MF&F 19:4–12.)
Ia faamamafa atu o tulaga i seoli e oo i ai i latou o e o le a mautofi i le malo telesitila, o le a le tumau. Talu ai o nei tagata taitoatasi o le a le salamo ma faaaoga faamanuiaga o le Togiola i o latou olaga, o le a latou nonofo ai i seoli i le taimi atoa o le Meleniuma, e totogi ai le sala mo a latou agasala e ala i mea latou te puapuagatia ai.
-
O a fuaitau mai fuaiupu e 85 ma le 106 o loo aoao mai o seoli o le a avea ma se tulaga lē tumau mo i latou o e o le a mautofi i le malo telesitila?
Valaaulia se tagata aoga e faitau leotele le saunoaga lenei a Peresitene Iosefa Filitia Samita, ma valaaulia le vasega e faalogologo mo taunuuga o mafatiaga o le a oo i le tagata amioleaga i seoli:
“O lenei mafatiaga o le a avea ma auala o le faamamaina, po o le faaatoatoaina, ma o le ala lea, o le a aumaia ai e amioleaga i se tulaga ia mafai ai ona latou maua le tino ola pea, e ala i le laveaiga a Iesu Keriso. O le a toe faatasia o latou agaga ma tino, ma o le a latou nonofo i le malo telesitila. Ae o lenei toetutu o le a le oo mai seia oo i le iuga o le lalolagi” (Doctrines of Salvation, comp. Bruce R. McConkie, 3 vols. [1954–56], 2:298).
Otooto le Mataupu Faavae ma Feagaiga 76:106–108 i le faamatala atu o le amioleaga o le a puapuagatia mo a latou agasala seia oo ina faamaea e Iesu Keriso Lana galuega ma ave a’e le malo o le Atua i le lalolagi i Lona Tama. Ona faapaleina loa lea o Keriso i le mamalu.
Valaaulia se tagata aoga e faitau leotele le Mataupu Faavae ma Feagaiga 76:109–111. Ona valaaulia lea o se isi tagata aoga e faitau leotele le Mataupu Faavae ma Feagaiga 137:9. Fai atu i le vasega e mulimuli i le faitauga, ma vaavaai mo le mea o le a tupu pe a oo mai i latou o e e tatau ona mautofi i le malo telesitila i luma o le nofoalii o le Atua ina ia faamasinoina.
-
E tusa ai ma le Mataupu Faavae ma Feagaiga 76:110, o le a le mea o le a tupu a o aumai nei tagata i luma o le nofoalii o le Atua ina ia faamasinoina? (O le a latou tootutuli ma faailoa atu o Iesu Keriso o lo latou Faaola.)
-
E tusa ai ma le Mataupu Faavae ma Feagaiga 76:111 ma le 137:9, o le a le mea o le a faavae ai e le Alii Lana faamasinoga?
Faamalamalama atu e faapea, e ui o le fuaiupu e 111 e faatatau faapitoa ia i latou o e o le a mautofi i le malo telesitila, ae o le upumoni o loo aoaoina i lenei fuaiupu e faatatau i tagata uma.
-
E tusa ai ma le fuaiupu e 111, o le a le mea e iloa ai le malo o le mamalu tatou te mautofi ai? (Fesoasoani i tagata aoga e faailoa mai le aoaoga faavae lenei: O le malo o le mamalu tatou te mautofi ai, o le a iloiloina e ala i a tatou amioga i lenei olaga ma manaoga o o tatou loto. Atonu e te manao e tusi lenei aoaoga faavae i luga o le laupapa.)
-
E mafai faapefea e lenei aoaoga faavae ona faatosina ai au filifiliga?
Valaaulia tagata aoga e faitau filemu le Mataupu Faavae ma Feagaiga 76:86–89, 98, 112 ma vaavaai mo upu ma fuaitau e faamatala ai pe o le a faapeī le ola pea mo i latou o e mautofi i le malo telesitila. Fai atu i tamaiti aoga e lipoti mai mea latou te maua.
-
E faapefea e nei upu ma fuaitau ona faaalia ai le alofa ma le alofa mutimutivale o Iesu Keriso?
Valaaulia ni nai tagata aoga e auauai i le faitauina leotele mai o le Mataupu Faavae ma Feagaiga 76:91–98. Fai atu i le vasega e mulimuli i le faitauga, ma vaai po o le a se faatusatusaga o malo o le mamalu i le tasi ma le isi.
-
E faapefea ona ese le mamalu o le malo selesitila mai le mamalu o malo terasitila ma telesitila? (E mafai ona faaaoga e tagata aoga ni upu eseese, ae o a latou tali e tatau ona atagia ai le upumoni lenei: O le mamalu o le malo selesitila e sili atu i lo mamalu o malo terasitila ma le telesitila.)
-
E tusa ai ma fuaiupu 92–95, o a ni faamanuiaga o le a oo mai ia i latou o e maua le faaeaga i le malo selesitila? E faapefea ona faatusaina nei faamanuiaga i faamanuiaga o le a tuuina mai ia i latou o e mautofi i le malo telesitila?
Mataupu Faavae ma Feagaiga 76:113-119
Ua faamalamalama mai e Iosefa Samita ma Sini Rikitone le auala e mafai ai ona maua e isi le malamalama ua latou mauaina
Otooto le Mataupu Faavae ma Feagaiga 76:113–119 e ala i le faamalamalama atu faapea, ina ua uma le faamatalaina o lenei faaaliga, sa faapea mai Iosefa Samita ma Sini Rikitone, na poloaiina i laua e le Alii e aua ne’i tusia uma mea na faaali mai ia i la’ua. Sa laua faamalamalama mai foi mea e tatau ona tatou faia ina ia mafai ona iloa ma malamalama i mea lilo o le malo o le Atua.
Valaaulia se tagata aoga e faitau leotele le Mataupu Faavae ma Feagaiga 76:116-118. Fai atu i le vasega e mulimuli i le faitauga, ma vaavaai mo auala e mafai ona tatou iloa ma malamalama ai i mea lilo o le malo o le Atua.
-
E tusa ai ma nei fuaiupu, o le a le mea e tatau ona tatou faia ina ia mafai ona iloa ma malamalama i mea lilo o le malo o le Atua? (Tagai foi i le MF&F 76:5–10.)
Ina ia fesoasoani i tagata o le vasega e faamalamalama atu ma molimau atu e uiga i aoaoga faavae ua latou aoaoina mai le suesueina o le Mataupu Faavae ma Feagaiga 76, faamanatu atu ia i latou e uiga i le fesili sa latou talanoaina i le amataga o le vasega: “O le a le aoaoga a lau ekalesia e uiga i le lagi ma seoli?” Vaevae tagata aoga i ni paga, ma fai atu ia te i latou e galulue faatasi e fatu se auivi o le auala e mafai ona latou tali atu ai i lenei fesili. Logo atu ia i latou, a uma ni nai minute, o le a maua e paga taitasi le avanoa e faasoa atu ai a latou tali i le isi paga.
Ina ia fesoasoani i tagata aoga i a latou sauniuniga, tufatufa atu kopi o fesili nei po o le tusi o fesili i luga o le laupapa a o lei amataina le vasega:
O a mea ua faaali mai e le Alii e uiga i le lagi ma seoli i le Mataupu Faavae ma Feagaiga 76?
O a eseesega i le va o malo o mamalu taitasi?
O a eseesega i filifiliga e faia e i latou o e mautofi i nei malo, ma i latou o e e le mautofi i se malo o le mamalu?
O le a se mea e te iloa e moni e uiga i le Faaola ma Lana matafaioi i lo tatou faaolataga?
Fautua atu ina ia mafaufau tagata aoga i nei fesili a’o latou sauniuni e faamatala atu mea e aoao e le Ekalesia e uiga i le lagi ma seoli. E le gata i lea, fai atu i tagata aoga e faaaoga ia le itiiti ifo ma se lua ni mau mai le Mataupu Faavae ma Feagaiga 76 o se vaega o a latou faamalamalamaga.
A maea se taimi talafeagai, valaulia ia paga taitasi e galulue ma se isi paga. Valaaulia se paga se tasi e aoao isi tagata aoga e toalua e faaaoga ai la laua auivi. Pe a uma le avanoa o le paga muamua e faamatala ai le aoaoga faavae, valaaulia le paga lona lua e aoao atu. A uma ona aoao atu tagata aoga, atonu e te valaaulia i latou e faasoa atu i le vasega mea na latou aoaoina.
Ina ia fesoasoani i tagata aoga e faaaoga mea ua latou aoaoina mai le suesue e uiga i malo o le mamalu, tusi fuaiupu le uma nei i luga o le laupapa ma valaaulia tagata aoga e faauma i a latou api o le vasega po o api talaaga mo le suesueina o tusitusiga paia:
O se taunuuga o mea ua ou aoaoina mai le suesue e uiga i malo o le mamalu i le Mataupu Faavae ma Feagaiga 76:
Ou te iloa …
Ou te manao e …
O le a ou …
Pe a ua lava se taimi o tagata aoga e faauma ai lenei gaoioiga, uunaia i latou e mafaufau pe faamata o filifiliga o loo latou faia o le a latou agavaa ai e mautofi i le malo selesitila. Ia uunaia foi i latou e saili le fesoasoani a le Alii e fai ai soo se suiga latou te lagona e tatau ona latou faia. Mafaufau e faasoa atu lau molimau e uiga i upumoni ua e aoaoina mai le suesueina o le Mataupu Faavae ma Feagaiga 76.
Tala ma Faamatalaga o Talaaga
O le Taiala i Tusitusiga Paia o loo faamalamalama mai ai le faaaogaina o le upu seoli i tusitusiga paia:
“Ua talanoa mai faaaliga o aso e gata ai e uiga ia seoli i ni faauigaga e le itiiti ifo ma le lua. Muamua, o le nofoaga le tumau i le lalolagi o agaga mo i latou o e sa le usitai i le olaga i le tino. I le faauigaga lenei, o seoli e i ai lona mutaaga. O agaga iina o le a aoaoina i le talalelei, ma o se taimi pe a uma ona latou salamo, o le a latou toetutu ai i se tikeri o le mamalu lea latou te agavaa ai. O i latou o le a le salamo, ae e le o i latou foi o ni atalii o le malaia, o le a tumau ai i seoli i le Meleniuma atoa. A mavae nei afe tausaga o puapuaga, o le a latou toetutu i se mamalu telesitila (MF&F 76: 81–86; 88:100–101).
“Lona lua, o le nofoaga tumau o i latou o e e le laveaiina e ala i le togiola a Iesu Keriso. I lenei tulaga, o seoli e tumau. E mo i latou o e e ‘tumau pea … i le eleelea’ (MF&F 88:35, 102). O le nofoaga lenei o le a nonofo ai e faavavau ia Satani, ana agelu, ma atalii o le malaia—o i latou o e ua teenaina le Alo ina ua uma ona faaalia mai o ia e le Tama (MF&F 76:43–46)“ (Taiala i Tusitusiga Paia, ”Seoli,“ scriptures.lds.org).
Na saunoa mai Elder Bruce R. McConkie e uiga i le seoli:
“O lena vaega o le lalolagi o agaga e nofoia e agaga amioleaga o e o loo faatalitali i le aso mulimuli ane o lo latou toetutu ua ta’ua o seoli. I le va o lo latou oti ma le toetutu, o nei agaga o le amioleaga e tuliesea i le pouliuli i fafo, i le taufaafefe atuatuvale o seoli, i nofoaga o loo faatalitali ai agaga leaga, i seoli. O iina latou te puapuagatia ai i mafatiaga o le tausalaina; o iina latou te tigaina ai i le tauimasui o le afi e faavavau; o iina e maua ai le tagi aue ma le liliuvau o nifo; o iina e liligi ifo ai le afi o le toasa o le Atua i luga o e amioleaga. (Alema 40:11–14; M.F. & F. 76:103–106.) …
“A mavae lo latou toetutu, o le toatele o i latou o e na puapuagatia i seoli, o le a o atu i le malo telesitila; o le vaega e totoe, na fetuuina o atalii o le malaia, o le a tuuina e auai i le malaia e le gata faatasi ma le tiapolo ma ana agelu. …
“O lea la, mo i latou o e o suli o nisi o faaolataga, lea e aofia ai tagata uma sei vagana ai atalii o le malaia (M.F. & F. 76:44), o seoli e iai sona iuga” (Mormon Doctrine, 2nd ed. [1966], 349, 350, 351; tagai foi i le Mataupu Faavae ma Feagaiga Tusi Lesona a le Tagata o le Vasega, 2nd ed. [Church Educational System manual, 2001], 165–166.)
Mataupu Faavae ma Feagaiga 76:85, 106. O le togiolaina o e amioleaga
Na faamalamalama mai e Peresitene Polika Iaga le auala na tali atu ai nisi o tagata i lona vaitaimi i le upu moni e faapea, o le toatele o e amioleaga o le a iu ina togiolaina ma le toe puapuagatia e faavavau i seoli:
“Ina ua faaali mai e le Alii ia Iosefa Samita ma Sini Rikitone e faapea, e i ai se nofoaga ua saunia mo tagata uma, e fuafua lea i le malamalama na latou mauaina ma lo latou teenaina o le leaga ae faia le lelei, sa avea lea ma se luitau tele i nisi, ma o nisi ua liliuese ona o le a le auina atu e le Atua i le faasalaga e faavavau i latou e le talitonu ia Keriso ma tamaiti pepe, ae i ai so latou nofoaga i le faaolataga, i le taimi o le Alii, mo tagata uma, ma o le a faamanuiaina i latou e faamaoni ma mama ma tonu, e tusa lava pe sa auai i soo se ekalesia pe leai foi. O se aoaoga faavae fou lea i lenei augatupulaga, ma e toatele sa umi se taimi o taumafai e talia lenei aoaoga” (Aoaoga a Peresitene o le Ekalesia: Polika Iaga [1997], 297).
Mataupu Faavae ma Feagaiga 76:92–95. “Mamalu o le selesitila … ua silisili atu i mea uma”
Na aoao mai Elder Orson Pratt o le Korama a Aposetolo e Toasefululua, i le eseesega i le va o le faaolaina i le malo selesitila ma mautofi i isi malo o le mamalu:
“E i ai se eseesega i le va o le faaolaina i se malo, o loo i ai sina mamalu, sina fiafia, ma le faaolaina i le malo o loo afio ai lo tatou Tama. …
“O lo tatou Tamā o le e afio i lagi i tua atu, ma lona Alo o Iesu Keriso, e afifio i le tikeri o le mamalu aupito maualuga i le faavavau. Ua ia te i laua le atoatoaga uma o le mamalu. Ua ia te i laua le atoatoaga o le fiafia, o se atoatoaga o le mana, o se atoatoaga o le poto, malamalama ma le upumoni, ma la te pule i isi malo uma e itiiti ifo le mamalu, e itiiti ifo le fiafia, ma itiiti ifo le mana. … O le talalelei ua faasafua atu e faaea ai le fanauga a tagata i lena lava tikeri o le mamalu e tasi, lea o loo afifio ai lo tatou Tama ma Lona Alo“ (Deseret News, 10 Nov., 1880, 642).
Mataupu Faavae ma Feagaiga 76:99-101. “Ona o i latou ia o e o sa Paulo, ma sa Apolo, ma sa Kefa”
Ina ia tausalaina le le lotogatasi, sa tusi atu ai Paulo i tagata i Korinito:
“Aua ua ta’ua mai outou, o’u uso e, … o ia te outou misa.
“O la’u upu lenei, ua taitoatasi outou ma faapea ane, O a’u o lo sa Paulo; O a’u o lo sa Apolo; O a’u o lo sa Kefa; O a’u o lo sa Keriso.
“Po ua felefele ea Keriso? pe na faasatauroina ea Paulo e sui ai outou? pe na papatisoina ea outou i le igoa o Paulo?” (1 Korinito 1:11–13).
O faaupuga faapena i le Mataupu Faavae ma Feagaiga 76:99–101 e faasino ia i latou e le ogatasi ma Iesu Keriso po o Ana perofeta. O le a fai mai nisi latou te mulimuli ia Iesu Keriso po o perofeta faapitoa, peitai, o nei tagata e teena ma le loto i ai le Faaola ma mumusu e talia Lana talalelei pe mulimuli i Ana perofeta.
Mataupu Faavae ma Feagaiga 76:113-116. E tele mea na vaai ai Iosefa Samita i lenei faaaliga nai lo mea ua tusiaina
E faatatau i le faaaliga ua faamaumauina i le Mataupu Faavae ma Feagaiga 76, na saunoa ai le Perofeta o Iosefa Samita:
“E mafai ona ou faamatalaina e sili atu i le faaselau nai so se isi lava taimi ia mamalu o malo na faaalia mai ia te au i le faaaliga, pe ana faatagaina au, pe ana saunia foi tagata e taliaina” (i le History of the Church 5:402).