Lesona 145
Mataupu Faavae ma Feagaiga 135, Vaega 2
Folasaga
O le lesona lona lua lenei o lesona e lua i le Mataupu Faavae ma Feagaiga 135 ma le maliu faamaturo o Iosefa ma Ailama Samita i le aso 27 o Iuni, 1844. I lenei lesona o le a talanoaina ai e tagata aoga le matafaioi na faia e le Perofeta o Iosefa Samita i le faaolataga o fanau a le Atua.
Fautuaga mo le Aoaoina Atu
Mataupu Faavae ma Feagaiga 135
Na faasilasilaina mai le maliliu faamaturo o Iosefa ma Ailama Samita
A o lei amataina le vasega, faaali atu se ata o Iosefa Samita i luma o le potu (tagai i le Tusi Ata o le Talalelei [2009], nu. 87; tagai foi i le LDS.org). Atonu e te mafaufau e fai atu i le vasega e usu le pese “Viia Le na Fetaia‘i ma Ieova” (Viiga, nu. 15) mo le viiga o le faigalotu. A o lei usuina le viiga, faamalamalama atu na tusia e W. W. Phelps upu o le viiga e manatua ai le Perofeta o Iosefa Samita a’o le’i leva ona mavae le faamaturoina.
Amata le lesona i le fai atu o fesili nei:
-
Pe ua outou talanoa ea ma se tasi e le auai i le Ekalesia e uiga i le Perofeta o Iosefa Samita? Afai o lea, o le a se mea na e talanoa e uiga i ai? (Afai e leai se tasi sa i ai lenei aafiaga, fai atu i tagata aoga po o le a se mea latou te mananao e ta’u atu i isi e uiga ia Iosefa Samita.)
Faamanatu atu i tagata aoga o le Mataupu Faavae ma Feagaiga 135 o loo i ai se faasilasilaga o le faamaturoina o Iosefa ma Ailama Samita. Valaaulia se tagata aoga e faitau leotele le fuaiupu muamua o le Mataupu Faavae ma Feagaiga 135:3. Fai atu i le vasega e mulimuli i le faitauga.
-
O le a le savali o le fuaiupu lenei? (E tatau ona faailoa mai e tagata aoga e faapea, e tele atu mea na faia e Iosefa Samita, vagana ai lava Iesu Keriso, mo le faaolataga o tagata i lenei lalolagi, nai lo se isi lava tagata na ola ai.)
-
O a mea ua faia e le Perofeta o Iosefa Samita mo lo tatou faaolataga ma le faaeaga? (Tusi tali a tagata aoga i luga o le laupapa.)
Valaaulia se tagata aoga e faitau leotele le Mataupu Faavae ma Feagaiga 135:3. Fai atu i le vasega e mulimuli i le faitauga, ma vaavaai mo fasifuaitau o loo faamatala ai mea na faia e Iosefa Samita mo lo tatou faaolataga. Fai atu i tagata aoga e vaavaai mo ni mea faaopoopo e faaopoopo atu i le lisi i luga o le laupapa.
Valaaulia se tagata aoga e faitau le saunoaga lenei mai ia Peresitene Iosefa F. Samita Fai atu i le vasega e faalogologo po o ai ua uunaia e le galuega a le Perofeta o Iosefa Samita.
“O le galuega na faia e Iosefa Samita sa le na o lenei olaga na pau mai ai, ae e faatatau foi i le olaga a sau, ma i le olaga sa i ai. I se isi faaupuga, e faatatau ia i latou o e sa ola i luga o le fogaeleele, ia i latou o loo ola ai ma i latou o e o le a mulimuli mai ia i tatou. E le o se mea lea e faatatau i na o tagata a’o soifua o ia i le tino, ae i le aiga atoa o tagata mai le vavau e oo i le faavavau” (Gospel Doctrine, 5th ed. [1939], 481).
Tagai i le faamatalaga e uiga ia Iosefa i le aumaia o le Tusi a Mamona ma le Mataupu Faavae ma Feagaiga i le fuaiupu e 3. Ina ia fesoasoani i tagata aoga ia malamalama atili i le taua o lenei galuega, valaaulia se tagata aoga e faitau leotele le Mataupu Faavae ma Feagaiga 135:6. Fai atu i le vasega e mulimuli i le faitauga, ma vaavaai mo se mafuaaga na aumaia ai le Tusi a Mamona ma le Mataupu Faavae ma Feagaiga.
-
E tusa ai ma le fuaiupu e 6, aisea na aumaia ai le Tusi a Mamona ma le Mataupu Faavae ma Feagaiga? (Atonu e faaaoga e tagata aoga isi faaupuga, ae e tatau ona latou faailoa mai le upumoni lenei: Na aumaia le Tusi a Mamona ma le Mataupu Faavae ma Feagaiga mo le faaolataga o le lalolagi.)
-
O a ni auala e fesoasoani ai nei tusi e aumaia le faaolataga o le lalolagi?
-
E tusa ai ma le fuaiupu e 6, o le a le mea e avea ai le Tusi a Mamona ma le Mataupu Faavae ma Feagaiga o nisi o tusi e sili ona taua e te ono anaina?
Fai atu i tagata aoga e mafaufau loloto i mea ua latou faia i le Tusi a Mamona ma le Mataupu Faavae ma Feagaiga i o latou olaga.
-
O le a se mea e mafai ona tatou faia e faaali atu ai lo tatou agaga faafetai mo le ositaulaga na faia e Iosefa ma Ailama Samita ina ia aumai ai nei tusi?
Valaaulia tagata aoga e tusi i a latou api o le vasega po o api talaaga mo le suesueina o tusitusiga paia, se auala faapitoa e mafai ona latou faaali atu ai lo latou agaga faafetai mo osigataulaga na faia ina ia aumai ai nei tusi.
Tagai i le lisi na tusia i luga o le laupapa i le amataga o le lesona. Molimau atu, o le fesoasoani e toe aumaia tusitusiga paia, aoaoga faavae moni, pule ma ki o le perisitua, sauniga mo e o ola ma e ua maliliu, ma le faatulagaga o le Ekalesia a Iesu Keriso, na fesoasoani Iosefa Samita i fanau uma a le Atua ia maua atoa le avanoa i faamanuiaga o le Togiola.
Faamalamalama atu e faapea, e ono le malamalama nisi o tagata i lagona po o talitonuga o le Au Paia o Aso e Gata Ai e uiga i le Perofeta o Iosefa Samita. Valaaulia se tagata aoga e faitau leotele le saunoaga lenei mai ia Peresitene Gordon B. Hinckley. Fai atu i le vasega e faalogologo po o a manatu o tagata o le Ekalesia ia Iosefa Samita e faatatau i le Tama Faalelagi ma Iesu Keriso. Afai e mafai, atonu e te manao e tuu atu i tagata aoga taitasi se kopi o lenei saunoaga.
“Matou te le tapuai i le Perofeta. Matou te tapuai i le Atua lo tatou Tama Faavavau ma le Alii toetu o Iesu Keriso. Ae peitai, matou te ta’uta’u atu le Perofeta; matou te talai atu o ia; matou te faaaloalo ia te ia; matou te ava ia te ia o se mea faigaluega i aao o le Silisili Ese i le toefuataiina i le lalolagi o upu moni anamua o le talalelei paia, faatasi ai ma le perisitua lea e mafai ai ona faaaoga le pule a le Atua i le faagaoioiga o mataupu o Lana Ekalesia ma mo le faamanuiaina o Ona tagata” (“Iosefa Samita le Itiiti—O Le Perofeta a le Atua, Auauna Maoae,” Liahona, Tes. 2005, 4).
-
I au lava upu, e faapefea ona e faamatalaina lagona o tagata o le Ekalesia e uiga i le Perofeta o Iosefa Samita?
Valaaulia tagata aoga e mafaufau i le aafiaga o le galuega a le Perofeta o Iosefa Samita sa i ai i o latou olaga ma i olaga o le faitau miliona i le lalolagi atoa. Tusi fesili nei i luga o le laupapa, ma fai atu i tagata aoga e tali i ai i a latou api o le vasega po o api talaaga mo le suesueina o tusitusiga paia:
O a ni auala patino atonu e ese ai lou olaga e aunoa ma le galuega a le Perofeta o Iosefa Samita?
Na faapefea ona uunaia e le Perofeta o Iosefa Samita lou malamalama i le, ma le sootaga ma le Tama Faalelagi ma Iesu Keriso?
Fai atu i se tagata aoga e faitau leotele le saunoaga lenei mai ia Peresitene Thomas S. Monson. Fai atu i le vasega e faalogologo mo auala e mafai ona tatou fesoasoani ai i isi ia maua le olioli o le talalelei.
“Na tuua e [le Perofeta o Iosefa Samita] se talatuu ua mafai ai e le [faitau miliona o] soo i aso nei i konetineta uma ona folafola atu o ia o se perofeta a le Atua. Talosia ia tatou, i tatou uma taitoatasi, taumafai e faaauau le silasila mamao a le Perofeta o Iosefa mo lenei galuega, ma ia faalauteleina lana talatuu e ala i a tatou galuega ma molimau i isi, ina ia mafai ona latou iloa o ia e pei ona tatou iloa, ma ia mafai ona latou iloa le filemu ma le olioli o le talalelei na ia toefuataiina mai” (“Brother Joseph,” Church News, Tes. 31, 2005, 4)
-
E mafai faapefea ona tatou fesoasoani i isi ia iloa le olioli o le talalelei e pei ona toefuataiina mai e ala i le Perofeta o Iosefa Samita?
Faamalamalama atu, mo le vaega o totoe o le vasega e mafai e tagata aoga ona faasoa mai a latou molimau e uiga i le Perofeta o Iosefa Samita ma le Toefuataiga o le talalelei. Valaaulia i latou e mafaufau e faaaoga a latou tali mai le gaoioiga tusitusi na faia muamua atu a o latou faailoa mai a latou molimau.
Faaiu i le faasoa atu o lau molimau e uiga i le Perofeta o Iosefa Samita ma le Toefuataiga. Valaaulia tagata aoga e vaavaai mo ni avanoa i nai aso o loo sosoo ai e faasoa atu ai i isi a latou molimau e uiga i le Perofeta o Iosefa Samita ma lana matafaioi i le toefuataiga o le talalelei a Iesu Keriso.
Tala ma Faamatalaga o Talaaga
O Le Perofeta o Iosefa Samita sa o se molimau ia Iesu Keriso
Tatou te vaai atu i le Perofeta o Iosefa Samita ma le migao ona o mea sa ia faia mo lo tatou malamalama e uiga ia Iesu Keriso ma Lana misiona. Na saunoa mai Elder D. Todd Christofferson o le Korama a Aposetolo e Toasefululua:
“O lana aleaga patino ma le Alii, o lana faaliliuga ma le lomiga o le Tusi a Mamona, ma le faamaufaailogaina o lana molimau i lona toto na faamaturoina, na avea ai Iosefa ma talifaaaliga aupito silisili ese a Iesu Keriso i Lona uiga moni o le Togiola paia. E leai se isi molimau sili atu a Iesu po o se uo e sili atu le faamaoni nai lo Iosefa Samita“ (” Toe Fanauina,“ Ensign po o le Liahona, Me 2008, 79; ua faaopoopo le faatusilima).
O le faatosinaga a Iosefa Samita
I le tautotogo o le 1844, sa asiasi atu ai i Navu ia Josiah Quincy, o le sa avea muamua ma pulenuu o Boston, Masatusa, ma o le peresitene i le taimi lena o le Iunivesite o Harvard, faatasi ai ma lona tausoga o Charles Francis Adams, o le atalii o le sa avea muamua ma Peresitene o le Iunaite Setete o Peresitene John Quincy Adams. Sa latou faaaluina se aso faatasi ma le Perofeta o Iosefa Samita. I tausaga mulimuli ane, na tusi ai e Josiah Quincy e uiga i lona aafiaga:
“O le a lē taumatea o ni tusi aoga i le lumanai, mo le faaaogaina e augatupulaga e le‘i fananau mai, o le a i ai se fesili faapea: O ai le tagata Amerika lauiloa o le seneturi lona sefulu iva, na faia se faatosinaga sili ona malosi i luga o faasinomaga o ona tagatanuu? Ma e mautinoa lava o le a le faigata le tali i lena fesili lea e mafai ona tusia faapenei: O Iosefa Samita, le perofeta Mamona” (Figures of the Past: From the Leaves of Old Journals [1888], 376).