I le aso 20 o Iulai, 1833, na faatonu ai e se vaega e 400–500 o tagata Misuri ina ia aua ne’i toe siitia atu nisi tagata o le Au Paia i le Itumalo o Jackson, ma faapea foi o i latou uma o loo nonofo ai iina e tatau ona o ese. A o lei mafai ona tali atu i ai le Au Paia i Misuri, na amata e ni tagata leaga ona faaleaga a latou meatotino ma faamatau atu o latou ola. I le aso 6 o Aokuso, 1833, na maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 98, lea na faatonuina ai e le Alii le Au Paia i le auala e tali atu ai i sauaga. E ui lava atonu na oo atu ni tala o le faalavelave i Misuri i le Perofeta i Katelani, Ohaio, e tusa ma le 900 maila (1,450 kilomita) le mamao, ae na o faaaliga lava na mafai ona ia malamalama ai i le ogaoga o le tulaga. I lenei faaaliga na ta’ua ai e le Alii puapuaga o le Au Paia, i Misuri ma Ohaio. Sa Ia fautuaina i latou e mulimuli i le tulafono faavae o le laueleele, ma ia tausia a latou feagaiga.
Ua faamalosiau le Alii i le Au Paia a’o feagai ma o latou puapuaga
A o le’i amataina le vasega, tusi le fesili lenei i luga o le laupapa: O a ni ou lagona e ono i ai?
Valaaulia se tagata aoga e faitau leotele le palakalafa lenei. Fai atu i le vasega e mafaufau po o a ni o latou lagona e i ai pe ana faapea sa latou i ai i lenei tulaga.
I le aso Toonai, 20 o Iulai, 1833, sa i le va o le 400 ma le 500 tagatanuu feita o Misuri sa feiloai i le fale faamasino i Initipene, Misuri. Sa latou filifilia se komiti e tusia se pepa o faamatalaga e otooto ai o latou manaoga mo tagata Mamona. Sa latou poloaia faamalosi ina ia le toe i ai ni tagata o le Au Paia o Aso e Gata Ai e toe faatagaina ona siitia atu i le Itumalo o Jackson, ma fai mai, o i latou o loo nonofo ai i le taimi lea, e tatau ona tauto atu e o ese i se vave e mafai ai. E le gata i lea, sa latou poloaiina foi ina ia taofia le toe lolomiina o le nusipepa a le Ekalesia. Ina ua faailoa atu nei poloaiga i taitai o le Ekalesia i Misuri, sa matuai tete’i taitai o le Ekalesia ma talosagaina ai se tolu masina e mafaufau ai i lenei fautuaga ma se’i feutagai ma taitai o le Ekalesia i Ohaio. Sa teena e le vaega o tagatanuu o Misuri na tuuina mai nei poloaiga le talosaga a taitai o le Ekalesia. Ona talosagaina lea e le Au Paia ni aso se 10, ae sa na o le 15 minute na faataga mai e tali atu ai. (Tagai i le Church History in the Fulness of Times Student Manual, 2nd ed. [Church Educational System manual, 2003], 132–33.)
Faasino atu tagata aoga i le fesili o loo i luga o le laupapa, ma fai atu le fesili lenei:
O a ni ou lagona pe ana faapea o oe o se tasi o le Au Paia o loo nofo i Initipene, Misuri, i le taimi lea?
A uma ona tali mai tagata aoga, valaaulia se isi tagata aoga e faitau leotele le palakalafa lenei:
O tagata Misuri sa i ai i le fonotaga i le fale faamasino i Initipene, sa vave ona liliu i se vaega o tagata faatupu vevesi ma filifili ai e faaleaga le ofisa ma le masini lomitusi. Sa latou o faamalosi i totonu o le ofisa lomitusi, talafo meafale i le aualatele ma le togalaau, talepe le masini lomitusi, faataapeape mataitusi o le masini lomitusi, ma faaleagaina toetoe o galuega uma na lolomiina, e aofia ai le vaega tele o itulau sa le’i faapipiiina o le Tusi o Poloaiga. Sa faasolo atu le vaega faatupu vevesi e faaleaga le Faleoloa o Gilbert ma Whitney. Ae peitai, sa faafetaui e Sini Gilbert le vaega faatupu vevesi a’o le’i mafai ona faatinoina la latou fuafuaga, ma folafola atu ia i latou, o le a tapena ana mea ma aluese i totonu o aso e tolu. (Tagai i le Church History in the Fulness of Times, 133.)
Fai atu i tagata aoga e faasoa mai a latou tali i le fesili o loo i luga o le laupapa e faatatau i lenei tala. A uma ona faasoa mai e tagata aoga o latou manatu, valaaulia se tagata aoga lona tolu e faitau le palakalafa lenei:
E tolu aso mulimuli ane, i le aso 23 o Iulai, sa toe vaaia ai foi se vaega faatupu vevesi i le Itumalo o Jackson, Misuri, ae o le taimi lenei, sa faaauupegaina i ni fana, tama’ifana, sasa, ma laau mafiafia. Sa latou susunuina faaputuga vaovaomago ma faatoaga sana ma faaleagaina nisi o fale, fale i faatoaga, ma pisinisi. Sa iu ina latou faafetauia ni taitai se toaono o le Ekalesia o e, ina ua latou vaaia le lamatia o fanua ma soifua o le Au Paia, sa ofoina atu o latou ola e su’i ai i latou. O le teenaina o lenei ofo, sa taufaamatau ane ai taitai o le vaega faatupu vevesi e faapea, o le a sasaina ia tamaloloa, fafine ma tamaiti uma, seiiloga latou te malilie atu e tuua le itumalo. O le i ai o nei faiga faamalosi, sa sainia ai e le usoga se maliega e tuua le Itumalo o Jackson. O le afa o tagata o le Ekalesia ma o le toatele o taitai o le a o ese i le aso 01 o Ianuari, 1834, ae o le vaega e totoe o le a o ese i le aso 1 o Aperila, 1834. Sa faatagaina e le vaega faatupu vevesi ia John Corrill ma Sini Gilbert e nonofo pea e faatau atu ia fanua o le Au Paia o e na tutuli ese. (Tagai i le Church History in the Fulness of Times, 134.)
Valaaulia se tagata aoga e faitau leotele le folasaga i le Mataupu Faavae ma Feagaiga 98. Fai atu i le vasega e mulimuli i le faitauga, ma vaavaai po o le a le mea na musuiaina ai lenei faaaliga. Valaaulia tagata aoga e lipoti mai a latou tali.
E tusa ai ma le folasaga o le vaega, o le a le mea e tulaga ese ai le taimi na maua ai lenei faaaliga?
Faamalamalama atu, sa feagai foi le Au Paia i Ohaio ma sauaga i lea lava foi taimi. O mataupu faavae o loo i lenei faaaliga e faatatau ia i latou, ma e mafai foi ona faatatau ia i tatou. Valaaulia se tagata aoga e faitau leotele le Mataupu Faavae ma Feagaiga 98:1–2. Fai atu i le vasega e vaavaai mo le fautuaga na tuuina mai e le Alii i le Au Paia. (Atonu e aoga ona faamalamalama atu e faapea, o Sapaota, o loo i le fuaiupu e 2, o se upu Eperu o lona uiga o le “o au” po o “autau.” O lona faaaogaga iinei e ta’u mai ai, e poloaiina e le Alii autau o agelu, po o au, ma autau a Isaraelu, po o le Au Paia. [Tagai Bible Dictionary, “Sabaoth.”])
O le a le fautuaga na tuuina mai e le Alii i le Au Paia? (Tusi tali a tagata aoga i luga o le laupapa.)
Aisea e taua ai mo le Au Paia ona ave le faafetai i taimi o faigata?
O le a lou manatu i le uiga o le faatalitali ma le onosai i le Alii?
Valaaulia se tagata aoga e faitau leotele le faamatalaga lenei mai ia Elder Robert D. Hales o le Korama a Aposetolo e Toasefululua. Fai atu i le vasega e faalogologo mo le uiga o le faatalitali ma le onosai i le Alii.
Ata
Elder Robert D. Hales
“O le a la, le uiga o le faatalitali i le Alii? I tusitusiga paia, o le upu faatalitali o lona uiga ia faamoemoe, ia tepa taulai, ma ia faalagolago. O le faamoemoe ma le faalagolago i le Alii e manaomia ai le faatuatua, onosai, lotomaualalo, agamalu, faapalepale, tausia o poloaiga, ma le tumau seia oo i le iuga” (“Faatalitali i le Alii: Ia Faia Lou Finagalo” Ensign po o le Liahona, Nov. 2011, 72).
Aisea na ono taua ai le fautuaga e faatalitali ma le onosai i le Alii mo le Au Paia i Misuri?
O a ni upu faamafanafana o e vaaia i le fuaiupu e 2?
Tusi le faamatalaga le uma lenei i luga o le laupapa: Afai tatou te avatu le faafetai i mea uma, ma faatalitali ma le onosai i le Alii, ona …
Valaaulia se tagata aoga e faitau leotele le Mataupu Faavae ma Feagaiga 98:3. Fai atu i le vasega e mulimuli i le faitauga, ma vaavaai mo mea na folafola mai e le Alii i le Au Paia pe afai latou te usiusitai i Ana fautuaga.
E faapefea ona e faaumaina le mataupu faavae o loo i luga o le laupapa e faavae i le fuaiupu e 3? (O le faamatalaga lenei o se tasi o auala e ono faauma ai e tagata aoga le mataupu faavae: Afai tatou te avatu le faafetai i mea uma, ma faatalitali ma le onosai i le Alii, ona mafai lea e le Alii ona faia o tatou puapuaga ia galulue faatasi mo lo tatou lelei.)
Valaaulia tagata aoga e mafaufau i se tasi latou te iloa, o le na faatalitali ma le onosai i le Alii i taimi o faigata ma ua maua ni mafuaaga e faafetai ai.
O a ni auala na aumaia ai e puapuaga le lelei i le olaga o lena tagata?
Ua fautuaina e le Alii le Au Paia ina ia lagolago le tulafono o le laueleele
Faamalamalama atu e faapea, e le gata i le fautuaina o le Au Paia e faatalitali ma le onosai, na fetalai mai le Alii ia i latou e usitai i Ana poloaiga uma (tagai i le MF&F 98:4) ma fai mai, sa tauamiotonuina i latou “i le lagolagoina o lena tulafono o le tulafono faavae lea o le laueleele” (MF&F 98:6). Sa Ia faamalamalama mai, o le tulafono faavae o le laueleele e lagolagoina “le mataupu autu lena o le saolotoga i le faatumauina o aiā ma avanoa” ma e a “tagata uma” (MF&F 98:5).
Valaaulia se tagata aoga e faitau leotele le Mataupu Faavae ma Feagaiga 98:9-10. Fai atu i le vasega e mulimuli i le faitauga, ma vaavaai mo le fetalaiga a le Alii e uiga i taitai faalemalo. Valaaulia tagata aoga e lipoti mai mea na latou maua.
E mafai faapefea ona fesoasoani le fautuaga a le Alii o loo i le Mataupu Faavae ma Feagaiga 98:4–10 ia i tatou i aso nei po o fea lava le atunuu tatou te nonofo ai?
Ua faatonu e le Alii le Au Paia e tausia a latou feagaiga, e oo lava i taimi faigata
Fai atu i tagata aoga e manatunatu loloto i le fesili lea:
O a ni taui e oo mai ia i latou o e e ofoina atu o latou ola mo le faamoemoe o Iesu Keriso ma Lona suafa?
Valaaulia se tagata aoga e faitau leotele le Mataupu Faavae ma Feagaiga 98:11-15. Fai atu i le vasega e mulimuli i le faitauga, ma vaavaai mo le tali i lena fesili, ma mea na ta’u mai e le Alii i le Au Paia e uiga i le suesueina po o le tofotofoina.
O le a le poloaiga na tuuina mai e le Alii i le Au Paia? (Tagai i le MF&F 98:11–12.)
E tusa ai ma fuaiupu 13–15, o le a se tasi o mafuaaga e suesueina ai i tatou e le Alii? (A uma ona tali mai tagata aoga, tusi le mataupu faavae lenei i luga o le laupapa: E suesue i tatou e le Alii e iloa ai pe o le a tatou tausia a tatou feagaiga e tusa lava pe faigata ona fai.
Aisea atonu na taua ai i le Au Paia na nonofo i Misuri i le 1833, ona iloa lenei upumoni? Aisea atonu e taua ai ona tatou manatuaina lenei upumoni i aso nei?
Fai atu i tagata aoga e mafaufau i se tasi latou te iloa, o se faataitaiga lelei o le tausia o feagaiga i taimi o faigata. Valaaulia ni nai tagata aoga e faasoa mai a latou tali i le vasega.
Valaaulia tagata aoga e mafaufau i mea o le a latou faia e tutumau malolosi ai ma tausia a latou feagaiga e tusa lava pe faigata ona fai o lena mea.
Valaaulia se tagata aoga e faitau leotele le Mataupu Faavae ma Feagaiga 98:16-18. Fai atu i le vasega e mulimuli i le faitauga, ma vaavaai mo mea na fautuaina e le Faaola tagata e fai. Valaaulia tamaiti e lipoti mai mea sa latou mauaina.
Ua ta‘u mai e le Alii i le Au Paia i Katelani e salamo
Faamalamalama atu e faapea, i le taimi na tuuina mai ai e le Alii lenei faaaliga, sa feagai ai foi le Au Paia i Katelani, Ohaio, ma ni faafitauli. I le Mataupu Faavae ma Feagaiga 98:19–22, tatou te faitau ai i le savali a le Alii mo i latou.
Valaaulia se tagata aoga e faitau leotele le Mataupu Faavae ma Feagaiga 98:19-22. Fai atu i le vasega e mulimuli i le faitauga, ma vaavaai mo le fetalaiga a le Alii e uiga i le Au Paia i Katelani. Valaaulia tamaiti e lipoti mai mea latou te mauaina.
E faapefea ona fesootai afioga a le Alii e uiga i le Au Paia i Katelani ma mea na Ia fofogaina mai i le Au Paia i Misuri? (Tagai i le MF&F 98:11.)
E mafai faapefea ona faatatau le savali a le Alii o loo i le fuaiupu e 11 ia i tatou? (Fesoasoani i tagata aoga ia malamalama o le ia “pipii atu i” mea lelei o le tautino ma le le mafaagaeetia i ai.)
Faaiu i le faasoa atu o lau molimau e uiga i aoaoga faavae ma mataupu faavae na talanoaina i le aso. Uunai tagata aoga e lafoai a latou agasala, ma pipii atu i le lelei.
“Sa oo ina faateteleina le masalosalo o uluai tagata na nofoia le eria, i le vave o le toatele o le aofai o tagata o le Ekalesia i le Itumalo o Jackson. Sa fefefe le toatele o tagata o le a le umi ae itiiti lo latou aofai i le aofai o tagata fai mai mai Sasae, o e sa faaosofia e se tapuaiga fou. O ‘tagata tuai [o le itumalo]’ sa o mai i se siosiomaga ese nai lo o le Au Paia o Aso e Gata Ai na fai mai, ma sa o se mea masani le tulai a’e o feeseeseaiga i le aganuu, upufai, tapuaiga, ma le tamaoaiga.
“O tagata na nonofo i le Itumalo o Jackson sa o se vaega amio pa’aa, le popoi, ma aumalolosi, o e na o mai mai le itulagi maugā o le tele o setete i saute i le faatausiusiuga o le itu i sisifo o le Iunaite Setete e su’e ai le saolotoga mai e maua ai le saolotoga mai le puleaina e nuu. O le toatele o i latou sa lē aoaoina ma sa le’i iloa lelei le aganuu lea sa taatele i Niu Egelani ma Sasae. O le toatele o i latou sa auai i le faaaogaina o le gagana masoa, solia o le Sapati, tuuga solofanua, tauga moa [toa], paie, onana, taaalo faitupe, ma le faatupu vevesi. …
“Sa manatu i latou ua leva ona nofoia [le itumalo], o le faatoateleina o tagata o le Au Paia, o le a avea o se faamata’u i tulaga faaupufai, e ui lava sa le’i tauva ni tagata o le Ekalesia mo ni tofi, pe palota uma i se faiga tutusa, i le taimi puupuu na latou nonofo ai i le Itumalo o Jackson. E oo ane ia Iulai o le 1833, ua toeitiiti afe luaselau le faitau aofai o Mamona i le itumalo, ma le isi toatele e taunuu atu i masina taitasi. Sa gugutu nisi o le au paia e faapea, e silia ma le faitau afe o loo o atu e nonofo i le itumalo. … Sa popole tagatanuu o le lotoifale e uiga i se naunautaiga faalelotu na valoiaina e faapea, o le a tafi ese uma tagata ‘Nuuese’ (e le o ni Mamona) pe a faatuina le malo o le meleniuma i le Itumalo o Jackson.
“Sa feita foi faifeau Porotesano i le solo atu o Mamona i le itumalo. Sa faaigoaina le Au Paia o Aso e Gata Ai o ni tagata ta’ina, ma e le faamaoni ma sa ta’usalaina i le tosina gofie ma le valea ona sa latou talitonu i, ma masani ona aafia i vavega, valoaga, faamalologa, faaaliga, ma tautatala i gagana. O le loto leaga ma le fefefe i le aveesea mai o nisi mai a latou lafu na faaopoopo atu i le tetee a faifeau. …
“E le gata i lea, o Mamona faatauoloa ma fesuia’ioloa sa faamanuiaina lo latou maua o se vaega mau [tupe tele] o le Auala o fefaatauaiga i Santa Fe, lea sa i ai muamua le toatele o tagata Misuri. Sa fefefe nisi o tagata na leva ona nonofo i le itumalo ona e faapea, sa naunau tagata o le Ekalesia e maua o latou laueleele ma pisinisi. E le gata i lea, sa ‘le’i faatauina mai e le Au Paia ia oloa mai le aufaatau oloa i le lotoifale, ona sa leai ni a latou tupe, ae sa faafesuia’i ia i latou lava i le faleteuoloa o le Ekalesia. … O nisi o tagata na leva ona nonofo i le itumalo, sa faatauina atu o latou fanua i Mamona ma o ese. O lona uiga ua atili toaitiiti tagata faatau i faleoloa, ma se faaletonu tautupe i le lumanai’ mo tagata tuai o le a nonofo ai pea. [T. Edgar Lyon, “Independence, Missouri, and the Mormons, 1827–1833,” BYU Studies, autumn 1972, 17–18].
“O le atili faigata o le mataupu, i le tautotogo o le 1833, na lolovaia ai Misuri, ma faaleagaina ai le mea e tuta ai vaa i Initipene, ma siitia ese ai le alavai o le vaitafe mai le alalafaga. Sa faatuina i luga atu o le punavai se taulaga fou, o Westport, na lelei atu lona tuta vaa, ma sa faapea ona faiifo ai pisinisi i Initipene. Na tuuaia e le au faipisinisi i Initipene ia Mamona mo lenei tulaga. O le muai vaaia o le mea e ono aumaia e le lumanai, o lea na ofo ai nisi o tagata tuai e faatau atu a latou meatotino uma i le Au Paia. Sa mananao tagata o le Ekalesia e faatau mai faatoaga ma meatotino, ae sa le‘i lava ni tupe e faia ai lena mea. O lenei mea na feita ai tagata Misuri, ma e le’i leva ae latou faasalalauina ni tala faatupu e matuai matitiva Mamona.
“Sa matatau ma feita tagata Misuri sa nonofo i le va o laueleele na faato’a ma laueleele sa le’i faatoaina i tagata Initia. Sa faateteleina lo latou inoino i le vaitau o le 1830, ina ua amata e le malo ona toe faanonofo tagata mai sasae i laueleele e lata i sisifo o Initipene. Ina ua mavae le Taua o le Black Hawk i le 1832, sa talosaga tagatanuu o Misuri i sisifo i le Konakelesi e faatutu ni ofisa o le militeli mo lo latou puipuiga. Na oo atu uluai faifeautalai Mamona i totonu o lenei siosiomaga atuatuvale ma folafola atu le faasinomaga faaperofeta o tagatanuu o Amerika. Sa fefefe tagata tuai [o le Itumalo] o le a faaaoga e le Au Paia tagata Initia e fesoasoani ia i latou ia faoa le eria mo lo latou Ierusalema Fou. Na atili faigata ia mataupu ona o faifeau Porotesnao o e sa loto leaga i taumafaiga faaletalaiga a le Au Paia o Aso e Gata Ai i tagata Initia.
“O le vevesi i le va o le Au Paia ma tagata tuai o le itumalo, sa oo ina avea ma se faalavelave ona o le mataupu i pologa. Na avea Misuri ma se vaega o le Iunaite Setete o se setete sa taga ai le faia o pologa, i lalo o le Tuufaatasiga o se tulaga o le pologa i lalo o le Compromise [Maliega] lauiloa o le 1820. Ae peitai, o le i ai o se pologa sa le o se faiga na masani ai. Sa faatauaina e tagata tuai o le itumalo lo latou aia tatau e faia ai ni pologa ae inosia le manatu ma taumafaiga e faamutaina. O nisi o le Au Paia sa aumaia mai Matu ma Sasae ni manatu e fai ni pologa ae inosia le manatu ma taumafaiga e faamutaina, ma o le ono i ai o se tetee o tagata uli sa o se mea na fefefe i ai le itu i Saute atoa i lena taimi. I le 1831 o le tetee o Nat Turner i pologa i Virginia na iu ai i le maliliu o le silia ma le fitusefulu o tagata papa’e ma le selau o pologa. O le mata’u le faavaea e uiga i ni amioga faatupuvevesi, na salalau atu i setete na i ai pologa. O le mea lea, sa faateteleina ai le popole o tagata Misuri i le amataga o le 1832, ona o tala feaveai e faapea, sa taumafai le Au Paia e tauanau tagata pologa e aua ne’i usitai i o latou matai pe ia sosola ese.
“Ina ia vave tineia ia tala faatupu, ia Iulai 1833, na lolomiina ai e le Evening and Morning Star se tusiga e lapataia ai faifeautalai e uiga i le talai atu i pologa ma i tagata sa avea muamua ma pologa, na ta’ua o le ‘faasaoloto tagata lanu.’ Ae paga lea, sa faauigaseseina e tagata Misuri i le lotoifale lenei fautuaga e faapea, sa valaaulia e Uso Phelps ia tagata uli saoloto e auai atu i Mamona i le Itumalo o Jackson. O le tusiga sa afua ai se gugulu tele, o lea na tuuina atu ai e Phelps se faamalamalamaga “Faaopoopo” e faapea, sa leai se faamoemoe o le Ekalesia e valaaulia mai tagata uli saoloto i Misuri, ae peitai sa le’i manuia ana taumafaiga e teena” (Church History in the Fulness of Times Student Manual, 2nd ed. [Church Educational System manual, 2003], 130–32)