Seminare ma Inisitituti
Lesona 45: I le Ohaio

Lesona 45

I le Ohaio

Folasaga

O lenei lesona o le a tuu atu ai i tagata o le vasega se aotelega puupuu o aafiaga o le Au Paia i Ohaio. Ia Tesema, 1830 na poloaiina ai le Au Paia e siitia atu i Ohaio (tagai i le MF&F 37:3), ma ia Ianuari 1831, sa folafola mai ai o le a faapea ona “faaeeina i le mana mai luga,” i latou pe afai o le a latou usiusitai (MF&F 38:32).

Na matua faamanuiaina i latou na faapotopoto atu i Ohaio. O faaaliga faifai pea na taitai atu ai le Au Paia i se malamalama loloto atu o le talalelei a Iesu Keriso. E le gata i lea, na latou maua faamanuiaga ia na oo mai i le fausiaina o se malumalu, ma talai atu le talalelei. A o faatupulaia le toatele ma le malosi faaleagaga o le Ekalesia i Ohaio, sa faapea foi ona faateteleina le tetee matautia e faasaga i le Ekalesia ma ona taitai. Sa nofo le Perofeta o Iosefa Samita i Katelani mai ia Ianuari 1831 e oo ia Ianuari 1838.

Fautuaga mo le Aoaoina Atu

Vaaiga Aoao i Katelani

aikona o pepa e tufa atuFaamalamalama atu faapea, ia Ianuari 1831, na tuua ai e le Perofeta o Iosefa Samita ma lona faletua o Ema, faapea foi ma Sini Rikitone ma Eteuati Paterika, ia Niu Ioka mo Ohaio. O le toatele lava o le Au Paia i Niu Ioka sa mulimuli atu ai i le taimi o le isi lima masina na sosoo ai. O lesona pupuu nei e fa o loo i ai se vaaiga aoao o mea taua na tutupu o le vaitaimi o Ohaio i le talafaasolopito o le Ekalesia. Vaevae lau vasega i ni vaega se fa, ma atofa atu i vaega taitasi se lesona puupuu se tasi. (Afai e le lava le fuaniumera o tagata o lau vasega mo lenei mea, e mafai ona e vaevaea lau vasega i ni vaega toalaiti ifo ma atofa faasili atu i ai ni lesona pupuu.) Valaaulia tagata o le vasega e suesue a latou auivi ma sauni e aoao atu le lesona i le vasega. A ua uma ona sauni tagata o le vasega, valaaulia vaega taitasi e filifili se tagata e toatasi e aoaoina le vasega. O lesona taitasi e tatau ona alu ai le tolu i le fa minute.

Lesona Puupuu 1—O Le Tulafono o le Ekalesia

Amata i le fai i tagata o le vasega o fesili nei:

  • Aisea e taua ai tulafono?

  • Aisea atonu e taua ai tulafono i le Ekalesia?

Faamanatu atu i le vasega ua folafola mai le Alii o le a Ia “tuu atu ai [i le Au Paia] laʼu tulafono” i le taimi lava latou te o atu ai i Ohaio (MF&F 38:32). Faamalamalama atu faapea, o le taimi lava na taunuu ai le Au Paia i Ohaio, na faataunuuina ai e le Alii Lana folafolaga ma tuuina mai se faaaliga na ta’ua o le Tulafono o le Ekalesia. O lenei tulafono, lea o loo tusia i le Mataupu Faavae ma Feagaiga 42, o loo aofia ai poloaiga ma faatonuga e taiala ai matafaioi o le Ekalesia. Valaaulia le vasega e vaai vave i le vaega o le otootoga o le Mataupu Faavae ma Feagaiga 42 (o loo i luga a’e o le fuaiupu muamua), ma vaavaai mo nisi o tulafono na tuuina mai e le Alii i le Au Paia.

Valaaulia tagata o le vasega e faailoga le fuaitau “Ua tuuina mai tulafono e pulea ai le faapaiaina o meatotino” i le vaega o le otootoga.

Faamalamalama atu i lenei faaaliga, na tuuina mai ai e le Alii le tulafono o le faapaiaga, “o se mataupu faavae faalelagi lea e faapaiaina ai e alii ma tamaitai o latou taimi, taleni, ma oa faalelalolagi i le faatuina ma le atiina ae o le malo o le Atua” (Taiala i Tusitusiga paia, “Faapaia, Tulafono o le Faapaiaga,” scriptures.lds.org). O nisi o faamoemoega o le tulafono o le faapaiaga e aofia ai le tausiga o e matitiva, faaitiitia le faaloloto, ma le fatuina o le lotogatasi i totonu o le Au Paia.

E silia teisi atu ma le tausaga talu ona faaali mai e le Alii le tulafono o le faapaiaga, ae Ia poloaiina taitai o le Ekalesia e faatu se Kamupani o le Tuufaatasi. O se tasi o faamoemoega o le Kamupani Tuufaatasi, lea sa faavae i mataupu faavae o le tulafono o le faapaiaga, ina ia faatutu ai ni faleteuoloa e fesoasoani ai i manaoga faaletino o tagata o le Ekalesia, ae maise lava o i latou o e sa matitiva. Sa o se faamanuiaga lenei mea i le Au Paia i lea taimi, ona o le toatele o tagata o le Ekalesia o e sa toe siitia atu mai Niu Ioka i Ohaio na tuua o latou fale ma fanua. Na tuuina mai foi e le Kamupani Tuufaatasi ni tupe e faatupeina ai taumafaiga eseese a le Ekalesia, e pei o le galuega faafaifeautalai ma taumafaiga i mea tau lomiga O le a tatou aoao atili e uiga i le tulafono o le faapaiaga ma ona aafiaga i le Au Paia i lesona i le lumanai.

Lesona puupuu 2—O Le Malumalu o Katelani

Faamanatu i tagata o le vasega le folafolaga a le Alii e faaee le Au Paia “i le mana mai luga” pe a latou taunuu i Ohaio (tagai i le MF&F 38:32). Valaaulia se tagata o le vasega e faitau leotele le Mataupu Faavae ma Feagaiga 88:119. Fai atu i le vasega e mulimuli i le faitauga, ma vaavaai mo le poloaiga na tuuina mai e le Alii i le Au Paia. A uma ona latou faailoa mai, na poloaiina e le Alii i latou e faatu se fale, faamalamalama atu o lena “fale” sa ta’ua e le Alii, o se malumalu. O le Malumalu o Katelani o le malumalu muamua lea na fausia i lenei tisipenisione.

Valaaulia tagata o le vasega e sue le ata o le Malumalu o Katelani i a latou tusitusiga paia (Atapue o le Talafaasolopito o le Ekalesia, Ata 9, “Malumalu o Katelani”).

Faamalamalama atu faapea, e pe tusa ma le tolu tausaga na alu i le fausiaina o le Malumalu o Katelani. Ina ua uma ona faapaiaina le malumalu i le aso 27 o Mati, 1836, sa amata ai lona ona faataunuu e le Alii Lana folafolaga e faaee le Au Paia i le mana, ma sa faapea ona latou maua ni faamanuiaga ofoofogia faaleagaga. Mo se faataitaiga, sa faaali mai le Alii lava Ia ia Iosefa Samita ma Oliva Kaotui i le Malumalu o Katelani ma folafola mai ua Ia “talia lenei fale” (MF&F 110:7). Na Ia auina mai foi ni avefeau faalelagi se toatolu—o Mose, o Elaia ma Elia—e toefuatai mai ki taua o le perisitua i le lalolagi. O nei ki o le a tuu mai ai i le Au Paia le pule e faatino ai sauniga o le malumalu ma ia faamau ai aiga mo le faavavau. E le gata i lea, na toefuatai mai ai foi “ki o le faapotopotoina o Isaraelu” i lea taimi (MF&F 110:11). O se taunuuga, ua valaauina faifeautalai ma faatagaina e aoao atu le talalelei i le lalolagi atoa.

Lesona puupuu 3—Galuega Faafaifeautalai

Valaaulia se tagata o le vasega e faitau leotele le Mataupu Faavae ma Feagaiga 42:6–7. Valaaulia le vasega e mulimuli i le faitauga, ma vaavaai mo le poloaiga na tuuina mai e le Alii i le Au Paia ina ua latou taunuu i Ohaio. A uma ona faitau e le tagata o le vasega le fuaiupu, fai atu fesili nei:

  • O le a le poloaiga na tuuina mai e le Alii i le Au Paia?

  • E tusa ai ma le fuaiupu e 6, na faapefea ona talai atu e nei faifeautalai le talalelei?

  • O le a le mea e talitutusa ai lenei mea ma le auala o loo talai atu ai e faifeautalai faamisiona le talalelei i aso nei?

Faamalamalama atu faapea, o le taimi lava na faapaiaina ai le Malumalu o Katelani ma ua toefuatai mai ki mo le faapotopotoina o Isaraelu, na amata ai e tagata o le Ekalesia ona talai atu le talalelei a Iesu Keriso i isi nofoaga e tele atu. Valaaulia tagata o le vasega e susue a latou tusitusiga paia i le Faafanua 3 i le vaega o Faafanua o le Talafaasolopito o le Ekalesia, i a latou tusitusiga paia (“O le Eria o Niu Ioka, Penisilevania, ma Ohio o le ISA”).

A o vaavaai tagata o le vasega i le faafanua, faamanatu atu ia i latou, na folafola mai e le Alii i le Au Paia o le a Ia auina atu i latou e talai atu “i totonu o atunuu uma” (MF&F 38:33). Faamatala atu, o Katelani sa o se nofoaga lelei e amata ai ona auina atu faifeautalai i le lalolagi atoa. Sa latalata Katelani i ni nai auala autu o femalagaaiga i le Iunaite Setete. Mai Katelani, sa le mamao lava ni feoaiga a faifeautalai e pu’e ai vaasuauu i vaitafe tetele o Amerika ma le Vaituloto o Erie. Sa latou faaaogaina foi se auala a le malo e agai atu i saute ma se auala o se alavaa e agai atu i matu. Ona o lenei mea, sa avea ai Katelani ma nofoaga e faaee ai mo misiona i Kanata, ma isi vaega o le Iunaite Setete, ma Peretania Tele.

Faamalamalama atu e faapea, ona o le galuega faafaifeautalai i lena taimi, sa faapea ona faateleina ai le aofai o tagata auai i le Ekalesia i le lalolagi atoa i tai fia afe. I le 1837, na valaauina ai Heber C. Kimball ma Orson Hyde faatasi ai ma isi tagata e toalima i se misiona i Peretania Tele, lea sa latou papatisoina ai le tusa ma le 2,000 o tagata. E oo ane i le 1838, ina ua tuua e le Au Paia ia Katelani ona o sauaga, sa i ai pe tusa ma le 2,000 o tagata o le Ekalesia e nonofo i Katelani ae toeitiiti atoa le 18,000 i le lalolagi atoa.

Lesona puupuu 4—O Isi Faaaliga Taua ma Mea na Tutupu

Valaaulia le vasega e faitau filemu le Mataupu Faavae ma Feagaiga 42:61. A uma ona latou faitau, faailoa atu, ina ua taunuu Iosefa Samita i Ohaio, sa fetalai mai le Alii ia te ia, o le a ia “maua lea faaaliga ma lea faaaliga” pe afai e ole atu i le Atua. Ona valaaulia lea o tagata o le vasega e sue i le faasologa tonu o le anomea o le Mataupu Faavae ma Feagaiga (o loo i tua mai o le folasaga). Fai atu ia i latou e fuafua po o fea le nofoaga sa maua ai le tele o faaaliga o loo tusiaina i le Mataupu Faavae ma Feagaiga. A uma ona latou maua, o le tele o faaaliga sa maua i Ohaio, faamalamalama atu, o le tele o faaaliga i Ohaio na faataunuuina ai le afioga a le Alii.

Ina ia faaali atu i le vasega nisi o faaaliga taua na maua i Ohaio, tofi atu ni vaega se tasi pe lua nei mai le Mataupu Faavae ma Feagaiga i tagata taitasi o le vasega: Mataupu Faavae ma Feagaiga 76; 89; 107; 137.

Mo vaega taitasi, fai atu i tagata o le vasega ua tofia e faitau le folasaga o le vaega ma tagai vave i le otootoga o le vaega lea o loo i luma atu o le fuaiupu muamua. Ona valaaulia lea o tagata taitoatasi o le vasega e lipoti mai pe aisea e taua ai a latou vaega na totofi atu. A o latou lipoti mai, ia mautinoa latou te faailoa mai mea nei:

Mataupu faavae ma Feagaiga 76; 137 (Faaaliga e uiga i tikeri e tolu o mamalu ma le faaaliga o le malo selesitila)

Mataupu Faavae ma Feagaiga 89 (O Le Upu o le Poto)

Mataupu Faavae ma Feagaiga 107 (Faaaliga e uiga i le perisitua)

A uma ona lipoti mai ia tagata taitasi o le vasega, fai atu le fesili lenei:

  • E te manatu na faapei mo le Au Paia i Ohaio le faalogo i nisi o nei upumoni mo le taimi muamua?

Faamalamalama atu e faapea, e le gata i nei upumoni ua faaalia mai, na faatonuina foi e le Alii ia Iosefa Samita e faatulaga le autaitai o le Ekalesia i le taimi lea. O le Au Peresitene Sili, o le Korama a Aposetolo e Toasefululua, ma o le Korama a Fitugafulu sa faatulagaina aloaia a’o nonofo le Au Paia i Ohaio. E le gata i lea, sa faaauau e Iosefa Samita lana galuega i le faaliliuga o le Tusi Paia.

O le tetee ma le liliu ese na malaia ai le au faamaoni i Ohaio

A uma ona fai e tagata o le vasega le gaoioiga o loo i luga, faamalamalama atu, o le taimi lava foi lea, sa matuai faamanuiaina ai le Au Paia e le Alii i Ohaio, sa faateteleina e Satani lona tetee e faasaga i le Ekalesia. O le taimi lava na taunuu ai le Au Paia i Katelani, na amata ai foi ona osofai e le au faitio aneti-Mamona le Ekalesia.

Valaaulia se tagata o le vasega e faitau le saunoaga lenei a Iosefa Samita e faatatau i nei tulaga:

Perofeta o Iosefa Samita

“E tele lipoti sese, pepelo, ma faamatalaga faavalevalea, na lolomiina i nusipepa, ma feaveai i itu uma, ina ia taofi ai tagata mai le suesueina o le galuega, pe taliaina le faatuatuaga” (i le History of the Church, 1:158).

Faamalamalama atu faapea, o nisi o nei lipoti le lelei na amataina e nisi na o ese ma le Ekalesia ona o mafuaaga eseese. Mo se faataitaiga, ia Setema o le 1831, sa taumafai ai se tagata sa avea ma tagata o le Ekalesia, na igoa ia Ezra Booth e upuesea tagata mai le auai i le Ekalesia ma lomia ni tusi se iva na auiliili ai lona faitioina o le Ekalesia (tagai i le Documents, Volume 1: July 1828–June 1831, vol. 1 of the Documents series of The Joseph Smith Papers [2013], 203–4; tagai foi Church History in the Fulness of Times Student Manual, 2nd ed. [tusi lesona a le Ofisa o Aoga a le Ekalesia, 2003], 113–15). O nei tusi na faateleina ai le feitai i le Ekalesia. O sauaga na mafua mai i na ituaiga o faatosinaga, o nisi taimi sa iu ai i ni vesiga, ae maise lava i le Perofeta ma isi taitai o le Ekalesia.

I se tasi o faafitauli ogaoga, i le po o le aso 24 o Mati, 1832, sa osofaia ai e se vaega o tagata leaga pe a ma le 25 i le 30 le maota o John Johnson i Hiram, Ohaio, lea sa nonofo ai Iosefa ma Ema Samita. Sa osofai toatele e alii ia Iosefa Samita ma tosoina ai o ia i fafo i le po. Sa latou titinaina o ia, saeia ona lavalava, ma taumafai e liligi faamalosi se fagu aseti i totonu o lona fofoga, lea sa ta’e ai se tasi o ona nifo, ma na mafua ai lava mulimuli ane ona pei e faaili teisi o ia pe a saunoa. Ona latou tuua ai lea o ia na lilofia i le ta ma ni fulumanu. Ina ua toe maua e Iosefa se malosi sa ia toe taumafai atu i le fale. Ina ua taunuu o ia i le faitotoa, ma iloa mai o ia e Ema ua lilofia i le ta, sa faapea lava o ia o le palapala, ma sa faapea ona matapogia ai. Sa faaaluina e uo le po atoa e faamama ese ai le ta. O le aso na sosoo ai, o le Aso Sa lea, sa talai atu ai Iosefa i se lauga lea na auai ai nisi o tagata o le au faatupu vevesi. Ina ua uma le lauga, na papatisoina e Iosefa ni tagata se toatolu. (Tagai i le History of the Church, 1:261–65.)

I le taimi o le tauiviga ma le le mautonu o lenei osofaiga, sa faapea ona matala ai lava le faitotoa o le fale. O se taunuuga, na aafia ai le atalii o Iosefa, o Iosefa Murdock Samita, o le sa ma’i i le misela, i se “fiva malosi” ma faapea ona maliu ai i le lima o aso mulimuli ane. O le po lava lea e tasi sa tosoina ai Sini Rikitone i ona mulivae mai lona fale. Sa matuai masaesae ma lavelavea lona ulu ona o le gaoa, ma le malo o le eleele, ma sa oso sona faama’i malosi mo ni nai aso. (Tagai i le History of the Church, 1:265.)

Faamalamalama atu e ui lava i nei ma isi faigata, sa faaauau pea ona faapotopoto le Au Paia i Katelani, ae maise lava mai le 1836 i le 1838. Ae peitai, sa matuai faateteleina sauaga i le vaitaimi o le taumalulu o le 1837 ma le tautotogo o le 1838, o lea sa faamalosia ai le toatele o le Au Paia e tuua Ohaio. O nisi taitai o le Ekalesia, e aofia ai Iosefa Samita, Sini Rikitone, ma Polika Iaga, sa sosola ese mai Katelani mo le saogalemu o o latou soifua.

Faaiu le lesona i le molimau atu faapea, e ui lava ina oo le Ekalesia i le tele o tofotofoga ma sauaga i Katelani, ae sa faamanuiaina tele e le Alii i latou o e sa tumau le faamaoni.

Tala ma Faamatalaga o Talaaga

O Le Liliuese i Katelani

I le 1833, na faatupu ai foi e se tasi o tagata sa auai i le ekalesia ni faafitauli ogaoga mo le Ekalesia. Sa avea Fomai Philastus Hurlbut o se toeaina i le Ekalesia, ae sa tape le igoa ona o le mulilua a’o auauna atu i se misiona. E ui lava ina sa faaali atu e taitai o le Ekalesia ia te ia le alofa mutimutivale ma faatagaina lona pepa faamaumau e toe faaaoga, ae sa toe agasala foi ma vavaeese ai [mai le Ekalesia] mo le taimi lona lua. Sa taumafai Hurlbut e tauleagaina le Ekalesia ma Iosefa Samita e ala i le aoina mai o tautinoga tusitusia e le talitonu i Mamona, ma tautino pepelo ai o le Tusi a Mamona sa faavae mai i se togitogiga na tusia e Solomon Spaulding ae sa le’i faaliliuina e le mana o le Atua.

Sa fai mai Hurlbut, na aumai faalilolilo e Sini Rikitone ia togitogiga a Spaulding ma sa laua kopiina ma Iosefa Samita e fatu ai le Tusi a Mamona. Ae peitai, o lenei taumafaiga e tauleagaina le Tusi a Mamona sa matuai le faavaea lava. Ina ua maua togitogiga a Spaulding, sa le mafai ona maua i se suesuega e faapea na tutusa ma le Tusi a Mamona, pe na i ai foi ni mea na tau foliga ai le va o ia tusitusiga e lua. Ma le isi, sa le’i feiloai Sini Rikitone ma Iosefa Samita i lena taimi, ae na faatoa feiloai lava ua leva ona uma ona lolomi le Tusi a Mamona. Sa molimau Oliva Kaotui i le pepelo o tuuaiga a Hurlbut: “’Sa …ou uuina i o’u lava lima ia papatusi auro lea na faaliliuina mai ai [le Tusi a Mamona]. Sa ou vaai foi i mea faamatalaupu. E moni lena tusi. Sa le’i tusia e Sini Rikitone. Sa le’i tusia e le susuga a Spaulding. Sa ou tusia e a’u lava a’o fofoga mai i laugutu o le perofeta.’ [Reuben Miller, journal, 1848–1849, Family and Church History Department Archives, 21 Oke. 1848; ua faalaugatasia faailoga ma le sipelaga.]” (a o sii mai i le James E. Faust, “Some Great Thing,” Ensign, Nov. 2001, 47).

Sa popole nisi o tagata Ohaio, ina ne’i le umi ae toatele naua tagata o le Ekalesia, ma o le a latou faia ai se vaega o tagata palota ma maua ai le pule i mea tau polokiki, sa latou togitupeina Philastus Hurlbut e taufaaleaga ia Iosefa Samita ma le Tusi a Mamona. Sa augani atu Iosefa Samita i se tusi e faapea o tagata o le Ekalesia sa “mafatia i sauaga tetele ona o se tasi o alii e igoa ia Fomai Hurlbut o le na faateaese mai le ekalesia ona o amioga mataga ma le mulilulua, ma ina ia faalealofa ia i matou, ua ia pepelo ai i se auala lelei tele ma ua taufetuli atu tagata ia te ia ma tuu atu ia te ia tupe e faatoilalo ai le faaMamona lea ua matuai lamatia ai o matou ola i le taimi nei””( (“Letter to William W. Phelps and Others, 18 Aokuso 1833,” 3; tagai i le josephsmithpapers.org; ua faalaugatasia le sipelaga).

O isi atinae i Katelani

O Katelani na faaali atili mai ai e le Alii le faatulagaga o le Ekalesia. O tofi nei o le perisitua na faaali mai i le vaitaimi o Katelani: epikopo, faitaulaga sili, o le Au Peresitene Sili, peteriaka, fautua maualuga, Aposetolo ma Fitugafulu.