Anomea o Sauniuniga mo le Faiaoga mo Suesuega i le Fale
Aotelega o Lesona mo Suesuega i le Fale i Aso Taitasi
O le aotelega lenei o mea na tutupu, aoaoga faavae, ma mataupu faavae na aoaoina e tagata aoga a’o latou suesueina le Mataupu Faavae ma Feagaiga 45–48 (iunite 11) e le o faamoemoe e aoao atu o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.
I fuaiupu amata o le Mataupu Faavae ma Feagaiga 45, na faitau ai tagata aoga, na foafoaina e Iesu Keriso le lagi ma le lalolagi ma o Ia o lo tatou fautua i le Tama Faalelagi. A o tatou aoao e uiga i le Faaola ma mea ua Ia faia mo i tatou, e mafai ona faateleina ai lo tatou naunau e faalogo ma usitai i Lona siufofoga.
Mai le suesueina o faailoga o le Afio Mai Faalua o Iesu Keriso, na aoao ai e tagata aoga, afai tatou te tutu i nofoaga paia ma vaavaai atu mo faailoga, o le a tatou saunia mo lena mea maoae o le a tupu. Mai le faataoto i taupou e toasefulu, sa latou aoao ai afai ua tatou maua le upumoni ma talia le Agaga Paia e avea ma o tatou taiala, o le a tatou i ai i le Afio Mai Faalua o le Faaola. O lenei lesona na faailoa atu ai foi tagata aoga i faamatalaga e uiga i le Ierusalema Fou.
Sa faaaluina e tagata aoga le taimi i le lesona lenei, e mafaufau ai e uiga i auala o loo faatinoina ai sauniga a le Ekalesia. Sa latou aoaoina, o taitai o le Ekalesia e tatau ona taialaina e le Agaga Paia a o latou taitaia sauniga, ma ua poloaiina i tatou e le Alii e talia tagata uma i a tatou sauniga faitele. Na faailoa mai foi e tagata aoga ni auala e aloese ai mai le faaseseina: (1) mulimuli i le Agaga i le paia uma ma le (2) valaau atu i le Atua ma ola ma le loto faafetai ia te Ia. Ona suesue lea o tagata aoga e uiga i faamoemoega o meaalofa faaleagaga.
A o aoao tagata aoga e uiga i le taua o le tausia o faamaumauga a le Ekalesia, sa latou iloa ai le upumoni e faapea, afai tatou te faamaoni i a tatou taumafaiga e tausia talafaasolopito faaletagata lava ia, o le a fesoasoani le Agaga ia i tatou. A o suesueina e tagata aoga le talaaga faasolopito i le faigamalaga a le Au Paia, na taunuu atu i Ohaio mai Niu Ioka, sa latou manatunatu i le poloaiga a le Alii e faasoa atu mea ua tatou maua ia i latou o loo manaomia le fesoasoani.
Folasaga
O le lesona lenei e faatatau i le finagalo alofa o Iesu Keriso ia i tatou uma. O le a maua e tagata aoga le avanoa e faafesootai ai aoaoga faavae ma mataupu faavae na latou aoaoina i le vaiaso atoa, i le auala e faaali mai e le Alii Lona alofa ia i tatou.
Manatua: I a latou suesuega faaletagata lava ia, sa galulue ai tagata aoga e tauloto ma faaaoga le fuaitau o le mau tauloto o le Mataupu Faavae ma Feagaiga 46:33. Atonu e te manao e fai atu ia te i latou e tauloto mai, ma faasoa mai ni auala latou te manatu e mafai e tagata talavou ona “faia e lē aunoa le amiomama ma le paia i luma [o le Alii].”
Ua aoao mai le Alii e uiga i mea taua e tutupu ma meaalofa i aso e gata ai
Tusi le fesili lenei i luga o le laupapa: O ai o loo mafaufau mai ia te oe i le taimi nei?
Atonu e te manao e uunai tagata aoga e faaalu sina taimi e toe faamanatu ai le Mataupu Faavae ma Feagaiga 45–46, ma vaavaai mo fuaiupu sa latou faailogaina ma soo se upumoni sa latou faailoaina mai, e lagolago ai le manatu e faapea, o loo mafaufau mai le Faaola ia i latou ma i ai se naunau patino ia i latou. Fai atu i tagata aoga e mafaufau loloto i le fesili o loo i luga o le laupapa, ma valaaulia i latou e tali mai i ai.
O le a se mea na e aoaoina i lau suesuega i lenei vaiaso, ua fesoasoani e te malamalama ai o loo manatu mai le Alii ia te oe? (O tali a tagata aoga e mafai ona atagia ai manatu nei: O le Faaola o lo tatou fautua i le Tama; e faaali mai e le Faaola Lona alofa ia i tatou e ala i le faaalia mai o mea e tutupu a’o le’i oo i le Afio Mai Faalua; ma e tuuina mai e le Atua ia i tatou meaalofa a le Agaga a o tatou saili ma ola agavaa mo ia meaalofa.)
Faamanatu atu i tagata aoga e faapea, i le taimi lenei i le talafaasolopito o le Ekalesia, sa faasalalau solo e fili ia pepelo ma lipoti sese e uiga i le Ekalesia ma le Perofeta o Iosefa Samita. O le faaaliga i le Mataupu Faavae ma Feagaiga 45 sa faamanatu mai ai i le Au Paia aemaise lava i lenei taimi faigata, sa mafaufau mai le Alii ia te i latou.
Valaaulia ni nai tagata aoga e auauai i le faitauina leotele mai o le Mataupu Faavae ma Feagaiga 45:1–6. Fai atu i le vasega e mulimuli i le faitauga ma mafaufau, pe na ono mafai faapefea e lenei faaaliga ona faamafanafanaina le Au Paia i lenei taimi o sauaga. Mafaufau e fai atu i tagata aoga e taofi le faitauga ina ia mafai ona e fai atu nisi o fesili nei, pe a uma ona faitauina fuaiupu e talafeagai i ai:
E faapefea ona faaalia e le aoaoga faavae, O Iesu Keriso na foafoaina le lagi ma le lalolagi (MF&F 45:1) le naunau patino o le Faaola ia te oe?
Mai le fuaiupu e 3, o le a lou malamalamaaga i le uiga o le fuaitau “fautuaina la outou tagi”?
E tusa ai ma le fuaiupu e 4, o le a le mea na aafia ai le Faaola, lea na mafai ai ona avea o Ia ma o tatou fautua i le Tama Faalelagi? (Na oo o Ia i puapuaga ma le oti, faapea foi ma le soifua ai i se olaga e leai se agasala. (Atonu e te manao e valaaulia se tagata aoga e faamatala atu le matafaioi o se fautua, mai i mea na latou aoaoina i a latou suesuega faaletagata lava ia.)
O a auala e aafia ai a tatou filifiliga ma amioga i le taimi nei ona o le iloaina o Iesu Keriso o lo tatou fautua i le Tama Faalelagi?
Ina ia faamamafa atu le manatu mai o le Faaola ia i tatou, valaaulia se tagata aoga e faitau leotele le faamatalaga lenei mai ia Peresitene Iosefa Filitia Samita. Fai atu i le vasega e faalogologo mo ni manatu faaopoopo e uiga i le matafaioi a le Faaola i le avea ai ma o tatou fautua.
Ata
Peresitene Iosefa Filitia Samita
“O loo tu [Iesu Keriso] i le va o le Tama ma le tagata. O loo augani atu mo lo tatou tulaga. E te silafia, a’o i ai o ia i luga o le fogaeleele, sa tatalo soo o ia, ma sa tatalo mo ona soo, ma augani atu i lona Tama e fai ma o latou sui, ma na augani atu o ia mai lava i lena taimi, ma o loo tu i le va o i tatou ma le Atua, lo tatou Tama” (i le Conference Report, Oke. 1953, 58).
O a ni auala e te manatu e mafai ai e se tagata ona faafetai atu i le Faaola mo le avea ma ona fautua? (Ina ia fesoasoani i tagata aoga e faasoa mai ni tali magafagafa i lenei fesili, atonu e te manao e faasino atu i latou i mea na latou tusia mo la latou galuega atofaina lona lua i la latou lesona mo le Aso 1 o le iunite lenei [MF&F 45:1-15].)
Fai atu i tagata aoga e mafaufau i se taimi na latou manatu ai sa leai se tasi na mafaufau mai ia i latou, pe na latou manatu foi e itiiti lo latou taua nai lo se isi tagata.
Faitau atu le saunoaga lenei a Elder Jeffrey R. Holland o le Korama a Aposetolo e Toasefululua. Fai atu i tagata aoga e faalogologo pe faapei lagona o le Faaola mo i latou taitoatasi.
Ata
Elder Jeffrey R. Holland
“Uso e ma tuafafine, ou te molimau atu e leai se tasi o i tatou e tau le faapelepeleina pe tau le alofagia e le Atua nai lo isi. Ou te molimau atu e alofa o Ia ia i tatou uma—, o e le atoatoa, o e popole, o e manatu na o i latou lava, ma tagata uma lava. Na te le fuaina a tatou taleni po o o tatou foliga, o a tatou galuega po o mea ua tatou maua. Na te faamalo i tagata taufetuli uma, ma tauvalavalaau mai i le taufetuliga ia tetee atu i le agasala, ae le o le faatautava o le tasi i le isi. Ou te iloa afai o le a tatou faamaoni, o le a i ai se ofu talaloa atoatoa o le amiotonu ua saunia ma faatalitali mai mo tagata uma” (“O Le Isi Atalii Faamaimau ‘Oa,” Liahona, Iulai 2002, 72).
Valaaulia tagata aoga e faasoa mai o latou lava aafiaga i se taimi na latou lagonaina ai sa manatu mai le Atua ia i latou, po o se taimi na latou lagonaina ai le faamalosiauina e le Atua.
Faamatala atu, o se tasi o auala na faamafanafanaina ai e le Faaola le Au Paia anamua i lenei taimi o sauaga, o le ta’u mai lea ia i latou, o le a toe afio mai o Ia i le lalolagi e faamanuia i latou. Tusi le mau faasino lenei i luga o le laupapa: Mataupu Faavae ma Feagaiga 45:55–59.
Fai atu i tagata aoga e faitau filemu fuaiupu nei, ma vaavaai mo auala o le a faamanuiaina ai le Au Paia i le afio mai o le Alii.
E tusa ai ma le fuaiupu e 57, o a mea e ao ona tatou faia ina ia saunia ai mo le afio mai o le Faaola? (Tusi le mataupu faavae lenei i luga o le laupapa: Afai tatou te maua le upumoni ma talia le Agaga Paia e fai ma o tatou taiala, o le a tatou i ai i le Afio Mai Faalua o le Faaola.)
O a auala e te manatu o le mauaina o le upumoni ma le taliaina o le Agaga Paia e fai ma o tatou taiala, e saunia ai i tatou mo le Afio Mai Faalua o Iesu Keriso?
O le a se mea ua e faia e maua ai ma talia le upumoni i lou olaga? O le a se taimi na taialaina ai oe e le Agaga Paia? (A uma ona tali mai tagata aoga, mafaufau e faasoa atu ni aafiaga mai lou lava olaga.)
E tatau i le Au Paia ona tausia i taimi uma se talafaasolopito ma faasoa atu a latou punaoa i le tasi ma le isi
Faamanatu atu i tagata aoga o se vaega o a latou suesuega i lenei vaiaso na faamamafaina ai le taua o le tausia o se talafaasolopito faaletagata lava ia po o se api talaaga. Ina ia uunaia tagata aoga e faaauau a latou taumafaiga i le tausia o se talafaasolopito faaletagata lava ia, po o le amata ona tausia o se talafaasolopito faaletagata lava ia, atonu e te manao e fesili atu ia i latou pe aisea e taua ai le tausia o se talafaasolopito faaletagata lava ia.
Valaaulia tagata aoga e faasoa mai po o a ni faamanuiaga ua latou maua mai le tausia o se talafaasolopito faaletagata lava ia, po o le, mai le faitauina o talafaasolopito o o latou matua, matua o matua, po o isi tuaa.
Ina ia saunia tagata aoga mo a latou suesuega o le vaiaso a sau, atonu e te manao e valaaulia i latou e mafaufau i mea nei: O a ni auala e tatau ona tatou talai atu ai le talalelei i isi? E faapefea ona e iloa po o e aoao atu po o aoaoina e ala i le Agaga Paia? Pe sa faigata ia te oe ona iloatino po o se mea sa mai i le Atua pe sa mai se isi faapogai? Faamatala atu, i le iunite o loo sosoo ai, o le a latou aoao ai i mea na aoao mai e le Alii i auala e iloa ai upumoni ma aloese ai mai aoaoga sese.