Lesona 146: Soloaiga i le Au Peresitene

Lesona 146

Soloa’iga i le Au Peresitene

O Le Faatomuaga

Ina ua mavae le faamaturoina o le Perofeta o Iosefa Samita ma lona uso o Ailama i le aso 27 o Iuni, 1844, sa le mautonu nisi o tagata po o ai o le a taitaia Le Ekalesia a Iesu Keriso o le Au Paia o Aso e Gata Ai. Ae a o lei maliu o ia, sa saunia le Perofeta mo lenei siitia atu o le taitaiga e ala i le faaeeina atu o ki uma ma mana o le perisitua i luga o le Korama a Aposetolo e Toasefululua. Ina ua saunoa atu Polika Iaga, o le sa avea ma Peresitene o le Korama a Aposetolo e Toasefululua, i le Au Paia i le aso 8 o Aokuso, 1844, e toatele tagata o le Ekalesia na maua se molimau faaleagaga sa valaauina ma saunia o ia e le Atua e taitai le Ekalesia.

Fautuaga mo le Aoaoina Atu

Ina ua mavae le faamaturoina o Iosefa ma Ailama Samita, sa i ai ni nai tagata na fai mai sa ia i latou le aia tatau e taitai ai le Ekalesia.

A o le’i amataina le vasega, tusi fesili nei i luga o le laupapa:

Pe a maliu le Peresitene o loo i ai nei o le Ekalesia, o ai o le a avea ma Peresitene e sosoo ai o le Ekalesia? E faapefea ona filifilia o ia?

E faapefea ona maua e le Peresitene o le Ekalesia le pule o le perisitua e tatau ai ona pulefaamalumalu i luga o le Ekalesia?

Valaaulia tagata aoga e mafaufau pe o le a faapefea ona latou tali atu i fesili o loo i le laupapa. Uunaia i latou e faalogologo mo tali i nei fesili i le aso, a o latou aoao e uiga i le suiga i le taitaiga o le Ekalesia lea na tupu ina ua mavae le maliu o le Perofeta o Iosefa Samita ma lona uso o Ailama.

Faamalamalama atu, ina ua mavae le maliufasia o le Perofeta o Iosefa Samita, sa oo le Au Paia i le faanoanoa loloto. Sa le mautonu nisi po o ai o le a taitaia le Ekalesia. O le leai ai o le Peresitene o le Ekalesia, sa malamalama nisi e faapea, o le tulaga faaletaitai e pau tonu lea i le Korama a Aposetolo e Toasefululua. Ae peitai, sa i ai ni nai tagata sa faailoa mai ni faamatalaga sese e faapea sa ia i latou le aia tatau e taitai ai le Ekalesia. O nisi o i latou ia o Sini Rikitone, James Strang.

Valaaulia se tagata aoga e faitau leotele parakalafa nei e tolu. Fai atu i le vasega e faalogologo mo mafuaaga na manatu ai Sini Rikitone, o se taitai iloga i le Ekalesia mo le tele o tausaga, e tatau ona taitai o ia i le Ekalesia.

“O Sini Rikitone, Fesoasoani Muamua i le Au Peresitene Sili, na taunuu mai [i Navu] mai Pittsburgh, Penisilevania, i le aso 3 o Aokuso, 1844. I le tausaga a’o lumanai le taimi lenei, sa amata ai ona ia aveina se mataupu sa ese mai i le fautuaga a le Perofeta o Iosefa Samita ma faapea ona motuese ai [vavaeeseina] mai le Ekalesia. Sa musu o ia e feiloai ma sui e toatolu o le Toasefululua na i ai i Navu, ae na alu talanoa atu i se vaega toatele o le Au Paia sa faapotopoto mo la latou sauniga tapuai o le Aso Sa” (Our Heritage: A Brief History of The Church of Jesus Christ of Latter-day Saints [1996], 66).

Sa talo e Sini Rikitone se fonotaga faapitoa e faia i le aso Lua, 6 o Aokuso, ina ia mafai ona filifili e tagata o le Ekalesia se tagata e vaaia le Ekalesia. Sa foliga mai e pei sa taumafai Sini Rikitone e faia lenei fonotaga, ina ia mafai ona faamaonia e tagata o le Ekalesia lona tofiga o se e vaaia le Ekalesia a o lei toe foi uma ifo le au Aposetolo e Toasefululua mai a latou misiona i le itu i sasae o le Iunaite Setete. Na lagona e nisi o taitai o le Ekalesia e faapea, atonu sa fafau Uso Rikitone “e faaaoga le tulaga [faanoanoa] o le Au Paia [ia fai ai o ia ma taitai o le Ekalesia]” (History of the Church, 7:225). O le mea e lelei ai, ona o taumafaiga a Elder Willard Richards ma Elder Pale P. Palate, sa faapea ona tolopoina ai le fono i le Aso Tofi, 8 o Aokuso, e oo ane la i le taimi lea, ua toatele le au Aposetolo ua toe foi mai i Navu.

Na fai mai Sini Rikitone ona sa valaauina ma faauuina o ia i se taimi na muamua atu e avea ma failauga mo Iosefa Samita (tagai i le MF&F 100:9), o lona tiutetauave la le “vaai o pulea le ekalesia i le ala e tatau ai” (History of the Church, 7:229). Sa ia fai mai foi, o ia e tatau ona “avea ma tagata e vaaia tagata” ma o le faataunuuina o lenei tiutetauave, sa ia faia ai le mea sa poloaiina o ia e le Atua e fai (tagai i le History of the Church, 7:230).

Afai na e i ai i Navu i lena taimi, mata o a ni ou lagona e uiga i faamatalaga a Sini Rikitone? Mata o a ni ou popolega e ono i ai e uiga ia Uso Rikitone?

Valaaulia se tagata aoga e faitau leotele le palakalafa lenei. Fai atu i le vasega e faalogologo mo mafuaaga na fai mai ai James Strang e tatau ona ia taitaia le Ekalesia.

O James Strang, o le na papatiso ia Fepuari 1844, sa sailia se isi nofoaga e mafai ona maua mo le Au Paia i Wisconsin i le tautotogo o le 1844. Ina ua mavae le faamaturoga, sa faapea mai Uso Strang na ia mauaina se tusi mai ia Iosefa Samita na ta’u atu ai na filifilia o ia e sui ia Iosefa. O le tusi a Uso Strang, lea sa ia faaali atu i tagata o le Ekalesia, sa foliga mai sa i ai le saini a Iosefa Samita. Sa fai mai Uso Strang o ia o le perofeta e sosoo ai ma sa faasilasilaina lona tofiga i se konafesi a le Ekalesia i Michigan i le aso 5 o Aokuso, 1844.

Afai sa e i ai faatasi ma le Au Paia i Michigan, o le a se mea, pe afai sa i ai, e te manatu na e ono talitonuina ai faamatalaga a James Strang? O a ni ou popolega e ono i ai e uiga i nei faamatalaga?

Valaaulia se tagata aoga e faitau leotele palakalafa nei e lima. Fai atu i le vasega e faalogologo mo mea na ta’u atu e Polika Iaga i isi taitai perisitua, e aofia ai sui o le Korama a Aposetolo e Toasefululua o e sa i ai i Navu, e uiga i le e tatau ona taitaia le Ekalesia:

Na i ai lava Elder Ioane Teila, Willard Richards, Pale P. Palate i Navu i le taimi na taunuu atu ai Sini Rikitone. O le toatele o le isi vaega o le au Aposetolo, e aofia ai Polika Iaga, na toe foi atu i Navu i le afiafi o le aso 6 o Aokuso, 1844. O le aso na sosoo ai, 7 o Aokuso, na fono ai le au Aposetolo i le maota o Ioane Teila. Mulimuli ane i lena aoauli, na fono faatasi ai le Au Aposetolo e Toasefululua, ma le au fautua maualuga. Sa saunoa atu Peresitene Iaga ia Sini Rikitone e fai atu lana savali i le Au Paia. Sa folafola atu ma le to’a e Sini Rikitone e faapea, sa vaai o ia i se faaaliga vaaia, ma e leai se tagata e mafai ona sui ia Iosefa Samita e avea ma Peresitene o le Ekalesia. Ona ia fautuaina atu lea e tofia o ia e vaaia tagata.

Ina ua uma le tautalaga a Sini Rikitone, sa faapea atu Polika Iaga:

“Ou te le popole po o ai e taitaia le Ekalesia, … ae tasi le mea e tatau ona ou iloa, ma o lena mea e faapea po o le a le finagalo o le Atua i ai. O loo ia te a’u ki ma mea e maua mai ai le finagalo o le Atua e uiga i le mataupu. …

“Na faaee mai e Iosefa i luga o o tatou ulu [e faatatau i Aposetolo e Toasefululua] ia ki uma ma mana e anaina e le au Aposetolo lea sa ia umiaina a’o le’i maliu o ia. …

“Ua tele taimi na saunoa mai ai Iosefa i le Toasefululua, ‘Ua ou faataatia le faavae ma e tatau ona outou atiae ai i luga, aua ua taatia atu i luga o o outou tauau le malo’” (i le History of the Church, 7:230).

Aisea na taua ai le molimau a Polika Iaga e uiga i ki o le perisitua? (A uma ona tali mai tagata aoga, tusi le upumoni lenei i luga o le laupapa: O le au Aposetolo e umia ki uma o le perisitua e manaomia e pulefaamalumalu ai i le Ekalesia.)

Faamalamalama atu faapea, pe a faauuina se Aposetolo, e tuuina atu ia te ia ki uma e manaomia o le perisitua i luga o le fogaeleele (tagai i le MF&F 112:30–32), ae o le pule e faaaoga ai na ki e gata lava i le Aposetolo sinia, o le Peresitene o le Ekalesia.

Faitau leotele le faatonuga lenei na tuuina atu e le Perofeta o Iosefa Samita i le Korama a Aposetolo e Toasefululua ia Ianuari 1836, i le silia ma le valu tausaga a o lei maliu o ia:

“O le Toasefululua e le i lalo o le pule a se isi lava tagata nai lo o le Au Peresitene Sili, … ‘pe a ou le i ai, e leai foi se Au Peresitene Sili e pulea le Toasefululua’” (i le History of the Church, 2:374).

E faavae i luga o lenei faamatalaga, o le a le mea e tupu i le Au Peresitene Sili pe a maliu le Peresitene o le Ekalesia? O ai e taitaia le Ekalesia? (A uma ona tali mai tagata aoga, tusi le aoaoga faavae lenei i luga o le laupapa: A maliu le Peresitene o le Ekalesia, e soloia le Au Peresitene Sili ma le Korama a Aposetolo e Toasefululua e avea ma le korama e pulefaamalumalu.)

Faamalamalama atu pe a maliu le Peresitene o le Ekalesia, o fesoasoani i le Au Peresitene Sili latou te toe tauaveina o latou tulaga o ni sui o le Korama a Aposetolo e Toasefululua, e tusa ai ma o latou tulaga sinia i le Korama. Ina ua faatoa faatulaga le Korama i le 1835, sa filifilia le tulaga sinia i tausaga o le soifua. O aso nei, e fua le tulaga sinia o se tagata i le aso na avea ai o ia ma se tasi o le Korama a le Toasefululua.

Valaaulia se tagata aoga e faitau leotele le Mataupu Faavae ma Feagaiga 124:127–128, ma fai atu i le vasega e vaavaai po o ai le Aposetolo sinia ma le Peresitene o le Korama a Aposetolo e Toasefululua i le taimi o le maliu o Iosefa Samita. Fai atu ia i latou e lipoti mai mea ua latou aoaoina.

E faavae i mea ua e aoaoina, aisea atonu e te naunau ai e mulimuli ia Polika Iaga ina ua mavae le maliu o le Perofeta o Iosefa Samita?

Faamaea le aoaoga faavae o loo i luga o le laupapa e ala i le faaopoopo atu i ai o le vaega o loo vaseina: Pe a maliu le Peresitene o le Ekalesia, e soloia le Au Peresitene Sili ma le Korama a Aposetolo e Toasefululua e avea ma korama e pulefaamalumalu, i lalo o le taitaiga a le Aposetolo sinia.

E toatele le Au Paia na maua se molimau o Polika Iaga e tatau ona taitaia le Ekalesia

Faamalamalama atu faapea, i le aso 8 o Aokuso, 1844, na faapotopoto ai le Au Paia i Navu, i le 10 i le taeao e faalogologo atu ia Sini Rikitone a’o faia lana tautalaga i le avea ai ma tagata e vaaia le Ekalesia. Ona sa agi le matagi agai atu i le tulaga [pulelaa], o lea na tu ai Uso Rikitone i totonu o se taavaletoso i tua atu o le faapotopotoga ina ia mafai ona lagona lelei atu e tagata lona siufofoga. Sa faliu atu i ai tagata ina ia mafai ona latou vaai atu ia Uso Rikitone a’o lauga o ia. Sa ia saunoa atu mo se itula ma le afa i le faitau afe o le Au Paia na faapotopoto ai, i le faamalamalamaina atu o le pogai e tatau ai ona avea o ia ma tagata e vaaia le Ekalesia. Na faamatalaina e nisi o tagata ia lana tautalaga e leai se agaga musuia na i ai.

Sa o mai Peresitene Polika Iaga ma isi taitai o le Ekalesia ma alala i luga o le tulaga e faafeagai ma le pito na saunoa mai ai Sini Rikitone. E oo ane i le taimi lea ua pe le matagi. Ina ua uma le tautalaga a Sini Rikitone, sa saunoa loa Peresitene Polika Iaga. Sa toe faliu mai le aofia e faalogologo i le saunoaga a Polika ma u atu o latou papatua i le taavaletoso sa i ai Sini Rikitone. (Tagai i le George Q. Cannon, “Discourse,” Deseret News, Fep. 21, 1883, 67.) Sa puupuu le saunoaga a Peresitene Iaga ma fai mai, sa sili atu ia te ia le foi mai i Navu e faanoanoa mo le Perofeta nai lo le tofia e avea ma se taitai fou. Sa ia faasilasila mai e faapea, o le a faia i se taimi mulimuli ane i lena aso se faatasiga a taitai o le Ekalesia ma tagata o le ekalesia i le 2:00 i le aoauli. Sa molimau mulimuli ane nisi o tagata o le Ekalesia e faapea, a’o saunoa Polika Iaga, sa latou vaaia le suia o ona foliga ma faalogo ua sui lona leo, sa pei lava o foliga ma le leo o le Perofeta o Iosefa Samita. O lenei mea faavavega na tupu sa fesoasoani i le toatele o le Au Paia e iloa, na finagalo le Alii ia Polika Iaga e taitaia le Ekalesia.

Valaaulia se tagata aoga e faitau leotele faataitaiga nei o le mea na vaaia ma faalogoina e le toatele o le Au Paia:

Sa faamatalaina e Benjamin F. Johnson, “O le taimi lava na ia [Polika Iaga] saunoa ai, sa vave ona ou tu i luga, ona sa pei uma lava o le siufofoga o Iosefa, ma lona tagata, i foliga, uiga faaalia, lavalava ma foliga vaaia, o Iosefa lava, i lona tino mai; ma sa ou iloa i le taimi lava lea, sa i ai i ona luga le agaga ma le tiutetauave o Iosefa” (My Life’s Review, 104, e pei ona siiina mai i le Church History in the Fulness of Times Student Manual, 2nd ed. [Church Educational System manual, 2003], 291).

Na faamatala e William C. Staines ia Polika Iaga sa saunoa i se “leo e pei o le siufofoga o le Perofeta o Iosefa. Sa ou faapea lava o ia lea, na faapena foi i le faitau afe sa faalogo i ai” (i le History of the Church, 7:236).

Na tusia e Uilifoti Uitilafi, “Ana faapea ou te le’i vaai ia te ia i o’u lava mata, semanu e leai se tasi e mafai ona faatalitonuina a’u, sa le o Iosefa Samita, ma e mafai ona molimau soo se tasi i lenei mea, o e sa masani i nei tamalii e toalua” (i le History of the Church, 7:236).

Faamalamalama atu faapea, i le taimi o le fonotaga na faia mulimuli ane i lena aso i le 2:00 i le aoauli, sa faapea ona saunoa ai Polika Iaga ma isi tagata o le Korama a Aposetolo e Toasefululua. E toatele isi na ta‘ua sa foliga ma sa pei le leo o Polika Iaga o Iosefa Samita a o saunoa o ia i lena aso. Sa manatuaina e George Q. Cannon, o le sa 17 ona tausaga i lena taimi, “Sa o le siufofoga o Iosefa lava ia. … Na foliga mai i le vaai a tagata, na pei lava o Iosefa le tagata na tu mai i o latou luma” (i le History of the Church, 7:236; tagai foi i le Edward William Tullidge, Life of Brigham Young [1877], 115). E le gata i lenei vavega, e toatele le Au Paia na lagonaina le molimau a le Agaga Paia ia i latou o Polika Iaga ma le Korama a Aposetolo e Toasefululua na valaauina e le Atua e taitaia le Ekalesia. I le faaiuga o lenei sauniga, na autasi ai le palota a le Au Paia i Navu e lagolago le Korama a Aposetolo e Toasefululua, ma Polika Iaga i o latou luma, e taitaia le Ekalesia. Ae peitai, e le o tagata uma o le Ekalesia na iu ina filifili e mulimuli i Aposetolo. O nisi o tagata sa filifili e mulimuli i tagata taitoatasi e pei o Sini Rikitone ma James Strang, o e na faatutuina a laua lava lotu.

Na faapefea ona faamanuia e le Alii le Au Paia ina ia iloa po o ai na Ia tofia e taitaia le Ekalesia?
E faapefea ona tatou iloa o taitai o le aso ua valaauina e le Atua? (A uma ona tali mai tamaiti aoga, tusi le aoaoga faavae lenei i le laupapa: E ala mai le Agaga Paia, e mafai ona tatou maua se molimau o i latou ua taitaia le Ekalesia ua valaauina e le Atua.)
Aisea e te manatu e taua ai le maua o se molimau, o o tatou taitai o le Ekalesia ua valaauina e le Atua?
O le a se taimi na e maua ai se molimau e faapea, o se taitai o le Ekalesia na valaauina e le Atua. O le a se mea na e faia e maua ai lena molimau?

Faamalamalama atu faapea, ina ua maliu le Perofeta o Iosefa Samita, sa vave lava ona mafai ona faaaoga e le Aposetolo sinia (Polika Iaga) ia ki uma o le perisitua. Sa ia te ia le aia tatau e maua ai faaaliga e faatatau i le taimi e faatulaga ai se Au Peresitene Sili fou. I le 1847—i le silia ma le lua tausaga talu ona mavae le faamaturoina—sa musuia ai Polika Iaga e toefaatulaga le Au Peresitene Sili, nai lo le faaauau ai pea ona taitai le Ekalesia o se Peresitene o le Korama a Aposetolo e Toasefululua.

Faaali atu ata o le Au Peresitene Sili ma le Korama a Aposetolo e Toasefululua i le taimi lenei. Ina ia tuuina atu i tagata aoga se avanoa e fai ai se aotelega o mea ua latou aoaoina, fai atu ia i latou e faamalamalama mai le mea e tupu i le Au Peresitene Sili ma le Korama a Aposetolo e Toasefululua pe a maliu le Peresitene o le Ekalesia. Fai atu ia te i latou e faailoa mai po o ai o le a avea ma Peresitene o le Ekalesia po o le Aposetolo sinia pe afai e maliu nei le Peresitene o loo i ai nei o le Ekalesia.

Atonu e te manao e faaiu lenei lesona i le molimau atu, o ki ma mana lava e tasi o le perisitua na faaeeina e Iosefa Samita i luga o Polika Iaga, ma sui o le Korama a Aposetolo e Toasefululua, o loo umia i le aso e le Peresitene o le Ekalesia, ona Fesoasoani i le Au Peresitene Sili, ma sui o le Korama a Aposetolo e Toasefululua. E mafai foi ona e faasoa atu pe na faapefea ona maua lau molimau o taitai o le Ekalesia ua valaauina e le Atua. Valaaulia tagata aoga e saili ma le agaga tatalo ia maua pe faamalosia a latou molimau e uiga i upumoni sa latou talanoaina i le aso.

Tala ma Faamatalaga o Talaaga

Faasologa o mea na tutupu i le suiga o le paeaiga i le Au Peresitene ina ua mavae le faamaturoina o Iosefa Samita

Aso
27 Iuni, 1844	Ua faamaturoina Iosefa ma Ailama Samita.
29 Iuni, 1844	Maimoaina e tagata lautele o tino maliu o Iosefa ma Ailama Samita.
27 Iuni–7 Iulai, 1844	Ua na o Willard Richards ma Ioane Teila, o le na manu‘a, le au Aposetolo sa i Navu.
8 Iulai, 1844	Ua toe foi mai Pale P. Palate i Navu e fesoasoani ia Willard Richards ma Ioane Teila i le faamaopoopoina o le Ekalesia.
3 Aokuso, 1844	Taunuu Sini Rikitone i Navu mai Pittsburg, Penisilevania.
4 Aokuso, 1844	Ua ta’u atu e Sini Rikitone i se vaega o le Au Paia, e tatau ona avea o ia ma tagata e vaaia le Ekalesia, ma ua manao e talo se fonotaga faapitoa i le aso 6 o Aokuso, e faamaonia ai lona tofiga. O le fonotaga sa faia tonu i le Aso Tofi, 8 o Aokuso.
6 Aokuso, 1844	O le toatele o isi Aposetolo uma, e aofia ai ma Polika Iaga, ua toe foi mai i Navu mai a latou misiona.
7 Aokuso, 1844	I le taeao, sa fono ai le au Aposetolo ma Sini Rikitone i le maota o Ioane Teila o le na manu’a. I se fonotaga i le aoauli a le au Aposetolo, fautua maualuga, ma faitaulaga sili, sa toe fai atu ai Sini Rikitone e tatau ona avea o ia ma tagata e vaaia le Ekalesia. Sa faapea atu Polika Iaga, o loo ia [Polika Iaga] umia ki, ma e manao e fai le finagalo o le Alii i le mataupu.
8 Aokuso, 1844	I le taimi o se sauniga i le 10:00 i le taeao, na saunoa atu ai Sini Rikitone mo le itula ma le afa i le faitau afe o le Au Paia na potopoto, e faamalamalama atu le mafuaaga e tatau ai ona avea o ia ma tagata e vaaia le Ekalesia. Sa saunoa foi Polika Iaga ma valaau ai le Au Paia e toe potopoto ane mo se fonotaga i le 2:00 i le aoauli. I le taimi o sauniga uma e lua, e toatele le Au Paia na molimau, mo se taimi le tumau sa foliga ma pei ai le leo o Polika Iaga o le Perofeta o Iosefa Samita. I le taimi o le sauniga i le 2:00 i le afiafi, na lagolago ai e le Au Paia ia Polika Iaga ma le au Aposetolo e Toasefululua o ni taitai o le Ekalesia. E toatele le Au Paia na molimau i le pau atu o le [ofutele] tiute o le Perofeta o Iosefa Samita i luga o Polika Iaga, o le mo se taimi le tumau sa foliga ma pei lona leo o Iosefa Samita.

O le soloa‘iga i le Au Peresitene o le Ekalesia na faavaeina e le Alii

O le soloa‘iga i le Au Peresitene o le Ekalesia na faavaeina e le Alii. E leai lava se taimi e lei i ai se taitaiga musuia i le Ekalesia, ma e leai foi se pogai mo ni masalosaloga po o ni feeseeseaiga i le po o ai o le a avea ma Peresitene e sosoo ai o le Ekalesia.

Na aoao mai Peresitene Ezra Taft Benson, “Ua silafia e le Atua mea uma, o le iuga mai le amataga, ma e leai se tagata e avea ma peresitene o le ekalesia a Iesu Keriso i se ala faafuasei, pe tumau ai iina ona o se laki, pe maliu ona o se mea tupu fua” (“Jesus Christ—Gifts and Expectations,” New Era, Me 1975, 16–17).

O le faaeeina atu e Iosefa Samita o ki o le malo i luga o le Korama a Aposetolo e Toasefululua

Na tusia e Wilford Woodruff, o le sa avea ma se sui o le Korama a Aposetolo e Toasefululua, le mea na tupu ia Mati 1844 a o lei maliu Iosefa Samita:

“Sa ia tu mo se tolu itula i totonu o le potu ma tuuina mai lana lauga mulimuli. Sa faatumuina le potu e pei o se afi mumu. O lona fofoga sa manino e pei o le pulu manino o le laau o le paina, o ana upu e pei o le emo o le uila ia i matou. Sa matua tuia ai vaega uma o o matou tino mai le tumutumu o o matou ulu e oo atu i o matou alofivae. Sa ia faapea mai, ‘Uso e, ua faamauina e le Alii Silisiliese i luga o lo’u ulu Perisitua uma, ki uma, mana uma, aoaoga faavae uma ia e aofia i le tisipenisione faaiu o le atoatoaga o taimi, ma i le fausiaina o le malo o le Atua. Ou te faamauina i luga o o outou ulu na aoaoga faavae, Perisitua, tofi aposetolo, ma ki uma o le malo o le Atua, ma o lenei ua tatau ia te outou ona faamalosia o outou tauau ma tauaveina lenei malo [a leai] o le a fano outou’” (Aoaoga a Peresitene o le Ekalesia: Wilford Woodruff[2004],xxxii-xxxiv).