Na maua e Iosefa Samita le faaaliga lenei mo ia lava, Oliva Kaotui, ma Tavita Uitimera ia Iuni 1829. Ina ua mavae le valaauina o alii e toalua e folafola atu le salamo, ona aoao lea o i laua e le Faaola i le taua o le tauaveina o Lona suafa i o laua luga. Sa ia ta‘ua le valaauga o le a oo mai o le au Aposetolo e Toasefululua ma lo latou manao e tauave i o latou luga le suafa o Iesu Keriso “ma le faamoemoe atoa o le loto” (MF&F 18:27). Ona tuu mai lea e le Alii ia Oliva Kaotui ma Tavita Uitimera le tiutetauave e saili ai mo tagata e mafai ona avea ma sui o le Korama a le Toasefululua.
Ua aoao mai Iesu Keriso ua na o Lona suafa lava e mafai ona faaolaina ai i tatou
Valaaulia ni tagata o le vasega se toatasi pe toalua e tusi o laua faaiu i le laupapa. Fai atu i tagata o le vasega fesili nei:
O le a le uiga o lou faaiu ia te oe?
O a ni avanoa ma ni tiutetauave e oo mai i lena igoa? (O avanoa e ono aofia ai se nofoaga e nonofo ai, alofa o le aiga, saogalemu, ma le ola ae i le Ekalesia. O tiutetauave e ono aofia ai le fesoasoani ia tausisia le saogalemu o le aiga, faia lelei o tagata o le aiga ma le faaaloalo, o le faia o feau i le fale, ma le aumaia o le mamalu i le igoa o le aiga.)
Faamanatu atu i tagata o le vasega na valaauina e le Alii ia Oliva Kaotui ma Tavita Uitimera e alaga atu le salamo (tagai i le MF&F 18:6, 9, 14). Faamalamalama atu e faapea, ina ua uma ona tuuina mai e le Alii ia i laua lenei faatonuga, sa Ia fetalai mai ia i laua e uiga i avanoa ma tiutetauave o le tauaveina i o laua luga o Lona suafa.
Kopi le siata lenei i le laupapa, ae aua ne’i aofia ai tali i le laina pito i lalo. Valaaulia tagata o le vasega e kopi le siata i a latou api o le vasega po o api talaaga mo le suesueina o tusitusiga paia. Ona valaaulia lea o tagata o le vasega e faitau filemu le Mataupu Faavae ma Feagaiga 18:17–25 ma faailoa mai avanoa ma tiutetauave e o mai ma le tauaveina i o tatou luga o le suafa o Iesu Keriso. Fai atu ia i latou e tusi mea ua latou maua i le laina pito i lalo o le siata.
O Avanoa
O Tiutetauave
Maua ma aoaoina e le Agaga Paia
Valaaulia isi e papatiso ma tumau e oo i le iuga
Maua le faaolataga i le malo o le Tama
Ia i ai le faatuatua, faamoemoe, ma le alofa mama
Aloese mai le fefinaua‘i ma isi ekalesia
Tautala faamaoni i le faautauta
Salamo ma tumau e oo i le iuga
E tusa ai ma le Mataupu Faavae ma Feagaiga 18:23, aisea e taua ai mo i tatou le tauave i o tatou luga le suafa o Iesu Keriso? (E tatau ona faailoa mai e tagata o le vasega le aoaoga faavae lenei: O le suafa o Iesu Keriso na o le pau lea o le igoa e mafai ona faaolaina ai i tatou. Atonu e te manao e fautuaina tagata o le vasega e faailoga lenei upumoni i totonu o a latou tusitusiga paia.)
Valaaulia se tagata o le vasega e faitau le faamatalaga lenei a Elder M. Russell Ballard, o le Korama a Aposetolo e Toasefululua. Fai atu i le vasega e faalogologo i le fautuaga a Elder Ballard e uiga i auala e tatau ona tatou tauaveina ai i o tatou luga le suafa o Iesu Keriso:
Ata
Elder M. Russell Ballard
“Tatou te ave i o tatou luga le suafa o Keriso i le vai o le papatisoga. Tatou te faafouina aafiaga o lena papatisoga i vaiaso taitasi pe a tatou aai ma feinu i le faamanatuga, ma faailoa atu ai lo tatou naunautai e ave i o tatou luga Lona suafa ma folafola atu tatou te manatua pea o Ia (tagai i le MF&F 20:77, 79) …
“Ua poloaiina i tatou e tutu atu e avea ma molimau ia te Ia. … O lona uiga e ao ona tatou naunautai e faailoa atu i isi po o ai o loo tatou mulimuli i ai ma po o ai e ana le Ekalesia lea tatou te auai: o le Ekalesia a Iesu Keriso. E mautinoa lava tatou te fia faia lenei mea i le agaga o le alofa ma le molimau. Tatou te fia mulimuli i le Faaola e ala i le tautino atu i se ala faigofie ma le manino, ae ia faia ma le lotomaualalo, o i tatou o tagata o Lana Ekalesia” (“O Le Taua o se Igoa,” Ensign po o le Liahona, Nov. 2011, 79–80).
O a auala na fautua mai e Elder Ballard tatou te tau atu ai i isi tatou te mulimuli ia Iesu Keriso?
I le Mataupu Faavae ma Feagaiga 18:19–20, na poloaiina ai e le Alii ia Oliva Kaotui ma Tavita Uitimera ia ia te i laua le faatuatua, faamoemoe, ma le alofa mama, ma aloese mai le finau ma isi ekalesia ma o latou tagata lotu. Aisea e te manatu e taua ai ona tatou faia nei mea i le avea ai o ni soo o Iesu Keriso?
Atonu e te manao e fesoasoani i tagata o le vasega ia malamalama i le Mataupu Faavae ma Feagaiga 18:20, o le fuaitau “ekalesia a le tiapolo” e le o faatatau i se lotu patino. E faasino i soo se tagata, vaega, faalapotopotoga, po o le filosofia galue faasagatau i le Ekalesia a Iesu Keriso ma le faaolataga o fanau a le Atua.
Valaaulia tagata o le vasega e tusi i a latou api o le vasega po o api talaaga mo le suesueina o tusitusiga paia, se auala se tasi e mafai ona latou faailoa atu ai i isi o loo latou mulimuli ia Iesu Keriso.
Ua faaali mai e le Alii le valaauga ma le misiona a le au Aposetolo e Toasefululua
Faamalamalama atu, sa fetalai le Alii e uiga i ni tamalii e ese mai ia Oliva Kaotui ma Tavita Uitimera, o e o le a tauaveina i o latou luga le suafa o Iesu Keriso ma folafola atu Lana talalelei. Valaaulia tagata o le vasega e faitau filemu le Mataupu Faavae ma Feagaiga 18:27–32 ma tusi a latou tali i fesili nei. (Tusi fesili nei i luga o le laupapa ao le’i amataina le vasega, pe saunia i luga o se pepa e tufa atu mo tagata taitasi o le vasega.)
O a manaoga o le a i ai o nei soo e toasefulululua?
O a mea o le a valaauina nei tamalii e fai? (Vaavaai mo ni manatu eseese se 3-5.)
O ai tagata o le Korama a Aposetolo e Toasefululua o loo i ai nei e mafai ona e manatua? (Tusi o latou suafa.)
A maea le taimi, fai atu i tagata o le vasega e lipoti mai a latou tali i le fesili muamua ua tusia i luga o le laupapa. Ona tuuina atu lea o le fesili lenei:
O le a sou manatu i le uiga o le tauave i o tatou luga o le suafa o Iesu Keriso ma le faamoemoe atoa o le loto?
Valaaulia ni nai tagata o le vasega e lipoti mai a latou tali i le fesili lona lua ua tusia i luga o le laupapa. O se tasi o mataupu faavae e tatau ona faailoa mai e tagata o le vasega o le O Aposetolo e Toasefululua a le Alii ua valaauina e talai atu ma tuuina atu le talalelei i le lalolagi atoa. Valaaulia se tagata o le vasega e faitau leotele le Mataupu Faavae ma Feagaiga 18:37–39. Fai atu i le vasega e mulimuli i le faitauga, ma vaavaai mo le tiutetauave na tuuina mai e le Atua ia Oliva Kaotui ma Tavita Uitimera.
O le a le mea na poloaiina e le Alii ia Oliva ma Tavita e fai? (Saili ni alii o le a valaauina e le Alii e avea ma tagata muamua o le Korama a Aposetolo i aso e gata ai.)
E faapefea ona latou iloa po o ai e tatau ona valaauina o ni Aposetolo? (O Aposetolo i le lumanai o le a faaalia le naunau ma galuega na fetalai mai ai le Alii.)
Faamalamalama atu na maua foi e Matini Harisi le tiutetauave o le sailia o le au Aposetolo e Toasefululua. Na valaauina ia uluai tagata o le Korama a Aposetolo e Toasefululua o aso e gata ai i le aso 14 o Fepuari, 1835, i le toeitiiti atoa le lima tausaga talu ona faatulagaina aloaia le Ekalesia. O le faaaliga i le Mataupu Faavae ma Feagaiga 18 e fesoasoani tatou te malamalama ai i le taua o lenei korama, e ala i le otootoina o le matafaioi a le au Aposetolo i le Ekalesia a Iesu Keriso.
Valaaulia tagata o le vasega e lipoti mai a latou tali i le fesili lona tolu ua tusia i luga o le laupapa i le fai atu ia i latou e ta’u mai suafa o sui o loo i ai nei o le Korama a Aposetolo e Toasefululua. Afai e mafai, faaali atu ni ata o nei tamalii. O loo maua ata na pueina i lomiga o Me ma Novema o le Ensign ma le Liahona ma luga o le lds.org/church/leaders.
Valaaulia se tagata o le vasega e faitau le saunoaga a Elder Jeffrey R. Holland o le Korama a Aposetolo e Toasefululua. A o lei faitauina e le tagata o le vasega, faamalamalama atu na tuuina mai e Elder Holland lenei saunoaga i lana uluai konafesi aoao i le avea ai o se Aposetolo fou faatoa valaauina.
Ata
Elder Jeffrey R. Holland
“E mautinoa lava o lo’u fiafiaga sili ma le mitamitaga sili o manatu uma o le, ua ou maua le avanoa, e pei ona faaupuina e Nifae, e ‘tautalatala e uiga ia Keriso, … olioli ia Keriso, … talai atu Keriso, [ma] vavalo e uiga ia Keriso’ (2 Nifae 25:26) po o fea lava ou te i ai, ma po o ai foi matou te i ai, seia oo ina iu lo’u ola. E mautinoa lava e leai se isi faamoemoega e maualuga atu po o se avanoa e sili atu nai lo o le avea ma se ‘[molimau] faapitoa o le suafa o Keriso i le lalolagi atoa’ (MF&F 107: 23).
“… I tua atu o au upu ma aoaoga ma molimau tautalagia, e ao ona avea lo’u olaga ma se vaega o lena molimau ia Iesu. E tatau ona atagia i lo’u lava tagata le paia o lenei galuega. E matuai le mafai ona ou gafatia pe afai e i ai se mea ou te ono tautala pe faia e ono faaitiitia ai la outou molimau ia Keriso, lo outou alolofa i lenei ekalesia, po o le maualuga o loo outou taulimaina ai le tofi paia faaaposetolo.
“Ou te folafola atu ia te outou—e pei ona ou folafola atu i le Alii ma o’u uso nei—o le a ou taumafai e ola agavaa mo lenei faatuatuaga ma auauna atu i le atoatoa ou te mafaia” (“Miracles of the Restoration,” Ensign, Nov. 1994, 31).
E faapefea ona fesoasoani ia te outou le iloa, o i latou o e auauna atu o ni Aposetolo ua tauaveina i o latou luga le suafa o Iesu Keriso ma le faamoemoe atoa o le loto? E mafai faapefea ona tatou mulimuli i a latou faataitaiga?
Valaaulia se tagata se toatasi pe toalua o le vasega e fesoasoani atu ia te oe i se gaoioiga. Fusi mata o nei tagata o le vasega pe fai atu i ai e moeiini o laua mata. Valaaulia ni nai isi tagata o le vasega e feauauai e tautatala i leo masani. Fai atu i tagata o le vasega o loo nonoa mata e ta‘u mai igoa o i latou na tautatala. Ona fai atu lea o le fesili lenei:
Aisea e faigofie atu ai ona iloa isi leo nai lo o isi? (Atonu e ta’u mai e tagata o le vasega, o le tatou faalogo soo lava i se leo, o le masani lelei foi lena ma iloa lelei.)
Valaaulia se tagata o le vasega e faitau leotele le Mataupu Faavae ma Feagaiga 18:34–36, 47. Fai atu i le vasega e mulimuli i le faitauga ma faailoa mai se auala se tasi, na fetalai mai le Alii e mafai ona tatou faalogo ai i Lona siufofoga. (Atonu e manaomia lou faamalamalama atu i le fuaiupu e 34, o le fuaitau “nei upu” e faatatau i faaaliga i le Mataupu Faavae ma Feagaiga.)
E tusa ai ma nei fuaiupu, e faapefea ona tatou faalogoina le siufofoga o le Alii? (E mafai ona tuuina mai e tagata o le vasega ni tali eseese, ae ia mautinoa ua manino le mataupu faavae lenei: E mafai ona tatou lagona le siufofoga o Iesu Keriso a o tatou faitau i tusitusiga paia e ala i le mana o le Agaga. Tusi le upumoni lenei i luga o le laupapa.)
O a ni auala e fesoasoani ai le suesue i tusitusiga paia tatou te faalogo ai i le siufofoga o Iesu Keriso?
Fesoasoani i tagata o le vasega ia malamalama, e mafai ona tatou faalogo i le siufofoga o le Alii i auala e le lagona i o tatou taliga. E ala i le Agaga Paia, e mafai ona tatou maua lagona ma savali i o tatou mafaufau ma loto (tagai i le MF&F 8:2-3).
Faasino atu i le upumoni na e tusia i luga o le laupapa.
E mafai faapefea e lenei upumoni ona faatosinaina le auala e te manatu ai e uiga i tusitusiga paia? E mafai faapefea ona ia taialaina oe a o e filifilia le taimi ma le nofoaga e faitau ai tusitusiga paia?
O anafea na e lagonaina ai le musuia o oe e le Alii a o e faitau pe mafaufau loloto i tusitusiga paia?
Uunai tagata o le vasega e suesue i tusitusiga paia i aso taitasi ma ia filiga i le sailia ma malamalama i le siufofoga o le Alii. Otooto le Mataupu Faavae ma Feagaiga 18:40–47 i le faamatala atu e faapea, na faamautu mai e le Alii o Oliva Kaotui, Tavita Uitimera, ma sui i le lumanai o le Korama a Aposetolo e Toasefululua, o le a maua faamanuiaga silisili pe afai latou te faamaoni i le tausiga o Ana poloaiga. Atonu e te manao e faaiuina lenei lesona i le molimau atu e uiga i upumoni sa outou talanoaina faatasi ma tagata o le vasega.
E faatatau i le Mataupu Faavae ma Feagaiga 18:20, na aoao mai ai Peresitene Iosefa Filitia Samita, “E tatau ona tatou malamalama o le faatonuga lenei ia i tatou, ia finau faasaga atu i mea leaga uma, e faapea ona tetee i le amiotonu ma le upumoni” (Church History and Modern Revelation, 2 vols. [1953], 1:83). E le o se valaau e finau faasaga i isi lotu po o o latou tagata lotu.
Na saunoa mai Peresitene Dieter F. Uchtdorf o le Au Peresitene Sili:
Ata
Peresitene Dieter F. Uchtdorf
“A o tatou mulimulitai i faataitaiga atoatoa [a le Faaola], o le a mafai ai la ona avea o tatou lima ma Ona aao; o tatou mata, ma Ona fofoga; o tatou loto, ma Lona finagalo. …
“I lo tatou iloa ai o nei mea, ia tatou aapa atu i isi ma o tatou loto ma lima mafola, aua o loo savalia e tagata uma lona lava auala faigata. I le avea ai ma soo o Iesu Keriso, lo tatou Alii, ua valaauina i tatou ia lagolago ma faamalolo atu ae le o le tausalaina” (“O Outou o O’u Lima,” Ensign po o le Liahona, Me 2010, 68-69).