O Le Matafaioi a le Tagata Aoao

Folasaga

O le faamoemoega o lenei lesona o le fesoasoani lea i tagata o le vasega ia iloa pe faapefea ona faataunuu la latou matafaioi i le aoaoina o le talalelei. Na saunoa Peresitene Henry B. Eyring o le Au Peresitene Sili, “O le liua moni, e faalagolago lea i se tagata o le vasega e sailiili saoloto i le faatuatua, ma se taumafaiga tele” (“We Must Raise Our Sights” [saunoaga i faiaoga o mataupu faalelotou a le OAE], 14 Aok., 2001], 4, LDS.org). A o e fesoasoani i tagata o le vasega e faataunuu la latou matafaioi i le faagasologa o le aoaoina, o le a latou aoaoina auala e valaaulia ai faaaliga faaletagata lava ia ma faaloloto lo latou liua i le Alii. Atonu e manaomia ona e toe faamanatuina e le aunoa ia mataupu faavae ua aoaoina i lenei lesona e faamanatu ai i tagata o le vasega o latou tiutetauave i le aoaoina o le talalelei.

Fautuaga mo le Aoaoina Atu

O le matafaioi a le faiaoga, o le tagata aoao, ma le Agaga Paia i le aoaoina o le talalelei

Aumai se meaai po o se meainu i le vasega (e pei o se fualaau aina po o se falaoa po o se ipu vai). Valaaulia ni tagata se toalua e o mai i le pito i luma o le vasega. Fai atu i se tasi o tagata o le vasega e u le meaai pe miti i le vaiinu. Fai atu i le tagata muamua o le vasega e faamatala atu le tofo o le meaai (po o le vaiinu) i le tagata lona lua o le vasega. Faamalosiau atu ia te ia e matuai faamatala lelei ina ia faamalieina e le faamatalaga le fiaai pe faamalieina ai le fiainu o le tagata lona lua. Ona fai atu lea o fesili nei i le tagata lona lua:

O le a se faamanuiaga na e maua mai le meaai (po o le vaiinu) lea na faamatalaina e le isi tagata o le vasega?
O le a le lelei o le faamatalaga a le tagata o le vasega na faamalieina ai lou fiaai (po o le fiainu)?
O le a le mea e tatau ona e faia e maua ai se malosi po o le faamanuiaina mai i lenei meaai (po o le vaiinu)?

Fai atu i le vasega pe faapefea ona fesootai le faataitaiga lenei o le faamalieina o manaoga faaletino o o tatou tino i o tatou tiutetauave e aoao ma tuputupu ae faaleagaga.

Faailoa atu o nisi tagata ua manatu o le tiutetauave mo le aoaoina o le talalelei e fitoitonu lea i se faiaoga. Ae ui i lea, e pei lava o le faataitaiga i le meaai po o le vaiinu, e le mafai e se tasi tagata ona maua se malamalamaaga loloto o upumoni faaleagaga mo le isi tagata. E ao ia i tatou taitoatasi ona tatou aoao ma faaaoga upumoni o le talalelei mo i tatou lava ina ia mafai ona maua le malosi faaleagaga ma le tuputupu ae.

Valaaulia se tagata o le vasega e faitau leotele le Mataupu Faavae ma Feagaiga 88:118. Uunai le vasega e mulimuli i le faitauga, ma vaavaai mo upu po o fasifuaitau o loo faamatala ai lo tatou tiutetauave i le aoaoina o le talalelei.

O a upu po o fuaitau e faamatala ai lo tatou tiutetauave i le aoaoina o le talalelei? (“Ia outou saili ma le filiga,” “aoao i le tasi,” “saili i le aoaoina, e ala lava lea i le suesue ma le faatuatua foi.” (Atonu e te manao e valaaulia se tagata o le vasega e lisi nei fuaitau i luga o le laupapa a o ta‘u mai e tagata o le vasega.)
Ua tatou masani i le uiga o le saili i le aoaoina “e ala lava lea i le suesue.” O le a sou manatu i le uiga o le saili le aoaoina “ma le faatuatua foi”?

Ina ia fesoasoani i tagata o le vasega ia malamalama lelei i le uiga o lenei fuaitau, valaaulia se tagata o le vasega e faitau leotele le faamatalaga lenei mai ia Elder David A. Bednar o le Korama a Aposetolo e Toasefululua. Afai e mafai, tuuina atu se kopi mo tagata taitasi o le vasega po o le tusi o le faamatalaga i luga o le laupapa a o lei amataina le vasega. Fai atu i tagata o le vasega e vaavaai mo upu po o fasifuaitau e fesoasoani latou te malamalama ai i le poloaiga a le Alii e saili i le aoaoina e ala i le faatuatua.

“O le aoao e ala i le faatuatua e manaomia ai le tuuina atu atoa faaleagaga, faalemafaufau, ma le faaletino ae le na ona talia. …

“… E ao i se tagata o le vasega ona faaaoga le faatuatua ma galue ina ia mafai ona maua le poto mo ia lava” (“Seek Learning by Faith” [lauga i faiaoga faalelotu o le OAE, 3 Fep., 2006], 3, LDS.org).

Tusi le faamatalaga lenei i luga o le laupapa: O le aoaoina faaleagaga e manaomia ai le …

Fai atu i tagata o le vasega e faaaoga le faamalamalamaga a Elder Bednar ma mea ua latou aoaoina e uiga i lo tatou tiutetauave o ni tagata aoao e faauma ai le faamatalaga lenei. O tali e ono aofia ai mea nei: O le aoaoina faaleagaga e manaomia ai taumafaiga i la tatou pitolaau. O le aoaoina faaleagaga e manaomia ai lo tatou faaaoga o le faatuatua ma galue.

Ina ia fesoasoani i tagata o le vasega ia malamalama i le aafiaga e mafai ona faia e taumafaiga patino i lo latou aoaoina faaleagaga, tusi le ata o loo avatu faatasi ai i luga o le laupapa. Faamalamalama atu e faapea, i le Mataupu Faavae ma Feagaiga 50, e fesoasoani le Alii ia tatou malamalama lelei i la tatou matafaioi i le aoaoina o le talalelei. Ina ia faia lenei mea, sa Ia faamatala muamua mai le matafaioi a le faiaoga ma le Agaga Paia i le aoaoina o le talalelei.

Valaaulia se tagata o le vasega e faitau leotele le Mataupu Faavae ma Feagaiga 50:13–14. A o lei faitau le tagata o le vasega, faamalamalama atu, o nei fuaiupu na tuuina mai i le Au Paia anamua o e na faauuina e aoao atu le talalelei i isi. Valaaulia le afa o le vasega e vaavaai mo upu e faamatala ai le tiutetauave o se faiaoga. Fai atu i le isi vaega o le vasega e vaavaai mo upu e faamatala ai le tiutetauave a le Agaga.

E tusa ai ma nei fuaiupu, o le a le tiutetauave o le faiaoga? (E talai atu le talalelei e ala i le Agaga. Valaaulia se tagata o le vasega e tusi le talai atu e ala i le Agaga i lalo ifo o le Faiaoga i luga o le ata.)
O le a le tiutetauave a le Agaga, po o le Fesoasoani? (E aoao mai le upumoni. Fai atu i se tagata o le vasega e faaopoopo atu upu aoao atu le upumoni i lalo ifo o le Agaga Paia i luga o le ata.)

Tusi le upumoni lenei i luga o le laupapa: O le Agaga Paia o le faiaoga moni lea. Faamalamalama atu faapea, e ui o se faiaoga, faifeautalai, po o se taitai i le Ekalesia ua i ai le tiutetauave e talai atu le talalelei e ala i le Agaga, o le Agaga Paia o ia lea e faaali mai, faamalamalama, ma molioo mai le moni o le talalelei i totonu o o tatou loto.

O le a se taimi na e lagonaina ai le Agaga o aoaoina oe?

Valaaulia se tagata o le vasega e faitau leotele le Mataupu Faavae ma Feagaiga 50:19-21. Fai atu i tagata o le vasega e mulimuli i le faitauga, ma vaavaai mo upu e faamatala ai le tiutetauave o le tagata aoao.

E tusa ai ma nei fuaiupu, o a tiutetauave o le tagata a‘oa’o? (Ia maua le upu moni e ala i le Agaga. Valaaulia se tagata o le vasega e tusi le maua e ala i le Agaga i lalo ifo o le Tagata a‘oa’o i luga o le ata.)

Ina ia fesoasoani i tagata o le vasega ia malamalama lelei i le uiga o le maua e ala i le Agaga, fai atu ia te i latou e mafaufau loloto i mea e manaomia e se tasi mo le mauaina o se polo mai se tasi o loo kikiina atu pe togiina atu ia i latou.

O le a se mea e manaomia ona faia e se tagata ia maua ai le polo? (Tuu i luga ona lima ma ia sapo.) E faapefea ona pei lenei mea o le taumafaiga e tatau ona faia e se tagata aoao ia maua ai le upu moni e ala i le Agaga? (Ina ia maua se polo, e ao i se tagata ona saunia e sapo. E faapena foi, e ao ona saunia o tatou loto ma mafaufau ia maua le upumoni e ala i le Agaga.)

Valaaulia tagata o le vasega e suesue le leoa i le Mataupu Faavae ma Feagaiga 50:22, ma vaavaai mo le mea e tupu pe a tatou faia lenei taumafaiga ia maua le talalelei ma aoao e ala i le faatuatua. A o lei faitau tagata o le vasega, faamalamalama atu o le upu faagaeetiaina e faatatau i le siitia po o le ati aʼe i le faaleagaga.

E tusa ai ma le fuaiupu lenei, o a ni faamanuiaga e maua e faiaoga ma tagata aoao mai le Agaga pe afai latou te faataunuu o latou tiutetauave o le aoao atu ma le aoaoina o le talalelei? (Malamalama, faagaeetia, ma le olioli.)

Tau atu i tagata o le vasega na molimau mai Elder Richard G. Scott e uiga i le fesootaiga i le va o tagata aoao e faataunuuina o latou matafaioi ma le avanoa o le Agaga e aoao mai ma molimau. Afai e mafai, tuu atu i tagata taitasi o le vasega se kopi o le faamatalaga lenei. Valaaulia se tagata o le vasega e faitau leotele le faamatalaga. Fai atu i le vasega e mulimuli i le faitauga, ma vaavaai mo fasifuaitau o loo faamatala ai le aafiaga o le taumafaiga a le tagata aoao i le avanoa o le Agaga Paia e aoao atu.

“O le faaiuga [a se tagata aoao] e auai, o se faatinoga lea o le faitalia e faataga ai le Agaga Paia e fesootai mai se savali patino e fetaui ma [ona] lava manaoga. O le fatuina o se siosiomaga o le auai, e faaleleia atili ai le avanoa o le a aoao mai ai e le Agaga ni lesona e sili atu ona taua nai lo mea e mafai ona fesootai atu [e le faiaoga]“ (“To Learn and to Teach More Effectively” [faigalotu a le BYU Campus Education Week, 21 Aok., 2007], 4–5, speeches.byu.edu).

E tusa ai ma le faamatalaga a Elder Scott, e faapefea ona tatou valaaulia le Agaga Paia e aoao i tatou?

Valaaulia tagata o le vasega e otooto mai pe faapefea ona aafia i a latou taumafaiga o ni tagata aoao le avanoa o le Agaga Paia e aoao mai ai. E mafai ona faaaoga e tagata o le vasega ni upu eseese, ae e tatau ona latou faamatalaina le mataupu faavae lenei: A o tatou faaaogaina lo tatou faitalia e auai i le faagasologa o le aoaoina, tatou te valaaulia ai le Agaga e aoao ma molimau mai i le moni. Tusi lenei mataupu faavae i luga o le laupapa i lalo ifo o mataupu faavae na faailoaina muamua.

Ina ia tuu atu i tagata o le vasega se faataitaiga o se tagata sa faaaogaina lana faitalia e aoao ai e ala i le suesue ma le faatuatua, valaaulia i latou e mafaufau i le tala a Iosefa Samita o le Uluai Faaaliga. Faatulaga tagata o le vasega i ni paga, ma tuu atu i paga taitasi se tasi pe sili atu o fuaiupu nei: Iosefa Samita—Talafaasolopito 1:8, 10, 11, 12, 13, 14, 15, 16, 18. (Atonu e te manao e tusi lenei upumoni i luga o le laupapa.) Valaaulia tagata o le vasega e faitau a latou fuaiupu atofaina, ma talanoa i fesili nei:

Na faapefea ona faia e Iosefa se taumafaiga e aoao i upu moni faaleagaga?

A maea le taimi, valaaulia paga taitasi e faailoa atu fasifuaitau mai a latou fuaiupu atofaina, o loo faaalia ai taumafaiga a Iosefa.

Molimau atu o le naunau o Iosefa e suesue i le afioga a le Atua ma galue i le faatuatua i le mea sa ia aoaoina na iu ai i le malamalama sili atu, o se faamanuiaga ua avanoa mo i tatou uma. Valaaulia tagata o le vasega e suesue ma le leoa i le Iosefa Samita—Talafaasolopito 1:20, ma vaavaai mo le tala a Iosefa sa fai atu i lona tina ina ua foi mai i le fale ua mavae le mauaina o le Uluai Faaaliga.

O le fea fuaitau i le saunoaga a Iosefa i lona tina e atagia ai sa ia aoaoina le mea moni mo ia lava? (“Ua ou iloa nei mo a’u lava ia.”)

Valaaulia tagata o le vasega e faailoa mai se mataupu faavae e mafai ona tatou aoaoina mai i le aafiaga a Iosefa. Uunaia i latou e faaupu a latou fautuaga o ni faamatalaga “afai-ona”. O le faamatalaga o loo i lalo o se tasi lea o auala e ono faaupuina ai e tagata o le vasega lenei mataupu faavae: Afai tatou te suesue ma le filiga i le afioga a le Atua ma galue i ai i le faatuatua, ona mafai lea ona tatou iloa upumoni o le talalelei mo i tatou lava. (Atonu e te manao e fautua atu i tagata o le vasega e tusi lenei mataupu faavae i a latou tusitusiga paia i talaane o le Iosefa Samita—Talafaasolopito 1:20.)

Tagai i le gaoioiga o le meaai po o le vaiinu sa e faaaogaina i le amataga o le vasega. Faamanatu atu i tagata o le vasega o le aai ma feinu i meaai faaletino e manaomia ai le taumafaiga i la tatou pitolaau, ma e mafai ona tatou manuia mai meaai po o vaiinu i le na o le aai po o le feinu mo i tatou lava. Molimau atu e moni foi lena mea i le faaleagaga: na pau lava le mea e mafai ona ulu mai ai le talalelei i o tatou loto ma avea ma se vaega o i tatou lava, a o tatou faia se taumafaiga e aoao ai upumoni o le talalelei ma faaaoga i o tatou olaga.

O a ni faatinoga o le a e faia i le tausaga lenei e valaaulia ai le Agaga e aoao mai ia te oe, ma molioo mai upumoni o le talalelei i lou loto? (O tali e mafai ona aofia ai le auai i sauniga a le Ekalesia ma vasega, e aofia ai le seminare; auai i sauniga ma vasega e ala i le lagiina o viiga, makaina o mau, faamaumauina o aoaoga, taliina o fesili, faasoa atu o aafiaga ma molimau, ma le aoaoina o isi; auai i afiafi faaleaiga ma suesuega faaleaiga o tusitusiga paia; punouai i le suesuega o tusitusiga paia i aso taitasi ma le tatalo; ma le faaaogaina o mataupu faavae o le talalelei i o latou olaga. Valaaulia tagata o le vasega e tusi i lalo se sini se tasi pe sili atu.)

Faaiu i le fai atu i tagata o le vasega e mafaufau i a latou molimau o le talalelei ma mea ua latou iloa mo i latou lava e moni. Valaaulia ni nai tagata o le vasega e faasoa mai po o a ni auala na faia e a latou taumafaiga patino e aoao le talalelei ma aafia ai a latou molimau ma sootaga ma le Alii. Faaopoopo atu lau molimau e uiga i le malosiaga ma le taitaiga e mafai ona tatou maua mai le Alii o le tali i a tatou taumafaiga e aoao ma ola i mataupu faavae o le talalelei.

Tala ma Faamatalaga o Talaaga

E mafai ona valaaulia e tagata o le vasega le Agaga Paia e faamautu mai mea ua latou aoaoina

Na molimau mai Elder David A. Bednar e uiga i le fesootaiga i le va o le tagata aoao e faataunuuina o latou matafaioi ma le avanoa o le Agaga e aoao ma molimau mai:

“O se tagata aoao e faaaogaina le faitalia e ala i le galue e tusa ai ma mataupu faavae sao e tatalaina lona loto i le Agaga Paia—ma valaaulia Ana aoaoga, molimau mamana, ma le molimau faamautuina. … O a tatou faatinoga faamaoni ma faifaipea e musuia e le faatuatua, tatou te faailoa atu ai i lo tatou Tama Faalelagi ma Lona Alo, o Iesu Keriso, lo tatou naunau e aoao ma maua faatonuga mai le Agaga Paia” (“Seek Learning by Faith” [lauga i faiaoga faalelotu a le OAE, 3 Fep., 2006], 3, LDS.org).

O le taua o le suesue i tusitusiga paia i aso taitasi

O loo ta’ua i leFaamaoni i le Faatuatua le faamatalaga lenei e uiga i le taua o le suesueina o tusitusiga paia i aso taitasi:

“Ua fautuaina i tatou e perofeta o Aso e Gata Ai e suesue i tusitusiga paia i aso uma, e le gata i le tagata lava ia ae ia faapea foi ma o tatou aiga. Ua latou fautuaina i tatou, e pei ona fautua atu Nifae i ona uso, ina ia faatatau tusi paia uma ia i tatou, saili auala e faatatau ai faamaumauga paia o anamua i o tatou olaga i aso nei (tagai i le 1 Nifae 19:23–24). Ua latou fautuaina i tatou e ‘suesue i tusi’ (Ioane 5:39) ma taumamafa ‘fiafia i afioga a Keriso’ (2 Nifae 32:3).

“O le a matua sili ona faamanuiaina oe pe a e mulimuli i lenei fautuaga. O le suesueina o tusitusiga paia i aso taitasi e fesoasoani e saunia ai oe e maua musumusuga a le Agaga Paia. E fausia ai lou faatuatua, faamalosia ai oe e tetee atu i faaosoosoga, ma fesoasoani e te latalata atu ai i lou Tama Faalelagi ma Lona Alo Pele.

“Ia faia se fuafuaga mo au suesuega o tusitusiga paia. Mafaufau e faaavanoaina se taimi i aso taitasi e suesue ai tusitusiga paia. I lena taimi, faitau ma le faaeteete, ma ia faalogo atu i musumusuga a le Agaga. Ole atu i lou Tama Faalelagi e fesoasoani mai ina ia e iloa le mea o loo Ia finagalo e te aoaoina ma faia.

“Ia faaauau pea le faitauina o tusitusiga paia, aemaise lava le Tusi a Mamona, i le gasologa o lou olaga. O le a e toe mauaina pea lava pea ia oa taua o tusitusiga paia, mauaina isi uiga fou ma ona faatatauga o loo i ai ao e suesueina i latou i vaega eseese o le olaga” (Faamaoni i le Faatuatua: O se Tusi Taiala o le Talalelei [2004], 156).

Na saunoa mai Peresitene Henry B. Eyring o le Au Peresitene Sili:

“Afai tatou te faatalale ia tatou suesuega o tusitusiga paia, o le a tatou faatalale foi ia tatou tatalo.

“Atonu o le a le mafai ona tatou taofia le tatalo atu, ae o a tatou tatalo o le a avea ma upu tautu, o le a sili atu ona leai se uiga. E le mafai ona tosina atu o tatou loto i se Atua tatou te le iloa, ma o tusitusiga paia ma saunoaga a perofeta soifua e fesoasoani tatou te iloa ai o Ia” (“Tatalo,” Ensign, Nov. 2001, 17).