Mataupu Faavae ma Feagaiga 53–55

Folasaga

Ia Iuni 1831, na maua ai e le Perofeta o Iosefa Samita le faaaliga o loo faamaumauina i le Mataupu Faavae ma Feagaiga 53–55. O loo i ai i le faaaliga ia faatonuga a le Alii mo nisi o tagata o le Ekalesia o e sa nonofo i Ohaio, ae o le a le toe umi ae siitia atu i Misuri. I nei faaaliga, na fetalai mai ai le Alii ia Sini Gilbert, Newel Knight, ma Viliamu W. Phelps, ma tuuina atu ia i latou faatonuga sa patino i o latou tofiga Faale-ekalesia ma a latou taleni.

Fautuaga mo le Aoaoina Atu

Mataupu Faavae ma Feagaiga 53

Ua valaauina e le Alii ia Sini Gilbert e avea o se toeaina ma malaga faatasi ma Iosefa Samita i Misuri

Valaaulia ni tagata se toalua o le vasega e o mai i luma o le vasega. Fai atu i le tasi e faatonu le isi i le faiga o se galuega patino. Mo se faataitaiga, e mafai e le isi tagata o le vasega ona aoao le isi e nonoa se ituaiga faapona faapitoa, gaugau se vaalele pepa, pe faia se ituaiga siva faapitoa. (Afai e mafai, fai atu i se tagata o le vasega a’o le’i oo i le taimi o le vasega e saunia e aoao mai se tomai.)

I lenei faatinoga, aisea e taua ai i le tagata a‘oa’o ona mulimuli i faatonuga uma? O le a se mea e tupu pe afai e filifili o ia e le ano i se tasi o vaega o faatonuga?

Faamanatu i tagata o le vasega, na valaauina e le Alii ia faifeautalai e malaga atu i Misuri (tagai i le MF&F 52). Faamalamalama atu, na iloa e se tagata fou liliu mai na igoa ia Sini Gilbert sa le’i lisiina lona igoa o se tasi o na faifeautalai. Sa alu atu o ia i le Perofeta o Iosefa Samita ma fesili atu po o le a se mea e finagalo le Alii na te faia. Sa fesili le Perofeta [i le Alii] ma maua mai ai le faaaliga ua faamaumauina i le Mataupu Faavae ma Feagaiga 53., lea na tuuina mai ai ia Sini ni laasaga amata o faatonuga.

Vaevae tagata o le vasega i ni paga. Valaaulia paga taitasi e faitau faatasi le Mataupu Faavae ma Feagaiga 53:1–5, ma vaavaai mo faatonuga na tuuina mai e le Alii ia Sini Gilbert. Uunaia i latou e faailoga faatonuga taitasi latou te mauaina.

O a faatonuga na tuuina mai e le Alii ia Sini Gilbert? (A o lipoti mai e tagata o le vasega mea na latou mauaina, atonu e aoga le ta’u atu o le tofiga o Uso Gilbert e “avea o se sui mo [le] ekalesia” o loo faamatala atoatoa mai i le Mataupu Faavae ma Feagaiga 57:6–10, 15.)

Faamalamalama atu e faapea, na faatatau le Alii i lenei lisi o faatonuga o “sauniga muamua nei [o le a] maua [e Sini]” (MF&F 53:6). O le upu sauniga o nisi taimi e faatatau i se tulafono po o se folafolaga. Valaaulia se tagata o le vasega e faitau leotele le Mataupu Faavae ma Feagaiga 53:6, ma fai atu i le vasega e vaavaai mo le taimi o le a tuuina mai ai e le Alii ia Sini mea uma [o] (“toega”) o Ana faatonuga.

O le a se mea e mafai ona tatou aoao mai i le fuaiupu e 6? (Mafaufau e fautuaina ia faasino atu e tagata o le vasega lenei mau i le Mataupu Faavae ma Feagaiga 52:4–5. Atonu e manatua e tagata o le vasega le faailoaina mai o le mataupu faavae lenei i le lesona ua te’a: A o tatou mulimuli ma le faamaoni i faatonuga a le Atua, Na te faaali mai mea e tele atu o Lona finagalo ia i tatou.)

Mataupu Faavae ma Feagaiga 54

Ua faatonu e le Alii le Au Paia a Colesville e tuua Tomasone, Ohaio, ae agai atu i Misuri

Faamalamalama atu e faapea, ia Aperila 1831, na taitaia ai e Newel Knight se vaega o le Au Paia mai Colesville, Niu Ioka, ina ia auai atu i le Au Paia i Ohaio. Ia Me, na faatonuina ai e le Perofeta o Iosefa Samita ia Epikopo Eteuati Paterika e faanonofo na Au Paia i le laueleele i Tomasone, Ohaio, lea na muai osifeagaiga (pe folafola atu) e Limani Copley e tuuina atu mo lena faamoemoega. Sa latou totoina laauiti iina ma amata ona faia isi galuega faaleleia i luga o le fanua. Ae e tusa lava pe na latou galulue faatasi e faaleleia atili le laueleele, sa amata ona latou manatu faapito ma matape’ape’a. Sa atili ona faaletonu lo latou tulaga ina ua toe foi mai Limani Copley mai lana misiona i le au Sieka ma amata ona masalosalo i lona faatuatua (tagai i le MF&F 49 ma le lesona 56). Sa ia teena lana molimau tuputupu a’e i le talalelei toefuataiina, ma na ia faatonuina ai le Au Paia e o ese mai le fanua. Sa ia tuuina atu foi ia latou totogiina le 60 tala. Ona na solia e Limani lana feagaiga, na faapea ona leai ai se mea e nonofo ai nei tagata o le Au Paia. Sa fesili atu Newel Knight ma isi i le Perofeta po o le a se mea e tatau ona latou faia. (Tagai i le Documents, Volume 1: June 1828–June 1831, vol. 1 of the Documents series of The Joseph Smith Papers [2013], 334–335.)

Valaaulia se tagata o le vasega e faitau leotele le Mataupu Faavae ma Feagaiga 54:1–3, ma fai atu i le vasega e vaavaai mo mea na manaomia ona fai e le Au Paia e fesoasoani ai e faaleleia lo latou tulaga.

Aisea e te manatu ai o le a fesoasoani le salamo ma le lotomaualalo i nei tagata o le Au Paia?

Faailoa atu sa le fiafia le Alii i le Au Paia i Tomasone, o ē na solia a latou feagaiga. Fai atu i tagata o le vasega e faitau filemu le Mataupu Faavae ma Feagaiga 54:4–5 ma vaai mo upu ma fuaitau na faaaoga e le Alii e faamatala ai mea e tutupu pe a solia se feagaiga.

O le a sou manatu i le uiga o se feagaiga e “talafua ma lē aoga”? O a faamanuiaga tatou te le maua pe a tatou le tausia a tatou feagaiga?

Valaaulia tagata o le vasega e faitau filemu le Mataupu Faavae ma Feagaiga 54:6, ma vaavaai mo se faamanuiaga tatou te maua pe a tatou tausia a tatou feagaiga ma usitai i poloaiga. Fai atu i tagata o le vasega e lipoti mai mea ua latou mauaina. Atonu latou te faaaogaina ni upu eseese, ae o a latou tali e tatau ona faailoa mai ai le mataupu faavae lenei: Afai tatou te tausia a tatou feagaiga ma usitai i poloaiga a le Alii, o le a tatou maua le alofa mutimutivale. Tusi lenei mataupu faavae i luga o le laupapa.

O le a se taimi na e vaaia ai i le tuuina mai e le Alii o le alofa mutimutivale ia i latou o e tausia a latou feagaiga faatasi ma Ia?

Uunaia tagata o le vasega e tausi feagaiga na latou osia i le papatisoga ma ia usiusitai i poloaiga, ina ia mafai ona latou maua le alofa mutimutivale mai le Alii.

Otooto le Mataupu Faavae ma Feagaiga 54:7–9 e ala i le faamatala atu, ina ua mavae le aveesea o fale o nei tagata o le Au Paia i le fanua o Limani Copley, sa poloaiina i latou e le Alii e malaga atu i Misuri. Sa tatau ona latou tofia se tagata e totogia le tau o mea e faaaoga i le latou malaga i le ala. Na fetalai mai le Alii o le taimi lava latou te taunuu atu ai i Misuri, o le a latou galulue mo lo latou tausiga iina seia oo ina saunia e le Alii se nofoaga mo i latou e nonofo ai.

Ina ia fesoasoani i tagata o le vasega ia iloa pe na faapefea ona finagalo le Alii i nei tagata o le Au Paia e tali atu i o latou tofotofoga, valaaulia se tagata o le vasega e faitau leotele le Mataupu Faavae ma Feagaiga 54:10. Fai atu i le vasega e mulimuli i le faitauga, ma vaavaai mo le fautuaga a le Alii i nei tagata o le Au Paia.

I sou aafiaga, o a nisi o faamanuiaga tatou te maua pe a tatou “onosai i puapuaga”?
O ai na fetalai le Alii o le a “maua le malologa i o latou agaga”? (Valaaulia tagata o le vasega e tali lenei fesili i se fuaiupu o le “afai-ona”. A o latou tali i le fesili, tusi lenei mataupu faavae i luga o le laupapa: Afai tatou te saili vave le Alii, o le a faapea ona tatou maua le malologa i o tatou agaga.)

Ina ia fesoasoani i tagata o le vasega ia malamalama i le uiga o le maua le malologa i o tatou agaga, faitau le saunoaga lenei a Elder Per G. Malm o le Fitugafulu:

“O le maua o le malologa i o tatou agaga e aofia ai le toafilemu o le mafaufau ma loto, o taunuuga ia o le aoaoina ma le mulimuli i aoaoga faavae a Keriso” (“Malologa mo o Outou Agaga,” Ensign po o le Liahona, Nov. 2010, 101).

Ina ia fesoasoani i tagata o le vasega ia malamalama i nisi o uiga o le saili vave le Alii, fai atu fesili nei:

O le a sou manatu i le uiga o le saili vave o le Alii? (O tali e mafai ona aofia ai, o lona uiga ia saili vave ia te Ia i o tatou olaga, o lona uiga o le vave sailia o Ia i aso uma, ma o lona uiga o le sailia o Lana fesoasoani, a o lei oo mai tofotofoga i o tatou olaga.)
Aisea e te manatu ai tatou te maua le malologa i o tatou agaga pe a vave ona tatou sailia le Alii?
O le a le mea e ese ai le vave sailia o le Alii, a’o lei oo i se taimi o le puapuaga, nai lo le sailia o Ia i le taimi o le puapuaga?

Valaaulia tagata o le vasega e tusi tali i fesili nei i a latou api o le vasega po o api talaaga mo le suesueina o tusitusiga paia. Atonu e te manao e tusi nei fesili i luga o le laupapa pe saunia i latou i luga o se pepa e tufa atu:

O a ni auala e mafai ona e saili vave ai le Alii, a o lei oo mai ni tofotofoga i lou lumanai?
O a ni mea e mafai ona e faia e saili vave ai le Alii i aso taitasi?
O a ni mea e mafai ona e faia e saili ai le Alii i le taimi nei, a’o e i ai i lou talavou?

A uma ona tuu atu i tagata o le vasega se taimi e tusitusi ai, valaaulia ni isi o i latou e faasoa mai o latou manatu.

Mataupu Faavae ma Feagaiga 55

Ua valaau e le Alii ia Viliamu W. Phelps e fesoasoani i le tusiaina ma le lolomiina o tusi ma mea e faaaoga o le Ekalesia

Ia logo mamao atu, i se tagata o le vasega e sau saunia i le vasega e faaali mai se taleni po o se tomai. Ia mautinoa o le faaaliga a le tagata o le vasega e talafeagai ma le Agaga. Po o le fai atu i tagata o le vasega e lisi i luga o le laupapa nisi o taleni ma tomai ua latou vaaia i le tasi ma le isi. Ona valaau lea o le igoa o se tagata o le vasega ma fai atu i ai fesili nei:

Aisea e te manatu ai, o au taleni ma tomai e ese mai i taleni ma tomai a isi i le vasega?
Aisea e te manatu ai ua faamanuiaina oe i na taleni ma tomai?

Valaaulia tagata o le vasega e faitau filemu le folasaga o le vaega o le Mataupu Faavae ma Feagaiga 55, ma vaavaai mo se tasi o tomai o Viliamu W. Phelps. Fai atu ia i latou e lipoti mai mea ua latou mauaina.

Faamalamalama atu, sa faatau mai e Viliamu W. Phelps se kopi o le Tusi a Mamona i le lua vaiaso talu ona ofoina atu mo le faatauina atu. O lenei mea na taitai atu ai i lona liua. Sa ia fai mai mulimuli ane, “E ui sa le’i papatisoina lo’u tino i totonu o lenei ekalesia seia oo … ia Iuni 1831, ae sa i ai iina lo’u loto mai le taimi na ou iloa ai le tusi a Mamona” (i Documents, Volume 1: Iuni 1828–Iuni 1831, 337). I le aso 14 o Iuni, 1831, i le taimi na taunuu atu ai Uso Phelps i Katelani, na maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 55.

Valaaulia se tagata o le vasega e faitau leotele le Mataupu Faavae ma Feagaiga 55:4, ma fai atu i le vasega e vaavaai mo se isi taleni sa i ai a Viliamu W. Phelps. Fai atu i tagata o le vasega e lipoti mai mea ua latou mauaina. Ona valaaulia lea o se isi tagata o le vasega e faitau leotele le Mataupu Faavae ma Feagaiga 55:5, ma fai atu i le vasega e sue le nofoaga na valaauina Uso Phelp e faia ai le galuega o le tusiaina ma le lolomiina. (Na faatonuina o ia e le Alii e malaga faatasi ma Iosefa Samita ma Sini Rikitone i Misuri.)

Tusi le mataupu faavae lenei i luga o le laupapa: E mafai ona faaaoga e le Atua a tatou taleni, tomai, ma gafatia e faamanuia ai Ana fanau.

O a ni auala na e vaaia o faaaoga ai e le Atua taleni ma gafatia a tagata e faamanuia ai Ana fanau?

Fai atu i tagata o le vasega e mafaufau i se taleni po o tomai o loo ia i latou, ma pe faapefea ona latou faaaogaina lena gafatia e fesoasoani ai i isi ma faaagai ai i luma le galuega a le Alii. Valaaulia ni nai tagata o le vasega e faasoa mai o latou manatu.

Faaiu le lesona e ala i le faatatau atu i aoaoga faavae ma mataupu faavae o loo tusia i luga o le laupapa. Valaaulia ni nai tagata o le vasega e filifili se upumoni se tasi ma faasoa mai pe aisea e taua ai ia i latou, ma o le a se mea latou te mananao e fai e faaaoga atoatoa ai i o latou olaga.

Tala ma Faamatalaga o Talaaga

Mataupu Faavae ma Feagaiga 55. O sao o Viliamu W. Phelps i le Ekalesia

Sa faatuina e Viliamu W. Phelps le fale lomitusi muamua mo le Ekalesia i Misuri. Sa ia lolomiina le nusipepa muamua a le Ekalesia, o le Evening and the Morning Star. Sa ia fesoasoani e tuufaatasia, saunia, ma lomia faaaliga i le Tusi o Poloaiga i le 1833 ma mulimuli ane i le lomiga o le 1835 o le Mataupu Faavae ma Feagaiga. Sa ia fesoasoani e saunia le tusi pese muamua o le Ekalesia, ma tusia upu o ni vaega o viiga, e aofia ai le “Le Agaga o le Atua,” lea sa usuina i le faapaiaga o le Malumalu o Katelani. Na ia tuuina atu le 500 tala e faamaea ai lena malumalu.

Mataupu Faavae ma Feagaiga 55:6. O le sao o Iosefa Kou i le Ekalesia

O Iosefa Kou, o se uluai tagata liliu mai i le Ekalesia i Niu Ioka, na taunuu atu i Katelani i le 1831. Sa malaga atu o ia i Misuri faatasi ma Iosefa Samita ma Sini Rikitone, na tuua Katelani i le aso 19 o Iuni, 1831. Mulimuli ane, i le toe i ai i Katelani, na tofia ai o ia o le sui aoao o le Ekalesia. Sa ia pulea le faatauina mai o fanua i le 1833, e aofia ai le 103 eka o le faatoaga a Peteru French, lea o le a fausia ai le Malumalu o Katelani. Sa valaauina o ia i le aufono maualuga a Katelani ia Fepuari 1834. Ia Iulai 1835, sa ia fesoasoani ai i le faatauina mai o faatagata ma tusitaai a Aikupito, lea na taitai atu ai ia Iosefa Samita i le aumaia o le tusi a Aperaamo.