Lesona 155

Mataupu Faavae ma Feagaiga 138:7–60

Folasaga

O le lesona lona lua lenei o lesona e lua o loo i le faaaliga ua faamaumauina i le Mataupu Faavae ma Feagaiga 138. A o mafaufau loloto Peresitene Iosefa F. Samita i nisi o fuaitau i le Feagaiga Fou, sa ia vaaia se faaaliga vaaia e uiga i le lalolagi o agaga ma agaga amiotonu o loo faatalitali le laveaiga mai noataga o le oti. Sa vaai foi Peresitene Samita ia Iesu Keriso, i le va o le taimi o Lona maliu ma le taimi o Lona Toetu, o faatulagaina ma faatagaina auauna amiotonu e aoao atu le talalelei i agaga i le falepuipui o agaga.

Fautuaga mo le Aoaoina Atu

Mataupu Faavae ma Feagaiga 138:7-37

Ua aoao Peresitene Iosefa F. Samita i le auala na talai atu ai le talalelei i le lalolagi o agaga

Ta‘u atu i tagata aoga e faapea, e i ai talitonuga eseese o tagata i le lalolagi atoa e uiga i le mea e tupu ia i tatou pe a tatou oti. Fesili atu i tagata aoga pe na latou feiloai i se tasi e i ai ni talitonuga e ese mai e uiga i le mea e tupu ia i tatou pe a tatou oti. Valaaulia ni nai tagata aoga e faasoa mai o latou aafiaga. (Ia faaeteete e aua le talanoa le lelei e uiga pe ta’u faatauvaaina talitonuga o isi ekalesia.)

• E mafai faapefea ona tatou iloa po o le fea o talitonuga e uiga i le olaga pe a mavae le oti e sa’o? (E mafai ona e faailoa atu, e i ai foi nisi o le Au Paia o Aso e Gata Ai e le sa’o o latou talitonuga e uiga i le olaga pe a mavae le oti.)

Ina ia faaopoopo atu i tali a tagata aoga, fai atu i se tagata aoga e faitau leotele le saunoaga lenei a Elder D. Todd Christofferson o le Korama a Aposetolo e Toasefululua:

“O tusitusiga paia o fuafaatatau ia mo le fuaina o le sa‘o ma le moni” (“O Le Faamanuiaga o Tusitusiga Paia,” Ensign po o le Liahona, Me 2010, 34).

Tautino atu e mafai ona tatou iloa le sa‘o o talitonuga eseese e uiga i le olaga pe a mavae le oti, e ala i le faatusatusaina o na talitonuga i upumoni ua faaalia mai e le Alii i tusitusiga paia, e pei ona i ai i le Mataupu Faavae ma Feagaiga 138.

Tusi le ata o loo i le [tusi lesona] i luga o le laupapa. Atonu e te manao e faamalamalama puupuu atu e faapea, i nisi o itu, o le lalolagi atoa o agaga e mafai ona faapea o le falepuipui o agaga aua e oo lava foi i e amiotonu e vaai atu i le tuueseeseina mai o latou tino o se noatiaga (tagai i le MF&F 138:49–50).

Ina ia fesoasoani i tagata aoga e toe iloilo faapuupuu upumoni na latou aoaoina i le lesona na muamua atu i le vaega e 138, tofi le afa o le vasega e sue i le Mataupu Faavae ma Feagaiga 138:12–15, 22 mo faamatalaga auiliili e faatatau i e o le a o atu i le parataiso o agaga pe a oti, ma tulaga o le a latou oo i ai iina. Tofi le isi afa o le vasega e sue i le Mataupu Faavae ma Feagaiga 138:20–22 mo faamatalaga auiliili e faatatau i e o le a o i le falepuipui o agaga pe a oti, ma tulaga o le a latou oo i ai. Fai atu i tagata aoga e lipoti mai mea ua latou mauaina.

Faailoa atu e le gata ina o atu tagata amioleaga ma fouvale i le falepuipui o agaga i le taimi e maliliu ai, ae faapena foi ia i latou o e oti i a latou agasala e aunoa ma se malamalama e uiga i le talalelei (tagai i le MF&F 138:32). Faamanatu i tagata aoga a o mafaufau loloto Peresitene Iosefa F. Samita i fuaitau i le 1 Peteru, sa faaali mai e le Alii ia te ia le auala o le a maua ai e tagata i le falepuipui o agaga le avanoa e maua ai faamanuiaga o le talalelei.

Valaaulia se tagata aoga e faitau leotele le Mataupu Faavae ma Feagaiga 138:7–10. Fai atu i le vasega e mulimuli i le faitauga ma vaavaai mo mea na fai mai Peteru sa faia e le Faaola ina ua uma ona “fasiotia [o Ia] i le tino.”

• O le a le mea na fai mai Peteru sa fai e le Faaola ina ua afio atu o Ia i le lalolagi o agaga?

Valaaulia se tagata aoga e faitau leotele le Mataupu Faavae ma Feagaiga 138:25-28. Fai atu i le vasega e mulimuli i le faitauga ma faailoa mai le mea na mafaufau i ai Peresitene Samita a o manatunatu i le galuega a le Alii i le lalolagi o agaga.

• O le a le fesili a Peresitene Samita? (A uma ona tali mai tagata aoga, atonu e te manao e tusi le fesili lenei i luga o le laupapa: Na mafai faapefea e le Alii ona talai atu le talalelei i tagata uma i le falepuipui o agaga i le na o le tolu aso?)

Valaaulia se tagata aoga e faitau leotele le Mataupu Faavae ma Feagaiga 138:29–32, ma fai atu i le vasega e vaavaai mo le tali na maua e Peresitene Samita a o mafaufau loloto o ia.

• Na faapefea ona talai atu e le Faaola le talalelei ia i latou i le falepuipui o agaga i se taimi puupuu?

Fai atu i tagata aoga e faaaoga mea na latou aoaoina i fuaiupu e 29–32 e ta‘u mai ai se upumoni i le ala na aoao atu ai le talalelei i le lalolagi o agaga. E tatau ona latou faailoa mai se mea e tutusa ma le upumoni lenei: I lalo o le taitaiga a Iesu Keriso, ua aoao atu ai e avefeau amiotonu le talalelei ia i latou i le falepuipui o agaga. Atonu e te manao e valaaulia tamaiti e faailoga fuaitau i le fuaiupu e 30 o loo aoao mai ai lenei upumoni.

Makaina ma le tusiga o faamatalaga i tusitusiga paia

E mafai e faiaoga ona uunaia tagata aoga e faailoga mau i le fai atu o se mea faapenei, “A o e suesue i nei fuaiupu, ou te valaaulia outou e maka se mataupu faavae autu ua e iloaina”, po o le “O se mau faasino taua lenei. Atonu e te manao e tusi le mea lenei i totonu o au tusitusiga paia.” E sili atu ona lelei le aoao atu, faailoa mai, ma faatino elemene autu o le makaina o mau, nai lo le aoao atu o se faiga faapitoa o le makaina o tusitusiga paia. Ia faamamalu e le aunoa le faitalia o tagata aoga ma ia aua ne’i manaomia i latou e tusitusi i totonu o a latou tusitusiga paia. Nai lo lena, fai atu ni fautuaga ma faataga tagata aoga e filifili le mea e talafeagai.

I le ata o loo i luga o le laupapa, tusi se aū mai le parataiso o agaga i le falepuipui o agaga e faatusa i avefeau amiotonu a le Alii o loo talaiina le talalelei i le falepuipui o agaga.

Valaaulia se tagata aoga e faitau leotele le Mataupu Faavae ma Feagaiga 138:33-34. Fai atu i le vasega e vaavaai mo mea na aoao atu e avefeau amiotonu a le Alii i agaga i le falepuipui. Fai atu i tamaiti aoga e lipoti mai mea latou te maua.

• E faapefea ona faatusatusa ia nei aoaoga ma aoaoga o loo aoaoina ai tagata a’o latou saunia mo le papatisoga i le olaga nei?

• O le a le “papatisoga sui”?

• E tusa ai ma le fuaiupu e 34, aisea e manaomia ai ona talaiina atu nei mataupu faavae o le talalelei ia i latou i le falepuipui o agaga? (Atonu e manaomia lou faamalamalama atu o le “faamasino … e tusa ma tagata i le tino” o lona uiga o fanau uma a le Atua, o [e] ola po o ua oti, e tatau ona maua le avanoa e aoao ai e uiga, ma talia le talalelei ina ia mafai ona faamasinoina i latou i le tulaga faatonuina e tasi.)

Valaaulia se tagata aoga e faitau leotele le Mataupu Faavae ma Feagaiga 138:35-37. Fai atu i le vasega e mulimuli i le faitauga, ma vaavaai pe o le a le tele o agaga o le a maua se avanoa e talia ai le talalelei a Iesu Keriso.

• Aisea e te manatu e taua ai le iloa, o le fanau uma a le Tama Faalelagi o le a maua le avanoa e faalogo ai ma talia le talalelei a Iesu Keriso?

Ina ia fesoasoani i tagata aoga ia malamalama i le auala o le a faalogo ai tagata uma i le talalelei, faamalamalama atu e faapea, e ui lava ina sa asiasi atu le Faaola i le lalolagi o agaga mo na o sina taimi puupuu ina ua mavae Lona maliu, sa Ia faatulagaina agaga amiotonu e talai atu le talalelei ia i latou i le falepuipui o agaga. O lenei taumafaiga o loo faaauau pea i le taimi nei. Pe a maliliu tagata e le’i faalogo pe taliaina le talalelei i o tatou aso, o le a latou maua foi se avanoa e faalogo ai ma talia le talalelei i le lalolagi o agaga.

Mataupu Faavae ma Feagaiga 138:38-60

Ua vaai Peresitene Samita i agaga tamalii ma tautaua o e o le a talai atu le talalelei i le falepuipui o agaga

Fai atu i tagata aoga e mafaufau i tagata amiotonu o o latou aiga po o tuaa o e ua maliliu.

• Pe e i ai se taimi na e mafaufau ai po o a ni a latou mea o fai i le lalolagi o agaga?

Faamanatu atu i tagata aoga, i le Mataupu Faavae ma Feagaiga 138:38–49, ua lisiina ai e Peresitene Iosefa F. Samita igoa o le toatele o agaga “taʼutaʼua ma malolosi” sa ia vaai i ai i le lalolagi o agaga o e sa faatalitali mo le Faaola e faaali atu ia i latou i le mavae ai o Lona maliu i luga o le satauro. O nisi o agaga sa asiasi atu i ai le Faaola o perofeta o le Feagaiga Tuai ma le Tusi a Mamona. E amata atu i le fuaiupu e 53, tatou te faitau ai sa vaai foi Peresitene Samita i agaga filifilia o e o le a o mai i aso e gata ai, e aofia ai le Perofeta o Iosefa Samita (uso o lona tama) ma Ailama Samita (o lona tama,).

Valaaulia se tagata aoga e faitau leotele le Mataupu Faavae ma Feagaiga 138:53-56. Fai atu i le vasega e mulimuli i le faitauga, ma vaavaai mo auala na saofaga ai nei tagata taitoatasi a’o latou i ai i le lalolagi i le faaolataga o i latou i le falepuipui o agaga.

• O faapefea ona fesoasoani taitai o le Ekalesia o aso e gata ai i agaga i le falepuipui?

A uma ona maua e tagata aoga, o perofeta o aso e gata ai e fesoasoani i le togiolaina o e ua maliliu e ala i le fausia o malumalu ma le taitaiina o sauniga o le malumalu mo e ua maliliu, tuu pe tusi se ata o se malumalu i tafatafa o le ata o loo i luga o le laupapa.

• E tusa ai ma fuaiupu 55–56, o anafea na amata sauniuni ai nei taitai mo le galuega o le a latou faia iinei i le lalolagi?

Valaaulia se tagata aoga e faitau leotele le Mataupu Faavae ma Feagaiga 138:57. Fai atu i le vasega e mulimuli i le faitauga, ma vaavaai mo mea o le a faaauau ona faia e toeaina faamaoni pe a latou maliliu.

• O le a le mea o le a faaauau ona faia e toeaina faamaoni pe a latou maliliu?

Ina ia faamanino atu e faapea, o le galuega i le lalolagi o agaga e le faatapulaaina ia i latou e umia le Perisitua Mekisateko, valaaulia se tagata aoga e faitau leotele le saunoaga lenei a Peresitene Iosefa F. Samita. Fai atu i le vasega e faalogologo mo mea e faia e tamaitai faamaoni i le lalolagi o agaga:

“O nei tuafafine lelei o e ua uma ona vaetofia, faauuina i le galuega, … o le a faatagaina atoatoa ma tuuina i ai le pule e talai atu le talalelei ma auauna atu i tamaitai a’o talai atu toeaiina ma perofeta i alii” (Gospel Doctrine, 5th ed. [1939], 461).

Atonu e te manao e valaaulia tagata aoga e faailoga fuaitau i le fuaiupu e 57 o loo aoao mai ai le upumoni lenei: A mavae ona te’a atu ma olaga faitino, o le a faaauau e le Au Paia faamaoni a latou galuega i le talaiina o le talalelei.

Valaaulia se tagata aoga e faitau leotele le Mataupu Faavae ma Feagaiga 138:58-59. Fai atu i le vasega e mulimuli i le faitauga, ma vaavaai mo mea e tatau ona faia e tagata ua maliliu ina ia faaolaina ai. Fai atu i tamaiti aoga e lipoti mai mea latou te maua.

• O le a le mea o le a tupu ia i latou o e salamo i le lalolagi o agaga? (E mafai ona faaaoga e tagata aoga ni upu eseese, ae e tatau ona latou faailoa mai le mataupu faavae lenei: O agaga o e salamo o le a togiolaina e ala i le usiusitai i sauniga o le malumalu, ma faamamaina e ala i le Togiola, ma maua o latou taui.)

• E mafai faapefea ona tatou fesoasoani i le galuega o le faaolataga mo e ua maliliu a o tatou i ai iinei i le lalolagi? (E ala i le faamaeaina o galuega o talafaasolopito o aiga ma auai i sauniga o le malumalu mo e ua maliliu.)

I le avea ai ma se vaega o lenei talanoaga, atonu e te manao e valaaulia se tagata aoga e faitau leotele le saunoaga lenei a Elder Richard G. Scott o le Korama a Aposetolo e Toasefululua:

“Soo se galuega e te faia i le malumalu o le taimi faaaluina tatau lea, ae o le mauaina o sauniga sui mo ou lava tuaa o le a sili atu ai ona paia le taimi i le malumalu, ma o le a faapea ona maua ai faamanuiaga sili atu” (O Le Olioli i le Faaolaina o E Ua Maliliu,” Ensign po o le Liahona, Nov. 2012, 93–94).

Faasino atu i le ata o le malumalu o loo i luga o le laupapa. Molimau atu a tatou o atu i le malumalu e faatino sauniga mo i latou o e ua maliliu, ua tatou fesoasoani ia i latou—pe afai latou te filifili e talia sauniga—ina ia laveaiina mai le falepuipui o agaga ma auai faatasi ma agaga o e amiotonu i le parataiso.

I le ata o loo i luga o le laupapa, tusi ai se aū mai le falepuipui o agaga agai i le parataiso o agaga e fai ma sui o le laveaiina o agaga ua salamo mai le falepuipui o agaga.

• E mafai faapefea e lenei malamalamaaga ona uunaia ai ou aafiaga i le faia o galuega faalemalumalu ma talafaasolopito o aiga?

• Ua faapefea ona faamanuiaina oe e ala i le auai i galuega o talafaasolopito o aiga ma le malumalu? (Atonu foi e faasoa atu sa oe lava aafiaga.)

Valaaulia se tagata aoga e faitau leotele le Mataupu Faavae ma Feagaiga 138:60. Fai atu i le vasega e mulimuli i le faitauga, ma vaavaai mo le molimau a Peresitene Iosefa F. Samita e uiga i upumoni sa ia faamaumauina.

Ia uunaia tagata aoga e faatulaga se taimi e fai ai ni galuega o talafaasolopito o aiga po o le malumalu i nai vaiaso o loo sosoo ai.

Faaiu i le faasoa atu o lau molimau e uiga i le Alii o Iesu Keriso ma faamanuiaga o le Togiola o loo avanoa mo e o ola ma e ua oti.

Tala ma Faamatalaga o Talaaga

Mataupu Faavae ma Feagaiga 138:58. O faamanuiaga o le auai i galuega o talafaasolopito o aiga ma le malumalu

Na tuuina mai e Elder Richard G. Scott o le Korama a Aposetolo e Toasefululua, le folafolaga lenei i tagata talavou o e auai i le galuega o talafaasolopito o aiga ma malumalu:

“Outou tupulaga talavou, pe tou te mananao i se auala mautinoa e tuuitiitia ai faatosinaga a le fili i lou olaga? Ia faatofu oe lava i le sailia o ou tuaa, saunia igoa mo sauniga sui paia o loo maua i le malumalu, ona e alu atu lea i le malumalu e fai ma sui mo i latou ia maua sauniga o le papatisoga ma le meaalofa o le Agaga Paia. A o e faasolosolo matua, o le a mafai foi ona e auai i le mauaina o isi sauniga. E leai se isi puipuiga sili atu mai faatosinaga a le fili i lou olaga e mafai ona ou mafaufau i ai” (“O Le Olioli i le Faaolaina o E Ua Maliliu,” Ensign po o le Liahona, Nov. 2012, 94).