Seminare ma Inisitituti
Lesona 66: Mataupu Faavae ma Feagaiga 60–62

Lesona 66

Mataupu Faavae ma Feagaiga 60–62

Folasaga

I le aso 8 o Aokuso, 1831, na sauni ai Iosefa Samita ma nisi o toeaina e tuua Initipene, Misuri, ma toe foi atu i Ohaio. Na faatonuina e le Alii ia toeaina e talai atu le talalelei a o latou malaga atu—o faatonuga ua faapea ona faamaumauina nei i le Mataupu Faavae ma Feagaiga 60. I le aso lona tolu o le latou malaga, na aafia ai le latou vaega i se tulaga matautia i luga o le Vaitafe o Misuri. O isi aso e lua na sosoo ai, 12 ma le 13 o Aokuso, na maua ai e le Perofeta o Iosefa Samita ni faaaliga se lua mai le Alii. O na faaaliga o loo faamaumauina nei i le Mataupu Faavae ma Feagaiga 61 ma le 62. O loo aofia ai upu o faatonuga, lapataiga, faamafanafanaga, ma faamalosiauga.

Fautuaga mo le Aoaoina Atu

Mataupu Faavae ma Feagaiga 60

Ua poloaiina e le Alii ia toeaina e talai atu le talalelei a o latou malaga mai Misuri i Ohaio

A o lei amataina le vasega, tusi le fesili lenei i luga o le laupapa: E mafai ona e mafaufau i se taimi sa e tau musu ai e ta‘u atu i isi e uiga i ou talitonuga pe sa e musu e faasoa atu lau molimau o le talalelei?

Amata le vasega i le fai atu i tagata o le vasega e mafaufau loloto i le fesili o loo i luga o le laupapa. A o mafaufau loloto tagata o le vasega, atonu e te manao e faasoa atu lau lava tali i lenei fesili e ala i le faamatala atu o se aafiaga mai lou olaga.

Faamalamalama atu sa malaga se vaega o toeaina mai Ohaio e auai i le faapaiaga o le laueleele ma le tulaga o le malumalu i Initipene, Misuri. Na poloaiina i latou e le Alii e talai atu le talalelei i isi a o latou malaga atu i Misuri (tagai i le MF&F 52:9–10). O leMataupu Faavae ma Feagaiga 60 o loo i ai le afioga a le Alii i nisi o nei toeaina a o latou sauni e toe foi atu i Ohaio. Valaaulia tagata o le vasega e faitau filemu le Mataupu Faavae ma Feagaiga 60:1–2, ma vaavaai mo mafuaaga na le fiafia ai le Alii i nisi o nei toeaina.

  • Aisea na le fiafia ai le Alii i nisi o toeaina? (Sa Ia fetalai, “Ua latou lē tatalaina o latou gutu, ae ua latou natia taleni ua Ou tuu atu ia te i latou.” I se isi faaupuga, latou te le’i faasoaina atu a latou molimau e uiga i le talalelei.)

  • E tusa ai ma le Mataupu Faavae ma Feagaiga 60:2, aisea na le faasoaina atu ai e nisi o toeaina a latou molimau?

Valaaulia se tagata o le vasega e faitau leotele le Mataupu Faavae ma Feagaiga 60:3 . Fai atu i le vasega e mulimuli i le faitauga ma faailoa mai mea e mafai ona tupu pe afai tatou te le faasoaina atu a tatou molimau.

  • O le a se mea e mafai ona tupu pe afai tatou te le faasoaina atu a tatou molimau? (E mafai ona faaaoga e tagata o le vasega ni upu eseese, ae e tatau ona latou faailoa mai le mataupu faavae lenei: E mafai ona aveesea a tatou molimau pe afai tatou te le faasoaina atu.)

  • Aisea e te manatu ai e tatau ona faasoa atu a tatou molimau ina ia tumau ai ia i tatou? O le a se taimi na e lagonaina ai ua tuputupu a’e malosi lau molimau ona sa e faasoaina atu?

Uunaia tagata o le vasega e faasoa atu a latou molimau pe a latou maua ni avanoa e fai ai. Otooto le vaega o totoe o le Mataupu Faavae ma Feagaiga 60 i le faamatala atu e faapea, na poloaiina e le Alii nei toeaina e talai atu le talalelei a o latou malaga toe foi atu i Ohaio.

Mataupu Faavae ma Feagaiga 61

Ua saunia e le Alii le taitaiga mo Iosefa Samita ma isi toeaina i la latou malaga atu i Ohaio

Fai atu i tagata o le vasega e mafaufau i se taimi na latou popole ai mo lo latou saogalemu ma lagonaina na puipuia i latou e le Alii. Faamalamalama atu e faapea, i le aso 11 o Aokuso, 1831, sa iloa ai e le Perofeta o Iosefa Samita ma ni toeaina e toasefulu, na latou i ai i se tulaga lamatia a’o latou malaga atu i paopao i luga o le aave malosi o le Vaitafe o Misuri. Na ta’ua e Iosefa Samita e faapea, i le aso lona tolu o le malaga, “sa faapea ona aliae ai le tele o tulaga matautia lea e masani ona i ai i vaitafe i sisifo; ma ina ua uma ona matou tolauapi i luga o le auvai o le vaitafe, … sa vaaia e Uso [William W.] Phelps, i se faaaliga vaaia matilatila i le ao, le faaleaga mea i lona mana sili ona matautia, o faasee mai i luga o le vaitafe; o isi na faalogoina le pao, ae sa le’i vaai i le faaaliga” (i le History of the Church, 1:203). Na muamua atu i lenei faaaliga, sa faapea ona aliae ai nisi o feeseeseaiga ma lagona le lelei i le usoga” (B. H. Roberts, Comprehensive History of the Church, 1:262–63). I lena afiafi, na talanoaina ai e le usoga o latou faafitauli ma o le toatele o i latou na mafai ona faamagalo atu i le tasi ma le isi. O le taeao na sosoo ai, sa tatalo ma maua ai e Iosefa Samita le faaaliga ua faamaumauina i le Mataupu Faavae ma Feagaiga 61.

Valaaulia se tagata o le vasega e faitau leotele le Mataupu Faavae ma Feagaiga 61:2, 20, 36–37. Fai atu i le vasega e mulimuli i le faitauga, ma vaavaai mo upu ma fasifuaitau atonu na aumai ai le faamafanafanaga i nei toeaina.

  • O a ni upu po o ni fasifuaitau na e mauaina atonu na faamafanafanaina ai nei toeaina? (A o tali mai tagata o le vasega, atonu e te fia fai atu ia te i latou e faamatala mai po o a auala na avea ai upu po o fuaitau na latou ta’ua o ni faamafanafanaga.)

Faamalamalama atu o lenei faaaliga, na aoao mai ai le Alii o, “faafanoga e tele” o le a tutupu i luga o vai i aso e gata ai (tagai i le MF&F 61:5, 14–19). Sa fetalai mai foi le Alii e uiga i Lona mana. Valaaulia se tagata o le vasega e faitau leotele le Mataupu Faavae ma Feagaiga 61:1. Fai atu i le vasega e mulimuli i le faitauga, ma vaavaai mo mea ua aoao mai e le Alii e uiga i Lona mana.

  • O faapefea ona faamatala e le Alii Lona mana i le fuaiupu lenei? (A uma ona tali mai tagata o le vasega, tusi le aoaoga faavae lenei i luga o le laupapa: Ua i ai i le Alii le mana uma.)

Atonu e te manao e faailoa atu e faapea, ona o le faaaliga vaaia a William W. Phelps e uiga i le faaleaga mea i luga o vai, ua manatu ai nisi ua i ai ia Satani le mana i luga o vai. Ae peitai, ua faamautu mai e le Mataupu Faavae ma Feagaiga 61:1 ua i ai i le Alii le mana uma—e aofia ai le mana i luga o vai.

Valaaulia se tagata o le vasega e faitau leotele le Mataupu Faavae ma Feagaiga 61:6, 10. Fai atu i le vasega e mulimuli i le faitauga ma vaavaai mo fasifuaitau ia atonu na fesoasoani i toeaina e talisapaia atili le mana o le Alii. Fai atu i tagata o le vasega e lipoti mai mea latou te mauaina, ona faaopoopo atu lea i le faamatalaga o loo i luga o le laupapa ina ia faitauina faapea: Ua i ai i le Alii le mana uma, ma e mafai ona Ia faasaoina i tatou.

  • O a ni aafiaga na e oo i ai ua faamalosia ai lau molimau e uiga i le mana o le Alii ma e uiga i le mafai e le Alii ona puipuia i tatou mai faalavelave?

Atonu e te manao e aotele le vaega o totoe o le Mataupu Faavae ma Feagaiga 61 i le faamatala atu e faapea, na tuuina mai e le Alii isi faatonuga e taiala ai nei toeaina a’o toe foi atu i Ohaio.

Mataupu Faavae ma Feagaiga 62

Ua faafetaia e le Alii le faamaoni o se vaega o toeaina na malaga atu i Initipene, Misuri

Tusi fesili nei i luga o le laupapa:

O le a le lanu o le mitiafu e tatau ona ou ofuina nei?

Pe e tatau ona ou alu i le Lotu i le Aso Sa?

Pe e tatau ona ou auauna atu i se misiona? Afai o lea, o afea?

Afai e ofo mai lo’u tina na te faia le meaai e sili ona ou fiafia i ai, o le a le meaai e tatau ona ou filifilia?

O ai e tatau ona ou tafao faamasani i ai? O fea e tatau ona ma o ma te aai ai i le ma tafaoga faamasani?

Fai atu i tagata o le vasega e mafaufau po o le fea o nei fesili atonu e sili atu ona taua i le Alii.

Faamalamalama atu, a o faatonuina e le Alii ia toeaina o e sa malaga mai Misuri i Ohaio, sa Ia fesoasoani ia latou malamalama o nisi o faaiuga na manaomia ona latou faia sa sili atu le taua ia te Ia nai lo isi. Uunaia tagata o le vasega e vaavaai mo ni aoaoga i le Mataupu Faavae ma Feagaiga 62 e mafai ona taiala ai i latou i le faia o faaiuga.

Valaaulia se tagata o le vasega e faitau leotele le Mataupu Faavae ma Feagaiga 62:1–3. Fai atu i le vasega e mulimuli i le faitauga, ma vaavaai mo fasifuaitau e faaalia ai o taumafaiga a toeaina e talai atu le talalelei sa taua i le Alii.

  • O a ni fuaitau na e mauaina? E faapefea ona faaalia i nei fuaitau lagona o le Alii e uiga i nei taumafaiga faafaifeautalai?

Ina ia fesoasoani i tagata o le vasega e mafaufau i faataitaiga o mea sa taua i le Alii, ma mea sa le’i taua, kopi le siata lenei i luga o le laupapa pe saunia o se pepa e tufa atu. Aua nei aofia ai faamatalaga o loo i totonu o puipui. E fuafua i manaoga o tagata o lau vasega, fai atu ia i latou e fai taitoatasi le gaoioiga lenei, pe fai faatasi ma se paga. Pe e mafai foi ona outou faamaeaina le gaoioiga o se vasega.

O a mea na taua i le Alii

O a mea sa le’i taua i le Alii

MF&F 60:5

(Sa vave ona alu le malaga a toeaina i St. Louis)

(Pe na faia pe na aumai e toeaina se vaa e malaga ai)

MF&F 61:21–22

(Ina ia faanatinati atu le malaga a toeaina ma o le a latou faataunuu la latou misiona)

(Pe sa latou malaga i vai po o le laueleele)

MF&F 62:5-7

(Ina ia faamaoni toeaina, tuu atu le molimau e uiga i le talalelei, ma fesoasoani e faapotopoto mai le Au Paia)

(Pe sa malaga faatasi uma toeaina pe sa taitoalua; pe sa tietie toeaina i solofanua po o ni miula po o ni kariota)

A uma ona faatumu e tagata o le vasega le siata, fai atu i ai fesili nei:

  • O a ni eseesega e te matauina i le va o mea sa taua i le Alii ma mea sa le’i taua?

  • E mafai faapefea ona taiala oe e lenei mamanu a’o e faia ni faaiuga?

Faamalamalama atu e faapea, ua aoao mai i le Mataupu Faavae ma Feagaiga 62:8 se mataupu faavae e mafai ona taiala ai i tatou a’o tatou faia ni faaiuga. Valaaulia tagata o le vasega e faitau filemu le fuaiupu lenei, ma vaavaai mo lena mataupu faavae. Ona fai atu lea ia i latou e lipoti mai le mea na latou mauaina. E mafai ona latou faaaogaina nisi upu, ae e tatau ona latou faailoa mai le mataupu faavae lenei: Pe a tatou faia ni faaiuga, e tatau ona tatou faalagolago i lo tatou faautautaga ma le taitaiga a le Agaga. Atonu e te manao e valaaulia tagata o le vasega e tusi lenei mataupu faavae ia latou lava upu, i totonu o a latou tusitusiga paia.

  • Aisea e taua ai le faalagolago i lo tatou faatuatuaga faapea ma taitaiga a le Agaga pe a tatou faia ni faaiuga?

  • O anafea na e faia ai se faaiuga e faavae i lou lava faautautaga faapea ma le taitaiga mai le Agaga? Na faapefea ona faamanuiaina oe mo le faia o lena mea?

Molimau atu i upumoni na outou talanoaina i le lesona. Valaaulia tagata o le vasega e mafaufau loloto i auala e mafai ona latou galulue ai i upumoni ua latou aoaoina mai le suesuega o le Mataupu Faavae ma Feagaiga 60–62. Atonu e te manao e valaaulia se tagata se toatasi pe toalua o le vasega e faasoa mai ni auala ua laua fuafua e galulue ai i se tasi o nei upumoni.

Tala ma Faamatalaga o Talaaga

Mataupu Faavae ma Feagaiga 61:5–19. E faapefea ona fetuuina vai?

O afioga a le Alii o loo i le Mataupu Faavae ma Feagaiga 61:5–19 e le o faasaina ai le Au Paia o Aso e Gata Ai mai le femalagaai i luga po o le taeele i vai. I le faamatalaina o le fetuu i luga o vai i aso e gata ai, atonu sa faatatau atu le Alii i fuaitau i le tusi o Faaaliga lea o loo faamatalaina ai e le Aposetolo o Ioane le faatafunaga o le a tupu i vai a’o lei oo i le Afio Mai Faalua o Iesu Keriso (tagai i le Faaaliga 8:8-11; 16:2–6). I le Mataupu Faavae ma Feagaiga 61, o loo faatatau tonu atu le Alii i le matautia “o nei vai,” o lona uiga o le Vaitafe o Misuri (tagai i le MF&F 61:5, 18). Na faamalamalama mai e Peresitene Iosefa Filitia Samita nisi o mea na faaleagaina na mafua mai i le Vaitafe o Misuri:

Peresitene Iosefa Filitia Samita

“E faatatau i vaitafe o Misuri-Misisipi, ua tatou vaaia i lea tausaga ma lea tausaga faafanoga tetele i luga o ia [vai], ma e sau mai i nei [vai]. E faitau miliona ma miliona tala e maumau e toetoe o tausaga uma i lenei vaitafe tele pe a oo ina pa ona auvai. E toatele ua maumau o latou soifua i lologa nei a o latou tafefea i luga o le laueleele, ma e oo lava i luga o lenei vaitafe, o le mea moni lava e filemu pe tafetafe malie, ae e mafai ona tulai mai ai ni afā e aumaia ai le faafanoga. E moni ua, ma o loo faataunuuina le afioga a le Alii, e faatatau i na vai” (Church History and Modern Revelation, 2 vols. [1953], 1:224).

Mataupu Faavae ma Feagaiga 62. Talaaga o le Talafaasolopito

A o malaga atu Iosefa Samita ma isi i sasae i Ohaio, sa latou fetaiai ma toeaina e toafa o malaga atu i sisifo i Initipene, Misuri. O se tasi o nei toeaina, o John Murdock, sa gasegase a’o talai atu le talalelei i le taimi o le malaga mai Ohaio. Sa nonofo John ma lana soa, o Ailama Samita, i Karitone, Misuri, e faatalitali ai seia toe malosi le gasegase o John. O iina sa la feiloai ai i isi toeaina e toalua o Tavita Uitimera ma Harvey Whitlock, o ē foi sa faamaoni i le poloaiga e talai atu le talalelei a’o agai atu i Misuri. Ina ua feiloai atu le toafa lenei ia Iosefa Samita i Karitone ma maua ai faatonuga a le Alii o loo faamaumauina i le Mataupu Faavae ma Feagaiga 62, sa tuufaatasi loa a latou tupe ma faatau ai se solofanua, lea na mafai ai ona faigofie ona malaga atu John Murdock i Siona.