Ina ua uma ona maua e Iosefa Samita le Uluai Faaaliga i le 1820, sa ia faasoa atu lona aafiaga i se failotu o le na teenaina lana molimau. E le gata i lea, sa sauaina e isi tagata o le nuu le taulealea o Iosefa Samita. Sa faia e tagata na maualuluga o latou tulaga ia mea uma e faitioina faalautele ai o ia. E ui lava i lenei tetee, sa tumau faamaoni pea Iosefa Samita i lana molimau.
O failotu ma isi tagata o tulaga maualuluga na faamatua’ia sauaga e faasaga ia Iosefa Samita
Amata le vasega i le faitauina leotele o le tala lenei sa faamatalaina e Peresitene Gordon B. Hinckley e uiga i se talanoaga sa la faia ma se alii talavou i Lonetona, Egelani. Ae e te lei faitauina le vaega muamua o le tala lenei, valaaulia le vasega e mafaufau loloto i mea latou te ono faia pe afai na latou i ai i le tulaga o lenei alii talavou. (E mafai ona e ta‘u atu i le vasega o le faaiuga o le tala lenei o le a oo mai i se taimi mulimuli ane o le lesona.)
Ata
Peresitene Gordon B. Hinckley
“Sa fai mai o ia, ‘e tatau lava ona ou talanoa i se tasi. Ua tuua na o a’u. …’
“Ma sa ou fai atu, ‘O le a lou faafitauli?’
“Ma sa ia fai mai, ‘Ina ua ou auai i le Ekalesia i le toeitiiti atoa ai o se tausaga talu ai, sa fai mai lo’u tama ou te aluese ma lona fale ma aua ne’i o’u toe foi atu. Ma ou te lei toe foi atu lava.’
‘Sa ia faaauau, ‘O ni nai masina mulimuli ane, na aveese ai a’u mai le lisi o le kalapu kirikiti lea sa ou auai ai, ma faasa a’u ona ou toe auai faatasi atu i isi tama o e sa matou tutupu a’e faatasi ma i latou o e sa ou latalata ma faauo i ai.’
“Ona ia fai mai lea, ‘O le masina ua te’a, na tuli ai a’u e lo’u pule ona ua avea a’u ma se tagata o lenei ekalesia, ma ua le mafai ona toe maua se isi a’u galuega. …
“’Ma o ana po na fai mai ai le teine sa ma feoa’i mo le tausaga ma le afa, o le a le faaipoipo ia te a’u ona o a’u o se Mamona’” (“O Le Tuua Toatasi o le Tulaga Faaletaitai” [Brigham Young University devotional address, Nov. 4, 1969], 3, speeches.byu.edu).
A uma ona faitau le tala lenei, valaaulia ni nai tagata o le vasega e tali mai i le fesili lenei:
Pe na i ai se taimi na e lagonaina na faia ai oe ma le faalealofa pe faitioina ona o ou talitonuga faalelotu? O le a le mea na tupu? (E mafai foi ona faasoa atu sou aafiaga patino i le vasega.)
Faaali atu le ata O Le Uluai Faaaliga (Tusi Ata o le Talalelei [2009], nu. 90; tagai foi i le LDS.org). Ia faamalamalama atu, e ui lava sa faamanuiaina tele Iosefa Samita ona o le molimau na ia maua o se taunuuga o le Uluai Faaaliga, ae sa matuai tofotofoina foi o ia. Uunaia tagata o le vasega e mafaufau i mea e mafai ona latou aoao mai i le tali atu a Iosefa Samita i le tetee na oo mai ia te ia ona o lana molimau.
Ata
O Le Uluai Faaaliga
Faatonu tagata o le vasega e galulue i paga. Valaaulia paga taitasi e feauauai i le faitauina leotele o le Iosefa Samita—Talafaasolopito 1:21–23. Fai atu ia i latou e vaavaai mo upu ma fasifuaitau o loo faamatala ai le tetee sa feagai ma Iosefa Samita ona o lana molimau. (Atonu e te manao e fautuaina tagata o le vasega e faailoga upu ma fuaitau latou te maua.) A uma ona faitau tagata o le vasega, fai atu fesili nei:
O a ni upu po o ni fuaitau sa tulaga ese ia te oe?
O ai na amataina le tele o sauaga faasaga ia Iosefa Samita i le taimi lea? (O tagata maualuga i le nuu o e na fai mai o ni tagata Kerisiano.)
A o e mafaufau i tausaga o le matua o Iosefa Samita ma tulaga o le olaga, e faapefea ona sili atu ona faigata ia te ia o sauaga mai nei tagata?
Faasino atu le fuaiupu e lata i le faaiuga o le Iosefa Samita—Talafaasolopito 1:20 e amata i le, “Sa foliga mai e peiseai. …” Valaaulia tagata o le vasega e amata atu i upu nei, ona faitau filemu le vaega o totoe o le fuaiupu, ma vaavaai mo le pogai na tuuina mai e Iosefa Samita mo le mafuaaga na ia oo ai i sauaga ao itiiti lava.
E tusa ai ma le saunoaga a Iosefa Samita, aisea na oo ai o ia i lenei sauaga a’o talavou lava? (Na iloa e Satani o le a avea Iosefa Samita “o se faalavelave ma faasoesa i lona malo” [Iosefa Samita—Talafaasolopito 1:20].)
Faamalamalama atu faapea, a o faaauau e tagata o le vasega a latou suesuega o le Iosefa Samita—Talafaasolopito i le aso, o le a latou aoao ai i upumoni taua o le a fesoasoani ia i latou e taulimaina le tetee ma sauaga e ono oo ia i latou ona o o latou talitonuga ma amioga amiotonu.
E ui lava ina itagia ma sauaina Iosefa Samita, sa tumau faamaoni pea o ia i lana molimau
Tuu i luga o au tusitusiga paia, ma fai atu le fesili lenei:
O ai se tagata i tusitusiga paia e te faamemelo i ai ona o ona uiga po o le malosi o ana faataitaiga? (Valaaulia tagata o le vasega e faamatala faapuupuu mai a latou tali.)
Valaaulia se tagata o le vasega e faitau leotele le Iosefa Samita—Talafaasolopito 1:24 . Fai atu i le vasega e mulimuli i le faitauga, ma vaavaai mo le igoa o se tagata o ona aafiaga sa tutusa ma aafiaga o Iosefa Samita.
Aisea na mafai ai e Iosefa Samita ona toe tepa i tua i ona aafiaga ma faafesootai ma le Aposetolo o Paulo? (Sa ulagia Paulo ona o lana molimau ia Iesu Keriso ae sa tumau faamaoni pea i ai.)
O a ni auala e te manatu, atonu na aoga ai ia Iosefa Samita le iloa o mea sa la tutusa ai ma le Aposetolo o Paulo? (Tagai i le 2 Korinito 11:23–27 mo se faamatalaga o mafatiaga o Paulo.)
O a ni lesona e mafai ona tatou aoao mai i faataitaiga a Iosefa Samita o le suesue ma le mafaufau loloto i aafiaga o Paulo? (Fesoasoani i tagata o le vasega e faailoa mai le mataupu faavae lenei: I taimi o faigata, e mafai ona tatou maua mai le malosi mai faataitaiga a tagata faamaoni o loo i tusitusiga paia.)
Tusi lenei upumoni i luga o le laupapa, ma faamalamalama atu o se faataitaiga lea o se mataupu faavae. Atonu e te manao e faamanatu atu i tagata o le vasega, o aoaoga faavae ma mataupu faavae o le talalelei e taua, o upumoni e le masuia e tuuina mai le taitaiga mo o tatou olaga. Ina ia fesoasoani i tagata o le vasega e faatatau lenei mataupu faavae i o latou olaga ma lagona lona moni ma le taua, fai atu le fesili lenei:
O le a se taimi na faamalosia ai oe e ala i le suesue i le aafiaga o se tagata faamaoni o loo i tusitusiga paia? (Atonu foi e te manao e faasoa atu sou aafiaga.)
Uunaia tagata o le vasega e liliu atu i tusitusiga paia mo le malosiaga i soo se taimi lava latou te feagai ai ma faigata.
Tusi le faamatalaga lenei i luga o le laupapa: “Sa ou vaai i se faaaliga vaaia; sa ou mautinoa lena mea, ma sa ou mautinoa sa silafia e le Atua lena mea, ma e lē mafai ona ou faafitia lena mea” (Iosefa Samita—Talafaasolopito 1:25).
O le a le mea ua aoao mai e lenei fuaitau ia te oe i le molimau a Iosefa Samita e uiga i le Uluai Faaaliga?
E faapefea ona e maua se molimau na vaai Iosefa Samita i le Atua le Tama ma Lona Alo o Iesu Keriso?
Valaaulia tagata o le vasega e suesue ma le leoa i le Iosefa Samita—Talafaasolopito 1:24-25. Fai atu ia te i latou e vaavaai mo aoaoga faavae po o mataupu faavae e mafai ona fesoasoani ia i tatou pe a tatou feagai ma mea faafeagai pe ua faavaivai i a tatou molimau. Valaaulia i latou e faamaumau mea latou te maua i a latou api o le vasega po o api talaaga mo le suesueina o tusitusiga paia. O faataitaiga o upumoni e mafai ona faailoa mai e tagata o le vasega e aofia ai mea nei:
O le malamalama tatou te maua mai le Atua e moni, e tusa lava pe teena e le lalolagi.
E tatau ona sili atu ona tatou popole i le po o le a le mafaufau o le Atua ia i tatou nai lo o manatu o tagata.
E tusa lava pe inosia ma sauaina i tatou ona o a tatou molimau, e tatau lava ona tatou tumau faamaoni ai.
Valaaulia tagata o le vasega e faasoa mai ni upumoni ua latou mauaina. Uunaia i latou e faalogo ma le totoa i le tasi ma le isi. Atonu e te manao e fautua atu, ia latou tusia upumoni latou te aoaoina mai le tasi ma le isi i a latou api o le vasega po o api talaaga mo le suesueina o tusitusiga paia. A o faasoa mai e tagata o le vasega ni upumoni ua latou mauaina, fai atu fesili nei:
Na faapefea ona avea Iosefa Samita o se faataitaiga o lena upumoni?
E mafai faapefea ona fesoasoani lena upumoni ia te oe?
E faapefea e le ola ai i lena upumoni ona faatosinaina a tatou filifiliga?
Faitau leotele le vaega o loo totoe o le tala na faamatalaina e Peresitene Hinckley e uiga i le alii talavou i Lonetona, Egelani, na feagai ma le malosi o le tetee ona o ona talitonuga faalelotu:
Ata
Peresitene Gordon B. Hinckley
‘‘Sa ou fai atu, ’Afai la ua tele naua mea ua aveesea mai ia te oe, aisea la e te le tuua ai le Ekalesia ae toe foi atu i le fale o lou tama, ma lau kalapu kirikiti, ma le galuega ua taua tele ia te oe ma le teine lea ua e manatu ua e alofa i ai?’
“Sa leai sana upu na fai mai mo se taimi na foliga mai o se taimi umi lava. Ona, ifo ane lea o lona ulu i ona lima, ma tagi masusu ai lea. Mulimuli ane, sa ia tepa ae i luga ma ona loimata ma fai mai, ‘e le mafai ona ou faia lena mea. Ua ou iloa e moni lenei mea, ma afai lava e aveesea ai ma lo’u ola, e le mafai lava ona ou faafitiaina’” (“The Loneliness of Leadership,” 3–4).
Valaaulia tagata o le vasega e filifili se tasi o upumoni sa latou lisiina ma tusi i lalo se mea o le a latou faia e faaaoga ai lena upumoni i o latou olaga.
Faaiu le lesona i le valaaulia o se tagata o le vasega e faitau leotele le Iosefa Samita—Talafaasolopito 1:26. Fai atu i tagata o le vasega e mulimuli i le faitauga ma faailoa mai le mataupu faavae lea na iloa e Iosefa Samita e moni.
O a faamanuiaga na oo mai ia Iosefa Samita ona sa talitonu i le folafolaga mai ia Iakopo? (Sa ia iloa ai pe a tatou ole atu ma le faatuatua i le Atua mo le poto, o le a Ia tuuina saoloto mai ia i tatou. Sa ia aoaoina foi, pe a tatou galulue i folafolaga o loo i tusitusiga paia, e mafai ona tatou maua se molimau e uiga i lo latou moni.)
Faasoa atu lau molimau, ao tatou faalagolago i le Atua ma talitonu ma galulue i folafolaga o loo i tusitusiga paia, o le a tatou maua tali mai le Atua ma maua le malosi e faatoilalo ai luitau tatou te feagai.