Lesona 71
Mataupu Faavae ma Feagaiga 65
Folasaga
I le aso 12 o Setema, 1831, na siitia atu ai Iosefa Samita ma lona aiga mai Katelani, Ohaio, i Hairama, Ohaio, pe a ma le 30 maila i sautesasae o Katelani. Sa latou faia lenei siitaga e tali atu ai i le fautuaga mai le Alii (tagai i le MF&F 63:65). Sa nonofo faatasi le Perofeta ma lona aiga ma le aiga o Ioane ma Alice Johnson, o ni tagata fou liliu mai i le Ekalesia. O se mafuaaga tele o le siitia mai Katelani ina ia toe amata le galuega i le faaliliuga musuia o le Tusi Paia. O le taimi lava na oo atu ai i Hairama, na toe amata ai loa e Iosefa lena galuega. I le aso 30 o Oketopa, 1831, na maua ai e Iosefa Samita le faaaliga ua faamaumauina i le Mataupu Faavae ma Feagaiga 65. I le faaaliga lenei, na aoao mai ai le Alii e faapea, o le a alu atu le talalelei i atunuu uma i le sauniuniga mo le Afio Mai Faalua o le Faaola, ma e tatau i le Au Paia ona tatalo mo le tuputupu ae o le malo o le Atua.
Fautuaga mo le Aoaoina Atu
Mataupu Faavae ma Feagaiga 65
Ua tautino mai e le Alii o le a faatumulia e le talalelei le lalolagi atoa
Valaaulia tagata o le vasega e lisi i a latou api o le vasega po o api talaaga mo le suesueina o tusitusiga paia, nisi o mea e masani ona latou tatalo ai. Atonu e te fai atu i nai tagata o le vasega e faasoa mai mea na latou tusia pe afai latou te lagona le to’a e faasoa mai ai.
Valaaulia se tagata o le vasega e faitau leotele le folasaga o le vaega o le Mataupu Faavae ma Feagaiga 65. Faamalamalama atu e faapea, i le faaaliga lenei, ua ta’u mai e le Alii ia i tatou se mea e tatau ona tatou tatalo atu ai— ae maise lava a o tatou molimau i le faataunuuga o mea na valoia e tutupu i aso e gata ai.
Valaaulia se tagata o le vasega e faitau leotele le Mataupu Faavae ma Feagaiga 65:1–2. Fai atu i le vasega e mulimuli i le faitauga, ma vaavaai pe na faapefea ona faamatala e le Alii le faasalalauina atu o le talalelei.
-
O fea o le a alu ai le talalelei a Iesu Keriso? (E tatau ona faailoa mai e tamaiti aoga le aoaoga faavae lenei: O le talalelei a Iesu Keriso o le a agai i luma i le iuga o le lalolagi. Tusi le aoaoga faavae lenei i le laupapa.)
-
E tusa ai ma le fuaiupu e 2, o le a le mea “ua tuu atu [e le Alii] i tagata” e mafai ai ona tumu le lalolagi atoa i le talalelei? (O ki o le malo o le Atua. Atonu e manaomia ona e faamanatu atu i tagata o le vasega o le fuaitau “ki o le malo” e faatatau i le pule o le perisitua e pulefaamalumalu i le Ekalesia. Faatasi ai ma nei ki, ua taitai ai e le Peresitene o le Ekalesia a tatou taumafaiga e talai atu le talalelei. Ua ia faasafua atu nisi o ki i taitai perisitua aoao ma i le lotoifale.)
Faaali atu i tagata o le vasega le ata o Tanielu o loo Faamatala le Miti a Nepukanesa (Tusi Ata o le Talalelei [2009], nu. 24; tagai foi i le LDS.org). Valaaulia tagata o le vasega e faamatala mai mea ua latou iloa e uiga i le faamatalaina e Tanielu o le miti a le Tupu o Nepukanesa. (Atonu e te mafaufau e faitau atu pe otooto le Tanielu 2:31–45. Fesoasoani i tagata o le vasega ia malamalama sa faapopoleina le Tupu o Nepukanesa i se miti, ae sa faaalia e le Alii le miti ma lona uiga ia Tanielu. I le miti, sa faaleagaina se faatusa tele, lea e faatusa i malo faaupufai eseese, e se maa mai se mauga e le’i tofia e se lima. Sa amata mai le maa o laitiiti ae na faatupulaia seia oo ina tumu ai le lalolagi atoa.)
-
E tusa ai ma le Mataupu Faavae ma Feagaiga 65:2, o le a le maa na tofi mai le mauga e aunoa ma lima? (O le Malo o le Atua. Faamalamalama atu e faapea, i lenei fuaiupu, o le fuaitau “o le malo o le Atua” e faasino i le malo o le Atua i le lalolagi—O Le Ekalesia a Iesu Keriso o le Au Paia o Aso e Gata Ai. Atonu e te manao e fautua atu i tagata o le vasega e tusi lenei faamalamalamaga i a latou tusitusiga paia i talane o le fuaiupu e 2.)
Afai e mafai, tuu atu i tagata o le vasega se kopi o le faamatalaga lenei ina ia latou tuuina i totonu o a latou tusitusiga paia. Afai e le mafai, atonu e te manao e tusi le faamatalaga i luga o le laupapa a o lei amataina le vasega ma valaaulia tagata o le vasega e tusi i a latou api o le vasega po o api talaaga mo le suesueina o tusitusiga paia. Fai atu i se tagata o le vasega e faitau leotele le faamatalaga.
Na saunoa mai Peresitene Gordon B. Hinckley
“O i tatou o tagatanuu i le malo aupito silisili i le lalolagi—o se malo e le taitaia e le poto o tagata ae o loo taitaia e le Alii o Iesu Keriso. E moni lava o loo i ai. E mautinoa lona taunuuga. O le malo lenei na saunoa ai le perofeta o Tanielu—o se maa, e pei ona i ai, e tatau ona tofia mai mauga ae le tofia e ni lima ma taavale atu ma ufitia ai le lalolagi uma. (Tagai i le Tan. 2:34–35.)
“E lei foafoaina e se tagata ola lenei malo” (“O Poutu o le Upumoni,” Liahona, Me 2002, 4-5).
-
O a faamaoniga ua e vaaia o le faataunuuina o le valoaga a Tanielu i aso nei?
-
E faapefea ona faamalosia e lenei faamaoniga lau molimau o Le Ekalesia a Iesu Keriso o le Au Paia o Aso e Gata Ai?
-
O le a le uiga ia te oe o le avea ma se vaega o le malo o le Atua i le lalolagi?
Faitau leotele le saunoaga lenei a Elder Neil L. Andersen o le Korama a Aposetolo e Toasefululua. A o lei e faitauina, ta‘u i tagata o le vasega o le a e taofia le faitauina i le ogatotonu o le fuaiupu mulimuli o le faamatalaga. Fai atu ia i latou e faalogologo ma le toto‘a ma manatunatu pe faapefea ona latou faaumaina le fuaiupu mulimuli.
“Pe o outou manatunatu ea e uiga i le mafuaaga ua auina mai ai outou i le lalolagi i lenei taimi faapitoa? Tou te lei fananau mai i le taimi o Atamu ma Eva, po o le taimi na pulea ai e Farao ia Aikupito, po o le taimi o le Pulega o Aiga i Saina [Ming dynasty]. Ua outou o mai i le lalolagi i lenei taimi i le 20 o seneturi talu ona mavae le uluai afio mai o Keriso. Ua toefuatai mai le perisitua a le Atua i le lalolagi, ma ua uma ona tuu mai e le Alii Lona aao e saunia le lalolagi mo Lona toe afio mai ma le mamalu. O aso nei o avanoa maoae ma tiutetauave taua. O ō outou aso nei. … O se tasi o ou tiutetauave taua o le …” (“Sauniaina o le Lalolagi mo le Afio Mai Faalua,” Ensign po o le Liahona, Me 2011, 49).
Valaaulia ni nai tagata o le vasega e ta’u mai pe faapefea ona latou faaumaina le fuaiupu o le saunoaga a Elder Andersen. Ona valaaulia lea o se tagata o le vasega e faitau leotele le Mataupu Faavae ma Feagaiga 65:3. Fai atu i le vasega e mulimuli i le faitauga, ma vaavaai mo le poloaiga a le Alii ia i tatou i le avea ai ma tagata o Lona malo.
-
O le a le uiga o le, e tatau ona tatou saunia le ala a le Alii ma o le talisuaga a le tamai Mamoe, ma ia sauniuni mo le Faatoafaiava? (O nei fasifuaitau e faasino i le tiutetauave e saunia le lalolagi mo le Afio Mai Faalua o Iesu Keriso.)
Tusi le upumoni lenei i luga o le laupapa: Ua ia i tatou se tiutetauave e saunia ai i tatou lava ma isi mo le Afio Mai Faalua o Iesu Keriso. Atonu e te manao e fautua atu i tagata o le vasega e tusi lenei upumoni i a latou tusitusiga paia i talane o le Mataupu Faavae ma Feagaiga 65:3. Faamalamalama atu na molimau mai Elder Neil L. Andersen i lenei upumoni. Faitau atoa le fuaiupu mulimuli mai lana saunoaga: “O se tasi o outou tiutetauave taua o le fesoasoani lea e saunia le lalolagi mo le Afio Mai Faalua o le Faaola” (“Sauniaina o le Lalolagi,” 49).
-
A o e mafaufau e uiga i lou tiutetauave o le saunia o oe lava ma isi mo le Afio Mai Faalua, o a ni ou manatu ma lagona o i ai?
Valaaulia se tagata o le vasega e faitau leotele le Mataupu Faavae ma Feagaiga 65:4, ma fai atu i le vasega e vaavaai mo mea e mafai ona tatou faia e saunia ai i tatou lava ma isi mo le Afio Mai Faalua. Fai atu i tamaiti aoga e lipoti mai mea latou te maua.
-
O a ni auala e mafai ona tatou “faailoa atu ai galuega ofoofogia [a le Alii] i totonu o tagata”?
Valaaulia se tagata o le vasega e faitau leotele le Mataupu Faavae ma Feagaiga 65:5–6, ma fai atu i le vasega e vaavaai mo mea e tatau ona tatou tatalo atu ai.
-
E tusa ai ma nei fuaiupu, o a mea e tatau ona tatou tatalo atu ai a’o tatou sauniuni mo le Afio Mai Faalua? (A o tali mai tagata o le vasega i lenei fesili, atonu e te manao e valaaulia i latou e faatusatusa le fuaiupu e 6 ma upu o le tatalo a le Alii i le Mataio 6:10.)
-
E mafai faapefea ona fesoasoani le tatalo mo nei mea ia i tatou e sauniuni ai i tatou lava ma isi mo le Afio Mai Faalua?
Valaaulia se tagata o le vasega e faitau leotele le saunoaga lenei mai ia Peresitene Thomas S. Monson, ma fai atu i le vasega e faalogologo mo se mea e tatau ona faaaofia i a tatou tatalo.
“Ou te talosaga atu ina ia faaauau pea lo outou faatuatua ma tatalo mo eria e utiuti so tatou aafiaga o i ai, ma nofoaga e le o faatagaina ona tatou faasoa saoloto atu ai le talalelei i le taimi nei. E mafai ona tutupu vavega pe a tatou faia lena mea” (“Susu Maia i le Konafesi,” Ensign po o le Liahona, Nov. 2009, 6).
-
E tusa ai ma le saunoaga a Peresitene Monson, o le a se mea e tatau ona tatou tatalo atu ai? O le a faapefea ona fesoasoani nei tatalo e saunia le ala mo le Afio Mai Faalua?
Fai atu i le vasega e toe foi i le Mataupu Faavae ma Feagaiga 65:1–2, ma fai atu i se tagata o le vasega e faitau leotele fuaiupu nei.
-
O a ni auala o loo tatou auai ai i le galuega a le Alii e faatumu le lalolagi i Lana talalelei? (A o tali mai tagata o le vasega i lenei fesili, fesoasoani ia latou iloa e mafai ona latou auai i lenei galuega o ni faifeautalai faamisiona. E fesoasoani foi ia latou iloa ai latou te auai i lenei galuega i le taimi nei, e ala i a latou uunaiga i o latou aiga, o latou uarota ma paranesi, a latou aoga, ma lo latou nuu.)
Uunaia tagata o le vasega e saunia i latou lava ma isi mo le Afio Mai Faalua.
Tala ma Faamatalaga o Talaaga
Mataupu Faavae ma Feagaiga 65. “Ina ia mafai ona oo mai le malo o le lagi”
O se tusitusiga anamua o le faaaliga ua faamaumauina i le Mataupu Faavae ma Feagaiga 65 o loo aofia ai upu nei o le folasaga: “O se faaaliga a Iosefa le Tagatavaai aso 30 o Oketopa, 1831 i le Mataio e 6 fuaiupu e 10” (William E. McLellin copy of Revelation, Oct. 30, 1831 [D&C 65], in William E. McLellin Papers, 1831–1878, Church History Library) O le Mataio 6:10 o loo i ai se vaega o le tatalo a le Alii: “Ia oo mai Lou malo. Ia faia lou finagalo i le lalolagi e pei ona faia i le lagi.” O le faaaliga i le Mataupu Faavae ma Feagaiga 65 o loo faaalia ai auala eseese ua oo mai ai le malo o le Alii i le lalolagi, ma o le a faaauau pea ona agai i luma. Ma e faaiu i upu e tutusa lava ma upu mulimuli i le Tatalo a le Alii: “Aua e a oe le mamalu, mana ma le viiga, e faavavau faavavau lava. Amene” (MF&F 65:6; tagai foi i le Mataio 6:13).
Mataupu Faavae ma Feagaiga 65:2. “Seia tumu ai le lalolagi atoa”
E ui sa laitiiti le Ekalesia i le amataga, ae sa i ai se lagona faaperofeta o Iosefa Samita i lona taunuuga tele e i ai. Na toe manatua e Uilifoti Uitilafi lena mea i se sauniga a le au perisitua i Katelani, Ohio, ia Aperila 1834:
“Sa valaauina e le Perofeta i latou uma sa umiaina le Perisitua ina ia faapotopoto atu i se tamai faleaoga ogalaau sa i ai iina. O se fale e laitiiti naua, pe tusa ma le 14 futu faatafafa. Ae sa ofi uma ai le Au Perisitua O Le Ekalesia a Iesu Keriso o le Au Paia o Aso e Gata Ai o e sa i ai i le nuu o Katelani. … Ina ua matou potopoto faatasi uma sa valaauina e le Perofeta ia Toeaina o Isaraelu ina ia latou molimau ma ia i lenei galuega. … Ina ua maea uma latou sa faapea mai le Perofeta, ‘Uso e ua matua faagaeetia au ma ua aoaoina e ala i a outou molimau iinei i le po nei, ae ou te fia fai atu ia te outou i luma o le Alii, e tou te leiloaina nisi mea faaopoopo e uiga i taunuuga o lenei Ekalesia ma le malo nai lo se pepe i luga o vae o lona tina. E tou te le malamalama i ai.’ Sa taufai si o’u ofo. Sa ia saunoa, ‘Ua na o sina luutaga o Perisitua o loo outou vaai i ai i lenei afiafi, ae o lenei Ekalesia o le a faatumulia ai Amerika i Matu ma Saute—o le a faatumulia ai le lalolagi’“ (i le Aoaoga a Peresitene o le Ekalesia: Iosefa Samita [2007], 145-46).