Lesona 117

Mataupu Faavae ma Feagaiga 109:47–80

Folasaga

I le aso 27 o Mati, 1836, na fofogaina ai e le Perofeta o Iosefa Samita le tatalo o le faapaiaga mo le Malumalu o Katelani. O lena tatalo, lea na faaali muamua mai e le Alii ia te ia, ua faamaumauina i le Mataupu Faavae ma Feagaiga 109. O le lona lua lenei o lesona e uiga i le tatalo. O loo aofia ai le olega a le Perofeta ina ia faamanuia e le Alii le Au Paia o e sa sauaina i le Itumalo o Jackson, Misuri, ma mo le Alii e faamanuia e na faasaua ia i latou. O loo aofia ai foi le olega a le Perofeta ina ia faaliliuina mai tagata o le lalolagi atoa, ae maise o Isaraelu na faataapeapeina, i le atoatoaga o le talalelei, ma ina ia talia e le Tama Faalelagi le faapaiaga o le Malumalu o Katelani ma faamanuia aiga o le Ekalesia.

Fautuaga mo le Aoaoina Atu

Mataupu Faavae ma Feagaiga 109:47–53

Ua ole atu Iosefa Samita i le Tama Faalelagi e fesoasoani i le Au Paia i Misuri

Valaaulia tagata aoga e mafaufau faapea, o loo tauivi pe o mafatia se uo po o se tagata o le aiga i nisi o auala. Ona fai atu lea ia te i latou e mafaufau faapea, e le mafai ona latou faia e i latou lava soo se mea e fesoasoani ai i lenei uo po o le aiga o se tagata. A uma se taimi na latou mafaufau ai, fai atu le fesili lenei:

• O a ni auala e mafai ona e fesoasoani e faamāmā ai mafatiaga o se tasi, e tusa lava pe leai se mea e mafai ona e faia e oe lava?

A uma ona faasoa mai e tagata aoga ni nai manatu, faamanatu atu ia i latou e faapea, sa mafatia tele le Au Paia i Misuri ona o vevesiga e faatupu e vaega faatupu vevesi i le Itumalo o Jackson. Ia Aperila 1836, sa i ai le Perofeta o Iosefa Samita i Katelani, Ohaio. E ui lava i le taimi lea, sa le mafai ona ia faia se mea e faamama ai mafatiaga o le Au Paia i Misuri, ae sa ia faia se mea i le taimi o le faapaiaga o le Malumalu o Katelani e fesoasoani e faamalosia ai i latou. Valaaulia se tagata aoga e faitau leotele le Mataupu Faavae ma Feagaiga 109:47–49. Fai atu i le vasega e mulimuli i le faitauga, ma vaavaai mo le mea e tasi e mafai ona tatou faia e fesoasoani ai i isi i taimi o faigata.

• I le faapaiaga o le Malumalu o Katelani, o le a le mea na faia e le Perofeta mo le Au Paia i Misuri? (Sa ia tatalo mo i latou.)

Valaaulia se tagata aoga e fai ma se tusiupu i le laupapa. Fai atu i le vasega e fautua mai se upumoni e mafai ona tatou aoao mai i upu o le tatalo a le Perofeta i nei fuaiupu. A o tali mai tagata o le vasega, e mafai ona tusi e le tusiupu le upumoni lenei: O a tatou tatalo e mafai ona aumaia ai le fesoasoani ma le malosi ia i latou e manaomia le fesoasoani.

• O anafea na e lagonaina pe vaaia ai le mana o le tatalo o fesoasoani i se tasi na manaomia le fesoasoani? (Atonu e te manao e faasino atu, o ni tatalo faapena o nisi taimi e taliina e ala i musumusuga tatou te maua ia fesoasoani atu i isi.)

Valaaulia se tagata aoga e faitau leotele le Mataupu Faavae ma Feagaiga 109:50. Fai atu i le vasega e mulimuli i le faitauga, ma vaavaai mo isi tagata na tatalo ai le Perofeta mo i latou.

• O ai isi na tatalo ai le Perofeta mo i latou?

• Aisea e te manatu e tatau ai ona tatou tatalo mo o tatou fili? (Ina ia fesoasoani i tagata aoga e tali lenei fesili, atonu e te manao e fautua atu latou te faitauina le Mataupu Faavae ma Feagaiga 109:43 ma le 3 Nifae 12:43–45.)

• O le a se mea e mafai ona tatou aoao mai i le Mataupu Faavae ma Feagaiga 109:50 e uiga i le auala e mafai ai e a tatou tatalo ona uunaia isi? (A uma ona tali mai tagata o le vasega, fai atu i le tusiupu e tusi le mataupu faavae lenei i luga o le laupapa: O a tatou tatalo e mafai ona fesoasoani e uunaia tagata ia salamo. Ona valaaulia lea o le tusiupu e nofo i lalo.)

Fai atu i tagata aoga e mafaufau loloto i le fesili lenei:

• Ae faapefea pe afai e filifili tagata o loo tatou tatalo ai e le salamo?

Valaaulia se tagata aoga e faitau leotele le Mataupu Faavae ma Feagaiga 109:51–53. Fai atu i le vasega e mulimuli i le faitauga, ma vaavaai mo fasifuaitau o loo faailoa mai ai le finagalo o le Alii ma le faitalia o isi. Valaaulia tagata aoga e lipoti mai mea ua latou mauaina. (A o lei faitauina e tagata aoga nei fuaiupu, atonu e te manao e faamalamalama atu, pe a aofia i mau ni faamatalaga e uiga i le Alii e faaalia Lona aao, latou te faasino atu ia te Ia o loo faaalia Lona mana.)

Valaaulia tagata aoga e toe faitau filemu le Mataupu Faavae ma Feagaiga 109:53, ma vaavaai mo mea o le a faia e le Tama Faalelagi mo i latou o e salamo. (Atonu e manaomia ona e faamalamalama atu, o le toasa o le Atua e masani ona faaalia i le faasalaga po o puapuaga tatou te oo i ai ona o a tatou agasala, e tusa ai ma Lana faamasinoga tonu. O le fuaitau “pe a e silasila mai i luga o fofoga o lē ua e Faauuina” e faatatau i le naunautai o le Tama Faalelagi e foai mai le alofa mutimutivale ona o le taulaga togiola a Lona Alo o Iesu Keriso.)

• Aisea o le a liliu ese ai e le Tama Faalelagi Lona toasa mai ia i latou o e salamo? (E mafai ona faaaoga e tagata o le vasega ni faaupuga eseese, ae fesoasoani ia i latou e faailoa mai le mataupu faavae lenei: Ona o le taulaga togiola a Iesu Keriso, o le a liliu ese ai le toasa o le Tama Faalelagi mai ia i latou o e salamo. Tusi lenei mataupu faavae i luga o le laupapa.)

Vaai faalemafaufau

Mai lea taimi i lea taimi, valaaulia tagata aoga e vaai faalemafaufau i lea mea o loo tupu i se tala faaletusi paia. E mafai ona fesoasoani lenei mea e faamanino atili ma moni le mau fuaitau mo i latou.

Ina ia fesoasoani i tagata aoga e vaai faalemafaufau i le faamatalaga i le fuaiupu e 53, valaaulia i latou e faia mea nei:

Vaai faalemafaufau i se tasi sa i ai i le vaega faatupu vevesi e tetee i Mamona o loo tu i luma o le Atua ina ia faamasinoina. Ia vaai faalemafaufau, o tausaga a’o lei maliu lenei tagata, sa salamo moni ai o ia ma talosagaina ia faamagaloina ma togiolaina e ala i le Togiola a Iesu Keriso. Ona sa puapuagatia Iesu Keriso mo agasala a lenei tagata, o le a liliu ese ai e le Tama Faalelagi le faasalaga ae ofo mai le alofa mutimutivale i le tagata agasala ua salamo.

Uunaia tagata aoga e atiina ae lenei uiga faaalia agai i e ua faatiga ia i latou, pe ua mafua ai ona latou puapuagatia. Fai atu i tagata aoga e vaai faalemafaufau i le tutu salamo o na ituaiga tagata i luma o le Tama Faalelagi. Valaaulia tagata aoga e tatalo, e pei ona sa faia e Iosefa Samita, mo tagata o e tausuai ia i latou pe agasala faasaga ia te i latou.

Mataupu Faavae ma Feagaiga 109:54-67

Ua tatalo le Perofeta ina ia liliu tagata i le lalolagi atoa i le atoatoaga o le talalelei

Fai atu i tagata aoga e sii o latou lima pe afai na latou faia soo se tasi o mea nei:

• Tatalo mo faifeautalai faamisiona

• Tatalo mo tagata sailiili i le Ekalesia

• Tatalo mo tagata e lei faalogo i le talalelei

• O a ni auala e te manatu e fesoasoani ai au tatalo i nei tagata?

Valaaulia se tagata aoga e faitau leotele le Mataupu Faavae ma Feagaiga 109:54-58. Fai atu i le afa o le vasega e vaavaai mo tagata na tatalo ai Iosefa Samita. Fai atu i le isi afa e vaavaai mo mea na talosagaina e le Perofeta le Alii e fai mo na tagata. Ona fai atu lea i vaega taitasi e lipoti mai mea na latou maua.

• O le a le mea na tatalo le Perofeta o le a tupu ia i latou uma o e faalogo i le molimau a auauna a le Alii?

• O a mataupu faavae o loo outou vaaia i nei fuaiupu? (E mafai ona faailoa mai e tagata aoga nisi o upumoni, e aofia ai mea nei: O le tapuai i le malumalu e saunia ai i tatou e molimau atu i isi. Afai tatou te tatalo mo isi, e mafai ona faamaluluina o latou loto e talia auauna a le Alii. (A’o faailoa mai e tagata aoga ia mataupu faavae, atonu e te manao e lisi i luga o le laupapa.)

Tuu atu i tagata aoga se avanoa e molimau ai e uiga i mataupu faavae ua latou faailoaina mai. Atonu foi e te manao e faasoa atu lau molimau ma se aafiaga, e faatatau i le lesona.

Otooto le Mataupu Faavae ma Feagaiga 109:59–67 i le faamatala atu e faapea, na tatalo Iosefa Samita ina ia faatuina e le Alii nisi siteki o Siona ina ia mafai ona faapotopoto atu i ai tagata i le lalolagi atoa. Sa faapitoa ona ia tatalo mo e e tupuga mai i le perofeta o Iakopo (Isaraelu) ina ia iloa le upumoni ma ia liliu mai i le atoatoaga o le talalelei. O se auala taua lenei e faapotopotoina mai ai Isaraelu i aso e gata ai.

Mataupu Faavae ma Feagaiga 109:68-80

Ua tatalo le perofeta mo le Ekalesia ma talosagaina le Alii e talia le faapaiaga o le malumalu

Valaaulia tagata aoga e sailiili filemu i le Mataupu Faavae ma Feagaiga 109:68–69, 71–73, 78–80. Atonu e te manao e tusi numera o fuaiupu nei i luga o le laupapa ina ia mafai ona tagai atu i ai tagata aoga. Fai atu i tagata aoga e vaavaai mo ni talosaga faaopoopo na faia e le Perofeta i le tatalo o le faapaiaga. Mafaufau e fautua atu latou te faailogaina mea latou te maua.

• O ai ma o le a le mea na tatalo ai Iosefa?

• O a ni faamanuiaga e mafai ona oo mai e ala i le faaaofia ai o na ituaiga talosaga i a tatou tatalo?

Valaaulia tagata aoga e usu faatasi le pese “O Le Agaga o le Atua” (Viiga, nu. 2). Tatai atu mafaufau o tagata aoga i le faamalamalamaga o loo i lalo o anotusi o le viiga, lea e fai mai, sa lagiina le viiga i le faapaiaga o le Malumalu o Katelani. (Sa lagiina e se aufaipese i le taimi tonu na uma ai le tatalo o le faapaiaga.) O loo faaauau pea ona lagiina i faapaiaga o malumalu i le taimi nei.

Valaaulia se tagata aoga e faitau le otootoga lenei o le mea na tupu i le malumalu i le afiafi o le aso 27 o Mati, 1836, ina ua mae‘a le faapaiaga o le malumalu:

I lena afiafi, sa fono ai korama o le perisitua i le malumalu. Na saunoa mai Iosefa Samita e faapea sa ia “tuuina atu ia te i latou faatonuga e faatatau i le agaga o valoaga, ma valaau atu i le faapotopotoga e tautala atu. … Sa tulai Uso Siaosi A. Samita ma amata ona vavalo, ina ua faalogoina se pao sa pei o le gogolo o se savili malosi, lea na faatumulia ai le Malumalu, ma sa tutu faatasi uma i luga le faapotopotoga, ona o le faagaeetia e se mana e le vaaia; sa amata ona tautatala le toatele i gagana eseese ma vavalo; o isi na vaai i ni faaaliga vaaia mamalu; ae sa ou vaaia le Malumalu na faatumulia i agelu, o lea mea moni sa ou folafolaina atu i le faapotopotoga. Sa taufetuli mai tagata o le pitonuu (i le faalogoina o se pao uigaese mai totonu, ma le vaaia o se malamalama susulu na pei o se afi faaniutu na faamalumalu i luga o le Malumalu), ma sa maofa i le mea sa tupu” (i le History of the Church, 2:428). O nisi tagata sa vaai i agelu i luga a’e o le malumalu ma faalogoina pesega (tagai i le Church History in the Fulness of Times Student Manual, 2nd ed. [Church Educational System manual, 2003], 167).

Faaiu i le molimau atu e uiga i faamanuiaga e mafai ona tatou maua pe a tatou auai ma le agavaa i le malumalu.

Manatu Faaopoopo mo le Aoaoina Atu

Mataupu Faavae ma Feagaiga 109:54–58. O lo tatou tiutetauave e fesoasoani e “faapotopoto e amiotonu”

Ina ia fesoasoani i tagata aoga ia lagonaina lo latou tiutetauave o le faasoa atu o le talalelei, ia faailoa atu e tatau ona tatou faia ni mea e sili atu nai lo na o le tatalo mo faifeautalai ma tagata latou te aoaoina. Faitau le saunoaga lenei a Elder David A. Bednar o le Korama a Aposetolo e Toasefululua. Valaaulia tagata aoga e faalogo mo le uiga o le “ole atu ma le faatuatua.”

Elder David A. Bednar

“Atonu tatou te tatalo mo le saogalemu ma le manuia o faifeautalai faamisiona i le lalolagi atoa. Ma o se elemene masani i le tele o a tatou tatalo o se talosaga lea ia taitai faifeautalai i tagata ma aiga ua saunia mo le mauaina o le savali o le Toefuataiga. Ae o le mea moni lava, o lo’u tiutetauave ma lou tiutetauave le sailia o tagata mo faifeautalai e aoao. O faifeautalai o faiaoga i le taimi atoa; o oe ma au o le au saili i le taimi atoa. O oe foi ma au i le avea ai o ni faifeautalai i le olaga atoa, tatou te le tatalo e fai e faifeautalai faamisiona le galuega a tatou!

“Afai e te tatalo ma ou tatalo ma ole atu ma le faatuatua, e faapei ona faia e Iosefa Samita—afai tatou te tatalo ma le faamoemoe e galulue a e le na o le faailoa atu o o tatou manao—ona agai ai lea i luma o le galuega o le folafola atu o le talalelei i se ala ofoofogia. O lena tatalo o le faatuatua e mafai ona aofia ai nisi o elemene nei:

“• Faafetai atu i le Tama Faalelagi mo aoaoga faavae ma sauniga o le talalelei toefuataiina a Iesu Keriso, lea ua aumaia ai le faamoemoe ma le fiafia i o tatou olaga.

“• Ole atu mo le lototele ma le toa e tatala ai o tatou gutu ma faasoa atu le talalelei i o tatou aiga ma uo.

“• Ole atu ma le faatauanau i le Tama Faalelagi ina ia fesoasoani mai ia i tatou ina ia iloa tagata taitoatasi ma aiga o le a taliaina la tatou valaaulia ina ia aoaoina e faifeautalai i o tatou fale.

“• Tautino atu e faia la tatou vaega i le asō ma lenei vaiaso ma faatoga atu mo se fesoasoani e faatoilalo ai le atuatuvale, fefe, ma le faalotolotolua.

“• Saili mo le meaalofa o le iloatino—mo mata ia vaai ma taliga e faalogo ai i avanoa faafaifeautalai pe a tulai mai.

“• Tatalo faatauanau mo le malosi e faatino ai pe a tatou iloa ua tatau ai” (“Ole Atu ma le Faatuatua,” Ensign po o le Liahona, Me 2008, 95–96).

• E faavae i le fautuaga a Elder Bednar, o le a se mea e mafai ona e faia e fesoasoani ai e “faapotopoto e amiotonu”? (MF&F 109:58).