Lesona 64

Mataupu Faavae ma Feagaiga 58:34–65

Folasaga

I le tali mai i le fesili a toeaina pe faapefea ona latou faagasolo e fausia le aai o Siona, na tuuina mai ai e le Alii le faaaliga ua faamaumauina i le Mataupu Faavae ma Feagaiga 58 i le aso 1 o Aokuso, 1831. O fuaiupu e 34–65 o loo i ai faatonuga o le ola ai i le tulafono o le faapaiaga mo i latou o e na siitia atu i Siona. I nei fuaiupu, na aoao mai ai foi e le Alii ia mataupu faavae o le salamo, ma poloaiina toeaina e talai atu le talalelei, ma fautuaina i latou e uiga i auala e fausia ai Siona.

Fautuaga mo le Aoaoina Atu

I le lesona ua mavae, sa valaaulia ai tagata o le vasega e faaaoga o latou faitalia e faia ai se mea lelei a o lei amataina le vasega i le aso lenei. Tulitatao lenei valaaulia e ala i le fai atu i tagata o le vasega e faasoa mai o latou aafiaga o le filifili e “auai ma le naunautai” (MF&F 58:27) i le faia o mea lelei.

Mataupu Faavae ma Feagaiga 58:34-43

Ua tuuina mai e le Alii faatonuga e faatatau ia Siona ma aoao mai mataupu faavae o le salamo

A o lei amataina le vasega, tusi le fesili lenei i luga o le laupapa: O le a le uiga o le ia salamo?

Fai atu i ni nai tagata o le vasega e tali mai i le fesili lenei. Ona tusi lea o fesili nei i luga o le laupapa: E mafai faapefea ona ou iloa ua ou salamo atoatoa? E mafai faapefea ona ou iloa pe ua faamagalo a’u e le Alii i a’u agasala?

Valaaulia tagata o le vasega e tusi nei fesili i a latou api o le vasega po o api talaaga mo le suesueina o tusitusiga paia. Fai atu ia i latou e faaalu ni nai minute e tusi ai tali i fesili taitasi. A maea le taimi, faailoa atu ia te i latou o le a latou maua se avanoa e toe siaki ai a latou tali i se taimi mulimuli mai o le lesona.

Otooto le Mataupu Faavae ma Feagaiga 58:34–37 i le faamatala atu e faapea, o le toatele o toeaina o e na malaga atu i Misuri ma o le a nonofo ai iina, sa mananao e iloa mea na manaomia ona latou faia e fuafua, faatulaga, ma fausia ai le aai o Siona. Na faatonuina e le Alii i latou na siitia atu i Misuri e tuuina atu a latou tupe ma meatotino i le faamoemoe o le fausiaina o Siona. Sa faatonuina Matini Harisi ina ia fai ma se faataitaiga o le tuuina atu o tupe i le epikopo. Na ia foai atu se tupe tele e fesoasoani ai ia Epikopo Eteuati Paterika e faatau mai fanua mo le Ekalesia.

Tusi igoa nei i luga o le laupapa: Matini Harisi, William W. Phelps, ma Ziba Peterson. Valaaulia se tagata o le vasega e faitau leotele le Mataupu Faavae ma Feagaiga 58:38–41, 60. Fai atu i le vasega e mulimuli i le faitauga, ma vaavaai mo le fautuaga na tuuina mai e le Alii ia Matini Harisi, William W. Phelps, ma Ziba Peterson a o latou sauni e fausia Siona.

A o tali mai tagata o le vasega i fesili nei, tusi a latou tali i lalo o le igoa talafeagai i luga o le laupapa.

• O a agasala na fetalai mai le Alii sa tausalaina ai Matini Harisi? O le a le mea na fetalai mai le Alii ia te ia e fai?

• O a agasala na fetalai mai le Alii sa tausalaina ai Viliamu W. Phelps? O le a le mea na fetalai mai le Alii ia te ia e fai? (Atonu e te manao e faamalamalama atu o le fuaitau “saili ia matua tulaga ese” [I lefuaiupu e 41] e le o lona uiga o le tatou faia o le mea sili po o le taumafai ia alualu i luma. Ae, o lenei fuaitau e faatatau i se manaoga amioletonu, faamaualuga, ia foliga ia sili atu po o le ia taua atu nai lo isi tagata.)

• O le a le mea na taumafai Ziba Peterson e fai i ana agasala?

Ia faailoa atu, o agasala a nei alii, sa foliga mai e taofia ai i latou mai le fesoasoani atu e fausia Siona.

• O a nisi o auala e ono faatapulaa ai e agasala o tatou gafatia e auauna atu i le Alii?

Valaaulia se tagata aoga e faitau leotele le Mataupu Faavae ma Feagaiga 58:42. Fai atu i le vasega e mulimuli i le faitauga, ma vaavaai mo le aoaoga na aoao mai e le Alii e uiga i le salamo.

• E tusa ai ma lenei fuaiupu, o le a le folafolaga a le Alii ia i tatou pe afai tatou te salamo i a tatou agasala? (E tatau ona faailoa mai e tagata aoga le mataupu faavae lenei: Afai tatou te salamo i a tatou agasala, o le a faamagalo i tatou e le Alii ma le toe manatuaina a tatou agasala. Tusi lenei mataupu faavae i luga o le laupapa. Atonu e te manao e fautua atu i tagata aoga e faailoga upu o loo aoao mai ai lenei mataupu faavae i le fuaiupu e 42.)

• O le fea o a tatou agasala e faatatau i ai lenei folafolaga? (O agasala uma lava.)

Valaaulia se tagata aoga e faitau leotele le saunoaga lenei mai ia Peresitene Boyd K. Packer o le Korama a Aposetolo e Toasefululua. Fai atu i le vasega e faalogologo mo upu po o fuaitau e faatatau i le mataupu faavae ua tusiaina i luga o le laupapa.

Po o a lava a tatou soligatulafono, po o le a foi se tele e faamanualia ai e a tatou amioga isi tagata, o lena tausalaina e mafai lava ona tafiesea atoa. Ia te au, masalo o le fasifuaitau aupito sili ona matagofie i tusitusiga paia o le mau lea ina ua fetalai le Alii, ‘Faauta, o ia o lē ua salamo i ana agasala, o ia lava lea ua faamagaloina, ma o A’u, o le Alii, e lē toe manatuaina lava i latou’ [MF&F 58:42].

“O le folafolaga lena o le talalelei a Iesu Keriso ma le Togiola” (O Le Togiola,” Ensign po o le Liahona, Nov. 2012, 77).

Toe faasino atu tagata o le vasega i fesili o loo tusi i luga o le laupapa.

• E faapefea ona fesoasoani le folafolaga a le Alii i le fuaiupu e 42 e tali le fesili lona tolu: E mafai faapefea ona ou iloa ua faamagalo a’u e le Alii i a’u agasala? (O le folafolaga a le Alii e fesoasoani tatou te iloa ai, na te tuuina mai ia i tatou le faamagaloga pe afai tatou te salamo atoatoa.)

• E faaopoopo atu i le iloaina ua folafola mai e le Alii e faamagalo i tatou pe a tatou salamo atoatoa, o le a se isi auala e mafai ona tatou iloa ai ua faamagaloina i tatou?

Valaaulia se tagata o le vasega e faitau leotele le saunoaga lenei a Peresitene Dieter F. Uchtdorf o le Au Peresitene Sili. Fai atu i tagata o le vasega e faalogologo mo auala e mafai ona latou iloa ai ua faamagaloina i latou e le Alii i a latou agasala.

“O le taimi lava tatou te salamo moni ai, o le a aveese e Keriso le avega o le tausalaga ona o a tatou agasala. E mafai ona tatou iloa mo i tatou lava ua faamagaloina i tatou ma ua faamamaina. O le a faamaonia mai ia i tatou e le Agaga Paia lena mea; O Ia o le Faapaiaina. E leai se isi molimau o le faamagaloga e mafai ona sili atu” (“Vaega Tonu o le Toe Foi Saogalemu,” Ensign po o le Liahona, Me 2007, 101).

• Na faapefea ona faamanuiaina lou olaga i le iloaina e mafai ona faamagaloina oe i au agasala uma?

Faamalamalama atu i tagata o le vasega, ua manatu sese nisi o tagata e faapea, afai e mafai lava ona latou manatua a latou agasala o lona uiga latou te le’i salamoina atoatoa. Valaaulia se tagata o le vasega e faitau leotele le faamatalaga lenei mai ia Peresitene Dieter F. Uchtdorf. Fai atu i le vasega e faalogologo pe aisea tatou te manatua ai a tatou agasala ae ua uma ona tatou salamoina.

“O le a taumafai Satani e faatalitonu i tatou e le faamagaloina a tatou agasala aua e mafai ona tatou manatuaina. O Satani o le pepelo; e taumafai o ia e faapuaoa la tatou vaaiga ma taitai ese mai ai i tatou mai le ala o le salamo ma le faamagaloga. E lei folafola mai le Atua faapea, o le a tatou le manatuaina a tatou agasala. O le manatuaina o le a fesoasoani ia i tatou e aloese mai ai i le toe faia o mea sese lava na. Peitai, afai tatou te tumau i le moni ma le faamaoni, o le a oo ina manifinifi le manatua o a tatou agasala. O le a avea lenei mea ma vaega o le faagasologa o le faamalologa ma le faapaiaga o loo manaomia” (“Vaega Tonu o le Toe Foi Saogalemu,” 101).

Faamanino atu o le folafolaga o loo tusia i luga o le laupapa e i ai ona tuutuuga. E pau le auala e mafai ai ona tatou maua le faamagaloga a le Alii o le, pe afai lea tatou te faia mea uma e mafai e salamo atoatoa ai i a tatou agasala.

• O le a le uiga ia salamo? (Atonu e te manao e valaaulia tagata o le vasega e toe vaai i tali na latou tusia i fesili o loo i luga o le laupapa.)

A uma ona tali mai tagata o le vasega, valaaulia se tagata o le vasega e faitau leotele le faamatalaga lenei mai le tamaitusi o le Mo le Malosi o le Autalavou . Fai atu i le vasega e faalogologo mo mea faaopoopo e mafai ona latou iloa e uiga i le ia salamo.

“O le salamo e sili atu nai lo le na o le faailoaina o mea sese. O se suiga o le mafaufau ma le loto. E aofia ai le fulitua i le agasala ma liliu atu i le Atua mo le faamagaloga. E faaosofia e ala i le alofa mo le Atua ma le naunau faamaoni e usitai i Ana poloaiga” (Mo le Malosi o le Autalavou [tamaitusi, 2011], 28).

Faamalamalama atu faapea, o le salamo moni e aofia ai ni tulaga e manaomia ona fai. O le lua o nei tulaga manaomia o loo ta‘ua i le Mataupu Faavae ma Feagaiga 58:43. Valaaulia se tagata o le vasega e faitau leotele lena fuaiupu. Fai atu i le vasega e mulimuli i le faitauga, ma vaavaai mo mea e lua e tatau ona tatou faia e salamo atoatoa ai i a tatou agasala.

• E tusa ai ma le fuaiupu e 43, o a mea e lua e tatau ona tatou faia e salamo atoatoa ai ia tatou agasala? (E tatau ona faailoa mai e tagata o le vasega le mataupu faavae lenei: Ina ia salamo, e tatau ona ta‘uta’u atu ma lafoai a tatou agasala. Tusi le mataupu faavae lenei i le laupapa.)

• E faapefea ona fesoasoani lenei upumoni tatou te taliina ai le fesili E mafai faapefea ona ou iloa pe ua ou salamo atoatoa? (Fesoasoani i tagata o le vasega ia malamalama o le ta‘uta’u atu ma le lafoaia o agasala e taua i le salamo atoatoa.)

• O le a le uiga o le ta’uta’u atu o a tatou agasala?

Ina ia fesoasoani i tagata aoga ia malamalama lelei i le uiga o le ta’uta’u atu o a tatou agasala, valaaulia se tagata aoga e faitau leotele le saunoaga lenei mai ia Elder D. Todd Christofferson o le Korama a Aposetolo e Toasefululua:

“O le ta’uta’u atu ma le lafoai o ni manatu faavae mamana. E matua tele atu nai lo le na o se fai atu faasamasamanoa ‘ou te ioe i ai; ou te faamalie atu.’ O le ta‘uta’u atu o se faailoaga loloto, o nisi taimi e tiga, o mea sese ma solitulafono i le Atua ma le tagata” (“O Le Meaalofa Paia o le Salamo,” Ensign po o le Liahona, Nov. 2011, 40).

• O a auala e fesoasoani ai le ta’uta’u atu o a tatou agasala, tatou te o ese ai mai le agasala ma liliu atu i le Atua mo le faamagaloga?

O se vaega o lenei talanoaga, atonu e tuufesili ai tagata aoga po o a agasala e ta’uta’u atu ma ia te ai. Faamalamalama atu faapea, e tatau ona tatou ta’uta’u atu a tatou agasala uma i le Tama Faalelagi. O agasala matuia, e pei o le agasala o feusuaiga po o le faaaogaina o ponokalafi, e tatau foi ona ta’uta’u atu i le epikopo po o le peresitene o le paranesi.

Faasino atu tagata o le vasega i le upumoni mulimuli sa e tusia i le laupapa.

• O le a le uiga o le lafoai o a tatou agasala? (O le liliuese atoa mai a tatou agasala ma ia le toe faia.)

Molimau atu i le Togiola a le Faaola ma mataupu faavae o le salamo ma le faamagaloga sa outou talanoaina. Valaaulia tagata o le vasega e mafaufau loloto pe o i ai ni agasala e manaomia ona latou salamo ai, ma uunaia i latou e salamo e ala i le faatinoina o upumoni ua latou aoaoina.

Mataupu Faavae ma Feagaiga 58:44–65

Ua poloaiina e le Alii ia toeaina e talai atu le talalelei ma fautuaina i latou e faatatau i le ala e fausia ai Siona

Otooto le Mataupu Faavae ma Feagaiga 58:49–62 i le faamatala atu, na ta’u mai e le Alii i toeaina o e sa tatau ona nonofo i Misuri, e tatau ona latou faatau mai ni fanua ma sauniuni mo le faapotopoto mai o le Au Paia i Misuri.

Valaaulia se tagata o le vasega e faitau leotele le Mataupu Faavae ma Feagaiga 58:46–47, 63–65. Fai atu i le vasega e vaavaai mo le fautuaga na tuuina mai e le Alii i toeaina o e na tatau ona toe foi atu i Ohaio.

• E tusa ai ma fuaiupu 46–47, o le a le mea na tatau ona fai e toeaina a o latou toe foi atu i Ohaio?

• E tusa ai ma le fuaiupu e 64, o ai e tatau ona talai atu i ai le talalelei? (E mafai ona faaaoga e tagata o le vasega ni upu eseese, ae o a latou tali e tatau ona atagia mai ai le upumoni lenei: E ao ina talai atu le talalelei i tagata uma. Atonu e te manao e fautua atu i tagata o le vasega e faailoga upu o loo aoao mai ai lenei upumoni i le fuaiupu e 64.)

Uunaia tagata o le vasega e mulimuli i uunaiga a le Agaga e faasoa atu upumoni o le talalelei ia i latou o siomia i latou.

Tala ma Faamatalaga o Talaaga

Mataupu Faavae ma Feagaiga 58:39. “Salamo”

Na aoao mai e Elder D. Todd Christofferson o le Korama a Aposetolo e Toasefululua, o le salamo e sili atu nai lo na o se lisi o mea e fai:

“O ni taumafaiga e fatu se lisi o ni laasaga patino o le salamo atonu e aoga i isi, ae e ono taitai atu ai foi i se metotia le mafaufauina o le salamo e aunoa ma se lagona moni po o se suiga. O le salamo moni e le o se mea papa’u. Na tuuina mai e le Alii ni mea autu se lua e manaomia: ‘O le mea lenei e mafai ai ona outou iloa pe afai ua salamo se tagata i ana agasala—faauta, e ta’uta’u atu e ia i latou ma lafoai i ai’ (MF&F 58:43)” (“O Le Meaalofa Paia o le Salamo,” Ensign po o le Liahona, Nov. 2011, 40).

Na faamalamalama mai e Elder Russell M. Nelson o le Korama a Aposetolo e Toasefululua, le uiga o le ia salamo:

“O le aoaoga faavae o le salamo e lautele atu nai lo le faauigaga a se lolomifefiloi. Ina ua fetalai Iesu “salamo,” sa tusi faamaumau e Ona soo lena poloaiga i le gagana Eleni faatasi ai ma le veape metanoeo. O lenei upu mamana e tulaga ese lona taua. I le upu lenei, o le fasi upu e tuu i luma o le meta o lona uiga o le ‘suia.’ O le fasi upu e tuu i tua e faatatau lea i ni upu Eleni taua se fa: nous, lo lona uiga ‘o le mafaufau’; gnosis, o lona uiga o le ‘iloa’; pneuma, o lona uiga o le ‘agaga’; ma le pnoe, o lona uiga o le ‘manava.’

“O lea la, ina ua fetalai Iesu ‘salamo’, ua Ia poloaiina i tatou ina ia sui—ia sui o tatou mafaufau, iloa, ma le agaga, e oo i la tatou manava. Na faamatalaina e se perofeta o se suiga faapea i le manava a se tasi, o le manava lea ma le loto faafetai ia te Ia o le na tuuina atu le manava. Fai mai le Tupu o Peniamina, ‘Afai tou te auauna atu i Le na faia outou … ma o loo faasaoina foi outou i lea aso ma lea aso, ua tuuina mai foi ia te outou le manava … i lea itula ma lea itula—ou te fai atu, afai tou te auauna atu ia te ia ma o outou agaga atoa, e fai pea outou ma auauna le aoga.’ [Mosaea 2:21.]

“Ioe, ua poloai mai le Alii ia i tatou ina ia salamo, ia suia o tatou ala, ia o mai ia te Ia, ma ia avea atili e faapei o Ia. [Tagai i le 3 Nifae 27:21, 27.] O lenei mea e matuai moomia ai se suiga atoa” (“Salamo ma le Liuaina,” Ensign po o le Liahona, Me 2007, 103).

Mataupu Faavae ma Feagaiga 58:42. “E lē toe manatuaina lava i latou”

Sa faasoa mai e Elder F. Burton Howard o le Fitugafulu, se mea na tupu ia te ia lea sa ia aoaoina, ina ua uma ona salamo, e le toe manatuaina moni e le Alii a tatou agasala:

“Toe tasi le tala mulimuli—sa tupu foi a’o avea a’u ma epikopo. I se tasi po, a o ou moe gapepe lava, na tatagi ai le logo o le faitotoa. Sa ou tautevateva atu e tali ma ou iloa ai o se tagata talavou o la’u korama a ositaulaga sa i le faitotoa. Sa ou iloaina lelei o ia, iloa lelei lea sa matou o ai e tafafao ma ia, e tatalo faatasi ma ia, ma taaalo ma ia, ma aoaoina o ia. Sa ou iloa lelei foi o ia e pei ona iloa e se epikopo lelei soo se ositaulaga toaga e sefuluvalu tausaga le matua, lea sa lelei ai ia te a’u ona ou fesili atu po o a ana mea o fai i luma o lo’u faitotoa i le tuneva o le po.

“Sa ia fai mai, ‘e tatau ona ou talanoa atu ia te oe, epikopo. Na faatoa uma lava ona ou faia se mea matuia, ma e le mafai ona ou alu i le fale.’

“Sa sa’o o ia. Sa matuia. Sa ou valaauliaina o ia i totonu, ma ma talanoa. Sa tautala o ia ae ou faalogo, ona ou tautala lea ae faalogo o ia, seia oo i le tafa o ata. Sa tele ni ana fesili sa i ai. Sa ia solia se agasala leaga. Sa ia fia iloa pe sa i ai se faamoemoe. Sa ia fia iloa pe faapefea ona salamo. Sa ia fia iloa pe o le salamo na aofia ai le ta’u atu i ona matua. Sa ia fia iloa pe sa i ai soo se avanoa lava e alu ai i se misiona. Sa ia fia iloa le tele o isi mea.

“Sa le’i ia te au ia tali uma, ae sa ou ta’u atu ia te ia sa i ai le faamoemoe. Sa ou fai atu ia te ia, o le ala e toe foi mai ai e faigata, ae e mafai. Sa ou faamatala atu i ai mea na ou iloa e uiga i le faagasologa o le salamo ma fesoasoani ia te ia ia iloa le mea e ao ona ia faia. Sa ou fai atu ia te ia, afai e manao moni lava e alu i se misiona, o lena faaiuga e pau le taimi e mafai ona faia ai o le lumanai pe a uma ona ia salamo. Ona ou fai atu lea i ai e alu i le fale, ma sa alu loa.

“Sa ia faia se faaleleiga ma ona matua. Sa ia talosagaina se faamagaloga mai ia i latou sa ia faia i ai le mea sese. Sa ia tuu le agasala ma uo leaga i ona tua ae fai mea uma na ia mafaia e salamo ai.

“O se tausaga pe a mulimuli ane, e toalima alii talavou mai lena korama na o ni misiona. O ia o se tasi o i latou na. Sa ou latalata atu ia te i latou uma. Sa ou auai ia latou faamavaega taitasi. Sa latou auauna uma atu i ni misiona faamamaluina. I se taimi puupuu talu ona foi mai i le fale, sa latou faaipoipo uma ai i le malumalu. Sa ma auai atu ma lo’u toalua i sauniga taitasi. E oo mai i le aso, e mafai ona ou aumai se fasipepa ma tusi ai o latou igoa ma igoa o o latou faletua, ma nisi o a latou fanau. O le lelei lena o lo’u iloaina o i latou.

“Ae sei ou tau atua la se isi mea—o se mea sili ona lilo ma taua tele. Ou te le manatua le igoa o le alii talavou na sau i lo’u fale i le tuneva o le po. Ou te iloa o ia o se tasi o le toalua, ae ou te le manatua po o ai o i latou ia.

“Sa i ai se taimi sa masani ona ou popole ai i lena mea. Sa ou mafaufau atonu ua faaletonu lo’u mafaufau. Sa ou taumafai ma le iloa lelei e manatua po o ai na i ai le faafitauli, ae sa le mafai.

“Na iu lava ina faamaloloina au, ma sa ou tuuina ese le mea atoa na tupu mai lo‘u mafaufau. I se savalivaliga i le leva o le afiafi i ni tausaga mulimuli ane, sa ou oo atu ai i le uarota lea sa avea ai a’u ma epikopo. O le filemu o ataata na toe foi mai ai le tele o mea e manatua. Sa faasolosolo lava o’u mafaufauga loloto ma ou iloa ane ai, sa ou savali atu i luma o se fale lea sa nofo ai se tasi o a’u ositaulaga i tausaga ua mavae. Na faafuasei ona oo mai le tala e uiga i le alii talavou lea na ou ta’ua i lo’u mafaufau, ma sa ou toe taumafai foi e manatua po o ai o le tagata o le toalima lea. Pe sa nofo i le fale lena? O o’u manatunatuga ia. Aisea ua ou le manatuaina ai?

“A o faaauau ona ou alu, sa i ai se mea na tupu—o se mea e faigata ona faamatala, ae moni ia te a’u. Sa pei ou te faalogoina se leo na fai mai: ‘E te le iloa, lo’u atalii e? Ua galo ia te au lena mea. Aisea la e tatau ai ona e manatua?’

“Sa matuai o’u ma lava. Sa leai se tali faamalieina i le fesili. Ou te lei toe mafaufau lava i ai. Ma sa ou iloaina moni lava nai lo se isi lava taimi na ou iloaina ai, e fiafia le Alii pe a toe foi mai lana fanau ia te ia.

“O i latou uma o leoleo mamaoe ma mamoe uma o se, e tatau ona matauina le mea mulimuli lenei. E sa’o lava le Alii ina ua Ia fetalai mai, ‘o Ia o le ua salamo i ana agasala, o ia lava lea ua faamagaloina, ma o a’u, o le Alii, e lē toe manatuaina lava i latou (MF&F 58:42)’” (“Come Back to the Lord,” Ensign, Nov. 1986, 77–78).

Mataupu Faavae ma Feagaiga 58:43. “Taʼutaʼu atu [e ia] i latou”

Na faamalamalama mai e Elder Richard G. Scott o le Korama a Aposetolo e Toasefululua, mea e manaomia mo le ta’uta’u atu:

“Ua manaomia lava i taimi uma ona tautau atu au agasala i le Alii. Afai o ni agasala matuia, e pei o le [feusuaiga] ola le mama, e manaomia ona ta’uta’u atu i se epikopo po o se peresitene o le siteki. Faamolemole ia malamalama o le ta’uta’u e le o le salamo lea. O se laasaga taua peitai ae e le lava le na o ia. O le ta’uta’u atu o se vaega e ala i le ta’uina atu o mea sese laiti, o le a le fesoasoani ia te oe e faaleleia ai solitulafono matuia e le’i faailoaina atu. E taua i le faamagaloga o se naunau e faailoa uma atu i le Alii ma, pe a tatau ai, i Lana faamasino faaleperisitua ia mea uma sa e faia “(“Mauaina o le Faamagaloga,” Liahona, Iulai 1995, 86).

Na aoao mai Peresitene Spencer W. Kimball e uiga i le taua o le faamaoni ma le amiosa’o atoatoa pe a ta’uta’u atu a tatou agasala:

“E leai se tasi e mafai ona faamagaloina i soo se solitulafono seiloga e i ai le salamo, ma e le salamo se tasi seiloga ua ia faaalia atu uma lona loto ma ioeina ona faamoemoega ma vaivaiga e aunoa ma ni alofaga po o ni sisi’o” (Love versus Lust, Brigham Young University Speeches of the Year [Jan. 5, 1965], 10).

Mataupu Faavae ma Feagaiga 58:43. Aisea e tatau ai ona ta’uta’u atu nisi o agasala i se taitai perisitua ua faatagaina?

I le avea ai ma peresitene o le Perisitua Arona i le uarota, o se epikopo po o se peresitene o le paranesi ua i ai ki o le salamo mo tagata o lana uarota. E faaaoga e epikopo ma peresitene o paranesi ia ki e fuafua ai le tulaga o se tagata i totonu o le Ekalesia ma fesoasoani i lena tagata i le faagasologa o le salamo. Na tuuina mai e Elder Richard G. Scott o le Korama a Aposetolo e Toasefululua se malamalamaaga faaopoopo i le faamoemoega o le ta’uta’u atu o agasala matuia i taitai perisitua ua faatagaina:

“O soligatulafono matuia e pei o le ola le mama e manaomia ai le fesoasoani a se tasi o loo umia ki o le aia tatau, e pei o se epikopo po o le peresitene o le siteki, ina ia galueaina ma le filemu le faagasologa o vaega o le salamo, ma mautinoa ua maea ma atoatoa lona faataunuuina” (“O Le Mana o le Amiotonu,” Liahona, Ian. 1999, 81).

Mataupu Faavae ma Feagaiga 58:43. “Taʼutaʼu atu e ia i latou ma lafoai i ai”

Na aoao mai Elder Neil L. Andersen o le Korama a Aposetolo e Toasefululua, le uiga o le salamo i a tatou agasala:

“O le lafoaia o agasala e aofia ai le aua lava nei toe foi mai. O le lafoaia e manaomia ai le taimi. Ina ia fesoasoani ia i tatou, e faataga ai e le Alii i nisi o taimi ia toega o a tatou mea sese e nofo i o tatou manatua. O se vaega taua o lo tatou aoaoina faaletino.

“Pe a tatou ta’uta’u atu ma le faamaoni a tatou agasala, toefuatai mea e mafai ona tatou i le na faatiga i ai, ma lafoai a tatou agasala e ala i le tausia o poloaiga, ua tatou i ai i le faagasologa o le mauaina o le faamagaloga. E i ai le taimi, o le a tatou lagona ai le te’a atu o le mafatia o lo tatou faanoanoa, ma ave ‘ese le tausalaina mai o tatou lagona sala mai i o tatou loto’ [Alema 24:10] ae aumai le ‘filemu o le mafaufau.’ [Mosaea 4:3.]

“Mo i latou o e ua salamo faamaoni ae e foliga mai e le o mafai ona lagona le mapusaga: ia faaauau pea ona tausi poloaiga. Ou te folafola atu ia te outou, o le a oo mai lena mapusaga i le taimi lava a le Alii. O le faamalologa e manaomia ai foi le taimi” (“Salamo … Ina ia Ou Faamagaloina Outou,” Ensign po o le Liahona, Nov. 2009, 42].)