Lesona 151
O Le Taua a Iuta ma le Fasiotiga Tagata i Mountain Meadows
Folasaga
I le vaitaimi o le 1850, o le feteenai ma le le lelei o le fesootaiga i le va o le Au Paia o Aso e Gata Ai ma taitai o le malo o le Iunaite Setete, na oo atu ai i le Taua a Iuta i le 1857–58. Ia Setema 1857, na tulai mai ai foi feteenaiga i le va o nisi o le Au Paia o Aso e Gata Ai ma tagata malaga o se solo o taavale solofanua na ui atu i Iuta. O le faaosofia i le ita ma le mata’u, na fuafua ma faatino ai e nisi o le Au Paia o Aso e Gata Ai i Iuta le tagatavaleina o le tusa ma le 120 o tagata na faimalaga atu i Kalefonia. O lenei faatinoga limatete ua faaigoaina o le Fasiotiga Tagata i Mountain Meadows
Fautuaga mo le Aoaoina Atu
Ua tupu le feteenai i le va o le Au Paia o Aso e Gata Ai ma le malo o le Iunaite Setete
Faamalamalama atu, i le aso 24 o Iulai, 1857, sa faatasi ai Peresitene Polika Iaga ma se vaega o le Au Paia e faamanatu le 10 tausaga talu ona latou taunuu atu i le Vanu o Sate Leki, ae ona mauaina se faamaoniga o tala fou na oo muamua atu e faapea, o loo agai mai se vaegaau i le Aai o Sate Leki. I tausaga ua mavae, o feeseeseaiga ma le le lelei o le fesootaiga na iu ai ina faateteleina le feteenai i le va o le Au Paia o Aso e Gata Ai ma taitai o le malo o le Iunaite Setete. Sa mananao le Au Paia ia puleaina i latou e taitai e filifilia e i latou lava, ma na [latou] teena tagata na tofia e le malo o e sa le tutusa o latou tulaga faatauaina. O lena mea na oo ai ina manatu nisi o taitai o le malo, ua latou tetee e faasaga i le malo o le Iunaite Setete. E aunoa ma le faatagaga mai le Konakeresi, sa auina atu ai e le Peresitene o le Iunaite Setete o James Buchanan le tusa ma le 1,500 o fitafita i le Aai o Sate Leki e faamalosia tagata Iuta e talia ia taitai fou.
-
Ana faapea na avea oe ma se Au Paia o Aso e Gata Ai i le 1857 ma faalogo na o atu se autau toatele i le tou nuu, o a ni atugaluga atonu sa i ai ia te oe? (Atonu e fai mai tagata aoga, sa tutuliese ma le saua le Au Paia mai Ohaio, Misuri, ma Ilinoi; o le toatele na aveesea mea totino taua ma fanua; ae o nisi na fasiotia ai pe na maliliu ai foi i le taimi o nei sauaga. O tala e uiga i le agai atu o le vaegaau, na alia’e ai ni popolega ina ne’i toe tulai mai ni mea faapena i Iuta.)
Valaaulia se tagata aoga e faitau leotele le palakalafa lenei:
I lauga i le Au Paia, sa faamatalaina ai e Peresitene Iaga ma isi taitai o le Ekalesia ia fitafita na o atu o ni fili. O Peresitene Iaga, o lē ua leva ona talosagaina le Au Paia e faaputu kuranuma, ua faafouina ana faatonuga ina ia lava ni a latou mea e ai pe afai e manaomia ona latou sosola ese mai fitafita. I le avea ai ma kovana o le Teritori o Iuta, sa ia faatonuina ai foi le autau a le teritori e sauniuni e puipui le teritori.
Ua tulai mai feteenaiga i le va o nisi o le Au Paia o Aso e Gata Ai ma tagata malaga o se solo o taavale solofanua
Faaali atu se faafanua e tutusa ma le faafanua lenei, pe tusi se faafanua i luga o le laupapa. Valaaulia se tagata aoga e faitau leotele palakalafa nei e lua:
Na ui atu i Iuta se solo o taavale solofanua a tagata malaga na agai atu i sisifo mai Arkansas i Kalefonia, i le taimi tonu sa tapena ai le Au Paia o Aso e Gata Ai e puipui le teritori mai fitafita na o mai a le Iunaite Setete. Sa le fiafia nisi o tagata o le solo o taavale solofanua ona sa faigata ona latou faatauina mai ni kuranuma sa latou manaomiaina tele mai le Au Paia, o e na faatonuina e sefe a latou kuranuma. Sa faapea foi ona feteenai tagata malaga ma le Au Paia o e sa le mananao i solofanua o le solo o taavale solofanua ma povi e aina punaoa o meaai ma vaiinu na manaomia e le Au Paia ma a latou lava manu.
Sa alia’e ni feeseeseaiga i le Aai o Cedar, o le nofoaga mulimuli lea i Iuta e ui atu ai i Kalefonia. Sa tupu ni fefinauaiga i le va o nisi o tagata o le solo o taavale solofanua ma nisi o le Au Paia o Aso e Gata Ai. Na taufaamata‘u ane nisi o tagata o le solo o taavale solofanua o le a au faatasi ma fitafita na o mai a le malo e faasagatau i le Au Paia. E ui lava ina sa otegia e le kapeteni o le solo o taavale solofanua ana soa mo le faia o nei faamata’uga, ae sa manatu lava nisi o taitai o le Aai o Cedar ma tagata na nonofo ai, o tagata malaga o ni fili. Na pe a na’o se itula talu ona taunuu le vaega o taavale solofanua ae toe o ese mai le taulaga, ae na mananao lava nisi sa nonofo ma taitai i le Aai o Cedar e tuliloa ma faasala alii sa faatiga ia i latou.
Valaaulia tagata aoga e mafaufau i ni taimi sa latou aafia ai i ni feeseeseaiga ma se isi tagata po o se vaega o tagata. Valaaulia se tagata aoga e faitau leotele le 3 Nifae 12:25. Fai atu i le vasega e mulimuli i le faitauga, ma vaavaai mo mataupu faavae na aoao mai e Iesu Keriso, e mafai ona taialaina ai i tatou pe a tatou oo i ni feteenaiga ma isi.
-
O le a sou manatu i le uiga o le “vave ona e ioe faatasi ma lou fili”?
Ina ia fesoasoani i tagata aoga ia malamalama i lenei fuaitau, atonu e te manao e fai atu i se tagata aoga e faitau leotele le faamatalaga lenei:
Na aoao mai Elder David E. Sorensen o le Fituagafulu e faapea, o le fuaitau “ia vave ona e ioe faatasi ma lou fili” o lona uiga “o le vave ona faaleleia o tatou feeseeseaiga ina ne’i faateteleina le malosi o le lagona i lena taimi ma oo ai ina mafatia i la le tino po o lagona ma tatou nofo pologa ai i lo tatou ita” (“O Le Loto Faamagalo E Suia ai le Oona Matuitui i le Alofa,” Ensign po o le Liahona, Me 2003, 11).
-
E faapefea ona e aoteleina aoaoga a le Faaola i le 3 Nifae 12:25 i au lava upu? (Ao tali mai tamaiti, tusi se mataupu faavae e tutusa ma lenei e i le laupapa: Afai tatou te foia feteenaiga ma isi i le ala a le Alii, ona tatou aloese lea mai aafiaga leaga o le finauga.)
-
Pe na fesoasoani faapefea le usitaia o le mataupu faavae o loo i le 3 Nifae 12:25 i le Au Paia o Aso e Gata Ai o e sa le fiafia i tagata o le solo o taavale solofanua?
Faamalamalama atu, talu ai sa le’i foia e nei Au Paia o latou feteenaiga ma tagata malaga mai i le ala a le Alii, o lea sa atili ai le ogaoga o le tulaga. Sa talosagaina e Isaac Haight, o le pulenuu o le Aai o Cedar, taitai o le autau a tagata o le aai, ma o le peresitene o le siteki, le faatagaga mai le faatonu o le autau a tagata o le aai, o le sa nofo i le pitonuu lata ane o Parowan, e valaau atu i le autau a tagata o le aai e faafetaiai le au faatiga mai a le solo o taavale solofanua. Na fautuaina e le faatonu o le autau a tagata o le aai o William Dame, ia Isaac Haight e aua le amanaiaina taufaamatauga a tagata malaga mai. Nai lo le mulimuli i lenei fautuaga, sa filifili Isaac Haight ma isi taitai o le Aai o Cedar e tauanau nisi o tagata Initia i le lotoifale e osofaia le solo o taavale solofanua ma gaoi a latou povi o se auala e faasala ai le au malaga mai. Sa talosagaina e Isaac Haight ia John D. Lee, o se tagata o le Ekalesia i le lotoifale ma o se taitai i le autau a tagata o le aai, e taitaia lenei osofaiga, ma sa taupulepule le toalua lea e tuuaia tagata Initia mo le galuega.
-
O le a le mea sa tatau ona faia e taitai o le Aai o Cedar ina ua fautuaina i latou e William Dame, e aua le faaaogaina le autau a tagata o le aai? O le a le mea na taitai atu i latou e fai ona o le teenaina o le fautuaga? (Ina ua uma ona tali mai tagata o le vasega, tusi le mataupu faavae lenei i luga o le laupapa: Afai tatou te lē amana‘iaina fautuaga e fai le mea sa’o, o le a atili ai ona tatou lilifa atu i le faia o filifiliga le lelei.)
Faailoa atu sa galulue nei alii e faafeagai ma o latou tiutetauave o le perisitua. Valaaulia se tagata aoga e faitau leotele le Mataupu Faavae ma Feagaiga 121:36–37. Fai atu i le vasega e mulimuli i le faitauga, saili mo le lapataiga a le Alii i e umia le perisitua o loo galulue ma le amioletonu.
-
O le a se lapataiga ua tuuina mai e le Alii i e umia le perisitua o e taumafai e ufiufi a latou agasala po o le faia o ni mea i le amioletonu?
Faitau pe aotele palakalafa nei, ma valaaulia tagata aoga e faalogologo mo auala sa faaauau ai ona faia e taitai o le Aai o Cedar City ni filifiliga le lelei ina ua latou le amanaiaina le fautuaga na latou maua.
Na faailoa atu e Isaac Haight le fuafuaga e osofaia ai le solo o taavale solofanua i se aufono o taitai i le lotoifale i le Ekalesia, nuu, ma le autau o tagata o le nuu. Sa teena malosi e nisi o tagata o le aufono le fuafuaga ma fesiligia Haight pe na ia logoina Peresitene Polika Iaga e uiga i le mataupu. O le fai mai na te le’i logoina, na malie ai Haight e auina atu se avefeau, o James Haslam, i le Aai o Sate Leki ma se tusi e faamatala ai le tulaga ma fesili i ai i se mea e tatau ona fai. Ae ui i lea, ona o le Aai o Sate Leki e tusa ma le 250 maila (pe a ma le 400 kilomita) le mamao mai le Aai o Cedar, o le a manaomia ai e le avefeau pe a ma se vaiaso le alu atu i le solofanua mo ni taimi umi ina ia taunuu ai i le Aai o Sate Leki ma toe foi mai i le Aai o Cedar ma faatonuga a Peresitene Iaga.
E le’i leva lava ona auina atu e Isaac Haight lana tusi i le avefeau, ae osofaia loa e John D. Lee ma se vaega o tagata Initia le tolauapiga a tagata malaga i se nofoaga na ta’ua o Mountain Meadows. Sa taitai e Lee le osofaiga ae sa natia lona tagata moni ina ia foliga ai sa na o tagata Initia sa aafia ai. O nisi o le au malaga sa fasiotia pe faamanualia, ae o e na totoe sa tau ma tutuliese ai tagata na osofaia i latou, ma faamalosia ai Lee ma tagata Initia e toe foi. Sa vave ona toso mai e tagata malaga a latou taavale solofanua i se li’o fufusi, po o se pa, mo le puipuiga. E lua isi osofaiga faaopoopo na sosoo ai i aso e lima na faia ai le taofiga o le solo o taavale solofanua.
I se tasi taimi, sa iloa atu ai e tagata o le autau o le Aai o Cedar ni alii se toalua o le au malaga sa i fafo mai o le li’o o taavale solofanua. Sa tafana atu i laua e tagata o le autau a le nuu, ma fasiotia ai le toatasi. Sa sola le isi alii ma momoli atu le tala i le tolauapiga a taavale solofanua e faapea, sa aafia ai tagata papae i osofaiga e faasaga ia i latou. Na maua nei i latou o e sa taupulepuleina ia osofaiga i lo latou taufaasese. Ana faataga le au malaga e o atu i Kalefonia, o le a salalau atu le tala e faapea, o le Au Paia o Aso e Gata Ai sa nafa ma le osofaiga o le solo o taavale solofanua. Sa fefefe le au taupulepule leaga ona o lenei tala o le a aumaia ai taunuuga le lelei i o latou luga ma o latou tagata.
-
O le a le taunuuga o le faaiuga ia le usitai i le fautuaga a le taitaiau o le autau a le nuu?
-
I le taimi lenei, o a ni filifiliga sa i ai ia i latou na nafa ma le osofaia o le au malaga? (E mafai ona ta‘uta’u atu mea na latou faia ma maua ai taunuuga, po o le taumafai e ufiufi a latou solitulafono ma agasala. Tagai i le MF&F 121:37.)
-
O le a se mea sa tatau ona latou faia?
Valaaulia tagata aoga e mafaufau loloto i fesili nei:
-
O le a se mea e te faia pe a e faia se mea sese? E te ta‘uta’u atu se mea sese na e faia ma maua ai ni taunuuga, pe e te taumafai e ufiufi le agasala e ala i le taufaasese?
Sa fuafua ma faatino e nisi o le Au Paia o Aso e Gata Ai le fasiotiga tagata i Mountain Meadows
Faamalamalama atu faapea, o tagata o le Ekalesia sa aafia ai i osofaiga e faasaga i le au malaga, sa filifili e taumafai e nana a latou agasala. Valaaulia le vasega e faalogologo mo mea na tutupu o se taunuuga o lenei faaiuga a o e faitauina pe aoteleina ia palakalafa nei:
I se taumafaiga e taofia le tala mai le salalau atu e faapea sa aafia le Au Paia o Aso e Gata Ai i osofaiga o le solo o taavale solofanua, sa faia ai e Isaac Haight, John D. Lee, ma isi taitai o le Ekalesia i le lotoifale ma taitai o le autau a tagata o le nuu, se fuafuaga e fasioti tagata uma na totoe o le au malaga vagana ai tamaiti laiti. O le faataitaia ai o lenei fuafuaga, na oo atu ai John D. Lee i le au malaga ma faapea atu, o le a puipui i latou e le autau a tagata o le nuu mai nisi osofaiga e ala i le taitai saogalemu atu o i latou e toe foi i le Aai o Cedar. A o savavali atu le au malaga agai i le Aai o Cedar, sa liliu ane le autau a le nuu ma tafana i latou. Sa tulioso mai nisi o tagata Initia mai nofoaga sa lalafi ai, e auai i le osofaiga. Mai le pe a ma le 140 o le au malaga o e sa avea ma vaega o le solo o taavale solofanua, sa na o le 17 le fanau laiti sa faasaoina.
E lua aso talu ona uma le fasiga tele, ae taunuu mai James Haslam i Cedar City ma le savali o le tali a Peresitene Iaga, na faatonuina ai taitai o le lotoifale e faataga le solo a taavale solofanua e o ma le filemu. “Ina ua faitau Haight i upu a Iaga, na ia tagi lotulotu e pei o se tamaitiiti ma na pau upu na ia mafaia, ‘Tuai tele, tuai tele’” (Richard E. Turley Jr., “The Mountain Meadows Massacre,” Ensign, Set. 2007, 20).
Faamalamalama atu o filifiliga a nisi o taitai o le Au Paia o Aso e Gata Ai ma e na nonofo i le Teritori i Iuta i saute, na oo atu ai i le faalavelave matautia o le Fasiotiga Tagata i Mountain Meadows. I se faatusatusaga, sa foia e taitai o le Ekalesia ma taitai o le teritori i le Aai o Sate Leki le feteenaiga ma le malo o le Iunaite Setete e ala i talanoaga ma soalaupulega filemu i le 1858. I le taimi o lenei feteenaiga—lea na ta’ua mulimuli ane o le Taua a Iuta—sa auai fitafita a le Iunaite Setete ma autau a tagata o le nuu o Iuta i gaoioiga soonafai ae sa le’i tau lava.
-
E faapefea ona e aoteleina filifiliga na taitai atu ai i le Fasiotiga Tagata i Mountain Meadows?
-
O le a se mataupu faavae e mafai ona tatou aoaoina mai i lenei faalavelave? (E mafai ona faailoa mai e tagata aoga ni mataupu faavae eseese, ae o a latou tali e mafai ona aofia ai mea nei: O le filifili e nana a tatou agasala e mafai ona taitai atu ai i tatou i le faia o isi agasala. O le filifili e nana a tatou agasala e mafai ona aumaia ai le faanoanoa ma mafatiaga.)
Faamalamalama atu, o le Fasiotiga Tagata i Mountain Meadows, na le gata ina iu ai i le maliliu o le tusa ma le 120 o tagata na aafia ai, ae na afua ai foi le tele o mafatiaga i fanau na sao mai ai ma isi tagata o aiga na aafia ai. Sa puapuagatia ai foi Initia Paiute mai le tuuaia ma le le tonu mo le solitulafono. E le gata i lea, o nisi o i latou “o e na faatinoina le fasiotiga tagata, sa galulue mo taimi atoa na totoe o o latou olaga i lalo o se lagona leaga tele o le ta’usalaina ma le faia soo o miti taufaafefe e uiga i mea na latou faia ma vaaia” (Richard E. Turley Jr., “The Mountain Meadows Massacre,” 20).
Faamautinoa atu i tagata aoga, afai ua amata ona latou uia se ala o mea sese ma agasala, e mafai ona latou taofia le lototiga ma le faanoanoa i le lumanai e ala i le liliu atu i le Alii ma le salamo i a latou agasala.
Faamalamalama atu e faapea, talu ai ona o nisi o le Au Paia o Aso e Gata Ai i le lotoifale sa nafa ma le fuafuaina ma le faataunuuina o le Fasiotiga Tagata i Mountain Meadows, ua faatagaina ai e nisi o tagata lenei mea na tupu e faa-aafia ai i se auala le lelei o latou manatu e uiga i le Ekalesia.
-
Aisea e taua ai le iloa o faatinoga sese a nisi o tagata o le Ekalesia e le afaina ai le moni o le talalelei?
Valaaulia se tagata aoga e faitau le faamatalaga lenei mai ia Peresitene Henry B. Eyring o le Au Peresitene Sili:
“O le talalelei a Iesu Keriso ua tatou taliaina, e inoino ma e le fiafia i le fasiotia faalealofa o alii, tamaitai ma tamaiti. E moni lava, na te lagolagoina le filemu ma le faamagalo atu. O le mea sa faia [i Mountain Meadows] i tausaga ua leva e tagata o le tatou Ekalesia, ua faatusa i se o ese leaga mai ma le leai o se alofaga mai aoaoga ma amioga faa-Kerisiano (“150th Anniversary of Mountain Meadows Massacre,” Sete. 11, 2007, mormonnewsroom.org/article/150th-anniversary-of-mountain-meadows-massacre).
Valaaulia se tagata aoga e faitau leotele le Helamana 5:12. Fai atu i le vasega e mulimuli i le faitauga, ma vaavaai mo mea e mafai ona tatou faia e atinae ma faatumau ai a tatou molimau, ina ia oo ane i taimi faigata, e pei o taimi tatou te iloa ai ni mea sa le ola ai tagata o le Ekalesia e tusa ma aoaoga a Iesu Keriso, o le a faapea ona le maluelue ai o tatou faatuatua.
-
E tusa ai ma le Helamana 5:12, o a ni mea e mafai ona tatou faia e atinae ma faatumau ai a tatou molimau? (A uma ona tali mai tagata aoga, atonu e te manao e tusi le mataupu faavae lenei i luga o le laupapa: E mafai ona tatou atiina ae ni molimau malolosi e ala i le fausiaina o lo tatou faatuatua i le faavae o Iesu Keriso.)
Ina ia faapupula atu lenei mataupu faavae, valaaulia se tagata aoga e faitau le palakalafa lenei:
“O James Sanders o le atalii o le atalii o le atallii o … o se tasi o tamaiti sa faasaoina mai le fasiotiga tagata [ma o se tagata foi o le Ekalesia]. … Fai mai Uso Sanders … o le iloaina sa fasiotia ona augatama i le fasiotiga tagata, ‘sa le’i aafia ai lo’u faatuatua aua ua faavae ia Iesu Keriso, ae le o se tagata i le Ekalesia’” (Richard E. Turley Jr., “The Mountain Meadows Massacre,” 21).
-
E mafai faapefea e lo tatou faatuatua ia Iesu Keriso ona faamalosia i tatou, pe a tatou iloa ni taimi sa le ola ai tagata o le Ekalesia e tusa ai ma aoaoga a le Faaola?
-
O a nisi o mea e te faia e fesoasoani e fausia ai lou faatuatua i luga o le faavae o Iesu Keriso?
Molimau atu i le taua o le ola ai i aoaoga a le Faaola ma le faavaeina o lo tatou faatuatua i luga ia te Ia ma Lana talalelei. Valaaulia tagata aoga e mafaufau loloto pe faapefea ona latou atinaeina atili o latou faatuatua i le faavae o Iesu Keriso ma ia faia se sini ia faia lena mea.
Tala ma Faamatalaga o Talaaga
Tiutetauave mo le Fasiotiga Tagata i Mountain Meadows
Sa fofogaina e Peresitene Henry B. Eyring o le Au Peresitene Sili le faamatalaga lenei e faatatau i le tiutetauave mo le Fasiotiga Tagata i Mountain Meadows:
“O le tiutetauave mo le fasiotiga tagata o loo taoto atu i taitai i le lotoifale o Le Ekalesia a Iesu Keriso o le Au Paia o Aso e Gata Ai i le itulagi lata ane i Mountain Meadows, o e foi o loo umia tofiga faalemalo ma le militeli, faapea ma tagata o le Ekalesia e galulue i lalo o la latou taitaiga. …
“… E le masalomia lava, o le a tuu mai e le Faamasinoga Tonu Paia le faasalaga e tatau ai i luga o i latou e nafa ma lenei fasiotiga tagata” (“150th Anniversary of Mountain Meadows Massacre,” Sete. 11, 2007, mormonnewsroom.org/article/150th-anniversary-of-mountain-meadows-massacre).
Ua faamalamalama mai e Richard E. Turley Jr., o le tusi talafaasolopito ma le tusitalafaamaumau fesoasoani a le Ekalesia, le auala na iu ina iloa ai e taitai aoao o le Ekalesia lenei fasiotiga tagata. Sa ia aoteleina foi taunuuga na oo mai i nisi o le au solitulafono:
“E ui ina sa faalogo Polika Iaga ma isi taitai o le Ekalesia i le fasiotiga tagata i se taimi e le’i mamao mulimuli ane talu ona tupu, ae o lo latou malamalama lelei i le aafia ai o tagata o le nuu ma faamatalaga matautia e uiga i solitulafono, sa faaopoopo mai lava i le aluga o taimi. I le 1859 sa latou faamaloloina ai mai o latou valaauga le peresitene o le siteki o Isaac Haight ma isi taitai iloga o le Ekalesia i le Aai o Cedar, o e sa i ai se matafaioi i le fasiotiga tagata. I le 1870 sa latou tapeina ai igoa o Isaac Haight ma John D. Lee mai le Ekalesia.
“I le 1874 sa tuuaia aloaia ai e se faatonu maualuga o le teritori ni alii se toaiva mo la latou matafaioi i le fasiotiga tagata. O le toatele o i latou na iu lava ina taofia, e ui lava sa na o Lee sa faamasinoina, faamaonia lona moliaga ma fasiotia mo le solitulafono. O se isi alii na tuuaia na faaliliu atu faamaoniga a le setete [ma le loto i ai na molimau ma tuuina atu faamaoniga agai i isi na molia], ae o isi na tele tausaga o sosola mai le tulafono. O isi alii o le militeri na faatinoina le fasiga tele na galulue i aso o totoe o o latou olaga i lalo o se lagona o le nofosala ma mititaufaafefe faifaipea o mea na latou faia ma vaaia” (Richard E. Turley Jr., “The Mountain Meadows Massacre,” Ensign, Set. 2007, 20).
Faasologa o mea na tutupu latalata i le Fasiotiga Tagata i Mountain Meadows
Aso Tofi, 3 o Setema, 1857: Na ui atu ai i le Aai o Cedar, Iuta se solo o taavale solofanua sa i ai le tusa ma le 140 o tagata, o le toatele lava na o mai mai Arkansas. Sa aafia nisi o tagata o le solo o taavale solofanua i se feteenaiga ma nisi o tagata o le Au Paia o Aso e Gata Ai i le lotoifale. Ina ua mumusu nisi o tagata o le solo o taavale solofanua i le taofiga, sa saili atu taitai o le Ekalesia i le lotoifale ma taitai o le malo i le Aai o Cedar mo se faatagaga mai ia William Dame, le taitaiau o le militeli a le itumalo sa i Parowan lata ane, e valaau atu i le vaegaau a tagata o le nuu e faafetauia tagata malaga mai.
Aso Faraile, 4 o Setema, 1857: Na auina mai e William Dame se savali o le tali na faatonuina ai taitai o le Aai o Cedar e aua ne’i faia se gaoioiga e faasagatau atu ai i tagata malaga. Sa faia e Isaac C. Haight ma isi taitai i le Aai o Cedar se fuafuaga e tauanau ai tagata Initia i le lotoifale e osofaia le solo o taavale solofanua a tagata malaga. Sa aumai e Haight ia John D. Lee mai Fort Harmony lata ane e taitaia le osofaiga.
Aso Sa, 6 Setema, 1857: Ua pulefaamalumalu Isaac C. Haight, i se fonotaga a le aufono i le Aai o Cedar ma logoina ai isi taitai i le lotoifale e uiga i le fuafuaga e osofaia le au malaga mai. Sa tetee nisi o taitai i lenei fuafuaga ma tauanau ia Haight e auina atu se avefeau, o James Haslam, e saili mai se fautuaga a Peresitene Polika Iaga e uiga i le mataupu.
Aso Gafua, 7 o Setema, 1857: Ua osofaia e John D. Lee ma tagata Initia le solo o taavale solofanua a tagata malaga i Mountain Meadows. Ua tuua e James Haslam, o le na tauaveina atu se tusi e talosagaina ai le taitaiga mai ia Peresitene Polika Iaga, le Aai o Cedar mo le Aai o Sate Leki. Ua osofaia e ni fitafita se toalua o le Aai o Cedar ni tagata malaga se toalua o e sa i tua mai o le faataali’oli’oga o taavale solofanua. Ua sao se tasi o tagata malaga ma toe foi atu i totonu o le faataali’oli’oga, ma aumai le tala e faapea, o loo osofaia e tagata o le nuu ia tagata malaga.
Aso Lua, 8 o Setema, 1857: Ua auai nisi o le Au Paia o Aso e Gata Ai ma tagata Initia i isi osofaiga e lua e faasaga i tagata o le solo o taavale solofanua. Sa manuia le puipuiga e tagata malaga o lo latou tulaga, ae na fasitoia e tagata o le Aai o Cedar nisi alii se toalua o e sa taumafai e sosola e saili fesoasoani.
Aso Lulu, 9 Setema, 1857: Ua malaga atu Isaac C. Haight mai le Aai o Cedar agai i Parowan e feiloai ai ma William Dame. Sa tonu i le aufono a Parowan e tatau ona faataga le vaega o tagata malaga e o i lo latou ala ma le filemu, ae sa polokiki faalilolilo Haight mo le, ma maua ai le faatagaga a Dame e valaau ai le vaegaau a tagata o le nuu e osofaia le au malaga lofituina.
Aso Tofi, 10 o Setema, 1857: Toe foi atu Isaac C. Haight i le Aai o Cedar ma talanoa ma taitai i le lotoifale. Ua latou auina atu faatonuga e fasioti tagata uma o le aumalaga vagana ai tamaiti laiti. Ua taunuu James Haslam i le Aai o Sate Leki, momoli atu le savali a Haight, ma amata le malaga toe foi mai i le Aai o Cedar ma le tali a Peresitene Iaga.
Aso Faraile, 11 Setema, 1857: Mailei mai e fitafita a le nuu ia tagata malaga na totoe mai lo latou tolauapiga. Ua osofaia ma fasiotia e le vaegaau a le nuu ma Initia ia tagata malaga vagana ai ni tamaiti laiti e toa 17.
Aso Sa, 13 Setema, 1857: Ua foi mai James Haslam mai le Aai o Sate Leki ma faatonuga tusitusia a Polika Iaga e tuu tagata malaga e o ma le filemu.
1859: Ua aumai e taitai o le Malo tamaiti na sao mai le faalavelave ma faafoi atu i latou i Arkansasa e nonofo ai ma tagata o o latou aiga.
1870: Ua iloa e Peresitene Polika Iaga ni faamatalaga faaopoopo e uiga i le fasiotiga tagata ma tape ai le igoa o Isaac C. Haight ma John D. Lee mai le Ekalesia.
1874: Ua aloaia moliaga o ni alii se toaiva e le faatonu maualuga o le teritori mo a latou matafaioi i le fasiotiga tagata.
1875: E na o John D. Lee le tagata na faia le solitulafono na faamasinoina, ae o le iuga a le faamasinoga o le faasala oti i le sisi o le ua.
1876: Ua litaea John D. Lee ma faamaonia ai le fasioti tagata ona o lana matafaioi i le fasiotiga tagata.
Aso Faraile, 23 o Mati, 1877: Ua fasiotia John D. Lee e ala i le tafanaina i Mountain Meadows.
O Le Taua a Iuta
I le ogatotonu o le 1857, na faalogo ai taitai o le Au Paia o Aso e Gata Ai i tala feaveai e faapea, e ono suia e le malo tele ia Polika Iaga i se kovana fou o le Teritori a Iuta, o le o le a lagolagoina e se fuainumera toatele o fitafita a le malo. Na faamaonia mai nei tala feaveai i le aso 24 o Iulai e alii o le Au Paia o Aso e Gata Ai, o e na o mai i le Aai o Sate Leki mai sasae (tagai Ronald W. Walker, Richard E. Turley Jr., and Glen M. Leonard, Massacre at Mountain Meadows: An American Tragedy [2008], 30). Na taunuu mai Abraham Smoot, Judson Stoddard ma Orrin Porter Rockwell i le Aai o Sate Leki i le aso 23 o Iulai ma tala o le agai mai o le vaegaau. O le aso na sosoo ai sa latou momoliina atu ai le tala i Big Cottonwood Canyon, i le mea sa faamanatuina ai e Polika Iaga ma le toatele o le Au Paia le 10 tausaga talu ona ulufale atu paionia i le Vanu o le Aai o Sate Leki (tagai i le Church History in the Fulness of Times Student Manual, 2nd ed. [Church Educational System manual, 2003], 369–70).
Sa talitonu Peresitene Polika Iaga ma isi taitai o le Ekalesia, sa i ai ni faamoemoega le fiafia o fitafita a le malo o loo agai atu i le Au Paia o Aso e Gata Ai. I le amataga o Aokuso o le 1857, na fofogaina mai ai e taitai o le Ekalesia ni fuafuaga e taofia ai pe faavaivaia ai le fitafita mai le ulufale atu i le Teritori o Iuta. I le aso 15 o Setema, 1857, na folafola atu ai e Polika Iaga le faaaoga o le tulafono faamiliteli i le teritori. Sa ia “faatonuina foi le Vaegaau Aloaia a Navu e sauni mo le osofaiga. Na toetoe lava o nuu uma i Iuta, sa faateleaiina tapenapenaga mo le puipuiga. Sa ia faatonuina foi epikopo i nuu e sauni e susunu mea uma pe afai e oo mo’i se osofaiga” (Church History in the Fulness of Times Student Manual, 371).
Na auina atu tagata o le Vaegaau Aloaia a Navu [o le igoa na faaaoga e le vaegaau a tagata o le nuu o le Teritori o Iuta] e faaita fitafita o le malo a’o latou savavali agai mai i le teritori. “Na susunuina e [tagata o le vaegaau aloaia] se aofaiga atoa e fitusefulu fa o taavale solofanua, na i ai ni sapalai e tofu ai se ami toatele mo le tolu masina. Sa latou pueina foi le afe fa selau o le lafu povi e lua afe na omai faatasi ai i le malaga” (Church History in the Fulness of Times Student Manual, 374). O lenei mea sa tuai ai le savaliga a fitafita ma taofia ai i latou mai le ulufale atu i le Vanu o Sate Leki seia oo i le tautotogo o le 1858.
Ia Mati 1858, na faatonuina ai e Peresitene Iaga le Au Paia ina ia o ese mai nofoaga uma sa nonofo ai i Iuta i matu. Sa “nana e le Au Paia ia maa uma na tipiina mo le Malumalu o Sate Leki, ma faalaugatasia ma ufiufi lona faavae ina ia foliga ai le fasifanua o se fanua na suaina ma tumau ai le le’i loteina” (Church History in the Fulness of Times Student Manual, 376). Sa faatutumu fale o aiga ma isi fale i le Aai o Sate Leki i vaovaomago ina ia mafai ona susunuina nai lo le nofoia e fitafita. E silia ma le 30,000 le Au Paia na agai atu i Provo ma isi taulaga i le ogatotonu ma le itu i saute o Iuta, lea sa fesoasoani ai isi tagata o le Ekalesia e faanonofo i latou i o latou fale ma tausi i latou.
Sa foia e taitai o le Ekalesia ma le teritori i le Aai o Sate Leki le vevesi ma le malo o le Iunaite Setete e ala i talanoaga ma soalaupulega filemu. Ia Aperila 1858, na faafeiloaia ai e taitai o le Ekalesia le kovana fou o le teritori, o Alfred Cumming, i le Aai o Sate Leki. Na momoli atu e Polika Iaga ia faamaumauga o le teritori ma le faamau i le kovana fou ma faavaeina ai se mafutaga mafana faaleuo ma ia. I le amataga o Iuni, na taunuu atu ai ni avefeau i le Aai o Sate Leki, na auina mai e Peresitene James Buchanan e tauave mai ai se ofo mo se faamagaloga mo le Au Paia o Aso e Gata Ai. Sa talia e taitai o le Ekalesia lenei ofo, lea na kilia ai le Vaegaau Aloaia a Navu i le faia o se mea sese i a latou gaoioiga osofai e faasaga i le solo o sapalai a le ami. I le aso 26 o Iuni, na ulufale filemu atu ai le ami i le laumua o le aai filemu lea na toetoe lava a leai se isi na i ai. Ona sa le’i lotea e fitafita meatotino a le Au Paia, o lea sa le gaoioi ai le Au Paia o e sa nonofo ai lava i le aai i la latou faamatauga e susunu ia fale. Ina ua mavae ona nonofo ai i le aai mo ni nai aso, na tuumuli loa le ami ma faatuina se nofoaga fou e tusa ma le 48 maila (77 km) i sautesisifo o le Aai o Sate Leki, lea na latou faaigoaina o Camp Floyd. I le aso 1 o Iulai, 1858, na faatonuina ai e Polika Iaga le Au Paia e toe foi atu i o latou aiga i Iuta i matu (tagai i le Church History in the Fulness of Times Student Manual, 375–77).
O le a le mea na tupu i fanau a le au malaga lea na sao mai i le fasiotiga tagata?
Sa ave e nisi o le Au Paia o Aso e Gata Ai ia fanau a le au malaga o e sa faasaoina mai i le fasiotiga tagata ma tausia i latou. I le 1859, na maua ai e taitai o le malo le iuga faaletulafono e vaai ai nei tamaiti ma toe faafoi atu ai i latou i o latou aiga i Arkansas.
Pe na faaonana e tagata malaga o le solo a taavale solofanua ia tagata Initia?
Na faamalamalama mai e Richard E. Turley Jr., o le tusi talafaasolopito ma le tusitalafaamaumau fesoasoani e faapea:
“Ua talia e nisi o talafaasolopito anamua a Iuta o mea na tutupu i Mountain Meadows le faamatalaga e faapea, o lena faaonanaaga na saofaga foi i le feteenaiga—e faapea, na faaoona moni lava e le au malaga mai Arkansas se vaieli ma se povipulu ua mate e latalata i le taulaga i le ogatotonu o Iuta o Fillmore, na mafua ai le mama’i ma le maliliu o Initia i le lotoifale. E tusa ai ma lenei tala, sa matuai feita Initia ma mulimuli atu ai i le au malaga i Mountain Meadows, lea a le o i latou lava na faatinoina ia faiga faalealofa, pe na faamalosia foi ia tagata matatau o le Au Paia o Aso e Gata Ai e auai ma i latou i le osofaiga. Ua faaalia i sailiiliga o talafaasolopito e le sa’o nei tala.
“E ui e moni sa mamate nisi o lafu a le au malaga i le ala, e aofia ai e lata atu i Fillmore, ae o le maliliu [o tagata] e foliga mai o le taunuuga o se faama’i na aafia ai lafu povi na femalagaai ai i le vaitaimi o le 1850. Na maua tagata i le faama’i mai meaola sa aafia ai e ala i vaega o le tino e lavelavea pe manunua pe ala foi i le aina o aano manufasi ua afaina i le faama’i. Ana le aunoa ma lenei malamalamaaga i ona po nei, semanu e masalosalo tagata o le faafitauli sa mafua mai i le faaonana” (“The Mountain Meadows Massacre,” Ensign, Sete. 2007, 16).
O amioga le manuia a tagata o le Ekalesia
O le saunoaga lenei mai ia Peresitene Dieter F. Uchdorf o le Au Peresitene Sili, e mafai ona fesoasoani tatou te iloa ai le ala e tali atu ai pe afai tatou te faalogo e uiga i ni mea sese e faia e taitai o le Ekalesia:
“Ma, ina ia faamaoni atoatoa, e i ai taimi e faia ai e tagata po o taitai i le Ekalesia ni mea sese faigofie. Atonu na i ai ni upu po o ni mea na faia ua le ogatusa ma o tatou tulaga faatauaina, mataupu faavae, po o le aoaoga faavae.
“Ou te manatu e na o le pau le mea e atoatoa ai le Ekalesia pe ana faapea e taitaia e ni tagata atoatoa. E atoatoa le Atua, ma e mama Lana aoaoga faavae. Ae e galue o Ia ia i tatou—O Lana fanau le atoatoa—ma tagata le atoatoa e faia mea sese. …
“O le auala lava lea e i ai i taimi uma ma o le a i ai pea seia oo i le aso atoatoa pe a nofotupu ai Keriso lava Ia i le lalolagi.
“O le mea e faanoanoa ai o nisi ua tautevateva ona o mea sese e faia e tagata. Ae e ui lava i lenei mea, o le upumoni e faavavau o le talalelei toefuataiina o loo maua i Le Ekalesia a Iesu Keriso o le Au Paia o Aso e Gata Ai e le sese, pe faaitiitia, pe faaumatiaina” (“Sau, Auai Faatasi ma i Matou,” Ensign po o le Liahona, Nov. 2013, 22-23).
Fasiotiga Tagata i Mountain Meadows
Mo nisi faamatalaga e uiga i le Fasiotiga Tagata i Mountain Meadows, alu i Autu o le Talalelei i le LDS.org ma su’e mo le “Mountain Meadows Massacre.”