Sauniuniga o Anomea mo le Faiaoga o Suesuega e Fai i le Fale
Aotelega o Lesona o Suesuega e Fai i le Fale i Aso Taitasi
O le aotelega lenei o mea na tutupu, aoaoga faavae, ma mataupu faavae na aoaoina e tagata aoga a’o latou suesueina le Mataupu Faavae ma Feagaiga 8-9; 11–16; ma le Iosefa Samita—Talafaasolopito 1:68–75 (iunite 4) e le o faamoemoe e aoao atu o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.
A o latou suesueina taumafaiga a Oliva Kaotui e faaliliu ia papatusi, na aoaoina e tagata aoga le mauaina ma le iloaina o faaaliga e manaomia ai le taumafaiga i la latou vaega. Na latou aoaoina foi e faapea, afai o le a latou suesue ma ole atu i le faatuatua, o le a fetalai mai le Alii i o latou mafaufau ma loto e ala i le mana o le Agaga Paia.
Na faailoa atu e le uso o le Perofeta o Ailama se manao e fesoasoani i le galuega a le Alii. Mai se faaaliga ia Ailama, na aoaoina ai e tagata aoga, latou te maua faamanuiaga mai le Atua e tusa ma o latou manao, ma afai latou te mananao e fai le galuega a le Atua, e mafai ona avea i latou ma auala o le faia o mea lelei e tele. Na maua foi e tagata aoga le avanoa e mafaufau loloto ai i auala e mafai ona latou suesue ma maua ai le afioga a le Alii ina ia mafai ona maua Lona Agaga ma le mana.
Na aoaoina e tagata aoga o Ioane le Papatiso na faaeeina atu le Perisitua Arona i luga o Iosefa Samita ma Oliva Kaotui e ala i le faaee o lima. O ki o le Perisitua Arona, lea e aofia ai le auaunaga a agelu, le talalelei o le salamo, ma o le papatisoga e ala i le faatofuina mo le faamagaloina o agasala, ua toe i ai i le lalolagi.
Na fesoasoani Tavita Uitimera ia Iosefa Samita ma Oliva Kaotui e siitia atu i Niu Ioka e aloese ai mai sauaga i Penisilevania. Mai afioga a le Alii ia Tavita Uitimera, na aoaoina ai e tagata aoga, afai latou te tausia poloaiga ma tumau e oo i le iuga, o le a latou maua le ola e faavavau. Na latou aoaoina foi, a o latou fesoasoani ma le faamaoni i le galuega a le Alii, o le a faamanuiaina i latou faaleagaga ma faaletino. E ala i le suesueina o faaaliga na tuuina mai ia Ioane ma Pita Uitimera, sa iloa ai e tagata aoga, o a tatou taumafaiga e aumai isi ia Iesu Keriso e taua tele ia i tatou ma e silafia lelei i tatou e le Atua.
Folasaga
Sa iloa uma e Oliva Kaotui, Ailama Samita, Iosefa Knight le Matua, Tavita Uitimera, Ioane Uitimera, ma Pita Uitimera o Iosefa Samita o se perofeta a le Atua ma sa naunau e fesoasoani i le Toefuataiga. Na aoaoina i latou e le Alii e uiga i le agaga o faaaliga, ma le mea e tatau ona faia e se tagata a o lei taumafai e talai atu le talalelei.
Ua aoao e le Alii ia Oliva Kaotui ma Ailama Samita e uiga i le agaga o faaaliga
Fai atu i tagata aoga e sii o latou lima pe afai sa i ai se taimi na latou mafaufau ai pe faapefea ona latou iloa ua latou mauaina se faaaliga mai le Alii.
Valaaulia ni tagata aoga e toe faamanatu le Mataupu Faavae ma Feagaiga 8 ma le 9 faapea foi ma mea na latou tusia i a latou api talaaga mo le suesueina o tusitusiga paia e uiga i na mataupu i le lesona o le aso 1 mo le iunite lenei. Fai atu i tagata aoga e vaavaai mo mea na latou aoaoina e uiga i le mauaina ma le iloaina o tali i tatalo. Valaaulia ni nai tagata aoga e faasoa mai se mea na latou aoaoina.
O a ni luitau e te lua faafeagai a’o e taumafai e iloa le taimi e te maua ai ni uunaiga po o se taitaiga mai le Agaga Paia?
Faamanatu atu i tagata aoga, o le Mataupu Faavae ma Feagaiga 8 ma le 9 o loo i ai faatonuga a le Alii mo Oliva Kaotui a o taumafai Oliva e faaliliu papatusi auro. Mai nei faaaliga, e mafai ona tatou aoao ai pe faapefea ona maua ma iloa faaaliga. Valaaulia tagata aoga e sue i le Mataupu Faavae ma Feagaiga 8:2-3 (o se fuaitau o mau tauloto) ma tauloto faatasi le mau. Tusi le upumoni lenei i luga o le laupapa: E fetalai mai le Alii i o tatou mafaufau ma loto e ala i le mana o le Agaga Paia.
E mafai faapefea e le malamalama i lenei upumoni ona fesoasoani ia te oe a o e taumafai e iloa faaaliga mai le Alii?
Faamalamalama atu o le tomai e saili ma maua faaaliga faaletagata lava ia o se meaalofa mai le Atua e avanoa mo Ana fanau uma.
Fai atu i se tagata aoga e faitau leotele le Mataupu Faavae ma Feagaiga 8:4, ma valaaulia le vasega e mulimuli i le faitauga, ma vaavaai mo mea na folafola mai e le Alii ia Oliva pe afai na te “toaga i” le meaalofa o faaaliga. Ona fai atu lea o fesili nei:
O le a sou manatu i le uiga o le ia “toaga i” le agaga o faaaliga? (Ia saili mo tali i tatalo ma ola agavaa ia maua ai.)
O le a le mataupu faavae e mafai ona tatou aoaoina mai le Mataupu Faavae ma Feagaiga 8:4? (E ui atonu e ese le faaupuina e tagata aoga, ia mautinoa latou te faailoa mai e faapea, afai tatou te faaaogaina le agaga o faaaliga, e mafai ona laveaiina i tatou mai mea leaga ma mea e afaina ai. Tusi le mataupu faavae lenei i luga o le laupapa.)
Fai atu i tagata aoga e faasoa mai i se taimi na puipuia ai i latou e le Alii po o se tasi latou te iloa ona sa latou sailia ma faalogo i le Agaga Paia.
Valaaulia tagata aoga e faitau filemu le Mataupu Faavae ma Feagaiga 8:1 ma vaavaai mo auala e mafai ona latou faaleleia atili ai a latou tatalo ina ia mafai ona “toaga” le agaga o faaaliga.
Afai e mafai, tuu atu i tagata aoga se kopi o le saunoaga lenei a Elder David A. Bednar o le Korama a Aposetolo e Toasefululua (po o le tusi o le faamatalaga i luga o le laupapa a o lei amataina le vasega):
Ata
Elder David A. Bednar
“Talu ai e musumusu lemu mai lava ma le lē gaoiā le Agaga, e faigofie ona malamalama i le mafuaaga e tatau ai ona tatou faatafaese mai faasalalauga e le talafeagai, ponokalafi, ma amioga ma mea faataumaoi ua fai ma vaisu. O nei meafaigaluega a le Tiapolo e mafai ona faaitiitia ai ma iu ai lava ina faataumaoia lo tatou mana e iloa ai ma tali atu i feau maaleale mai le Atua, ia e auina mai e ala i le mana o le Agaga Paia. E tatau ia i tatou ona mafaufau toto’a ma manatunatu loloto ma le agaga tatalo pe mafai faapefea ona tatou teena faatosinaga a le tiapolo ‘toaga i ai’ ma le amiotonu, tusa lava pe i ai le agaga o faaaliga i o tatou olaga patino ma aiga” (“O Le Agaga o Faaaliga,” Ensign po o le Liahona, Me 2011, 88).
Fai atu i tagata aoga e faitau filemu le saunoaga a Elder Bednar ma ia faailoa mai fasifuaitau e fesoasoani ia i latou ia malamalama ai i auala e “toaga” lelei ai po o le saili atu i le agaga o faaaliga. Atonu e te manao e fautua atu ia latou faailogaina nei fuaitau. Ona fai atu lea o fesili nei:
O a ni fasifuaitau na e faailoa mai, ma aisea na tulaga ese ai ia fasifuaitau ia te oe?
E tusa ai ma le saunoaga a Elder Bednar, aisea e taua ai le aloese mai le leaga pe afai tatou te mananao e maua ma iloa faaaliga?
Valaaulia tagata aoga e mafaufau i nisi o auala atonu e mafai ona latou faaleleia ai le “toaga i” le meaalofa o faaaliga ina ia maua ai le puipuiga mai le leaga. Atonu e te manao e uunaia i latou e tusi se sini o le auala latou te mananao e “toaga i ai” i lenei meaalofa ma le atoatoa sili atu i o latou olaga.
Ina ia fesoasoani i tagata aoga ia malamalama i le isi auala e saili ai i faaaliga, ia faamanatu atu ia i latou, sa tuuina atu ia Oliva Kaotui le faatagaga e faaliliu ai, ae ina ua mavae ona ia amataina, sa ia “lē faaauau pea e pei ona sa [ia] amata mai” (MF&F 9:5). Fai atu i se tagata aoga e faitau leotele le Mataupu Faavae ma Feagaiga 9:7-8, ma valaaulia le vasega e mulimuli i le faitauga, ma vaavaai mo le mea na ta’u mai e le Alii ia Oliva na manaomia ona ia faia e maua ai faaaliga.
E faavae i le fautuaga a le Alii ia Oliva Kaotui, o le a le mea tatou te iloa e masani ona manaomia i la tatou vaega ina ia mafai ona maua faaaliga? (O se tasi o mataupu faavae e mafai ona faaailoa mai e tagata aoga o le, mauaina ma le iloaina o faaaliga e manaomia ai taumafaiga i la tatou vaega. Atonu e te manao e tusi i luga o le laupapa lenei upumoni po o se upumoni e talitutusa e faailoa mai e tagata aoga.)
O le faaaoga ai o le Mataupu Faavae ma Feagaiga 9:8, o le a se fautuaga e te tuuina atu i se uo o le sa taumafai e faia se faaiuga taua?
Atonu foi e te fai atu i tagata aoga e faasoa mai ni aafiaga e uiga i se taimi na manaomia ai ona latou faia se taumafaiga e faia se faaiuga faigata, ona ole atu lea i le Tama Faalelagi pe na latou faia le filifiliga sa’o.
Ua faatonu e le Alii ia Ailama Samita, Iosefa Knight le Matua, ma le au uso Uitimera e uiga i a latou matafaioi i le galuega a le Atua
Fai atu i tagata aoga e vaai faalemafaufau e faapea, na talosagaina i latou e auai i se tasi o faamoemoega maoae e tupu i le lalolagi. Ta‘u atu ia te i latou o Me ma Iuni 1829, na faatonuina patino ai ni alii se toalima e uiga i le fingalo o le Alii mo i latou i le Toefuataiga o le talalelei.
Tusi ulutala nei ma tusi o mau i luga o le laupapa. Fai atu i tagata aoga e sue tusi o mau e saili ai le mea na fautuaina e le Alii ia nei alii taitoatasi e fai, ina ia mafai ona lagolago i le fausiaina o le malo o le Atua i luga o le lalolagi. Valaaulia tagata aoga e suesue ia tusi uma e fa. (Afai e puupuu le taimi, vaevae ia tusi o mau i le vasega ma fai atu i tagata aoga e lipoti mai mea na latou mauaina.)
A uma ona suesue e tagata aoga ia tusi o mau, fai atu fesili nei:
O a ni mea e tutusa ai poloaiga a le Alii i nei alii e toalima na e matauina? O a ni eseesega o e vaaia?
Mai mea ua e aoaoina mai fuaiupu i le Mataupu Faavae ma Feagaiga 11, aisea na finagalo ai le Alii ia Ailama Samita e “faatali umi laitiiti atu” (MF&F 11:16) le talai atu o le talalelei?
O le a le fautuaga na tuu mai e le Alii ia Ailama i le Mataupu Faavae ma Feagaiga 11:21 o le a aoga i se alii talavou po o se tamaitai o sauniuni e auauna atu i se misiona? (Mai a latou tali, fesoasoani i tagata aoga e faailoa mai le mataupu faavae lenei: O i latou o e suesue i le afioga a le Alii, o le a maua Lona Agaga ma le mana e faatalitonu ai isi i le moni o le talalelei.) Atonu e te manao e tusi i luga o le laupapa.
Valaaulia tagata aoga e mafaufau loloto i mea e mafai ona latou faia ia sili atu ona fuafuaina lelei ai a latou taumafaiga e suesue ma maua le afioga a le Alii, ma ia faatu se sini e galue i uunaiga latou te maua a o latou mafaufau loloto.
Ina ia fesoasoani i tagata aoga e tauloto atili le fuaitau o le mau tauloto i le Mataupu Faavae ma Feagaiga 13:1, valaaulia i latou e tauloto faatasi mai i mea latou te manatua. Ia tuu atu ia te i latou e faaaoga a latou tusitusiga paia pe a manaomia. Ona vaevae lea o tagata aoga i ni paga ma fai atu ia i latou e faaaoga le fuaitau e faamatala atu ai i a latou paaga le auala e fesoasoani ai ki o le Perisitua Arona e aumai tagata ia Iesu Keriso.
Tau atu i tagata aoga a o latou suesue i le iunite e sosoo ai, o le a latou aoao e uiga i alii o e na filifilia e fai ma molimau e vaai i papatusi auro, o le Liahona, ma isi mea paia. O le a latou faitau i le tala a le Faaola e uiga i Lona puapuagatia i le faatoaga o Ketesemane ma luga o le satauro. O le a latou faitau foi i aoaoga a le Faaola e uiga i le auala e mafai ona tatou aloese ai mai ni mafatiaga faapena.