Lesona 158: Faanatinatiina o le Galuega o le Faaolataga

Lesona 158

Faanatinatiina o le Galuega o le Faaolataga

Folasaga

Talu mai le amataga o le Toefuataiga, ua faalauteleina ai le galuega a le Alii i le lalolagi atoa. Ua tatou ola i se vaitaimi ua faanatinatiina ai e le Alii Lana galuega. Ua i ai i le autalavou a le Ekalesia ni punaoa ma ni avanoa se tele e saofaga atu i le faanatinatiina o le galuega a le Alii.

Fautuaga mo le Aoaoina Atu

Ua faanatinati e le Alii Lana galuega

Valaaulia se tagata aoga e savali mai le tasi itu o le potu i le isi i se saoasaoa masani. Ona fai atu lea i le tagata aoga e toe savali mai ma ia faavavevave pe faatelea’i lona saoasaoa. A o sopoia e le tagata aoga le potu i le taimi lona lua, fai atu i le vasega le fesili lenei:

O le a le uiga o le faanatinati o se mea? (Ia faatelevave.) O a nisi o mafuaaga atonu e faanatinati pe faatelevave ai e se tasi se galuega?

Valaaulia se tagata aoga e faitau leotele le Mataupu Faavae ma Feagaiga 88:73. Fai atu i le vasega e mulimuli i le faitauga, ma vaavaai po o le a le mea na fetalai mai le Alii o le a Ia faanatinatia. Fai atu i tamaiti aoga e lipoti mai mea latou te maua.

O le a sou manatu i le uiga i le Alii o le faanatinati o Lana galuega?

E faatatau i le Mataupu Faavae ma Feagaiga 88:73, na saunoa mai ai Elder Russell M. Nelson, “O le taimi lenei o le faanatinati” (“Thus Shall My Church Be Called,” Ensign, Me 1990, 17). Tusi le aoaoga faavae lenei i luga o le laupapa: Ua tatou ola i se vaitaimi ua faanatinatiina ai e le Alii Lana galuega.

O a nisi o auala ua e molimauina ai le faanatinatiina e le Alii o Lana galuega?

Valaaulia se tagata aoga e faitau leotele le Mataupu Faavae ma Feagaiga 133:10. Fai atu i le vasega e mulimuli i le faitauga, ma vaavaai mo mea o loo fautuaina mai e lenei fuaiupu e uiga i le mafuaaga o le a faanatinati ai e le Alii ia Lana galuega.

O le a le mea o loo fautua mai e lenei fuaiupu i le mafuaaga o le a faanatinati ai e le Alii Lana galuega? (Ina ia fesoasoani i tagata ia saunia mo Lona Afio Mai Faalua.)

Faaali atu se ata o Peresitene Spencer W. Kimball (Tusi Ata o le Talalelei [2009], nu. 133; tagai foi i le LDS.org). Faamalamalama atu faapea, i le taimi o le auaunaga a Peresitene Spencer W. Kimball o se Peresitene o le Ekalesia, na faanatinatiina ai e le Alii ia Lana galuega. Mo se faataitaiga, na faalauteleina le galuega faafaifeautalai, ma sa lolomia e le Ekalesia ni lomiga fou o tusitusiga paia. A o ia uunaia tagata o le Ekalesia e faamalolosi i luma, na saunoa Peresitene Kimball, “ua fai si umi e le o alualu i luma” le Ekalesia (“Let Us Move Forward and Upward,” Ensign, Me 1979, 82). Sa ia aoao mai foi, “E tatau ona faalautetele a tatou laa ma e tatau ona faia nei loa” (“Always a Convert Church: Some Lessons to Learn and Apply This Year,” Ensign, Sete. 1975, 3).

O le a sou manatu i le uiga o le saunoaga a Peresitene Kimball ina ua ia saunoa mai e tatau ona “faalautetele a tatou laa”?

Ina ia fesoasoani i tagata aoga ia malamalama i nisi o auala ua faanatinati ai e le Alii Lana galuega i aso nei, ma nisi o auala e mafai ona latou auai ai i Lana galuega, ia fai le gaoiogia lenei:

Vaevae le vasega i ni vaega se tolu, ma tuu atu i tagata aoga i vaega taitasi se kopi o se tasi o le tofitofiga faafaiaoga nei. Tuu atu i tagata aoga ni nai minute e suesue ma saunia ai e aoao mai i tagata o le latou vasega ia vaega na tofitofi atu ia i latou. A lava loa se taimi, faatulaga tagata aoga i ni vaega taitoatolu, ia tofu le vaega ma se tagata se toatasi mai uluai vaega e tolu. Valaaulia tagata aoga e auauai e aoao a latou vaega e uiga i auala ua faanatinati ai e le Alii ia Lana galuega, ma pe mafai faapefea ona latou auai i lena galuega.

Tofiga Faafaiaoga 1: Faanatinatiina o le galuega faafaifeautalai

Sa ta’u mai e Peresitene Spencer W. Kimball i le Au Paia e faapea, sa saunia le Alii e tatala faitotoa mo i latou e faasoa atu ai le talalelei, e aofia ai i malo sa le’i faatagaina ai le galuega faafaifeautalai. Ae peitai, sa ia saunoa foi, na manaomia e le Au Paia ona saunia i latou lava ia maua na avanoa. Na molimau mai foi Peresitene Kimball, afai e saunia alii talavou uma e auauna atu i se misiona talai, o le a tatala e le Alii faitotoa ma saunia se ala mo le galuega faafaifeautalai e alu atu ai i le lalolagi atoa. Sa ia folafola mai:

“Ou te iloa e i ai o latou pupuni [taofiga o faatosinaga mai fafo], e pei o pupuni uamea ma pupuni ofe. Ou te iloa le faigata tele aua sa tatou faia ni taumafaiga … Ae e leai se mafuaaga lelei o o’u vaaia, o le a tatala ai e le Alii ia faitotoa tatou te le o saunia e ulu atu i ai. Aisea o le a ia soloia ai i lalo le Puipui Uamea po o le Puipui Ofe po o soo se isi lava puipui, pe afai tatou te le o saunia lava e ulu atu i ai?” (“When the World Will Be Converted,” Ensign, Oke. 1974, 5, 7).

Sa mulimuli tagata o le Ekalesia i le fautuaga a Peresitene Kimball ma saunia e faasoa atu le talalelei. I le taimi o le taitaiga a Peresitene Kimball, sa siitia ai le numera o faifeautalai faamisiona i le silia i le 50 pasene. I le faaiuga o le vaitau o le 1980 ma le 1990, o malo o Siamani i Sasae, o malo i totonu o le Soviet Union sa i ai muamua, ma isi atunuu sa faasaina ai muamua le galuega faafaifeautalai, na amata ona faatagaina faifeautalai e faasoa atu le talalelei i nei atunuu. Na faataunuuina le valoaga a Peresitene Kimball.

Ia Oketopa 2008, sa toe ta‘u mai ai e Peresitene Thomas S. Monson le fautuaga na tuuina mai e Peresitene Kimball:

“O loo tumau … ona i ai lava vaega o le lalolagi e le tele so tatou aafiaga o i ai, ma e le o faatagaina ona tatou faasoa saoloto atu i ai le talalelei. E pei ona faia e Peresitene Spencer W. Kimball i le silia ma le 32 tausaga talu ai, ou te fautuaina outou ina ia tatalo mo le tatalaina o na eria, ina ia mafai ona tatou faasoa atu ia i latou le fiafia o le talalelei. A o tatou tatalo i lena taimi, sa tatou vaaia le tutupu o vavega, o le tali i aioiga a Peresitene Kimball, o lea atunuu ma lea atunuu, sa tapunia talu ai i le Ekalesia, ua tatala. O le a toe tulai mai foi lena mea pe a tatou tatalo ma le faatuatua (“Susu Maia ma Talaaao mai i le Konafesi,” Ensign po o le Liahona, Nov. 2008, 6).

Faamanino atu faapea, a o uunaia e Peresitene Kimball tagata o le Ekalesia e faalautetele a latou laa, na ia faamanino mai se tiutetauave o alii talavou uma i le Ekalesia. Valaaulia se tagata o la outou vaega e faitau leotele le faamatalaga lenei:

“O le fesili e masani ona fesiligia: Pe e tatau i alii talavou uma ona faia se misiona? Ma o le tali ua tuuina mai e le Alii. O le ‘Ioe.’ E tatau i alii talavou uma ona faia se misiona” (“When the World Will Be Converted,” 8).

Faamanatu atu i tagata o lau vaega, ua faaauau pea ona uunaia e perofeta ia alii talavou agavaa, ma malolosi uma e auauna atu i se misiona talai. Ua taliaina foi e perofeta ia tamaitai talavou e auauna atu i ni misiona talai pe afai latou te mananao i ai. Ia Oketopa 2012, sa fofogaina ai e Peresitene Thomas S. Monson se suiga musuia i tulaga manaomia i le matutua o faifeautalai, ua mafai ai e alii talavou ona amata le auaunaga faafaifeautalai i le 18 tausaga le matutua ae o tamaitai talavou i le 19 tausaga.

Ia talanoa o se vaega i fesili nei:

E tusa ai ma saunoaga a perofeta o aso e gata ai, o le a le faamoemoega o le Alii mo alii talavou e faatatau i le galuega faifeautalai faamisiona? (E ui lava e ono faaaoga e tagata o le vaega isi upu, o a latou tali e tatau ona atagia mai ai le mataupu faavae lenei: E tatau i alii talavou uma ona saunia e auauna atu i se misiona talai ma ia tausia lona agavaa e auauna atu ai.)
Aisea e tatau ona saunia ai alii talavou uma e auauna atu i se misiona talai?
E mafai faapefea e le saunia mo se misiona i le taimi nei ona fesoasoani e te saofaga ai i le galuega a le Alii?
O a auala e te manatu ua saofaga ai le suiga musuia i le matutua manaomia mo faifeautalai faamisiona i le faanatinatiina o le galuega a le Alii?

Tofiga Faafaiaoga 2: Lomiga fou o tusitusiga paia

Fai atu i tagata o lau vaega e mafaufau po o le a se mea latou te faia pe afai e fai atu se uo lelei ia te i latou, “ou te fia faalatalata atu i le Atua. O le a se mea e tatau ona ou faia?” Ona tuuina atu lea o le fesili lenei:

O le a sau tala e fai atu i lau uo?

Faitau le saunoaga lenei mai ia Peresitene Spencer W. Kimball:

“Ua ou iloaina a ou manatu faatalale i le ma fesootaiga ma le e paia, ma a oo ina foliga mai e le o faafofoga mai le Atua ma leai se siufofoga paia o fetalai mai, o lona uiga ua ou matua mamao, mamao ese lava. Afai ou te faatofuina au lava i tusitusiga paia, ona vaapiapi ai lea o le va ma toe foi mai le faaleagaga” (Aoaoga a Spencer W. Kimball, ed. Edward L. Kimball [1982], 77).

Faailoa atu i le tagata o lau vaega, o le saunoaga a Peresitene Kimball ua faamalamalama ai le manaomia tele ona tatou maua ni tusitusiga paia. Valaaulia se tagata o la outou vaega e faitau leotele le Mataupu Faavae ma Feagaiga 104:58–59. Fai atu i le vaega e mulimuli i le faitauga ma faailoa mai pe aisea na finagalo ai le Alii i taitai o le Ekalesia e lomia faaaliga.

E mafai faapefea e le suesue i tusitusiga paia ona fesoasoani ia i tatou e faalautetele ai a tatou laa ma saofaga i le faanatinatiina o le galuega a le Alii?

Faamalamalama atu faapea, i le amataga o le vaitau o le 1970, sa silafia ai e taitai o le Ekalesia le manaomia e tagata o le Ekalesia ona faateleina le iloa o tusitusiga paia, ma ia i ai se lomiga faatulagaina o le Tusi Paia mo suesuega ma le aoao atu. I le 1979, i le mavae ai o tausaga o taumafaiga musuia ma le filigā, na lolomiina ai e le Ekalesia se lomiga aloaia faa-Peretania a le AAG o le Tusi Paia King James. O lenei lomiga o le Tusi Paia, o loo i ai ni fesoasoaniga se tele mo suesuega ia sa le’i maua muamua, e aofia ai le faalauteleina o vaefaamatalaga faatasi ma mau faasino ma isi fesoasoaniga; toe faaleleia atili ulutala o mataupu; vaega pupuu mai le Faaliliuga a Iosefa Samita; o le Topical Guide; ma le Bible Dictionary. I le 1981, na lomia ai e le Ekalesia se lomiga fou o le tusi fusi tolu faa-Peretania, ua aofia ai vaefaamatalaga ua toe faaleleia, ulutala o mataupu, faafanua, ma se faasino upu. I le 2009, na lolomiina ai e le Ekalesia le lomiga a le AAG o le Tusi Paia Reina-Valera i le gagana Sipaniolo.

Valaaulia se tagata aoga e faitau le saunoaga lenei a Peresitene Boyd K. Packer o le Korama a Aposetolo e Toasefululua, na faia i le tasi o le tausaga talu ona faamatuu mai i tua le tusi fusi tolu o le 1981 i le gagana Peretania. Fai atu i tagata aoga e faalogologo mo auala na ia tagai mamao ai i le faamanuiaina o olaga ma le faaagai i luma o le galuega a le Atua e nei lomiga fou o tusitusiga paia.

“I le mavae ai o tausaga, o le a faatupuina mai e nei tusitusiga paia ni augatupulaga faamanuiaina o ni Kerisiano faamaoni, ua latou iloa le Alii o Iesu Keriso, ma ua latou mananao e usiusitai i Lona finagalo.

“… O le a latou atiina ae se talalelei e aoao ai e sili atu nai lo mea na maua e o latou augatama. O le a ia i latou le molimau o Iesu o le Keriso, ma o le a latou agavaa e folafola atu o Ia ma puipuia o Ia” (“O Tusitusiga Paia,” Liahona, Ian. 1983, 104).

Faasoa atu lau molimau e faapea, ua molimau mai tusitusiga paia o Iesu o le Keriso. O le suesueina o tusitusiga paia, e mafai ona fesoasoani ia i tatou e maua se molimau ia Iesu Keriso ma fesoasoani e faatumulia o tatou olaga i le Agaga Paia.

Faamalamalama atu faapea, sa faia ma e faaauau pea ona faia taumafaiga e tele ina ia tuuina atu i tagata o le Ekalesia ia tusitusiga paia ma fesoasoani aoga mo suesuega i a latou lava gagana moni.

Ia talanoa o se vaega i fesili nei:

Aisea e taua ai le suesueina i aso uma o tusitusiga paia?
Ua faapefea ona fesoasoani au suesuega patino o tusitusiga paia e te lagolago ai i le galuega a le Alii?

Tofiga Faafaiaoga 3: O le faanatinatiina o le galuega faalemaulmalu ma talafaasolopito o aiga

Fai atu i la outou vaega e mate mai pe fia malumalu na fausia i tausaga e 143 i le va o le faatulagaga o le Ekalesia i le 1830 ma le valaauina o Peresitene Spencer W. Kimball i le 1973 (17 malumalu). Ona fai atu lea i le vaega e mate mai pe fia malumalu na fofogaina mai pe na fausia i le 40 tausaga i le va o le 1973 ma le 2013 (153 malumalu).

Faamalamalama atu na iloga le faateleina o le fausiaina o malumalu i lalo o le taitaiga a Peresitene Gordon B. Hinckley. Valaaulia se tagata i la outou vaega e faitau le saunoaga lenei a Peresitene Hinckley:

“Ua ia te au se faanaunauga musaesae ia tu se malumalu i mea e faigofie mo le Au Paia i le lalolagi atoa. … Ua televave le galuega i le saoasaoa tatou te mafaia. O la‘u tatalo faifai pea ina ia mafai ona faateletelevave ina ia toatele o tatou tagata e mafai ona faigofie ona malaga i se maota paia o le Alii” (“O Misiona, Malumalu ma le Taitaiga,” Liahona, Ian. 1996, 66).

Valaaulia se tagata aoga e faitau leotele le Mataupu Faavae ma Feagaiga 128:15, 17. Fai atu i le vaega e mulimuli i le faitauga, ma vaavaai mo le tiutetauave ua ia i tatou mo o tatou tuaa. Ona faitau leotele lea o le faamatalaga faale-aoaoga faavae lenei na tuuina mai e Elder David A. Bednar o le Korama a Aposetolo e Toasefululua: “Ua ia te i tatou le tiutetauave o le feagaiga e sailia o tatou augatama ma tuuina atu mo i latou ia sauniga faaola o le talalelei” (“O Le a Liliu Atu Loto o Fanau i o Latou Tama,” Ensign po o le Liahona, Nov. 2011, 25).

Faamanino atu o le fausiaina o malumalu ma le faaleleia atili i le galuega o talafaasolopito o aiga, o ni faamaoniga ua faanatinati e le Atua Lana galuega i le isi itu o le veli. Valaaulia se tagata aoga e faitau le faamatalaga lenei mai ia Elder Bednar. Fai atu i le vaega e faalogologo mo auala e mafai ona latou saofagā ai i le galuega a le Alii.

“E le o se mea na faafuaveta ona oo mai le FamilySearch ma isi meafaigaluega i se taimi ua matua masani lelei ai tupulaga talavou ma se vaega tele o faamatalaga ma fesootaiga tau tekinolosi. Ua aoaoina o outou tamatamailima e auina atu feau feaveai i telefoni ma komepiuta e faatelea’i ai ma faalautele le galuega a le Alii—e le na ona fesootai vave ai ma a outou uo. O tomai ma taleni ua molimauina i le toatele o tupulaga talavou i ona po nei, o se tapenapenaga e saofagā ai i le galuega o le faaolataga” (“O Le a Liliu Atu Loto o Fanau i o Latou Tama,” Ensign po o le Liahona, Nov. 2011, 26).

Ia talanoaina le fesili lenei ma lau vaega:

O a ni aafiaga lelei na e maua i le faia o galuega o talafaasolopito o aiga po o le alu i le malumalu e auai i sauniga mo e ua maliliu?

O lo tatou tiutetauave i le faaagai i luma o le galuega

A uma ona fai e tagata aoga a latou aoaoga i a latou vaega toalaiti, valaaulia ni nai tagata aoga e faasoa mai o latou manatu ma lagona e uiga i le faanatinatiina o le galuega a le Alii.

Valaaulia se tagata aoga e faitau le saunoaga lenei a Elder David B. Haight o le Korama a Aposetolo e Toasefululua. Fai atu i le vasega e faalogologo mo mea e mafai ona tupu a o tatou auai i le galuega a le Alii.

“Uso e ma tuafafine, ua tatalaina e le Alii le ala ma ua mafai ai ona faalauteleina Lana galuega i le lalolagi atoa, ma o se matuai faamanuiaga mo i tatou uma—e taitoatasi ma lana lava ala—e auai ai. …

“O ai ea sei vagana ai perofeta a le Atua sa mafai ona muai silafia le vavega o le faatupulaia vave o le galuega a le Alii? E moni, e pei ona muai valoia mai e le Alii i le vaega e 88 o le Mataupu Faavae ma Feagaiga, ua Ia faanatinatiina Lana galuega i lona taimi (tagai i le MF&F 88:73)” (“Galuega Faafaifeautalai—O So Tatou Tiutetauave,” Liahona, Ian. 1994, 71).

E tusa ai ma le saunoaga a Elder Haight, o le a se mea e mafai ona tupu a’o tatou auai i le galuega a le Alii? (A o tali mai tagata aoga, tusi le upumoni lenei i luga o le laupapa: E mafai ona faamanuiaina i tatou e ala i le auai i le faanatinatiina o le galuega a le Alii.)
O a ni faamanuiaga ua e mauaina, a o e auai i le faanatinatiina o le galuega a le Alii?

Valaaulia tagata aoga e mafaufau i avanoa ua latou maua e saofaga ai i le faanatinatiina o le galuega a le Alii. Fai atu ia i latou e tali le fesili lenei i a latou api o le vasega po o api talaaga mo le suesueina o tusitusiga paia:

O a nisi o auala e mafai ona e saofaga ai i le faanatinatiina o le galuega a le Alii?

A ua lava loa le taimi, ona valaaulia lea o tagata aoga e faatu se sini e toe tulitatao mea na latou tusia. Faaiu i le molimau atu e uiga i le faanatinatiina o le galuega a le Alii ma o tatou tiutetauave ma avanoa e auai ai i Lana galuega.

Tala ma Faamatalaga o Talaaga

“E tatau ona faalautetele a tatou laa”

Na aoao mai Peresitene Spencer W. Kimball:

“O i ai foi la, se mea e tatau ona tatou faasoa atu? Ioe! Ua ia i tatou le talalelei a Iesu Keriso, o le talalelei o le filemu, o le talalelei o le olioli. Ua ia i tatou upumoni e mafai ona avea ai soo se tagata ma se tagata lelei atu ma sili atu ona faamalieina, soo se faaipoipoga ia fiafia atu ma suamalie atu, soo se aiga ia sili atu ona faalelagi. Ua ia i tatou le mana o le perisitua a le Atua e faamanuia ai o tatou aiga ma olaga ma olaga o isi. Ioe, o i tatou lava, o tatou aiga, a tatou korama, a tatou vasega, o tatou tofiga i le Ekalesia e tatau ona tatou tauaveina ma le malosi atu na mea ua tatou mauaina. Ma o o tatou tuaoi ma uo e le auai i le ekalesia lea ua talosagaina i tatou i le taimi nei e ‘avatu foi i ai e pei ona tatou maua.’ Ua poloaiina i tatou e le Alii ia tatou faia lena mea. E tatau ona faalautetele a tatou laa ma e tatau ona faia nei loa” (“Always a Convert Church: Some Lessons to Learn and Apply This Year,” Ensign, Sete. 1975, 3).

O Korama a Fitugafulu

O le faateleina o Korama a Fitugafulu o le faamaoniga lea ua faanatinati e le Alii Lana galuega.

I le 1976, na faatulagaina ai e Peresitene Spencer W. Kimball le Korama Muamua a Fitugafulu, ma faaopoopo atu isi Korama a Fitugafulu a’o tuputupu ae le Ekalesia. E mafai ona faaauau pea ia numera o korama pe a manaomia.

“[E oo mai i le 2014] ua … valu Korama a Fitugafulu. O korama taitasi e mafai ona oo atu i le 70 ona sui auai. O sui o Korama a Fitugafulu e masani ona faatatau atu i ai o ‘Fitugafulu.’ Ua valaauina le au fitugafulu e folafola atu le talalelei ma atinae le Ekalesia. Latou te galulue i lalo o le taitaiga a le Korama a Aposetolo e Toasefululua ma le au Peresitene o Fitugafulu. …

“… O sui o Korama Muamua ma Lua o Fitugafulu o ni au Pulega Aoao, o lona uiga e ia i latou le pule e auauna atu ai i soo se mea o le lalolagi. O sui o isi korama e ta’ua o Fitugafulu Eria, ma e tapulaa o latou pule i le eria latou te galulue ai” (“O Korama a Fitugafulu,” LDS.org).