Mataupu Faavae ma Feagaiga 98–101:42 (Iunite 21)

Anomea o Sauniuniga mo le Faiaoga mo Suesuega i le Fale

Aotelega o Lesona mo Suesuega i le Fale i Aso Taitasi

O le aotelega lenei o mea na tutupu, aoaoga faavae, ma mataupu faavae na aoaoina e tagata aoga a’o latou suesueina le Mataupu Faavae ma Feagaiga 98–101:42 (iunite 21) e le o faamoemoe e aoaoina o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.

Aso 1 (Mataupu Faavae ma Feagaiga 98)

A o suesueina e tagata aoga e uiga i nisi o vevesiga o le au faatupu faalavelave na tupu i le Au Paia i le Itumalo o Jackson, Misuri, na latou aoaoina ai, tatou te faamaonia atu i tatou lava i le Alii e ala i le tausia o a tatou feagaiga, e tusa lava pe e faigata ona faia lena mea. Na aoaoina foi e tagata aoga afai tatou te onosaia faiga agaleaga ma le onosai ma e aunoa ma le tali ita atu i ai, o le a tauia i tatou e le Alii. Ma le mea mulimuli, sa latou aoaoina o le ulufale atu i taua e mafai ona ta’uamiotonuina i lalo o tulaga faatonuina e le Alii.

Aso 2 (Mataupu Faavae ma Feagaiga 99–100)

I lenei lesona sa aoaoina e tagata aoga, e fai i tatou ma sui o le Alii pe a tatou faia ni misiona, ma o i latou o e talia le talalelei “e pei o se tamaitiiti” (MF&F 99:3) maua le alofa mutimutivale. Sa latou aoaoina foi afai o le a sii atu o tatou leo e faasoa atu le talalelei i isi ma le loto atoa ma i le agaga o le agamalu, o le a fesoasoani le Alii ia tatou iloa upu e tautala atu ai ma o le a molimau atu le Agaga Paia i la tatou savali. Na iloa foi e tagata aoga o le a galulue faatasi mea uma mo lo tatou lelei pe afai tatou te savavali tonu i luma o le Alii.

Aso 3 (Mataupu Faavae ma Feagaiga 101:1–16)

A o suesueina e tagata aoga le tutulieseina o le Au Paia mai le Itumalo o Jackson, Misuri, na latou aoaoina ai a tatou solia poloaiga, e faataga e le Atua ina ia tatou mafatia; e ese mai lenei mea mai tofotofoga ma faigata e aafia ai i latou o e amiotonu. Na latou aoaoina foi afai o le a tatou lē onosaia le aoaiga, e le mafai ona faapaiaina i tatou. Na iloa e tagata aoga e tusa lava pe tatou te agasala, o le a agaalofa lava le Alii ia i tatou. Pe a tatou ola amiotonu, e mafai ona tatou maua le mafanafana i le malamalama e i ai tagata uma i aao o le Alii.

Aso 4 (Mataupu Faavae ma Feagaiga 101:17-42)

O se vaega o lenei lesona, sa aoaoina e tagata aoga ni auala e mafai ona tatou saunia ai mo le Afio Mai Faalua o le Faaola. Sa latou faailoa mai foi le mataupu faavae e faapea, o i latou o e mafatia i sauaga ona o le suafa o le Faaola ma tumau i le faatuatua, o le a maua le mamalu o le Atua. E le gata i lea, ua latou iloa foi, ina ia fesoasoani i tagata o le lalolagi ia maua faamanuiaga a le Atua, e tatau ona tatou salamo i a tatou agasala ma lotomaualalo.

Folasaga

O lenei lesona e taulai atu i nisi o faatonuga o loo i le Mataupu Faavae ma Feagaiga 98 na tuuina mai e le Alii i le Au Paia o e sa sauaina e tagata faatupu faalavelave. O lenei lesona e mafai ona fesoasoani i tagata aoga ia malamalama i auala e tatau ona tatou tali atu ai i tulaga faigata, ma e mafai ona fesoasoani e faamalolosia ai a latou molimau i le mana ma le agalelei o le Alii.

Fautuaga mo le Aoaoina Atu

Mataupu Faavae ma Feagaiga 98

Sa faamalosiau mai le Alii i le Au Paia i le taimi o o latou puapuaga

A o le’i amataina le vasega, tusi fesili nei i luga o le laupapa: O a ni ou lagona e i ai? O le a se mea e te faia?

Faamalamalama atu i tagata aoga, o le lesona o le aso, o le a latou aoao ai e uiga i nisi o tofotofoga ma sauaga na oo i le Au Paia sa nonofo i le Itumalo o Jackson, Misuri, ia Iulai 1833. Faamalamalama atu, sa feita nisi o tagata Misuri i le Au Paia ona o eseesega faaleupufai, faaagafesootai, tamaoaiga, ma faalelotu.

Valaaulia se tagata aoga e faitau leotele le palakalafa lenei:

I le aso Toonai, 20 Iulai, 1833, e i le va o le 400 ma le 500 tagatanuu le fiafia o Misuri sa faapotopoto i le fale faamasino i Initipene, Misuri. Sa latou filifilia se komiti e tusia se pepa o faamatalaga e otooto ai o latou manaoga mo tagata Mamona. Sa latou poloaia faamalosi ina ia le toe i ai ni tagata o le Au Paia o Aso e Gata Ai e toe faatagaina ona siitia atu i le Itumalo o Jackson, ma fai mai, o i latou o loo nonofo ai i le taimi lea, e tatau ona tauto atu e o ese i se vave e mafai ai. E le gata i lea, sa latou poloaiina foi ina ia taofia le toe lolomiina o le nusipepa a le Ekalesia. Ina ua faailoa atu nei poloaiga i taitai o le Ekalesia i Misuri, sa matuai tete’i taitai o le Ekalesia ma talosagaina ai se tolu masina e mafaufau ai i lenei fautuaga ma se’i feutagai ma taitai o le Ekalesia i Ohaio. Sa teena e le vaega o tagatanuu o Misuri na tuuina mai nei poloaiga le talosaga a taitai o le Ekalesia. Ona talosagaina lea e le Au Paia ni aso se 10, ae sa na o le 15 minute na faataga mai e tali atu ai. (Tagai i le Church History in the Fulness of Times Student Manual, 2nd ed. [Church Educational System manual, 2003], 132–33.)

Fai atu i tagata aoga e tali atu i fesili o loo i luga o le laupapa.

Fai atu i se isi tagata aoga e faitau leotele le palakalafa lenei:

Sa vave ona suia tagata Misuri sa i ai i le fonotaga i le fale faamasino i Initipene i se vaega faatupu faalavelave, ma tonu ai e faaleaga le ofisa ma le masini lomitusi. Sa osofaia faamalosi e le vaega faatupu faalavelave le ofisa lomitusi, ma tauai i le alatele ma le togalaau ia meafale, talepe le masini lomitusi, ma faataape solo tailolomi, ma faaleaga le toetoe o galuega uma na lolomiina, e aofia ai le tele o itulau e le’i faapipiiina o le Tusi o Poloaiga. O le isi mea sa mananao le vaega faatupu faalavelave e fai o le faaleaga lea o le Faleoloa o Gilbert ma Whitney. Ae ui i lea, sa fetaui Sini Gilbert ma le au faatupu faalavelave a’o le’i mafai ona latou faatinoina la latou fuafuaga, ma tautino atu i ai, o le a tapena ana mea ma aluese i aso e tolu. (Tagai i le Church History in the Fulness of Times, 133.)

Fai i tagata aoga e toe tali atu i fesili o loo i luga o le laupapa.

Valaaulia se isi tagata aoga e faitau leotele le palakalafa lenei:

O le tolu o aso mulimuli ane, i le aso 23 o Iulai, sa toe oo mai ai le vaega leaga i le Itumalo o Jackson, Misuri, ae o le taimi lenei sa faaauupegaina i fana tetele, tamai fana, sasa, ma laau. Sa susunu e le au faatupu faalavelave faaputuga vaomago ma faatoaga saito, ma faaleaga nisi o fale, fale i faatoaga, ma pisinisi. Na iu lava ina faafetoai e le au faatupu faalavelave ni taitai se toaono o le Ekalesia, o e, ina ua vaaia le lamatiaina o meatotino ma soifua o le Au Paia, sa latou ofo atu o latou ola e fai ma sui [o le Au Paia ma a latou meatotino]. O le teena ai o lenei ofo, sa taufaamata’u ane taitai o le au faatupu faalavelave o le a sasaina ia alii, tamaitai, ma tamaiti uma lava seiiloga latou te ioe atu e o ese ma le itumalo. I lalo o nei faiga faamalosi, sa sainia ai e le Usoga se maliega e o ese ma le Itumalo o Jackson—o le afa o tagata o le Ekalesia ma le toatele o taitai e oo atu i le aso 1 o Ianuari, 1834 ua o ese, ae o le vaega na totoe o le aso 1 o Aperila, 1834. Na faataga e le au faatupu faalavelave ia John Corrill ma Sini Gilbert e nonofo e faatau ese ia fanua o le Au Paia o e na tutuli ese. (Tagai i le Church History in the Fulness of Times, 134.)

Fai i tagata aoga e toe tali atu i fesili o loo i luga o le laupapa.

Valaaulia se tagata aoga e faitau leotele le folasaga o le vaega mo le Mataupu Faavae ma Feagaiga 98. Fai atu i le vasega e mulimuli i le faitauga, ma vaavaai mo le mea na mafua ai lenei faaaliga. Valaaulia tamaiti e lipoti mai mea latou te mauaina.

E tusa ai ma le folasaga o le vaega, o le a le mea e tulaga ese ai le taimi o lenei faaaliga?

Valaaulia se tagata aoga e faitau leotele le Mataupu Faavae ma Feagaiga 98:1–2. Fai atu i le vasega e mulimuli i le faitauga, ma vaavaai mo le fautuaga na tuuina mai e le Alii i le Au Paia. (Atonu e aoga le faamalamalama atu o le Sapaota, i le fuaiupu e 2, o se upu Eperu e masani ona faauigaina o ‘au po o autau. O lona faaaogaaga iinei e faailoa ai e i ai autau agelu a le Alii, po o ‘au, ma autau a Isaraelu, po o le Au Paia, i Lana faatonuga. [Tagai i le Bible Dictionary, “Sabaoth.”])

O le a le fautuaga na tuuina mai e le Alii i le Au Paia? (Tusi tali a tagata aoga i luga o le laupapa.)
Aisea e taua ai mo le Au Paia ona ave le faafetai i taimi o faigata?
O le a lou manatu i le uiga o le faatalitali ma le onosai i le Alii?

Valaaulia se tagata aoga e faitau leotele le faamatalaga lenei mai ia Elder Robert D. Hales o le Korama a Aposetolo e Toasefululua. Fai atu i le vasega e faalogologo mo le uiga o le faatalitali ma le onosai i le Alii.

“O le a la, le uiga o le faatalitali i le Alii? I tusitusiga paia, o le upu faatalitali o lona uiga ia faamoemoe, ia tepa taulai, ma ia faalagolago. O le faamoemoe ma le faalagolago i le Alii e manaomia ai le faatuatua, onosai, lotomaualalo, agamalu, faapalepale, tausia o poloaiga, ma le tumau seia oo i le iuga” (“Faatalitali i le Alii: Ia Faia Lou Finagalo” Ensign po o le Liahona, Nov. 2011, 72).

E faapefea ona fesoasoani le saunoaga a Elder Hales ina ia e malamalama i le uiga o le faatalitali ma le onosai i le Alii?
Aisea na ono taua ai le fautuaga e faatalitali ma le onosai i le Alii mo le Au Paia i Misuri?
O a ni fetalaiga faamafanafana na tuuina mai e le Alii i le Au Paia i le fuaiupu e 2?

Tusi le mataupu faavae le uma lenei i luga o le laupapa: Afai tatou te avatu le faafetai i mea uma, ma faatalitali ma le onosai i le Alii, ona …

Valaaulia se tagata aoga e faitau leotele le Mataupu Faavae ma Feagaiga 98:3. Fai atu i le vasega e mulimuli i le faitauga, ma vaavaai mo mea na folafola mai e le Alii i le Au Paia pe afai latou te usiusitai i Ana fautuaga.

E faapefea ona e faaumaina le mataupu faavae o loo i luga o le laupapa, e faavae i luga o le fuaiupu e 3? (O se tasi lenei o auala e faauma ai le mataupu faavae: Afai tatou te avatu le faafetai i mea uma ma faatalitali ma le onosai i le Alii, ona mafai lea e le Alii ona faia o tatou puapuaga ia galulue faatasi mo lo tatou lelei.)

Valaaulia tagata aoga e mafaufau i se tasi latou te iloa o le sa faatalitali ma le onosai i le Alii i taimi o faigata ma maua ai mafuaaga e faafetai ai.

O a ni auala na aumaia ai e puapuaga ni mea lelei i le olaga o lena tagata?

Valaaulia se tagata aoga e faitau leotele le Mataupu Faavae ma Feagaiga 98:18. Fai atu i le vasega e mulimuli i le faitauga, ma vaavaai mo se faamanuiaga o le a maua e tagata faamaoni.

Faaiu i le molimau atu e uiga i mataupu faavae sa outou talanoaina i le vasega i le aso.

Iunite e Sosoo Ai (Mataupu Faavae ma Feagaiga 101:43–101; 102–105)

Valaaulia tagata aoga e vaai faalemafaufau pe ono faapefea ona latou tali atu, pe afai e valaauina i latou e le Alii e savavali mo le fia selau o maila i ni masina e fesoasoani atu i tagata o le Ekalesia sa manaomia le fesoasoani. Faamalamalama atu, a o latou suesue i vaega o totoe o le Mataupu Faavae ma Feagaiga 101 ma vaega 102 e oo i le 105 i le vaiaso a sau, o le a latou aoao ai e uiga i se vaega o tagata o e na ofo atu e malaga mai Ohaio i Misuri ina ia fesoasoani atu i uso a tagata o le Ekalesia. O lenei vaega sa ta’ua o le Tolauapiga a Siona.