Mataupu Faavae ma Feagaiga 65–71 (Iunite 15)

Anomea o Sauniuniga mo le Faiaoga mo Suesuega i le Fale

Aotelega o Lesona mo Suesuega i le Fale i Aso Taitasi

O le aotelega lenei o mea na tutupu, aoaoga faavae, ma mataupu faavae na aoaoina e tagata aoga a’o latou suesueina le Mataupu Faavae ma Feagaiga 65–71 (iunite 15) e le o faamoemoe e aoao atu o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.

Aso 1 (Mataupu Faavae ma Feagaiga 65–66)

A o suesueina lenei lesona, sa aoaoina ai e tagata aoga e faapea, o le a oo atu le talalelei a Iesu Keriso i tuluiga o le lalolagi. Na latou iloaina ai e i ai so tatou tiutetauave ia saunia i tatou lava ma isi mo le Afio Mai Faalua o Iesu Keriso.

Aso 2 (Mataupu Faavae ma Feagaiga 67)

I lenei lesona, na faailoa mai ai e tagata aoga ia mataupu faavae nei: E faafofoga mai le Alii i a tatou tatalo ma silafia o tatou loto; afai tatou te faataga le fefe i totonu o o tatou loto, o lona uiga e mafai ona tatou le maua ni faamanuiaga. Na latou aoaoina foi, a’o tatou aveesea mai i tatou lava mai le lotoleaga ma le fefe, ae faamaualalo i tatou lava, ma faaauau pea i le onosai, o le a mafai ona tatou mafuta i le afioaga o le Alii.

Aso 3 (Mataupu Faavae ma Feagaiga 68)

O se vaega o lenei lesona, sa aoaoina ai e tagata aoga e faapea, pe a musuia auauna a le Alii e le Agaga Paia, o a latou saunoaga o le a taitai atu ai tagata i le faaolataga. Na aoaoina foi e tagata aoga, o epikopo e tatau ona faamaonia mai e le Au Peresitene Sili ma faauuina i le pule tatau. Ma le isi, na iloa e tagata aoga ua poloaiina e le Alii ia matua e aoao a latou fanau ia malamalama i le aoaoga faavae o le salamo, faatuatua ia Keriso, papatisoga, ma le meaalofa o le Agaga Paia.

Aso 4 (Mataupu Faavae ma Feagaiga 69-71)

Mai le fautuaga a le Alii ia Ioane Uitimera, na aoaoina ai e tagata aoga, e faamoemoe le Alii ia tausia talafaasolopito mo le manuia o le Ekalesia ma mo le tupulaga faia‘e. Na iloa ai foi e tagata aoga o le a faamasinoina i tatou e le Alii mo tiute ua Ia tuuina mai ia i tatou. O le mea mulimuli, na aoaoina e tagata aoga e faapea, pe a faitio tagata i le ekalesia, e mafai ona tatou tali atu i le faasoa atu o upumoni mai tusitusiga paia ma mulimuli i le taitaiga a le Agaga.

Folasaga

O lenei lesona e taulai atu i fetalaiga a le Alii ia William E. McLellin i le Mataupu Faavae ma Feagaiga 66. E ala i la latou suesuega o le vaega lenei, e mafai e tagata aoga ona aoao i le taua o le salamo i a latou agasala uma, aveeseina o mea e faalavelave i lo latou alualu i luma faaleagaga, ma le tumau faamaoni seia oo i le iuga.

Fautuaga mo le Aoaoina Atu

Mataupu Faavae ma Feagaiga 66

Ua poloaiina e le Alii ia William E. McLellin e folafola atu le talalelei, lafoaʼi ese amioletonu uma, ma ia faaauau pea ma le faamaoni i le iuga

A o lei amataina le vasega, kopi le ata lenei i luga o le laupapa.

A o amataina le vasega, valaaulia tagata aoga e iloilo le ata o loo i luga o le laupapa. Fai atu ia i latou e mafaufau loloto ma le filemu po o fea o le a latou tuuina i ai i latou lava i luga o le ata. Ia fautua atu foi e mafaufau po o le fea o itu o loo latou agai i ai—latalata atili atu i le Atua po o le mamao ese mai ia te Ia. Ona valaaulia lea o se tagata aoga e faitau leotele le saunoaga lenei mai ia Peresitene Henry B. Eyring o le Au Peresitene Sili. Fai atu i le vasega e faalogologo mo auala e mafai ona tatou faalatalata atili atu ai i le Atua.

“Afai e te fia faalatalata pea i se tasi e pele ia te oe, ae o loo mamao ese mai ia te oe, e te iloa lava le ala e fai ai. O le a e sailia se ala e te talanoa atu ai ia te i latou, o le a e faalogo atu ia te i latou, ma o le a e iloa foi ni ala e faia ai ni mea mo i latou taitoatasi. O le faateleina o le tupu soo o lena mea, o le umi atu foi lena e faaauau ai, o le loloto atili foi lena o le sootaga o le alofa [i le va ma i latou]. Afai e tele se taimi e alu e aunoa ma se toe talanoa atu i ai, faalogo atu i ai, ma faia se mea mo i latou, o le a faavaivaia lea sootaga.

“E atoatoa ma mamana le Atua, a o oe ma a’u o ni tagata faaletino. Peitai o Ia o lo tatou Tama, e alofa o ia ia i tatou, ma ua ia ofoina mai lea lava avanoa e faalatalata atu ai ia te ia e pei ona faia i se uo pele. Ma o le a e faia foi i lea lava ala e tasi: talanoa, faalogo, ma faia” (“Ia Falatala i le Atua,” Liahona, Iulai 1991, 72).

E tusa ai ma le saunoaga a Peresitene Eyring, e mafai faapefea ona tatou faalatalata atili atu i le Atua?
O le a sou manatu i le uiga o le talanoa, faalogo, ma le faia, a o tatou taumafai e faalatalata atili atu i le Atua?

Faamalamalama atu e faapea, i aso popofou o le Ekalesia, sa faalatalata atili atu ai se tagata e igoa ia William E. McLellin i le Atua ina ua ia aoao e uiga i le talalelei toefuataiina. Na papatisoina o ia i le aso 20 o Aokuso, 1831. E le’i leva lena, ae faauuina o ia o se toeaina, ma sa la o atu ma Ailama Samita mo ni nai vaiaso o se faifeautalai. Ia Oketopa 1831, sa ia malaga atu ai i Ohaio mo se konafesi a le Ekalesia. A o i ai iina, sa ia feiloai ai i le Perofeta o Iosefa Samita. I le aso 29 o Oketopa, sa tatalo faalilolilo ai Uso McLellin, ma ole atu i le Alii e faaali mai ni tali i ni fesili faapitoa se lima e ala i le Perofeta. E aunoa ma le tauina atu ia Iosefa Samita o fesili, na talosagaina ai e Uso McLellin se faaaliga. A o faalau mai e le Perofeta le faaaliga o loo maua i le Mataupu Faavae ma Feagaiga 66, na iloa e Uso McLellin sa taliina mai ana fesili taitasi. Sa tuuina mai e le Alii ia te ia ni faatonuga ma ni lapataiga e fesoasoani ia te ia e tumau ai i le faamaoni ma iu ai ina maua le ola e faavavau.

Valaaulia se tagata aoga e faitau leotele le Mataupu Faavae ma Feagaiga 66:1–2. Fai atu i le vasega e mulimuli i le faitauga, ma vaavaai mo mafuaaga na faamanuiaina ai e le Alii ia William McLellin i le taimi o le faaaliga lenei.

Aisea na mafai ai e Uso McLellin ona maua faamanuiaga mai le Alii? (Ona sa liliuese o ia mai ana agasala, maua upumoni a le Alii, ma maua le atoatoa o le talalelei.)

Valaaulia tagata aoga e faitau filemu le Mataupu Faavae ma Feagaiga 66:3, ma vaavaai mo mea na fetalai mai le Alii sa manaomia pea ona fai e Uso McLellin ina ia fiafia ai o Ia. Fai atu i tagata aoga e lipoti mai mea na latou aoaoina.

O le a sou manatu i le uiga o le “mamā, ae ua lē mamā atoa”? (Atonu e manaomia ona e fesoasoani atu i tagata aoga ia malamalama, e ui lava sa tele se alualu i luma o Uso McLellin ma na faamanuiaina i ana taumafaiga, ae sa manaomia lava ona salamo i nisi o agasala.)
O le a se mea e mafai ona tatou aoao mai i le fautuaga a le Alii i le fuaiupu e 3? (E tatau ona faailoa mai e tagata aoga le poloaiga lenei: Ua poloaiina i tatou e salamo i a tatou agasala uma.)
Aisea e taua ai le salamo ia tatou agasala uma, ae le na o nisi o agasala?
O le a se mea e mafai ona tatou aoao mai i lenei fuaiupu e uiga i le auala o le a fesoasoani mai ai le Alii i lo tatou salamo? (Atonu e eseese tali a tagata aoga, ae e tatau ona latou faamatala mai le mataupu faavae lenei: O le a faaali mai e le Alii ia i tatou mea e tatau ona tatou salamo ai.)

Valaaulia se tagata aoga e faitau leotele le saunoaga lenei a Peresitene Henry B. Eyring. Fai atu i le vasega e faalogologo mo se tasi o auala e mafai ona tatou ole atu ai i le Alii e fesoasoani mai ia tatou salamo.

“O se tasi o fesili e tatau ona tatou ole atu ai i lo tatou Tama Faalelagi i na tatalo faalilo o le: ‘O le a se mea ua ou faia i lenei aso, pe le’i faia, ua faatiga ai i Lau Afio? Afai e mafai ona ou iloa, o le a ou salamo mai ai ma lo‘u loto atoa e aunoa ma le faatuai.’ O lena tatalo faamaualalo o le a taliina mai” (“Aua Le Faatuai,” Liahona, Ian. 1999, 40).

Uunaia tagata aoga e mafaufau i faamanuiaga ua latou maua ina ua latou liliuese mai agasala ma maua le talalelei. Valaaulia i latou e saili ina ia iloa mea e tatau ona latou salamo ai, ina ia mafai ona latou maua faamanuiaga e sili atu.

Vaevae le vasega i ni paga. Fai atu i paga e faitau faatasi le Mataupu Faavae ma Feagaiga 66:5–9 ma vaavaai mo mea na finagalo le Alii e fai e Uso McLellin. Fai atu i tamaiti aoga e lipoti mai mea latou te maua.

E tusa ai ma fuaiupu e 8-9, o a faamanuiaga o le a maua e Uso McLellin pe afai o le a ia faia ma le faamaoni le finagalo o le Alii?
O le a se mea e mafai ona tatou aoaoina mai i nei fuaiupu e uiga i faamanuiaga e mafai ona tatou maua pe a tatou mulimuli i le finagalo o le Alii mo i tatou? (E tatau ona faailoa mai e tagata aoga le mataupu faavae lenei: Afai tatou te faamaoni i le faia o le finagalo o le Alii, o le a faatasi o Ia ma i tatou ma o le a faamanuia i tatou ina ia mafai ona tatou ausia mea ua Ia manaomia mai ia i tatou.)

Faamalamalama atu e faapea, e le gata i le tuuina mai ia William McLellin o faatonuga e uiga i mea e tatau ona fai, ae sa tuuina mai foi e le Alii ia te ia se lapataiga. Fai atu i se tagata aoga e faitau leotele ia fuaiupu muamua e lua o le Mataupu Faavae ma Feagaiga 66:10. A o lei ona faitauina, faailoa atu o le fuaiupu muamua o loo aofia ai le upu faalavelavea. Faamalamalama e faalavelavea se mea ia i tatou pe a ona polokaina lo tatou ala, po o le matuai faafaigataina o le faamaeaina o se galuega.

Na poloaiina e le Alii ia Uso McLellin e “lafoaʼi i amioletonu uma.” E faapefea e le amioletonu, po o le agasala, ona faalavelavea i lana galuega faafaifeautalai?
E faapefea ona faalavelavea le amioletonu ia i tatou i le faaleagaga?

Faitau leotele le fuaiupu lona tolu o le Mataupu Faavae ma Feagaiga 66:10, ma valaaulia le vasega e vaavaai mo se lapataiga patino na tuuina mai e le Alii ia Viliamu McLellin.

E tusa ai ma le fuaiupu e 10, o le a le tofotofoga na tauivi ma Uso McLellin?
O le a se mea e mafai ona tatou aoao mai i le fuaiupu e 10 e uiga i le malamalama o le Alii ia i tatou taitoatasi? (Fesoasoani i tagata aoga ia iloa e silafia e le Alii o tatou luitau patino ma faaosoosoga, e pei ona sa Ia silafia ai Uso McLellin.)
Aisea e te manatu e taua ai le malamalama e silafia e le Alii o tatou luitau patino ma faaosoosoga?

Valaaulia se tagata aoga e faitau leotele le Mataupu Faavae ma Feagaiga 66:11-13. Fai atu i le vasega e mulimuli i le faitauga, ma vaavaai mo le fautuaga faaopoopo na tuuina mai e le Alii ia Viliamu McLellin.

E tusa ai ma le fuaiupu e 12, o le a le mea e tatau ona faia e maua ai le ola e faavavau? (Fesoasoani i tagata aoga ia iloa, afai tatou te faaauau pea ma le faamaoni e oo i le iuga, o le a tatou maua le ola e faavavau.)
O le a le uiga ia te oe o le faaauau pea ma le faamaoni e oo i le iuga?

Faamalamalama atu faapea, ina ua tuuina mai lenei faaaliga, ua maua e Viliamu McLellin se molimau e uiga i le talalelei toefuataiina. Ina ua uma ona tuuina mai le faaaliga, sa ia molimau atu e uiga i le valaauga faaperofeta o Iosefa Samita. Sa auauna atu ma le faamaoni Uso McLellin mo ni nai tausaga ma sa valaauliaina e avea o se tasi o tagata muamua o le Korama a Aposetolo e Toasefululua i lenei tisipenisione. Ae peitai, sa le’i faaauau ai pea ma le faamaoni o ia e oo i le iuga. O le mea moni, na liliu faasagatau atu o ia i le Perofeta o Iosefa Samita, ma tapeina ai lona igoa i le 1838.

Ia tatai atu mafaufau o tagata aoga i le ata o loo i luga o le laupapa, ma fautua atu e toe mafaufau po o fea o le a latou tuu ai i latou lava i lena ata. Fai atu ia i latou e mafaufau loloto i le fesili lenei:

O le a se mea e te faia e te faalatalata atili atu ai i le Atua ma faaauau faamaoni ai e oo i le iuga?

Molimau atu e uiga i aoaoga faavae ma mataupu faavae na outou talanoaina, ma faamalosiau atu i tagata aoga e galulue i nei upumoni.

Iunite e Sosoo Ai (Mataupu Faavae ma Feagaiga 72–76)

Fai atu i tagata aoga e vaai faalemafaufau pe faapei le mauaina o se vaaiga puupuu i seoli (pogisa i fafo) ma isi mafatiaga o e e lē amioatua ona maua lea o se faaaliga vaaia e uiga i malo o le mamalu o selesitila, terasitila, ma le telesitila. Faamalamalama atu e faapea, ona o la laua galuega i le faaliliuga musuia o le Tusi Paia, sa faapea ona mafai ai e le Perofeta o Iosefa Samita ma Sini Rikitone ona pupula o laua mata e vaai ai i se faaaliga e uiga i tikeri o mamalu e tolu, lea na faamaumauina i le Mataupu Faavae ma Feagaiga 76.