Lesona 121: Ua Siitia Atu Le Ekalesia i Misuri i Matu
Lesona 121
Ua Siitia Atu Le Ekalesia i Misuri i Matu
Folasaga
I le 1837 ma le 1838, sa taitai ai e le Perofeta o Iosefa Samita ma isi taitai o le Ekalesia le Ekalesia i se vaitau o faigata. O se taunuuga o le atuatuvale, faaloloto, saili masei, ma sauaga, pe tusa ma le 10 po o le 15 pasene o le Au Paia i Katelani, Ohaio, ma Misuri i matu na liliuese, e aofia ai ma ni taitai iloga o le Ekalesia. Sa amata ona siitia atu le Au Paia faamaoni i Ohaio e auai faatasi ma i latou i matu o Misuri. O lenei lesona e mafai ona fesoasoani i tagata aoga ia malamalama ma aoao mai mea na tutupu anamua ma tuu atu ai ia i latou ni vaaiga manino i faaaliga na maua i lenei vaitaimi.
Fautuaga mo le Aoaoina Atu
O le Liliuese ma le aai o Sisifo Mamao
I se vaitau o le liliuese ma sauaga, sa siitia atu ai le Au Paia faamaoni i Misuri i matu
A o lei amataina le vasega, tusi le fesili lenei i luga o le laupapa: Mata e fesoasoani faigata ma tofotofoga ia faamalosia lo tatou faatuatua, pe mafua ai ona tatou lafoai le faatuatua? Atonu foi e te manao e tusi se faafanua i luga o le laupapa e faaali ai le nofoaga o Katelani, Ohaio, ma isi nuu i Misuri i matu.
Amata le vasega i le valaaulia o tagata aoga e tali atu i le fesili o loo i luga o le laupapa. Pe a uma ona faasoa mai e tagata aoga o latou manatu, faamalamalama atu e faapea, i le 1837 ma le 1838, o se faasologa o tofotofoga na mafua ai ona feagai le toatele o le Au Paia ma lenei lava fesili. Faamalamalama atu i lenei lesona, o le a aoao ai tagata aoga e uiga i nei mea faigata na tutupu ma le auala na tali atu ai le Au Paia ia i latou. Valaaulia tagata aoga e mafaufau loloto pe mafai faapefea e la tatou tali atu i tofotofoga ona a lē faamalosia pe faavaivaia ai lo tatou faatuatua ia Iesu Keriso.
Atonu foi e te faamalamalama atu i tagata aoga, o lenei lesona e mafai ona fesoasoani ia i latou ia malamalama ai i le tulaga anamua o faaaliga o le a latou suesue i ai i le Mataupu Faavae ma Feagaiga 113–123.
Faasino atu ia Misuri i le faafanua. Faamalamalama atu ina ua tutuliesea le Au Paia mai le Itumalo o Jackson, Misuri, i le 1833, sa taliaina e tagatanuu o le Itumalo tuaoi o Clay le toatele o i latou ma tuuina atu ia i latou le toomaga, ma le faamoemoe o le a na o se taimi le tumau o le a nonofo ai le Au Paia. Ae peitai, ina ua toeitiiti tolu tausaga o nonofo ai iina le Au Paia, sa amata e nei tagatanuu ona faamalosi i latou e tuua le itumalo.
Faasino atu ia Katelani, Ohaio, i le faafanua. Faamalamalama atu faapea, i le 1837, o le tausaga talu ona uma le faapaiaina o le Malumalu o Katelani, sa oo ai le Au Paia i tofotofoga sa tofotofoina ai lo latou faatuatua. Sa liliuese se vaega o le Au Paia ma tuua le Ekalesia, e aofia ai ma nisi o taitai iloga o le Ekalesia.
Vaevae le vasega i ni vaega se lua. Tuu atu se kopi o se tasi o aotelega lenei o mea na tutupu anamua mo vaega taitasi. (Afai e toatele lau vasega, atonu e te manao e vaevae tagata aoga i ni vaega taitoafa pe taitoaono ma tuu atu i vaega taitasi se kopi o se tasi o aotelega. O lenei faiga o le a mafai ai e tagata aoga e toatele ona auai i le talanoaga.) Valaaulia vaega taitasi e faitau faatasi le aotelega ma talanoa i fesili i le faaiuga o le aotelega. Tofi se tagata e toatasi i vaega taitasi e taitaia le talanoaga ma fesoasoani i le vaega e tusi se mataupu faavae e faasoa mai i le vasega i se taimi mulimuli ane.
Aotelega 1 o Mea na Tutupu Anamua—o le Liliuese i Katelani
I le 1837, na oo ai le Au Paia i Katelani, Ohaio, i nisi o faafitauli tautupe. Ina ia fesoasoani i le Au Paia ina ia lava mea latou te faalagolago i ai i a latou mea tautupe, sa faavaeina ai e Iosefa Samita ma isi taitai o le Ekalesia se kamupani e pei o se faletupe ma ta’ua o le Sosaiete Saogalemu a Katelani. Ona o le salalau solo o le faaletonu o le tamaoaiga i lena vaitaimi, na tele ai faletupe sa gau i le atunuu atoa. Sa gau foi le Sosaiete Saogalemu a Katelani i le tautoulu o le 1837. E luaselau tagata faaunetupe i le faletupe na toetoe a gau ai a latou tupe uma, ma o Iosefa Samita sa sili ona tele lona gau. E ui lava sa le’i faatupeina e le Ekalesia le Sosaiete Saogalemu o Katelani, ae sa manatu i ai nisi o le Au Paia o se faletupe a le Ekalesia po o le faletupe a le Perofeta, ma tuuaia ai Iosefa mo o latou faafitauli tautupe. Sa oo lava foi ina amata ta’u o ia e nisi o se perofeta toilalo. Ae e ui lava i le gau o le faletupe, o le toatele o isi na gau ai a latou tupe, sa tausisia le faamaoni ma tumau faamaoni i le Perofeta. (Tagai i le Church History in the Fulness of Times Student Manual [Church Educational System manual, 2003], 171–73.)
Sa salalau solo se agaga o le liliuese ma le saili masei i le toatele o le Au Paia. Sa faamatalaina e Polika Iaga se mea na tupu ina ua feiloai nisi o taitai o le Ekalesia a le Au Paia, e teena ia Iosefa Samita ma tofia se perofeta fou:
Ata
Peresitene Polika Iaga
“O nisi o le Toasefululua, o molimau o le Tusi a Mamona, ma isi o le Pulega o le Ekalesia, sa faia se fonotaga i le afeafe pito i luga o le Malumalu. O le fesili sa folasia i o latou luma o le faamautinoa o le auala e mafai ona aveesea ai le tofi mai le Perofeta o Iosefa, ae tofia Tavita Uitimera e fai ma Peresitene o le Ekalesia. … Sa ou tulai, ma i se auala manino ma le malosi na ou fai atu ai ia i latou, o Iosefa o se Perofeta, ma sa ou iloaina, ma e mafai ona latou tetee malosi ma faia faamatalaga e ta’uleaga ai o ia, i le tele latou te mananao ai, ae e le mafai ona latou talepeina le tofiaina o le Perofeta a le Atua, e pau le mea e mafai ona latou faia o le faaumatia o o latou lava pule, motusia le manoa na fusia ai i latou i le Perofeta ma i le Atua ma gogoto ai i latou lava i seoli” (Manuscript History of Brigham Young 1801–1844, ed. Elden Jay Watson [1968], 15-16).
E oo ane ia Iuni 1838, e tusa ma le 200 po o le 300 tagata liliuese na tuua le Ekalesia, e aofia ai Aposetolo e toafa, o Molimau e Toatolu o le Tusi a Mamona, ma se sui o le Au Peresitene Sili (tagai i le Church History in the Fulness of Times, 177). Ae peitai, o le toatele o le Au Paia na tali atu i lena vaitaimi i tofotofoga ma le faatuatua, e pei ona sa faia e Polika Iaga. Na faamalolosia i latou e le Alii, ma sa latou tumau faamaoni i a latou molimau. O nisi o i latou o e sa tuua le Ekalesia i lena vaitau o le liliuese, sa toe foi mai mulimuli ane ma talosagaina ina ia toe faatasia i latou faatasi ma le Ekalesia a le Alii. Sa i ai i totonu o i latou ia Oliva Kaotui, Matini Harisi, Luka Johnson, ma Feterika G. Viliamu.
I le lotolotoi o nei tauiviga i Katelani, sa taumafai ai se vaega toaitiiti o tagata liliuese e fasioti Iosefa Samita. Ina ua lapataiina ai e le Agaga, sa o ese ai i laua ma Sini Rikitone i le po o le aso 12 o Ianuari, 1838. Sa tuliloaina i laua e o laua fili mo ni aso, ae sa puipuia i laua e le Alii. Sa laua taunuu atu ma o laua auaiga i Sisifo Mamao, Misuri, i le aso 14 o Mati, 1838.
Ia talanoa o se vaega i fesili nei:
O a mataupu faavae e mafai ona tatou aoao mai i nei mea na tutupu anamua?
O le a se mea na semanu e te faia ia tumau faamaoni ai i le Perofeta i lenei vaitaimi o le saili masei?
O le a se taimi na faamalosia ai lou faatuatua i le Faaola ona o le onosaia o se tofotofoga?
O a ni auala na avea ai le mulimuli i le perofeta o se puipuiga faaleagaga mo oe?
Aotelega 2 o Mea na Tutupu Anamua—Autaitai i Misuri i Matu
I le taumafanafana o le 1836, ina ua faamalosia e tagatanuu o le Itumalo o Clay, Misuri, le Au Paia e su’e se nofoaga e sili atu ona tumau, sa faapea ona faaaoga ai e Ioane Uitimera ma William W. Phelps, o fesoasoani e toalua i le au peresitene o le siteki a Misuri, ia tupe a le Ekalesia e faatau mai ai fanua i se nofoaga sa ta’ua o Sisifo Mamao i Misuri i matu. Ae peitai, ina ua la ofoina atu ni fasifanua i le Au Paia fai mai, sa laua faatauina atu le fanua mo se tupe faasili laitiiti, lea sa laua taofia mo i laua lava. O le le fiafia i lenei mea ma isi faiga le sa’o, na aveese ai e le au fautua maualuga i Misuri le au peresitene o le siteki mai le tofi.
Sa lagolagoina e Iosefa Samita le iuga a le aufono, ma sa le fiafia ai William W. Phelps. Ia Novema 1838, sa saini ai e Uso Phelps se faamatalaga na tauto ai e faasaga i le Perofeta. O lenei faamatalaga tauto na saofaga i le pueina ma le lafoina o Iosefa ma isi i le Falepuipui o Liperate mo le taumalulu. E le’i leva ae tape le igoa o Uso Phelp mai le Ekalesia.
I le falepuipui, sa matuai tigaina ai Iosefa Samita ma i latou sa faatasi ma ia, na le gata mai tulaga saua o lo latou faafalepuipuiina, ae faapea foi mai lipoti e uiga i le Au Paia na tutuliese mai o latou fale ma sauaina i le tele o auala. O le vaega faatupu vevesi a Misuri, sa le’i taofia e le kovana, sa faaleagaina meatotino ma fasiotia ni tagata e 17 i se fale vili falaoamata na anaina e se tagata na igoa ia Jacob Haun.
Sa tigaina faaleagaga ia William W. Phelps ona o ana amioga, ma sa ia tusi atu ia Iosefa se tusi e talosaga ai mo se faamagaloga i le tausaga mulimuli ane. Sa toe tusi atu i ai le Perofeta:
Ata
Perofeta o Iosefa Samita
“E moni, ua matou mafatia tele ona o le taunuuga o au amioga. …
“Ae ui i lea, ua uma ona inumia le ipu, ua faia le finagalo o lo tatou Tama, ma o loo matou ola pea, o lea matou te faafetai ai i le Alii. …
“I le talitonuina o lau faatoesega o se mea moni, ma le moni aiai o lou salamo, ou te fiafia ai e toe tuuina atu le lima taumatau o le faauo, ma olioli i le toe foi mai o le atalii na leiloa. …
“’Sau ia le uso pele, aua o lea ua uma le taua,
“’O uo sa i ai muamua, ua toe avea ma uo i le faaiuga’” (i le History of the Church, 4:163, 164).
Ia talanoa o se vaega i fesili nei:
Aisea e faigata ai ona faamagalo atu i se uo sa faalataina ai oe ma na mafua ai ona e mafatia?
O a ni mataupu faavae e mafai ona tatou aoao mai i le faataitaiga a Iosefa Samita?
O a nisi lesona e mafai ona tatou aoao mai i lenei aafiaga?
A uma ona maua e vaega se taimi e faitau ma talanoa ai i aotelega o mea na tutupu anamua, valaaulia i latou e toe faamatala i le vasega le talafaasolopito sa latou aoaoina ma mataupu faavae na latou faailoa mai ai. A o latou aoao mai, fai atu ia i latou e tusi mataupu faavae i luga o le laupapa. O nei mataupu faavae e mafai ona aofia ai mea nei: A o tatou filifili e tali atu i tofotofoga i le faatuatua nai lo le masalosalo, e mafai ona faamalolosia a tatou molimau; a o tatou lagolagoina le perofeta ma mulimuli i ana fautuaga, tatou te maua le saogalemu faaleagaga lea e fusia ai i tatou i le Atua (tagai i le aotelega 1 i mea na tutupu anamua). A o tatou faamagalo atu i isi, e mafai ona faamalolo e le Alii a tatou mafutaga (tagai i le aotelega 2 o mea na tutupu anamua).
A o faailoa mai e tagata aoga ia mataupu faavae, fai atu ni fesili tulitatao ina ia fesoasoani ia latou malamalama ma lagona le taua o nei upumoni. O nei fesili e ono aofia ai mea nei:
Aisea e taua ai ona tatou manatua lenei mataupu faavae?
E faapefea ona e faamatalaina lenei upumoni i se uo?
O anafea na e oo ai pe na e vaaia ai se faataitaiga o lenei mataupu faavae?
Ina ia fesoasoani i tagata aoga e faaaoga upumoni ua latou aoaoina, fai atu ia i latou e filifili se upumoni se tasi pe lua na faailoa mai e vaega. Ona valaaulia lea o i latou e tusi se tali i le fesili lenei i totonu o a latou api o le vasega po o api talaaga mo le suesueina o tusitusiaga paia:
O le a se mea o le a ese ona ou faia ona o le mataupu faavae po o mataupu faavae ua ou aoaoina i le aso?
O mea na tutupu na oo atu ai i le faateaina o le Au Paia mai Misuri i matu
Fesili atu i tagata aoga e sii o latou lima pe afai na latou vaai i se tagata o le Ekalesia o faia se filifiliga na mafua ai ona oo se lagona le lelei i se isi tagata e uiga i le Ekalesia. (Aua ne’i fai atu ia i latou e faasoa mai o latou aafiaga.) Atonu foi e te manao e fai i tagata aoga e mafaufau pe o a ni auala na uunaia ai e o latou lava amioga ia lagona o isi e uiga i le Ekalesia.
Aisea e taua ai mo i tatou ona mafaufau pe o a auala e atagia ai a tatou amioga po o upu i le Ekalesia?
Faamalamalama atu e faapea, i le 1838, o amioga ma upu a nisi o tagata o le Ekalesia na faaopopo atu i lagona le lelei na i ai i nisi o tagatanuu o Misuri agai i le Au Paia o Aso e Gata Ai. Tuu atu i tagata aoga ni kopi o le aotelega lenei o mea na tutupu anamua, ma valaaulia se tagata aoga e faitau leotele i ai. Fai atu i le vasega e mulimuli i le faitauga, ma vaavaai mo mea sa tautatala pe na faia e nisi o le Au Paia sa faapea ona tiga ai le Ekalesia ma ona tagata auai. Mafaufau e valaaulia le tagata aoga e taofi pe a uma palakalafa taitasi. A o taofi i vaega taitasi, fai atu i tagata aoga le fesili lenei:
O a faamatalaga po o mea na faia e se vaega toaitiiti o le Au Paia na mafua ai ona faaalia ni uiga le lelei i le Ekalesia?
I le 1837 ma le 1838 na amata ai e nisi sa le malilie ma tapeina igoa mai le Ekalesia na nonofo faatasi ma le Au Paia i Sisifo Mamao, Misuri, ona aumai ni moliaga faaletulafono e faasaga i le Ekalesia ma ona taitai ina ia faaleaga ai le Ekalesia. Sa amata ona tuputupu a’e le le to’a o nisi o le Au Paia i nei tagata faatuiese. Ia Iuni 1838, sa lauga malosi ai Sini Rikitone i le mea ua lauiloa o le “Lauga i le Masima.” Sa ia ta’ua le Mataio 5:13 ma faapea atu, afai e mai le masina, e leai se mea e toe aoga i ai, ma e tatau ona lafo i fafo, e faailoa ai le mea moni e faapea, o i latou o e na tuua le Ekalesia, e tatau ona lafo i fafo mai le Au Paia. E le gata i lea, e toa 84 tagata o le Ekalesia na sainia se pepa o faamatalaga na poloaiina ai le au liliuese e tuua le itumalo. I le lua vaiaso mulimuli ane, i le aso 4 o Iulai, sa tuuina atu ai e Sini Rikitone se lauga lea sa ia folafola atu ai, o le a puipui e le Au Paia i latou lava e tusa lava pe oo ai i se “taua o le fasiotiga tagata.” E ui lava o nei lauga uma e lua na foliga mai e tetee i le faatonuga a le Alii e “aioi atu mo le filemu” (MF&F 105:38), sa lomiaina uma nei lauga e lua ma na mafua ai le fefefe o tagata e le o ni Au Paia o Aso e Gata Ai. (Tagai i le Church History in the Fulness of Times, 191–92.)
I le aso 6 o Aokuso, 1838, sa taumafai ai se vaega o le Au Paia e palota i Kalatini, Misuri, sa tulei ese i latou e se vaega o tagata Misuri, ma sa ta e se tasi o tagata i le lotoifale se tasi o le Au Paia. Sa tau atu i ai le Au Paia, ma sa tau fai manunua alii o itu uma e lua. O lenei mea na tupu na taitai atu ai i ni feteenaiga ma ni taufaamatauga faaopoopo, ma faateteleina ai feeseeseaiga i le va o le Au Paia o Aso e Gata Ai ma o latou tuaoi i Misuri.
I le taimi lea, na tuuina atu ai e se tagta liliu mai na igoa ia Sampson Avard ni tautoga faalilolilo ia i latou o e o le a auai ma ia i le faatuina o se vaega faomea na ta’ua o Danites. Na faatonuina e Avard i latou e fao mea ma vete i tagata Misuri, ma fai mai, o lenei mea o le a fesoasoani e atinae ai le malo o le Atua. Na faatalitonuina e Avard tagata na mulimuli ia te ia, o ana faatonuga sa sau mai i le Au Peresitene Sili. Sa iloa mulimuli ane le mea moni, ma sa tape ai le igoa Avard. O amioga a Avard na mafua ai se afaina tele i le igoa o le Ekalesia, ma na fesoasoani e taitai atu ai i le faafalepuipuiina o le Perofeta i le Falepuipui o Liperate.
Ia Oketopa 1838, sa i ai se taua i le va o nisi o tagata o le Ekalesia ma fitafita Misuri, ma na maliliu ai ni nai tagata o itu uma taitasi. Na oo atu lipoti [faamatalaga] faatele o le taua ia Kovana Boggs, o le na tuuina mai se poloaiga o le fasiotiga [o Mamona]: “E tatau ona faia Mamona o ni fili ma e tatau ona fasiotia pe tutuliese faamalosi ma le setete, pe a tatau ai mo le manuia o tagata lautele” (sii mai i le History of the Church, 3:175). E lei umi, ae siomia le aai o Sisifo Mamao e se autau lea na sili atu le toatele nai lo autau a le Au Paia i le toalima i le toatasi. Sa faafalepuipuiina Iosefa Samita ma isi taitai o le Ekalesia i le Falepuipui o Liperate, lea sa latou nonofo ai i le taumalulu atoa. O isi tagata uma o le Au Paia sa faamalosia le tuua o le setete.
Aisea atonu e taua ai mo i tatou le iloa o nisi o sauaga na puapuagatia ai le Au Paia, na oo mai mai amioga a tagata o le Ekalesia?
O le a se mea e mafai ona tatou aoao mai nei mea na tutupu, e uiga i auala e mafai ai e a tatou lava amioga ma upu ona faatosina ai isi? (A o tali mai tagata aoga, faamamafa atu le mataupu faavae lenei: O a tatou amioga ma upu e mafai ona aafia ai le auala e vaai mai ai isi tagata i le Ekalesia a Iesu Keriso. Atonu e te manao e fai atu i tagata aoga e faitau le Alema 39:11.)
Valaaulia ni nai tagata aoga e faasoa mai ni aafiaga na latou maua, i se taimi na latou vaaia ai le faatosinaina o se isi tagata i upu po o amioga a se isi tagata ia maua se lagona lelei e uiga i le Ekalesia.
Faaiu i le toe ta’ua o le fesili na e tusia i luga o le laupapa a’o le’i amataina le vasega. Valaaulia tagata aoga e faasoa mai mea ua latou aoaoina i le aso, i le pe mafai faapefea e la tatou tali atu i luitau ma tofotofoga ona a le o le faamalosia po o le faavaivaia o o tatou faatuatua. Faasoa atu lau molimau i le mana o le tumau faamaoni i le talalelei i taimi o faigata.
Tala ma Faamatalaga o Talaaga
Faamatalaga o le vaitau o le liliuese i Katelani
I le aluga o le 1837 sa mafatia ai nisi o tagata o le Ekalesia i Katelani, Ohaio i se agaga o le pogisa:
“I le taimi lea, o le agaga o le masalosalo i fanua ma mea totino o ituaiga uma, lea sa salalau solo i malo uma, sa mauaa i totonu o le Ekalesia. I le vave iloa ai o fua o lenei agaga, o masalosaloga leaga, saili masei, o le le lotogatasi, feeseesea’i, ma le liliuese, ma sa foliga mai e pei sa tuufaatasi uma e le lalolagi ma seoli o laua mana ma uunaiga i se auala faapitoa e faatoilalo ma faia ai se iuga tumau i le Ekalesia i lea lava taimi” (History of the Church, 2:487).
Na faamatala mai e Eliza R. Snow, o lē sa nofo i Katelani i le taimi lea ma sa avea mulimuli ane ma Peresitene lona lua o le Aualofa, i lena vaitaimi i Katelani:
Ata
Eliza R. Senoa
“O le toatele o e sa lotomaulalo ma faamaoni i le faatinoina o tiute uma—sa sauni e o ma o mai i valaauga uma o le Perisitua, sa amata ona faasausili i o latou agaga, ma siitia i luga i le faamaualuluga o o latou loto. A o feinu le Au Paia i le alofa ma le agaga o le lalolagi, sa aluese mai le Agaga o le Alii mai o latou loto, ma sa faatumulia i latou i le faamaualuga ma le inoino ia i latou o e tausisia lo latou faamaoni” (Biography and Family Record of Lorenzo Snow [1884], 20).
Na faamatalaina e Polika Iaga le tulaga i le Ekalesia i le vaitaimi o le 1837 ma ana taumafaiga e puipuia le Perofeta o Iosefa Samita:
Ata
Peresitene Polika Iaga
“I le taimi lea, o le agaga o le masalosalo, leai o se faamaoni, ma le liliuese, sa faia e le toatele o le Toasefululua, ma sa aafia uma ai Korama a le Ekalesia, sa matua salalau solo sa faigata ai mo soo se tasi ona iloa lelei le ala e ao ona tulitulimatagauina.
“… Sa o se faalavelave lenei mea ona sa foliga mai na aufaatasi le lalolagi ma seoli e faatoilalo le Perofeta ma le Ekalesia a le Atua. Na vaivai tulivae o le toatele o tagata malolosi o le Ekalesia.
“I lenei taimi o le o’o mai o le pouliuli, na ou tu latalata ai ia Iosefa, ma, faatasi ai ma le poto uma ma le mana na tuuina mai e le Atua ia te a’u, na tuuina atu ai lo’u malosi atoa e lagolago ai le auauna a le Atua ma tuufaatasia Korama a le Ekalesia” (Manuscript History of Brigham Young 1801–1844, ed. Elden Jay Watson [1968], 15, 16–17).
O mea moni na saofaga i faafitauli tautupe i Katelani
I le 1837, sa mau ai le uu a le faaloloto i loto o nisi tagata o le Ekalesia, faapea foi ma nisi o taitai iloga o le Ekalesia i Katelani. Sa seasea ona maua ni tupe auro ma siliva. Sa faaaoga e tagata tupe pepa mai nisi o faletupe i le eria. Ina ia fesoasoani i le Au Paia ia atili gafatia ona faalagolago ia i latou lava i mea tautupe, sa faatuina ai e Iosefa Samita ma isi taitai o le Ekalesia se kamupani sa faapei o se faletupe na ta’ua o le Sosaiete Saogalemu o Katelani. E toatele le Au Paia na faatau mai a latou tupe i le faletupe fou. I totonu o ni nai masina talu ona tatala le kamupani, na amata ai se faafitauli tautupe, lea sa ta’ua mulimuli ane o le atuatuvale o le 1837, i le Aai o Niu Ioka ma salalau atu ai i sisifo, na iu ai i le gau o le faitau selau o faletupe, na aofia ai ma le Sosaiete Saogalemu o Katelani.
Sa i ai isi mea sa saofaga i le le mautu o le Sosaiete Saogalemu o Katelani. E tele isi faletupe sa mumusu e talia tupe a le Sosaiete Saogalemu o ni tupe mo’i, ma o nusipepa sa tetee i Mamona sa latou folafola atu e leai se aoga o tupe pepa. E le gata i lea, o le aseta a le sosaiete sa matele lava i fanua; sa le’i tele se tinoitupe na i ai, e pei o le auro ma le siliva, mo le faafesuia’iina ma tupe pepa pe a tulai mai se manaomia tele. Sa aumai e fili o le Ekalesia ni tupe pepa e amata ai ona latou poloaiina mai le faletupe ni aseta o auro ma siliva, e sili atu nai lo o tupe na i ai, ma faamalosia ai le sosaiete e taofi le totogiina atu o auro ma siliva i tagata ae na o ni nai vaiaso talu ona totogi atu tupe pepa muamua. O se taunuuga, sa tuuaia ma molia ai Iosefa Samita ma Sini Rikitone i le solia o le tulafono o teugatupe a Ohaio ma faapea ona faamasinoina ai. Sa sala tupe e tai $1,000 ia Iosefa ma Sini.
Sa faia e Iosefa Samita mea uma na ia mafaia e tauanau ai le au fai saofaga e tuuina atu nisi tupe e lagolago ai le faletupe, peitai, sa iu lava ina ia tuuina atu lona faagaoioiga i isi. Ae peitai, sa le’i foia e lenei faiga le faafitauli. Sa atili faaletonu le faletupe ona o le le lava o le potomasani ma le le faamaoni o pule. Sa gaoia e Warren Parrish, o le kesia a le faletupe ma o le failautusi faapitoa a Iosefa, le silia ma le 20,000 tala.
O se agaga faateleina o le masalosalo i Katelani sa faaopoopo atu i faafitauli tau i le tamaoaiga a le Ekalesia. Faatasi ai ma le i ai o tupe sa latou manatu o ni tupe mo’i lea na latou nonoina mai i le faletupe, sa toatele ai tagata na faia ni aitalafu e faatau mai ai fanua mo le toe faatauina atu mo se tupe faasili tele.
E oo ane i le tautoulu i le 1837, na tatau i le Sosaiete Saogalemu o Katelani ona tapunia ona faitotoa. E faitau selau tagata taitoatasi na gau ai le toetoe o mea uma sa latou faauneina, ae o Iosefa Samita sa silisili ai lava ona tele lona gau. Talu ai na manatu le toatele e faapea, o le Sosaiete Saogalemu o le faletupe a le Ekalesia po o le faletupe a le Perofeta, o lea na tuuaia ai e nisi o le Au Paia ia Iosefa Samita mo a latou faafitauli tautupe, ma faapea lava ona ta’ua ai o ia o se perofeta toilalo. O isi foi na gau ai a latou tupe, sa faaauau pea i le faatuatua ma tumau le faamaoni i le Perofeta. (Tagai i le Church History in the Fulness of Times Student Manual [Church Educational System manual, 2003], 171–73.)