Lesona 9

IosefaSamita—Talafaasolopito 1:27–54; Mataupu Faavae ma Feagaiga 2

Folasaga

Sa faaauau pea ona faamautu e le Taulealea o Iosefa Samita sa vaai o ia i se faaaliga, ma sa faaauau pea ona sauaina o ia ona o lena mea. Sa ia fai mai mulimuli ane i lena taimi, sa “paʼū atu soo [o ia] i sese valea e tele, ma faaalia vaivaiga o le talavou” (Iosefa Samita—Talafaasolopito 1:28). I se tasi afiafi, i le 17 o ona tausaga, sa ia tatalo ai mo le faamagaloga ma talosagaina e fia iloa lona tulaga i luma o le Atua. Sa faaali mai se agelu e igoa ia Moronae ma folafola mai, na i ai i le Atua se galuega mo Iosefa ina ia faia, e aofia ai le faaliliuga o se faamaumauga anamua sa tusia i luga o papatusi auro. A o faamatala mai le matafaioi a Iosefa i le Toefuataiga o le talalelei, e sii mai e Moronae le tele o valoaga mai le Tusi Paia, e aofia ai le valoaga a Malaki e uiga i le toe foi mai o Elia. O le aso na sosoo ai, na alu ai Iosefa Samita i le mauga lea na fai mai Moronae na tanumia ai papatusi auro. O iina sa ia maua ai nisi faatonuga mai ia Moronae.

Fautuaga mo le Aoaoina Atu

Iosefa Samita—Talafaasolopito 1:27–29

Ua tatalo Iosefa Samita mo le faamagaloga

Valaaulia tagata o le vasega e mafaufau i mea ua latou aoaoina mai i le faataitaiga a Iosefa Samita o se alii talavou. Atonu e te fai atu i ni nai tagata o le vasega e faasoa puupuu mai se mataupu faavae ua latou aoaoina ua i ai se aafiaga ia i latou. Ona fai atu lea i se tagata o le vasega e faitau leotele le Iosefa Samita—Talafaasolopito 1:27–29. A o lei faitauina e ia, ia faailoa atu o mea na tutupu o loo faamatalaina i nei fuaiupu, na tutupu i le va o le 14 ma 17 tausaga o le matua o Iosefa. Valaaulia tagata o le vasega e faatatau nei fuaiupu ia i latou lava, ma faailoa mai ni aafiaga sa oo ia Iosefa Samita e tutusa ma o latou aafiaga.

Aoao tagata o le vasega e faatatau ia tusitusiga paia ia i latou lava

Uunaia tagata o le vasega e fesili ifo ia i latou lava, “O a ni mea ma ni tulaga i lo‘u olaga e pei o mea ma tulaga i lenei fuaitau o tusitusiga paia?” po o le “E faapefea Ona ou pei o tagata o loo tatou aoaoina i tusitusiga paia?” A o vaaia e tagata o le vasega mea e tutusa ai i le va o o latou aafiaga ma aafiaga o tagata i tusitusiga paia, o le a lelei atu lo latou faailoaina o aoaoga faavae ma mataupu faavae ma iloa pe faapefea ona faatatau na upumoni i o latou olaga.

• O a nisi o aafiaga o Iosefa Samita sa i ai a o talavou e mafai ona e fesootai i ai? (Faamanatu i tagata o le vasega e le tatau ona latou faasoa mai ni aafiaga e patino tele pe e le faalauaiteleina.)

• E tusa ai ma le faaiuga o le Iosefa Samita—Talafaasolopito 1:28, o le a le tala a Iosefa e uiga i faaosoosoga ma mea sese sa pau atu i ai? (Sa le’i ta’usalaina o ia i soo se agasala matuia, ae o nisi taimi sa ia lagonaina sa le’i amioa’i o ia i amioga sa tatau ona amioa’i ai se tagata na valaauina e le Atua.)

• O le a le mea na faia e Iosefa Samita e uiga i le tausalaina sa ia lagonaina mo ana agasala? (Sa tatalo o ia mo le faamagaloga ma ole atu ina ia iloa lona tulaga i luma o le Atua.)

• O a ni upumoni e mafai ona tatou aoaoina mai i le faataitaiga a Iosefa Samita?

A o talanoaina e tagata o le vasega o latou manatu, fesoasoani ia i latou e faailoa mai upumoni nei:

A o tatou iloa a tatou agasala ma lagona le faanoanoa mo i latou, e mafai ona tatou tatalo i le Tama Faalelagi mo le faamagaloga.

E mafai ona tatou tatalo e iloa ai lo tatou tulaga i luma o le Atua.

• O le a sou manatu i le uiga o le ia iloa lou tulaga i luma o le Atua? (Atonu e manaomia ona e faamalamalama atu, o le ia iloa o lo tatou tulaga i luma o le Atua, o lona uiga ia iloa pe o fiafia le Atua ia i tatou.)

• Aisea atonu e taua ai mo i tatou le iloa o lo tatou tulaga i luma o le Atua?

Valaaulia se tagata o le vasega e faitau le faamatalaga lenei a Elder Neil L. Andersen o le Korama a Aposetolo e Toasefululua. Faamalamalama atu o le fautuaga a Elder Andersen e mafai ona fesoasoani tatou te iloa ai pe faapefea ona tatou iloa lo tatou tulaga i luma o le Atua.

“[E mafai ona tatou] faatoga atu ma le lotomaualalo i le Alii: ‘Le Tama e, o le a se mea E te finagalo ou te faia?’ E oo mai tali. Tatou te lagonaina suiga e tatau ona tatou faia. E ta’u mai e le Alii ia i o tatou mafaufau ma i o tatou loto” (“Salamo… Ina Ia Ou Faamaloloina Outou,” Ensign po o le Liahona, Nov. 2009, 41).

Faasoa atu lau molimau o upumoni na talanoaina e tagata o le vasega. Faamautinoa atu i tagata o le vasega, e naunau le Tama Faalelagi e faamagalo i tatou a o faaali o tatou faatuatua ia Iesu Keriso ma faia mea e tatau ai e salamo i a tatou agasala.

Iosefa Samita—Talafaasolopito 1:30–35

Ua faaali mai le agelu o Moronae ia Iosefa Samita

Valaaulia tagata o le vasega e faitau le leoa le Iosefa Samita—Talafaasolopito 1:30, ma vaavaai mo le mea na tupu a o tatalo Iosefa Samita mo le faamagaloga. Fai atu ia i latou e lipoti mai mea ua latou mauaina. Faaali atu le ata o Moronae o loo Faaali ia Iosefa Samita i totonu o Lona Potu (Tusi Ata o le Talalelei [2009], nu. 91; tagai foi i le LDS.org).

Fai atu i se tagata o le vasega e faitau leotele le Iosefa Samita—Talafaasolopito 1:32–33, ma valaaulia le vasega e vaavaai mo le savali muamua a Moronae ia Iosefa Samita.

• O le a le tala a Moronae e uiga i le lumanai o Iosefa Samita? (E tatau ona ta’u mai e tagata o le vasega Sa i ai i le Atua se galuega mo Iosefa Samita e fai.)

• Fai mai Moronae o le igoa o Iosefa Samita o le a “tauleleia ma tauleagaina i totonu o atunuu uma.” O le a se taimi na e vaaia ai se faataitaiga o lenei mea?

Fai atu i se tagata o le vasega e faitau leotele le Iosefa Samita—Talafaasolopito 1:34–35. Valaaulia le vasega e mulimuli i le faitauga, ma faailoa mai mea na aoao mai e Moronae e uiga i le galuega o le a faia e Iosefa.

• O le a faapefea ona faaliliuina le tusi? (E ala i le faaaogaina o ni maa faapitoa, e ta’ua o le Urima ma le Tumema, na saunia e le Atua.)

Faamalamalama atu o lesona o loo lumanai, o le a aoao ai tagata o le vasega e uiga i taumafaiga a Iosefa Samita e faaliliu ma lolomi le Tusi a Mamona.

Iosefa Samita—Talafaasolopito 1:36–49; Mataupu Faavae ma Feagaiga 2

Ua faatonu e Moronae ia Iosefa Samita

Otooto le Iosefa Samita—Talafaasolopito 1:36-42 i le faamatala atu e faapea, na sii mai e Moronae valoaga mai le Tusi Paia e faamatala ai le matafaioi a Iosefa Samita i le aumaia o le Toefuataiga o le talalelei. (Mafaufau e fautuaina tagata o le vasega e faailoga ia mau faasino o loo ta‘ua i nei fuaiupu. Mo se faataitaiga, i le fuaiupu e 40, e mafai e tagata o le vasega ona faailoga le fuaitau “o le mataupu e sefulutasi o le Isaia.”)

Ia faailoa atu, o upu o le valoaga o loo siiina mai i le Iosefa Samita—Talafaasolopito 1:38-39 o loo faaalia foi i le Mataupu Faavae ma Feagaiga 2. O se tasi lenei o faaaliga muamua i lenei tisipenisione, na tuuina mai ia Iosefa Samita ina ua 17 ona tausaga.

Atonu foi e te ta‘ua o lenei valoaga e matua taua tele o loo faapea ona faaalia foi i le Feagaiga Tuai (tagai i le Malaki 4:5-6), i le Feagaiga Fou (tagai i le Luka 1:17), ma le Tusi a Mamona (tagai i le 3 Nifae 25: 5-6).

A o lei amataina le vasega, fai ni kopi o le siata lenei. Oti i ni pepa eseese e tufa atu se tolu. Vaevae le vasega i ni vaega se tolu, ma tuu atu i vaega taitasi se tasi o pepa e tufa atu. Fai atu i vaega taitasi e suesue a latou fuaiupu atofaina ma le faamalamalamaga faaperofeta o loo sosoo ane ai. E le gata i lea, fai atu i vaega taitasi e aotele mai le savali o a latou fuaiupu atofaina i a latou lava upu, ma tali le fesili po o fesili o loo i a latou pepa ua tufa atu.

Vaega 1

Mataupu Faavae ma Feagaiga 2:1—o ai Elia? O le a le mana o le perisitua na fai mai Moronae o le a toefuatai mai e Elia?

“O Elia o se perofeta maoae sa i ai le mana maoae na tuuina i ai e le Atua. Sa ia umia le mana silisili na tuuina mai e le Atua i Ana fanau: sa ia umia le mana e faamau ai, o le mana e fusifusia ai i le lalolagi ma fusifusia ai foi i le lagi” (Peresitene Henry B. Eyring, “O Loto ua Fusia Faatasi,” Ensign po o le Liahona, Me 2005, 78).

Vaega 2

Mataupu Faavae ma Feagaiga 2:2—O ai tama ma fanau o loo ta’ua i lenei fuaiupu?

I le valoaga e faapea “o le a totō e ia i loto o fanau folafolaga na faia i tamā”, o le fuaitau “o tamā,” e faatatau ia “Aperaamo, Isaako ma Iakopo, o i latou ia na fai i ai le folafolaga. O a ia folafolaga? O folafolaga o se faaauauga o le iunite o le aiga i le faavavau” (Bruce R. McConkie, Millennial Messiah [1982], 267).

I le valoaga “o le a liliu atu loto o fanau i o latou tamā,” o le fuaitau “o latou tamā,” e faatatau i o “tatou tuaa ua maliliu o e ua maliliu e aunoa ma le avanoa e maua ai le talalelei, ae na latou mauaina le folafolaga o le a oo mai le taimi o le a tuuina atu ai lena avanoa ia i latou. O le fanau o i latou ia o loo ola i le taimi nei, o e o loo saunia faamatalaga o gafa ma ē o loo faatinoina sauniga sui mo i latou i totonu o malumalu” (Iosefa Filitia Samita, Doctrines of Salvation, ed. Bruce R. McConkie, 3 vols. [1954 – 56], 2:127).

Vaega 3

Mataupu Faavae ma Feagaiga 2:3—Aisea o le a faamaʼumauina atoa ai le lalolagi pe ana faapea e le toefuataiina mai le mana o faamauga?

“Aisea o le a faamaʼumauina atoa ai le lalolagi? Aua afai e leai se sootaga maopoopo i le va o le tama ma le fanau—o le galuega lea mo e ua maliliu—o lona uiga o le a teena uma i tatou; o le galuega atoa a le Atua o le a toilalo ma faamaumauina atoa“ (Iosefa Filitia Samita, Doctrines of Salvation, ed. Bruce R. McConkie, 3 vols. [1954 – 56], 2:122).

A uma se taimi e sauniuni ai vaega, valaaulia tagata o le vasega mai vaega e lipoti mai a latou aotelega ma tali i le vasega. O tali a tagata o le vasega e tatau ona atagia ai upumoni nei:

Mataupu Faavae ma Feagaiga 2:1—O le a auina mai e le Atua ia Elia e toefuatai mai le mana o faamauga i le lalolagi a’o lei oo i le Afio Mai Faalua o Iesu Keriso.

Mataupu Faavae ma Feagaiga 2:2—E mafai ona liliu atu o tatou loto i o tatou tuaa, ma e mafai ona tatou faia sauniga mo i latou i totonu o malumalu.

Mataupu Faavae ma Feagaiga 2:3—A aunoa ma le mana e tuufaatasia ai aiga mo le faavavau, o le a faaumatia le lalolagi i le Afio Mai Faalua o Iesu Keriso.

Afai ua uma ona faamauina oe i le malumalu, atonu e te manao e faaali atu se ata o lou aiga. Afai e le’i faamauina oe, faamatala atu e uiga i lou naunau tele ina ia faamauina. Ia faamatala faapuupuu atu, pe a suesue e tagata o le vasega le Mataupu Faavae ma Feagaiga 110, o le a latou aoao ai e uiga i le tuuina mai e Elia o le mana o faamauga i luga o Iosefa Samita.

Tatai tagata o le vasega i tua i le faamatalaina o le Iosefa Samita—Talafaasolopito i le faamatala atu, ina ua uma ona sii mai e Moronae le valoaga e uiga i le toe foi mai o Elia, sa ia siiina mai isi valoaga e uiga i le Toefuataiga. Ona ia tuuina mai lea o nisi faatonuga e uiga i papatusi auro ona aluese ai lea (tagai i le Iosefa Samita—Talafaasolopito 1:42–43). Valaaulia se tagata o le vasega e faitau leotele le Iosefa Samita—Talafaasolopito 1:44–45. Fai atu i le vasega e mulimuli i le faitauga ma faailoa mai le mea na tupu ina ua tuumuli Moronae. O le taimi lava e iloa ai e tagata o le vasega na toe foi mai Moronae i le po lena ma toe ta’u mai lea lava savali e tasi, valaaulia i latou e tagai vave i le Iosefa Samita—Talafaasolopito 1:46–49 ma vaavaai mo le aofaiga o taimi na momoli mai ai e Moronae lea lava savali e tasi ia Iosefa Samita.

• E faafia ona momoli mai e Moronae le savali ia Iosefa Samita? (E faa fa.)

• O a nisi o savali ua ta’u faafia mai i tusitusiga paia, i lesona a le Ekalesia, ma i saunoaga i konafesi aoao?

• O a ni auala tatou te manuia ai pe a ta’u faafia mai e le Alii ma Ana auauna a latou savali?

Uunaia tagata o le vasega e vaavaai mo aoaoga e ta’u faafia mai a o latou suesue i tusitusiga paia mo i latou lava, ma mafaufau i le taua o na aoaoga.

IosefaSamita—Talafaasolopito 1:50–54

Ua alu Iosefa i le mauga ma iloa ai faamaumauga, le Urima ma le Tumema, ma le ufifatafata

Otooto le Iosefa Samita—Talafaasolopito 1:50–51 i le faamatala atu, sa usitai Iosefa i le poloaiga a Moronae ma ta‘u atu i lona tama e uiga i lona aafiaga i le po na muamua atu. Sa talitonu lona tama ia te ia ma fautuaina o ia e fai le mea na tau atu e Moronae ia te ia e fai. O lea na alu ai Iosefa i le mauga lea na tanumia ai papatusi auro. Fai atu i ni tagata se toatolu o le vasega e feauauai i le faitauina leotele o le Iosefa Samita—Talafaasolopito 1:52–54 ao mulimuli le vasega i le faitauga. Ina ia mautinoa ua malamalama lelei tagata o le vasega i mea na tutupu o loo faamatalaina i nei fuaiupu, fai atu i se tagata o le vasega e toe faamatala mai mea na tutupu i ana lava upu. Faailoa atu i tagata o le vasega e faapea, i le lesona e sosoo ai, o le a latou talanoaina ai mea na tutupu e aofia ai le taimi na faatagaina ai Iosefa e aumai papatusi.

Atonu e te manao e faaiu i le molimau atu e uiga i upumoni sa outou talanoaina i lenei lesona, ma valaaulia o tagata o le vasega e faatino soo se uunaiga ua latou maua e faaaoga ai nei upumoni i o latou olaga.

Tala ma Faamatalaga o Talaaga

IosefaSamita—Talafaasolopito 1:33. “O loʼu igoa o le a tauleleia ma tauleagaina i totonu o atunuu uma”

Sa faamatala e Elder John H. Groberg o le Fitugafulu e uiga i se aafiaga lea na ia vaai ai i se faataunuuga o valoaga a Moronae i le Iosefa Samita—Talafaasolopito 1:33. A o avea o se faifeautalai i le Pasefika i Saute, sa asiasi atu ai Elder Groberg i se motu mamao e igoa ia Tafahi, lea sa na o le 18 ni aiga sa i ai ma e leai se eletise po o se suavai. Sa ia tusia:

“I le aiga mulimuli, na oo mai ai ia te a’u se manatu ese lava, ‘Aisea e te le tofotofoina ai le valoaga, o le igoa o Iosefa Samita o le a lauiloa mo le tauleleia ma tauleagaina i le lalolagi atoa?’ Ou te le iloa pe aisea na oo mai ai lea manatu, ae sa oo mai. ”

Na ia fesili atu i le aiga na nonofo i lea fale pe na latou faalogo e uiga i le peresitene o le Iunaite Setete. Sa latou tali mai, “O ai o ia?” ma “O fea e i ai le Iunaite Setete?” Na lipoti mai e Elder Groberg e faapea:

“Sa ou taumafai e faamatala atu le mea sa i ai, ae sa le mafai ona latou malamalama. Sa latou fesili mai pe o le a le tele o lea motu. Sa ou tali atu o se motu tele lava, e faitau afe maila le mamao ese ma e faitau miliona tagata e nonofo ai. Sa ou fai atu ia te i latou, o le toatele o tagata iina e le’i vaai lava i le sami ma o le toatele o tagata e le iloa e le tasi le isi. Sa le mafai ona latou malamalama i lea mea.”

Ona ia fesili atu lea ia i latou e uiga i taitai o Rusia ma Farani, ae sa le mafai ona latou taliina ana fesili.

“O le isi,” na ia saunoa ai, “sa ou fesili atu e uiga i tagata taaalo, i ni tagata lauiloa i tifaga, tagata faipisinisi lauiloa, e uiga i le Pau o le Tamaoaiga, o le Taua a Korea, ma isi lava mea. …

“Sa leai se tagata o le Ekalesia sa nofo ai i lea motu, e ui lava e lua isi ekalesia sa i ai iina. Sa ou manava tele ma fai atu, ‘Na outou faalogo la ia Iosefa Samita?’

“O le taimi lava lena na sui ai se vaaiga i o latou foliga. Sa tau fai tilotilo mai tagata uma ia te au, ma sa fai mai le tama. ‘Aua e te talanoa mai ia i matou e uiga i lena perofeta pepelo! Aua [ne’i e talanoa mai ai] i totonu o le matou fale! Ua matou iloa mea uma e uiga ia te ia. Na ta’u mai e le matou faifeau ia i matou!’ Sa faigata ona ou talitonu i le mea na ou faalogoina. Sa tatagi mai i lo’u mafaufau le mau … o le igoa o Iosefa ‘o le a tauleleia ma tauleagaina i totonu o atunuu uma’ (IS—T 1:33). Ia te au o se faataunuuga moni lenei o le valoaga.

“Ou te talitonu e faigata ona e maua se nofoaga e sili ona mamao, sili ona le iloa ni mea o tutupu i nei ona po, nai lo le motu laitiiti o Tafahi. O tagata iina latou te le iloa se mea e uiga i taitai iloga o aso nei—[taitai] faaupufai, faaletamaoaiga, po o le a lava—ae sa latou iloaina le igoa Iosefa Samita. I lenei tulaga sa latou iloa [lona igoa] mo le leaga, ia o se mea e amata ai. Sa ou faaaluina i nai aso na sosoo ai i le faamalamalamaina atu o ni mea se tele e uiga i le misiona a le Perofeta o Iosefa Samita, ma ae ma te le’i o ese, ua iloa e ni isi o i latou lona igoa mo le lelei” (In the Eye of the Storm [1993], 104–6).

Manatu Faaopoopo mo le Aoaoina Atu

Iosefa Samita—Talafaasolopito 1:36–49; Mataupu Faavae ma Feagaiga 2. “O le a liliu atu loto o fanau i o latou tamā.”

Fesoasoani i tagata o le vasega ia iloa le olioli e maua mai le sailia o faamaumauga o o latou tuaa ma o atu i le malumalu e faataunuu sauniga e fai ma sui mo i latou. Valaaulia se tagata o le vasega e faitau leotele le Mataupu Faavae ma Feagaiga 2:1-3, ma fai atu i le vasega e faalogologo mo le mea e tupu i “loto o fanau.”

• O le a le mea na fai mai le Atua o le a Ia totoina i loto o fanau? (O “folafolaga na faia i tamā.”)

Fesoasoani i tagata o le vasega ia malamalama “o folafolaga na faia i tama” o folafolaga ia i le feagaiga faa-Aperaamo, lea e aofia ai faamanuiaga o le perisitua ma aiga e faavavau. Atonu e te manao e tuu atu i tagata o le vasega e toe iloilo le faamatalaga mo le “Feagaiga faa-Aperaamo” i le Faamaoni i le Faatuatua: O Se Tusitaiala o le Talalelei. [2004], 5–6.

• O le a se tou manatu o le uiga o le liliu o o tatou loto i o tatou tama?

Fesoasoani i tagata o le vasega ia malamalama, e faaopoopo atu i le liliu o o tatou loto i o tatou matua faalelalolagi ma le manatuaina o folafolaga na faia e le Alii ia Aperaamo, Isaako ma Iakopo, e tatau ona liliu atu o tatou loto i o tatou tuaa ua maliliu e aunoa ma le mauaina o le talalelei. O se vaega lenei o lo tatou tiutetauave ma le avanoa i le avea ai ma tagata e mauaina folafolaga i le feagaiga faa-Aperaamo. Ona o lo tatou alofa mo o tatou tuaa, e tatau ai ona tatou o atu i le malumalu ma fesoasoani ia latou maua le sauniga o le faaolataga.

Fai atu i se tagata o le vasega e faitau le faamatalaga lenei mai ia Elder Richard G. Scott o le Korama a Aposetolo e Toasefululua:

“O galuega o le malumalu ma talafaasolopito o aiga o le galuega e tasi e vaevaeina i ni vaega se lua. E soo faatasi e pei o sauniga o le papatisoga ma le meaalofa o le Agaga Paia. O nisi o le au paia atonu e le mafai ona latou faia uma ia galuega ona o tulaga i le soifua maloloina po o le taumamao foi ma malumalu” (“O Le Olioli i le Faaolaina o E Ua Maliliu,” nsign po o le Liahona, Nov. 2012, 93).

Faamalamalama atu e faapea, ina ua uma ona faia o lenei saunoaga, na sii mai e Elder Scott le saunoaga a Peresitene Howard W. Hunter. Valaaulia se isi tagata o le vasega e faitau upu a Peresitene Hunter:

“E ao ona tatou faataunuuina galuega o sauniga perisitua i le malumalu e alagatatau mo lo tatou lava faaeaga; ona tatau lea ona tatou faia galuega mo i latou o e e le’i maua le avanoa e talia ai le talalelei i le olaga nei. O le faia o galuega mo isi e mafai ona ausia i ni laasaga se lua: muamua, e ala i le sailia o talafaasolopito o aiga e iloa ai o tatou tuaa; ma lona lua, o le faia lea o sauniga o le malumalu e tuu atu ai ia i latou ia lava avanoa e maua e tagata o soifua pea“ (“A Temple-Motivated People,” Ensign, Feb. 1995, 4; tagai foi i le “O Le Olioli i le Faaolaina o E Ua Maliliu,“ 93).

• O a vaega e lua o le galuega o le malumalu ma talafaasolopito o aiga?

Valaaulia se isi tagata o le vasega e faaauau le faitauina o le saunoaga a Peresitene Hunter:

“Ae e toatele tagata o le Ekalesia e faatapulaa le mafai ona o atu i malumalu. Latou te faia le mea sili latou te mafaia. Latou te faia le sailiga o talafaasolopito o aiga ae fai e isi galuega o sauniga o le malumalu. Ae peitai e I ai ni isi o le au paia o e auai i le faiga o galuega faalemalumalu ae latou te le faia le sailiga o talafaasolopito o aiga o o latou lava tuaa. E ui o loo latou faia se auaunaga paia i le fesoasoani i isi, e aveesea mai so latou faamanuiaga e ala i lo latou le sailia o o latou lava aiga ua maliliu e pei ona aumai ai le taitaiga faalelagi e perofeta o aso e gata ai. …

“Ua ou iloaina o i latou o e auai i le sailiga o talafaasolopito faaleaiga ona faatino lea o sauniga faalemalumalu mo i latou ua latou maua igoa, o le a latou iloa le olioli faaopoopo o le mauaina o afa uma e lua o le faamanuiaga” (“A Temple-Motivated People,” 4–5; tagai foi i le “O Le Olioli i le Faaolaina o E Ua Maliliu,” 93).

Valaaulia se isi tagata o le vasega e faitau le faamatalaga lea mai ia Elder Scott:

“E finagalo le Tama oi le Lagi ia maua uma e i tatou taitoatasi ia vaega uma e lua o faamanuiaga o lenei galuega taua e fai ai ma sui [o e ua maliliu]. Ua Ia taitaiina isi e faasino mai ia i tatou le ala e agavaa ai. O oe ma a’u lava e pa’ū i ai le mauaina o na faamanuiaga.

Soo se galuega e te faia i le malumalu o le taimi faaaluina tatau lea, ae o le mauaina o sauniga sui mo ou lava tuaa o le a sili atu ai ona paia le taimi i le malumalu ma o le a faapea ona [e] maua ai faamanuiaga sili atu. Ua folafola mai e le Au Peresitene Sili e faapea, ‘O lo tatou tiutetauave tupito o le sailia lea ma faailoa o o tatou lava tuaa.’ [Tusi a le Au Peresitene Sili, 29 Fep. 2012; ua faaopoopo le faamamafa.]

Outou tupulaga talavou, pe tou te mananao i se auala mautinoa e tuuitiitia ai faatosinaga a le fili i lou olaga? Ia faatofu oe lava i le sailia o ou tuaa, saunia igoa mo sauniga sui paia o loo maua i le malumalu, ona e alu atu lea i le malumalu e fai ma sui mo i latou ia maua sauniga o le papatisoga ma le meaalofa o le Agaga Paia. A o e faasolosolo matua, o le a mafai foi ona e auai i le mauaina o isi sauniga. E leai se isi puipuiga sili atu mai faatosinaga a le fili i lou olaga e mafai ona ou mafaufau i ai” (“O Le Olioli i le Faaolaina o E Ua Maliliu,” 93–94).

• O a faamanuiaga e oo mai ia i latou e faia galuega faalemalumalu ma talafaasolopito o aiga?

• O a ni mea o loo e faia e auai ai i vaega uma e lua o le galuega faalemalumalu ma talafaasolopito o aiga? Mafaufau i se mea e mafai ona e faia e faaleleia atili ai.