Mataupu Faavae ma Feagaiga 107:21–38

Folasaga

Ia Aperila 1835 sa i ai sui na le’i leva ona faauuina o le Korama a Aposetolo e Toasefululua i Katelani, Ohaio, e sauni e o ese atu i le latou misiona muamua o se korama. A o lei o ese atu i latou, sa latou talosagaina ina ia saili atu e le Perofeta o Iosefa Samita se faaaliga e fesoasoani ia i latou a o latou taapeape (tagai i le folasaga o le lesona 111). O le faaaliga na ia maua ua faamaumauina i le Mataupu Faavae ma Feagaiga 107. O le lona lua lenei o lesona e tolu o loo talanoaina ai le vaega lenei. I le vaega lea o le faaaliga, ua faataoto mai e le Alii ia tiute o korama pulefaamalumalu a le Ekalesia: o le Au Peresitene Sili, o le Korama a Aposetolo e Toasefululua, ma Fitugafulu.

Fautuaga mo le Aoaoina Atu

Mataupu Faavae ma Feagaiga 107:21-26

Ua faataoto mai e le Alii ia tiute ma le pule o korama pulefaamalumalu a le Ekalesia

A o lei amataina le vasega, ia tusi upu nei i luga o le laupapa: fesoasoani ma le lagolago. A amata le vasega, ia fai atu i tagata aoga e mafaufau i se taimi na fesoasoani ai pe lagolagoina ai i latou e se tasi. Ona valaaulia lea o tagata aoga e faasaga atu i se paga ma faamatala i ai o latou aafiaga.

O le a se eseesega sa faia ai ina ua e iloaina sa fesoasoani atu pe na lagolagoina oe e se tasi?

Tusi le upu lagolagoina i luga o le laupapa, ma faamalamalama atu o le lagolagoina o se tasi o lona uiga tatou te fesoasoani ma lagolago i lena tagata.

Valaaulia tagata aoga e faitau filemu le Mataupu Faavae ma Feagaiga 107:21–22 , ma vaavaai mo lē na fetalai mai le Alii e tatau ona lagolagoina e tagata o le Ekalesia.

O ai na fetalai mai le Alii e tatau ona tatou lagolagoina? (A o tali mai tagata aoga, tusi le O Le Au Peresitene Sili e avea o se ulutala i luga o le laupapa.)

Fai atu i tagata aoga e toe faamanatu filemu le Mataupu Faavae ma Feagaiga 107:8-9. Ae latou te le’i faitauina nei fuaiupu, faamalamalama atu e faapea i le fuaiupu e 9, o le fuaitau “O Le Au Peresitene o le Perisitua Maualuga, e tusa ma le faatulagaga a Mekisateko” e faatatau i le Au Peresitene Sili. Fai atu i tagata aoga e vaavaai mo mea o loo aoao mai e nei fuaiupu e uiga i le Au Peresitene Sili.

O a ni mea o loo aoao mai e nei fuaiupu e uiga i le Au Peresitene Sili? (I lalo o le ulutala, tusi ai le upumoni lenei: O le Au Peresitene Sili ua i ai le tiutetauave ma le pule e pulefaamalumalu ai i tofi uma i le Ekalesia.)
E tusa ai ma le fuaiupu e 22, e faapefea ona tatou lagolagoina le Au Peresitene Sili? (O tali a tagata aoga e tatau ona atagia ai le upumoni lenei: E lagolagoina le Au Peresitene Sili e ala i le talitonu, faatuatua, ma tatalo a le Ekalesia. Atonu e te manao e fautua atu i tagata aoga e faailoga upu po o fuaitau i le fuaiupu e 22 o loo aoao mai ai lenei mataupu faavae.)
Aisea e te manatu e tatau ai ona tatou lagolagoina le Au Peresitene Sili?

Valaaulia se tagata aoga e faitau leotele le saunoaga lenei mai ia Peresitene Henry B. Eyring o le Au Peresitene Sili. Fai atu i le vasega e faalogologo mo mea na ia fai mai e tatau ona tatou faia e fesoasoani ai, pe lagolago ai, o tatou taitai o le Ekalesia.

“Mo i tatou ina ia lagolagoina i latou o e ua valaauina … , e tatau ona tatou iloiloina o tatou olaga, salamo pe a tatau ai, ia folafola atu e tausia poloaiga a le Alii, ma mulimuli i Ana auauna. …

“… Atonu o se mea atamai … ona fuafua e lagolagoina ma lo tatou faatuatua ma a tatou tatalo i latou uma o loo tautuaina i tatou i le malo. Ua ou malamalama lelei i le mana o le faatuatua o tagata o le Ekalesia e lagolagoina ai e ua valaauina. … Sa ou lagonaina ai i ni auala mamana ia tatalo ma le faatuatua a tagata o e ou te le iloaina ae latou te iloaina au o se tagata ua valaauina e auauna atu e ala i ki o le perisitua” (“O Le Ekalesia Moni ma le Ola,” Ensign po o le Liahona, Me 2008, 21).

O le a le saunoaga a Peresitene Eyring e tatau ona tatou faia e lagolago ai o tatou taitai o le Ekalesia?
E mafai faapefea ona tatou lagolagoina taitai o le Ekalesia, e pei o le Au Peresitene Sili, o e tatou te le masani lelei i ai?

Fai atu i tagata aoga e manatunatu i mea o loo latou faia e lagolago ai le Au Peresitene Sili ma isi taitai o le Ekalesia. Valaaulia i latou e tusi se sini patino i a latou api o le vasega po o api talaaga mo le suesueina o tusitusiga paia, o se mea o le a latou faia i le lumanai e fesoasoani ma lagolago lelei ai i latou.

Tusi le O Le Korama a Aposetolo e Toasefululua e fai ma ulutala i luga o le laupapa. Valaaulia tagata aoga e faitau filemu le Mataupu Faavae ma Feagaiga 107:23 ma vaavaai mo le fetalaiga a le Alii e uiga i tiute o le Au Aposetolo e Toasefululua.

E tusa ai ma le fuaiupu e 23, o a mea ua valaauina Aposetolo e Toasefululua e avea ai? (A uma ona tali mai tagata aoga, tusi le mataupu faavae lenei i luga o le laupapa i lalo o le “O Le Korama a Aposetolo e Toasefululua”: O Aposetolo o ni molimau faapitoa o le suafa o Iesu Keriso i le lalolagi atoa. Atonu e te manao e fautua atu i tagata aoga e faailoga lenei aoaoga faavae i a latou tusitusiga paia.)
O le a sou manatu i le uiga o le, o Aposetolo o ni molimau faapitoa o le suafa o Iesu Keriso?

Valaaulia tagata aoga e faitau le mea o loo ta’u mai e le Bible Dictionary e uiga i le upu ma le faalagiga Aposetolo. Fai atu i tagata aoga e lipoti mai mea na latou maua.

Faamalamalama atu, o le Peresitene o le Ekalesia o le Aposetolo sinia i luga o le lalolagi ma o e fesoasoani i le Au Peresitene Sili o ni Aposetolo foi. O le mea lea, o sui o le Au Peresitene Sili o ni molimau faapitoa foi o le suafa o Iesu Keriso. Valaaulia tagata aoga e mafaufau pe na faapei o latou lagona ina ua latou faalogologo pe faitau i molimau po o tautinoga, a le Au Aposetolo. Valaaulia ni nai tagata aoga e faasoa mai o latou lagona i le vasega.

Valaaulia tagata aoga e faitau filemu le Mataupu Faavae ma Feagaiga 107:24 ma vaavaai mo mea na fetalai mai ai le Alii e uiga i le pule ma le mana o le Korama a Aposetolo e Toasefululua.

I le fuaiupu e 24, o le a le mea ua tatou aoaoina e uiga i le pule ma le mana o le Korama a Aposetolo e Toasefululua? (O le korama ua i ai le pule ma le mana e tutusa ma le Au Peresitene Sili. Atonu e te manao e tusi lenei faamatalaga i luga o le laupapa i lalo o le “O Le Korama a Aposetolo e Toasefululua.”)

Faamalamalama atu, pe a faauuina alii o ni Aposetolo, ua tuuina atu ia i latou ia lava ki e tasi o le perisitua e pei o le Peresitene o le Ekalesia. Ae peitai, o le Peresitene o le Ekalesia, i le avea ai ma faitaulaga sili pulefaamalumalu i le Perisitua Mekisateko, ua na o le pau lea o le tagata i luga o le fogaeleele ua faatagaina e faaaogaina ki uma o le perisitua. E faaaoga e isi Aposetolo ia nei ki o le perisitua pe a faatagaina ai e le Peresitene o le Ekalesia. Pe a maliu se Peresitene o le Ekalesia, e soloia le Au Peresitene Sili ma le Korama a le Toasefululua, lea e tutusa i le pule ma le mana i le Au Peresitene Sili, e avea ma tino pulefaamalumalu o le Ekalesia. I le avea ai ma Peresitene o le Korama a le Toasefululua, o le Aposetolo sinia o loo soifua, e faatagaina e faaaogaina ki uma o le peristua.

Valaaulia tagata aoga e faitau filemu le Mataupu Faavae ma Feagaiga 107:25, ma vaavaai mo se isi korama o le perisitua na ta‘ua i lenei faaaliga, ma po o a tiute o ona sui auai.

O le a le korama lona tolu na ta’ua e le Alii i lenei faaaliga? (A o tali mai tagata aoga, tusi le O Fitugafulu e fai ma ulutala i luga o le laupapa.)
O a ni tiute o Fitugafulu? (A uma ona tali mai tagata aoga, tusi le upumoni lenei i luga o le laupapa i lalo “O Le Fitugafulu”: Ua valaauina le Au Fitugafulu e talai atu le talalelei ma ia avea ma molimau faapitoa ia Iesu Keriso i le lalolagi uma.)

Valaaulia tagata aoga e faitau filemu le Mataupu Faavae ma Feagaiga 107:26, ma vaavaai mo mea na fetalai mai le Alii e uiga i le pule o le Au Fitugafulu. Valaaulia tagata aoga e lipoti mai mea na latou maua.

Ina ia fesoasoani i le vasega ia malamalama i le fetalaiga a le Alii e uiga i le pule o le Fitugafulu, valaaulia se tagata aoga e faitau le faamatalaga lenei:

“O Iesu Keriso o loo umia ki uma o le perisitua e faatatau i Lana Ekalesia. Na Ia faaee atu i luga o Ana Aposetolo taitasi ki uma e faatatau i le malo o le Atua i le fogaeleele. O le Aposetolo sinia o loo soifua, o le Peresitene o le Ekalesia, ua na o le pau lea o le tagata i luga o le fogaeleele ua faatagaina e faaaogaina ki uma o le perisitua. …

“E galulue Fitugafulu e ala i tofiga ma le faasafua mai o le pule mai le Au Peresitene Sili ma le Korama a Aposetolo e Toasefululua. … E vaetofia le Au Peresitene o Fitugafulu ma tuuina atu i ai ki e pulefaamalumalu ai i Korama a Fitugafulu” (Tusitaulima 2: Taitaiina o le Ekalesia [2010], 2.1.1).

Valaaulia ni nai tagata aoga e faasoa mai ni aafiaga na latou maua a o latou faitau pe faalogologo i lauga a sui o le Au Peresitene Sili, o le Korama a le Toasefululua, ma Fitugafulu. Afai ua feiloai tagata aoga i nisi o nei usoga, valaaulia i latou e faasoa mai foi na aafiaga.

Mataupu Faavae ma Feagaiga 107:27-32

Ua faamalamalama mai e le Faaola le ala e fai ai e korama pulefaamalumalu o le Ekalesia ia faaiuga

Tau atu i tagata aoga e te manao ia i latou e faia o se vaega se faaiuga faigofie (mo se faataitaiga, e mafai ona latou filifili i se pese e usu mo le faigalotu a le vasega o le a sosoo ai). Uunaia tagata aoga e talanoaina mea latou te filifili mai ai ma ia ausia faatasi ai se faaiuga. O le taimi lava e fai ai e tagata aoga se faaiuga, ia talanoaina mea nei:

O a ni auala e masani ona faia ai e ni vaega o tagata ni faaiuga?
E te manatu e faapefea ona faatusatusa nei faiga i le auala e fai ai e le Au Peresitene Sili, o le Korama a Aposetolo e Toasefululua, ma Fitugafulu ni faaiuga?

Vaevae tagata aoga i ni paga. Valaaulia i latou e faitau faatasi le Mataupu Faavae ma Feagaiga 107:27–32, ma, vaavaai mo le mea na aoao mai e le Alii e uiga i le auala e tatau ona faia ai e korama pulefaamalumalu o le Ekalesia ia faaiuga. A ua lava se taimi o tagata aoga e suesue ai nei fuaiupu, ia talanoaina fesili nei:

E tusa ai ma nei fuaiupu, e faapefea ona faia e korama pulefaamalumalu ia faaiuga? (A uma ona tali mai tagata aoga, atonu e te manao e aotele a latou tali i le tusia o le mataupu faavae lenei i luga o le laupapa: O faaiuga a korama pulefaamalumalu o le Ekalesia e faia i le lotogatasi ma le amiotonu.)
O a uiga auau mama o loo ta’ua i le fuaiupu e 30 e taua ona i ai i nei usoga ina ia mafai ona oo i le faiga o faaiuga lotogatasi?
E tusa ai ma le fuaiupu e 31, o le a le mea ua folafola mai e le Alii i korama pulefaamalumalu o le Ekalesia, a o latou faia faaiuga e faaaoga ai nei uiga auau mama?
E faapefea e le iloa ua folafola mai e le Alii e faamanuia i le Au Peresitene Sili, o le Korama a Aposetolo e Toasefululua, ma Fitugafulu, i Lona malamalama, ona fesoasoani ia te oe e lagolago ai nei taitai ma le talitonu, faatuatua ma tatalo ma mulimuli i a latou fautuaga?

Mataupu Faavae ma Feagaiga 107:33-38

Ua tuuina mai e le Alii se taitaiga faaopoopo i korama pulefaamalumalu o le Ekalesia

Tofi atu i tagata aoga taitasi se tasi o fuaiupu nei: Mataupu Faavae ma Feagaiga 107:33, 34, po o le 35. Valaaulia tagata aoga e suesue a latou fuaiupu ma faailoa mai upumoni e uiga i le Au Aposetolo e Toasefululua po o Fitugafulu. A maea le taimi, valaaulia ni nai tagata aoga e o mai i le laupapa ma tusi ai upumoni ua latou iloaina i lalo “O Le Korama a le Aposetolo e Toasefululua” po o “Fitugafulu.”

I totonu o upumoni e ono faailoa mai e tagata aoga o [upumoni] nei: O le au Aposetolo e Toasefululua e galulue i le suafa o le Alii ma lalo o le taitaiga a le Au Peresitene Sili i le atinaeina o le Ekalesia. O le au Fitugafulu e galulue i le suafa o le Alii, i lalo o le taitaiga a Aposetolo e Toasefululua. O le Au Aposetolo e Toasefululua ua i ai ki o le folafolaina atu o le talalelei a Iesu Keriso.

Faaiu le lesona lenei i le faasoa atu o lau molimau e uiga i tiutetauave paia o i latou o e ua valaauina e le Alii e taitaia Lana Ekalesia. Uunai tagata aoga e lagolago ma fesoasoani ia i latou e ala i le gauai atu i a latou taitaiga musuia.

Tala ma Faamatalaga o Talaaga

Mataupu Faavae ma Feagaiga 107:21–24. Molimau faapitoa i le suafa o Keriso

Na aoao mai Elder David A. Bednar o le Korama a Aposetolo e Toasefululua, le uiga o le avea ma se molimau faapitoa o le suafa o Keriso:

“O le matafaioi a se Aposetolo i aso nei e tutusa lava ma le mea sa i ai anamua (tagai i le Galuega 1:22; 4:33). O lo tatou tiute o le o atu i le lalolagi atoa ma folafola atu ‘Iesu Keriso, ma o ia sa faasatauroina’ (tagai i le Mareko 16:15; 1 Korinito 2:2). O se Aposetolo o se faifeautalai ma se molimau faapitoa i le suafa o Keriso. O le ‘suafa o Keriso’ e faatatau i le atoatoaga o le misiona, maliu, ma le toetu o le Faaola—o Lana pule, Ana aoaoga faavae, ma Ona tomai tulaga ese o le Alo o le Atua e avea ma lo tatou Togiola ma lo tatou Faaola. I le avea ai o ni molimau faapitoa o le suafa o Keriso, matou te molimau atu i le moni, paia, ma le toetu o Iesu Keriso, o Lana Togiola e le i‘u ma faavavau, ma Lana talalelei” (“Special Witnesses of the Name of Christ,” The Religious Educator: Perspectives on the Restored Gospel, vol. 12, no. 2 [2011], 1).

Mataupu Faavae ma Feagaiga 107:27-30. O faaiuga a le Au Peresitene Sili ma le Korama a Aposetolo e Toasefululua

Na aoao mai Peresitene Gordon B. Hinckley e uiga i faaiuga a le Au Peresitene Sili ma le Korama a Aposetolo e Toasefululua:

“E leai se tonu mai filifiliga a le Au Peresitene Sili ma le Toasefululua e faia e aunoa ma le autasi o le manatu o i latou uma. I le amataga o le talanoaina o se mataupu, atonu e i ai se eseesega o taofi. O se mea mautinoa lena mea. O nei tamalii e o mai mai siosiomaga eseese. O i latou o ni tamalii e mafaufau mo i latou lava. Peitai a o lei faia se tonu faaiu, e i ai le autasi i o latou finagalo ma siufofoga.

“Ua faamoemoeina lena mea pe afai latou te mulimulitai i le afioga faaalia a le Alii. Ou te toe sii mai le faaaliga e faapea:

“‘O tonu a nei korama, po o se tasi o ia [korama], e tatau ona faia ma le amiotonu uma, i le paia, ma le maualalo o le loto, agamalu, ma le faapalepale, ma i le faatuatua, ma le loto mama, ma le poto, faautauta, onosai, amioatua, ma le agalelei ma le alofa faauso;

“‘Auā o le folafolaga e faapea, afai e faateleina ia mea ia te i latou o le a lē aunoa i latou ona fua tele mai i le malamalama o le Alii’ (MF&F 107:30–31).

“Ou te faaopoopo atu se molimau patino e faapea, i le luasefulu tausaga talu ona ou auauna o se tasi o le Aufono a le Toasefululua, ma faapea ma le toe itiiti ona atoa o le sefulutolu o tausaga o ou auauna i le Au Peresitene Sili, sa lei i ai lava se faatinoga taua na faia sa lei faia ai lenei auala. Ua ou vaai i le eseese o manatu na tuuina mai i nei soalaupulega. Mai i lenei ala o le faaalia e nei uso o o latou lava mafaufauga na ala mai ai le iloiloga ma le filiga o manatu ma mataupu. Peitai ou te lei vaai lava i se feeseeseaiga tele po o se feitagai o le tasi i le isi o ou Uso nei. Ae ua ou molimauina se mea matagofie ma ofoofogia—o le aumai faatasi lea, i lalo o le taitaiga a le Agaga Paia ma lalo o le mana o faaaliga, o taofi eseese seia oo lava ina i ai le autasi ma le maliliega atoatoa. Ona faatoa faia lea o se mea. Ou te molimau atu, o lena mea, o se faamaoniga a le agaga o faaaliga o faaalia mai pea lava pea i le taitaiga o le galuega lenei a le Alii” (“O Le Atua o Loo i le Ao o Lenei Ekalesia,” Liahona, Iulai 1994, 72).

Mataupu Faavae ma Feagaiga 107:35. O ki a Aposetolo e Toasefululua

Na aoao mai le Perofeta o Iosefa Samita, o le au Aposetolo e Toasefululua “e pulefaamalumalu i ekalesia o le Au Paia. … Latou te umia ki o le talaiga, e tatalaina faitotoa o le Malo o le lagi i atunuu uma, ma folafola atu le Talalelei i tagata uma. O le mana lea, pule, ma le paia o lo latou valaauga faaaposetolo” (Aoaoga a Peresitene o le Ekalesia: Iosefa Samita [2007], 149)