Mataupu Faavae ma Feagaiga 63:1–21

Folasaga

I le taumafanafana o le 1831, sa vaavaai ai e Iosefa Samita le faapaiaga o le laueleele lea sa tuu e fausia ai e le Au Paia ia Siona i Initipene, Misuri. I le taimi na toesea ai le Perofeta, na liliuese ai nisi o tagata o le Ekalesia i Ohaio mai le poloaiga a le Alii ma solia ni agasala matuia. Sa toe foi atu le Perofeta o Iosefa Samita i Katelani i le aso 27 o Aokuso, ma i le aso 30 o Aokuso, na ia mauaina ai le faaaliga ua faamaumauina i le Mataupu Faavae ma Feagaiga 63. O le lesona lenei o loo aofia ai se vaega o lena faaaliga, lea na lapataia ai e le Alii le Au Paia e uiga i taunuuga o le amioleaga ma le fouvale.

Fautuaga mo le Aoaoina Atu

Mataupu Faavae ma Feagaiga 63:1-6

Ua lapataia e le Alii le Au Paia e uiga i taunuuga o le amioleaga ma le fouvale

Valaaulia tagata o le vasega e vaai faalemafaufau faapea, ua fesili atu e se uo le fesili lenei. Fai atu i tagata o le vasega e faasoa mai po o a ni a latou tali i ai.

Aisea e te mulimuli ai i aoaoga a le tou Ekalesia nai lo le faia o mea e fiafia ai?

A ua uma ona tali mai tagata o le vasega, fai atu le fesili lenei:

I le avea ai ma tagata o le Ekalesia a Iesu Keriso, aisea e te manatu ai e taua lo tatou ola e tusa ai ma o tatou talitonuga?

Faamalamalama atu e faapea, i le taumafanafana o le 1831, a o i ai Iosefa Samita ma isi taitai o le Ekalesia i Misuri e faapaia le laueleele ma le tulaga o le malumalu i Siona, sa fai faalilolilo ai e nisi o tagata o le Ekalesia i Ohaio ni agasala matuia. Ina ua toe foi mai le Perofeta i Ohaio, sa ia mauaina se faaaliga ua faamaumauina i le Mataupu Faavae ma Feagaiga 63. Valaaulia se tagata o le vasega e faitau leotele le Mataupu Faavae ma Feagaiga 63:1, ma fai atu i le vasega e faailoa mai pe na faapefea ona faatatau atu le Alii i tagata o le Ekalesia i lenei fuaiupu. Valaaulia tamaiti e lipoti mai mea latou te mauaina.

E mafai faapefea ona ese le ta’u o i tatou lava o tagata o le Alii mai le avea ma tagata o le Alii?

Fai atu i tagata o le vasega e toe vaai vave i le i le fuaiupu 1 ma vaai mo le poloaiga a le Alii ia i latou o e ta’ua i latou lava o Lona nuu.

O le a le mea e finagalo le Alii tatou te faia i le avea ai ma Ona nuu? (Aotele tali a tagata aoga e ala i le tusia o le mataupu faavae lenei i luga o le laupapa: I le avea ai ma nuu o le Alii, e tatau ona tatala o tatou loto ma faalogo i Ana afioga ma Lona finagalo e faatatau ia i tatou.)
O le a sou manatu i le uiga o le tatala o o tatou loto?
E faapefea e le tatalaina o o tatou loto ona saunia i tatou e faalogo atu i le siufofoga o le Alii?
O le a le mea e te faia e fesoasoani e tatala ai lou loto?

Valaaulia tagata o le vasega e tatala o latou loto i le uunaiga a le Agaga Paia i le taimi o le lesona lenei. E mafai ona e fautuaina e tusi i lalo soo se musumusuga po o uunaiga latou te maua mai le Agaga.

Valaaulia se tagata o le vasega e faitau leotele le Mataupu Faavae ma Feagaiga 63:2, 6. A o lei faitauina e le tagata o le vasega, atonu e te manao e faamalamalama atu faapea, i le fuaiupu e 6, o le fuaitau “o le aso o le toasa” e faatatau i le Afio Mai Faalua o Iesu Keriso, o se taimi o le a mafatia ai i latou e le’i salamo ia latou agasala i taunuuga o a latou filifiliga. Fai atu i le vasega e mulimuli i le faitauga, ma vaavaai mo le mea na ta’u mai e le Alii i le au amioleaga ma le au fouvale Valaaulia tagata o le vasega e lipoti mai mea ua latou mauaina.

Mataupu Faavae ma Feagaiga 63:7-21

Ua lapatai mai le Alii e faasaga i le saili faailoga ma le amioleaga

I le Mataupu Faavae ma Feagaiga 63:6, ia faailoa atu le poloaiga ia “tuu atu i e e lē talitonu ia taofi o latou laugutu.” Faamalamalama atu o le taimi lenei, ua le toe talitonu nisi o tagata o le Ekalesia i le moni o le Ekalesia ma sa latou tautatala faalauaitele e faasaga ia Iosefa Samita ma isi taitai o le Ekalesia (tagai i le History of the Church, 1:216–17). O se tasi o tagata na sili ona aliali le faitio i le Ekalesia o se tagata na igoa ia Ezra Booth. Valaaulia se tagata o le vasega e faitau leotele parakalafa e lua nei e uiga i aafiaga na oo ai ina auai Ezra Booth i le Ekalesia.

O Ezra Booth sa avea o se faifeau Metotisi i Ohaio. Sa amata ona fiafia i le Toefuataiga i le amataga o le 1831 ina ua uma ona faitau mai le Tusi a Mamona. Sa malaga atu o ia i Katelani faatasi ma Ioane ma Alice Johnson e feiloai ma le Perofeta. O Mrs. Johnson sa gasegase i le tiga o sooga o ponaivi, lea sa mafua ai le tiga, fufula, ma le malo o lona ogalima. O le taimi muamua na ia feiloai ai ia Iosefa Samita, sa le mafai ona tuu i luga lona lima i lona ulu mo le tusa ma le lua tausaga.

“I le taimi o le faatalanoaga, sa liliu atu le talanoaga i le mataupu o meaalofa faamaneta, e pei ona sa faaeeina mai i aso o le au aposetolo. Sa faapea mai se tagata, ‘O Mrs. Johnson lea ma e pe lona lima; pe ua tuu mai ea e le Alii se mana i le tagata i le taimi lenei i le lalolagi e faamalolo ai o ia?’ I ni nai minute mulimuli ane, ina ua lilu atu le talanoaga i se isi mea, sa tulai [Iosefa] Samita, ma savali atu i le isi itu o le potu, ma uu le lima o Mrs. Johnson, ma faapea atu i se tulaga na sili ona paia ma faagaeetia: ‘Tamaitai e, i le suafa o le Alii o Iesu Keriso ou te poloai atu ia e malolo,’ ma aluese vave atu ma le potu. … O le taimi lava lea na faigofie ai ona sii i luga e Mrs. Johnson [lona lima], ma ina ua toe foi atu i le fale i le aso na sosoo ai, sa mafai ona fai lana tagamea e aunoa ma se faigata po o se tiga” (i le History of the Church, 1:215–16).

O le a sou manatu, o a ni ou lagona e ono i ai pe ana e molimauina se vavega e pei o lenei?

Faamalamalama atu faapea, e lei umi ona molimauina e Ezra Booth lenei vavega, ae papatisoina o ia.

Tusi le fasifuaitau lenei i luga o le laupapa: Faailoga ma le Faatuatua.

Valaaulia se tagata o le vasega e faitau leotele le Mataupu Faavae ma Feagaiga 63:7–9. Fai atu i le vasega e mulimuli i le faitauga ma faailoa mai mea na aoao mai e le Alii e uiga i faailoga ma le faatuatua.

O a ni mea tatou te aoaoina mai i nei fuaiupu e uiga i faailoga ma le faatuatua? (E mafai e tagata o le vasega ona faailoa mai ni mataupu faavae eseese, ae ia mautinoa e faamamafa atu le upumoni lenei: O le faatuatua e le oo mai i faailoga. Tusi lenei upumoni i luga o le laupapa i lalo ifo o le Faailoga ma le Faatuatua.)
O a ni faataitaiga i tusitusiga paia o ni tagata na molimauina ni faailoga tetele po o ni vavega, ae sa le faaalia le faatuatua tumau ma le amiotonu? (O faataitaiga e mafai ona aofia ai le fanauga a Isaraelu [tagai Numera 14:22-23] ma Lamana ma Lemuelu [tagai 1 Nifae 17:43–45].)

Faamalamalama atu o Ezra Booth o se faataitaiga o se tagata e faalagolago i faailoga nai lo le faatuatua. Ina ua uma ona papatisoina o ia, sa ia maua le perisitua ma sa auina atu i se misiona i Misuri. O le mea moni lava, sa amata e Booth lenei misiona ma ni faamoemoega tetele, sa manatu o le a mafai ona ia faaliliu mai ni tagata se toatele e ala i le faaali atu o faailoga ma le faia o vavega. Ae peitai, ina ua uma ona talai atu mo se taimi puupuu ma le vaaia ai ni taunuuga sa ia tulimataia, Sa faapea ona “alu ese” Booth ma liliuese (tagai i le History of the Church, 1:216). Sa faia e le Perofeta o Iosefa Samita le lafoga lenei e uiga ia Ezra Booth:

“Ina ua ia iloa le mea moni e faapea, o le faatuatua, lotomaualalo, onosai, ma puapuaga e muamua mai i faamanuiaga, ma e aumai e le Atua le maualalo ona faatoa Ia faaeaina ai lea; ma nai lo le tuuina atu e le Faaola o le mana e taia ai tagata ma faatalitonu ai i latou’ … sa faapea ona le fiafia o ia” (i le History of the Church, 1:216).

Valaaulia se tagata o le vasega e faitau leotele le Mataupu Faavae ma Feagaiga 63:10-12. Fai atu i le vasega e mulimuli i le faitauga, ma vaavaai mo upumoni faaopoopo e uiga i faailoga ma le faatuatua.

E tusa ai ma le fuaiupu e 10, e faapefea ona oo mai faailoga? (Fesoasoani i tagata o le vasega e faailoa mai le upumoni lenei: O faailoga e oo mai i le faatuatua, e tusa ai ma le finagalo o le Atua. Faaopoopo atu le upumoni lenei i le laupapa i lalo o le Faailoga ma le Faatuatua.)
Aisea e te manatu ai tatou te maua faailoga pe a uma ona tatou faatinoina le faatuatua?
E tusa ai ma le fuaiupu e 12, o le a se mafuaaga talafeagai e saili ai faailoga? (“Mo le lelei o tagata ma le mamalu [o le Atua]”—o lona uiga ia fesoasoani i isi tagata, ma faalautele ai le galuega a le Alii.)

Faailoa atu o faailoga ma mea ofoofogia e le o taimi uma e mataina ai le vaaiga i fafo. E masani ona mafai ona tatou maua se faailoga po o se molimau i le moni o le talalelei i se auala filemu, ma patino a’o faatinoina lo tatou faatuatua.

E faapefea ona faaaoga o tatou faatuatua ina ia mafai ona maua ai se molimau e uiga i le talalelei? (Atonu e te manao e lisi tali a tagata o le vasega i luga o le laupapa. O tali atonu e aofia ai gaoioiga e pei o le tatalo, suesue i tusitusiga paia, anapogi, auauna atu ma le ola ai i mataupu faavae o le talalelei.)

Valaaulia tagata o le vasega e faasoa mai o latou aafiaga i le mauaina o se molimau i le moni o le talalelei e ala i le faaaogaina o le faatuatua i se tasi o nei auala.

Faamanatu atu i tagata o le vasega, e faaopoopo atu i le sailia o faailoga, o nisi o tagata o le Ekalesia i Ohaio sa faapea foi ona “liliu ese mai [le] poloaiga” (MF&F 63:13) ma sa latou faia ni agasala matuia. Fai atu i tagata o le vasega e faitau filemu le Mataupu Faavae ma Feagaiga 63:14–19 ma faailoa mai nisi o agasala na faia e tagata o le Ekalesia. Valaaulia tagata o le vasega e lipoti mai mea ua latou maua. (Atonu e te manao e faamalamalama atu, o se faitaaga o se tagata e auai i agasala o feusuaiga. O se faataulaitu o se tagata e auai i gaoioiga e valaaulia ai le uunaiga a agaga leaga.)

Ia matau le lapataiga a le Alii e uiga i le manao i le fuaiupu e 16. O le a le uiga o le vaai atu i isi ma le manao i ai? (O le manao o lona uiga “o le i ai o le manao malosi ma le talafeagai mo mea” po o se tasi [Taiala i Tusitusiga Paia, “Manao,” scriptures.lds.org] O le vaai atu i se isi ma le manao i ai o lona uiga o le vaai atu ma le le tusa ai i le tino o se tasi, po o se ala e faaosofia ai lagona feusuai. O lenei mea e aofia ai le matamata i ata mataga.)
O le a le mataupu faavae ua e vaaia i le lapataiga a le Alii i le fuaiupu e 16? (E tatau ona faailoa mai e tagata o le vasega le mataupu faavae lenei: Afai tatou te vaai atu i isi ma le manao i ai, o le a tatou le maua le Agaga ma tatou te faafitia le faatuatua. Atonu e te manao e fautua atu i tagata o le vasega e faailoga upu o loo aoao mai ai le mataupu faavae lenei i a latou tusitusiga paia.
Aisea e te manatu ai o le manao i se isi, e mafua ai ona aluese le Agaga mai se tagata?
O a ni mea e mafai ona tatou faia e faatoilalo ai faaosoosoga o le manao atu i isi?

O se vaega o le talanoaga i le aloese mai le manao, atonu e te manao e valaaulia se tagata o le vasega e faitau le saunoaga lenei a Elder Jeffrey R. Holland o le Korama a Aposetolo e Toasefululua:

“O le mea e aupito sili ona taua, amata i lou aluese mai i tagata, tusi ma tulaga o le a faatamaia ai oe. …

“… Afai e le lelei se ata o le televise, tape. Afai e mataga se tifaga, savali ese mai ai. Afai ua faasolo ina le talafeagai le mafutaga, faauma loa. O le tele o nei faatosinaga, atonu e le leaga i le taimi muamua, ae e mafai ona faaseseina ai a tatou faamasinoga, faapogisa ai lo tatou faaleagaga, ma taitai atu ai i se mea e mafai ona leaga. …

“… Ia suia mafaufauga leaga i vaaiga lelei ma mea fiafia e manatuaina, vaai faalemafaufau i foliga o e alolofa ia te oe ma o le a nutimomomo pe a e faia se mea latou te faanoanoa ai. … Po o a lava mafaufauga e oo atu ia te oe, ia mautinoa e taliaina i lou loto i le na o le valaauliaina. …

“Ia atiina ae ma ia i ai i le mea e i ai le Agaga o le Alii. Ia mautinoa ua aofia ai ma lou lava fale po o le fale mautotogi, ia aoao ai le ituaiga o faatufugaga, musika, ma tusi faitau e te tuuina ai iina” (“Ia Le Toe Ulu Mai i Lo’u Agaga Le Ita Mai ia te Au,” Ensign po o le Liahona, Me 2010, 45, 46).

Faasino atu i le mataupu faavae muamua na e tusia i luga o le laupapa i le amataga o le vasega: I le avea ai ma nuu o le Alii, e tatau ona tatala o tatou loto ma faalogo i Lana afioga ma Lona finagalo e faatatau ia i tatou. Valaaulia tagata aoga e mafaufau pe na tatala o latou loto i uunaiga po o musumusuga i le taimi o a latou suesuega o tusitusiga paia i le aso. Uunaia i latou e faatino uunaiga ma musumusuga na latou maua mai le Alii, ma molimau atu a’o latou faia o lea, o le a avea i latou ma tagata o le Alii.

Tala ma Faamatalaga o Talaaga

Mataupu Faavae ma Feagaiga 63:16. O le manao [tuinanau] e mafua ai le aluese o le Agaga

I o tatou aso, o le salalau atu o ponokalafi ua aliali atu ai le toatele i le faaosoosoga o le tuinanau i isi. Na faamautinoa mai e Elder Richard G. Scott o le Korama a Aposetolo e Toasefululua e faapea, o le faaaogaina o ponokalafi o se gaoioiga o le tuinanau o le a faatapulaa ai le mafai e se tagata ona olioli i faamanuiaga o le Agaga o le Alii:

“Ou te faasoa atu se lapataiga. O le matuai lelei lava o Satani i le polokaina o fesootaiga faaleagaga e ala i le tauanauina o tagata taitoatasi, e ala i faaosoosoga, e soli tulafono o loo faavae ai fesootaiga faaleagaga. O nisi, ua mafai ona ia faatalitonuina i latou e le o mafai ona latou maua se taitaiga faapena mai le Alii.

“Ua poto Satani i le faaaogaina o mana vaisu o ponokalafi e faatapulaa ai le mafai e se tagata ona taitaiina e le Agaga. O osofaiga a ponokalafi i ona ituaiga matautia, aati, ma faataumaoi uma ua mafua ai le tele o le faavauvau, mafatiaga, lototiga, ma faaleagaina ai faaipoipoga. O se tasi lea o uunaiga aupito sili ona ta’usalaina i le lalolagi. Pe e ala mai i itulau lolomi, tifaga, televise, faaupuga mataga, laulauvavale i le telefoni, po o le emo mai i lau komepiuta, o ponokalafi e malolosi naua faavaisu ma e matuai o’oo’o le faataumaoi. O lenei meafaigaluega malosi a Lusifelo e olopalaina ai le mafaufau ma le loto ma le agaga o soo se tasi e faaaogaina. O i latou uma e maua i lenei upega faatosina, ma lavelave, ma tumau ai lava, o le a oo ina matuai fai ma vaisu seia oo i lona faatosinaga le mama, ma faataumaoi. Mo le toatele, o lena vaisu e le mafai ona faatoilaloina e aunoa ma le fesoasoani. O le mamanu matautia o se mea e masani ai. E amata i le fia iloa lea o faateteleina i ona faaosofia, ma e ta’uamiotonuina e manatu sese e faapea, a faia faalilolilo, e le afaina ai se isi tagata. Mo i latou e faafilemuina i lenei pepelo, o le gaoioiga e alu loloto, ma mea faaosofia e sili atu ona malolosi, seia oo ina tapuni le mailei ae faaaoga loa e le mausa leaga ma le le mama, ia lana pule saua. …

“Afai ua maileia outou i ponokalafi, ia fai se tautinoga atoatoa e faatoilalo loa i le taimi nei. Saili se nofoaga filemu; tatalo vave mo se fesoasoani ma le lagolago. Ia onosai ma usiusitai. Aua ne’i fiu” (“To Acquire Spiritual Guidance,” Ensign po o le Liahona, Nov. 2009, 8–9).