Lesona 106

Mataupu Faavae ma Feagaiga 101:43–101

Folasaga

I le aso 16 ma le 17 o Tesema, 1833, na maua ai e le Perofeta o Iosefa Samita se faaaliga e faatatau i le Au Paia i Misuri o e na tuua o latou fale ina ia sosola ese mai sauaga. O le toatele o na Au Paia na faamalosia e tuua a latou meatotino uma. O le faaaliga na maua e le Perofeta, ma ua faamaumauina i le Mataupu Faavae ma Feagaiga 101, ua talanoaina i ni lesona se tolu i lenei tusi lesona. O le lesona lona tolu lenei ua aofia ai le faataoto a le Alii i le tamalii ma laau olive, o loo aoao mai ai Lona finagalo e uiga i le laveaiina o Siona. O loo aofia ai foi le fautuaga a le Alii ina ia faaauau pea e le Au Paia ona faapotopoto faatasi (faatasi ai ma se faatatauga i Lana faataoto i saito ma titania) ma saili se faasa‘oga o solitulafono na faia e faasaga ia i latou (faatasi ai ma se faatatauga i Lana faataoto i le fafine ma le faamasino amioletonu).

Fautuaga mo le Aoaoina Atu

Mataupu Faavae ma Feagaiga 101:43-62

Ua tuuina mai e le Alii le faataoto i le tamalii ma laau olive

O mataupu faavae o loo aafia ai

E tele mataupu faavae e le ta’ua tuusa’o mai i tusitusiga paia, ae nai lo o lena e tau faaataata mai. O mataupu faavae e faaataata mai e masani ona maua e ala i le vaavaai mo sootaga o le mafuaaga-ma-aafiaga. Ina ia fesoasoani i tagata aoga ia maua mataupu faavae o loo tau faaataata mai, mafaufau e fai atu ia i latou e faamalamalama mai le tulaga po o le aano o se tala.

I luga o le laupapa tusi ai le O le faataoto i le …

Faamalamalama atu o se faataoto o “se tala faigofie sa faaaoga e faamalamalama ai ma aoao mai ai se upumoni po o se mataupu faavae faaleagaga. E faavae se faataoto i le faatusatusaina o se meafaitino masani po o le mea na tupu i se upumoni” (Taiala i Tusitusiga paia, “Faataoto,” scriptures.lds.org).

Fai atu i tagata aoga e lisi nisi o faataoto na aoao mai e le Faaola i le taimi o Lana auaunaga faaletino. Mo se faataitaiga, e ono ta’u mai e tagata aoga le faataoto i le Samaria agalelei po o le faataoto i taupou e toasefulu.

Faamalamalama atu o le lesona o le aso, o le a talanoaina ai e tagata aoga se faataoto na tuuina mai e le Faaola e ala mai ia Iosefa Samita. Faauma le fuaitau o loo i luga o le laupapa ina ia fai mai O le faataoto i le tamalii ma laau olive.

Valaaulia se tagata aoga e faitau leotele le Mataupu Faavae ma Feagaiga 101:43. Fai atu i le vasega e mulimuli i le faitauga ma vaavaai mo le savali na fetalai mai le Alii sa finagalo e ta’u mai i Lona nuu. (Sa finagalo o Ia ia malamalama tagata “e faatatau i le laveaiina o Siona.”) Valaaulia se tagata aoga e faitau leotele le Mataupu Faavae ma Feagaiga 101:44–45, ma fai atu i le vasega e mulimuli i le faitauga, ma ia tagai totoa i faamatalaga auiliili o le faataoto. Ina ia mautinoa ua malamalama tagata aoga i le tala, fai atu fesili nei:

• O le a le mea na faatonu e le tamalii ana auauna e fai?

• Aisea na manao ai le tamalii ia i ai ni leoleo i lona tovine? Aisea na ia manao ai i se leoleo i luga o le olo?

Valaaulia se tagata aoga e faitau leotele le Mataupu Faavae ma Feagaiga 101:46. Fai atu i le vasega e mulimuli i le faitauga, ma vaavaai po o le a le lelei na mulimuli ai auauna i faatonuga a le tamalii.

Valaaulia tagata aoga e faitau filemu le Mataupu Faavae ma Feagaiga 101:47–50, ma toe vaai po o le a le lelei na mulimuli ai auauna i faatonuga a le tamalii.

• O le a le lelei na mulimuli ai auauna i faatonuga? (Atonu e te manao e faamalamalama atu faapea, i le fuaiupu e 50, o le fuaitau “a’o latou fefinaua’i o le tasi ma le isi” o lona uiga sa fefinaua’i auauna o le tasi i le isi.)

• Aisea na le faamanuiaina ai auauna i le fauga o le olo?

Valaaulia se tagata aoga e faitau leotele le Mataupu Faavae ma Feagaiga 101:51. Fai atu i le vasega e vaavaai mo le mea na tupu ona sa le’i fausia e auauna le olo. Valaaulia i latou e lipoti mai mea latou te maua.

Faitau atu le Mataupu Faavae ma Feagaiga 101:52–54 i tagata aoga. Fai atu ia i latou e mulimuli i le faitauga, ma vaavaai mo upu a le tamalii i ana auauna.

• E tusa ai ma le fuaiupu e 54, aisea na le fiafia ai le tamalii ona sa le’i fausia e ana auauna se olo?

• E faapefea ona faatatau mea na tutupu na faamatalaina i lenei faataoto i le mea na tupu i le Au Paia i Misuri?

O se vaega o lenei talanoaga, atonu e te manao e faamanatu atu i tagata aoga faapea, i se faaaliga na tuuina mai ia Iulai 1831, na atofaina ai e le Alii le nofoaga mo se malumalu i Initipene, Misuri (tagai i le MF&F 57). I le aso 3 o Aokuso, 1831, na faapaiaina ai e Iosefa Samita le tulaga o le malumalu i Initipene. Ae peitai, sa leai ni mea a le Au Paia na faia e fausia ai le malumalu. I le aso 2 o Aokuso, 1833, na toe poloaiina ai e le Alii le Au Paia i Misuri e fausia se malumalu (tagai i le MF&F 97).

• E faapefea ona faatusa le olo i le faataoto i le malumalu lea sa le mafai e le Au Paia ona fausia?

• O a ni nisi o mataupu faavae i le faataoto lenei e mafai ona tatou faaaogaina i o tatou olaga? (Talu ai o se faataoto e mafai ona tele ni ona faauigaga, atonu e fautuaina mai e tagata aoga ni nai mataupu faavae, e aofia ai nei: A tatou usiusitai i poloaiga a le Alii, e faamalolosia i tatou e tetee atu i fili faaleagaga ma faaletino. O perofeta e avea o ni leoleo i le olo, e lapataia i tatou e faasaga i mea matautia e oo mai. E ala i galuega o le malumalu, tatou te saunia ai e tetee atu i le fili.)

Valaaulia ni nai tagata aoga e auauai i le faitauina leotele o le Mataupu Faavae ma Feagaiga 101:55–62. Fai atu i le vasega e mulimuli i le faitauga ma vaavaai mo le mea na poloaiina e le tamalii ia Ana auauna e fai.

• O le a le mea na ta‘u atu e le tamalii i Lana auauna e fai? (Faapotopoto se autau ma laveai le tovine.)

Faamalamalama atu, o le auauna o loo ta‘ua i le fuaiupu e 55 e faatusa ia Iosefa Samita (tagai i le MF&F 103:21). Sa mulimuli Iosefa Samita i le poloaiga a le Alii ma faatulaga se vaega na taua o le Tolauapiga a Siona e laveai mai le laueleele o Siona. O le a talanoaina le Tolauapiga a Siona i le lesona 108 ma le 110.

Mataupu Faavae ma Feagaiga 101:63-75

Ua apoapoai mai le Alii i le Au Paia ina ia faaauau pea le galuega o le faapotopotoina

Faamalamalama atu faapea, e ui lava ina faate’aese le Au Paia mai le Itumalo o Jackson, Misuri, mai o latou fale, ae na poloaiina lava i latou e le Alii e faaauau pea ona fausia Lona malo. Valaaulia se tagata o le vasega e faitau leotele le Mataupu Faavae ma Feagaiga 101:63–64 ma fai atu i le vasega e vaavaai mo mea na fetalai mai le Alii o le a faaauau pea ona Ia faia. Fai atu i tagata aoga e lipoti mai mea ua latou mauaina.

Valaaulia tagata aoga e faitau filemu le Mataupu Faavae ma Feagaiga 101:65–66, ma vaavaai mo se faataoto na faatatau atu i ai le Faaola.

• O le a le faatusa o le saito ma titania i le faataoto lenei? (O le saito ua faatusa i tagata faamaoni o le Ekalesia, ae o titania ua faatusa i tagata amioleaga o le lalolagi. (Atonu e te manao e faamalamalama atu o titania o vao e foliga e pei o ni saito a’o laiti.)

Ina ia fesoasoani i tagata aoga ia malamalama i lenei faataoto, faamalamalama atu i aso anamua, o falesaito o nofoaga sa faapotopoto i ai saito ma teuina malu ai. E faatatau i lenei faataoto ma isi aoaoga i tusitusiga paia, na faamalamalama mai e Elder David A. Bednar o le Korama a Aposetolo e Toasefululua, “O falesaito o malumalu paia” (“Taofia ma le Mamalu o se Igoa ma Tulaga,” Ensign po o le Liahona, Me 2009, 97). Tusi le faamatalaga lenei i luga o le laupapa: falesaito = malumalu paia.

• E faavae i lenei faataoto, o a ni faamanuiaga o le a tatou maua e ala i le faapotopoto atu i malumalu ma auauna atu ai iina? (E mafai ona faaaoga e tagata aoga ni upu eseese, ae e tatau ona latou faailoa mai le mataupu faavae lenei: A o tatou faapotopoto i le malumalu, tatou te maua ai le puipuiga ma saunia ai i tatou lava mo le ola e faavavau.)

• O le a sou manatu, e mafai faapefea e sauniga ma feagaiga o le malumalu ona puipuia ma saunia i tatou mo le ola e faavavau?

Valaaulia ni nai tagata aoga e faasoa mai pe o faapefea ona avea le malumalu ma se punavai o le puipuiga ma sauniuniga mo i latou ma o latou aiga. Atonu e te manao e faaopoopo atu lau molimau e uiga i lenei mataupu faavae.

Otooto le Mataupu Faavae ma Feagaiga 101:67–75 i le faamalamalama atu faapea, e ui lava ina sa faamalosia le o ese o le Au Paia mai le Itumalo o Jackson, Misuri, ae na fautuaina i latou e le Alii ina ia faaauau pea ona faatau mai ni fanua iina ma i itumalo tuaoi.

Mataupu Faavae ma Feagaiga 101:76-101

Ua fautuaina e le Alii le Au Paia e faaauau pea ona saili atu i se auala e toe foi atu ai i o latou fale i Misuri

Faamalamalama atu faapea, e le gata i le faatonuina o le Au Paia e faatau mai fanua, na fetalai atu foi le Alii ia i latou e “tagi atu mo le toe totogi mai, ma le toe faaola mai” ona o amioga a i latou o e na sauaina i latou (tagai i le MF&F 101:76). I se isi faaupuga, sa Ia ta‘u atu ia i latou e saili le faamasinoga tonu e ala i le tulafono a le malo.

Valaaulia se tagata aoga e faitau leotele le Mataupu Faavae ma Feagaiga 101:76–80. Fai atu i le vasega e mulimuli i le faitauga ma faailoa mai tulafono a le malo o le a mafai ai e le Au Paia ona saili le fesoasoani mai taitai o le malo.

• E tusa ai ma nei fuaiupu, na taitaiina e le Alii le faatuina o le Faavae o le Iunaite Setete i tausaga na muamua atu. Aisea e finagalo ai o Ia ina ia faatumauina lenei faavae?

• Na fetalai mai le Alii o se tasi o faamoemoega o le “faitalia” ina ia mautinoa lea tatou te “tali atu mo a [tatou] lava agasala” (MF&F 101:78). Aisea e avea ai le tali atu mo a‘u lava—o le nafa ma a tatou lava amioga—o se vaega taua o le faitalia? E faapefea ona e tali atu i se tasi e fai mai “Ou te saoloto e faia soo se mea ou te manao i ai”?

• Na fetalai mai le Alii, e le tatau ona i ai se tasi e saisaitia i se isi tagata. Aisea e te manatu e taua ai le le saisaitia o tagata?

O se vaega o lenei talanoaga, tusi le faamatalaga lenei i luga o le laupapa: Ua tuuina mai e le Atua ia i tatou le faitalia, o le mana e filifili ai, peitai tatou te …

Valaaulia tagata aoga e faauma le faamatalaga lenei e faavae i le Mataupu Faavae ma Feagaiga 101:78. (A o faailoa mai e tagata o le vasega le mataupu faavae lenei, faauma le faamatalaga o loo i luga o le laupapa: Ua tuuina mai e le Atua ia i tatou le faitalia, o le mana e filifili ai, peitai tatou te tali atu mo a tatou lava filifiliga.)

Faamalamalama atu, na faaaoga e le Alii se faataoto e uunaia ai le Au Paia e saili le fesoasoani mai taitai o le malo. Valaaulia se tagata aoga e faitau le faataoto i le Mataupu Faavae ma Feagaiga 101:81–84 (tagai foi i le Luka 18:1-8). Fai atu i le vasega e mulimuli i le faitauga, ma mafaufau i auala e faatatau ai le faataoto i le Au Paia i Misuri. Ona fai atu lea i se isi tagata aoga e faitau le Mataupu Faavae ma Feagaiga 101:85–88. Fai atu i le vasega e vaavaai mo le auala na faatatau ai e le Faaola le faataoto i na tagata o le Au Paia.

• I lenei vaitaimi o le talafaasolopito o le Ekalesia, o ai e ono faatusa i ai le fafine ua oti lana tane? (Tagata o le Ekalesia.) O ai e mafai ona faatusa i ai le faamasino? (O le faamasino e mafai ona faatusa i faamasino ma taitai o le malo o le a talosaga i ai le Au Paia mo se fesoasoani. O Ia foi e mafai ona faatusa i le Tama Faalelagi, o le o le a faaauau pea ona tatalo atu i ai le Au Paia.)

• O le faaaogaina o lenei faataoto, o a ni mea patino na faatonu e le Alii le Au Paia e fai?

Faamalamalama atu, sa apili le Au Paia i faamasino i faamasinoga i le lotoifale peitai sa le’i maua mai ai le lagolago sa latou faamoemoe i ai. Sa latou talosaga atu ia Daniel Dunklin, o le kovana o Misuri, ma Andrew Jackson, o le peresitene o le Iunaite Setete, e fesoasoani ia i latou e toe foi atu i o latou fale ma fanua, ma tuuina mai le puipuiga mo i latou. Sa le taliaina e nei taitai uma e fesoasoani ia i latou. Sa talosaga foi le Au Paia i le fono faitulafono a le setete o Misuri, peitai sa latou mumusu e fesoasoani [ia i latou].

Faasino i le mataupu faavae na e tusia i luga o le laupapa. Valaaulia se tagata aoga e faitau leotele le Mataupu Faavae ma Feagaiga 101:89-91. Fai atu i le vasega e vaavaai mo auala o le a faamasinoina ai taitai o le malo pe afai sa latou mumusu e fesoasoani i le Au Paia. Fai atu i tagata aoga e lipoti mai mea latou te maua.

Valaaulia tagata aoga e faitau filemu le Mataupu Faavae ma Feagaiga 101:92–95, ma vaavaai mo mea na ta‘u mai e le Alii i le Au Paia e fai mo o latou taitai o le malo.

• O le a le mea ua aoao mai e le fuaiupu e 92 ia i tatou e uiga i le Alii? (E le finagalo o ia e faasala tagata. E finagalo o Ia ina ia salamo tagata uma ina ia mafai ona Ia alofa mutimutivale ia te i latou.)

Otooto le Mataupu Faavae ma Feagaiga 101:96–101 i le faamatala atu, na fautuaina e le Alii le Au Paia ina ia taofi pea i o latou fanua i le Itumalo o Jackson, e tusa lava pe sa le’i faatagaina i latou e nonofo ai iina. Sa Ia folafola mai e faapea, afai latou te ola agavaa, o le a i ai se aso e mafai ai ona latou nonofo iina.

Ina ia faaiu, faasoa atu lau molimau e uiga i mataupu faavae na talanoaina e tagata aoga.

Tala ma Faamatalaga o Talaaga

Mataupu Faavae ma Feagaiga 101:44–64. O le faataoto i le tamalii ma laau olive

O palakalafa nei o le a faamalamalama ai se tasi o auala e faamatala ai le faataoto i le tamalii ma laau olive:

“E foliga mai o le faataoto e tatau ona faamatalaina i le ala lenei: o le tamalii o le Alii, o le laueleele filifilia i Lona tovine o Siona i Misuri. O nofoaga e nonofo ai le Au Paia i Siona o laau olive. O auauna o le au malaga a le Au Paia o Aso e Gata Ai, ae o leoleo o o latou taitai i le Ekalesia. A o lei fausiaina Siona, sa latou fefinauai o le tasi ma le isi ma faapea ona le fausia ai le olo po o le Malumau, lea na uma ona faapaiaina muamua lona tulaga i le aso 3 o Aokuso, 1831. Ana faapea na latou fausiaina e pei ona faatonuina ai, semanu e avea o se sulufaiga faaleagaga mo i latou, aua mai le malumalu e mafai ai e leoleo a le Alii ona iloa mamao atu e ala i faaaliga ia feoaiga a le fili. O lenei muai silafia o le a laveaiina ai i latou ma a latou galuega fita i le taimi e osofai mai ai le fili.

“Ae peitai sa paie, faatalale solo, ma momoe le Au Paia i Misuri. Na oo mai le fili, ma o le taunuuga o sauaga i Misuri. Na faataapeapeina tagata o le Alii ma ma’umau ai le tele o a latou galuega. Sa aoaiina e le silisili Ese Lona nuu, e pei ona tatou vaaia, ae na Ia poloaiina se tasi o Ana auauna (fuaiupu e 55), o Iosefa Samita (103:21), e faapotopoto le ‘malosi o Loʼu fale’ ma laveai mai Ona laueleele ma meatotino mai ia te i latou.

“Mulimuli ane, na o atu ai le Perofeta ma ona uso i le Tolauapiga lauiloa a Siona agai i Misuri i le 1834 i se taumafaiga e faataunuu tuutuuga o le faataoto. A’o le’i o atu i latou, na faapea ona maua se faaaliga faaopoopo (tagai i le 103:21–28) e faatatau i le laveaiina o Siona. Sa faatonuina le usoga e taumafai e faatau mai fanua i Misuri, ia le faaaogaina le faamalosi; ma afai e sau le fili ia i latou, ia latou tuu atu se fetuu i o latou luga. Sa lei laveaiina mai Siona i lena taimi, ae e mafai ona tatou saili atu i ai i le lumanai e le mamao tele. … O le a togiolaina pe a tusa ai ma le finagalo o le Alii.” (Sidney B. Sperry, Doctrine and Covenants Compendium [1960], 521–22; quoted in Doctrine and Covenants Student Manual [Church Educational System manual, 2001], 243).

Mataupu Faavae ma Feagaiga 101:78. Filifiliga saoloto ma le tali atu o le tagata mo ia lava

Na aoao mai e Elder D. Todd Christofferson o le Korama a Aposetolo e Toasefululua, i le mafuaaga e lelei ai le faaaoga o le faaupuga faitalia amiotonu nai lo o le faaupuga filifiliga saoloto:

“I tausaga ua mavae, sa masani ona tatou faaaogaina ai le faaupuga filifiliga saoloto. E le faapea e le sa’o lena upu, ae talu ai nei lava ua tatou matauina ai ua le toe ta’ua ai le filifiliga saoloto i tusitusiga paia. Latou te talanoa i lo tatou ‘saoloto e filifili’ ma ‘saoloto e galulue’ mo i tatou lava ma e uiga i lo tatou matafaioi i le faia o mea e tele i lo tatou lava ‘loto malie.’ Ae o le upu faitalia e faaali mai a le na o ia lava, po o le, i le Mataupu Faavae ma Feagaiga, vaega 101, fuaiupu e 78, faatasi ai ma le upu e suia ai le uiga o le amiotonu: ‘Ina ia mafai e tagata taitoatasi ona faia e tusa ma mataupu faavae ma mataupu autu … e tusa ma le faitalia [amiotonu] ua Ou tuu atu ia te ia, ina ia mafai e tagata taitoatasi ona tali mo ana lava agasala i le aso o le faamasinoga’ (faaopoopo le faamamafa). Pe a tatou faaaogaina le faaupuga faitalia amiotonu, o lona uiga, ua talafeagai lo tatou faamamafaina o le tali atu o le tagata mo ia lava, o se vaega taua o le meaalofa faalelagi o le faitalia. O i tatou o tagata lelei ma e fai ma o tatou lava sui, e saoloto e filifili ae e nafa foi ma a tatou lava filifiliga” (“Moral Agency” [Brigham Young University devotional address, Jan. 31, 2006], 1, speeches.byu.edu).

Mataupu Faavae ma Feagaiga 101:80. Ua faatuina e le Atua le Faavae o le Iunaite Setete

Na saunoa mai Peresitene J. Reuben Clark o le Au Peresitene Sili e faapea:

“Ia te a’u, ou uso e ma tuafafine, o lena fetalaiga a le Alii, ‘Ua ou faatuina le Faavae o lenei laueleele,’ ua tuu ai le Faavae o le Iunaite Setete i le tulaga o le a i ai, pe ana faapea e tusia i le tusi o le Mataupu Faavae ma Feagaiga lava ia. E avea ai le Faavae ma afioga a le Alii ia i tatou. Na faapea ona tuuina mai, e le ala mai i le upu e fetalaia mai, ae e ala i le galueaina o lona mafaufau ma le agaga i luga o mafaufau o tagata, e musuia i latou i le faagaoioia o lenei pepa o faamatalaga tele o le malo o tagata, e le suia ai lana pule” (i le Conference Report, Ape. 1935, 93).

Mataupu Faavae ma Feagaiga 101:80. “Alii atamamai o e na Ou faatutu mai i luga mo lenei lava faamoemoe”

Na saunoa Peresitene Polika Iaga e uiga i nisi o alii o e na avea ma ni meafaigaluega i aao o le Atua e faatuina le Faavae o le Iunaite Setete:

“Matou te talitonu na saunia le Alii i le taimi e tatau ona ia aumaia ai lana galuega, e faapea, a oo mai loa le atoatoaga o le taimi, ia i ai se nofoaga i luga o lona tuugaaao, e tatau ona lava le saolotoga o le mafaufau e i ai, ina ia mafai ona nonofo ai lana Au Paia i le filemu i lalo o le faapaologa malu o le tulafono faavae ma aia tatau tutusa. I lenei vaaiga, tatou te mafaufau ai o alii i le Fetauaiga na musuia e le silisili Ese, e tatia‘i ese filifili o le faigamalo faatina, ma lana tapuaiga ua i ai. Ma o lenei pogai na musuia ai Adams, Jefferson, Franklin, Washington, ma le toatele o isi i galuega e tetee atu ai i gaoioiga a le Tupu o Peretania Tele … i le faavaeina lea o se faigamalo fou i luga o se mataupu faavae o le saolotoga sili atu, o se faavae o le faigamalo [a le atunuu lava ia], e faatagaina ai le faaaoga saoloto o tapuaiga faalelotu.

“O le siufofoga lea o le Alii ua musuia ai aliii agavaa uma o e na i ai le malosiaga ma faatosinaga i na taimi faigata, e le gata ina ia o atu e tau, ae ia faaaoga foi le poto i fonotaga, puipuiga, faamalosiauga, ma le faatumauina o fanua ua siomiaina, faapea foi ona atinae ma faaaoga na faiga atamai ma le lelei lea e faamautuina ai i latou lava ma augatupulaga e sosoo ai, i faamanuiaga o se faigamalo saoloto ma tutoatasi” (Discourses of Brigham Young sel. John A. Widtsoe [1954], 359–60).

Mataupu Faavae ma Feagaiga 101:81-95. “E tatau ona faaauau pea ona latou tagi atu mo le totogi”

I le faaaliga ua faamaumauina i le Mataupu Faavae ma Feagaiga 101, na toe fofoga mai ai e le Alii Lana faataoto e uiga i le fafine na faalelavaina le faamasino seia oo ina ia tuuina atu lana talosaga (tagai i le Luka 18:1-8). Sa Ia faatusaina le faataoto i le tulaga o le Au Paia o e na tutuli ese mai i o latou fale i Misuri. Sa tatau ona latou o atu i taitai o le malo e saili i le faamasinoga tonu ma le puipuiga, e amata atu i se faamasino, ma, pe a talafeagai ai, ia o atu i le kovana o Misuri, ma le peresitene o le Iunaite Setete. Afai na le utagiaina mai augani a le Au Paia, na fetalai mai le Alii, o le a Ia tulai mai i le toasa ma faia le faamasinoga tonu ia i latou o e na faoa meatotino a le Au Paia, aua o tagata uma o le a “tuua … e aunoa ma se ‘alofaga” (MF&F 101:93). Na faamalamalama mai e Peresitene Iosefa Filitia Samita:

“Na tatau foi i le Au Paia ona ave atu o latou faavauvauga i faamasinoga e tatau ai ma saili mo ni fofo o a latou mea sese. Sa o se laasaga na matua manaomia lenei, ma ina ua faia e le Au Paia lenei mea, ma teenaina o latou aia faalemalo ma faalelotu, sa tuua na taitai e aunoa ma ni alofaga, ma na tauamiotonuina faamasinoga a le Silisili Ese lea na oo mulimuli ane i o latou luga i le taimi o le Taua i le Lotoifale. …

“Talu ai o loo i ai se tulafono ta’uamiotonuina o le faasalaga, e tumau ma faavavau e pei o isi tulafono a le Silisili Ese [tagai 2 Korinito 9:6; MF&F 6:33], o le a faapea ona oo mai le aso o le a i ai ni suiga e faia i luma o se Faamasinoga Amiotonu o le a le faafefeina e taufaamatauga a tagata faatupu vevesi” (Church History and Modern Revelation, 2 vols. [1953], 1:462, 469).