Lesona 111
Mataupu Faavae ma Feagaiga 106:1-107:20
Folasaga
I le aso 25 o Novema, 1834, na maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 106. I le faaaliga lenei, na valaauina ai e le Alii ia Warren A. Kaotui, o le uso matua o Oliva Kaotui, e pulefaamalumalu i le Ekalesia i Freedom, Niu Ioka, ma nuu taulalata ane i ai. Na maua e Iosefa Samita le faaaliga ua faamaumauina i le Mataupu Faavae ma Feagaiga 107 pe a o Aperila 1835, a’o saunia sui uma o le Korama a Aposetolo e Toasefululua e faia ni misiona i le Iunaite Setete i sasae. I se faamatalaga tusitusia, na saunoa ai le Toasefululua: “Ua lata mai le taimi o le a tatou valavala ai; ma o le aso tatou te toe feiloai ai, e na o le Atua e silafia; o le mea lea ua matou manatu ai e fesili i le ua tatou ta’ua o lo tatou Perofeta ma le Tagatavaai, ina ia ole atu i le Atua mo i tatou, ma maua mai se faaaliga, … ina ia mafai ona tatou vaai atu i ai a’o tatou valavala, ina ia mafai ona faamafanafanaina o tatou loto” (i le History of the Church, 2:209–10). O le faaaliga na faamaumauina i le 1835, ae “o faamaumauga o le talafaasolopito ua faamautu mai ai, o le tele o fuaiupu 60 e oo i le 100 ua aofia ai se faaaliga na tuuina mai e ala mai ia Iosefa Samita i le aso 11 o Novema, 1831” (folasaga i le MF&F 107). O le lesona muamua lenei o lesona e tolu o le tusi lesona lenei i le Mataupu Faavae ma Feagaiga 107.
Fautuaga mo le Aoaoina Atu
Mataupu Faavae ma Feagaiga 106
Ua valaauina e le Alii ia Warren Kaotui e avea ma faitaulaga sili pulefaamalumalu i Freedom, Niu Ioka
Fai atu i tagata aoga e mafaufau i se taimi na latou lagolagoina ai se epikopo fou po o se peresitene fou o le paranesi.
-
O le a sou manatu, o a ni lagona o lena tagata a o lagolagoina o ia?
Faamalamalama atu faapea, i le 1834 sa oo ai le Ekalesia i se tuputupu a‘e tele i Freedom, Niu Ioka, e itiiti ifo i le 200 maila (e tusa e 320 kilomita) mai Katelani, Ohaio. Na valaauina e le Alii se taitai perisitua e pulefaamalumalu i luga o le au paia iina. Valaaulia se tagata aoga e faitau filemu le Mataupu Faavae ma Feagaiga 106:1–3.
-
O le a le mea na faatonu e le Alii ia Warren Kaotui e fai?
Faamalamalama atu atonu sa tutusa lagona o Uso Kaotui ma lagona o se epikopo po o se peresitene fou i aso nei. Na faasoa mai e le Alii ni tuleiga faamafanafana a o taliaina e Uso Kaotui lona valaauga fou. Valaaulia se tagata aoga e faitau leotele le Mataupu Faavae ma Feagaiga 106:6. Fai atu i le vasega e mulimuli i le faitauga ma faailoa mai pe aisea na fiafia ai le Alii ia Uso Kaotui.
-
O le a sou manatu i le uiga o le fuaitau “ifo … i lo’u tootoo”? (Ina ia fesoasoani i tagata aoga e tali lenei fesili, atonu e te manao e faamalamalama atu, o se tootoo o se laau na feaveai e tupu ma masiofo. O se faatusa o le pule.)
-
O le a sou manatu i le uiga o le fuaitau “vavae ese o ia lava mai faiva o tagata”?
I luga o le laupapa, tusi ai le Afai , ona . Valaaulia se tagata aoga e faitau leotele le Mataupu Faavae ma Feagaiga 108:7–8 . Fai atu i le vasega e mulimuli i le faitauga, ma saili mo le fautuaga ma folafolaga a le Alii ia Uso Kaotui. Valaaulia tagata aoga e tusi mea latou te maua i le tusia o se mataupu faavae o le “afai-ona” i a latou tusitusiga paia. A ua lava se taimi na tuu atu i ai, valaaulia ni nai tagata aoga e faasoa mai mataupu faavae ua latou faailoaina mai. (E mafai ona faaaoga e tagata aoga ni upu eseese, ae e tatau ona latou faailoa mai le mataupu faavae lenei: Afai tatou te faalotomaualaloina i tatou lava i luma o le Alii, o le a faapea ona i ai Lona alofa mutimutivale i o tatou luga, siitia i tatou, ma tuuina mai ia i tatou le alofa tunoa ma le mautinoa.)
-
O a ni auala e siitia ai e le Alii i latou o e faamaualaloina i latou lava i Ona luma?
Molimau atu e mafai ona tatou maua faamanuiaga na folafola mai ia Warren Kaotui, pe afai tatou te faalotomaualaloina i tatou lava i luma o le Alii.
Mataupu Faavae ma Feagaiga 107:1–20
Ua aoao mai le Alii e uiga i le Peresitua Mekisateko ma le Perisitua Arona
Faamalamalama atu o le faaaliga ua faamaumauina i le Mataupu Faavae ma Feagaiga 107 na fesoasoani e faamanino ai le faatulagaga ma tiutetauave o le Au Peresitene Sili, o le Korama a Aposetolo e Toasefululua, ma le Korama a Fitugafulu.
Faitau le faamatalaga lenei o se perofeta o le Feagaiga Tuai. Valaaulia tagata aoga e mate po o ai latou te manatu o loo e faamatalaina.
O lenei perofeta “o se tagata o le faatuatua, o lē na faia le amiotonu; ma a’o avea ma se tamaitiiti sa ia mata’u i le Atua, ma taofi gutu o leona, ma tapeina le saua o le afi” (Faaliliuga a Iosefa Samita, Kenese 14:26 [i le faaopoopoga o le Tusi Paia]). I le avea ai ma tupu o Salema, sa ia “faatu le filemu i le laueleele i ona aso; o lea na taua ai o ia o le aloalii o le filemu” (Alema 13:18). Sa totogi atu i ai e le perofeta o Aperaamo ia sefuluai (tagai i le Alema 13:15).
A uma ona taumafai ni nai tagata aoga e mate le igoa o lenei perofeta, tusi Mekisateko i luga o le laupapa. Fai i tagata aoga e suesue filemu i le Mataupu Faavae ma Feagaiga 107:1-4, ma vaavaai mo mea o loo aoao mai e nei fuaiupu e uiga ia Mekisateko.
-
O le a le igoa na ta’u ai le Perisitua Mekisateko a o lei oo i aso o Mekisateko? Aisea ua ta‘ua ai i le taimi lenei o le Perisitua Mekisateko?
Tusi le mataupu faavae lenei i luga o le laupapa: O le Perisitua Mekisateko ua tusa ma le faatulagaga a le Alo o le Atua. Atonu e te manao e fautuaina tagata aoga e faailoga le fuaitau lenei i le fuaiupu e 3.
-
O le a le mea o loo fautua mai e lenei mataupu faavae i le auala e tatau ai i e umia le perisitua ona faataunuu o latou tiutetauave?
I le avea o se vaega o lenei talanoaga, valaaulia se tagata aoga e faitau leotele le saunoaga lenei a Peresitene Boyd K. Packer o le Korama a Aposetolo e Toasefululua:
“A faatinoina ma le tatau le pule o le perisitua, ua faia e i latou e umia le perisitua le mea na semanu e faia e Ia [Iesu Keriso] pe ana i ai o Ia iinei” (“O Le Mana o le Perisitua,” Liahona, Me 2010, 7).
Lisi faalapotopotoga nei a le Ekalesia i luga o le laupapa: Aualofa, Aoga Sa, Alii Talavou, Tamaitai Talavou, ma le Peraimeri. Valaaulia tagata aoga e faitau filemu le Mataupu Faavae ma Feagaiga 107:5, 8-9, ma vaavaai mo upu ma fasifuaitau o loo aoao mai ai pe faapefea ona fesootai nei faalapotopotoga i le Perisitua Mekisateko. Fai atu i tamaiti aoga e lipoti mai mea latou te maua.
-
O le a le mea e ta’u o le faaopoopoga? (O se vaega o le tino, e pei o le lima po o le vae.)
-
E tusa ai ma le fuaiupu e 8, o le a le aia ma le pule o loo umia e le Perisitua Mekisateko? (A o tali mai tagata aoga, atonu e te manao e tusi le upumoni lenei i luga o le laupapa: O le Perisitua Mekisateko ua i ai le aia tatau o le au peresitene, mana, ma le pule i tofiga uma o le Ekalesia, ma le pule e taitai ai i mea faaleagaga. Faamalamalama atu o le “taitai [ga] i mea faaleagaga” e aofia ai le taitaiina o faamanuiaga, sauniga ma feagaiga.)
Faamalamalama atu faapea, o le au peresitene o loo ta’ua i le fuaiupu e 9 o le Au Peresitene Sili. Valaaulia se tagata aoga e faitau leotele le Mataupu Faavae ma Feagaiga 107:10, ma fai atu i le vasega e vaavaai po o ai isi tagata ua i ai le aiā tatau e galulue ai i lalo o le taitaiga a le Au Peresitene Sili. A o lipoti mai e tagata aoga mea ua latou iloa, fesoasoani ia latou malamalama o au peresitene o siteki ma au epikopo, o faataitaiga o faitaulaga sili e galulue i o latou lava tulaga i lalo o le taitaiga a le Au Peresitene Sili.
Faasino atu i igoa o faalapotopotoga na e tusia i luga o le laupapa. Ina ia fesoasoani i tagata aoga ia malamalama i le sootaga i le va o nei faalapotopotoga ma taitai perisitua o le siteki ma uarota, valaaulia se tagata aoga e faitau leotele le saunoaga lenei a Peresitene Iosefa F. Samita:
“E leai se pulega i le Ekalesia a Iesu Keriso e ese mai, pe o i luga po o i fafo o le Perisitua paia po o lana pule. … [O faalapotopotoga a ausilali] e le i fafo atu, pe i luga ae, pe e mamao atu e le mafai ona au atu i ai. Latou te iloa le mataupu o le Perisitua. Po o fea lava e i ai i latou, ua latou i ai ma le manatu o le faataunuuina o se lelei; o le faaolataga o nisi o agaga, faaletino ma le faaleagaga“ (Aoaoga a Peresitene o le Ekalesia: Iosefa F. Samita [1998], 351-52).
Valaaulia tagata aoga e sailiili filemu i le Mataupu Faavae ma Feagaiga 107:18–19 e iloa ai po o le a le pule faaopoopo e umia e le Perisitua Mekisateko.
-
E tusa ai ma le fuaiupu e 18, o le a le pule e umia e le Perisitua Mekisateko? (Tusi le upumoni lenei i luga o le laupapa a’o faailoa mai e tagata aoga: O le Perisitua Mekisateko e umia ki o faamanuiaga faaleagaga uma o le Ekalesia.)
Ina ia fesoasoani i tagata aoga ia malamalama i lenei upumoni, valaaulia se tagata aoga e faitau leotele le saunoaga lenei a le Perofeta o Iosefa Samita. Fai atu i le vasega e faalogologo mo faamanuiaga faaleagaga e oo mai e ala i le Perisitua Mekisateko.
“[O le Perisitua Mekisateko] o le auala lea e faaali mai ai le poto uma, aoaoga faavae, le ata o le faaolataga, ma mataupu taua uma mai le lagi” (i le History of the Church, 4:207).
-
O faamanuiaga faaleagaga o loo faamatalaina i le fuaiupu e 19 e tulaga ese ia te oe? Aisea?
Fesoasoani i tagata aoga ia malamalama, o i latou o e umia le Perisitua Mekisateko e tatau ona faaaogaina e fesoasoani ai i isi tagata e maua faamanuiaga, e pei o le meaalofa o le Agaga Paia ma faamanuiaga o le malumalu.
-
O a nisi o faamanuiaga ua e maua e ala i le Perisitua Mekisateko?
Faamalamalama atu na faamatala mai e le Alii upumoni faaalia e uiga i le pule o le Perisitua Arona. Valaaulia ni tagata aoga se toatolu e auauai i le faitauina leotele o le Mataupu Faavae ma Feagaiga 107:13–14, 20. Fai atu i le vasega e mulimuli i le faitauga ma faailoa mai le pule o loo umia e le Perisitua Arona.
-
O le a le pule e umia e le Perisitua Arona? (E tatau ona faailoa mai e tagata aoga le aoaoga faavae lenei: O le Perisitua Arona e umia ki o le auaunaga a agelu ma le faataunuuina o sauniga faaletino.)
-
O a sauniga o loo ta‘ua i le fuaiupu e 20? O a isi sauniga faaletino e faataunuuina e ala i le pule o le Perisitua Arona? (O le faamanatuga.)
-
O a nisi o faamanuiaga ua e maua e ala i le Perisitua Arona?
Tusi upu nei e fai ma ulutala i luga o le laupapa:
Tofi o le Perisitua Mekisateko Tofi o le Perisitua Arona
A o lei amataina le vasega, tusi tofi nei o le perisitua i luga o ni fasipepa eseese: tiakono, aoao, ositaulaga, epikopo, toeaina, faitaulaga sili, peteriaka, Fitugafulu, Aposetolo. Tuu pepa i totonu o se koneteina i soo se faasologa lava.
I le taimi lenei o le lesona, vaevae pepa i ni nai tagata aoga. Valaaulia tagata aoga e o mai i le laupapa ma tuu ia tofi taitasi i lalo o le ulutala sao.
Atonu e faapea mai nisi o tagata aoga o le tofi o le epikopo o se tofiga o le Perisitua Mekisateko. Afai latou te fai mai ai, valaaulia se tasi o i latou e faitau leotele le Mataupu Faavae ma Feagaiga 107:13, 15. Fai atu i tagata aoga e faaaoga nei fuaiupu e filifili ai po o fea e tatau ona latou tuua ai le tofi o le epikopo i luga o le laupapa. Faamalamalama atu faapea, o le tofi o le epikopo o se tofiga i le Perisitua Arona. O se epikopo o le peresitene o le Perisitua Arona ma o le faitaulaga sili pulefaamalumalu i lana uarota. (Ia matau, o le valaauga o le fanau moni o Arona, e pei ona ta‘ua i fuaiupu e 16-17, o loo talanoaina i le Mataupu Faavae ma Feagaiga 68:15–21 ma le lesona 74.)
Ia mautinoa ua faatulagaina sao ia tofi i luga o le laupapa. (O tofi i le Perisitua Mekisateko o le toeaina, faitaulaga sili, peteriaka, Fitugafulu, ma le Aposetolo. O tofi o le Perisitua Arona o le tiakono, aoao, ositaulaga, ma le epikopo.) Faamalamalama atu o nei lisi o le a saunia ai tagata aoga mo isi lesona e lua e sosoo ai, lea o le a latou aoao atili ai e uiga i tofi o le perisitua.
Faaiu i le valaauliaina o tagata aoga e faasoa mai a latou molimau e uiga i mea ua latou aoaoina ma lagonaina i le vasega i le aso.
Tala ma Faamatalaga o Talaaga
Mataupu Faavae ma Feagaiga 107:1. O le a le sootaga i le va o le Perisitua Arona ma le Perisitua Mekisateko?
Sa aoao mai le Perofeta o Iosefa Samita:
“Ae ui lava o loo i ai Perisitua e lua, ae o le Perisitua Mekisateko e aofia ai ma le Perisitua Arona po o le Perisitua faa-Levi, ma e umia le pule sili ona maualuga lea e i ai i le Perisitua, ma o ki o le Malo o le Atua i le tupuaga uma o le lalolagi e oo lava i le tupuaga o loo i ai i le lalolagi, ma o le auala lea o le poto uma, mataupu faavae uma, le ata o le faaolataga ma mataupu taua uma taitasi e faaalia mai le lagi” (Aoaoga a Peresitene o le Ekalesia: Iosefa Samita [2007], 114).
“O perisitua uma lava e faa-Mekisateko; ae peitai o loo i ai ni ona vaega po o tulaga eseese. … O perofeta uma lava na umia le Perisitua Mekisateko” (Aoaoga a Peresitene o le Ekalesia: Iosefa Samita, 116).
Mataupu Faavae ma Feagaiga 107:8–9, 18. Ki o le Perisitua
O ki o le perisitua o le pule lea ua tuuina mai e le Atua i taitai perisitua e faatonu ai, faafoe ai, ma pulea ai le faaaogaina o Lana perisitua i luga o le fogaeleele. O le faaaogaina o le pule o le perisitua e pulea lea e i latou o e umia ona ki (tagai i le MF&F 65:2; 81:2; 124:123). O i latou e umia ki o le perisitua ua i ai le aia tatau e pulefaamalumalu ai ma taitaia le Ekalesia i totonu o se puleaga.
“O Iesu Keriso o loo umia ki uma o le perisitua e faatatau i Lana Ekalesia. Na Ia faaee atu i luga o Ana Aposetolo taitasi ki uma e faatatau i le malo o le Atua i le fogaeleele. O le Aposetolo sinia o loo soifua, o le Peresitene o le Ekalesia, ua na o le pau lea o le tagata i luga o le fogaeleele ua faatagaina e faaaogaina ki uma o le perisitua (tagai i le MF&F 43:1–4; 81:2; 107:64–67, 91–92; 132:7).
“E galulue Fitugafulu e ala i tofiga ma le faamatuu mai o le pule mai le Au Peresitene Sili ma le Korama a Aposetolo e Toasefululua. E tofia Peresitene o Eria e faatautaia ia eria i lalo o le faatagaga a le Au Peresitene Sili ma le Toasefululua. E vaetofia le Au Peresitene o Fitugafulu ma tuuina atu i ai ki e pulefaamalumalu ai i Korama a Fitugafulu.
“E faamatuu atu e le Peresitene o le Ekalesia ia ki o le perisitua i isi taitai perisitua ina ia mafai ai ona latou pulefaamalumalu i o latou eria o tiutetauave. E faaee atu ki o le perisitua i luga o peresitene o malumalu, misiona, siteki, ma itu; epikopo; peresitene o paranesi; ma peresitene o korama. O le pule e pulefaamalumalu ai e taulia mo na o tiutetauave ua tofia i ai ma i totonu o le puleaga o le faataatiaga faafaafanua o le valaauga o taitai taitoatasi. A oo i le taimi e faamalolo ai taitai perisitua mai o latou valaauga, latou te le toe umiaina ki e o faatasi ma na valaauga.
“O fesoasoani i taitai perisitua e le tuuina atu i ai ni ki. E vaetofia i latou ma galulue i o latou valaauga e ala i tofitofiga ma le pule e faamatuu atu i ai.
“O faalapotopotoga uma a ausilali o uarota ma siteki, e faagaoioia i lalo o le taitaiga a le epikopo po o le peresitene o le siteki, o lē o loo umiaina ki e pulefaamalumalu ai. E le tuuina atu i peresitene o ausilali ma o latou fesoasoani ni ki. Latou te maua le pule e faamatuu atu i ai e galulue ai i o latou valaauga” (Tusitaulima 2: Taitaiina o le Ekalesia [2010], 2.1.1).
Mataupu Faavae ma Feagaiga 107:8–12. O le Au Peresitene Sili, o le au peresitene o le Perisitua Mekisateko
“Na aoao mai e le Perofeta o Iosefa Samita e faapea, e faaali mai e le Alii Lona finagalo e ala i le au peresitene o le Perisitua Mekisateko, o lona uiga o le Au Peresitene Sili: ‘O le Perisitua Maualuga o le Mekisateko sa leai lava se isi mea nai lo o le Perisitua o le Alo o le Atua; … o loo i ai ni sauniga faapitoa e a le Perisitua, lea e tafe mai ai taunuuga patino; ma o le Peresitene po o le Au Peresitene e vaaia le Ekalesia; ma faaaliga o le mafaufau ma le finagalo o le Atua i le Ekalesia, e tatau ona ala mai i le Au Peresitene. O le faatulagaga lenei o le lagi, ma le mana ma faamanuiaga o lenei Perisitua’ (i le History of the Church, 2:477) “(Mataupu Faavae ma Feagaiga Tusi Lesona a le Tagata Aoga, 2nd ed. [Church Educational System manual, 2001], 263).
Mataupu Faavae ma Feagaiga 107:18. O le Perisitua Mekisateko e umia “ki o faamanuiaga uma faaleagaga o le ekalesia”
Na aoao mai Peresitene Spencer W. Kimball:
“[O le Perisitua Mekisateko] o le ala lea e galue ai le Alii e ala mai i le tagata ina ia faaolaina agaga. Afai e aunoa ma lenei mana o le perisitua, e se ese tagata. Ua na o lenei lava le mana e mafai ai e tagata ona ‘taofia ki o faamanuiaga faaleagaga uma o le ekalesia,’ ma mafai ai e le tagata ona maua ‘mea lilo a le malo o le lagi ma le faaavanoaina o le lagi’ ia te ia (tagai i le MF&F 107:18–19), e mafai ai e le tagata ona ulufale i le feagaiga fou ma le faavavau o le faaipoipoga ma faamauina ai lana ava ma le fanau ia te ia i se noataga e faavavau, o se mana e mafai ai e le alii ona avea ma peteriaka i lona aiga e faavavau, ma e mafai ai foi ona maua e ia le atoatoa o faamanuiaga a le Alii” (“Faataitaiga a Aperaamo,” Liahona, Tesema 1975, 1; tagai foi i le Doctrine and Covenants Institute Student Manual, 2nd ed. [Church Educational System manual, 2001], 263).
Na molimau mai Elder Jeffrey R. Holland o le Korama a Aposetolo e Toasefululua, e uiga i faamanuiaga faaleagaga e faatatau i le Perisitua Mekisateko:
“Sa ou vaaia le faaali mai o le mana o le Atua i lo’u aiga ma lo’u valaauga. Sa ou vaaia le tuliesea o le tiapolo ma le puleaina o elemene. Ua ou iloa le uiga o le faatoilaloina o ni faafitauli se tele ma le vaeluaina o Sami Ulaula. Ua ou iloa le uiga o le ‘laaloa’ le agelu o le faafanoga ‘ia te i latou’ [MF&F 89:21]. O le mauaina o le pule ma le faaaogaina o le mana o le ‘Perisitua Paia, e tusa ai ma le Faatulagaga a le Alo o le Atua’ [tagai i le MF&F 107:1–3], o se faamanuiaga tele lea mo au ma lo’u aiga e mafai ona ou faamoemoe i ai i lenei lalolagi. O lea la, o le uiga o le perisitua i faaupuga uma lava—e le mafaatusalia, e le uma, e gafataulima ona faamanuia atu pea“ (“O Le Mea ua Sili Ona Tulagaese Ai i Tatou,“ Ensign po o le Liahona, Me 2005, 45).