Lesona 78

Mataupu Faavae ma Feagaiga 76:1–19

Folasaga

I le aso 16 o Fepuari, 1832, sa galulue ai Iosefa Samita ma Sini Rikitone i le faaliliuga musuia o le Tusi Paia (o nisi taimi e taua ai o le Faaliliuga a Iosefa Samita). A o la faaliliuina ma mafaufau loloto i le uiga o le Ioane 5:29, sa faaali mai ia i laua se faaaliga vaaia, lea ua faamaumauina i le Mataupu Faavae ma Feagaiga 76. I le taimi o lenei faaaliga, na faaali mai ai e le Faaola ia Iosefa Samita ma Sini Rikitone se faasologa o faaaliga vaaia manino na faamautuina ai le moni ma le paia o Iesu Keriso, aoao mai e uiga i le toilalo o Satani ma atalii o le malaia, ma faaali mai le natura o malo e tolu o le mamalu ma i latou o e o le a mautofi ai. Na saunoa Peresitene Uilifoti Uitilafi, “Ou te talanoa e uiga i le “Faaaliga” [i le vaega 76] na o ia, o se faaaliga lea ua sili atu le malamalama, sili atu upumoni ma sili atu aoaoga faavae ua ia aumaia nai lo se isi lava faaaliga o i ai i se isi lava tusi ua tatou faitauina. Na te faamaninoina mai i lo tatou malamalamaaga e uiga i lo tatou tulaga i le taimi nei, o fea na tatou o mai ai, aisea ua tatou i ai iinei, ao fea foi tatou te agai i ai. E mafai e soo se tagata ona iloa e ala i lena faaaliga, lana vaega ma lona tulaga o le a i ai” (Aoaoga a Peresitene o le Ekalesia: Uilifoti Uitilafi [2004], 120–21).

O leMataupu Faavae ma Feagaiga 76 o le a aoaoina i ni lesona se fa. O le lesona lenei e aofia ai se vaaiga aoao puupuu o le faaaliga vaaia, o faamanuiaga folafolaina a le Alii i e faamaoni, ma faatinoga na taitai atu ai Iosefa Samita ma Sini Rikitone e maua le faaaliga.

Fautuaga mo le Aoaoina Atu

Vaaiga Aoao o le Mataupu Faavae ma Feagaiga 76

Fai atu i tagata o le vasega e ta‘u mai ni nofoaga latou te fia o i ai i se tafaoga po o aso malolo. (Lisi a latou tali i luga o le laupapa.) Li’o se tasi o nofoaga ua lisiina i luga o le laupapa. Fai i tagata o le vasega e tusi i lalo se faamatalaga o le auala e manaomia ona latou malaga ai ina ia taunuu atu ai i le taunuuga ua filifilia. A uma se minute pe lua, valaaulia ni nai tagata o le vasega e faamatala mai mea na latou tusia. Ona filifili lea o se taunuuga ua lisiina i luga o le laupapa e matuai ese lava mai le taunuuga muamua, ma fai atu fesili nei:

• Afai e te mulimuli i le ala na faamatalaina mo le taunuuga muamua, mata o le a e oo ai i le isi taunuuga lea?

• E faapefea ona aafia le taunuuga e te filifilia i le auala e tatau ona e uia e oo atu ai iina?

Faamalamalama atu faapea, ia Fepuari 1832, na maua ai e le Perofeta o Iosefa Samita ma Sini Rikitone se faaaliga vaaia na faaalia mai ai taunuuga e faavavau e mafai ona maua e tagata. O lenei faaaliga, ua tusia i le Mataupu Faavae ma Feagaiga 76, o loo faamatala ai tikeri e tolu (po o le malo) o le mamalu ma le maualuga o le tuputupu ae faaleagaga o i latou o e o le a mautofi ai. Valaaulia tagata o le vasega e faailoa mai filifiliga e taitai atu ai i le ola e faavavau i le malo selesitila, a o latou suesue i lenei faaaliga i lesona e fa e sosoo ai. E le gata i lea, valaaulia i latou e mafaufau loloto pe o filifiliga o loo latou faia i le taimi nei e taitai atu ai i latou i le taunuuga e faavavau ma o le a aumaia ai ia i latou le fiafia sili.

Ina ia tuuina atu se vaaiga aoao puupuu o le anotusi o le Mataupu Faavae ma Feagaiga 76, tuu atu i tagata o le vasega se kopi o le ata o loo i ai i le lesona. (E mafai ona e faia le kopi ia lava lona laitiiti ia mafai e tagata o le vasega ona sulu i a latou tusitusiga paia ma vaavaai atu i ai a o latou suesueina le vaega e 76.) Faamalamalama atu o le ata o loo faataatia atu ai le mea na vaaia ma aoaoina e Iosefa ma Sini e uiga i le faaaliga vaaia sa la mauaina.

Mataupu Faavae ma Feagaiga 76:1-10

Ua folafola mai e le Alii faamanuiaga ia i latou o e faatuatua ia te Ia

Valaaulia se tagata o le vasega e faitau leotele le Mataupu Faavae ma Feagaiga 76:1–5. Fai atu i le vasega e mulimuli i le faitauga, ma vaavaai mo upu ma fasifuaitau o loo faamatala ai uiga o Iesu Keriso.

• O le fea o uiga o Iesu Keriso ua ta‘ua i nei fuaiupu e taua ia te oe? Aisea?

Tata‘i atu mafaufau o tagata o le vasega i uiga o le Faaola o loo faamatalaina i le Mataupu Faavae ma Feagaiga 76:5.

• E tusa ai ma le fuaiupu e 5, o a mea e tatau ona tatou faia e iloa ai le alofa mutimutivale ma le agalelei o le Alii? (E tatau ona tatou matatau ia te Ia. Faamalamalama atu i le tulaga lea, o le matau o le uiga o le fetalaiga a le Alii ia ava, faaaloalo, ma alofa ia te Ia.)

• O le a le mea e tatau ona tatou faia e maua ai le mamalu o le Alii? O le a sou manatu i le uiga o le auauna atu i le Alii “i le amiotonu ma le upumoni e oo i le iuga”?

Valaaulia tagata o le vasega e faitau filemu le Mataupu Faavae ma Feagaiga 76:6–9 ma vaavaai mo faamanuiaga ua folafola mai e le Alii ia i latou o e ava ma auauna atu ia te Ia.

• E tusa ai ma nei fuaiupu, o a faamanuiaga e oo mai ia i latou o e ava ma auauna atu i le Alii? (Atonu e te manao e faamanatu i tagata o le vasega o le upu mealilo i le fuaiupu e 7 e faatatau i upumoni faaleagaga ia e na o faaaliga e iloa ai.)

Tusi le faamatalaga le uma lenei i luga o le laupapa: Afai tatou te ava i le Alii ma auauna atu ia te Ia e oo i le iuga, o le a Ia faamamaluina i tatou e ala i le …

Valaaulia tagata o le vasega e faauma le mataupu faavae o loo i luga o le laupapa. E tatau ona latou faailoa mai le mea lenei: Afai tatou te ava i le Alii ma auauna atu ia te Ia e oo i le iuga, o le a Ia faamamaluina i tatou e ala i le faailoa mai o upumoni ia i tatou.

Ina ia fesoasoani i tagata o le vasega ia malamalama i le auala e mafai e le Alii ona faaali mai upumoni ia i tatou, uu i luga se matauila (po o se moliuila) ma fesili atu pe o le a lona sootaga i le uunaiga a le Agaga. A uma ona tali mai tagata o le vasega, valaaulia se tagata o le vasega e faitau leotele le Mataupu Faavae ma Feagaiga 76:10. Fai atu i le vasega e mulimuli i le faitauga, ma vaavaai mo se malamalamaaga faaopoopo i le pe faapefea ona fesootai se matauila (po o se moliuila) i uunaiga a le Agaga.

• E faapefea ona faatusa le uunaiga a le Agaga i se pogai o le malamalama, e pei o se matauila? (O tali a tagata o le vasega e mafai ona atagia ai le upumoni lenei: E faamalamalamaina i tatou e le Alii e ala i le Agaga.)

• O le a le uiga o le faamalamalamaina? (O le aumaia o le malamalama po o le vaaiga faaleagaga lea e faateleina ai lo tatou malamalama pe fesoasoani tatou te iloa ai le upumoni.)

• O le a se taimi na faamalamalamaina ai oe e ala i le Agaga? (A uma ona tali mai tagata o le vasega, e mafai ona e faasoa atu sou lava aafiaga.)

Mataupu Faavae ma Feagaiga 76:11-19

Ua faamatala e Iosefa Samita ma Sini Rikitone tulaga na taitai atu ai i le la faaaliga vaaia

Valaaulia se tagata o le vasega e faitau leotele le Mataupu Faavae ma Feagaiga 76:11-14. Fai atu i le vasega e mulimuli i le faitauga, ma vaavaai mo se faataunuuga o folafolaga o loo ta‘ua i le fuaiupu e 5–10.

• O a ni auala na avea ai le aafiaga a Iosefa Samita ma Sini Rikitone o se faataunuuga o folafolaga o loo ta‘ua i le fuaiupu 5–10?

Valaaulia tagata o le vasega e mafaufau i ni taimi na latou faitauina ai tusitusiga paia ae sa le malamalama i mea na latou faitauina.

• O le a se mea na e faia ina ia e malamalama lelei ai i tusitusiga paia?

Faamalamalama atu faapea, o faatinoga a Iosefa Samita ma Sini Rikitone a o le‘i maua lenei faaaliga vaaia, e mafai ona aoao ai i tatou i le auala e mafai ona faaleleia atili ai lo tatou malamalama i tusitusiga paia ma valaaulia ai le Agaga Paia e faailoa mai le moni ia i tatou.

Tofi tagata o le vasega e galulue i ni paga. Valaaulia se tagata se toatasi o le paga e faitau filemu le vaega o le folasaga mo le Mataupu Faavae ma Feagaiga 76. Valaaulia le isi tagata o le paga e faitau filemu le Mataupu Faavae ma Feagaiga 76:15–19. Fai atu i tagata o le vasega e vaavaai mo le mea sa fai e Iosefa Samita ma Sini Rikitone e saunia ai i laua e maua le malamalamaaga e uiga i tusitusiga paia e ala i faaaliga. (Ina ia fesoasoani i tagata o le vasega ia malamalama lelei i le folasaga o le vaega, atonu e tatau ona e faamalamalamaina atu o le upu eseesega o lona uiga o le eseese. Atonu foi e te manao e faamalamalama atu faapea, i aso o Iosefa Samita, o le toatele o tagata na talitonu i le Tusi Paia, sa manatu a uma le Faamasinoga Mulimuli o le a faapea ona auina atu tagata uma a le i le lagi po o seoli.) A ua uma se taimi na faitau ai tagata o le vasega, fai atu ia te i latou e lipoti atu mea na latou maua i a latou paga. Ona fai atu lea i tagata o le vasega ia fesili nei:

• O a mea na faia e Iosefa Samita ma Sini Rikitone na saunia ai i laua e maua lenei faaaliga vaaia? (Sa la suesue ma manatunatu loloto i le Ioane 5:29.)

• O le a le uiga o le manatunatu loloto i tusitusiga paia? (O tali e mafai ona aofia ai le mafaufau loloto po o le mafaufau i mea o loo e faitauina, fai atu fesili e uiga i mea o loo e faitauina, ma faafesootai mea o loo e aoaoina i mea ua uma ona e iloa.)

• O le a le mataupu faavae e mafai ona tatou aoao mai i le faataitaiga a Iosefa Samita ma Sini Rikitone? (E mafai e tagata o le vasega ona fautua mai ni mataupu faavae eseese, ae ia mautinoa e faamamafa atu le mataupu faavae lenei: A o tatou suesue ma le agaga tatalo ma mafaufau loloto i tusitusiga paia, ua tatou saunia i tatou lava e maua le malamalamaaga mai le Alii e ala i le Agaga Paia.)

Ina ia fesoasoani i tagata o le vasega ia malamalama lelei i le auala e suesue ai ma le agaga tatalo ma mafaufau loloto i tusitusiga paia, valaaulia se tagata o le vasega e faitau le saunoaga lenei a Elder D. Todd Christofferson o le Korama a Aposetolo e Toasefululua. Fai atu i le vasega e faalogologo mo faatinoga e o faatasi ma le suesue ma le agaga tatalo ma mafaufau loloto i tusitusiga paia. (Atonu e te manao e tuu atu i tagata o le vasega se kopi o le saunoaga ina ia mafai ona latou mulimuli ai i le faitauga.)

“O lo’u fai atu e ‘suesue,’ o lona uiga, e sili atu nai lo le na ona faitau. … Ou te iloa o nisi taimi tou te faitauina ai ni nai fuaiupu, ona mafaufau lea i ai, ma toe faitau ma le faaeteete na lava fuaiupu, ma a o outou mafaufau pe o le a le uiga, tou te tatalo mo se malamalama, tuufesilisili i lou mafaufau, ma faatalitali mo ni lagona faaleagaga, ma tusitusi i lalo lagona ma malamalamaaga e oo mai ina ia mafai ai ona outou manatua ma aoao atili ai. O le suesue faapea, atonu e le tele ni mataupu po o ni fuaiupu tou te faitauina i se afa itula, ae peitai o le a e tuua ai se vaega i lou loto mo le upu a le Atua, ma o le a fetalai atu o Ia ia te oe” (Pe a Liua Mai Oe,” Ensign po o le Liahona, Me 2004, 11).

• O a ni faatinoga na faafesootai e Elder Christofferson i le suesue ma le agaga tatalo ma le mafaufau loloto i tusitusiga paia?

• E faaopoopo atu i le fautuaga a Elder Christofferson, o le a se isi mea ua e faia e suesue ai ma le agaga tatalo ma mafaufau loloto ai i tusitusiga paia? (Lisi tali a tagata o le vasega i luga o le laupapa.)

• O le a se mea na oo ia te oe o se taunuuga o le suesue ma le agaga tatalo ma le mafaufau loloto i tusitusiga paia?

Uunaia tagata o le vasega e faaaoga faatinoga na talanoaina nei i a latou suesuega patino o tusitusiga paia. Mafaufau e faasoa atu lau molimau e uiga i le suesue ma le agaga tatalo ma le mafaufau loloto i tusitusiga paia.

Fesoasoani i tagata o le vasega e faaaoga aoaoga faavae ma mataupu faavae

A o faaaoga e tagata o le vasega ia mataupu faavae ua latou aoaoina mai tusitusiga paia, o le a tuputupu ae o latou malamalamaaga ma molimau e uiga i na upumoni. Tuu atu i tagata o le vasega se taimi i le vasega e mafaufau loloto ai i mea na latou aoaoina ma mafaufau i ni auala e mafai ona latou faatino ai mea ua latou aoaoina. Uunaia i latou e galulue i uunaiga latou te maua mai le Agaga Paia a o latou mafaufau loloto.

Tala ma Faamatalaga o Talaaga

Vaaiga aoao o le Mataupu Faavae ma Feagaiga 76. Filifili le ala sa‘o mo le taunuuga sa manao i ai

O le tala lenei, na toe faamatalaina e Elder Sterling W. Sill o le Fitugafulu, ua faaalia ai le taua o le filifilia o le ala o le a taitai atu ai i tatou i le taunuuga e faavavau e aupito sili ona tatou manaomia:

“Atonu tatou te aoao mai ni lesona taua se tele mai le tala na faamatalaina i le tele o tausaga ua mavae e Dr. Harry Emerson Fosdick na faaautuina ‘On the Wrong Bus.’ O loo ta’u mai ai e uiga i se alii [i le Iunaite Setete] sa oso i luga o se pasi ma le faamoemoe ma le manao e alu i Detroit. Ae ina ua ia taunuu i le faaiuga o se malaga umi, sa iloa ai ua i ai o ia i le Aai o Kansas. I le taimi muamua sa le talitonu i ai. Ina ua ia fesili atu mo [le auala agai] Woodward Avenue ma sa ta’u mai ia te ia e leai se Woodward Avenue, sa le fiafia o ia—sa ia iloa sa i ai. Sa fai si umi o le taimi ona faatoa manao ai lea e faafesagai ma le mea moni e faapea, e ui lava i ona faamoemoega lelei ma lona naunau faamaoni, ae sa le’i i ai o ia i Detroit, ae o le Aai o Kansas. Sa lelei mea uma vagana ai mo sina faamatalaga laitiiti; na ia pueina le pasi sese.

“Pe e le o se mea malie ea, le toatele o tagata e taunuu atu i se nofoaga i le olaga, lea latou te le’i faamoemoe e o atu i ai. Tatou te filifilia sini o le mamalu ma le manuia ma le fiafia, ma o nisi taimi tatou te tulioso ai i luga o le pasi e aveina atu i tatou i taunuuga e tumu i le le mamalu, toilalo ma mea le lelei. O se faamoemoega autu o lo tatou i ai i le olaga nei, o le sauniuni lea mo le olaga o loo i tua atu. Ma o lo tatou taunuuga na vaevaeina i ni vaevaega tetele se tolu, lea e faatusaina e Paulo i le manaomia o le malamalama o le la, le masina, ma fetu. …

“Ma o lea tatou te toe foi mai ai i lenei manatu maoae o se tasi lea o mea aupito sili ona taua i le lalolagi: muamua, ua tatou iloa le mea tatou te fia o i ai; ma lona lua, ia tatou oso atu i luga o le pasi o le a aveina atu i tatou iina” (“On the Wrong Bus,” New Era, Iulai 1983, 4, 6.)

Mataupu Faavae ma Feagaiga 76:11–12. “E ala i le mana o le Agaga sa tatalaina ai o tatou mata”

Na saunoa mai Iosefa Samita ma Sini Rikitone e faapea, a o la faaliliuina le Ioane 5:29 sa i ai i laua “i le Agaga” (MF&F 76:11) ma “e ala i le mana o le Agaga” (MF&F 76:12) sa tatalaina ai o laua mata. I le tulaga lea, o nei fasifuaitau e faasino i se tulaga le tumau faaletino ma le tulaga faaleagaga na ta’ua o le liua. E tupu le liuaina pe a “suia lē tumau tagata … i foliga ma le natura—o lona uiga, o le siitia i se tulaga faaleagaga maualuga atu—ina ia mafai ona latou onosai le i ai ma le mamalu o tagata faalelagi” (Taiala i Tusitusiga Paia, “Liua,” scriptures.lds.org).

Mataupu Faavae ma Feagaiga 76:19. Suesue ma mafaufau loloto i tusitusiga paia

Na aoao mai Peresitene Henry B. Eyring o le Au Peresitene Sili e uiga i le eseesega o le suesue ma mafaufau loloto, ma e uiga i le va o le mafaufau loloto ma le mauaina o faaaliga:

“O le faitau, suesue, ma le manatunatu loloto e le tutusa. Tatou te faitau i upu ma mafai ona maua ai ni manatu. Tatou te suesue ma maua ai manatu ma sootaga o mau. Ae a tatou manatunatu loloto ua tatou valaaulia faaaliga e ala i le Agaga. Ia te au o le manatunatu loloto o le mafaufau lea ma le tatalo ou te faia pe a uma ona ou faitau ma suesue ma le faaeteete i tusitusiga paia” (“Auauna atu ma le Agaga,” Ensign po o le Liahona, Nov. 2010, 60).

Na aoao mai Elder Marvin J. Ashton o le Korama a Aposetolo e Toasefululua:

“O le mafaufau, e tuu atu ai e i tatou i le agaga le avanoa e faagaeetia ai ma taitai” (“E Tele Meaalofa,” Liahona, Ian. 1988, 19).

Mataupu Faavae ma Feagaiga 76. “O Le Faaaliga Vaaia”

I lalo o le taitaiga a Iosefa Samita, sa tusia ai se lomiga faatusisolo o le Mataupu Faavae ma Feagaiga 76, lea e masani ona ta‘ua “O Le Faaaliga Vaaia.” Sa lomia le solo i le aso 1 Fepuari, 1843, i le Times and Seasons, o se nusipepa a le Ekalesia sa lomia i Navu, Ilinoi, mai ia Novema 1839 ia Fepuari 1846 (tagai i le Times and Seasons, 1 Fep., 1843, 82–85). O le siata o loo i lalo o loo faaalia ai ni vaega o le Mataupu Faavae ma Feagaiga 76, o ni laina e faatatau i ai mai le solo, ma malamalamaaga e mafai ona tatou maua mai i ia tusiga e lua.

Mataupu Faavae ma Feagaiga 76	Fatuga Faatusisolo	Malamalamaaga
Fuaiupu e 24 “E mai ia te ia, ma o ia, ma ui mai ia te ia, na foafoaina ai lalolagi uma, ma o e ua nonofo ai o atalii ma afafine fanauina mo le Atua.”	Laina 19–20 “19. Na ou faalogoina le siufofoga, o molimau mai le lagi, O Ia o le Faaola, ma le toatasi na Fanaua o le Atua— E mai ia te ia, ma o ia, ma ui mai ia te ia, na foafoaina ai lalolagi uma, E oo lava i felavesaiga i le atulaulau, “20. O e foi o nonofo ai, mai le muamua e oo i le mulimuli, Ua faaolaina e lo tatou nei Faaola; O i latou foi o afafine ma ni atalii na fanaua e le Atua, Mai nei lava upumoni ma le mana e tasi.”	O Iesu Keriso o le Faaola e le gata mo tagata o lo tatou laloagi, ae mo tagata foi o lalolagi uma na faia e Ia.
Fuaiupu 72–73 “Faauta, o i latou ia o e na oti e aunoa ma le tulafono; “Ma o i latou foi o e o agaga o tagata sa taofia i le falepuipui, o e na asia e le Alo, ma talai atu le talalelei ia te i latou, ina ia mafai ona faamasinoina i latou e tusa ma tagata i la le tino;	Laina 54-55 “54. Faauta, o i latou ia o e na oti e aunoa ma le tulafono O tagata faapaupau o vaitausaga e lei maua le faamoemoe, Ma o i latou o le itulagi ma le ata o le oti, O agaga i le falepuipui, ua aumai i luga e le malamalama. “55. I agaga i le falepuipui lea na tala’i atu i ai le Faaola, Ma aoao i latou i le talalelei, ma malosiaga fou; Ona papatiso lea o e ola mo o latou tagata oti, Ina ia faamasinoina e pei o tagata i la le tino. ”	E le pei o Alavini Samita, o le semanu na te taliaina le talalelei pe ana ia maua le avanoa e maua ai a’o le’i maliu (tagai i le MF&F 137), o loo i ai le toatele o e semanu e teenaina le talalelei pe ana latou mauaina i le olaga nei. Ae ona o le alofa mutimutivale tele o le Atua, o le a maua ai e nei tagata le avanoa e faalogo ma talia le talalelei i le falepuipui o agaga ma ia faamasinoina e pei sa latou i ai i la le tino.
Fuaiupu 74-77 “O e sa lē taliaina le molimau ia Iesu i la le tino, ae mulimuli ane taliaina. “O i latou ia o tagata mamalu o le lalolagi, o e na faatauasoina i le faitogafiti o tagata. “O i latou ia o e e maua i lona mamalu, ae lē o lona atoatoa. “O i latou ia o e e mauaina luma o le Alo, ae lē o le atoatoa o le Tamā.”	Laina 56-57 “56. O i latou nei o tagata faaaloalogia o le lalolagi; O e na faatauasoina ma faaseseina i togafiti a tagata: Latou te le’i maua muamua le moni o le Faaola; Ae na latou maua, ina ua toe faalogo i ai i le falepuipui. “57. O le le totoa i le upumoni, e le mauaina le pale, Ae e mo i latou le mamalu e faatusa i le masina: O i latou ia e o mai i le afioaga o Keriso, Ae e le o le atoaga o le Atua, i lona nofoalii.”	E toatele tagata faaaloalogia e teena le talalelei i lenei olaga ae mulimuli ane salamo ma talia le talalelei pe a aoao atu ia te i latou i le lalolagi o agaga. O le a latou maua le mamalu terasitila, lea e faatusaina i le malamalama o le masina. O le a mafai ai ona latou faifai mea faatasi ma Iesu Keriso, ae o le a latou le maua le atoatoa o le Atua le Tama.